కోలీవుడ్ నటుడు సూర్య విలక్షణమైన పాత్రలకు కేరాఫ్ అడ్రస్. కమర్షియల్ ఎంటర్‌టైనర్లతో పాటు వైవిధ్యమైన ప్రయోగాలు చేస్తూ సౌత్ ఇండియాలోనే కాకుండా గ్లోబల్ వైడ్‌గా భారీ ఫ్యాన్ బేస్ సంపాదించుకున్నారు. ప్రస్తుతం సరికొత్త లైనప్‌తో దూసుకుపోతున్న ఈ స్టార్ హీరో కెరీర్‌లో అత్యంత ప్రతిష్టాత్మకమైన 50వ చిత్రం గురించి ఫిలిం నగర్ సర్కిల్స్‌లో ఒక క్రేజీ టాక్ నడుస్తోంది. ఈ ల్యాండ్‌మార్క్ మూవీ కోసం ఒక స్టార్ కమర్షియల్ డైరెక్టర్ రంగంలోకి దిగినట్లు ఇండస్ట్రీ వర్గాల సమాచారం.

తెలుస్తున్న వివరాల ప్రకారం.. ‘జైలర్’ సినిమాతో బాక్సాఫీస్ వద్ద సెన్సేషన్ క్రియేట్ చేసిన దర్శకుడు నెల్సన్ దిలీప్ కుమార్, సూర్య మైల్‌స్టోన్ ప్రాజెక్ట్ కోసం అదిరిపోయే కథను సిద్ధం చేస్తున్నారట. వీరిద్దరి మధ్య ఇప్పటికే కథా చర్చలు కూడా మొదలైనట్లు కోలీవుడ్ మీడియా కోడై కూస్తోంది. ఒకవేళ అంతా అనుకున్నట్లు కుదిరి నెల్సన్ మార్క్ డార్క్ కామెడీతో సూర్య యాక్షన్ ప్లాన్ సింక్ అయితే, బాక్సాఫీస్ వద్ద సరికొత్త రికార్డులు క్రియేట్ అవ్వడం ఖాయమని ట్రేడ్ విశ్లేషకులు భావిస్తున్నారు.

ఇటీవలే ఆర్జే బాలాజీ దర్శకత్వంలో వచ్చిన 'కరుప్పు' సినిమాతో సూర్య సాలిడ్ సక్సెస్ అందుకొని మంచి ఫామ్‌లో ఉన్నారు. ప్రస్తుతం ఆయన చేతిలో క్రేజీ వెంచర్లు ఉన్నాయి. వెంకీ అట్లూరి దర్శకత్వంలో సూర్య నటిస్తున్న క్లాస్ ఫ్యామిలీ డ్రామా 'విశ్వనాథ్ అండ్ స‌న్స్' విడుదలకు శరవేగంగా సిద్ధమవుతోంది. దీనితో పాటు మలయాళ బ్లాక్‌బస్టర్ మేకర్ జితూ మాధవన్ కాంబినేషన్‌లో నజ్రియా నజీమ్, నస్లేన్‌లతో కలిసి ఒక ఇంట్రెస్టింగ్ ప్రాజెక్ట్ చేస్తున్నారు.

ఈ చిత్రాల అనంతరం సూర్య తన 48వ సినిమాను పట్టాలెక్కించనున్నారు. 'జై భీమ్' లాంటి పవర్‌ఫుల్ అండ్ సెన్సేషనల్ మూవీతో మెప్పించిన డైరెక్టర్ టి.జె. జ్ఞానవేల్‌తో ఈ ప్రాజెక్ట్ ఉండబోతోంది. వీరిద్దరి కాంబోలో రాబోయే ఈ సోషల్ డ్రామాపై అభిమానుల్లో ఇప్పట్నుంచే భారీ అంచనాలు ఉన్నాయి. ఇలాంటి బ్యాక్ టు బ్యాక్ హై-వోల్టేజ్ చిత్రాల తర్వాత సూర్య 50వ సినిమా అనౌన్స్‌మెంట్ రానుంది.

ఈ ల్యాండ్‌మార్క్ సినిమాపై సోషల్ మీడియాలో నెటిజన్లు, సినీ ప్రియులు తీవ్ర ఆసక్తి చూపిస్తున్నారు. నెల్సన్ ప్రస్తుతం సూపర్ స్టార్ రజనీకాంత్‌తో మోస్ట్ అవైటెడ్ సీక్వెల్ ‘జైలర్ 2’ షూటింగ్‌తో ఫుల్ బిజీగా ఉన్నారు. ఈ భారీ షెడ్యూల్ పూర్తయిన తర్వాతే సూర్య 50వ ప్రాజెక్ట్‌పై అధికారిక ముద్ర పడే అవకాశం ఉంది. ఈ లోపు ఈ కాంబినేషన్‌కు సంబంధించిన మరిన్ని ఆసక్తికర విశేషాలు బయటకు వచ్చే ఛాన్స్ ఉంది.