సమాచార శాఖలో స్కాంల కలకలం.. సీబీఐ విచారణకు విపక్షాల డిమాండ్ 

తెలంగాణ ప్రభుత్వంలో సమాచార పౌర సంబంధాల శాఖ అవినీతి అడ్డాగా మారిందా? ప్రకటనల పేరుతో ప్రభుత్వ నిధులు దోచెస్తున్నారా? ఐఅండ్ పీఆర్ లో అవినీతి జరుగుతుందంటూ కొన్ని రోజులుగా వస్తున్న ఆరోపణలు నిజమయ్యాయి. సమాచార పౌర సంబంధాల శాఖలో భారీ కుంభకోణాలు వెలుగు చూశాయి. రూ,11.75 కోట్ల స్కాం జరిగిందని తేలింది. 2015-17 మధ్య రెండు ఏండ్లకు సంబంధించి ప్రకటనల పేరుతో ఈ డబ్బులను దిగమింగారు. ఓ అంతర్జాతీయ మార్కెటింగ్‌ అనుబంధ సంస్థ సీఈవో, తెలంగాణ సమాచార శాఖ అధికారులు కలిసి రెండు కుంభకోణాలకు పాల్పడ్డారంటూ ఓ ప్రముఖ దినపత్రికలో వచ్చిన కథనం రాష్ట్రంలో తీవ్ర ప్రకంపనలు రేపుతోంది. అవినీతి  గుట్టు బయటపడడంతో లండన్‌ సంస్థ హైదరాబాద్‌లోని అనుబంధ సంస్థను మూసేసి.. చేసిన తప్పునకు ప్రాయశ్చిత్తంగా అమెరికా సెక్యూరిటీస్‌ అండ్‌ ఎక్స్చేంజ్‌ కమిషన్‌కు ‘ఫారిన్‌ కరప్ట్‌ ప్రాక్టీసెస్‌ యాక్ట్‌ (ఎఫ్‌సీపీ) కింద జరిమానా చెల్లించుకుంటోంది.  డబ్ల్యూపీపీ కంపెనీ 2011 జూలై 6న తన అనుబంధ సంస్థ అయిన జేడబ్ల్యూటీ ఇండియా ద్వారా హైదరాబాద్‌కు చెందిన మైండ్‌సెట్‌ అడ్వర్టయిజింగ్‌ ప్రైవేట్‌ లిమిటెడ్‌ను టేకోవర్‌ చేసింది. తర్వాత జేడబ్ల్యూటీ మైండ్‌సెట్‌ అడ్వర్టయిజింగ్‌గా మారింది. తెలంగాణ ప్రభుత్వంతో ఒప్పందం కుదుర్చుకుంది. ఒప్పందంలో భాగంగా జేడబ్ల్యూటీ మైండ్‌సెట్‌ సంస్ ప్రభుత్వానికి యాడ్స్‌ తయారుచేసేది. అయితే వాటిని తాను నేరుగా మీడియాకు ఇవ్వకుండా.. ఆ బాధ్యతను ‘వెండర్‌ ఏ’ అనే బినామీ సంస్థకు ఇచ్చింది. ఆ సంస్థ .. మీడియా నుంచి యాడ్‌ స్పేస్‌ను కొనుగోలు చేసి యాడ్స్‌ ఇచ్చేది. సదరు యాడ్స్‌కు సంబంధించిన బిల్లులను ‘వెండర్‌ ఏ’ సంస్థ.. ఆయా మీడియా సంస్థల నుంచి తీసుకుని జేడబ్ల్యూటీ మైండ్‌సెట్‌కు ఇచ్చేది. అందులో 10 శాతం కమీషన్‌ వెండర్‌ ఏ సంస్థకు ముడుతుంది. కానీ మీడియా సంస్థలు ఇచ్చే బిల్లులేవీ తీసుకోకుండానే, చూడకుండానే జేడబ్ల్యూటీ మైండ్‌సెట్‌ సంస్థ వెండర్‌ ఏ కంపెనీకి చెల్లింపులు జరిపేసింది. ఇలానే కాదు అసలు వాణిజ్యప్రకటనలే ఇవ్వకుండా డబ్బులు మింగేస్తూ మరో కుంభకోణానికి పాల్పడింది జేడబ్ల్యూటీ మైండ్‌సెట్‌. వెండర్‌ బి’ అనే మరో బినామీ కంపెనీని ఇందుకు వాడుకున్నాయి. 2015 జూన్‌లో తెలంగాణ ఆవిర్భావ దినోత్సవం సంబరాలకు సంబంధించి ప్రచారైల కాంట్రాక్టు విలువ 15,88,480 డాలర్లు. అంటే దాదాపుగా రూ.11.75 కోట్లు. అయితే ఒక్క యాడ్‌ కూడా ఇవ్వకుండానే మొత్తం సొమ్ము మింగేశారు. పథకం ప్రకారం.. కాంట్రాక్టు అమలుచేసినట్లుగా ‘వెండర్‌ బి’ సంస్థ బోగస్‌ బిల్లులు సృష్టించింది. అలా మింగేసిన రూ.11.75 కోట్లలో రూ.7.5 కోట్లు డీఐపీఆర్‌ అధికారుల వాటాగా చేరినట్లు జేడబ్ల్యూటీ మైండ్‌సెట్‌  తయారుచేసిన నివేదిక ద్వారా వెల్లడైంది. మిగిలిన సొమ్మును ‘వెండర్‌ బి’ సంస్థ జేడబ్ల్యూటీ మైండ్‌సెట్‌ సీఈవోకు నగదు రూపంలో ఇచ్చింది.  ఈ కుంభకోణాలకు సంబంధించి డీఐపీఆర్‌లోని అవినీతి అధికారికి, హైదరాబాద్‌లోని డబ్ల్యూపీపీ సీఈవోకు మధ్య సన్నిహిత సంబంధాలున్నాయని డెలాయిట్‌ తేల్చినట్టు సమాచారం. డీఐపీఆర్‌ అధికారి పెద్ద లంచగొండి అని పేర్కొన్నట్టు తెలుస్తోంది.   2015-17 కాలంలో  తెలంగాణ సమాచార పౌర సంబంధాల శాఖ కమిషనర్ గా సీనియర్ ఐఏఎస్ నవీన్ మిట్టల్ పని చేశారు. ఆయన హయంలోనే ఈ అడ్డగోలు అవినీతి జరిగింది. అంతర్జాతీయ సంస్థ ద్వారా రూ. 11.75 లక్షల రూపాయల అవినీతి జరిగిందని తేలినా.. ఇతరత్రా మార్గాల్లో భారీగానే అక్రమాలు జరిగాయనే ఆరోపణలు వస్తున్నాయి. సమాచార శాఖలో గత ఏడేండ్లుగా సాగిన కార్యాకలాపాలపై సమగ్ర విచారణ జరిపించాలని విపక్షాలు డిమాండ్ చేస్తున్నారు. రాష్ట్ర ప్రభుత్వం జరిపించే దర్యాప్తులో నిజాలు తేలవని, సీబీఐతో విచారణ జరిపించాలని కాంగ్రెస్ పార్టీ జాతీయ అధికార ప్రతినిధి దాసోజ్ శ్రవణ్ కుమార్, రాష్ట్ర ముఖ్య అధికార ప్రతినిధి అద్దంకి దయాకర్ , టీడీపీ మహిళా అధ్యక్షురాలు జ్యోత్స డిమాండ్ చేస్తున్నారు. ఇందులో ప్రభుత్వ పెద్దల హస్తం కూడా ఉందని వాళ్లు ఆరోపిస్తున్నారు.  సమాచార పౌరసంబంధాల శాఖలో వెలుగుచూసిన స్కాంపై బీజేపీ నేత విజయశాంతి స్పందించారు. ఓ పత్రికలో వచ్చిన  కథనాన్ని జతచేస్తూ సోషల్ మీడియాలో ఆమె సంచలన పోస్ట్ పెట్టారు. ‘‘ఏ దోపిడీ నుంచి తెలంగాణను కాపాడుకోవాలని ఎంత పోరాటం చేసి ప్రత్యేక రాష్ట్రాన్ని సాధించుకున్నామో... ఆ పోరాటయోధులు, అమరవీరుల త్యాగాలు, ఆత్మార్పణలకు ఏ మాత్రం విలువ లేకుండా ఉమ్మడిరాష్ట్ర కాలపు అక్రమాల పరంపరను నేటి తెలంగాణ పాలకులు జంకూ గొంకూ లేకుండా కొనసాగించారనడానికి మరో తిరుగులేని సాక్ష్యాన్ని మీడియా బయటపెట్టింది. ప్రత్యేక రాష్ట్రం ఏర్పడి ఏడాదైనా గడవకముందే 2015 నుంచి రెండేళ్ళ పాటు I&PR (సమాచార ప్రజా సంబంధాల) విభాగంలో కొనసాగిన అవినీతి వారసత్వం బట్టబయలైంది. తెలంగాణ ఆవిర్భావ దినోత్సవాల పేరు చెప్పి... విదేశీ అడ్వర్టయిజింగ్ కంపెనీ WPP భారతీయ విభాగాల (JWT Mindset Advt.)తో కుమ్మక్కై వీసమెత్తు ప్రచారం కూడా చెయ్యకుండా అందరూ కలసి మొత్తంగా సుమారు రూ.12 కోట్లు... పత్రికల్లో యాడ్స్ అంటూ మరి కొన్ని కోట్ల రూపాయలు స్వాహా చేసినట్లు ఈ కథనం ఆధారాలతో సహా వివరాలిచ్చింది. ఈ సొమ్ములో రూ.7.5 కోట్లు డీఐపీఆర్ అధికారుల వాటాగా ఇచ్చినట్లు JWT Mindset నివేదిక ద్వారా తెలిసింది. కలకలం రేపుతున్న మరో విషయం ఏమిటంటే, ఈ డబ్ల్యూపీపీ సంస్థ పలు దేశాల్లో ఇలాంటి అక్రమాలకు పాల్పడినప్పటికీ, భారతదేశంలో మాత్రం ప్రధానంగా తెలంగాణలోనే అవినీతికి పాల్పడినట్లు ఆ వార్తా కథనం స్పష్టం చేసింది. దీన్ని బట్టి ఏ స్థాయిలో అక్రమాలు జరిగాయో అర్థమవుతూనే ఉంది. ఈ మొత్తం వ్యవహారంలో తెలంగాణ పాలకులకు సంబంధం లేదంటే పసిపిల్లలు కూడా నమ్మరు. తెలంగాణలో పాలనా పగ్గాలు అందుకున్నప్పటి నుంచీ అధికార పార్టీ వారి అవినీతి, అక్రమాల చిట్టా పెరుగుతూ పోయిందే తప్ప ఎక్కడా తగ్గలేదు. కానీ, ప్రత్యేక రాష్ట్రం ఇలా ఏర్పడిందో లేదో... ఆ మరు క్షణం నుంచే అవినీతి మెట్లెక్కుతూ... అక్రమాల పుట్టలు కడుతూ ప్రజల్ని మోసగించిన వైనం చూస్తుంటే కళ్లు బైర్లు కమ్ముతున్నాయి.’’ అంటూ విజయశాంతి తన ఫేస్‌బుక్ పేజీలో పోస్ట్ చేశారు. 
Publish Date:Sep 28, 2021

గ‌న్‌తో హ‌ల్‌చ‌ల్‌.. బైక్‌తో ఫీట్స్‌.. దుర్గగుడి ఫ్లైఓవర్‌పై ఓవ‌రాక్ష‌న్‌..

బెజ‌వాడ‌లో బ్లేడ్ బ్యాచ్‌లు, గంజాయి ముఠాలే కాదు.. తుపాకీ వీరులూ చెల‌రేగిపోతున్నారు. ఏపీలో పోలీసింగ్ సిస్ట‌మ్ అట్ట‌ర్‌ఫ్లాప్ అవ‌డంతో కుర్ర‌కారుకి ప‌గ్గాలు లేకుండా పోతోంది. త‌మ‌ను ఎవ‌రూ ఏమీ చేయ‌లేర‌నే ధీమానో.. పోలీసుల చేత‌గానిత‌నంపై న‌మ్మ‌క‌మో.. రీజ‌న్ ఏదైనా.. యూత్ య‌మ డేంజ‌ర‌స్‌గా ప్ర‌వ‌ర్తిస్తోంది. విజ‌య‌వాడ‌, గుంటూరు త‌దిత‌ర ప్రాంతాల్లో ఉన్మాదులు రెచ్చిపోతుండ‌టం, మ‌హిళ‌ల‌పై దాడుల‌కు తెగ‌బ‌డుతుండ‌టం క‌ల‌క‌లం రేపుతూనే ఉంది. పోలీసుల వైఫ‌ల్యం ఆవారా గాళ్ల‌కు, అరాచ‌క శ‌క్తుల‌కు అనుకూలంగా మారుతోంది. ఖాకీల నిఘా లేక‌పోవ‌డంతో.. కుర్ర‌కారు తెగ రెచ్చిపోతున్నారు. తాజాగా, జ‌రిగిన ఓ ఘ‌ట‌న విజ‌య‌వాడవాసుల‌ను భ‌య‌బ్రాంతుల‌కు గురి చేస్తోంది.   బెజ‌వాడ‌ దుర్గగుడి ఫ్లైఓవర్‌పై కొంద‌రు యువ‌కులు రెచ్చిపోయారు. బైక్‌తో భ‌యంక‌ర స్టంట్స్ చేస్తూ చెల‌రేగిపోయారు. న‌డుస్తున్న బైక్‌పైకి ఎక్కి నిలుచొని ర‌క‌ర‌కాల విన్యాసాలు చేశారు. ఓ యువ‌కుడు బైక్‌పై నిలుచుని.. గాల్లో తుపాకీ చూపిస్తూ.. హ‌ల్‌చ‌ల్ చేశాడు. ఆ ఫీట్‌ను వీడియో తీయించుకొని సోష‌ల్ మీడియాలో పోస్ట్ చేయ‌డం క‌ల‌క‌లం రేపుతోంది.  ఆ బైక‌ర్ త‌న బండిని ఎవరూ గుర్తించకుండా నెంబర్‌ ప్లేట్ తీసేసి ఫ్లైఓవ‌ర్‌పై ఫీట్లు చేశాడు. ఆ వీడియో వైర‌ల్‌గా మార‌డంతో న‌గ‌ర‌వాసుల‌తో పాటూ పోలీసులూ ఉలిక్కిప‌డ్డారు. ఇంత‌కీ అత‌నికి గ‌న్‌ ఎలా వ‌చ్చింది? అది నిజ‌మైన తుపాకీనేనా? దుర్గ‌గుడి ఫ్లైఓవ‌ర్‌పై యూత్ ఇలా బైక్స్‌తో ఫీట్స్ చేస్తుంటే పోలీసులు ఏం చేస్తున్న‌ట్టు? ఇలా ఖాకీల‌పై విమ‌ర్శ‌ల వ‌ర్షం గుప్పిస్తున్నారు నెటిజ‌న్లు.    
Publish Date:Sep 28, 2021

ఆ రాష్ట్రంలో గజదొంగను పట్టించిన ఈ రాష్ట్రం పోలీసు

ఒక ఐడియా జీవితాన్ని నిజంగా మారుస్తుందో లేదో తెలీదు కానీ.. ఒక చిన్న షేరింగ్ మాత్రం భారీ నేరస్తుల గుట్టు  బయట  పెట్టి తీరుతుంది. అందుకే విలువైన సమాచారం, ఎమర్జెన్సీ సమాచారాన్ని మాత్రమే సోషల్ మీడియా గ్రూపుల్లో షేర్ చేయాలని నిపుణులు చెబుతున్నారు. భారీ నేరాలు చేసి తప్పించుకుంటూ తిరుగుతున్న పేరుమోసిన నేరగాళ్లు సైతం వణికిపోతున్నారంటే అందుక్కారణం సోషల్ మీడియానే.  ఇక వివరాల్లోకి వెళ్దాం. గత జులై 9వ తేదీన తమిళనాడులోని తిరువరక్కడు పోలీస్ స్టేషన్ పరిధిలోని ఓ ఇంట్లో భారీ చోరీ జరిగింది. ఈ సంఘటనలో పెద్దమొత్తంలో బంగారు, వెండి ఆభరణాలు అపహరణకు గురయ్యాయి. ఈ చోరీకి పాల్పడిన నేరస్తుణ్ని గుర్తించేందుకు స్థానికంగా వున్న సీసీ కెమెరాల్లో రికార్డయిన విజువల్స్ ను తిరువరక్కడు పోలీసులు పరిశీలించారు. విజువల్స్ అయితే ఉన్నాయి గానీ ఆ దొొంగ తాలూకు వివరాలు మాత్రం వారిదగ్గర లేవు. ఆ దొంగ ఎక్కడివాడు, పాత నేరాలేమైనా అతనిపై ఉన్నాయా.. అసలు ఆ దొంగను పట్టుకోవాలంటే ఎక్కణ్నుంచి విచారణ మొదలు పెట్టాలన్న కనీస సమాచారం కూడా ఆ సమయంలో వారికి అందుబాటులో లేదు. దీంతో  చెన్నై పోలీసాఫీసర్ కులశేఖరన్ బుర్రలో ఓ ఐడియా తట్టింది. వెంటనే ఆ రోజు జరిగిన నేరం తాలూకు వివరాలతో కలిపి నేరస్తుడి విజువల్స్ ను జాతీయ క్రైం విభాగానికి సంబంధించిన వాట్సప్ గ్రూపులో పోస్ట్ చేశారు. అదే వాట్సాప్ గ్రూపులో వరంగల్ కమిషనరేట్లో టాస్క్ ఫోర్స్ కానిస్టేబుల్ గా పనిచేస్తున్న మీర్ మహమ్మద్ ఆలీ  ఆ విజువల్స్ తీసుకొని అప్పటికే తను సేకరించి పెట్టిన ఆ దొంగ తాలూకు వివరాల పూర్తి సమాచారాన్ని తిరువరక్కడు పోలీస్ స్టేషన్ పంపించారు. చోరీకి పాల్పడిన నిందితుడు, ఆలీ పంపించిన సమాచారం ఒక్కటే కావడంతో తిరువరక్కడు పోలీసులు నిందితుణ్ని సులభంగా గుర్తించి అరెస్టు చేశారు.  అంతేకాదు.. నిందితుడి నుంచి సుమారు 12 లక్షల విలువైన బంగారు, వెండి ఆభరణాలు పోలీసులు స్వాధీనం చేసుకున్నారు. నిందితుణ్ని అరెస్టు చేయడంలో ఆలీ ఇచ్చిన సమాచారం కీలకం కావడంతో చెన్నై పోలీస్ కమిషనర్ శంకర్ జైవాల్.. మీర్ మహమ్మద్ ఆలీని  అభినందిస్తూ వరంగల్ పోలీస్ కమిషనరేట్ కార్యాలయానికి క్యాష్ రివార్డు పంపించారు. వరంగల్ పోలీస్ కమిషనర్ తరుణ్ జోషీ చేతుల మీదుగా ఆలీ క్యాష్ రివార్డు అందుకొని సాటి కానిస్టేబుల్స్ కు స్ఫూర్తిదాయకంగా నిలిచారు. ఆలీ గతంలోనూ కేరళ, ఆంధ్రప్రదేశ్, కర్నాటక రాష్ట్రాలతో పాటు పక్క జిల్లాల్లో జరిగిన చోరీల్లో నిందితులను పట్టిచ్చారు. అలా ఇప్పటికే పలుమార్లు ఆలీని పలు విభాగాల పోలీస్ అధికారులు ఘనంగా సన్మానించారు. అలాగే వరంగల్ పోలీస్ కమిషనరేట్ పరిధిలో గతంలో జరిగిన నేరాల్లోని నిందితులను గుర్తించడంలో ఆలీ చాలా కీలక పాత్ర పోషించారు. ఇలా ఆలీలాగా ప్రతిఒక్కరూ తమకు అప్పగించిన విధులను పూర్తి స్థాయిలో నిర్వర్తిస్తే క్రైమ్ రేట్ అతి తొందరగానే తగ్గిపోతుందని, శ్రేయోదాయకమైన సమాజం ఆవిర్భవిస్తుందని పోలీసు అధికారులు ఆశాభావం వ్యక్తం చేస్తున్నారు
Publish Date:Sep 28, 2021

ప‌వ‌న్‌ను వైసీపీ కావాల‌నే రెచ్చ‌గొడుతోందా? టీడీపీని సైడ్ చేసే వ్యూహ‌మా?

బ‌ల‌మైన శ‌త్రువును దెబ్బ‌కొట్ట‌డం అంత ఈజీ కాదు. మ‌న‌కు అంత బ‌లం లేన‌ప్పుడు.. ప్ర‌త్య‌ర్థి బ‌లాన్ని త‌గ్గించ‌డం ఓ ఎత్తుగ‌డ‌. రాజ‌కీయాల్లో ఇది బాగా వ‌ర్క‌వుట్ అవుతుంది. ప్ర‌స్తుం వైసీపీ ఇదే పొలిటిక‌ల్ స్ట్రాల‌జీని అప్లై చేస్తోంద‌ని అంటున్నారు విశ్లేష‌కులు. ఏపీ వ్యాప్తంగా టీడీపీ ఇప్ప‌టికీ అత్యంత బ‌ల‌మైన ప్ర‌తిప‌క్షంగా ఉంది. నిజాయితీగా ఎలాంటి బెదిరింపులు, కుట్ర‌లు లేకుండా ఎన్నిక‌లు జ‌రిపితే తెలుగుదేశం స‌త్తా ఏంటో తెలుస్తుంది. ఈ విష‌యం అంద‌రికంటే అధికార‌పార్టీకే బాగా తెలుసు. అందుకే, బ‌ల‌మైన టీడీపీని రాజ‌కీయంగా సైడ్ చేసేందుకు.. వైసీపీ ద్విముఖ వ్యూహం అమ‌లు చేస్తోంది. వివిధ అంశాల్లో బీజేపీని, జ‌న‌సేన‌ని క‌వ్వించి, రెచ్చ‌గొట్టి.. ఆ రెండు పార్టీలు నిత్యం వార్త‌ల్లో ఉండేలా చేయ‌డమే ఆ ఎత్తుగ‌డ‌. అలా ఆ రెండు పార్టీలను యాక్టివ్ పాలిటిక్స్‌లో లైమ్‌లైట్‌లో ఉంచి.. ప్ర‌ధాన ప్ర‌తిప‌క్ష‌మైన టీడీపీని సైడ్‌వేస్‌లోకి పంపించేయాల‌నేది వైసీపీ స్కెచ్ అంటున్నారు. అందుకు అనేక ఉదాహ‌ర‌ణ‌లు చూపిస్తున్నారు.  ఇటీవ‌ల టిప్పు సుల్తాన్ విగ్ర‌హం విష‌యంలో బీజేపీ నానార‌చ్చ చేసింది. ఎక్క‌డో ఓ ప‌ట్ట‌ణస్థాయి ఇష్యూని స్టేట్‌వైడ్ ప్రాబ్ల‌మ్‌గా క్రియేట్ చేసి.. బీజేపీ ర్యాలీల‌తో హోరెత్తించి.. ప్ర‌భుత్వంపై పోరాడేందుకు తామే క‌రెక్ట్ అనేలా సీన్ క్రియేట్ చేశారు. అంత‌కుముందు, ఆల‌యాలపై దాడులు, మ‌త‌మార్పిడిలు, టీటీడీలో అన్య‌మ‌త‌స్తుల అంశంలోనూ బీజేపీ యాక్టివ్ పాలిటిక్స్ చేసి.. టీడీపీని డ‌మ్మీ చేసే ప్ర‌య‌త్నం చేసింది. సేమ్ ఇలాంటి స్ట్రాట‌జీనే జ‌న‌సేన విష‌యంలోనూ ప్ర‌యోగిస్తోంది వైసీపీ. గిల్లితే గిల్లించుకోకుండా.. గూబ ప‌గ‌ల‌గొట్టేలా మాట్లాడే ప‌వ‌న్‌క‌ల్యాణ్‌ను క‌వ్వించ‌డం చాలా సింపుల్‌. జ‌స్ట్ ఒక్క మాటంటే చాలు.. మాట‌ల తూటాల‌తో ఎదురుదాడి చేయ‌డం పీకే నైజం. ఆ వీక్‌నెస్‌ను వైసీపీ ఫుల్‌గా క్యాష్ చేసుకుంటోంద‌ని అంటున్నారు. కావాల‌నే ప‌వ‌న్‌క‌ల్యాణ్‌ను రెచ్చ‌గొట్టేందుకే.. తిరుప‌తి ఉప ఎన్నిక‌ల టైమ్‌లో వ‌కీల్‌సాబ్‌ను టార్గెట్ చేశార‌ని.. అద‌లా కంటిన్యూ చేస్తూ.. ఆన్‌లైన్ టికెటింగ్ తీసుకురావ‌డం.. ఇలా మొత్తం మేట‌ర్‌ను పీకే చుట్టూ తిప్పేసింది ప్ర‌భుత్వం. వైసీపీ ట్రాప్‌లో ప‌వర్‌స్టార్ ఈజీగా ప‌డిపోయారు. స్వ‌త‌హాగా అస‌మ‌నం, ఆవేశం ఫుల్లుగా ఉండే ప‌వ‌న్‌క‌ల్యాన్‌.. ఓపిక ప‌ట్టీ ప‌ట్టీ.. రిప‌బ్లిక్ వేదిక‌గా బ్లాస్ట్ అయ్యారు. ఏపీ పాల‌కుల‌ను ఓ రేంజ్‌లో ఏకిపారేశారు. దానికి మ‌రింత మ‌సాలా ద‌ట్టిస్తూ.. పేర్ని నాని, పోసాని, స‌జ్జ‌ల లాంటి వాళ్లు ఆ అగ్నిగుండం ఆర‌కుండా.. మ‌రింత ఆజ్యం పోస్తున్నారు. ప‌వ‌న్ సైతం ట్విట‌ర్‌లో ర‌చ్చ కంటిన్యూ చేస్తున్నారు. ఈ టోట‌ల్ ఎపిసోడ్‌లో ఎక్క‌డా టీడీపీ ప్ర‌స్తావ‌న లేక‌పోవ‌డం.. జ‌న‌సేన వ‌ర్సెస్ వైసీపీ వార్ ర‌క్తిక‌ట్ట‌డం ఆస‌క్తిక‌ర‌మే కాదు వ్యూహాత్మ‌క‌మూ అంటున్నారు.  వైసీపీకీ కావ‌ల‌సింది ఇదే. ప్ర‌భుత్వంపై బాగా పోరాడుతున్నారంటూ ప్ర‌జ‌ల అటెన్ష‌న్ జ‌న‌సేన వైపో, బీజేపీ వైపో షిఫ్ట్ చేయ‌డం అధికార‌పార్టీ టార్గెట్ అంటున్నారు. ఎందుకంటే, ఎంత ఎగిరెగిరి ప‌డినా జ‌న‌సేన కానీ, బీజేపీ కానీ ఇప్ప‌ట్లో ఏపీలో ప‌వ‌ర్‌లోకి వ‌చ్చే ఛాన్సే లేదు. సంస్థాగ‌తంగా ఆ రెండు పార్టీలు బాగా బ‌లహీనం. టీడీపీ అలా కాదు.. ఏమాత్రం అవ‌కాశం క‌లిసొచ్చినా.. మునుప‌టి వైభ‌వం ఖాయం. అందుకే, ఆ పార్టీకి ఆ అవ‌కాశం చిక్క‌కుండా చేసేందుకే.. బీజేపీ, జ‌న‌సేన‌ల‌ను ఎప్ప‌టిక‌ప్పుడూ రెచ్చ‌గొడుతూ వైసీపీ రాజ‌కీయ ప‌బ్బం గ‌డుపుకుంటోంద‌ని అనుమానిస్తున్నారు. ఇలా ప్ర‌భుత్వ వ్య‌తిరేక‌త టీడీపీ, బీజేపీ. జ‌న‌సేన‌ల మ‌ధ్య చీలిపోయి.. ఆ మేర‌కు వైసీపీ లాభం పొంద‌ట‌మే ఆ పార్టీ పొలిటిక‌ల్ స్ట్రాట‌జీగా క‌నిపిస్తోందని అంటున్నారు.
Publish Date:Sep 28, 2021

సినిమా టికెట్లపై సీరియస్.. ప్రజా సమస్యలపై సైలెన్స్! ఇదేందయ్యా పవన్ కల్యాణ్.. 

ఆంధ్రప్రదేశ్ రాజకీయాల్లో కాక రాజుకుంది. జనసేన అధినేత పవన్ కల్యాణ్, వైసీపీ నేతల మధ్య తీవ్ర స్థాయిలో మాటల యుద్దం సాగుతోంది. రిప‌బ్లిక్ సినిమా ఈవెంట్ లో  వైసీపీ ప్రభుత్వంపై పవన్ కల్యాణ్ చేసిన ఆరోపణలతో రాజుకున్న వేడి.. మరింత తీవ్రమవుతోంది. ఏపీ పాల‌కుల‌ను స‌న్నాసులు, ద‌ద్ద‌మ్మ‌లూ అంటూ మొద‌లుపెట్టి.. సినిమా టికెట్ల‌ ఆన్‌లైన్ అమ్మ‌కాల‌పై ఓ రేంజ్‌లో విమ‌ర్శ‌లు చేశారు పవన్. వెంటనే రియాక్ట్ అయిన  మంత్రులు, వైసీపీ నేతలు తీవ్ర పదజాలంతో విరుచుకుపడ్డారు. మంత్రులు, వైసీపీ నేతలు త‌న‌పై అటాక్‌కు దిగ‌డంతో మ‌రోసారి ట్వీట్‌తో పంచ్ ఇచ్చారు పవన్ కల్యాణ్. వైసీపీ నేతల మాటలను గ్రామ సింహాల అరుపులతో పోల్చారు. 'హూ లెట్ ద డాగ్స్ ఔట్' అన్న పాటను ట్వీట్ చేస్తూ.. మొరిగే కుక్క‌ల‌కు తాను భ‌య‌ప‌డ‌న‌నే అర్థం వ‌చ్చేలా ట్వీట్ చేశారు. పవన్ కౌంటర్ ట్వీట్ కు అదేస్థాయిలో కౌంటర్ ఇచ్చారు మంత్రి పేర్నినాని.  పవన్ కల్యాణ్, వైసీపీ నేతల మధ్య వార్ సాగుతుండగానే మరో అంశంపై జనాల్లో చర్చ సాగుతోంది. పవన్ కల్యాణ్ ఇప్పుడు ఈ స్థాయిలో ఎందుకు స్పందించారన్నదానిపై రకరకాల చర్చలు సాగుతున్నాయి. సినిమా టికెట్లను ఆన్ లైన్ విక్రయించాలన్న జగన్ సర్కార్ నిర్ణయంపై ఓ రేంజ్ లో ఫైరైన పవన్ కల్యాణ్.. ఏపీ సమస్యల విషయంలో ఎందుకు ఇంతలా స్పందించలేదని కొన్ని వర్గాల నుంచి ప్రశ్న వస్తోంది. జగన్ రెడ్డి పాలనలో ఏపీలో పాలనా అస్తవ్యస్థంగా సాగుతుందనే విమర్శలు ఉన్నాయి. ఏపీ ప్రస్తుతం అప్పుల ఊబిలో చిక్కుకుంది. దేశంలోనే అప్పులు ఎక్కువ చేసిన రాష్ట్రాల్లో టాప్ లో ఉంది. ఉద్యోగులకు సకాలంలో వేతనాలు ఇవ్వడం లేదు. ప్రతి నెలా అప్పులు తెస్తేనే ఉద్యోగులకు జీతాలు వచ్చే పరిస్థితి. ఇలాంటి పరిస్థితులపై పవన్ కల్యాణ్ ఎందుకు ఈ స్థాయిలో ప్రశ్నించలేదని కొందరు అడుగుతున్నారు. టీడీపీ ప్రభుత్వం అంతర్జాతీయ రాజధానిగా నిర్మించేందుకు ప్లాన్ చేసిన అమరావతిని జగన్ సర్కార్ మూడు ముక్కలు చేసే ప్రతిపాదన చేసింది. కోర్టు కేసులతో ప్రస్తుతానికి ఆగిపోయినా.. అమరావతిని మాత్రం గాలికొదిలేసింది. రాజధాని రైతులు 20 నెలలకు పైగా ఆందోళనలు చేస్తున్నారు. అయితే అమరావతి విషయంలో ఏదో మాట్లాడాలన్నట్లుగా స్పందించారు కాని.. సినిమా టికెట్లపై స్పందించినంత రేంజ్ లో పవన్ ఎందుకు రియాక్ట్ కాలేదనే ప్రశ్న వస్తోంది. మూడు రాజధానులకు వ్యతిరేకంగా ఎందుకు ఉద్యమించలేదని కొందరు అడుగుతున్నారు. గతంలో అమరావతికి మద్దతు తెలిపిన పవన్.. ఆ రాజధానిని మూడు ముక్కలు చేస్తున్నా సీరియస్ గా స్పందించలేదనే విమర్శలు ఉన్నాయి.  సినిమా టికెట్ల ఇష్యూపై మాట్లాడినంత ఘాటుగా అమరావతి విషయంలో మాట్లాడితే  రాజధాని ఉద్యమానికి మరింత ఊపు వచ్చేదని అంటున్నారు. విశాఖ స్టీల్ ప్లాంట్... ఆంధ్రుల హక్కుగా సాధించిన కర్మాగారం. విశాఖ ఉక్కును ప్రైవేటుకు అమ్మేస్తోంది మోడీ ప్రభుత్వం. ఆంధ్రుల ఆత్మగౌరవంగా చెప్పుకునే విశాఖ స్టీల్ ప్లాంట్ ను కేంద్ర ప్రభుత్వం అమ్మేస్తున్నా జనసేన చీఫ్ పవన్ కల్యాణ్ మాత్రం సీరియస్ గా రియాక్ట్ కాలేదు. బీజేపీతో జనసేన పొత్తు పెట్టుకోవడంతో.. ఆయన ఈ విషయంలో సైలెంటుగానే ఉండిపోయారు. విశాఖ స్టీల్ ప్లాంట్ ను ప్రైవేట్ పరం చేయవద్దంటూ కొన్ని ప్రకటనలు చేయడం తప్ప... బీజేపీని తీవ్రంగా విమర్శించి లేదు. విశాఖ స్టీల్ ప్లాంట్ లాంటి కీలకమైన అంశంలో మాట్లాడని పవర్ స్టార్... సినిమా టికెట్ల విషయంలో మాత్రం తీవ్రంగా రియాక్ట్ కావడంపై కొన్ని వర్గాల నుంచి విమర్శలు వస్తున్నాయి. రాజకీయ పార్టీ అధినేతగా ఉంటూ... ప్రజా సమస్యలపై పెద్దగా పట్టింపు లేదన్నట్లుగా వ్యవహరిస్తూ... సినిమాల విషయంలో మాత్రం సీరియస్ గా రియాక్ట్ కావడం చర్చగా మారింది.  ఇవే కాదు.. ఏపీలో చాలా సమస్యలు ఉన్నాయి. ఆలయాలపై దాడులు జరిగాయి. టీటీడీ నిత్యం వివాదాల్లో ఉంటుంది. ఆస్తి పన్ను పెంచిన ప్రజలపై భారం మోపారు. పెట్రోల్, డీజిల్ ధరలు... దక్షిణాదిలో ఆంధ్రప్రదేశ్ లోనే ఎక్కువ. లిక్కర్ పాలసీపై మొదటి నుంచి వివాదమే ఉంది. ఇసుక, మైనింగ్ మాఫియా రెచ్చిపోతుందనే ఆరోపణలు ఉన్నాయి. ఏపీలో మహిళలపై దాడులు పెరిగిపోయాయి. తాడేపల్లిలోని ముఖ్యమంత్రి క్యాంప్ కార్యాలయం సమీపంలోనే గ్యాంగ్ రేప్ జరిగింది.  ఇలాంటి సమస్యలపై పవన్ కల్యాణ్ ఏనాడు సీరియస్ గా స్పందించలేదనే విమర్శలు ఉన్నాయి. ఇవే ఇప్పుడు చర్చకు వస్తున్నాయి. ప్రజా సమస్యలు చాలా ఉన్నా పెద్దగా స్పందించని పవన్ కల్యాణ్... తన సినిమాకు అడ్డంకులు స్పష్టించారనే కారణంగా ప్రభుత్వంపై రెచ్చిపోయారనే విమర్శలు వస్తున్నాయి.  పవన్ కల్యాణ్ తీరు చూస్తుంటే... ఆయనకు రాజకీయాలకన్నా సినిమాలే ముఖ్యమన్నట్లుగా ఉందని అంటున్నారు విశ్లేషకులు. జనసేన పార్టీకి  చీఫ్ గా ఉంటూ రాజకీయాలకంటే సినిమాలే ఎక్కువన్నట్లుగా వ్యవహరించడం ఆయనకు మైనస్ అవుతుందంటున్నారు. ఇలాంటి చర్యలతో రాజకీయాలపై సీరియస్ నెస్ లేదనే ముద్ర ఆయనపై పడుతుందని చెబుతున్నారు. 
Publish Date:Sep 28, 2021

కౌశిక్ రెడ్డికి ఎమ్మెల్సీ లేనట్టేనా? హుజురాబాద్ లో ఏం జరగబోతోంది? 

ఇలా పార్టీలో చేరి .. అలా ఎమ్మెల్సీగా నామినేట్ అయిన కౌశిక్ రెడ్డి, అదృష్టమే అదృష్టం. ఏళ్ల తరబడి క్యూలో నిలబడిన వారిని కనికరించని కేసీఆర్, కాంగ్రెస్ నుంచి వచ్చిన కౌశిక్ రెడ్డిని పట్టుమని పక్షం రోజులు తిరక్కుండానే ఎమ్మెల్సీ చేశారు. అది కూడా చుక్క చెమట, రూపాయి ఖర్చులేకుండా ఉచిత (గవర్నర్) కోటాలో  కౌశిక్ రెడ్డి ఎమ్మెల్సీ అయిపోయారు... అనుకున్నారు. అదృష్టం అంటే అది కదా, అంటూ చాలా మంది చాలా విధాలుగా ఆశ్చర్యానికి గురయ్యారు.  నిజం చెప్పాలంటే చాలా మంది కౌశిక్ రెడ్డి అదృష్టాన్ని చూసి ఈర్షకు కూడా గురయ్యే ఉంటారు. అందులో ఎవరు ఎలాంటి శాపనార్ధాలు పెట్టారో ఏమో గానీ, అడక్కుండానే వచ్చి పడిన అదృష్టం, ఇప్పడు చెప్పా పెట్టకుండా చెట్టెక్కి కూర్చుంది. అంతే కాదు,అది ఇప్పట్లో చెట్టు దిగే దారి కూడా కనిపించడం లేదు. కౌశిక్ రెడ్డిని గవర్నర్ ఎమ్మెల్సీగా నామినేట్ చేయాలని సిఫార్సు చేస్తూ, రాష్ట్ర మంత్రివర్గం పంపిన తీర్మానం ఫైలును గవర్నర్ భద్రంగా పెండింగ్ లో పెట్టారు. అంతే కాదు, ఇప్పట్లో ఆ ఫైల్ కు మోక్షం లేదని, రాదని గవర్నర్ మరోసారి స్పష్టం చేశారు. దీంతో  వచ్చినట్లే వచ్చిన ఎమ్మెల్ల్సీ పదవి, ఓ జీవిత కాలం లేటైనా కావచ్చని, ఇప్పట్లో కౌశిక్ రెడ్డి ఎమ్మెల్సీ ముచ్చట తీరక పోవచ్చని, అంతర్గత వర్గాల సమాచారం.  గతంలో ఒక సారి, కౌశిక్ రెడ్డి ఫైల్ పరిశీలనలో ఉందని, అయన అర్హతలను పరిశీలించేందుకు ఇంకొంత సమయం పడుతుందని చెప్పిన గవర్నర్ తమిళి సై మళ్ళీ మరో మారు అదే మాట రిపీట్ చేశారు. ఓ టీవీ చానల్ కు ఇచ్చిన ఇంటర్వ్యూలో,  ఇట్ ఈజ్ స్టిల్ ఇన్ పెండింగ్. ఇంకా పెండింగ్’లోనే  ఉంది, కౌశిక్ రెడ్డి ఎమ్మెల్సిగా అమోదించేందుకు మరింత సమయం కావాలని అమె స్పష్ట చేశారు. అంతే కాదు, అది అంత ఇంపార్టెంట్ విషయం కాదన్నట్లుగా, ఇప్పట్లో తేలే విషయం అసలే కాదన్నట్ల్గు గవర్నర్ మాట్లాడారు. గవర్నర్ ఇలా మళ్ళీ మళ్ళీ వాయిదా వేస్తున్నారంటే, అందుకు అయితే, ఆయన అర్హత, యోగ్యతల విషయంలో గవర్నర్’కు అనుమానాలైనా ఉంది ఉండాలి ... లేదంటే గవర్నర్ అడిగిన వివరాలను ఇవ్వడంలో ప్రభుత్వం జాప్యం చేయడం అయినా కారణం అయ్యుండాలని అధికార వర్గాలు అనుమానిస్తున్నాయి.   రాజకీయ నిర్ణయాల విషయంలో ఆచి తూచి అడుగులు వేసే ముఖ్యమంత్రి కేసీఆర్ ఈ విషయంలోనూ  క్యాలిక్యూటెడ్ నిర్ణయమే తీసుకున్నారని రాజకీయ వర్గాల్లో చర్చ జరుగుతోంది. అన్నీ తెలిసే, ముఖ్యమత్రి కౌశిక్ రెడ్డిని రెంటికి చెడ్డ రేవడిని చేశారని అటు కాంగ్రెస్ వర్గాల్లో, ఇటు తెరాస వర్గాల్లో వినిపిస్తోంది. కౌశిక్ రెడ్డికి  త్రిశంకు సభలో పెర్మనెంట్ సీటు ఇచ్చేందుకే, ముఖ్యమంత్రి ఆయనకు పెద్దల సభలో సీటును ఎరగా వేశారని కూడా రాజకీయ వర్గాల్లో చర్చ జరుగుతోంది. ఏది ఏమైనా కౌశిక్ రెడ్డి గవర్నర్ కోటాలో ఎమ్మెల్సీ అయ్యే అవకాశం మాత్రం ఇక లేదనే అనికోవచ్చని అంటున్నారు. ఎమ్మెల్సీ విషయంలో సీఎం కేసీఆర్ తీరుపై కౌశిక్ రెడ్డి అనుచరులు కూడా అసహనానికి లోనవుతున్నారు. ఎమ్మెల్సీ ఆమోదంపై గవర్నర్ తో ముఖ్యమంత్రి మాట్లాడకపోవతంపై వాళ్లు అనుమానాలు వ్యక్తం చేస్తున్నారు. గతంలో చాలా విషయాల్లో రాజ్ భవన్ కు వెళ్లి కేసీఆర్ చర్చించారని.. ఎమ్మెల్సీ విషయంలో ఆ పని ఎందుకు చేయడం లేదని ప్రశ్నిస్తున్నారు. కౌశిక్ రెడ్డిని నమ్మించి నట్టేట ముంచారనే ఆరోపణలు కొందరు చేస్తున్నారు. దీని ప్రభావం హుజురాబాద్ ఉప ఎన్నికలో ఉంటుందని కూడా చెబుతున్నారు. 
Publish Date:Sep 28, 2021