తెలుగు సినిమా చరిత్రలో కామెడీ చిత్రాలకు ఒక ప్రత్యేకమైన స్థానం ఉంది. అందులోనూ హాస్య నటకిరీటి రాజేంద్ర ప్రసాద్, దిగ్గజ దర్శకుడు ఈ.వి.వి. సత్యనారాయణ కాంబినేషన్ లో వచ్చిన సినిమాలు ప్రేక్షకుల మనసుల్లో చెరగని ముద్ర వేశాయి. అలా వచ్చి అప్పటి నుంచీ ఇప్పటి వరకు నవ్వుల పువ్వులు పూయిస్తున్న కల్ట్ కామెడీ మూవీ 'అప్పుల అప్పారావు'. ఈ సినిమా ఇప్పటికీ టీవీల్లో, డిజిటల్ ప్లాట్ఫామ్లలో సృష్టిస్తున్న హంగామా అంతా ఇంతా కాదు.
'అప్పుల అప్పారావు' పేరు వినగానే ప్రతీ ఒక్కరికీ ముందుగా గుర్తొచ్చేది రాజేంద్ర ప్రసాద్ మార్క్ కామెడీ టైమింగ్. ఊరంతా అప్పులు చేయడం, వాటి నుంచి తప్పుకోవడానికి విచిత్రమైన ఉపాయాలు ఆలోచించడం, అప్పు ఇచ్చిన వారిని తన తెలివితో బురిడీ కొట్టించడం.. ఇలా ప్రతీ సన్నివేశం ప్రేక్షకులకు పొట్టచెక్కలయ్యేలా నవ్వులు పూయిస్తుంది. ఈ చిత్రంలో కథానాయికగా నటించిన శోభన తన అందం, అభినయంతో ప్రేక్షకులను ఎంతగానో ఆకట్టుకున్నారు.
దర్శకుడు ఈ.వి.వి. సత్యనారాయణ రాసిన కథనం, ఆయన మార్క్ డైలాగ్స్ ఈ సినిమాకు ప్రధాన బలం. ప్రతి పాత్రకూ ఒక ప్రత్యేకతను కేటాయించి, ప్రతి సీన్లోనూ అవుట్ అండ్ అవుట్ హస్య రసం పండేలా తెరకెక్కించడంలో ఆయన సిద్దహస్తుడు. అప్పుల ఇచ్చిన వారు అప్పారావు వెనకాల పడే సన్నివేశాలు, ఆ క్లిష్ట పరిస్థితుల్లో హీరో ఇచ్చే ఎక్స్ప్రెషన్లు థియేటర్లలో నవ్వుల వర్షం కురిపించాయి.
ఈ చిత్రంలో హాస్య బ్రహ్మ బ్రహ్మానందం పాత్ర గురించి ఎంత చెప్పినా తక్కువే. తన మార్క్ మేనరిజమ్లు, హాస్యంతో ఆయన పండించిన కామెడీ ప్రేక్షకులను ఎంతగానో అలరిస్తుంది. రాజేంద్ర ప్రసాద్, బ్రహ్మానందం మధ్య వచ్చే కాంబినేషన్ సీన్లు ఈ సినిమాకు ప్రధాన హైలైట్గా నిలిచాయి. ఐరన్ లెగ్ శాస్త్రి కామెడీ కూడా మరో స్థాయిలో ఉంటుంది. వారితో పాటు ఇతర ప్రముఖ నటులంతా తమ నటనతో నవ్వుల విందు అందించారు.
రాజేంద్ర ప్రసాద్, శోభన జోడీ స్క్రీన్ పై ఎంతో ముచ్చటగా కనిపించి ప్రేక్షకులను కట్టిపడేసింది. ఈ చిత్రంలోని సన్నివేశాలు, డైలాగ్స్ నేటికీ మీమ్స్ రూపంలో సోషల్ మీడియాలో చక్కర్లు కొడుతూనే ఉన్నాయి.
అప్పుల బాధల నేపథ్యంలో ఒక కడుపుబ్బ నవ్వించే కథను రూపొందించి, అన్ని వర్గాల ప్రేక్షకులను మెప్పించడం ఈ సినిమా ప్రత్యేకత. ఎలాంటి అశ్లీలత లేకుండా, స్వచ్ఛమైన హాస్యాన్ని అందించిన ఈ చిత్రం కుటుంబ సమేతంగా కూర్చుని హాయిగా నవ్వుకోవడానికి ఎప్పుడూ మొదటి వరుసలో ఉంటుంది.
కాలం మారినా, ఎన్ని కొత్త సినిమాలు వచ్చినా 'అప్పుల అప్పారావు' అందించే వినోదం మాత్రం ఎవర్ గ్రీన్. యూట్యూబ్లో అందుబాటులో ఉన్న ఈ పూర్తి స్థాయి వినోదాత్మక చిత్రాన్ని చూస్తూ తెలుగు ప్రేక్షకులు తమ చిన్ననాటి తీపి జ్ఞాపకాలను నెమరువేసుకుంటున్నారు.
Appula Appa Rao, Telugu Cinema, Rajendra Prasad, EVV Satyanarayana, Brahmanandam
