-ఇండస్ట్రీలో విషాదం
-ప్రముఖ యంగ్ నటి ఉరి వేసుకొని ఆత్మహత్య
-సూసైడ్ కి ముందు  డాన్స్ రీల్ 
-దీంతో మరణంపై కొంత మందిలో అనుమానాలు 
  

చిత్ర పరిశ్రమలో విషాదం చోటుచేసుకుంది. ప్రముఖ యువ నటి నటి సంచిత ఉగాలే(Sanchita Ugale)ముంబైలోని తన నివాసంలో ఉరి వేసుకొని ఆత్మహత్యకి పాల్పడింది. కేవలం 22 సంవత్సరాల చిన్న వయసులోనే ఆమె ఆత్మహత్యకి పాల్పడటం యావత్ పరిశ్రమ, అభిమానులని తీవ్ర దిగ్భ్రాంతికి గురి చేస్తుంది. నిన్న సాయంత్రం 7 గంటల నుంచి 7.30 గంటల మధ్య ముంబై సమీపంలోని నాలాసోపారా ఈస్ట్‌, అచోలే రోడ్డులోని సాయి సంతోషి బిల్డింగ్ నివాసంలో ఈ విషాద ఘటన చోటు చేసుకుంది. ఆ సమయంలో  ఇంట్లో సంచిత  ఒంటరిగా ఉన్నట్లుగా చెప్తున్నారు. 

సంచిత ఉగాలే  మొదట బుల్లితెరపై ఎంతో క్రేజ్ సంపాదించుకుంది. ముఖ్యంగా జీ ఛానల్ లో  ప్రసారమయ్యే సూపర్ హిట్ సీరియల్ 'కుంకుమ్ భాగ్య' లో దియా టాండన్ రోల్ తో  దేశవ్యాప్తంగా గుర్తింపు తెచ్చుకుంది. 'వాగ్లే కీ దునియా' అనే మరో సీరియల్  లో రుచితా జైట్లీగా, దంగల్ టీవీలోని 'దిల్వాలీ దుల్హా లే జాయేగీ' సీరియల్‌లో సుకూన్ అనే క్యారక్టర్ తో  లక్షలాది మంది హృదయాలని గెలుచుకుంది. బుల్లితెరకే పరిమితం కాకుండా, బాలీవుడ్ స్టార్ హీరో విక్కీ కౌశల్ నుంచి వచ్చిన  'ఛావా'లో మహారాణి తారాబాయి రోల్ లో కనిపించింది. రోజుకి లక్ష వరకు రెమ్యునరేషన్ కింద  తీసుకునే సంచిత ఆత్మహత్య లాంటి కఠిన నిర్ణయం తీసుకోవడంపై ఎవరికీ అర్థం కావడం లేదు.

Also read: Ntr: కొరటాలని రౌండ్ అప్ చేసిన ఎన్టీఆర్ ఫ్యాన్స్.. ట్వీట్ సైతం వైరల్ 

అన్నింటికంటే ముఖ్యంగా అభిమానులని, కుటుంబ సభ్యులని  కలచివేస్తున్న విషయం ఏమిటంటే, ఆమె చనిపోవడానికి కేవలం కొన్ని గంటల ముందే సోషల్ మీడియాలో ఎంతో యాక్టివ్‌గా ఉన్నారు. ఇన్‌స్టాగ్రామ్‌లో 'డఫ్లీవాలే డఫ్లీ బజా' అనే సాంగ్ కి ఆకర్షించే  చిరునవ్వుతో డ్యాన్స్ చేస్తూ ఒక రీల్‌ని పోస్ట్ చేశారు. ఆ వీడియో చూసిన కొన్ని గంటల్లోనే ఆమె ఇక లేరనే వార్త రావడంతో ఎవరూ నమ్మలేకపోతున్నారు. ఆమె ముఖంలో కనిపించే   ప్రశాంతమైన చిరునవ్వు వెనుక అంతటి  బాధ దాగుందా అని నెటిజన్లు ఆవేదన వ్యక్తం చేస్తున్నారు. కూతురు గది తలుపులు లాక్ చేసి ఉండటాన్ని గమనించిన తండ్రి మచింద్ర ఉగాలే, ఇతర కుటుంబ సభ్యులు తలుపులు బద్దలు కొట్టి చూడగా ఈ ఘోరం వెలుగుచూసింది. వెంటనే ఆమెని హాస్పిటల్ కి తరలించగా, అప్పటికే ఆమె మరణించినట్లు వైద్యులు ప్రకటించారు. పోలీసులు BNSS సెక్షన్ 194 ప్రకారం ప్రమాద వశాత్తు మరణంగా కేసు నమోదు చేసుకుని దర్యాప్తు ప్రారంభించారు.