ఒక సినిమా హిట్ కావడం వేరు.. నెలల తరబడి థియేటర్లలో ప్రేక్షకులను అలరిస్తూ చరిత్ర సృష్టించడం వేరు. ఇప్పుడంటే రెండు మూడు వారాలు థియేటర్లలో ఆడితేనే గొప్పగా చెప్పుకుంటున్నారు. కానీ ఒకప్పుడు 100 రోజులు, 175 రోజులు, 200 రోజులు పాటు సినిమాలు ప్రదర్శితమవుతూ ఉండేవి. ముఖ్యంగా 175 రోజుల రన్ అనేది అప్పట్లో ఓ సినిమా విజయానికి కీలకమైన మైలురాయిగా నిలిచేది. అలా టాలీవుడ్‌లో అత్యధిక కేంద్రాల్లో నేరుగా 175 రోజులు ప్రదర్శితమైన సినిమాల జాబితాలో కొన్ని చిత్రాలు ఇప్పటికీ ప్రత్యేక స్థానాన్ని సంపాదించుకున్నాయి.

టాప్ ప్లేస్‌లో ‘సింహాద్రి’
ఈ జాబితాలో జూనియర్ ఎన్టీఆర్ నటించిన ‘సింహాద్రి’ మొదటి స్థానంలో ఉంది. 2003లో విడుదలైన ఈ సినిమా అప్పట్లో బాక్సాఫీస్ వద్ద సంచలనం సృష్టించింది. ఎస్.ఎస్. రాజమౌళి దర్శకత్వంలో తెరకెక్కిన ఈ చిత్రం ఎన్టీఆర్ కెరీర్‌లోనే మైలురాయిగా నిలిచింది. ఏకంగా 52 కేంద్రాల్లో నేరుగా 175 రోజులు ప్రదర్శితమై అగ్రస్థానాన్ని దక్కించుకుంది.

రెండో స్థానంలో ‘పోకిరి’
మహేశ్ బాబు, పూరీ జగన్నాథ్ కాంబినేషన్‌లో వచ్చిన ‘పోకిరి’ 2006లో విడుదలై తెలుగు సినిమా బాక్సాఫీస్ లెక్కలను మార్చేసింది. ఈ సినిమా భారీ వసూళ్లతో పాటు మహేశ్ బాబు స్టార్‌డమ్‌ను మరో స్థాయికి తీసుకెళ్లింది. ఈ సినిమా 48 కేంద్రాల్లో నేరుగా 175 రోజుల ప్రదర్శనతో రెండో స్థానంలో నిలిచింది.

మూడో స్థానంలో ‘ఇంద్ర’
చిరంజీవి నటించిన ‘ఇంద్ర’ 2002లో విడుదలై ప్రేక్షకులను విశేషంగా ఆకట్టుకుంది. బి. గోపాల్ దర్శకత్వంలో తెరకెక్కిన ఈ చిత్రం అప్పట్లో వసూళ్ల పరంగా సరికొత్త రికార్డులు సృష్టించింది. ఈ జాబితాలో 31 కేంద్రాల్లో నేరుగా 175 రోజులు ప్రదర్శితమై మూడో స్థానాన్ని సంపాదించుకుంది.

బాలయ్య సినిమాలకు ప్రత్యేక స్థానం
నందమూరి బాలకృష్ణ నటించిన ‘సమరసింహారెడ్డి’, ‘నరసింహనాయుడు’ చిత్రాలు కూడా ఈ జాబితాలో చోటు దక్కించుకున్నాయి. 1999లో విడుదలైన ‘సమరసింహారెడ్డి’ 29 కేంద్రాల్లో 175 రోజుల రన్‌తో నాలుగో స్థానంలో ఉంది. 2001లో వచ్చిన ‘నరసింహనాయుడు’ 17 కేంద్రాల్లో ఈ ఘనత సాధించి ఎనిమిదో స్థానంలో నిలిచింది. ఫ్యాక్షన్ నేపథ్యంలో తెరకెక్కిన ఈ రెండు సినిమాలు బాలయ్య మాస్ ఇమేజ్‌ను మరింత బలోపేతం చేశాయి.

కుటుంబ కథా చిత్రాలదీ అదే జోరు
శ్రీకాంత్ నటించిన ‘పెళ్లి సందడి’ 27 కేంద్రాల్లో 175 రోజులు ప్రదర్శితమై ఐదో స్థానంలో నిలిచింది. తరుణ్ నటించిన ‘నువ్వే కావాలి’ 25 కేంద్రాల్లో ఈ ఘనత సాధించి ఆరో స్థానాన్ని దక్కించుకుంది. వెంకటేశ్ నటించిన ‘కలిసుందాం రా’ 14 కేంద్రాల్లో 175 రోజుల రన్‌తో తొమ్మిదో స్థానంలో ఉంది.

పాత సినిమాల ప్రభంజనం
1981లో విడుదలైన అక్కినేని నాగేశ్వరరావు ‘ప్రేమాభిషేకం’ 19 కేంద్రాల్లో నేరుగా 175 రోజులు ప్రదర్శితమై ఏడో స్థానంలో నిలిచింది. ఇక 1963లో వచ్చిన ఎన్టీఆర్ ‘లవకుశ’ 13 కేంద్రాల్లో ఈ ఘనత సాధించి పదో స్థానాన్ని దక్కించుకుంది. 

నేరుగా 175 రోజుల రన్ సాధించిన టాప్ 10 సినిమాలు:

1. సింహాద్రి (2003) – 52 కేంద్రాలు
2. పోకిరి (2006) – 48 కేంద్రాలు
3. ఇంద్ర (2002) – 31 కేంద్రాలు
4. సమరసింహారెడ్డి (1999) – 29 కేంద్రాలు
5. పెళ్లి సందడి (1996) – 27 కేంద్రాలు
6. నువ్వే కావాలి (2000) – 25 కేంద్రాలు
7. ప్రేమాభిషేకం (1981) – 19 కేంద్రాలు
8. నరసింహనాయుడు (2001) – 17 కేంద్రాలు
9. కలిసుందాం రా (2000) – 14 కేంద్రాలు
10. లవకుశ (1963) – 13 కేంద్రాలు

 

ఇది కూడా చదవండి: నన్ను కొట్టకూడదు.. ‘జైలర్ 2’లో రజనీకి మిథున్ చక్రవర్తి కండిషన్.!

 

 

 

[Tollywood 175 Days Movies, Top 10 Tollywood Movies, Simhadri 175 Days Record, Simhadri Movie, Pokiri Movie, Indra Movie, Samarasimha Reddy Movie, Pelli Sandadi Movie, Telugu Film News]