Home

»

Featured News

దక్షిణాది నుంచి తొలి దాదాసాహెబ్ ఫాల్కే అవార్డు అందుకున్న దర్శకుడు ఎవరో తెలుసా.?

Nov 16, 2026 10:42AM

(నవంబర్ 16 దర్శకనిర్మాత బి.ఎన్.రెడ్డి జయంతి సందర్భంగా..)

తెలుగు చలనచిత్ర పరిశ్రమలో దర్శకుడిగా, నిర్మాతగా తనకంటూ ప్రత్యేక గుర్తింపు తెచ్చుకున్న వ్యక్తుల్లో బి.ఎన్‌.రెడ్డి ఒకరు. తెలుగు సినిమాకు కళాత్మక విలువలను పరిచయం చేసిన గొప్ప దర్శకుల్లో ఆయన పేరు తప్పకుండా ఉంటుంది. బి.ఎన్‌.రెడ్డి అసలు పేరు ఏమిటి? ఆయన సినీ ప్రయాణం ఎలా మొదలైంది? తన కెరీర్‌లో ఎలాంటి సినిమాలు చేశారు? ఎన్ని చిత్రాలకు దర్శకత్వం వహించారు? వంటి ఆసక్తికర విషయాలు తెలుసుకుందాం.

బి.ఎన్‌.రెడ్డి అసలు పేరు బొమ్మిరెడ్డి నరసింహారెడ్డి. 1908 నవంబర్ 16న ప్రస్తుత కడప జిల్లాలోని కొత్తపల్లి గ్రామంలో జన్మించారు. చిన్నప్పటి నుంచే వ్యాపార, సామాజిక విషయాలపై ఆసక్తి ఉన్న ఆయన మద్రాసులో ఉన్న సమయంలో సినీ రంగంపై ఆకర్షితులయ్యారు. హెచ్‌.ఎం.రెడ్డితో కలిసి రోహిణి పిక్చర్స్‌లో పనిచేశారు. 1938లో విడుదలైన ‘గృహలక్ష్మి’ చిత్ర నిర్మాణంలోనూ ఆయన భాగస్వామిగా ఉన్నారు. ఆ తర్వాత హెచ్‌.ఎం.రెడ్డితో విడిపోయి 1939లో వాహిని పిక్చర్స్ సంస్థను స్థాపించారు. అలా నిర్మాతగా, దర్శకుడిగా తెలుగు సినిమా రంగంలో తన ప్రయాణాన్ని మొదలుపెట్టారు.

బి.ఎన్‌.రెడ్డి దర్శకత్వం వహించిన మొదటి సినిమా ‘వందేమాతరం’. 1939లో విడుదలైన ఈ సినిమాతో ఆయ‌న‌కు మంచి గుర్తింపు వ‌చ్చింది. ఆ తర్వాత ‘సుమంగళి’, ‘దేవత’, ‘స్వర్గసీమ’ వంటి చిత్రాలను రూపొందించారు. ముఖ్యంగా సమాజంలో ఉన్న సమస్యలను సినిమాల ద్వారా ప్రేక్షకులకు తెలియజేయాలనే ఉద్దేశంతో ఆయన ఎక్కువగా సామాజిక కథాంశాలను ఎంచుకునేవారు. వితంతువుల సమస్యలు, బాల్యవివాహాలు, కుటుంబ సంబంధాలు, మానవ విలువలు వంటి అంశాలను తన సినిమాల్లో చూపించేవారు. ‘సుమంగళి’లో వితంతువుల జీవితాలను చూపిస్తే, ‘స్వర్గసీమ’లో సినిమా రంగం చుట్టూ సాగే కథను తెరకెక్కించారు. తెలుగు సాహిత్యంలోని గొప్ప వ్యక్తుల జీవితాలను కూడా ‘వేమన’, ‘పోతన’ వంటి చిత్రాల ద్వారా ప్రేక్షకులకు పరిచయం చేశారు.

ఇక బి.ఎన్‌.రెడ్డి కెరీర్‌లో ప్రత్యేకంగా చెప్పుకోవాల్సిన సినిమా ‘మల్లీశ్వరి’. 1951లో విడుదలైన ఈ చిత్రంలో ఎన్టీఆర్‌, భానుమతి జంటగా నటించారు. శ్రీకృష్ణదేవరాయల కాలం నాటి నేపథ్యంలో రూపొందిన ఈ సినిమా తెలుగు సినీ చరిత్రలో ఓ అద్భుత దృశ్యకావ్యంగా నిలిచిపోయింది. ఆ తర్వాత ‘బంగారు పాప’, ‘భాగ్యరేఖ’, ‘రాజమకుటం’, ‘పూజాఫలం’, ‘రంగుల రాట్నం’, ‘బంగారు పంజరం’ వంటి చిత్రాలను రూపొందించారు. మొత్తంగా ఆయన తన కెరీర్‌లో 11 సినిమాలకు దర్శకత్వం వహించారు. ఆయన దర్శకత్వం వహించిన చివరి సినిమా ‘బంగారు పంజరం’. 1969లో విడుదలైన ఈ చిత్రంతో ఆయన దర్శకుడిగా తన ప్రయాణానికి ముగింపు పలికారు.

త‌ను చేసే సినిమాలు కేవలం వినోదానికే పరిమితం కాకుండా సామాజిక మార్పుకు కూడా దోహదపడాలని బి.ఎన్‌.రెడ్డి భావించేవారు. అందుకే ఆయన రూపొందించిన చాలా సినిమాలు విమర్శకుల ప్రశంసలు అందుకోవడంతోపాటు పలు పురస్కారాలను కూడా సాధించాయి. ‘బంగారు పాప’ చిత్రానికి 1955లో ఉత్తమ తెలుగు చిత్రంగా రాష్ట్రపతి రజత పతకం లభించింది. ‘రంగుల రాట్నం’ సినిమాకు 1966లో జాతీయ స్థాయిలో ఉత్తమ తెలుగు చిత్రంగా గుర్తింపు వచ్చింది. ఇక భారతీయ సినిమా రంగానికి చేసిన విశేష సేవలకు గుర్తింపుగా 1974లో దాదాసాహెబ్ ఫాల్కే అవార్డును అందుకున్నారు. అదే ఏడాది పద్మభూషణ్ పురస్కారం కూడా ఆయనను వరించింది. శ్రీ వేంకటేశ్వర విశ్వవిద్యాలయం నుంచి గౌరవ డాక్టరేట్ కూడా అందుకున్నారు.

తెలుగు సినిమాను కేవలం వినోద సాధనంగా కాకుండా ఒక కళారూపంగా నిలబెట్టేందుకు కృషి చేసిన దర్శకుడు బి.ఎన్‌.రెడ్డి. వాహిని సంస్థతో పాటు విజయ వాహిని స్టూడియోస్ అభివృద్ధిలోనూ ఆయన కీలక పాత్ర పోషించారు. దక్షిణ భారతదేశం నుంచి దాదాసాహెబ్ ఫాల్కే అవార్డు అందుకున్న తొలి సినీ ప్రముఖుడిగా ఆయనకు ప్రత్యేక గుర్తింపు ఉంది. 1977 నవంబర్ 8న ఆయన కన్నుమూశారు. అయితే ఆయన రూపొందించిన ‘మల్లీశ్వరి’, ‘స్వర్గసీమ’, ‘బంగారు పాప’ వంటి చిత్రాలు ఇప్పటికీ తెలుగు సినీ చరిత్రలో ప్రత్యేక స్థానాన్ని సంపాదించుకున్నాయి. అందుకే బి.ఎన్‌.రెడ్డి పేరు తెలుగు సినిమా ఉన్నంతకాలం గుర్తుండిపోతుంది.

 

 

BNReddyBiography, B N Reddy, TollywoodDirector, BommireddyNarasimhaReddy, MalleswariMovie

google-ad-img

Customer Service

For support : teluguone.teluguone@gmail.com | For Queries : support@teluguone.com