స్థానిక ఎన్నికల సమాయత్తం విషయంలో తెలుగుదేశం దూకుడు ప్రదర్శిస్తున్నది. ఒకదాని వెంట ఒకటి అన్నట్లుగా స్థానిక అభ్యర్థుల జాబితాలను విడుదల చేస్తున్నది. రాష్ట్రంలో   మున్సిపల్ కార్పొరేషన్లు, మున్సిపాలిటీలు,  నగర పంచాయతీ ఎన్నికలకు సంబంధించి తెలుగుదేశం పార్టీ తమ అభ్యర్థుల రెండో జాబితాను శనివారం (అక్టోబర్ 17) విడుదల చేసింది.  మొదటి జాబితాలో  36 మంది అభ్యర్థులను ప్రకటించిన అనంతరం, మిత్రపక్షాలతో చర్చలు పూర్తి చేసుకుని  22 మంది అభ్యర్థుల పేర్లతో  రెండో జాబితాను తెలుగుదేశం అధినేత, ముఖ్యమంత్రి నారా చంద్రబాబు విడుదల చేశారు. 

రెండో జాబితాలో ప్రధాన మున్సిపల్ కార్పొరేషన్లు, మున్సిపాలిటీలు,  నగర పంచాయతీలకు సంబంధించి మేయర్, ఛైర్మన్ అభ్యర్థులను ప్రకటించారు. ఇందులో భాగంగా  మచిలీపట్నం మున్సిపల్ కార్పొరేషన్ మేయర్ అభ్యర్థిగా షేక్ అబ్దుల్ అబీదా పేరు  ప్రకటించారు. అదేవిధంగా నర్సీపట్నం మున్సిపాలిటీ ఛైర్‌పర్సన్ స్థానానికి సీనియర్ నాయకురాలు చింతకాయల పద్మావతిని బరిలోకి దించారు. 

తాజాగా విడుదల చేసిన ఈ జాబితాలోనూ స్థానిక సమీకరణాలు, గెలుపు గుర్రాలకు ప్రాధాన్యత ఇస్తూ అభ్యర్థుల ఎంపిక సాగింది. పార్టీ కోసం సుదీర్ఘకాలంగా పనిచేస్తున్న నాయకులు, వారి కుటుంబ సభ్యులతో పాటు స్థానికంగా ప్రజాదరణ ఉన్న వర్గాలకు చోటు కల్పించారు. మొదటి జాబితా తరహాలోనే ఈ రెండో విడతలోనూ మహిళలకు, సామాజిక వర్గాల ప్రాతినిధ్యానికి తగిన ప్రాధాన్యత ఇచ్చారు.

మున్సిపల్ ఎన్నికల నామినేషన్ ప్రక్రియ కొనసాగుతుండటంతో, జాబితాలో పేర్లు ఖరారైన అభ్యర్థులు తక్షణమే క్షేత్రస్థాయిలో ప్రచారానికి శ్రీకారం చుట్టాలని అధిష్టానం ఆదేశించింది. ప్రతి నియోజకవర్గ పరిధిలో ఉన్న స్థానిక ఎమ్మెల్యేలు, ఇన్‌ఛార్జులు అభ్యర్థులకు అండగా ఉంటూ నామినేషన్ల ప్రక్రియను ప్రశాంతంగా పూర్తి చేయించాలని, ప్రజా సమస్యలపై పక్కా కార్యాచరణతో ముందుకు సాగాలని ఈ సందర్భంగా చంద్రబాబు ఆదేశించారు.  

  రెండో జాబితా విడుదల కావడంతో టీడీపీ పోటీ చేసే ప్రధాన పట్టణ స్థానాలన్నింటికీ అభ్యర్థుల ప్రకటన దాదాపు పూర్తైనట్లయింది. కూటమి భాగస్వామ్య పక్షాలైన జనసేన, బీజేపీలతో సయోధ్య కుదుర్చుకుని, మిగిలిన చోట్ల పరస్పర సమన్వయంతో ఎన్నికల బరిలోకి దిగుతున్నారు. సంక్షేమ పథకాలు,  అభివృద్ధి కార్యక్రమాలను ప్రజల్లోకి తీసుకెళ్లడం ద్వారా స్థానిక పోరులో మెజారిటీ స్థానాలను కైవసం చేసుకోవాలని టీడీపీ భావిస్తోంది.  

ప్రధాన పార్టీలు తమ జాబితాలను పూర్తిస్థాయిలో వెల్లడించడంతో రాష్ట్రవ్యాప్తంగా పురపాలక ఎన్నికల రాజకీయం రసకందాయంలో పడింది. అభ్యర్థులు తమ తమ స్థానాల్లో ప్రచార హోరెత్తించేందుకు కార్యాలయాలు ప్రారంభిస్తూ ఎన్నికల సమరానికి సిద్ధమవుతున్నారు. నామినేషన్ల ఘట్టం పూర్తయిన వెంటనే ప్రచార పర్వం మరింత ఊపందుకునే అవకాశం ఉంది.

[AP Local Body Elections, TDP Second List, Candidates,  Chandrababu Naidu Candidates List, Machilipatnam Mayor CandidateTelugu One]