Andhra Pradesh Analytical News | Political Analysis

ఏపీ స్థానిక సమరం: జగన్ సుద్దపూస కబుర్లు.. వినేవారెవరు.?

మునిసిపల్ ఎన్నికల నామినేషన్ల పర్వం గురించి గవర్నర్‌ను కలిసిన జగన్మోహన్ రెడ్డి, మీడియా ముందు వెళ్ళబుచ్చిన ఆవేదనలో ప్రత్యేకత ఉన్నది. అరాచకాలకు సంబంధించిన వివరణలో ఆయన వర్ణన బాగుంటుంది. అది వివేకానందరెడ్డికి తగిలిన గొడ్డలి దెబ్బల గురించి అయినా, వైసీపీ ప్రభుత్వ హయాంలో స్థానిక సంస్థల ఎన్నికలు జరిగిన విధానం గురించి అయినా.. ప్రస్తుతం జరగబోతున్న ఎన్నికలలో కూటమి ప్రభుత్వం అరాచకాలను చేస్తుందేమో అనే ఊహతోనే ఆయన స్పష్టంగా పిన్ టు పిన్ వర్ణిస్తారు. ఈ విషయంలో జగన్మోహన్ రెడ్డి ఇప్పుడున్న అనేకమంది రాజకీయ నాయకుల కంటే తెలివితేటలలో ఆరితేరారు. వైసిపికి స్థానిక సంస్థల ఎన్నికలలో గెలిచే అవకాశం ఇసుమంతైనా కనిపించటం లేదు. వాస్తవంగా చెప్పాలంటే అభ్యర్థులు కూడా దొరకని పరిస్థితి. తన హయాంలో తనకు అండగా నిలిచిన సహచరులు అరెస్ట్ అవుతున్నారు. కొత్త కేసులు ఎప్పుడు వచ్చి తన తలుపు తడతాయో తెలియని పరిస్థితి. పాత కేసులు రోజువారీ విచారణకు రానున్నాయి. వీటన్నిటి మధ్య ఎన్నికల సంరంభం. కార్పొరేషన్ మేయర్లను, మునిసిపల్ చైర్మన్లను ప్రత్యక్ష ఎన్నిక విధానంలో ఎన్నుకునే పద్ధతిని తీసుకువచ్చి చంద్రబాబు నాయుడు వ్యూహాత్మకంగా జగన్మోహన్ రెడ్డిని దెబ్బకొట్టారు. మేయర్, మునిసిపల్ చైర్మన్లను గతంలో మాదిరిగా కౌన్సిలర్లు, కార్పొరేటర్లు ఎన్నుకునే విధానమే ఉంటే.. పోటీ చేయటానికి అభ్యర్థులను వెతుక్కునే పరిస్థితి ఉండేది కాదు. కౌన్సిలర్లు, కార్పొరేటర్లకు ఒక ఆశ ఉండేది. తాము గెలిస్తే మేయర్ పదవి కోసం పార్టీల అధిష్టానాన్ని ఒప్పించుకోవచ్చు. ఇప్పుడు ఆ ఆశ లేదు. గతంలో వారు తమ ఎన్నికకు అయ్యే ఖర్చు ఒక్కటి పెట్టుకుంటే సరిపోయేది. ఇప్పుడు మేయర్ అభ్యర్థికి మిగిలిన సభ్యులతో పని లేదు. మేయర్ అభ్యర్థి తనను తాను గెలిపించుకుంటే సరిపోతుంది. అధికార పార్టీ కౌన్సిలర్లు, కార్పొరేటర్లకు ప్రభుత్వంలో పనులు జరిగే అవకాశం ఉంటుంది కాబట్టి వాళ్లకు అభ్యర్థుల కొరత కనిపించదు. అదే అధికారంలో లేని పార్టీ వారు అయితే చేయగలిగేది ఏమీ ఉండదు అనే నిర్లిప్తతతో పోటీ చేయటానికి వైసీపీ వైపుఎవరూ మొగ్గు చూపడం లేదు. ఆంధ్రప్రదేశ్ మునిసిపల్ ఎన్నికల పోరులో అధికార పక్షానిదీ, వైసీపీదీ ఒకటే దారి. వైసీపీని నామినేషన్లు వేయకుండా చూడాలని అధికార పార్టీ ఆలోచన. 2021 లో జరిగిన స్థానిక పోరులో నామినేషన్లు వేయలేని పరిస్థితుల్లో తెలుగుదేశం పార్టీ ఎన్నికలనే బహిష్కరించింది అనటమే సబబు. ఆ రోజు కుప్పంలో కూడా నామినేషన్ వేయనీయని పరిస్థితి. జగన్మోహన్ రెడ్డి రాజకీయాలను ప్రజల పరంగా కాకుండా వ్యక్తిగతంగా తీసుకోవటం వలన కుప్పం టార్గెట్ అయింది. అందుకే తెలుగుదేశం పులివెందులను టార్గెట్ చేసింది. అది తెలుగుదేశం అధినాయకత్వం ఆదేశాల మేరకా.. లేక గతంలో తమను టార్గెట్ చేసిన వైసీపీ మీద అదే జులుం చేయాలని కార్యకర్తల నిర్ణయమా? అంటే కార్యకర్తల నిర్ణయం అనే చెప్పాల్సి ఉంటుంది. అందుకే జగన్ పోటీ చేసి ఓడిపోవటం కంటే, నామినేషన్లు వేయనీయలేదనే నెపంతో తప్పుకోవటం మంచిది అనే ఆలోచన చేసినట్లుగా కనిపిస్తున్నది. వైసీపీ హయాంలో రాష్ట్రంలో ఎక్కడా తెలుగుదేశం అభ్యర్థులు నామినేషన్లు వేయనీయకుండా చేసింది. తెలుగుదేశం ఇప్పుడే కాదు, ఎప్పుడూ కూడా ఇలాంటి అరాచకాలకు పాల్పడలేదు. ఆ పార్టీ అధినేత అందుకు ఇసుమంతైనా అంగీకరించరు. ఆ విషయం ఆయన ప్రత్యర్థులకే కాదు.. తెలుగుదేశం నాయకులు, శ్రేణులకు కూడా తెలుసు. అందుకే గతంలో అంటే వైసీపీ హయాంలో స్థానిక సమరం సమయంలో వైసీపీ ఎక్కడెక్కడ గూండాయిజం చేసిందో.. అక్కడే సత్తా చూపించాలని ఎక్కడికక్కడ తెలుగుదేశం క్యాడర్, లీడర్ ప్రయత్నం చేసినట్లు కనిపిస్తోంది. రాష్ట్రవ్యాప్తంగా జరిగిన స్థానిక నామినేషన్ల పర్వాన్ని గమనిస్తే, వైసీపీ హయాంలో జరిగినంత అరాచకం లేదనడం వాస్తవం. ఒకటి రెండు చోట్ల మరీ ముఖ్యంగా సీమలో వైసీపీ నామినేషన్లను అడ్డుకోవడం జ.రిగిందంటే.. అక్కడ ఆ పరిస్థితిని సృష్టించింది, అటువంటి అరాచకానికి నాంది పలికిందీ వైసీపీయే అని పరిశీలకులు విశ్లేషిస్తున్నారు. పుంగనూరులో మిథున్ రెడ్డి తన వాహనంతో మొదలుపెట్టిన అరాచకం, రాయలసీమ నుండి ఉమ్మడి గుంటూరు జిల్లా వరకు ఒక హింసాత్మక వాతావరణాన్ని సృష్టించింది. అందుకే టీడీపీ శ్రేణులూ తిరగబడ్డాయి. దీంతో వైసీపీ అభ్యర్థులు నామినేషన్లు వేయలేని పరిస్థితులు కొన్ని చోట్ల నెలకొన్నాయి. అయినా అరాచకం, హింస విషయాలలో వైసీపీయులదే పై చేయి అయ్యింది. అయినా కూడా.. జగన్ పోలీసులు లక్షయంగా రెచ్చిపోయారు. ప్రెస్ మీట్‌లో కర్నూలు డీఐజీ కోయ ప్రవీణ్ పేరు ప్రస్తావించి మరీ వార్నింగ్ ఇచ్చారు. ఆయనను తెలుగుదేశం కార్యకర్తగా అభివర్ణించారు. ఇక పోతే తెలుగుదేశం నాయకుడు బీటెక్ రవి కడప జిల్లాలో తొలి సారిగా ఫెయిర్ ఎలక్షన్ జరుగుతోందని చేసిన వ్యాఖ్యలు.. అక్కడి పరిస్థితికి అద్దం పట్టింది. గతంలో పులివెందులలో వేరే వాళ్లు నామినేషన్లు వేయగలిగే పరిస్థితి ఉండేది కాదు. కానీ ఇప్పడు వైసీపీ అభ్యర్థులు నామినేషన్లు వేయగలిగారు. అందుకే బీటెక్ రవి పులివెందులలో ఫెయిర్ ఎలక్షన్ అన్నారు. పుంగనూరు పుడింగి పెద్దిరెడ్డి రామచంద్రారెడ్డి దూకుడు ప్రదర్శించి హడావుడి చేసినా వెనక్కు తగ్గక తప్పలేదు. మొత్తంగా స్థానిక సమరంలో వైసీపీ అరాచకాలను, హింసను, దౌర్జన్యాలనూ అడ్డుకోవడానికి తెలుగుదేశం శ్రేణులు ఒకింత దూకుడుగానే వ్యవహరించాయి. అవసరమైతే తామూ తిరగబడగలమని నిరూపించుకునే ప్రయత్నం చేశాయి. అది సహజం కూడా. కానీ వైసీపీ అధినేత, మాజీ ముఖ్యమంత్రి జగన్ కు మాత్రం తత్వం బోధపడి బొమ్మ కనిపించింది. ఎలక్షన్ కమిషన్ గొప్ప వ్యవస్థ అనే విషయం గుర్తుకు వచ్చింది. ఆ వ్యవస్థ తన పరువును కాపాడుకోవాలని హితవు పలికారు. తాను అధికారంలో ఉన్నప్పుడు ఆనాటి రాష్ట్ర ఎన్నికల కమిషనర్ నిమ్మగడ్డ రమేష్ కుమార్ పట్ల తాను వ్యవహరించిన తీరుకు, ఆయన సామాజిక వర్గం ఏమిటో తానే ఊహించుకుని ఆయనపై చేసిన నిరాధార ఆరోపణలకు క్షమాపణలు చెప్పి.. ఇప్పుడా హితవు పలికి ఉంటే ఇంకా బాగుండేది. కానీ జగన్ కదా.. అందుకే ఇప్పుడు కూడా నిమ్మగడ్డ ప్రసాద్ ను నిందించే ప్రయత్నమే చేస్తున్నారు. ఈ మధ్య కాలంలో జగన్మోహన్ రెడ్డి ఎన్నికల కమిషనర్ల నియామక చట్టానికి మద్దతు తెలిపి తాను పెద్ద తప్పు చేశానని పదే పదే చెబుతున్నారు. భారత ఎన్నికల సంఘం కమిషనర్ల నియామకంలో భారత ప్రధాన న్యాయమూర్తి ఉండాలంటున్నారు. పాపం ఆయనకు గతం గుర్తులేదేమో.. ఇదే జగన్ ఆంధ్రప్రదేశ్‌కే చెందిన భారత ప్రధాన న్యాయమూర్తిని ఇరుకున పెట్టేందుకు చేసిన ప్రయత్నాలను ఆయనకు గుర్తు చేయాల్సిన అవసరం ఉంది. . ఇప్పుడు రాష్ట్ర ఎన్నికల కమిషనర్ నియామకంలో రాష్ట్ర హైకోర్టు ప్రధాన న్యాయమూర్తి ఉండాలని మరింత గట్టిగా చెబుతున్నారు. కానీ న్యాయవ్యవస్థ పైన, న్యాయమూర్తుల పైన ఇష్టారాజ్యంగా అసభ్యకరమైన పదజాలంతో తన అనుయాయులు పెట్టిన పోస్టుల వ్యవహారంలో హైకోర్టు నోటీసులు ఇచ్చినా మారని పరిస్థితిని ముందు చక్కదిద్దుకుని, వారిని తీసుకుని వచ్చి న్యాయస్థానానికి అప్పజెబితే అప్పుడు జగన్మోహన్ రెడ్డి వ్యవస్థలను గౌరవిస్తారని, నిజంగానే ఆయనలో మార్పు వచ్చింది అని ఎవరైనా నమ్ముతారు. లేకుంటే తాను అధికారంలో ఉన్నప్పుడు ఏ వ్యవస్థలనైతే అవమానపరిచారో, బాధ్యతాయుతమైనపదవుల్లో ఉన్నవారిని వ్యక్తిగతంగా ఎలా దూషించారో, వారిని వారి బాధ్యతలను నిర్వర్తించకుండా ఎలా అడ్డు పడ్డారో విస్మరించి ఇప్పుడు ఇలా సుద్దపూసను అన్నట్లుగా జగన్ చెబుతున్న సుద్దులను నమ్మడానికి జనం సిద్ధంగా లేరని ఆయనకు చెప్పాల్సిన అవసరం ఉంది. ఏది ఏమైనా ఇక్కడ ఒక్క విషయం చెప్పుకోవాలి. స్థానిక ఎన్నికల నామినేషన్ల పర్వంలో వైసీపీ స్థాయిలో కాకున్నా..చోట్ల తెలుగుదేశం కూడా పరిధి దాటింది. అలా జరగాల్సింది కాదు. ఆ పరిస్థితి తెలుగుదేశం పార్టీకే కాదు, ఆంధ్రప్రదేశ్ కు కూడా మేలు చేయదు. ప్రజాస్వామ్య స్ఫూర్తికి కట్టుబడటంలో తెలుగుదేశం పార్టీకి ఉన్న ప్రతిష్టను, గుర్తింపును ఇటువంటి చర్యలు ఏదో ఒక మేరకు మసకబారుస్తాయి. ఈ విషయంపై చంద్రబాబు దృష్టి పెట్టాల్సిన అవసరం ఉంది. [Jagan Change Stand, AP Local Body Elections, Jagan Mohan Reddy, Chandrababu Naidu, YCP, TDP, Nominations, Violence, Andhra Pradesh Politics]

Published on: Tue Oct 20, 2026 11:54AM

జగన్ మాట నిలుపుకుంటారా? పులివెందుల బరి నుంచి తప్పుకుంటారా.?

ఆంధ్ర ప్రదేశ్ లో స్థానక సమరం వైసీపీని ఇరకాటంలో పడేసింది. స్థానక సమరం విషయంలో చాలా చాలా గట్టిగా నిలబడతామనీ, ఏకగ్రీవాలకు అస్సలు అవకాశం ఇవ్వమనీ చాలా చాలా ధీమాగా ప్రకటించిన వైసీపీ అధినేత జగన్.. ఆ ప్రకటన సందర్భంగా పార్టీ నేతలకు పలు హెచ్చరికలు కూడా జారీ చేశారు. ఆ హెచ్చరికలే ఇప్పుడు అసలాయన వచ్చే ఎన్నికలలో పులివెందుల అసెంబ్లీ బరిలో నిలబడతారా? అలా నిలబడితే.. ఆయన స్వయంగా పార్టీ నేతలకు చేసిన హెచ్చరికలు ఏమవుతాయి అన్న చర్చ ఇప్పుడు ఏపీ పొలిటికల్ సర్కిల్స్ లో జోరుగా సాగుతోంది. ఇంతకీ స్థానిక ఏకగ్రీవాలపై ఆయన చేసిన హెచ్చరికలేంటని ఓ సారి చూస్తే.. స్థానిక ఎన్నికల్లో ఎక్కడైనా సరే ఏకగ్రీవాలు జరిగితే ఆయా నియోజకవర్గాల ఇంచార్జిలకు 2029 అసెంబ్లీ ఎన్నికల్లో పోటీ చేసేందుకు టికెట్ కేటాయించబోనని జగన్ స్పష్టమైన హెచ్చరిక జారీ చేశారు. ప్రస్తుతం రాష్ట్రవ్యాప్తంగా జరుగుతున్న పరిణామాలు ఈ నిబంధనను స్వయంగా ఆయన సొంత నియోజకవర్గంతో పాటు పార్టీ సీనియర్ నేతలకే ఎసరుపెట్టే పరిస్థితులు ఏర్పడ్డాయి. జగన్ సొంత నియోజకవర్గం పులివెందులలోనే పరిస్థితి జగన్ కు మింగుడుపడటం లేదు. పులివెందుల నియోజకవర్గంలోనే సుమారు 16 వార్డులు ఏకగ్రీవమైనట్లు తెలుస్తోంది. పులివెందుల మాత్రమే కాకుండా, రాష్ట్రంలోని పలు ప్రాంతాల్లో వైకాపా అభ్యర్థులు నామినేషన్లు వేయకపోవడం లేదా ఎన్నికలకు దూరంగా ఉండటం గమనార్హం. ప్రకాశం జిల్లా దర్శి మున్సిపాలిటీలో చైర్మన్ పదవితో పాటు ఒక్క వార్డుకు కూడా వైకాపా నామినేషన్ దాఖలు చేయకపోగా, కమలాపురం, మైదుకూరు వంటి ప్రాంతాల్లోనూ ఇదే పరిస్థితి. అనంతపురం జిల్లా తాడిపత్రి, గుత్తి, ఎర్రగుంట, తిరుపతి కార్పొరేషన్, పుంగనూరు వంటి పలు నియోజకవర్గాల్లోనూ పార్టీ అభ్యర్థులు నామినేషన్లు వేయలేదు. రాయచోటి, మైదకూరు మునిసిపల్ చైర్మన్ పదవులు ఏకగ్రీవంగా తెలుగుదేశం ఖాతాలో పడ్డాయి. ఈ నేపథ్యంలో జగన్ హెచ్చరిక మేరకు ఆయన పులివెందుల అసెంబ్లీ టికెట్ కు దూరం కావాలి. అలాగే పుంగనూరు పుడింగి.. పెద్దిరెడ్డి రామచంద్రారెడ్డికి కూడా పార్టీ టికెట్ ఇవ్వకూడదు. ఇదే విషయాన్ని తెలుగుదేశం కూటమి నాయకులు ఎత్తి చూపుతూ జగన్ కు సవాల్ విసురుతున్నారు. సొంత కంచుకోట పులివెందులలోనే ఏకగ్రీవాలను నివారించడంలో విఫలమైన జగన్ పులివెందుల నుంచి ఎలా పోటీ చేస్తారని నిలదీస్తున్నారు. జగన్ తన మాటకు కట్టుబడి పోటీకి దూరంగా ఉండటమే కాకుండా, పెద్దిరెడ్డి తదితరులకు కూడా పార్టీ టికెట్ ఇవ్వకూడదని అంటున్నారు. ఎన్నికల్లో అధికార పార్టీ వేధింపులు, పోలీసుల తీరు వల్లే నామినేషన్లు వేయలేకపోయినట్లు జగన్ చెప్పుకుంటున్నప్పటికీ.. పరిశీలకులు మాత్రం జగన్ హయాంలోలా ఏపీలో ఇప్పుడు ఎక్కడా అంతటి అరాచకత్వం లేదని విశ్లేషిస్తున్నారు. అధికారం కోల్పోయిన తర్వాత కూడా పార్టీ శ్రేణుల్లో నైతికస్థైర్యం నింపడంలో నాయకత్వం విఫలమవుతోందనీ, మరీ ముఖ్యంగా బలమైన నాయకులు ప్రాతినిధ్యం వహించే నియోజకవర్గాల్లో సైతం నామినేషన్ల ప్రక్రియలో వెనకడుగు వేయడం పార్టీ అంతర్గత బలహీనతలను బయటపెడుతోందని విశ్లేషకులు అంటున్నారు. మొత్తంగా చూస్తే, జగన్ జారీ చేసిన నిబంధనే ఇప్పుడు ఆయనకు అతిపెద్ద సవాలుగా మారింది. ఇచ్చిన మాటకు కట్టుబడి చర్యలు తీసుకుంటే సీనియర్ నాయకులు దూరం అవుతారు.. ఒకవేళ వెనక్కి తగ్గితే అధినేత మాటపై విశ్వసనీయత సన్నగిల్లుతుంది. [Ap Local body Elections, unanimous, Jagan Caution,municipal elections, Pulivendula, YSRCP politics, Seniors, Assembly Tickete, Telugu One]

Published on: Mon Oct 19, 2026 11:44AM

స్థానిక ఎన్నికలు: తెలుగుదేశం తొలి జాబితా.. సామాజిక సమతుల్యం, యువత, విద్యావంతులకు పెద్దపీట.!

ఆంధ్రప్రదేశ్‌ స్థానిక సంస్థల ఎన్నికల సమరానికి తెలుగుదేశం పార్టీ సన్నద్ధమౌతోంది. ఇందులో భాగంగా ఈ ఎన్నికలలో పోటీ చేసే అభ్యర్థుల తొలి జాబితాను విడుదల చేసింది. సామాజిక సమతుల్యత, యువతకు పెద్ద పీట, విద్యావంతులకు ప్రాధాన్యత ఇస్తూ వెలువడిన తొలి జాబితాపై పార్టీ వర్గాల్లో హర్షాతిరేకాలు వ్యక్తమౌతున్నాయి. మొత్తం ఏడు మున్సిపల్ కార్పొరేషన్లు, 29 మున్సిపాలిటీలకు మేయర్, ఛైర్మన్ అభ్యర్థుల పేర్లను తెలుగుదేశం తొలి జాబితాలో ప్రకటించింది. ఈ జాబితా ద్వారా సామాజిక న్యాయానికి కట్టుబడి ఉన్నట్లు విస్పంష్టంగా చాటింది. విడుదల చేసిన మొత్తం 36 స్థానాల జాబితాను పరిశీలిస్తే, అత్యధికంగా 22 స్థానాలు అంటే దాదాపు 61 శాతం బీసీ, ఎస్సీ, ఎస్టీ, మైనారిటీ వర్గాలకు చెందిన నాయకులకే కేటాయించింది. మరీ ముఖ్యంగా బీసీలకు అత్యధిక ప్రాధాన్యత ఇస్తూ 16 స్థానాలను అంటే రమారమి 44 శాతం సీట్లను కేటాయించింది. అలాగే ప్రకటించిన ఏడు మున్సిపల్ కార్పొరేషన్లలో ఏకంగా ఐదు మేయర్ స్థానాలను బీసీ, ఎస్సీ వర్గాలకే కేటాయించింది. పార్టీ తమ సామాజిక ఆకాంక్షలను ఆచరణలో చూపించింది. ఇక ఆళ్లగడ్డ, రాయచోటి పరిధిలో మైనారిటీ వర్గాలకు అవకాశం ఇచ్చింది. ఈసారి అభ్యర్థుల ఎంపికలో విద్యా అర్హతలకు, యువ నాయకత్వానికి తెలుగుదేశం పెద్ద పీట వేసింది. మొత్తం 36 మంది అభ్యర్థుల్లో 25 మంది అంటే సుమారుగా 76 శాతం మంది డిగ్రీ లేదా అంతకంటే ఎక్కువ చదివిన వారే కావడం విశేషం. ఈ 36 మందిలొ ఏడుగురు పీజీ పట్టభద్రులు, ఎంబీఏ, ఎంసీఏ, ఎంఎస్సీ పూర్తి చేసిన అభ్యర్థులతో పాటు ముగ్గురు వైద్యులు కూడా ఉన్నారు. అభ్యర్థుల సగటు వయస్సు 45.7 సంవత్సరాలుగా ఉండగా, 16 మంది 45 ఏళ్లలోపు వారే కావడం యువ రక్టానికి తెలుగుదేశం ఇచ్చిన ప్రాధాన్యతను ఎత్తిచూపుతోంది. రాజంపేట నుంచి పోటీ చేస్తున్న 26 ఏళ్ల డాక్టర్ దంతం గాయత్రి వీరిలో అత్యంత పిన్న వయస్కురాలైన అభ్యర్థిగా నిలిచారు. స్థానిక సంస్థల్లో మహిళా సాధికారతను ప్రోత్సహించే దిశగా టీడీపీ మరో అడుగు ముందుకేసింది. చట్టబద్ధంగా మహిళలకు రిజర్వ్ అయిన 17 స్థానాల పరిధిని దాటి, మరో రెండు జనరల్ స్థానాల్లోనూ మహిళలకే అవకాశం కల్పించింది. సాధారణ కేటగిరీకి చెందిన చిత్తూరు కార్పొరేషన్, బద్వేల్ మున్సిపాలిటీల్లో మహిళా అభ్యర్థులను ఖరారు చేయడం ద్వారా మొత్తం 19 మంది మహిళలకు అంటే 53 శాతం అవకాశం ఇచ్చింది. క్షేత్రస్థాయిలో ప్రజల ఆమోదం, వ్యక్తిగత ప్రతిష్ట, విద్యా అర్హతలు, సామాజిక వర్గాల ప్రాతినిధ్యం ప్రాతిపదికగానే ఈ ఎంపికలు జరిగాయని పార్టీ వర్గాలు వెల్లడించాయి. సుదీర్ఘంగా నిర్వహించిన అంతర్గత సర్వేలు, స్థానిక నాయకత్వ అభిప్రాయాల సేకరణ తర్వాతే తుది జాబితాను రూపొందించినట్లు తెలుస్తోంది. ఈ ఎంపిక ద్వారా ప్రతిపక్షాలకు ఏమాత్రం అవకాశం లేకుండా, బలమైన ప్రత్యామ్నాయాన్ని ప్రజల ముందు ఉంచినట్లైంది. ప్రజాస్వామ్య వ్యవస్థలో స్థానిక సంస్థలు కీలకమైన ప్రజా ప్రతినిధుల తయారీ కేంద్రాలుగా మారుతాయని, అలాంటి చోట విద్యాధికులు, యువకులు మరియు మహిళలకు పెద్దపీట వేయడం వల్ల సద్పరిపాలన సాధ్యమవుతుందని విశ్లేషకులు భావిస్తున్నారు. [TDP local body candidates 1st List, AP Municipal Elections, TDP Social Justice TDP Candidates, BC SC women Youth, Chandrababu Naidu, Telugu One]

Published on: Sat Oct 17, 2026 2:52PM

నాడు తల్లి, నేడు పిన్ని: జగన్ రాజకీయ ప్రయోగాలు.!

ఆంధ్రప్రదేశ్ మాజీ ముఖ్యమంత్రి, వైసీపీ అధినేత వైఎస్ జగన్ కుటుంబ సభ్యులపై చేసే రాజకీయ ప్రయోగాలు వికటిస్తున్నాయా? అంటే పరిశీలకులు ఔననే అంటున్నారు. 2014 ఎన్నికలలో తల్లి విజయమ్మను విశాఖ లోక్ సభ స్థానం నుంచి పోటీకి దింపారు విజయ్. అయితే ఆ ఎన్నికలలో ఆమె దారుణ పరాజయం పాలయ్యారు. ఆ తరువాత పొలిటికల్ గా ఆమె దాదాపు కనుమరుగయ్యారు. ఇక ఇప్పుడు తన అడ్డాగా చెప్పుకునే పులివెందులలో ఆయన మరో ప్రయోగానికి తెరతీశారు. అదేంటంటే.. పులివెందుల మునిసిపల్ చైర్ పర్సన్ గా సొంత పిన్ని ప్రమీలమ్మను నిలబెట్టనున్నారు. ఈ ప్రయోగమైనా సక్సెస్ అవుతుందా? అన్న చర్చ రాజకీయవర్గాలలోనే కాదు, వైసీపీ శ్రేణులలోనూ, చివరాఖరికి వైఎస్ కుటుంబ సభ్యులలోనూ జోరుగా సాగుతోంది. ఒక వైపు దివంగత వైఎస్ వివేకానందరెడ్డి కుటుంబాన్ని దూరం పెడుతూ, మరో వైపు మరో బాబాయ్ వైయస్ మనోహర్ రెడ్డి కుటుంబానికి పెద్ద పీట వేస్తున్న తీరు కుటుంబంలో విభేదాలకు అద్దంపడుతున్నది. జగన్ తన సొంత కంచుకోట పులివెందులలో మున్సిపల్ చైర్‌పర్సన్ స్థానం కోసం పార్టీ తరఫు అభ్యర్థిగా ఎంపిక చేసిన తీరు సర్వత్రా ఆసక్తిని రేకెత్తిస్తోంది. కుటుంబ సభ్యులను కీలక రాజకీయ పదవులకు పోటీకి పెట్టడంపై గత అనుభవాలను బేరీజు వేస్తూ జగన్ వ్యవహార శైలిపై పరిశీలకులు పలు కోణాల్లో విశ్లేషణలు చేస్తున్నారు. గతంలో జరిగిన ఎన్నికల సరళిని పరిశీలిస్తే, వైయస్ జగన్ కొన్ని కీలక సందర్భాల్లో తన కుటుంబ సభ్యులను ప్రత్యక్ష ఎన్నికల బరిలో నిలిపిన సందర్భాలున్నాయి. ముఖ్యంగా 2014 సాధారణ ఎన్నికల సమయంలో విశాఖపట్నం పార్లమెంటు స్థానం నుంచి తన తల్లి వైయస్ విజయమ్మను పార్టీ తరఫున పోటీకి దింపారు. అప్పట్లో వైయస్ విజయమ్మ ఆ ఎన్నికల్లో ఓటమిని చవి చూశారు. తాజాగా పులివెందుల మున్సిపల్ ఎన్నికల్లో మరోసారి కుటుంబ సభ్యురాలికే పెద్దపీట వేస్తున్నారు. పులివెందుల మున్సిపల్ చైర్‌పర్సన్ అభ్యర్థిగా వైయస్ జగన్ తన బాబాయ్ వైయస్ మనోహర్ రెడ్డి సతీమణి ప్రమీలమ్మను బరిలోకి దించుతున్నారు. పులివెందుల నియోజకవర్గం ఎప్పుడూ వైయస్ కుటుంబానికి తిరుగులేని అడ్డాగా ఉంటూ వస్తోంది. ఇక్కడ పార్టీ అభ్యర్థుల గెలుపుపై ఎలాంటి సందేహాలు లేనప్పటికీ, చైర్‌పర్సన్ పదవికి ప్రమీలమ్మను ఎంపిక చేయడం ద్వారా స్థానిక రాజకీయాల్లో కొత్త సమీకరణాలకు తెరలేపారు. పులివెందుల జగన్ కు పెట్టని కోట అయినప్పటికీ.. ఇటీవలి కాలంలో ఆయనకూ, ఆయన పార్టీ అయిన వైసీపీకి కొన్ని ఎదురుదెబ్బలు గట్టిగానే తగిలాయి. 2024 ఎన్నికలలో పులివెందుల అసెంబ్లీ నియోజకవర్గంలో స్వయంగా జగన్ మెజారిటీ భారీగా తగ్గింది. ఆ తరువాత పులివెందుల జడ్పీటీసీ ఎన్నికలలో వైసీపీ అభ్యర్థి కనీసం డిపాజిట్ కూడా దక్కించుకోలేక ఘోర పరాజయం పాలయ్యారు. ఈ నేపథ్యంలో జగన్ ప్రమీలమ్మను పులివెందుల చైర్ పర్సన్ గా బరిలోకి దింపడం సాహస ప్రయోగంగానే పరిశీలకులు అభివర్ణిస్తున్నారు. ఒక వైపు వైఎస్ వివేకా కుటుంబ సభ్యుల వ్యతిరేకత నిస్సందేహంగా పులివెందుల మునిసిపల్ ఎన్నికలపై పడుతుందని అంటున్నారు. ఈ తరుణంలో ప్రమీలమ్మను బరిలోకి దింపడం ద్వారా ఫలితం ఏమైనా తేడాగా వస్తే కంచుకోటలాంటి పులివెందులలో జగన్ బలం, ప్రతిష్ఠ మసకబారడం ఖాయమంటున్నారు. [YS Jagan Mohan Reddy Political experiments, Pulivendula Municipal Elections, YS Pramilamma, YCP Chairperson Candidate, Telugu One]

Published on: Wed Oct 14, 2026 5:04PM

సీఈసీపై విపక్షాల పోరు: జగన్ మౌనం.. వ్యూహాత్మకమా, కేంద్రానికి మోకరిల్లడమా.?

2024 సార్వత్రిక ఎన్నికల ఫలితాలు వెలువడిన నాటి నుంచి కేంద్ర ఎన్నికల సంఘం తీరుపై, ఈవీఎంల విశ్వసనీయతపై తీవ్ర స్థాయిలో ధ్వజమెత్తిన వైసీపీ అధినేత, మాజీ ముఖ్యమంత్రి జగన్ ప్రస్తుతం వ్యూహాత్మక మౌనం వహిస్తుండడం రాజకీయ వర్గాలను విస్మయపరుస్తోంది. ఒకవైపు కేంద్ర ఎన్నికల ప్రధాన కమిషనర్ జ్ఞానేష్ కుమార్ రాజీనామా చేయాలని డిమాండ్ చేస్తూ ప్రతిపక్షాలు ఆందోళనలు చేస్తుంటే.. వైసీపీ, ఆ పార్టీ అధినేత జగన్ మాత్రం ఈ ఆందోళనలకు దూరంగా ఉంటున్నారు. ఎన్నికల కమిషన్, ఎన్డీఏ ప్రభుత్వంపై రాహుల్ గాంధీ, అరవింద్ కేజ్రీవాల్, మమతా బెనర్జీ వంటి కీలక ప్రతిపక్ష నేతలందరూ నేరుగా వీధుల్లోకి వచ్చి నిరసనలు తెలుపుతూ ఒత్తిడి పెంచుతున్నారు. అయితే.. 2024 ఎన్నికల తరువాత ఎన్నికల సంఘంపైనా, ఈవీఎంల విశ్వసనీయతపైనా గళమెత్తిన జగన్ ప్రస్తుతం సీరియస్ గా జరుగుతున్న ప్రతిపక్షాల ఆందోళనలకు దూరంగా ఉండటం పట్ల పరిశీలకులు విస్మయం వ్యక్తం చేస్తున్నారు. అంతే కాకుండా జగన్ వైఖరి పట్ల సొంత పార్టీలోనే తీవ్ర అసంతప్తి వ్యక్తం అవుతున్నాది. జాతీయ స్థాయిలో సీఈసీకి వ్యతిరేకంగా ఉవ్వెత్తున సాగుతున్న ఉద్యమంలో భాగస్వామ్యం కాకపోవడం సరికాదన్న అభిప్రాయం సొంత పార్టీలోనే గట్టిగా వ్యక్తమౌతుండటంతో ఇక తప్పదన్నట్లు తూతూ మంత్రంగా వైసీపీ సోషల్ మీడియా వేదికగా ఓ పోస్టు షేర్ చేసి చేతులు దులిపేసుకుంది. ప్రధాన ఎన్నికల కమిషనర్ తో పాటు పాటు మొత్తం వ్యవస్థకు సంబంధించి వైసీపీ తన అధికారిక సోషల్ మీడియా హ్యాండిల్‌లో తొమ్మిది ప్రశ్నలు సంధించింది. అయితే ఎక్కడా ఎవరి పేరునూ, రాజ్యాంగ వ్యవస్థ పేరునూ ప్రస్తావించలేదు. ఈ మొత్తం వివాదంలో ఓటు చోరీపై కానీ, సర్ అవకతవకలపై కానీ వైసీపీ ప్రశ్నించలేదు. కేవలం 2024 ఎన్నికలలో పోలింగ్ రాత్రి 11:45 గంటల వరకు ఎలా కొనసాగింది? సాయంత్రం 6 గంటల తర్వాత పోలింగ్ శాతం ఊహించని రీతిలో ఎలా పెరిగింది? అంటూ సందేహాలు వ్యక్తం చేయడానికే పరిమితమైంది. అలాగే ఫారమ్ 20 విడుదల చేయడంలో జరిగిన జాప్యాన్ని కూడా ప్రశ్నించినప్పటికీ, ఈ ప్రశ్నలన్నింటికి నిర్దిష్టమైన కాలపరిమితిని జోడించకుండా కేవలం సాధారణ ప్రశ్నలుగా మాత్రమే వైసీపీ సోషల్ మీడియా పోస్టు చేసింది. వాస్తవానికి దేశవ్యాప్తంగా ఉన్న ప్రతిపక్ష నేతలంతా ఒక్కటై కేంద్రానికి వ్యతిరేకంగా వీధిపోరాటాలు చేస్తుంటే, జగన్ మాత్రం ప్రజాక్షేత్రంలోకి రాకపోవడం, అలాగే వైసీపీ నిరసనను సోషల్ మీడియాలో ఒకే ఒక్క పోస్టుతో సరిపెట్టడం గమనార్హం. ప్రతిపక్షంలో ఉన్నప్పటికీ ఎన్డీఏ ప్రభుత్వంతో ఘర్షణ వైఖరి తగదని భావిస్తున్నారో లేక మరేదైనా కారణం ఉందో కానీ, జగన్ మోహన్ రెడ్డి కేంద్రానికి లోపాయికారీగా సరెండర్ అయ్యారన్న విమర్శలకు ఈ పరిణామం బలం చేకూరుస్తోందని పరిశీలకులు విశ్లేషిస్తున్నారు. [Reason Behind JaganSilence On Opposition Protests, Election Commission CEC, Strategic, Surrender, Center, Modi, Telugu One, Jagan NDA Relations]

Published on: Tue Oct 13, 2026 4:25PM

స్టార్ లింగ్ ఇండియా ఎంట్రీ: మస్క్ ప్రధాని అంబానీ సెటైర్లు.. ఒత్తిడి వ్యూహం ఫలిస్తుందా.?

ఇంటర్నెట్‌ రంగంలో పోటీనా? వ్యాపార ప్రయోజనాల కోసం ఒత్తిడా? లేక ప్రభుత్వ అనుమతుల విషయంలో నిబంధనల ప్రక్రియా? భారత శాటిలైట్ ఇంటర్నెట్ మార్కెట్ విస్తరణ విషయంలో ఇప్పుడు సర్వత్రా తలెత్తుతున్న ప్రశ్నలివే. ప్రపంచ కుబేరుడు, టెస్లా, స్పేస్‌ఎక్స్ అధినేత ఎలాన్ మస్క్.. రిలయన్స్ ఇండస్ట్రీస్ అధినేత ముకేష్ అంబానీని ఉద్దేశించి చేసిన వ్యాఖ్యలు ఈ వివాదం మరింత ముదిరేలా చేశాయి. స్టార్‌లింక్‌కు భారత్‌లో వాణిజ్య సేవలు ప్రారంభించేందుకు ఇంకా తుది అనుమతులు రాకపోవడంపై సహజంగానే తీవ్ర అసంతృప్తి, అసహనంతో ఉన్న ఎలాన్ మస్క్.. సోషల్ మీడియా వేదికగా.. ప్రియమైన ప్రధాని అంబానీ అంటూ షేర్ చేసిన పోస్ట్ పెను సంచలనంగా మారింది. భారతదేశానికి నిజమైన బాస్ అంబానీయే అంటూ.. ఆ విషయాన్ని తాను గుర్తించలేకపోయానని, క్షమించమంటూ ఎలాన్ మస్క్ ఆ పోస్టులో తన వ్యంగ్య వైభవాన్నంతా కుమ్మరించారు. భారత ప్రజలపై గుత్తాధిపత్య ధోరణితో ప్రయోజనాలు పొందాలని అంబానీ కోరుకుంటున్నారని అందుకే స్టార్ లింక్ ఇండియా ఎంట్రీకి అడ్డంకులు ఎదురౌతున్నాయనీ మస్క్ అన్యాపదేశంగా పేర్కొన్నారు. దేశంలోని అనేక ప్రాంతాల్లో ఇప్పటికీ ఇంటర్నెట్ సదుపాయం అందుబాటులో లేదని, దీనివల్ల పిల్లలకు విద్యావకాశాలు, చిన్న వ్యాపారులకు ప్రపంచ మార్కెట్లను చేరుకునే అవకాశాలు పరిమితమవుతున్నాయని ఇండియా విధానాలపై ఆయన విమర్శలు గుప్పించారు. ఇండియా ఇంటర్నెట్ సమస్యలన్నిటికీ స్టార్‌లింక్ సేవలు మాత్రమే పరిష్కారం చూపుతాయంటూ.. స్టార్ లింక్ ను సర్వరోగ నివారిణి జిందా తిలిస్మాత్ గా చెప్పుకున్నారు. అయితే స్టార్ లింగ్ ఇండియా ఎంట్రీకి ముఖేష్ అంబానీ అడ్డుపడుతున్నారనీ, తన పలుకుబడిని ఉపయోగించి.. ఇండియన్ గవర్నమెంట్ నిర్ణయాలను ప్రభావితం చేస్తున్నారన్న ధోరణిలో ఆయన విమర్శలు గుప్పించారు. ఎలాన్ మస్క్‌కు చెందిన స్పేస్‌ఎక్స్ సంస్థ స్టార్‌లింక్ ద్వారా ఉపగ్రహాల ఆధారంగా ఇంటర్నెట్ సేవలను అందిస్తోంది. సాధారణ మొబైల్ నెట్‌వర్క్‌లు లేదా ఫైబర్ కనెక్షన్లు చేరుకోలేని మారుమూల ప్రాంతాలకూ ఇంటర్నెట్ సేవలు అందించడం ఈ సాంకేతికత ప్రత్యేకత. భారత్‌లోనూ ఈ సేవలను ప్రారంభించేందుకు మస్క్ గత కొంత కాలంగా విశ్వ ప్రయత్నాలు చేస్తున్నారు. అలాగే ముఖేష్ అంబానీ రిలయెన్స జియో.. ఇప్పటికే దేశీయ టెలికాం మార్కెట్‌లో కీలక సంస్థగా ఉంది. జియో కూడా ఉపగ్రహ ఆధారిత కమ్యూనికేషన్ సేవల రంగంలోకి రావడానికి రెడీ అవుతోంది. ఎయిర్‌టెల్ మద్దతున్న యూటెల్‌శాట్ వన్‌వెబ్ కూడా ఈ రంగంలో పోటీ పడుతోంది. దీంతో భారత్‌లో శాటిలైట్ ఇంటర్నెట్ మార్కెట్ భవిష్యత్తులో పెద్ద వ్యాపార పోటీకి వేదికగా మారబోతోంది. అయితే స్టార్‌లింక్‌కు అనుమతుల ఆలస్యం వెనుక అంబానీ ఒత్తిడి ఉందంటూ తాజాగా ఎలాన్ మస్క్ చేసిన ఆరోపణలు, సంధించిన వ్యంగ్యాస్త్రాలపై కేంద్రం చాలా సీరియస్ గా స్పందించింది. టెలికాం మంత్రి జ్యోతిరాదిత్య సింధియా.. దేశంలో ఏ రంగంలోనూ గుత్తాధిపత్యాన్ని ప్రోత్సహించే విధానం లేదని పేర్కొన్నారు. స్టార్‌లింక్, జియో శాటిలైట్ కమ్యూనికేషన్స్, యూటెల్‌శాట్ వన్‌వెబ్ సంస్థల అనుమతుల విషయంలో దాదాపు ఒకే దశలో ఉన్నాయని క్లారిటీ ఇచ్చారు. ఈ సంస్థలకు అవసరమైన అనుమతులు, భద్రతా ప్రమాణాల పరిశీలన, స్పెక్ట్రమ్ కేటాయింపు వంటి ప్రక్రియలు పూర్తయ్యాకే వాణిజ్య సేవల ప్రారంభానికి అనుమతులు లభిస్తాయన్నారు. ఇక్కడ స్టార్ లింక్ ఇండియా ఎంట్రీకి ముఖేష్ అంబానీ అడ్డుపడుతున్నారనడం శుద్ధ అబద్ధమని జ్యోతిరాదిత్య సింధియా కుండబద్దలు కొట్టారు. ఇక ఇప్పుడు అనుమతుల విషయంలో దేశ భద్రత, డేటా భద్రత వంటివి అత్యంత ముఖ్యం. ఉపగ్రహ ఇంటర్నెట్ అనేది కేవలం వ్యాపార సేవ మాత్రమే కాదు. దేశ భద్రత, వినియోగదారుల డేటా, చట్టబద్ధమైన నిఘా అవసరాలు, అత్యవసర పరిస్థితుల్లో సేవలను నియంత్రించే సామర్థ్యం వంటి అంశాలతోనూ ముడిపడి ఉంటుంది. అందువల్ల భారత్‌లో సేవలు ప్రారంభించే సంస్థలు సంబంధిత నిబంధనలకు అనుగుణంగా ఉండాలి. స్టార్‌లింక్ ఇప్పటికే కొన్ని కీలక లైసెన్సులు, అనుమతులు పొందినప్పటికీ, వాణిజ్య సేవల ప్రారంభానికి అవసరమైన అన్ని తుది ప్రక్రియలు పూర్తికాలేదు. ఒక్క స్టార్ లింక్ కే కాదు.. రిలయెన్స్ జియోకు కూడా పూర్తి అనుమతులు రావాల్సి ఉంది. ఈ నేపథ్యంలో మస్క్ వ్యాఖ్యలు కేంద్రంపై ఒత్తిడి పెంచి, అనుమతుల ప్రక్రియను వేగవంతం చేసుకోవడంలో భాగంగా పరిశీలకులు చెబుతున్నారు. , అనుమతుల ఆలస్యాన్ని కేవలం వ్యాపార ప్రత్యర్థుల చర్యగా ఎలాన్ మస్క్ చేసిన వ్యాఖ్యలను తప్పుపడుతున్నారు. స్టార్‌లింక్ ఇండియాలో సేవలు ప్రారంభిస్తే మారుమూల గ్రామాలు, కొండ ప్రాంతాలు, దీవులు, సాధారణ నెట్‌వర్క్ సదుపాయాలు తక్కువగా ఉన్న ప్రాంతాలకు ప్రత్యామ్నాయ ఇంటర్నెట్ అందే అవకాశం ఉంటుంది. విద్యార్థులు ఆన్‌లైన్ విద్యను పొందడం, చిన్న వ్యాపారులు డిజిటల్ మార్కెట్లను చేరుకోవడం, అత్యవసర పరిస్థితుల్లో కమ్యూనికేషన్ కొనసాగించడం వంటి ప్రయోజనాలు ఉండవచ్చు. అంత మాత్రాన భద్రతా ప్రమాణాల విషయంలో ఇండియన్ గవర్నమెంట్ రాజీ పడుతుందని భావించడం సరికాదు. మస్క్ చేసిన ప్రధాని అంబానీ అంటూ వ్యంగ్యాస్త్రాలు సంధించి.. ప్రమాణాల విషయంలో కేంద్రపై ఒత్తిడి తీసుకురావాలన్న మస్క్ ప్రయత్నాలు ఫలిస్తాయని భావంచజాలం. మస్క్ వ్యాఖ్యలు, ఆరోపణలు, వ్యంగ్యాస్త్రాల వెనుక ఉన్నది ఒత్తిడి వ్యూహమేనని పరిశీలకులు అంటున్నారు. [Elon Musk PM Mukesh Ambani Comments, Starlink India, Starlink India launch, Elon Musk Ambani, Jio Satellite internet, Indian Telecom, satellite internet approvals, Telugu One]

Published on: Sun Oct 11, 2026 8:27AM

యుద్ధాల దారి యుద్ధాలదే: నోబెల్ మాత్రం నాదే.. ట్రంపరితనం మామూలుగా లేదుగా.!

ఈ సారి నోబెల్ శాంతి బహుమతి తనకే అంటున్నారు అగ్రరాజ్యాధినేత డొనాల్డ్ ట్రంప్. తనకు నెబెల్ ఇవ్వకపోతే నోబెల్ కమిటీ పరువుపోతుందని కూడా హెచ్చరికలు జారీ చేస్తున్నారు. పరిశీలకులు మాత్రం ట్రంపరి తనానికి ఇది పరాకాష్ట అంటున్నారు. తమ దారికి రాకపోతే ఇరాన్ ను ప్రపంచపటంలో లేకుండా చేస్తాం అంటూ హెచ్చరించిన నోటితోనే నోబెల్ శాంతి బహుమతికి తన కంటే అర్హుడెవరున్నారని ప్రశ్నిస్తున్నారంటే ట్రంప్ ధైర్యానికి మెచ్చుకోవలసిందేనని అంటున్నారు. నోబెల్ శాంతి బహుమతి కోసం ప్రపంచం మొత్తం ఎవరి పేరు వస్తుందా అని ఎదురు చూస్తుంటే.. అమెరికా అధ్యక్షుడు డొనాల్డ్ ట్రంప్ మాత్రం ఇంకెవరి పేరో ఏంటి.. తన పేరే అని ధీమాగా చెబుతున్నారు. నోబెల్ శాంతి బహుమతికి తనకు మించిన అర్హులెవరూ లేరని డంకా బజాయించి మరీ చెబుతున్నారు. తనకు నోబెల్ శాంతి బహుమతి రాకుంటే.. నోబెల్ కమిటీ పరువు గంగలో కలిసినట్లేనని చెబుతున్నారు ట్రంప్. అమెరికా అధ్యక్షుడిగా రెండో సారి బాధ్యతలు చేపట్టిన తర్వాత ఎనిమిది ఘర్షణలను పరిష్కరించానని ట్రంప్ చెప్పుకుంటున్నారు. ప్రపంచంలో ఇంతకు ముందు ఏ అధ్యక్షుడూ చేయని పని తాను చేశానని ట్రంప్ తన భుజాలను తానే చరిచేసుకుంటున్నారు. కే నోబెల్ శాంతి బహుమతి తనదేనని ఆయనకు ఆయనే ప్రకటించేసుకుంటున్నారు. సాధారణంగా నోబెల్‌కు ఎవరైనా నామినేట్ చేస్తే.. నన్ను గుర్తించినందుకు ధన్యవాదాలు అంటారు. కానీ ట్రంప్ మాత్రం తనను నామినేట్ చేసే చాన్స్ ఎవరికీ ఇవ్వడం లేదు. నోబెల్ నాదే.. నాకు రావాల్సిందే అని తనకు తానే ప్రకటించేసుకుంటున్నారు. అదే నామినేట్ చేయడం అనుకోమంటున్నారు. తనను తానే ప్రమోట్ చేసుకుంటూ.. తనకు నోబెల్ శాంతి పురస్కారం ఇవ్వకుంటే నోబెల్ కమిటీ పరువుపోతుందంటూ హెచ్చరికలు జారీ చేస్తున్నారు. ఇంకా స్పష్టంగా చెప్పాలంటే నోబెల్ శాంతి పురస్కారం కోసం నోబెల్ కమిటీని బ్లాక్ మెయిల్ చేయడానికి కూడా వెనుకాడటం లేదు. కంబోడియా, ఇజ్రాయెల్, పాకిస్థాన్‌ నేతలు తనను నోబెల్‌కు నామినేట్ చేశారని ఆయన చెప్పుకుంటున్నారు. వాస్తవానికి నోబెల్ నామినేషన్లు గోప్యంగా ఉంటాయి. దీంతో ట్రంప్ చెప్పుకుంటున్నట్లుగా కంబోడియా, ఇజ్రాయెల్, పాకిస్ధాన్ దేశాలు ట్రంప్ ను నిజంగా నోబెల్ శాంతి పురస్కారం కోసం నామినేట్ చేశారనడం ధృవీకరణకు నిలవదు. ఇక ట్రంప్ తనకు తాను పరిష్కరించానని చెప్పుకుంటున్న ఘర్షణలు తలెత్తడానికే ట్రంప్ కారణమన్న అభిప్రాయం విస్తృతంగా ఉంది. ట్రంప్ శాంతి బహుమతి కోసం చాలాకాలంగా ప్రయత్నిస్తున్నారు. గత ఏడాది నోబెల్ శాంతి బహుమతి అందుకున్న వెనిజులా ప్రతిపక్ష నాయకురాలు మరియా కొరీనా మచాడో.. 2026 జనవరిలో తన నోబెల్ పతకాన్ని ట్రంప్‌కు బహూకరించారు. ఇదిగో.. మీకు కూడా నోబెల్ వచ్చేసింది అన్నట్టుగా జరిగిన ఆ పరిణామాన్ని ట్రంప్ ఎంతో గౌరవంగా పేర్కొన్నారు. అయితే నోబెల్ బహుమతిని మరొకరికి బదిలీ చేయడం సాధ్యం కాదని నోబెల్ సంస్థ కుండబద్దలు కొట్టినట్లు చెప్పడంతో ట్రంప్ స్వయం ప్రచారానికి ఫుల్ స్టాప్ పెట్టక తప్పలేదు. రష్యా-ఉక్రెయిన్ యుద్ధానికి ఇప్పటికీ శాశ్వత పరిష్కారం రాలేదు. మరోవైపు ఇరాన్‌తో అమెరికా, ఇజ్రాయెల్‌ ఘర్షణలు కొనసాగుతున్నాయి. ట్రంప్ శాంతి ప్రయత్నాలుగా పేర్కొంటున్న కొన్ని పరిణామాలు పూర్తిగా ముగిసిన యుద్ధాలుగా పరిగణించడానికి వీలులేదు. ఇంతకీ నోబెల్ కమిటీ ఏం చేస్తుంది? అది ట్రంప్ చెప్పినట్టుగా తనకు ఇవ్వకపోతే కమిటీకే పరువు పోయే’ స్థితిలో ఉందా? లేక ఎప్పటిలాగే తన ప్రమాణాల ప్రకారమే నిర్ణయం తీసుకుంటుందా? సమాధానం త్వరలోనే రానుంది. 2026 నోబెల్ శాంతిబహుమతి విజేతను నార్వేజియన్ నోబెల్ కమిటీ శుక్రవారం (అక్టోబర్ 9) ప్రకటించనుంది. మొత్తానికి.. ప్రపంచంలో చాలామంది నోబెల్ కోసం ఎదురు చూస్తారు. ట్రంప్ మాత్రం నోబెల్ తన కోసం ఎదురు చూస్తోందని చెప్పుటుంటూ సొంత డబ్బా వాయించుకుంటున్నారు. ప్రపంచ సంక్షోభానికి కారకుడిగా మారిన ట్రంప్ కు నోబెల్ వస్తే నిజంగానే నోబెల్ కమిటీ పరువు పోతుందని నెటిజనులు ఓ రేంజ్ లో పోస్టులు పెడుతున్నారు. [Nobel Pace Prize, Donald Trump, America President, Over Enthusiasm, Wars, Ukraine, Russia, Iran, Isreal, Telugu One]

Published on: Thu Oct 8, 2026 11:40AM

సీఈసీ అంశం: ఏకకాలంలో రాహుల్ కు అందివచ్చిన అవకాశం, పోలిటికల్ చాలెంజ్ కూడా.!

దేశ రాజకీయాలలో కేంద్ర ఎన్నికల సంఘం కేంద్రంగా ప్రస్తుతం నెలకొన్న పరిణామాలు కాంగ్రెస్ అగ్రనేత, లోక్ సభలో ప్రతిపక్ష నాయకుడు రాహుల్ గాంధీకి ఒకేు సమయంలో అందివచ్చిన అవకాశంగా, ఎదుర్కోవలసిన సవాల్ గా మారాయి. కేంద్ర ఎన్నికల సంఘం అంతర్గత వ్యవహారాలు, నిర్ణయాలపై వెలువడుతున్న వార్తలు ప్రజాస్వామ్య వ్యవస్థలో సరికొత్త చర్చకు దారితీశాయి. ముఖ్యంగా ప్రధాన ఎన్నికల కమిషనర్ (సీఈసీ) జ్ఞానేశ్ కుమార్, ఇతర కమిషనర్ల మధ్య నెలకొన్న విభేదాలకు సంబంధించిన అంశాలు జాతీయ స్థాయిలో కలకలం రేపాయి. ప్రజాస్వామ్యంలో ఓటు అనేది పౌరులు అత్యంత పవిత్రంగా భావించే ప్రాథమిక హక్కు. ఈ తరుణంలో ఎన్నికల సంఘం పనితీరు, దాని స్వయంప్రతిపత్తిపై ప్రజల్లో వ్యక్తమవుతున్న భయాలు, అనుమానాలు, ఆందోళనలను సరిగా అంచనా వేసి ముందుకు సాగాల్సిన గురుతర బాధ్యత ప్రధాన ప్రతిపక్ష నేతగా రాహుల్ పై ఉంది. ఎన్నికల సంఘంలో కమిషనర్ల మధ్య భేదాభిప్రాయాలు రావడం సాధారణమేనని అధికార బీజేపీ, అలాగే ఆ పార్టీ నేతృత్వంలోని కూటమి పార్టీలూ అంటున్నాయి. కానీ.. ప్రస్తుత పరిస్థితుల్లో అధికార పార్టీ ఇస్తున్న సమర్థనలుఎంత మాత్రం సమంజసంగా లేవన్నది పరిశీలకుల విశ్లేషణ. 1993లో పీవీ నరసింహారావు ప్రధానమంత్రిగా ఉన్న కాలంలో తీసుకువచ్చిన చట్టబద్ధమైన మార్పులను గనుక పరిశీలిస్తే.. అప్పటి ప్రధాని పీవీ నరసింహారావు నాటి ఎన్నికల సంఘం కమిషనర్ టీఎన్ శేషన్ సర్వాధికారాలను నియంత్రించడానికి బహుళ సభ్యుల ఎన్నికల సంఘం నిబంధనను తీసుకువచ్చారు. ఆప్పట్లో శేషన్ తాను కేవలం ప్రజలకు, పార్లమెంట్‌కు, రాష్ట్రపతికి మాత్రమే బాధ్యత వహిస్తానని విస్ఫష్టంగా ప్రకటించారు. అయితే.. సుప్రీం కోర్టు బహుళ సభ్యుల ఎన్నికల సంఘం అన్న అప్పటి పీవీ ప్రభుత్వ నిర్ణయాన్ని సమర్థించింది. ఎన్నికల సంఘంలోని ముగ్గురు కమిషనర్లకు సమానమైన అధికారాలు ఉంటాయని, అన్ని నిర్ణయాలు ఏకగ్రీవంగా లేదా మెజారిటీ ఓటు ద్వారా జరగాలని విస్పష్ట తీర్పు కూడా ఇచ్చింది. అయితే.. తరువాత తరువత ప్రభుత్వాలు తమకు అనుకూలంగా ఉండే అధికారులను ఈసీ స్థానాల్లో నియమించడానికి వివిధ మార్గాలను అన్వేషించాయి. 2009 జనవరిలో నాటి సీఈసీ ఎన్. గోపాలస్వామి అప్పటి ఈసీ నవీన్ చావ్లాకు రాజకీయ తటస్థత లేదంటూ ఆయనను తొలగించాలని రాష్ట్రపతికి సిఫారసు చేసిన ఉదంతాన్ని తీసుకుంటే.. అప్పటి మన్మోహన్ సింగ్ ప్రభుత్వం ఆయన్ను తొలగించకపోవడమే కాకుండా.. తదుపరి సీఈసీగా నియమించింది. ఇటువంటి పరిణామాలు గతంలోనూ జరిగినప్పటికీ, నరేంద్ర మోడీ ప్రభుత్వం 2023లో తీసుకువచ్చిన సరికొత్త చట్టం మాత్రం ఎన్నికల సంఘం స్వయంప్రతిపత్తి విషయంలో పెను మార్పులకు కారణమైంది. ఈ కొత్త చట్టం ప్రకారం, ఎన్నికల సంఘం కమిషనర్ల ఎంపిక కమిటీ నుంచి దేశ ప్రధానన్యాయమూర్తిని తొలగించారు. అంతేకాకుండా, ఈసీ సభ్యులకు జీవితాంతం న్యాయపరమైన విచారణల నుంచి సంపూర్ణ మినహాయింపు అంటే ఇమ్యూనిటీ కల్పించారు. ఈ నూతన చట్టం ప్రకారం ఎంపిక కమిటీలో ప్రధాని, కేంద్ర కేబినెట్ మంత్రి, లోక్‌సభలో ప్రతిపక్ష నాయకుడు మాత్రమే ఉంటారు. అయితే ప్రధాని, కేబినెట్ మంత్రి ఎప్పుడూ ఒకే వర్గంగా ఉంటారు కాబట్టి.. ప్రతిపక్ష నేత పాత్ర నామమాత్రంగా మిగిలిపోతుంది. ఇదే విషయంపై విపక్షాలు వ్యక్తం చేసిన అభ్యంతరాలను బేఖాతరు చేస్తూ.. ఎటువంటి చర్చా లేకుండానే పార్లమెంటులో ఈ బిల్లుకు కేంద్రం ఆమెదముద్ర వేయించుకుంది. ఇది ప్రజాస్వామ్యాన్ని అపహాస్యం చేయడమేనని అప్పుడే కాదు, ఇప్పటికీ ప్రతిపక్షాలు విమర్శిస్తూనే ఉన్నాయి. ఈ నేపథ్యంలోనే ఇటీవల మీడియా సంస్థల కథనాల ద్వారా ఈసీ అంతర్గత విభేదాలు వెలుగులోకి రావడం, ఆ తర్వాత ఈ సంస్థ సమావేశమై కొన్ని నిర్ణయాలను ప్రకటించడం వంటి పరిణామాలు ఈ వివాదానికి మరింత ఆజ్యం పోశాయి. ఈ తరుణంలో ప్రధాన ప్రతిపక్ష నాయకుడు రాహుల్ గాంధీకి ప్రజాస్వామ్య పరిరక్షణ కోసం నిలబడి గళమెత్తే అవకాశం లభించింది. ప్రభుత్వ విధానాలను, సంస్థలు స్వయంప్రతిపత్తి కోల్పోవడాన్ని ప్రజల్లోకి తీసుకువెళ్లడంలో ఆయన ఇప్పటికే ఒకింత విజయం సాధించారు. అయితే ప్రసంగాలలో విమర్శలకే పరిమితం కావడం కాకుండా.. బలమైన ప్రజా ఉద్యమాన్ని నిర్మించేలా కార్యాచరణ రూపొందించాల్సిన అవసరం ఉంది. ప్రజాస్వామ్య పరిరక్షణ కోసం గళమెత్తి, బలంగా నిలబడే అవకాశాన్ని ఆయన ఎలా సద్వినియోగం చేసుకుంటారన్నది కాలమే నిర్ణయిస్తుంది. ఇక సవాల్ ఏమిటంటే.. బలమైన కార్యాచరణతో ఆయన ప్రజలను చైతన్య వంతం చేసి ప్రజా ఉద్యమాన్ని నిర్మిచడం. ఎందుకంటే.. మెజారిటీ జనం.. తమ ఓటుహక్కు కోల్పోతామన్న ఆందోళనలో ఉన్నారు. అందుకే కేంద్ర ఎన్నికల సంఘంలో పారదర్శకతను డిమాండ్ చేస్తున్నారు. ఈ సానుకూల అవకాశాన్ని రాహుల్ గాంధీ ఏ మేరకు ఉపయోగించుకుని ప్రజా చేతనను బలమైన ఆయుధంగా మలచుకుంటారన్నది చూడాల్సి ఉంది. ఒకవైపు దేశ ప్రజలు ఓటు హక్కు పట్ల ఎంతో జాగరూకతతో ఉన్నందున, సంస్థల పారదర్శకతను కాపాడాలని కోరుకుంటున్నారు. అధికార పక్షం ఈ సంక్షోభాన్ని మరింత పెంచకుండా సద్దుమణిగేలా చేయాలని విశ్వ ప్రయత్నం చేస్తున్నది. ఆందోళనలను అణచివేయడానికి బలప్రయోగానికి కూడా వెనుకాడటం లేదు. రాహుల్ గాంధీ ఈ తరుణంగా గట్టిగా నిలబడి ఈ అంశాన్ని ప్రజాక్షేత్రంలోకి బలంగా తీసుకెళ్లేందుకు అన్ని విధాలుగా ప్రయత్నించాల్సి ఉంది. ఈ విషయంలో ఆయన సాధించే విజయమే, ఆయన రాజకీయ భవిష్యత్ ను, అలాగే కాంగ్రెస్ పార్టీ భవిష్యత్ ఆధారపడి ఉంది. ఈ విషయంలో ఆయన విజయంసాధిస్తేనే.. జాతీయ రాజకీయాల్లో ఆయన నాయకత్వాన్ని అంగీకరించేందుకు ఇండియా కూటమి పార్టీలు ముందుకు వస్తాయి. [Election Commission ssue A Big Challenge, Rahul Gandhi, Congress, Political Future, Modi Government Law, Chief Election Commissioner, Indian politics, PV Narasimharrao, TN Seshan, Telugu One]

Published on: Wed Oct 7, 2026 11:55AM

జగన్ వర్సెస్ సజ్జల: వైసీపీలో సైలెంట్ వార్.. స్థానిక సమరం ముంగిట కొత్త తలనొప్పి.?

వైసీపీ వరుస సంక్షోభాలతో కూనారిల్లుతోందా? స్థానిక ఎన్నికలను లిట్మస్ టెస్టుగా తీసుకుని 2029 ఎన్నికల నాటికి రాష్ట్రంలో పూర్వ వైభవం సంతరించుకోవాలని ప్రయత్నిస్తున్న జగన్ కు పార్టీలో పరిస్థితులు అనుకూలంగా లేవా. స్థానిక ఎన్నికల వేళ పార్టీలో అంతర్గత విభేదాలు వైసీపీని బలహీనపరుస్తున్నాయా? అంటే పరిశీలకుల నుంచి ఔనన్న సమాధానమే వస్తున్నది. స్థానిక ఎన్నికలకు సమాయత్తమయ్యే వ్యూహాలకు సంబంధించి పార్టీ రాష్ట్ర సమన్వయ కర్త సజ్జల రామకృష్ణారెడ్డి, పార్టీ అధినేత జగన్ మధ్య విభేదాలు భగ్గుమన్నాయని అంటున్నారు. దాదాపుగా ఇరువురి మధ్యా సైలంట్ వార్ జరుగుతోందని పార్టీ వర్గాలే చెబుతున్నాయి. స్థానిక ఎన్నికల బహిష్కరణే బెటర్ అని సజ్జల చెబుతుంటే.. బరిలో నిలిచి సత్తా చాటాలన్న పట్టుదలతో జగన్ ఉన్నారు. ఈ విషయంలోనే ఇరువురి మధ్యా విభేదాలు పీక్స్ కు వెళ్లాయంటున్నారు. 2024 అసెంబ్లీ ఎన్నికల్లో ఘోర పరాజయం తర్వాత వైసీపీ క్షేత్రస్థాయిలో బాగా బలహీనపడింది. పలువురు ద్వితీయ శ్రేణి నాయకులు పార్టీకి దూరమయ్యారు. అవుతున్నారు. జగన్ అధికారంలో ఉన్న సమయంలో పార్టీ వాయిస్ గా నిలిచి, బలంగా గళం వినిపించి ఫైర్ బ్రాండ్ గా ముద్రపడిన కొడాలి నాని, వల్లభనేని వంశీ, ఆర్కే రోజా, విడదల రజని వంటి నేతలు సైలెంట్ అయిపోయారు. పార్టీ కార్యక్రమాలలో కూడా నామ్ కే వాస్తేగా పాల్గొంటూ ఇన్ యాక్టివ్ గా మారిపోయారు. దీంతో గ్రామ స్థాయిలో క్యాడర్ బలహీనపడింది.అంతెందుకు, జగన్ సొంత నియోజకవర్గమైన పులివెందులలో జడ్పీటీసీ ఉప ఎన్నికల్లో ఎదురైన పరాజయం రాష్ట్రంలో వైసీపీ పరిస్థితికి అద్దం పడుతోందని పరిశీలకులు విశ్లేషిస్తున్నారు. . ఈ నేపథ్యంలో స్థానిక ఎన్నికల్లో పోటీకి అభ్యర్థులే కరవయ్యే పరిస్థితి ఉందన్నది సజ్జల వాదనగా చెబుతున్నారు. అధవా పోటీ చేసినా పరాభవం తప్పదనీ, అందుకే బాయ్ కాట్ చేసి పరువు కాపాడుకోవడం బెటరన్నది సజ్జల ఉద్దేశంగా తెలుస్తోంది. తెలుగుదేశం కూటమి ప్రభుత్వానికి అనుకూలంగా రాజకీయ పరిస్థితులు ఉన్నాయని భావిస్తున్న తరుణంలో ఎన్నికల్లో పోటీ చేసి ఓడిపోతే మిగిలిన క్యాడర్ కూడా నిరుత్సాహానికి గురయ్యే ప్రమాదం ఉందని సజ్జల జగన్ కు గట్టిగా చెబుతున్నారని అంటున్నారు. ఈ పరిస్థితుల్లో స్థానిక ఎన్నికలను బహిష్కరిస్తే నిరసన గళం వినిపించినట్లూ ఉంటుంది, పొలిటికల్ గా ఒకింత వెసులుబాటు లభిస్తుందన్నది సజ్జల భావనగా చెబుతున్నారు. అయితే జగన్ మాత్రం ఈ ప్రతిపాదనకు సుముఖంగా లేరని తెలుస్తోంది. ఎన్నికలను బహిష్కరించడం వల్ల పార్టీ గ్రామస్థాయి పునాదులు మరింత బలహీనపడతాయని, రాజకీయంగా ప్రత్యర్థులకు అవకాశం ఇచ్చినట్లవుతుందని ఆయన అభిప్రాయపడుతున్నట్లు ప్రచారం సాగుతోంది. గెలుపోటములతో సంబంధం లేకుండా ప్రతి స్థానంలోనూ అభ్యర్థులను నిలబెట్టి పోరాడాలని ఆయన నిర్ణయించుకున్నట్లు కథనాలు వెల్లడిస్తున్నాయి. ఈ క్రమంలోనే జగన్ పార్టీ ప్రాంతీయ సమన్వయకర్తలు, జిల్లా అధ్యక్షులతో స్వయంగా సమావేశమై ఎన్నికల సన్నద్ధతపై సమీక్షలు నిర్వహించినట్లు సమాచారం. ప్రతి స్థానానికి ముగ్గురు అభ్యర్థుల పేర్లను సిద్ధం చేయాలని, నాయకులు బాధ్యతాయుతంగా వ్యవహరించాలని ఆయన ఆదేశించినట్లు తెలుస్తోంది. గతంలో పార్టీ వ్యూహాత్మక నిర్ణయాల్లో కీలకంగా వ్యవహరించిన సజ్జల తాజా సమీక్షల్లో ప్రేక్షక పాత్రకే పరిమితమయ్యారన్న చర్చ కూడా వైసీపీ వర్గాల్లో వినిపిస్తోంది. మరోవైపు, ఎన్నికల సమయంలో పార్టీ నాయకులు ఎదుర్కొనే న్యాయపరమైన, రాజకీయపరమైన సమస్యలను పరిష్కరించేందుకు ప్రత్యేక లీగల్ టాస్క్‌ఫోర్స్ ఏర్పాటు చేయాలనే ఆలోచన కూడా తెరపైకి వచ్చినట్లు సమాచారం. అయితే ఈ పరిణామాలపై వైసీపీ నాయకత్వం నుంచి అధికారిక స్పష్టత రావాల్సి ఉంది. మొత్తంగా స్థానిక సంస్థల ఎన్నికలు వైసీపీకి కేవలం రాజకీయ పోటీ మాత్రమే కాకుండా, పార్టీ భవిష్యత్తును నిర్ణయించే కీలక పరీక్షగా మారనున్నాయి. ఎన్నికల్లో పోటీ చేయాలన్న జగన్ పట్టుదల పార్టీకి కొత్త ఉత్సాహాన్ని ఇస్తుందా? లేక క్షేత్రస్థాయిలో ఉన్న బలహీనతలు మరోసారి బయటపడతాయా? అన్నది ఆసక్తికరంగా మారింది. [Sajjala, Jagan, Locol Bodies, E;ections, Boycott, Contest, Differences, Telugu One]

Published on: Mon Oct 5, 2026 10:10AM

ఏపీలో మరో కోనసీమ: కొబ్బరి చెట్లుండవు కానీ పచ్చదనం బ్రహ్మాండ్స్.. బాబు విజన్ లో రాయలసీమ.!

ఆంధ్రప్రదేశ్ లో మరో కోనసీమ రూపుదాలుస్తోంది. కరవు, వర్షాభావం, వలసలకు, ఫ్యాక్షన్ గొడవలకు బ్రాండ్ అంబాసిడర్ గా ఉన్న రాయలసీమ.. చంద్రబాబు విజన్ కారణంగా కొనసీమలా మారి సస్యశ్యామలం కాబోతోంది. హార్టీకల్చర్ హబ్ గా దేశంలోనే గుర్తింపు పొందేలా చంద్రబాబు రాయలసీమను తీర్చి దిద్దుతున్నారు. కోనసీమ కంటే ఓ అడుగు ముందుకు వేసి పచ్చదనం, పారిశ్రామీకరణలో దేశంలోనే నంబర్ వన్ గా రాయలసీమ రూపుదిద్దుకోబోతోందని చంద్రబాబు ఘంటాపధంగా చెబుతున్నారు. సీమను దేశంలోనే నంబర్ వన్ హార్టీకల్చర్ హబ్ గా తీర్చిదిద్దేలా బృహత్తర ప్రణాళిక రూపొందించారు. రాయలసీమ రైజింగ్ అంటూ లక్ష కోట్ల రూపాయల పెట్టుబడులతో సీమ సమగ్ర, సంతుల్య అభివృద్ధికి చంద్రబాబు సర్కార్ శ్రీకారం చుట్టింది. వ్యవసాయాన్ని సాంకేతికతతో అనుసంధానిస్తూ, రైతుల ఆదాయాన్ని పెంచడం, పంటలకు అంతర్జాతీయ మార్కెట్లను అందుబాటులోకి తీసుకురావడం ఈ ప్రాజెక్టు లక్ష్యం. అన్నమయ్య జిల్లా మదనపల్లెలో ఈ ప్రాజెక్టుకు గాంధీ జయంతి రోజున శంకుస్థాపన జరిగింది. కేంద్ర మంత్రి నిర్మలా సీతారామన్, ఏపీ డిప్యూటీ సీఎం పవన్ కల్యాణ్ ఈ కార్యక్రమంలో పాల్గొన్నారు. రాయలసీమలో ఉద్యానవన రంగాన్ని బలోపేతం చేసేందుకు కేంద్ర, రాష్ట్ర ప్రభుత్వాలు, ప్రైవేటు భాగస్వామ్యంతో ఈ భారీ ప్రాజెక్టును గ్రౌండ్ చేస్తున్నారు. 40 వేల352 కోట్ల ప్రభుత్వ పెట్టుబడులతో సాగునీరు, గ్రామీణ రహదారులు, మౌలిక సదుపాయాల అభివృద్థి, 60 వేల కోట్ల రూపాయల ప్రైవేటు పెట్టుబడులతో పంటల సేకరణ, గ్రేడింగ్, ప్రాసెసింగ్, ప్యాకింగ్, కోల్డ్ స్టోరేజ్, రవాణా, మార్కెటింగ్ వంటి సదుపాయలను కల్పించాలన్నది ఈ ప్రాజెక్టు ఉద్దేశం, లక్ష్యం. మూడేళ్లలో మూడు దశల్లో ఈ ప్రాజెక్టును పూర్తి చేయాలని ప్రభుత్వం లక్ష్యంగా పెట్టుకుంది. ఈ ప్రాజెక్టు పరిధిలో రాయలసీమతో అనుసంధానమైన ప్రాంతాల్లోని 10 జిల్లాలను భాగస్వామ్యం చేయనున్నారు. అనంతపురం, అన్నమయ్య, చిత్తూరు, కర్నూలు, నంద్యాల, శ్రీ సత్యసాయి, తిరుపతి, కడప, ప్రకాశం, మార్కాపురం జిల్లాల్లో 201 క్లస్టర్లను ఏర్పాటు చేయనున్నారు. 303 మండలాల్లోని 5 వేల 869 గ్రామాలకు మౌలిక సదుపాయాలు కల్పించాలన్నది లక్ష్యం. రాయలసీమలో ఇప్పటికే మామిడి, టమోటా, అరటి, దానిమ్మ, బత్తాయి వంటి పంటలు విస్తృతంగా సాగవుతున్నాయి. వీటితో పాటు అవకాడో, డ్రాగన్ ఫ్రూట్, ఖర్జూరం, స్ట్రాబెర్రీ వంటి అధిక విలువ కలిగిన పంటలను కూడా ప్రోత్సహించాలనే ఆలోచన ఉంది. మార్కెట్ డిమాండ్, వాతావరణ పరిస్థితులు, నీటి లభ్యత ఆధారంగా పంటల ఎంపికకు రైతులకు మార్గదర్శకత్వం అందించనున్నారు. ఉత్పత్తి పెంపుతో పాటు నాణ్యత ప్రమాణాలు, ఎగుమతులకు అవసరమైన సదుపాయాలపై కూడా దృష్టి పెట్టనున్నారు. ఈ చర్యల ద్వారా రాయలసీమను దేశీయ, అంతర్జాతీయ పండ్ల మార్కెట్లతో అనుసంధానించాలనేది ప్రాజెక్టు లక్ష్యం. రాయలసీమ అభివృద్ధికి ప్రధాన అవరోధంగా ఉన్న నీటి కొరతను అధిగమించేందుకు సాగునీటి మౌలిక సదుపాయాలను ప్రాజెక్టులో భాగంగా అభివృద్ధి చేయనున్నారు. నీటి సమర్థ వినియోగం, సూక్ష్మ సేద్యం, ఆధునిక సాగు పద్ధతులకు ప్రాధాన్యత ఇవ్వనున్నారు. పంటలకు అవసరమైన నీటిని అందుబాటులో ఉంచడంతో పాటు వాతావరణ మార్పుల ప్రభావాన్ని తట్టుకునే పంట రకాలను ప్రోత్సహించడం కూడా కీలకంగా మారనుంది. అయితే సాగునీటి లభ్యత, ప్రాజెక్టుల పురోగతి, నీటి కేటాయింపుల ఆధారంగానే ఈ లక్ష్యాల సాధన ఆధారపడి ఉంటుంది. ఈ ప్రాజెక్టులో మరో ముఖ్యమైన అంశం మదనపల్లెలో ఇండియన్ స్కూల్ ఆఫ్ అగ్రికల్చర్ ఏర్పాటు. రిలయన్స్ ఇండస్ట్రీస్ భాగస్వామ్యంతో ఏర్పాటు కానున్న ఈ సంస్థలో వ్యవసాయం, ఉద్యానవన రంగాల్లో ఆధునిక సాంకేతికత, పరిశోధన, కృత్రిమ మేధస్సు వినియోగం, శాస్త్రీయ సాగు పద్ధతులపై శిక్షణ అందించనున్నారు. రైతులు, వ్యవసాయ నిపుణులు, యువతకు నూతన పరిజ్ఞానాన్ని అందించడం ద్వారా వ్యవసాయ రంగంలో నైపుణ్యాన్ని పెంపొందించాలని లక్ష్యంగా పెట్టుకున్నారు. ఈ సంస్థకు కూడా మదనపల్లెలో శంకుస్థాపన జరిగింది. ఉద్యానవన పంటలు పండించిన తర్వాత వాటిని సరైన సమయంలో మార్కెట్‌కు చేర్చడం రైతులకు కీలకమైన అంశం. ఈ నేపథ్యంలో పంటల సేకరణ కేంద్రాలు, శీతల గిడ్డంగులు, ఫుడ్ ప్రాసెసింగ్ యూనిట్లు, ప్యాకేజింగ్ సదుపాయాలు, రవాణా వ్యవస్థలను అభివృద్ధి చేయనున్నారు. అంతర్జాతీయ నాణ్యత ప్రమాణాలకు అనుగుణంగా ఉత్పత్తులను సిద్ధం చేసి ఎగుమతులను ప్రోత్సహించేలా ప్రణాళిక రూపొందించారు. దీనివల్ల పంట కోత అనంతరం జరిగే నష్టాలను తగ్గించడంతో పాటు రైతులకు మెరుగైన మార్కెట్ అవకాశాలు లభిస్తాయి. [Rayalaseema Global Horticulture Hub, Andhra Pradesh Horticulture, Chandrababu Naidu Nirmala Sitharaman, Madanapalle Indian School of Agriculture, Rayalaseema, Konaseema, CBN Vision, Telugu One]

Published on: Sat Oct 3, 2026 3:19PM