Andhra Pradesh Top Story | Telugu Top Story News | Top Story

హఫీజ్‌పేట్ లాడ్జిలో 27 ఏళ్ల డాక్టర్ సృజన హత్య: రంగంలోకి మియాపూర్ పోలీసులు!

హైదరాబాద్‌లోని మియాపూర్ హఫీజ్‌‌పేట్ పరిధిలో వెలుగుచూసిన ఒక దారుణ సంఘటన తెలుగు రాష్ట్రాల్లో తీవ్ర కలకలం రేపింది. ఉన్నత చదువులు చదివి, డాక్టర్‌గా సమాజానికి సేవ చేయాల్సిన ఒక 27 ఏళ్ల యువతి.. సోషల్ మీడియా పరిచయం వల్ల ప్రాణాలు కోల్పోయిన తీరు అందరినీ తీవ్ర దిగ్భ్రాంతికి గురిచేస్తోంది. సంగారెడ్డి పట్టణంలోని శాంతినగర్‌కు చెందిన భూమయ్య రెండో కుమార్తె కె. సృజన (27) చిన్నతనం నుంచే చదువుల్లో ఎంతో ప్రతిభ కనబరిచింది. మహబూబ్‌నగర్‌లో ఎంబీబీఎస్ పూర్తి చేసిన సృజన, ప్రస్తుతం హనుమకొండలోని ఒక వైద్య కళాశాలలో పీడియాట్రిషన్ (పిల్లల వైద్య విభాగం) పీజీ మొదటి సంవత్సరం చదువుతోంది. చదువుతో పాటు హనుమకొండలోని ఒక ప్రైవేట్ ఆసుపత్రిలో పీడియాట్రిషియన్‌గా వైద్య సేవలు కూడా అందిస్తోంది. అయితే సుమారు 7 ఏళ్ల క్రితం ఇన్స్టాగ్రామ్ (Instagram) ద్వారా సృజనకు రవికుమార్ అనే యువకుడితో పరిచయం ఏర్పడింది. కాలక్రమేణా ఆ పరిచయం కాస్తా నమ్మకమైన స్నేహంగా మారింది. ఇటీవల రవికుమార్ సృజన వద్ద నుండి ఒక బంగారు గొలుసు తీసుకున్నాడని, ఆ గొలుసును తిరిగి ఇచ్చేస్తానని నమ్మబలికి ఆమెను హైదరాబాద్‌కు రావాలని కోరినట్లు పోలీసుల ప్రాథమిక విచారణలో తెలిసింది. రవికుమార్ మాటలను నమ్మిన సృజన గత నెల సెప్టెంబర్ 30వ తేదీన హనుమకొండ నుండి హైదరాబాద్‌కు బయలుదేరి వచ్చింది. కానీ, ఆ తర్వాత ఆమె ఎంతకీ తిరిగి రాకపోవడమే కాకుండా, సెల్‌ఫోన్ కూడా స్విచ్ఛాఫ్ కావడంతో అనుమానం వచ్చిన స్నేహితులు తక్షణమే సృజన తండ్రి భూమయ్యకు సమాచారం అందించారు. ఆందోళన చెందిన తండ్రి భూమయ్య వెంటనే పోలీసులకు ఫిర్యాదు చేయడంతో రంగంలోకి దిగిన పోలీసులు ప్రత్యేక బృందాలుగా ఏర్పడి దర్యాప్తు ప్రారంభించారు. సృజన సెల్‌ఫోన్ సిగ్నల్ మరియు కాల్ డేటా ఆధారంగా ఆమె మియాపూర్ పరిధిలోని హఫీజ్‌పేట్ ప్రాంతంలో ఉన్నట్లు గుర్తించారు. ఈ దర్యాప్తు క్రమంలో రవికుమార్ సెప్టెంబర్ 29నే హఫీజ్‌పేట్‌లోని ఒక సర్వీస్ అపార్ట్‌మెంట్ లేదా లాడ్జిలో రూమ్ అద్దెకు తీసుకున్నట్లు పోలీసులకు సాంకేతిక ఆధారాలు లభించాయి. వెంటనే ఆ లాడ్జి గది వద్దకు చేరుకుని తలుపులు తెరిచి చూడగా, సృజన మంచంపై మృతదేహమై కనిపిచడం తీవ్ర దిగ్భ్రాంతిని కలిగించింది. మృతదేహం అప్పటికే కుళ్ళిపోయిన స్థితిలో ఉండటంతో, ఆమెను 2 నుండి 3 రోజుల క్రితమే అత్యంత కిరాతకంగా హత్య చేసి ఉండవచ్చని పోలీసులు ప్రాథమికంగా భావిస్తున్నారు. లాడ్జి గదిలో సృజనను దిండుతో ముఖంపై నొక్కి ఊపిరాడకుండా చేసి హత్య చేసి ఉంటారని పోలీసులు అనుమానిస్తున్నారు. పథకం ప్రకారమే బంగారు గొలుసు ఇస్తానని నమ్మించి ఆమెను హైదరాబాద్ రప్పించి ఈ ఘాతుకానికి ఒడిగట్టినట్లు ఆధారాలు లభిస్తున్నాయి. హత్య జరిగిన అనంతరం నిందితుడు రవికుమార్ పరారవ్వడమే కాకుండా తన ఫోన్‌‌ను స్విచ్ఛాఫ్ చేసుకున్నాడు. మియాపూర్ సర్కిల్ ఇన్‌స్పెక్టర్ ఆధ్వర్యంలోని పోలీసు బృందం ఘటనా స్థలాన్ని పరిశీలించి కేసు నమోదు చేసింది. మృతదేహాన్ని గాంధీ ఆసుపత్రికి పోస్టుమార్టం నిమిత్తం తరలించారు. లాడ్జిలోని సీసీటీవీ ఫుటేజ్, సాంకేతిక ఆధారాలను పరిశీలిస్తూ నిందితుడు రవికుమార్ కోసం పోలీసులు తీవ్రంగా గాలిస్తున్నారు. ఏడేళ్ల సోషల్ మీడియా పరిచయం చివరకు ఒక దివ్యమైన భవిష్యత్తు ఉన్న యువ డాక్టర్ ప్రాణాలను బలితీసుకోవడం సమాజంలో ఆన్‌లైన్ పరిచయాల పట్ల ఉన్న ప్రమాదాలను మరొకసారి హెచ్చరిస్తోంది. Doctor Srijana murder, Hafeezpet lodge murder case, Miyapur police murder investigation, Hyderabad crime news, Doctor Srijana news, Hafeezpet crime update, Miyapur police doctor case.

Published on: Sat Oct 3, 2026 11:01AM

హైదరాబాద్‌లో విషాదం..యువ వైద్యురాలు అనుమానాస్పద మృతి.!

హైదరాబాద్‌‌ నగరంలో మరో దారుణ ఘటన వెలుగు చూసింది. మియాపూర్ పోలీస్ స్టేషన్ పరిధిలోని హఫీజ్‌పేట్ ప్రాంతంలో ఓ యువ వైద్యురాలు అనుమానాస్పద స్థితిలో మృతి చెందడం స్థానికంగా తీవ్ర కలకలం రేపింది. సంగారెడ్డి జిల్లాకు చెందిన 27 ఏళ్ల యువతి మహబూబ్‌నగర్‌లో మెడిసిన్ పూర్తి చేసి, ఇటీవల వరంగల్‌లో పీడియాట్రిక్స్ విభాగంలో పీజీ పట్టా అందుకున్నారు. భవిష్యత్తుపై ఎన్నో ఆశలతో ఉన్న ఆమె ఇలా అకస్మాత్తుగా ప్రాణాలు కోల్పోవడం కుటుంబ సభ్యులను తీవ్ర విషాదంలోకి నెట్టింది.కొద్ది రోజుల క్రితం ఆమె తన స్నేహితుడైన యువకుడితో కలిసి వరంగల్ నుంచి నగరానికి చేరుకున్నారు. అనంతరం హఫీజ్‌పేట్‌లోని ఆదిత్య నగర్ ప్రాంతంలో ఉన్న ఒక ప్రైవేట్ సర్వీస్ అపార్ట్‌మెంట్‌లో రూమ్ తీసుకుని బస చేసినట్టు పోలీసుల ప్రాథమిక విచారణలో తేలింది. అయితే, గత కొన్ని గంటలుగా కూతురి ఫోన్ నంబర్‌కు ఏమాత్రం స్పందన రాకపోవడంతో తల్లిదండ్రులు తీవ్ర ఆందోళన చెందారు. ఆ సమయంలో అనుమానం వచ్చి ఆమె మొబైల్ ఫోన్ లొకేషన్‌ను ట్రేస్ చేయగా, అది మియాపూర్ పరిధిలోని ప్రాంతంలో చూపించింది.దీంతో వెంటనే అప్రమత్తమైన కుటుంబ సభ్యులు హైదరాబాద్‌లోని మియాపూర్ పోలీసులను ఆశ్రయించారు. తమ కుమార్తె ఆచూకీ తెలియడం లేదని, ఫోన్ కూడా పనిచేయడం లేదని ఆందోళన వ్యక్తం చేస్తూ పోలీసులకు అధికారికంగా ఫిర్యాదు చేశారు.తల్లిదండ్రుల ఫిర్యాదును తీవ్రంగా పరిగణించిన పోలీసులు వెంటనే రంగంలోకి దిగారు. వారు తెలిపిన సర్వీస్ అపార్ట్‌మెంట్‌కు చేరుకుని తనిఖీలు చేపట్టగా, అక్కడ యువ వైద్యురాలు అనుమానాస్పద రీతిలో మృతి చెంది ఉండటాన్ని గుర్తించి నిర్ఘాంతపోయారు.ఈ ఘటనపై మియాపూర్ సర్కిల్ ఇన్‌స్పెక్టర్ జయరాం మీడియాతో మాట్లాడుతూ, మృతురాలితో పాటు ఆ గదిలో ఉన్న యువకుడు ప్రస్తుతం పరారీలో ఉన్నట్లు వెల్లడించారు. ఈ మృతికి గల అసలు కారణాలు ఏమిటనే కోణంలో లోతైన దర్యాప్తు ప్రారంభించినట్లు స్పష్టం చేశారు. మృతదేహాన్ని స్వాధీనం చేసుకుని పోస్టుమార్ట్ నిమిత్తం ఆసుపత్రికి తరలించారు. పోస్టుమార్ట్ నివేదిక వస్తేనే ఆమె మృతికి గల అసలు కారణాలు స్పష్టమవుతాయని పోలీసులు తెలిపారు. పరారీలో ఉన్న యువకుడి కోసం ప్రత్యేక బృందాలతో గాలింపు చర్యలు ముమ్మరం చేసినట్లు అధికారులు వెల్లడించారు. [ Hyderabad young doctor suspicious death, Miyapur service apartment news, Hafeezpet doctor murder case,Telangana crime news Telugu, Miyapur police station investigation, Hyderabad police, CP Sajjanar, DGP C.V. Anand, Telugu One, Telugu News ]

Published on: Fri Oct 2, 2026 6:09PM

Gandhi Jayanti: బాపూఘాట్ వద్ద డిజిటల్ మ్యూజియం ప్రారంభించిన సీఎం రేవంత్ రెడ్డి

అహింస మార్గమే మనకు శ్రీరామరక్ష.! గాంధీ జయంతి సందర్భంగా హైదరాబాద్‌లోని చారిత్రాత్మక బాపూఘాట్ వద్ద జాతిపిత మహాత్మా గాంధీకి రాష్ట్ర ప్రభుత్వం ఘనంగా నివాళులు అర్పించింది. లంగర్ హౌస్‌లోని బాపూఘాట్‌లో నిర్వహించిన ఈ వేడుకల్లో తెలంగాణ ముఖ్యమంత్రి రేవంత్ రెడ్డి రాష్ట్ర గవర్నర్ శివ్ ప్రతాప్ శుక్లా పాల్గొని మహాత్ముని విగ్రహానికి పూలమాలలు వేసి నివాళులర్పించారు. 1948లో మహాత్మా గాంధీ అస్థికలను నిమజ్జనం చేసిన పవిత్ర ప్రాంతమైన మూసీ ఈసీ నదుల సంగమ స్థలమైన బాపూఘాట్ వద్ద ఈ కార్యక్రమం అత్యంత నివాళులర్పించే రీతిలో కొనసాగింది. ఈ వేడుకల్లో భాగంగా ఏర్పాటు చేసిన ప్రత్యేక సర్వమత ప్రార్థన సమావేశంలో ప్రముఖులు పాల్గొన్నారు. ఈ సందర్భంగా ముఖ్యమంత్రి రేవంత్ రెడ్డి మాట్లాడుతూ, జాతిపిత చూపిన శాంతి, అహింస, సత్యం మరియు మానవతా విలువలు ఎప్పటికీ ఆచరణీయమని స్పష్టం చేశారు. దేశ స్వాతంత్ర్య సంగ్రామంలో అహింసను ప్రధాన ఆయుధంగా మలచుకుని ముందుకు నడిచిన మహాత్మా గాంధీ ఆశయాలను ప్రతి ఒక్కరూ కొనసాగించాలని పిలుపునిచ్చారు. స్వయం సమృద్ధి, గ్రామ స్వరాజ్యం, సామాజిక సమానత్వం వంటి గొప్ప సిద్ధాంతాలకు గాంధీజీ బలమైన పునాదులు వేశారని కొనియాడారు. తెలంగాణ ప్రజల ప్రభుత్వం గాంధీ మార్గంలోనే నడుస్తూ రాష్ట్రంలో శాంతిభద్రతలు, సామాజిక సమన్యాయం, అభివృద్ధిని సాధించడమే లక్ష్యంగా ముందుకు సాగుతోందని సీఎం పునరుద్ఘాటించారు. గాంధీ జయంతి వేడుకల్లో భాగంగా బాపూఘాట్ వద్ద ప్రత్యేకంగా ఏర్పాటు చేసిన డిజిటల్ మ్యూజియాన్ని గవర్నర్ సీఎం రేవంత్ రెడ్డి అధికారికంగా ప్రారంభించారు. ఈ చారిత్రాత్మక కార్యక్రమంలో డిప్యూటీ సీఎం మల్లు భట్టి విక్రమార్క, పీసీసీ అధ్యక్షుడు మహేష్ కుమార్ గౌడ్, పలువురు రాష్ట్ర మంత్రులు పొంగులేటి శ్రీనివాస రెడ్డి, అజహరుద్దీన్, పొన్నం ప్రభాకర్, ఎంపీ వేం నరేందర్ రెడ్డి, ప్రభుత్వ సలహాదారు వి. హనుమంతరావు, ప్రభుత్వ విప్‌లు, ఎమ్మెల్యేలు, ప్రభుత్వ ప్రధాన కార్యదర్శి సంజయ్ జాజు, డీజీపీ సి.వి. ఆనంద్ ఇతర ఉన్నతాధికారులు పెద్ద సంఖ్యలో పాల్గొని మహాత్మునికి తమ నివాళులు అర్పించారు. గాంధీ ఆశయాలను క్షేత్రస్థాయిలో ప్రజల్లోకి తీసుకువెళ్లేందుకు ఈ వేడుకలు ఎంతగానో దోహదపడతాయని నేతలు అభిప్రాయపడ్డారు [ Bapu Ghat, Revanth Reddy, Gandhi Jayanti, Mahatma Gandhi, Telangana news, digital museum,Telugu One, Telugu News, Langar House, Digital Museum ]

Published on: Fri Oct 2, 2026 5:52PM

ప్రయాణికులకు షాక్: తెలంగాణలో ఆటో ఛార్జీలు బాదుడు.!

కనీస ధర రూ.30కి పెంపునకు సిఫార్సు.! తెలంగాణ రాష్ట్రంలో ఆటోరిక్షా ఛార్జీలకు సంబంధించి ప్రభుత్వం కొత్త విధానాన్ని ఖరారు చేసింది. పెరుగుతున్న నిర్వహణ వ్యయాలను పరిగణనలోకి తీసుకోవడంతో పాటు ప్రయాణికులపై భారం నియంత్రించే విధంగా టారిఫ్‌ను సవరించింది. కొత్త విధానంలో కనీస ఛార్జీ, అదనపు దూరానికి వసూలు చేసే మొత్తం, వెయిటింగ్ ఛార్జీలు, రాత్రి సమయపు రేట్లు, లగేజీ రుసుములకు సంబంధించిన నిబంధనలను స్పష్టం చేశారు. కొత్త టారిఫ్ ప్రకారం ఆటోలో తొలి 1.6 కిలోమీటర్ల వరకు ప్రయాణానికి రూ.30 చెల్లించాల్సి ఉంటుంది. ఆ దూరం దాటిన తర్వాత ప్రతి అదనపు కిలోమీటర్‌కు రూ.14 చొప్పున ఛార్జీ పెరుగుతుంది. ప్రయాణ సమయంలో ట్రాఫిక్ రద్దీ, ఇతర పరిస్థితుల కారణంగా ఆటో కొంతసేపు కదలకుండా నిలిచిపోయినా వెయిటింగ్ ఛార్జీ వర్తిస్తుంది. ఈ ఛార్జీని నిమిషానికి 75 పైసలుగా నిర్ణయించారు.రాత్రి సమయంలో ఆటో సేవలను వినియోగించే వారికి సాధారణ టారిఫ్ వర్తించదు. రాత్రి 11 గంటల నుంచి ఉదయం 5 గంటల వరకు ప్రయాణిస్తే సాధారణ ఛార్జీకి 1.5 రెట్లు చెల్లించాల్సి ఉంటుంది. ఈ సమయాన్ని ప్రత్యేక ఛార్జీ కాలంగా నిబంధనల్లో పేర్కొన్నారు. ప్రయాణికులు తమ వెంట తీసుకెళ్లే సామానుకు సంబంధించి కూడా కొత్త విధానంలో స్పష్టత ఇచ్చారు. సాధారణ పరిమాణంలో ఉండే బ్రీఫ్‌కేస్, హ్యాండ్‌బ్యాగ్‌తో పాటు 60×40 సెంటీమీటర్ల కంటే తక్కువ పరిమాణం కలిగిన అటాచ్డ్ కేస్ లేదా బ్యాగ్‌కు ఎలాంటి అదనపు రుసుము చెల్లించాల్సిన అవసరం లేదు.అయితే నిర్దేశిత పరిమాణం కంటే పెద్దగా ఉండే ప్రతి ప్యాకేజీకి రూ.0.50 లగేజీ ఛార్జీగా వసూలు చేస్తారు. ఒక ఆటోలో మొత్తం 100 కిలోగ్రాముల వరకు లగేజీని మాత్రమే అనుమతిస్తారు.కొత్త ఛార్జీలకు అనుగుణంగా ఆటోల్లోని డిజిటల్ మీటర్లను కూడా తప్పనిసరిగా సవరించాల్సి ఉంటుంది. ప్రయాణం ప్రారంభించి మీటర్‌ను ఆన్ చేసిన వెంటనే రూ.30 కనీస ఛార్జీగా నమోదు కావాలి.తొలి 1.60 కిలోమీటర్ల దూరం పూర్తయ్యే వరకు ఇదే కనీస ఛార్జీ కొనసాగుతుంది. ఆ తర్వాత ప్రతి 100 మీటర్ల దూరానికి రూ.1.40 చొప్పున ఛార్జీ పెరిగేలా మీటర్‌ను రీసెట్ చేయాలి.ప్రయాణికుల నుంచి సరైన ఛార్జీలు వసూలు చేయడంతో పాటు మీటర్లలోనూ కొత్త టారిఫ్ సక్రమంగా ప్రతిబింబించేలా చూడాలని రవాణా శాఖ స్పష్టం చేసింది. కొత్త విధానం అమలులో పారదర్శకతకు ప్రాధాన్యం ఇవ్వాలని అధికారులు సూచించారు. [ Telangana auto fare hike, auto minimum charge Rs 30, Telangana transport department, auto charges per km, Hyderabad auto news, CM Revanth reddy, Minister ponnam prabhakar, Telugu One, Telugu News ]

Published on: Fri Oct 2, 2026 5:18PM

వెబ్‌సిరీస్ చూసి స్కెచ్: బొల్లారం ఆయుధాల చోరీలో షాకింగ్ ట్విస్ట్.!

వెబ్‌సిరీస్‌ ల్లో ఎక్కువగా బ్యాంకులు, బంగారు దుకాణాల్లో దోపిడీలకు సంబంధించిన వీడియోలే చూసేవాడు.. ఆ తర్వాత తనకున్న ఆర్మీ అనుభవాన్ని ఉపయోగించుకోని సికింద్రాబాద్‌ మద్రాస్‌ రెజిమెంట్‌ను ఎంచుకున్నాడు. ముందుగా రెక్కీ నిర్వహించాడు.. భద్రతా ఏర్పాట్లను పరిశీలించాడు.. సహచరుల సహకారం తీసుకున్నాడు.. చివరకు ఆయుధాలను చోరీ చేసి వాటిని కలకత్తాలో విక్రయించేందుకు ప్రయత్నించి చివరకు పోలీసుల చేతికి చిక్కాడు..మాజీ ఆర్మీ ఉద్యోగి హవల్దార్‌ మల్లేష్‌ను పోలీసులు 10 రోజుల పాటు కస్టడీలోకి తీసుకొని విచారించగా విస్తుపోయే విషయాలు వెలుగులోకి వచ్చాయి. చోరీ చేసిన ఆయుధాలను ముందుగానే పరిచయం ఉన్న అక్రమ ఆయుధాల వ్యాపారి అవల్‌ దెయ్‌ అలియాస్‌ ఓబీకి విక్రయించేందుకు ఒప్పందం కుదుర్చుకున్నట్లు పోలీసులు గుర్తించారు. దీంతో ఈ కేసు కేవలం ఆయుధాల చోరీకే పరిమితం కాలేదని.. దీని వెనుక పెద్ద నెట్‌వర్క్‌ ఉందా? అన్న కోణంలో దర్యాప్తు సాగుతోంది. 2009లో ఆర్మీలో చేరిన మల్లేష్‌కు ఆయుధాలు, మందుగుండు సామాగ్రిపై ప్రత్యేక శిక్షణ లభించింది. వివిధ కంటోన్మెంట్లలో పనిచేసిన సమయంలో ఆయుధాగారం బాధ్యతలు కూడా నిర్వహించినట్లు పోలీసులు తెలిపారు. దీంతో ఆయుధాల వినియోగం, వాటి నిర్వహణ, ఆయుధాగారంలోని వ్యవస్థపై అతడికి అవగాహన ఏర్పడినట్లు దర్యాప్తులో వెల్లడైంది.అయితే విధుల్లో నిర్లక్ష్యంగా వ్యవహ రించడంతో పలుమార్లు ఉన్నతాధికారుల క్రమశిక్షణ చర్యలు ఎదుర్కొన్నట్లు పోలీసులు చెబుతున్నారు. 16 ఏళ్ల సర్వీస్‌ పూర్తయిన తర్వాత మరో మూడేళ్లు కొనసాగేందుకు అవకాశం ఉన్నప్పటికీ.. ఆ అవకాశాన్ని తీసుకోకపోవడంతో తనలో అసంతృప్తి, కక్ష పెరిగినట్లు మల్లేష్‌ చెప్పినట్లు పోలీసులు వెల్లడించారు. మల్లేష్‌కు గతంలో నేరచరిత్ర కూడా ఉన్నట్లు పోలీసుల దర్యాప్తులో బయటపడింది. 2007లోనే ఆమ్రాబాద్‌, అచ్చంపేట ప్రాంతాల్లో ఇళ్ల దొంగతనాల కేసుల్లో నిందితుడిగా ఉన్నట్లు పోలీసులు గుర్తించారు. ఆ తర్వాత ఆర్మీలో చేరడం.. ఆయుధాలపై శిక్షణ పొందడం.. ఆయుధాగారాల బాధ్యతలు నిర్వహించడం.. ఇవన్నీ అతడికి ఆయుధాలపై ప్రత్యేక పరిజ్ఞానాన్ని అందించినట్లు పోలీసులు భావిస్తున్నారు. అక్రమ ఆయుధాలతో మల్లేష్‌కు పరిచయం కూడా పాతదేనని విచారణలో వెల్లడైనట్లు పోలీసులు తెలిపారు. 2022లో కలకత్తా బ్యారక్‌పూర్‌లో ఉన్న సమయంలో అక్రమ ఆయుధాల వ్యాపారి అవల్‌ దెయ్‌ అలియాస్‌ ఓబీతో మల్లేష్ కు పరిచయం ఏర్పడింది.. బీర్బల్‌ షా ద్వారా అవల్‌ దెయ్‌తో పరిచయం పెంచుకున్న మల్లేష్‌.. అతడి నుంచి రూ.10 వేలకు తుపాకీ కొనుగోలు చేసినట్లు పోలీసులు గుర్తించారు. ఆ తుపాకీతో దారి దోపిడీకి ప్రయత్నించినప్పటికీ విఫలమయ్యాడని, అనంతరం తుపాకీని స్వగ్రామంలో దాచినట్లు మల్లేష్‌ కన్ఫెషన్‌లో వెల్లడించినట్లు పోలీసులు తెలిపారు. అయితే మల్లేష్ ఆర్థిక ఇబ్బందులు ఎదురవుతున్న సమయంలో 2025లోనే ఆర్మీ ఆయుధాల చోరీ ఆలోచన మల్లేష్‌కు వచ్చినట్లు పోలీసులు చెబుతున్నారు. వెబ్‌సిరీస్‌లు, బ్యాంకులు, బంగారు దుకాణాల్లో దోపిడీలకు సంబంధించిన వీడియోలను చూస్తూ చోరీకి సంబంధించిన పద్ధతులను పరిశీలించినట్లు విచారణలో వెల్లడైంది. తనకు ఉన్న ఆర్మీ అనుభవాన్ని ఉపయోగించుకుని ఆయుధాలను చోరీ చేసి వాటిని విక్రయించడం ద్వారా డబ్బు సంపాదించాలనే ఆలోచనకు వచ్చినట్లు పోలీసులు అనుమాని స్తున్నారు.ఆలోచనకు కార్యరూపం ఇచ్చేందుకు మల్లేష్‌ మద్రాస్‌ రెజిమెంట్‌ను టార్గెట్‌గా ఎంచుకున్నట్లు పోలీసులు చెబుతు న్నారు. జూలై 2026లో పలుమార్లు రెక్కీ నిర్వహించి ఆయుధాగారం చుట్టూ ఉన్న భద్రతా ఏర్పాట్లను పరిశీలిం చినట్లు తెలిపారు. సీసీ కెమెరాలు ఎక్కడ ఉన్నాయి? విద్యుత్‌ దీపాలు ఎక్కడ ఉన్నాయి? జవాన్ల కదలికలు ఎలా ఉంటాయి? వంటి అంశాలను పరిశీలిం చినట్లు దర్యాప్తులో వెల్లడైనట్లు సమాచారం. ఈ వ్యవహారంలో శేషులు, ప్రవీణ్‌, వినోద్‌ సహకారం తీసు కున్నట్లు పోలీసులు చెబుతున్నారు.చోరీ తర్వాత ఆయుధాలను మద్రాస్‌ రెజిమెంట్‌ నుంచి బయటకు తరలించేం దుకు మల్లేష్‌ యాక్టివాను ఉపయోగించినట్లు పోలీసులు గుర్తించారు. అనంతరం బ్రీజా కారులో వాటిని నాగర్‌కర్నూల్‌లోని తన ఇంటికి తరలించి దాచినట్లు కన్ఫెషన్‌ స్టేట్‌మెంట్‌లో వెల్లడైనట్లు తెలిపారు. అక్కడితో ఆగకుండా.. చోరీ చేసిన ఆయుధాలను ఎలా, ఎవరికి విక్రయించాలన్న దానిపై ముందుగానే ప్రణాళిక వేసుకున్నట్లు దర్యాప్తులో బయటపడింది. చోరీ చేసిన ఆయుధాలను కలకత్తాకు తరలించి విక్రయించేందుకు మల్లేష్‌ ముందుగానే ప్రయత్నించినట్లు పోలీసులు చెబుతున్నారు. బీర్బల్‌ షా ద్వారా అవల్‌ దెయ్‌ అలియాస్‌ ఓబీతో సంప్రదింపులు జరిపి ఆయుధాల విక్రయానికి ఒప్పందం చేసుకున్నట్లు గుర్తించారు. ఇక్కడే కేసు మరో మలుపు తిరిగింది. బీర్బల్‌ షాకు బంగ్లాదేశ్‌ నుంచి కలకత్తాకు వచ్చే వ్యక్తులతో సంబంధాలు ఉన్నట్లు పోలీసులకు అనుమానం ఉంది. ఈ పరిచయాల వెనుక అక్రమ ఆయుధాల రవాణా, కొనుగోలు, విక్రయాల వ్యవహారం ఉందా? అనే కోణంలో అధికారులు దర్యాప్తు చేస్తున్నారు. మల్లేష్‌ కస్టడీ విచారణలో బయటపడిన వివరాల ఆధారంగా బీర్బల్‌ షా, అవల్‌ దెయ్‌ అలియాస్‌ ఓబీకి దేశవ్యాప్తంగా అక్రమ ఆయుధాల నెట్‌వర్క్‌ ఉన్నట్లు పోలీసులు అనుమానిస్తున్నారు. ఈ నెట్‌వర్క్‌లో ఇంకా ఎవరెవరు ఉన్నారు? ఆయుధాలు ఎక్కడి నుంచి వస్తున్నాయి? ఎక్కడికి తరలిస్తున్నారు? గతంలో ఎలాంటి లావాదేవీలు జరిగాయి? అనే అంశాలపై పోలీసులు ఆరా తీస్తున్నారు. ప్రస్తుతం బీర్బల్‌ షా, అవల్‌ దెయ్‌ అలియాస్‌ ఓబీ కోసం పోలీసులు గాలిస్తున్నారు. వీరిద్దరిని అదుపులోకి తీసుకుంటే మద్రాస్‌ రెజిమెంట్‌ ఆయుధాల చోరీతో పాటు అక్రమ ఆయుధాల క్రయవిక్రయాల వెనుక ఉన్న నెట్‌వర్క్‌పై మరిన్ని కీలక వివరాలు వెలుగులోకి వచ్చే అవకాశం ఉందని దర్యాప్తు అధికారులు భావిస్తున్నారు. [ Bolarum weapons theft case, Mallesh, Madras Regiment Hyderabad, Hyderabad Police investigation, Army weapon robbery case,Vinod and Seshu arrest, Madras Regiment, Hyderabad police, CP Sajjanar, DGP C.V.Anand ]

Published on: Fri Oct 2, 2026 4:50PM

Delhi: జంతర్ మంతర్ వద్ద ఉద్రిక్తత.. ఆప్ నేతల అరెస్ట్.!

ప్రధాన ఎన్నికల కమిషనర్ (సీఈసీ) వ్యవహారశైలిని నిరసిస్తూ ఢిల్లీలోని జంతర్ మంతర్ వద్ద తలపెట్టిన ఆందోళన తీవ్ర ఉద్రిక్తతకు దారితీసింది. ఓటర్ల జాబితా ప్రత్యేక సవరణ ప్రక్రియలో అవకతవకలు జరిగాయని ఆరోపిస్తూ ఆప్ నేతలు చేపట్టిన నిరసన కార్యక్రమం తీవ్ర రాజకీయ దుమారం రేపింది.ఈ నిరసనకు ఎలాంటి అనుమతి లేదంటూ ముందుగానే స్పష్టం చేసిన ఢిల్లీ పోలీసులు, ఎలాంటి అవాంఛనీయ ఘటనలు జరగకుండా భారీ బందోబస్తు ఏర్పాటు చేశారు. జంతర్ మంతర్ ప్రాంతాన్ని పూర్తిగా తమ ఆధీనంలోకి తీసుకుని, చుట్టుపక్కల ప్రాంతాల్లో పటిష్టమైన భద్రతను మోహరించారు. నిరసన స్థలానికి చేరుకున్న ఆమ్ ఆద్మీ పార్టీ కీలక నేతలతో పాటు వందలాది మంది కార్యకర్తలను పోలీసులు అదుపులోకి తీసుకున్నారు. ప్రశాంతంగా నిరసన తెలుపుతామన్న విపక్ష నేతల మాటలను ఖాతరు చేయకుండా పోలీసులు వారిని బలవంతంగా అరెస్ట్ చేసి పోలీస్ స్టేషన్లకు తరలించారు.ఈ ఆందోళనల నేపథ్యంలో ఎలాంటి అశాంతి చెలరేగకుండా కేంద్ర బలగాలను కూడా రంగంలోకి దించారు. నిరసన ప్రాంతానికి వెళ్లే పలు మెట్రో స్టేషన్ల ద్వారాలను మూసివేసి, సాధారణ ప్రజల రాకపోకలపై తీవ్రమైన ఆంక్షలు విధించారు. ప్రజాస్వామ్యాన్ని, రాజ్యాంగ హక్కులను కాపాడుకునేందుకే తాము ఈ పోరాటం చేస్తున్నామని ఆప్ నేతలు పేర్కొన్నారు. ఎన్నికల సంఘం ఏకపక్షంగా వ్యవహరిస్తోందని, నిష్పాక్షికత లోపించిందని వారు తీవ్రస్థాయిలో మండిపడ్డారు.ప్రభుత్వం తమ గొంతును అణచివేయాలని చూస్తోందని, నిరసన తెలిపే హక్కును కూడా కాలరాస్తున్నారని ఆరోపించారు. అయితే, శాంతిభద్రతల పరిరక్షణ కోసమే ఈ ఆంక్షలు విధించామని పోలీసులు వెల్లడించారు. రానున్న రోజుల్లో ఈ వివాదం మరింత ముదిరే అవకాశం ఉందని రాజకీయ విశ్లేషకులు భావిస్తున్నారు. విపక్షాల నుంచి వ్యతిరేకత పెరుగుతున్న తరుణంలో రాబోయే పరిణామాలు జాతీయ రాజకీయాల్లో కీలక చర్చనీయాంశంగా మారే సూచనలు కనిపిస్తున్నాయి. [ AAP leaders detained, Jantar Mantar protest, CEC Gyanesh Kumar, Delhi Police, voter rolls controversy, Saurabh Bharadwaj, SIR, AAP MLA Sanjeev Jhanu, Telugu One, Telugu News ]

Published on: Fri Oct 2, 2026 3:10PM

Hyderabad: మెట్రో, ఆర్టీసీలకు కామన్ పాస్ ప్రారంభించిన డిప్యూటీ సీఎం భట్టి

మెట్రో, ఆర్టీసీ ఛార్జీ నెలవారీ పాస్‌ ధర రూ.8,500 ఖరారు.! హైదరాబాద్ నగరవాసుల ప్రయాణ కష్టాలకు చెక్ పెట్టేందుకు రాష్ట్ర ప్రభుత్వం ప్రతిష్టాత్మక నిర్ణయం తీసుకుంది. ఇకపై నగరంలో రోజూ రాకపోకలు సాగించే ప్రయాణికులు మెట్రో రైళ్లు ఆర్టీసీ బస్సుల కోసం వేర్వేరుగా టికెట్లు కొనుగోలు చేయాల్సిన ఇబ్బంది తొలగిపోయింది. ప్రజా రవాణా వ్యవస్థను మరింత సులభతరం చేసే లక్ష్యంతో ప్రభుత్వం ఈ సరికొత్త విధానాన్ని అమలులోకి తెచ్చింది. ప్రజాభవన్‌లో జరిగిన ప్రత్యేక కార్యక్రమంలో ఉప ముఖ్యమంత్రి మల్లు భట్టి విక్రమార్క ఈ కామన్ పాస్ విధానాన్ని లాంఛనంగా ప్రారంభించారు. హైదరాబాద్ మెట్రో రైల్ లిమిటెడ్ (HMRL), తెలంగాణ రాష్ట్ర రోడ్డు రవాణా సంస్థ (TGSRTC) సంయుక్తంగా ఈ సేవలను ప్రయాణికులకు అందిస్తున్నాయి. నగరంలో పెరుగుతున్న రద్దీని దృష్టిలో ఉంచుకుని ఈ సమన్వయ వేదికను ఏర్పాటు చేశారు. ఈ నూతన కామన్ పాస్ విధానం ద్వారా ప్రయాణికులు ఒకే కార్డు లేదా పాస్‌తో మెట్రో రైలు మరియు ఆర్టీసీ బస్సుల్లో ఏకకాలంలో ప్రయాణించవచ్చు. ప్రధానంగా మెట్రో స్టేషన్ల నుంచి గమ్యస్థానాలకు లేదా ఇళ్ల నుంచి మెట్రో స్టేషన్లకు వెళ్లే వారికి ఇది ఎంతో ప్రయోజనకరంగా మారనుంది. రవాణా మార్గాల మధ్య మారేటప్పుడు ఎదురయ్యే అసౌకర్యాలను ఇది పూర్తిగా నివారిస్తుంది. ప్రయాణికుల ఆర్థిక స్థోమతను, సౌలభ్యాన్ని దృష్టిలో ఉంచుకుని అధికారులు రోజువారీ, నెలవారీ జాయింట్ పాస్‌లను అందుబాటులోకి తెచ్చారు. రోజువారీ కామన్ పాస్ ధరను రూ. 400గా నిర్ణయించగా, నెలవారీ కామన్ పాస్ ధరను రూ. 8,500గా ఖరారు చేశారు. ఈ పాస్‌లను ప్రధాన మెట్రో స్టేషన్లు మరియు ఆర్టీసీ బస్ స్టేషన్లలో కొనుగోలు చేసేందుకు వీలు కల్పించారు. రోజువారీ ఉమ్మడి పాస్‌ రూ.400గా నిర్ణయించారు. (మెట్రో ఛార్జీ రూ.300, ఆర్టీసీ ఛార్జీ రూ.100) నెలవారీ పాస్‌ రూ.8,500 (మెట్రో ఛార్జీ రూ.7,000, ఆర్టీసీ ఛార్జీ రూ.1,500)గా ధరను ఖరారు చేశారు. మొదటిసారి కొనుగోలు చేసేటప్పుడు కార్డు కోసం రూ.100 వసూలు చేస్తారు. కార్డును తిరిగి ఇచ్చినప్పుడు రూ.100 వాపసు చేస్తారు. ఒకే పాస్‌తో ఓఆర్‌ఆర్‌ లోపల నడిచే అన్ని రకాల ఆర్టీసీ సిటీబస్సుల్లో (పుష్పక్‌కు మినహా), మెట్రో రైళ్లలో ప్రయాణించవచ్చు. నగరంలో రోజూ లక్షలాది మంది ప్రయాణికులు మెట్రో ఆర్టీసీ సర్వీసులను వినియోగిస్తున్నారు. రోజువారీ రద్దీని నియంత్రించడంతో పాటు ప్రయాణ సమయాన్ని ఆదా చేసేందుకు ఈ సమైక్య రవాణా వ్యవస్థ ఎంతగానో దోహదపడుతుందని నిపుణులు భావిస్తున్నారు. పర్యావరణ పరిరక్షణతో పాటు రోడ్లపై వ్యక్తిగత వాహనాల వాడకాన్ని తగ్గించడానికి ఇది మంచి అవకాశమని నిపుణులు అభిప్రాయపడుతున్నారు. ప్రభుత్వం తీసుకున్న ఈ నిర్ణయంపై నగర ప్రజల నుంచి హర్షాతిరేకాలు వ్యక్తమవుతున్నాయి. ముఖ్యంగా నిత్యం ఉద్యోగాలు, వ్యాపారాల నిమిత్తం దూర ప్రాంతాలకు రాకపోకలు సాగించే వారికి ఈ విధానం పెద్ద ఉపశమనంగా నిలవనుంది. టికెట్ల కొనుగోలు కోసం లైన్లలో నిలబడే శ్రమ తప్పుతుందని ప్రయాణికులు ఆనందం వ్యక్తం చేస్తున్నారు. రాబోయే రోజుల్లో డిజిటల్ టికెటింగ్ మరియు యాప్ ఆధారిత సేవలను మరింత విస్తృతం చేయాలని ప్రభుత్వం యోచిస్తోంది. ప్రజల స్పందనను బట్టి మరిన్ని రకాల పాస్‌లను ప్రవేశపెట్టే అవకాశాలున్నాయి. హైదరాబాద్‌‌ను దేశంలోనే అత్యుత్తమ ప్రజా రవాణా సౌకర్యాలున్న నగరంగా తీర్చిదిద్దడమే లక్ష్యంగా ప్రభుత్వం అడుగులు వేస్తోంది. [ Hyderabad Metro RTC Common Pass, Bhatti Vikramarka, TGSRTC, Metro Rail Pass, Telangana Public Transport, CM Revanth reddy, HMRL ]

Published on: Fri Oct 2, 2026 2:48PM

కొత్త బీఎండబ్ల్యూ: రూ.2 లక్షల డిమాండ్‌..నకిలీ హిజ్రాల గుట్టురట్టు.!

కొత్త కారు కొనుక్కోవాలని ఎన్నో రోజులుగా కలలు కంటారు.. ఆ కల నెరవేరిన రోజు ఆ ఆనందమే వేరు! ఎంతో ఇష్టపడి కొత్త బీఎండబ్ల్యూ కారు కొనుగోలు చేసిన ఓ వ్యక్తి.. ఆ సంతోషాన్ని ఆస్వాదిస్తూ రోడ్డుపై డ్రైవింగ్‌ చేసుకుంటూ వెళ్తున్నాడు. కానీ, జూబ్లీహిల్స్‌ సమీపంలో అతనికి ఊహించని చేదు అనుభవం ఎదురైంది. కొత్త కారు కొన్న ఆనందం కాస్తా.. కొందరి బెదిరింపులతో ఇబ్బందిగా మారింది. కొత్త కారు కనిపించగానే నలుగురు వ్యక్తులు అతని వాహనానికి అడ్డంగా వచ్చారు. కారు కొనుగోలు చేసినందుకు రూ.2 లక్షలు ఇవ్వాలని డిమాండ్‌ చేశారు. డబ్బులు ఇచ్చే వరకు కారును కదలనివ్వబోమంటూ బెదిరింపులకు దిగారు. ఒక్కసారిగా జరిగిన ఈ పరిణామంతో కారు యజమాని ఇబ్బందికి గురయ్యాడు. అయితే, బెదిరింపులకు భయపడి డబ్బులు ఇచ్చేందుకు అతను అంగీకరించలేదు. తాను డబ్బులు ఇచ్చేది లేదని స్పష్టం చేసి అక్కడి నుంచి వెళ్లిపోయాడు. ఈ ఘటనను అక్కడే ఉన్న ఓ వ్యక్తి వీడియో తీసి సోషల్‌ మీడియాలో పోస్ట్‌ చేయడంతో అది వైరల్‌గా మారింది. కొత్త కారు కొన్నందుకు ఏకంగా రూ.2 లక్షలు డిమాండ్‌ చేయడంపై పలువురు ఆశ్చర్యం వ్యక్తం చేశారు. ఇదిలా ఉండగా, తనను నలుగురు వ్యక్తులు బెదిరించి డబ్బులు అడిగారంటూ బాధితుడు పోలీసులను ఆశ్రయించాడు. ఫిర్యాదును స్వీకరించిన పోలీసులు కేసు నమోదు చేసి దర్యాప్తు ప్రారంభించారు. సోషల్‌ మీడియాలో వైరల్‌గా మారిన వీడియోను పరిశీలించి, నిందితులను గుర్తించే ప్రయత్నం చేశారు. అయితే, ఈ ఘటనలో పోలీసులకు ఓ కీలక విషయం తెలిసింది. హిజ్రాల వేషధారణలో ఉన్న ఆ నలుగురు వ్యక్తులు నిజంగా హిజ్రాలు కాదని, వేషాలు మార్చుకుని ప్రజలను బెదిరిస్తూ డబ్బులు వసూలు చేస్తున్నట్లు పోలీసులు గుర్తించినట్టు సమాచారం. దీంతో నలుగురు నిందితులను పోలీసులు అరెస్టు చేసి విచారణ చేపట్టారు. ఇంతకుముందు కూడా ఇదే తరహాలో ఎవరినైనా బెదిరించారా? ఎంతమంది నుంచి డబ్బులు వసూలు చేశారు? అనే కోణాల్లో దర్యాప్తు కొనసాగిస్తున్నారు. కొత్త కారు కొన్న ఆనందాన్ని ఆస్వాదించాల్సిన సమయంలో.. బెదిరింపులను ఎదుర్కోవాల్సి వచ్చిన ఈ ఘటన నగరంలో చర్చనీయాంశంగా మారింది. వేషధారణను అడ్డుపెట్టుకుని అమాయకులను భయపెట్టి డబ్బులు వసూలు చేసే వారి పట్ల అప్రమత్తంగా ఉండాలని ఈ ఘటన గుర్తుచేస్తోంది. అయితే, నిందితులపై ఆరోపణలకు సంబంధించిన పూర్తి వివరాలు పోలీసుల దర్యాప్తులో వెల్లడికావాల్సి ఉంది. [ Fake Transgenders, Fake Hijras, Jubilee Hills, BMW Car, ₹2 Lakh Demand, Extortion Case, Hyderabad Crime News, Hyderabad Police, Four Accused Arrested, Viral Video, Criminal Threats, Police Investigation, New Car Owner, Telangana Crime News, Fake Identity Gang ]

Published on: Fri Oct 2, 2026 1:25PM

Vetri Payanam Scheme: కండక్టర్‌గా మారిన సీఎం విజయ్..బస్సులో మహిళలకు టికెట్ల పంపిణీ చేసిన దళపతి.!

తమిళనాడు రాజకీయాల్లో సరికొత్త వాతావరణం నెలకొంది. రాష్ట్ర ముఖ్యమంత్రి ప్రజల మధ్యకు నేరుగా వెళ్తూ, వారి సమస్యలు తెలుసుకోవడంతో పాటు ప్రభుత్వ సంక్షేమ పథకాలను స్వయంగా అమలు చేస్తూ అందరి దృష్టిని ఆకర్షిస్తున్నారు. గాంధీ జయంతిని పురస్కరించుకుని తమిళనాడు ప్రభుత్వం మహిళల కోసం ప్రవేశపెట్టిన ఉచిత బస్సు ప్రయాణ పథకాన్ని మరింత విస్తరించింది. ‘వెట్రి పయనం’ పేరుతో రూపొందించిన ఈ సరికొత్త విస్తృత కార్యక్రమాన్ని సీఎం విజయ్ అత్యంత వినూత్న రీతిలో ప్రారంభించి అందరినీ ఆశ్చర్యపరిచారు. చెన్నైలోని కోయంబేడు బస్ టెర్మినస్‌లో జరిగిన ఈ ప్రారంభోత్సవ వేడుకలో సీఎం విజయ్ ఓ సాధారణ కండక్టర్‌లా మారిపోయారు. బస్సు ఎక్కి ప్రయాణిస్తున్న మహిళలకు స్వయంగా ఉచిత టికెట్లను అందజేశారు. ఈ అరుదైన దృశ్యానికి సంబంధించిన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది.ఇప్పటివరకు కేవలం సాధారణ సిటీ టౌన్ బస్సులకే పరిమితమైన ఈ ఉచిత ప్రయాణ సదుపాయాన్ని ఇప్పుడు మరింత విస్తరించారు. ఇకపై ఎక్స్‌ప్రెస్, డీలక్స్, లిమిటెడ్ స్టాప్ సర్వీస్ బస్సులతో పాటు మెట్రోపాలిటన్ పట్టణ ప్రాంతాల్లో నడిచే పలు సర్వీసుల్లో కూడా మహిళలు ఉచితంగా ప్రయాణించవచ్చు. ఈ విస్తరణ ద్వారా రాష్ట్రంలోని వివిధ ప్రభుత్వ రవాణా సంస్థలకు చెందిన వేలాది బస్సులలో మహిళలకు ఉచిత ప్రయాణ సౌకర్యం లభించనుంది. దీనివల్ల ప్రతిరోజూ లక్షలాది మంది మహిళా ప్రయాణికులు, ఉద్యోగినులు, విద్యార్థినులకు రవాణా ఖర్చులు పూర్తిగా తగ్గే అవకాశం ఉంది.మహిళల ఆర్థిక స్వావలంబనకు, వారి ప్రయాణ సౌలభ్యానికి ఈ పథకం ఎంతో దోహదపడుతుందని నిపుణులు అభిప్రాయపడుతున్నారు. ఎలాంటి ఆదాయ పరిమితి లేకుండా అన్ని వర్గాల మహిళలకు, ట్రాన్స్‌జెండర్లకు ఈ సదుపాయం వర్తింపజేయడం పట్ల సర్వత్రా హర్షాతిరేకాలు వ్యక్తమవుతున్నాయి.భవిష్యత్తులో ప్రజా రవాణా వ్యవస్థను మరింత పటిష్టం చేసే దిశగా ప్రభుత్వం మరిన్ని సంస్కరణలు తెచ్చే అవకాశం ఉందని రాజకీయ విశ్లేషకులు భావిస్తున్నారు. సామాన్యులకు చేరువయ్యేలా సీఎం తీసుకుంటున్న ఇటువంటి చర్యలు ప్రజల్లో ప్రభుత్వ పట్ల సానుకూల దృక్పథాన్ని పెంచుతున్నాయి. [ CM Vijay, Vetri Payanam scheme, Tamil Nadu free bus for women, Tamil Nadu CM Vijay bus conductor video, women free travel scheme, Free bus travel for women, Koyambedu Bus Terminus, Tamil Nadu Transport Department ]

Published on: Fri Oct 2, 2026 1:04PM

Maharashtra: నవరాత్రి ఉత్సవాల వేళ విషాదం..లారీ ఢీకొని ఏడుగురు భక్తులు మృతి.!

మహారాష్ట్రలోని ప్రఖ్యాత హిందూ హృదయసమ్రాట్ బాలాసాహెబ్ థాకరే మహారాష్ట్ర సమృద్ధి మహామార్గ్‌పై జరిగిన ఒక ఘోర రోడ్డు ప్రమాదం తీవ్ర విషాదాన్ని నింపింది. శరన్న నవరాత్రి వేడుకల కోసం భక్తిశ్రద్ధలతో దుర్గాదేవి మూర్తిని తీసుకొని వెళ్తున్న భక్తుల వాహనాన్ని వెనుక నుంచి వేగంగా వచ్చిన ఒక లారీ బలంగా ఢీకొట్టింది. అమరావతి జిల్లాలోని ధామ్‌గావ్ రైల్వే ప్రాంతం సమీపంలో ఛానెల్ 97 వద్ద అర్ధరాత్రి దాటిన తర్వాత సుమారు 12:45 గంటల సమయంలో ఈ కంటతడి పెట్టించే దుర్ఘటన చోటుచేసుకుంది. ఈ అత్యంత తీవ్రమైన రోడ్డు ప్రమాదంలో ఏడుగురు భక్తులు సంఘటన స్థలంలోనే ప్రాణాలు కోల్పోగా, మరో 21 మంది తీవ్రంగా గాయపడ్డారు. షిగావ్ నుంచి సేగావ్ మీదుగా వార్ధా వైపు వెళ్తున్న బొలెరో పికప్ వ్యాన్‌లో పలువురు భక్తులు దుర్గాదేవి ప్రతిమను ఉంచుకుని ప్రయాణిస్తున్నారు. పవిత్రమైన నవరాత్రి ఉత్సవాలను పురస్కరించుకుని తమ ప్రాంతంలో అమ్మవారిని ప్రతిష్టించేందుకు సంతోషంగా బయలుదేరిన ఆ ప్రయాణం ఆ కుటుంబాలకు గ్రామస్థులకు తీరని శోకాన్ని మిగిల్చింది. వెనుక నుంచి వచ్చిన లారీ అతివేగంగా వచ్చి ఈ పికప్ వ్యాన్‌ను బలంగా ఢీకొట్టడంతో, వాహనం వెనుక భాగం పూర్తిగా నుజ్జునుజ్జయింది. ఈ భీకర ప్రమాద తీవ్రత ఏ స్థాయిలో ఉందంటే, వ్యాన్‌లో ప్రయాణిస్తున్న ఐదుగురు వ్యక్తులు క్షణాల వ్యవధిలో ఘటనా స్థలంలోనే దుర్మరణం చెందారు. ఈ సమాచారం అందిన వెంటనే స్థానిక పోలీసులు, హైవే సేఫ్టీ పెట్రోలింగ్ సిబ్బంది రెస్క్యూ టీమ్‌లు హుటాహుటిన సంఘటన స్థలానికి చేరుకుని సహాయక చర్యలు చేపట్టాయి. ఈ దుర్ఘటనలో గాయపడిన మొత్తం 21 మంది క్షతగాత్రులను వెంటనే స్థానిక ధామ్‌గావ్ గ్రామీణ ఆసుపత్రికి తరలించారు. అయితే వారిలో కొందరి పరిస్థితి అత్యంత విషమంగా ఉండటంతో, మెరుగైన వైద్య చికిత్స కోసం వారిని వెంటనే వార్ధా వైద్య కళాశాలకు రిఫర్ చేశారు. ప్రాథమిక నివేదికల ప్రకారం, గాయపడినవారిలో ఇద్దరి పరిస్థితి అత్యంత ఆందోళనకరంగా ఉందని, 10 మంది తీవ్రంగా గాయపడ్డారని, మరో 6 మందికి స్వల్ప గాయాలయ్యాయని అధికారులు వెల్లడించారు. ఈ ఘోర ప్రమాద సమాచారం తెలిసిన వెంటనే స్పెషల్ ఇన్‌స్పెక్టర్ జనరల్ మహేష్ పాటిల్, అమరావతి జిల్లా ఎస్పీ నికేతన్ కদম మరియు ధామ్‌గావ్ మున్సిపల్ చైర్‌పర్సన్ అర్చన రోథే తదితర ప్రముఖ అధికార ప్రతినిధులు హుటాహుటిన సంఘటన స్థలాన్ని అలాగే ఆసుపత్రిని సందర్శించి పరిస్థితిని సమీక్షించారు. నవరాత్రి ఉత్సవాలు ఆనందోత్సాహాలతో జరుపుకోవాల్సిన సమయంలో ఇటువంటి ప్రాణనష్టం జరగడం ఆ ప్రాంతంలో తీవ్ర విషాద ఛాయలను నింపింది. సమృద్ధి మహామార్గ్‌పై పెరుగుతున్న రోడ్డు ప్రమాదాల నివారణకు అధికారులు తగిన భద్రతా చర్యలు చేపట్టాలని స్థానికులు కోరుతున్నారు. [ Samruddhi Mahamarg accident, Amravati road accident, Durga devotees killed, Samruddhi Expressway crash, Maharashtra news today, Dhamangaon railway accident ]

Published on: Fri Oct 2, 2026 12:01PM