పెళ్లి చేసుకుంటే బంధువులు, స్నేహితులు బంగారు నగలు, రింగులు, ఖరీదైన కానుకలు ఇస్తారని ఆశపడితే.. చివరికి చేతిలో చిల్లిగవ్వ కూడా మిగలకపోతే ఎలా ఉంటుంది? సరిగ్గా ఇలాంటి పరిస్థితినే ఎదుర్కొంటాడు కథానాయకుడు పద్మనాభం. పెళ్లైన మొదటి రోజే అతడికి అక్షరాలా రూ.30 వేల నష్టం రావడంతో అసలు కథ మొదలవుతుంది. పెళ్లికి వచ్చిన అతిథులు కనీసం రూ.10 పెట్టి గిఫ్ట్ కూడా తీసుకురాకుండా, ఖాళీ చేతులతో వచ్చి బొకేలు ఇచ్చి కడుపునిండా భోజనం చేసి వెళ్లిపోవడంతో పద్మనాభం ఆశలన్నీ అడియాశలవుతాయి. పెళ్లి ఘనంగా చేస్తే కానుకల రూపంలో పెట్టిన ఖర్చంతా తిరిగి వస్తుందని అనుకున్న అతడికి మొదటి రోజే గట్టి షాక్ తగులుతుంది.

ఇక ఇంట్లో బామర్ది ఇచ్చే సలహాలు మరో స్థాయిలో నవ్వులు పూయిస్తాయి. ఇంటి నైరుతి మూల బరువు తగ్గిందని, వాస్తు ప్రకారం బెడ్‌రూమ్‌లో మరొకరిని తీసుకొచ్చి పెట్టాలని చెప్పే వింత లాజిక్‌తో పద్మనాభాన్ని మరింత అయోమయంలో పడేస్తాడు. ఆఫీస్‌లో పనిచేసే రమ్యను ఇంట్లోకి తీసుకొస్తే ఇద్దరి జీతాలు కలిపి త్వరగా సొంత ఇల్లు సంపాదించుకోవచ్చని ఓ మాస్టర్ ప్లాన్ కూడా వేస్తాడు. ఇక రిసెప్షన్ పేరుతో మరో లెక్క మొదలుపెడతాడు. సుమారు 200 మంది అతిథులు వస్తారని, ఒక్కొక్కరు కనీసం రూ.200 గిఫ్ట్ ఇచ్చినా మొత్తం రూ.40 వేలు వస్తాయని, రిసెప్షన్ ఖర్చు రూ.30 వేలు పోను రూ.10 వేలు మిగులుతాయని లెక్కలు వేస్తాడు. కానీ అక్కడికి వచ్చిన అతిథులు ఎవరంటే.. ఎలక్ట్రిషియన్లు, సీరియల్ ఎడిటర్లు, సప్లయర్లు! వాళ్లంతా తమ బకాయిల కోసం ఎదురుచూస్తుండటంతో పద్మనాభం పరిస్థితి మరింత దారుణంగా మారుతుంది.

ఇంతటితో పద్మనాభం కష్టాలు తీరవు. ఇంటి ఓనర్ కూడా ఎలాంటి కానుక ఇవ్వకుండా, 'మీరు నూరేళ్లు సుఖంగా బ్రతకండి' అంటూ ఓ కాగితం ముక్క చేతిలో పెట్టి వెళ్లిపోతాడు. ఇక ఫస్ట్ నైట్ రూమ్ రెంట్ కింద అడ్వాన్స్‌గా కట్టిన రూ.3,500 కూడా వృథా కావడంతో అతడి బడ్జెట్ మొత్తం తలకిందులవుతుంది. పెళ్లి చేసుకుంటే లాభం వస్తుందని ఆశపడిన పద్మనాభానికి వరుసగా ఎదురవుతున్న ఈ అనుభవాలు ప్రేక్షకులను కడుపుబ్బా నవ్విస్తాయి.

అయితే చివరికి పద్మనాభానికి ఓ అనూహ్యమైన గిఫ్ట్ అందుతుంది. ఆఫీస్‌లో పనిచేసే సిబ్బంది అంతా కలిసి అతడి హనీమూన్ కోసం రూ.30 వేల విలువైన కూపన్లు, ట్రావెల్ టోకెన్లు బహుమతిగా ఇస్తారు. దీంతో భార్యతో కలిసి కొడైకెనాల్ వెళ్లేందుకు సిద్ధమవుతాడు. ఫ్లైట్ లేదా ట్యాక్సీ ప్రయాణం నుంచి హోటల్ భోజనాల వరకు డబ్బులు చేతిలో పెట్టుకోకుండానే కూపన్లతో ప్రయాణం సాగించాల్సి రావడంతో అక్కడ కూడా ఎన్నో సరదా ఇబ్బందులు ఎదురవుతాయి. పెళ్లి మొదటి రోజే రూ.30 వేల నష్టంతో మొదలైన పద్మనాభం ప్రయాణం.. చివరికి భార్యాభర్తల మధ్య నవ్వులు పూయిస్తూ సుఖాంతమవుతుంది. ఈ సన్నివేశాల్లోని కామెడీ టైమింగ్, డబ్బుల కోసం పద్మనాభం పడే తిప్పలు చూస్తే పాత సినిమాల్లోని హాస్యం ఎంత ప్రత్యేకమో మరోసారి గుర్తుకొస్తుంది. ఇలాంటి కామెడీ వీడియోల కోసం మా Teluguone youtube channelను Subscribe చేసుకోండి. 

 

 

[Padmanabham Comedy Scene, Telugu Comedy Scenes, Telugu Wedding Comedy, Telugu Honeymoon Comedy, L B Sriram Comedy, Telugu Family Comedy, Telugu Funny Scenes, Wedding Gift Comedy, Kodaikanal Honeymoon Comedy, Telugu Movie Comedy Clips]