బంగారం రుణాలు కూడానా? మావల్లకాదు బాబోయ్: ఈటెల
posted on Jun 4, 2014 @ 3:16PM
రైతులు తీసుకున్న పంటరుణాల మాఫీకి ఓకే.. అది కూడా గత సంవత్సరం తీసుకున్న రుణాలను మాత్రమే మాఫీ చేస్తాం.. అందులోనూ లక్ష రూపాయల లోపు రుణాలనే మాఫీ చేస్తామని తెలంగాణ రాష్ట్ర ఆర్థిక మంత్రి ఈటెల రాజేందర్ చెప్పారు. రైతులు బంగారం బ్యాంకుల్లో పెట్టి తీసుకున్న రుణాలను మాత్రం మాఫీ చేయమని ఆయన స్పష్టం చేశారు. 2013-14 ఆర్థిక సంవత్సరానికి పంట రుణాలు మాఫీ చేస్తామని ఆయన తెలిపారు. బంగారు ఆభరణాలపై తీసుకున్న రుణమాఫీపై తాము ఎలాంటి హామీ ఇవ్వలేదని... అవి పంట రుణాల కిందకు రావని ఈటెల రాజేందర్ పేర్కొన్నారు. ఇదిలావుంటే, తెలంగాణ ముఖ్యమంత్రి కేసీఆర్ బుధవారం బ్యాంకర్లతో సమావేశం అయ్యారు. బ్యాంకుల్లో రైతుల రుణాల వివరాలను ఆయన అడిగి తెలుసుకున్నారు. రూ. లక్ష లోపు రుణమాఫీకి సహకరించాలని బ్యాంకర్లను ఈ సందర్భంగా కేసీఆర్ కోరారు. మరో వారంరోజుల్లో మరోసారి భేటీ కావాలని కేసీఆర్ కోరారు.రూ.లక్ష వరకు రుణమాఫీకి నిర్ణయం తీసుకోవటంతో ప్రభుత్వంపై సుమారు రూ. 12 వేల కోట్ల భారం పడే అవకాశం ఉంది.