నామినేషన్ల వేళ అగడూరులో ఉద్రిక్తత: వైసీపీ దాడిని ఖండించిన బీటెక్ రవి.!
Publish Date:Nov 19, 2026
Advertisement
తొండూరు మండలం అగడూరు నామినేషన్ కేంద్రం వద్ద చోటుచేసుకున్న హింసాత్మక దాడి ఘటనపై తెలుగుదేశం నేత బీటెక్ రవి మండిపడ్డారు. గతంలో హత్యాయత్నం కేసుల్లో నిందితులుగా ఉన్న రౌడీ షీటర్లను పోలీసులు అరెస్ట్ చేయకుండా వదిలేయడం వల్లే ఇలాంటి దాడులు జరుగుతున్నాయన్న బీటెక్ రవి, పోలీసులు తక్షణమే కఠిన చర్యలు తీసుకోకపోతే అధికార పార్టీలో ఉన్నప్పటికీ తానే స్వయంగా డీఎస్పీ కార్యాలయం ఎదుట రోడ్డుపై బైఠాయించి నిరసన తెలపాల్సి వస్తుందని ఆయన హెచ్చరించారు. ఇక అగడూరు దాడిని వివరిస్తూ.. నామినేషన్ సెంటర్ సమీపంలో సింహాద్రిపురం మార్కెట్ కమిటీ చైర్మన్ బండి రామసురారెడ్డి, మాజీ సింగిల్ విండో చైర్మన్తో పాటు వారి అనుచరులను లక్ష్యంగా చేసుకుని 600 నుంచి 700 మంది దుండగులు ఒక్కసారిగా విరుచుకుపడ్డారని బీటెక్ రవి తెలిపారు. కత్తులు, రాడ్లు, పెట్రోల్ బాంబులతో జరిపిన ఈ ఆకస్మిక దాడిలో తీవ్రంగా గాయపడిన బండి రామసురారెడ్డి చికిత్స నిమిత్తం ఆసుపత్రికి తరలించాల్సి వచ్చిందని వివరించారు. ఈ అల్లర్లలో నాయకులు, కార్యకర్తలనే కాకుండా అక్కడ ఉన్న మహిళలపైనా దుండగులు దాడులకు తెగబడ్డారని బీటెక్ రవి ఆగ్రహం వ్యక్తం చేశారు. అంతేకాకుండా ఆ ప్రాంతంలో నిలిపి ఉంచిన ఆరేడు వాహనాలకు నిప్పు పెట్టి దగ్ధం చేశారన్నారు. నామినేషన్ల ప్రక్రియ జరుగుతున్న చోట ఇంత పెద్ద ఎత్తున మారణాయుధాలు, పెట్రోల్ బాంబులతో గుంపులుగా వచ్చి విధ్వంసం సృష్టించడం శాంతిభద్రతల వైఫల్యానికి నిదర్శనమని విమర్శించారు. వాస్తవాలను వక్రీకరిస్తూ జగన్ మీడియా అసత్య ప్రచారం చేస్తూ ప్రజలను తప్పుదోవ పట్టించే ప్రయత్నం చేస్తున్నదని ఆరోపించారు. బాధితులపైనే నిందలు వేసేలా కథనాలు ప్రసారం చేయడం సరికాదని, క్షేత్రస్థాయిలో జరిగిన విధ్వంసాన్ని కప్పిపుచ్చలేరని ఆయన స్పష్టం చేశారు. గతంలో జరిగిన నేరాలకు సంబంధించి 307 సెక్షన్ కింద కేసులు నమోదైన వ్యక్తులు స్వేచ్ఛగా బయట తిరుగుతుండటం వల్లే మళ్లీమళ్లీ వారు ఇంతటి దారుణాలకు ఒడిగడుతున్నారని బీటెక్ రవి అన్నారు. పోలీసు యంత్రాంగం ముందస్తు జాగ్రత్తలు తీసుకోవడంలో, పాత నేరస్థులపై ఉక్కుపాదం మోపడంలో విఫలమైందని విమర్శించారు. స్థానిక సంస్థల ఎన్నికల నామినేషన్ల వేళ ఉద్రిక్తతలు తలెత్తే అవకాశం ఉన్నప్పటికీ, తగిన భద్రతా చర్యలు లేకపోవడంపై ఆయన అసంతృప్తి వ్యక్తం చేశారు. ఇది కూడా చదవండి: పులివెందులలో ఉద్రిక్తత: పార్నపల్లె వద్ద అవినాష్ రెడ్డిని అడ్డుకున్న పోలీసులు.! నామినేషన్ కేంద్రాల వద్ద ప్రజాస్వామ్యబద్ధంగా ప్రక్రియ సాగాల్సిన చోట భయాందోళనలు సృష్టించేలా దాడులు జరగడం పట్ల స్థానికంగా ఆందోళన వ్యక్తమవుతోంది. మహిళలపై దాడులు, వాహనాల దహనం వంటి ఘటనలతో గ్రామంలో ఉద్రిక్త వాతావరణం నెలకొంది. ఆసుపత్రిలో చికిత్స పొందుతున్న బండి రామసురారెడ్డి ఆరోగ్య పరిస్థితి నిలకడగా ఉన్నట్లు తెలుస్తోంది. ఈ దాడికి బాధ్యులైన ప్రతి ఒక్కరినీ వెంటనే గుర్తించి అరెస్ట్ చేయాలని బీటెక్ రవి డిమాండ్ చేశారు. పాత కేసుల్లో నిందితులుగా ఉన్న వారిని తక్షణమే అదుపులోకి తీసుకోవాలని డిమాండ్ చేశారు. ఇలా ఉండగా ఈ ఘటనతో అగడూరులో ఉద్రిక్త పరిస్థితులు నెలకొన్నాయి. పోలీసులు అదనపు బలగాలను మోహరించారు. ప్రస్తుతానికి పరిస్థితి ఉద్రిక్తంగా ఉన్నప్పటికీ అదుపులోనే ఉందని పోలీసులు చెబుతున్నారు. మీకు నచ్చవచ్చు: ;పులివెందులలో ఉద్రిక్తత.. జగన్ కాన్వాయ్ను అడ్డుకున్న దస్తగిరి.! ఎంపీటీసీజడ్పీటీసీ పోలింగ్ : పులివెందుల మండలం ఎర్రిపల్లిలో బాంబు దాడులు, ఉద్రిక్తత.! [Agaduru Nomination Centre Attack, Bandi Ramasura Reddy, Injured, BTech Ravi, Condemn, TeluguOne]
http://www.teluguone.com/news/content/agaduru-nomination-centre-attack-43-237483.html




