కోలీవుడ్‌ స్టార్‌ ధనుష్‌, నేచురల్‌ బ్యూటీ సాయిపల్లవి కలిసి నటిస్తున్న సినిమా ‘O.M’. మలయాళ స్టార్‌ మమ్ముట్టి కూడా కీలక పాత్రలో నటిస్తుండటంతో ఈ సినిమాపై మొదటి నుంచే ఆసక్తి నెలకొంది. ఇప్పటికే విడుదలైన ప్రమోషనల్‌ వీడియోలు ప్రేక్షకుల్లో అంచనాలను పెంచాయి. తాజాగా ఈ సినిమా ట్రైలర్‌ను చిత్ర యూనిట్‌ విడుదల చేసింది. దాదాపు మూడు నిమిషాల నిడివితో ఉన్న ఈ ట్రైలర్‌ ఆద్యంతం యాక్షన్‌ సన్నివేశాలతో ఉత్కంఠగా సాగింది.
ఆంధ్రప్రదేశ్‌లోని శేషాచలం అడవుల్లో జరిగే ఎర్రచందనం స్మగ్లింగ్‌ నేపథ్యంలో ఈ సినిమా కథ సాగుతుంది. ఈ అక్రమ వ్యాపారాన్ని అడ్డుకోవడానికి ఆంధ్రప్రదేశ్‌, తమిళనాడు పోలీసు బృందాలు కలిసి చేపట్టే ఆపరేషన్ చుట్టూ కథ తిరుగుతుంది. తమిళనాడు స్పెషల్‌ టాస్క్‌ ఫోర్స్‌ అధికారిగా నటిస్తున్న ధనుష్‌.. స్మగ్లింగ్‌ ముఠాలోకి ఒక కూలీగా వెళ్లి అక్కడి కార్యకలాపాలపై సమాచారం సేకరించే అండర్‌కవర్‌ ఆపరేషన్‌లో పాల్గొంటారు. అడవుల్లో కట్టెలు కొట్టే వ్యక్తిగా ముఠాలో కలిసిపోయి వారి నమ్మకాన్ని సంపాదించే సన్నివేశాలు ట్రైలర్‌లో కనిపించాయి.
ఇక సాయిపల్లవి ఈ సినిమాలో నిత్యారెడ్డి అనే పోలీస్ అధికారిణి పాత్రలో నటిస్తోంది. ఆంధ్రప్రదేశ్‌ ప్రత్యేక టాస్క్‌ ఫోర్స్‌ బృందానికి నాయకత్వం వహిస్తూ ఆపరేషన్‌ను ముందుకు నడిపిస్తుంది. ట్రైలర్‌లో ఆమె పాత్రకు కూడా మంచి ప్రాధాన్యత ఇచ్చారు. ధనుష్‌, మమ్ముట్టిలతో పాటు సాయిపల్లవి కూడా యాక్షన్‌ సన్నివేశాల్లో కనిపించడం విశేషం. మరోవైపు మమ్ముట్టి తెరపై కనిపించే తీరు, ఆయన పాత్రలోని గ్రే షేడ్స్‌ సినిమాపై మరింత ఆసక్తిని పెంచుతున్నాయి.
ఈ సినిమాలో శ్రీలీల కూడా నటిస్తోంది. ధనుష్‌ భార్య పాత్రలో ఆమె కనిపించనున్నట్లు సమాచారం. ఇంద్రన్స్‌, నసీరుద్దీన్‌ షా తదితరులు ఇతర కీలక పాత్రలు పోషిస్తున్నారు. ‘అమరన్‌’ సినిమాతో గుర్తింపు తెచ్చుకున్న రాజ్‌కుమార్‌ పెరియసామి ఈ చిత్రానికి దర్శకత్వం వహిస్తున్నారు. సాయి అభ్యంకర్‌ సంగీతం అందిస్తుండగా, వండర్‌బార్‌ ఫిల్మ్స్‌, ఆర్‌ టేక్‌ స్టూడియోస్‌ సంస్థలు సంయుక్తంగా నిర్మిస్తున్నాయి.
ఇది కూడా చదవండి: పెళ్లికి సిద్ధమైన మ‌రో హీరోయిన్.. వైర‌ల్ అవుతున్న బ్యాచిల‌ర్ పార్టీ వీడియో.!
మొదట ఈ సినిమాకు ‘OM’ అనే టైటిల్‌ను ప్రకటించారు. అయితే ఇప్పుడు దానిని ‘O.M’గా మార్చారు. ‘ఆపరేషన్ మోల్‌’ అనే పోలీస్ ఆపరేషన్ పేరును సూచించేలా ఈ టైటిల్‌ పెట్టారు. ఎర్రచందనం అక్రమ రవాణా, దాని వెనుక ఉన్న నెట్‌వర్క్‌, ఆ ముఠాను పట్టుకోవడానికి పోలీసులు చేసే ప్రయత్నాలు సినిమాలో ప్రధానంగా ఉండబోతున్నాయి. వాస్తవ సంఘటనల నుంచి స్ఫూర్తి పొంది ఈ కథను రూపొందించినట్లు దర్శకుడు గతంలో వెల్లడించారు.
ఇక ఈ సినిమా నవంబర్‌ 20న ప్రపంచవ్యాప్తంగా థియేటర్లలో విడుదల కానుంది. తమిళంతో పాటు తెలుగు, హిందీ, ఇతర దక్షిణాది భాషల్లోనూ ప్రేక్షకుల ముందుకు రానుంది. ధనుష్‌, మమ్ముట్టి వంటి ఇద్దరు స్టార్‌ నటులు ఒకే సినిమాలో కనిపిస్తుండటం, సాయిపల్లవి పోలీస్ అధికారిణిగా కొత్త తరహా పాత్రలో మెప్పించబోతుండటం ఈ సినిమాకు ప్రధాన ఆకర్షణ. మరి ట్రైలర్‌తో ఆసక్తి పెంచిన ‘O.M’ సినిమా థియేటర్లలో ఎలాంటి అనుభూతిని అందిస్తుందో చూడాలి.
మీకు నచ్చవచ్చు:
‘రామాయణ’ బాక్సాఫీస్ ప్రభంజనం.. ఆ మూడు సినిమాల రికార్డులు గల్లంతు.!
తనికెళ్ళ భరణి, బ్రహ్మానందంకి షాక్ ఇచ్చిన పూజారి: అహం అణిగిందా?
[Dhanush, O.M, O.MChapter1, SaiPallavi, Mammootty, Udhiram, RajkumarPeriasamy]
