నటసింహం నందమూరి బాలకృష్ణ తన 108వ సినిమాని అనిల్ రావిపూడి దర్శకత్వంలో చేస్తున్న సంగతి తెలిసిందే. షైన్ స్క్రీన్స్ నిర్మిస్తున్న ఈ చిత్రంలో కాజల్ అగర్వాల్, శ్రీలీల ముఖ్యపాత్రలు పోషిస్తున్నారు. ఈ సినిమా దసరా కానుకగా అక్టోబర్ లో ప్రేక్షకుల ముందుకు రానుంది. ఇప్పటికే విడుదలైన ఫస్ట్ లుక్ కి ప్రేక్షకుల నుంచి మంచి స్పందన లభించింది. ఇదిలా ఉంటే ఈ సినిమాలో బాలకృష్ణ 'భగవంత్ లాల్ కేసరి' అనే పవర్ ఫుల్ పాత్ర పోషిస్తున్నారని, ఆ పాత్ర పేరునే సినిమాకి టైటిల్ గా నిర్ణయించారని ఇటీవల బలంగా వార్తలొచ్చాయి. అయితే ఇప్పుడు ఆ సినిమా టైటిల్ అది కాదని, వేరే టైటిల్ ఉందని కొత్త ప్రచారం తెరపైకి వచ్చింది.
బాలకృష్ణ పుట్టినరోజు కానుకగా జూన్ 10న 'NBK 108' టైటిల్ ప్రకటన ఉంటుందని భావించారంతా. అయితే రెండు రోజుల ముందుగానే జూన్ 8 నే టైటిల్ ని రివీల్ చేయబోతున్నట్లు ప్రకటించి తాజాగా మూవీ టీం సర్ ప్రైజ్ చేసింది. దీంతో 'NBK 108' టైటిల్ గురించి చర్చ మొదలైంది. 'భగవంత్ లాల్ కేసరి' టైటిల్ ని ఖరారు చేశారని కొందరు అంటుంటగా, అంతకుమించి మరో పవర్ ఫుల్ టైటిల్ ఎంపిక చేశారని మరికొందరు అంటున్నారు. మరి 'NBK 108' టైటిల్ 'భగవంత్ లాల్ కేసరి'నేనా లేక మరేదైనా కొత్త టైటిలా? అనేది తెలియాలంటే గురువారం వరకు వేచి చూడాలి. కాగా టైటిల్ తో పాటు బాలకృష్ణ పుట్టినరోజు కానుకగా ఈ మూవీ గ్లింప్స్ కూడా విడుదల చేయనున్నారని సమాచారం.
మరోవైపు జూన్ 10న బాలకృష్ణ 109వ సినిమా ప్రకటన కూడా రానుంది. సితార ఎంటర్టైన్మెంట్స్ నిర్మించనున్న ఈ చిత్రానికి బాబీ కొల్లి దర్శకుడు.
