న్యాచురల్ స్టార్ నాని (Nani), దర్శకుడు శ్రీకాంత్ ఓదెల (Srikanth Odela) కాంబినేషన్‌లో వస్తున్న అత్యంత ప్రతిష్టాత్మక చిత్రం 'ది ప్యారడైజ్' (The Paradise). బ్లాక్‌బస్టర్ సినిమా 'దసరా' తర్వాత వీరిద్దరి కలయికలో వస్తున్న మూవీ కావడంతో టాలీవుడ్‌లో దీనిపై భారీ అంచనాలు ఉన్నాయి. అయితే ప్రస్తుతం ఈ సినిమా మేకర్స్‌కు ఒక ఊహించని తలనొప్పి వచ్చి పడిందని ఫిల్మ్ నగర్ వర్గాల్లో బలంగా వినిపిస్తోంది. ఈ సినిమా షూటింగ్ అనుకున్న సమయానికి పూర్తి కాకపోవడం, మరోవైపు డిజిటల్ పార్ట్‌నర్ అయిన ప్రముఖ ఓటీటీ సంస్థ నెట్‌ఫ్లిక్స్ (Netflix) నుంచి రిలీజ్ డేట్ కోసం విపరీతమైన ఒత్తిడి రావడం ఇప్పుడు హాట్ టాపిక్‌గా మారింది. ఈ పరిస్థితితో అటు హీరో నాని, ఇటు నిర్మాత తీవ్ర ఆందోళనలో ఉన్నట్లు ఇండస్ట్రీ టాక్.

నిజానికి, ఈ సినిమా షూటింగ్‌ను మొదట మార్చి 27న విడుదల చేయాలనే లక్ష్యంతో ప్రారంభించారు. కానీ, క్వాలిటీ విషయంలో రాజీపడని దర్శకుడు శ్రీకాంత్ ఓదెల మరికొంత సమయం కావాలని కోరడంతో మేకర్స్ ఆగస్టు 21కి రిలీజ్ డేట్‌ను మార్చారు. అయితే తాజా సమాచారం ప్రకారం, ఆగస్టు 21 నాటికి కూడా సినిమాను థియేటర్లలోకి తీసుకురావడం అసాధ్యమని తెలుస్తోంది. ఎందుకంటే ఈ చిత్రానికి సంబంధించి ఇంకా దాదాపు 60 రోజుల షూటింగ్ వర్క్ బ్యాలెన్స్ ఉంది. ఈ 60 రోజుల టాకీ, యాక్షన్ పార్ట్ పూర్తయిన తర్వాతే మొత్తం సినిమాను ఎడిటింగ్ టేబుల్‌పైకి తీసుకెళ్లాల్సి ఉంటుంది. ఆపై భారీ ఎత్తున పోస్ట్ ప్రొడక్షన్ పనులు వేగవంతం చేయాలి.

ఈ భారీ ఆలస్యం కారణంగా మేకర్స్ అనధికారికంగా ఆగస్టు 21 రిలీజ్ డేట్‌ను కూడా వదులుకున్నట్లు తెలుస్తోంది. ప్రస్తుతం వారు డిసెంబర్ నెలను టార్గెట్‌గా పెట్టుకుని వర్క్ ప్లాన్ చేసుకుంటుండగా, డిజిటల్ రైట్స్ దక్కించుకున్న నెట్‌ఫ్లిక్స్ మాత్రం దీనికి అంగీకరించడం లేదని సమాచారం. అగ్రిమెంట్ ప్రకారం ముందుగా అనుకున్న విండోలోనే అంటే సెప్టెంబర్ నాటికే సినిమాను ప్రేక్షకుల ముందుకు తీసుకురావాలని ఒత్తిడి చేస్తోంది. ఒకవేళ అంతకంటే ఆలస్యమైతే ఓటీటీ రైట్స్ కోసం కుదుర్చుకున్న డీల్ ప్రైస్‌ను భారీగా తగ్గించాల్సి ఉంటుందని నెట్‌ఫ్లిక్స్ హెచ్చరించినట్లు సమాచారం.

నాని కెరీర్‌లోనే అత్యధిక బడ్జెట్‌తో తెరకెక్కుతున్న సినిమా కావడంతో, ఓటీటీ రేట్ తగ్గితే నిర్మాతలకు కోట్లలో నష్టం వాటిల్లే ప్రమాదం ఉంది. ఇప్పటికే ఆలస్యం కారణంగా బడ్జెట్ భారీగా పెరిగిపోయింది. ఇలాంటి తరుణంలో ఓటీటీ రైట్స్ అమౌంట్ తగ్గితే భరించడం కష్టం. గతంలో 'పెద్ది' సినిమా మేకర్స్ కూడా రీషూట్ల కోసం సమయం కావాలనుకున్నా, ఓటీటీ రైట్స్ ప్రెజర్ మరియు బడ్జెట్ ఇష్యూస్ వల్ల జూన్ 4వ తేదీనే రిలీజ్ చేయాల్సి వచ్చింది. ఇప్పుడు 'ది ప్యారడైజ్' కూడా అదే తరహా సమస్యను ఎదుర్కొంటోంది. అందుకే కనీసం దసరా పండుగ కానుకగా అయినా సెప్టెంబర్ లేదా అక్టోబర్ నాటికి పనులన్నీ పూర్తి చేసి సినిమాను సిద్ధం చేయాలని నిర్మాత దర్శకుడిని కోరినట్లు తెలుస్తోంది. మరి శ్రీకాంత్ ఓదెల ఈ డెడ్‌లైన్‌ను ఎలా అందుకుంటారో చూడాలి.