.WEBP)
- కన్నీరు తుడిచిన కండల వీరుడు
- ఆ తల్లికి కొండంత అండగా సోనూసూద్
- సోనూసూద్ ఫౌండేషన్ అద్భుతం చేసింది!
వెండితెరపై విలన్గా మెప్పించే నటులు నిజజీవితంలో కూడా అదే స్థాయిలో క్రూరంగా ఉంటారని కొందరు భావిస్తారు. కానీ, తన నటనతో విలనిజాన్ని పండించి, తన వ్యక్తిత్వంతో కోట్లాది మంది హృదయాలను గెలుచుకున్న ఏకైక నటుడు సోనూసూద్. కరోనా సమయంలో దేశవ్యాప్తంగా వలస కూలీలకు అండగా నిలిచి 'మనుషుల్లో దేవుడు' అనిపించుకున్న సోనూ, తాజాగా మరోసారి తనలోని మానవత్వాన్ని చాటుకున్నారు. చావు అంచుల్లో ఉన్న ఓ చిన్నారి ప్రాణాలను కాపాడి, ఆ కుటుంబంలో వెలుగులు నింపారు.
వివరాల్లోకి వెళ్తే.. 'నీరా' అనే చిన్నారి తీవ్రమైన ప్రాణాంతక వ్యాధితో బాధపడుతోంది. ఆ బిడ్డను బ్రతికించుకోవడానికి ఆ తల్లి తిరగని ఆసుపత్రి లేదు. వెళ్ళిన ప్రతిచోటా డాక్టర్లు 'రిస్క్ ఎక్కువ.. బ్రతకడం కష్టం' అని చేతులెత్తేశారు. చివరకు ఆశలన్నీ వదులుకున్న ఆ తల్లి, తన బిడ్డను తీసుకుని ముంబైలోని సోనూసూద్ ఇంటికి చేరింది. కన్నీరుమున్నీరవుతున్న ఆ తల్లి ఆవేదన చూసి సోనూ చలించిపోయారు. తక్షణమే తన టీమ్ను అప్రమత్తం చేసి, మెరుగైన చికిత్స కోసం ఏర్పాట్లు చేశారు.
సోనూసూద్ చారిటీ ఫౌండేషన్ పర్యవేక్షణలో, జూపిటర్ ఆసుపత్రిలోని నిపుణులైన వైద్య బృందం నీరాకు క్లిష్టమైన శస్త్రచికిత్సను విజయవంతంగా నిర్వహించింది. ఎందరో వద్దన్నా, సోనూ నమ్మకంతో ముందుకు సాగి ఆ చిన్నారికి పునర్జన్మ ప్రసాదించారు. సర్జరీ తర్వాత కోలుకున్న ఆ చిన్నారిని సోనూ ప్రేమగా ఎత్తుకుని ముద్దాడారు. దీనికి సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. "ఎవరూ జీవితంపై ఆశ వదులుకోవద్దు.. మనం ఐక్యంగా ఉంటే ఏ యుద్ధాన్నైనా గెలవవచ్చు" అంటూ సోనూ ఎమోషనల్ పోస్ట్ చేశారు.
నిజానికి సోనూసూద్కు తెలుగు రాష్ట్రాలతో విడదీయలేని అనుబంధం ఉంది. తన భార్య సోనాలి ఆంధ్రప్రదేశ్కు చెందిన మహిళ కావడంతో ఏపీని తన రెండో ఇల్లుగా భావిస్తుంటారు. గత ఏడాది కూడా ఏపీకి నాలుగు అత్యాధునిక అంబులెన్స్లను అందించిన ఆయన, ఇక్కడి ప్రజలకు ఏ ఆపద వచ్చినా తాను ముందుంటానని ఎన్నోసార్లు నిరూపించారు. సినిమాల్లో సంపాదించిన పేరు ప్రఖ్యాతులతో పాటు, సమాజానికి తిరిగి ఇవ్వడం ఒక బాధ్యతగా ఆయన భావిస్తారు.
సోనూ చేస్తున్న ఈ సేవా కార్యక్రమాలపై నెటిజన్లు ప్రశంసల వర్షం కురిపిస్తున్నారు. 'అందరు హీరోలు సినిమాల్లోనే ఉంటారు.. కానీ సోనూ మాత్రం మన మధ్యే ఉన్న నిజమైన హీరో" అంటూ ఫ్యాన్స్ కామెంట్స్ చేస్తున్నారు. కేవలం వైద్య సహాయమే కాకుండా.. విద్య, వ్యవసాయం వంటి రంగాల్లో కూడా ఎంతో మందికి ఆయన తన ఫౌండేషన్ ద్వారా ఆసరాగా నిలుస్తున్నారు.
ఇక సినిమాల విషయానికి వస్తే, ప్రస్తుతం సోనూసూద్ తన ప్రతిష్టాత్మక ప్రాజెక్ట్ 'ఫతే' (Fateh) పనుల్లో బిజీగా ఉన్నారు. ఈ సినిమాతో ఆయన దర్శకుడిగా కూడా పరిచయమవుతున్నారు. సైబర్ క్రైమ్ నేపథ్యంలో తెరకెక్కుతున్న ఈ యాక్షన్ థ్రిల్లర్ కోసం అభిమానులు ఆసక్తిగా ఎదురుచూస్తున్నారు. సమాజం పట్ల ఇంత బాధ్యతగా ఉండే వ్యక్తి చేసే సినిమాలకు కూడా మంచి విజయం లభించాలని సినీ వర్గాలు ఆకాంక్షిస్తున్నాయి.
