దర్శకుడిగానే కాకుండా నటుడిగానూ తనదైన ముద్ర వేసిన తరుణ్ భాస్కర్ (Tharun Bhascker) హీరోగా నటించిన లేటెస్ట్ మూవీ 'గాయపడ్డ సింహం' (Gaayapadda Simham). నూతన దర్శకుడు కశ్యప్ శ్రీనివాస్ తెరకెక్కించిన ఈ సినిమా నేడు(మే 1) థియేటర్లలో అడుగుపెట్టింది. ఇందులో జేడీ చక్రవర్తి విలన్ గా నటించగా, శ్రీవిష్ణు ప్రత్యేక పాత్ర పోషించడం విశేషం.
టీజర్, ట్రైలర్‌తో మంచి బజ్ క్రియేట్ చేసిన ఈ సినిమా ఎలా ఉంది?. అమెరికన్ డ్రీమ్ వెనుక ఉన్న చేదు నిజాలను సెటైరికల్ కామెడీతో చూపించే ప్రయత్నం చేసిన ఈ మూవీపై ట్విట్టర్ (X) వేదికగా ప్రేక్షకులు ఎలాంటి అభిప్రాయాలు వ్యక్తం చేస్తున్నారో తెలుసుకుందాం. (Gaayapadda Simham Twitter Review)
కథా నేపథ్యం
ఈ సినిమా కథ దరహాస్ (తరుణ్ భాస్కర్) అనే యువకుడి చుట్టూ తిరుగుతుంది. ప్రేమ కోసం ఎంతో కష్టపడి అమెరికా వెళ్ళిన అతను, అక్కడ అనుకోని పరిస్థితుల వల్ల డీపోర్ట్ అయి ఇండియాకు తిరిగి వస్తాడు. ఇక్కడ అతను తీసుకునే కొన్ని తొందరపాటు నిర్ణయాలు, జేడీ చక్రవర్తి పాత్రతో జరిగే గొడవలు ఎలాంటి గందరగోళాన్ని సృష్టించాయనేదే ఈ చిత్ర కథాంశం.
ట్విట్టర్ టాక్:
ట్విట్టర్ రివ్యూల ప్రకారం, ఈ సినిమాకు నెటిజన్ల నుండి మిక్స్డ్ రెస్పాన్స్ లభిస్తోంది. ఐడియా బాగున్నప్పటికీ, ఎగ్జిక్యూషన్ తేలిపోయింది అంటున్నారు. ఒక మంచి కామెడీ ఎంటర్‌టైనర్ కావాల్సిన అన్ని హంగులు ఉన్నప్పటికీ, బలహీనమైన స్క్రీన్‌ప్లే కారణంగా ఇది ఒక సాదాసీదా ప్రయత్నంగానే మిగిలిపోయిందనే కామెంట్లు వినిపిస్తున్నాయి.
అక్కడక్కడా కామెడీ బాగానే వర్కౌట్ అయిందని టాక్. ముఖ్యంగా ఫస్ట్ హాఫ్ బాగుంది అంటున్నారు. అయితే సెకండ్ హాఫ్ మాత్రం కాస్త డల్ అయిందట. అయితే తరుణ్ భాస్కర్ తన కామెడీ టైమింగ్‌తో సినిమాను నిలబెట్టాడని, ముఖ్యంగా సెల్ఫ్-ట్రోల్ సీక్వెన్స్‌లలో అదరగొట్టాడని నెటిజన్లు ప్రశంసిస్తున్నారు. అలాగే సెకండ్ హాఫ్‌లో శ్రీవిష్ణు ఎంట్రీతో వచ్చే 30 నిమిషాల నాన్‌స్టాప్ ఫన్ సినిమాకు ప్రధాన హైలైట్ అని రిపోర్ట్స్ వస్తున్నాయి. ప్రభాస్, మహేష్ బాబు వంటి స్టార్ హీరోలకు సంబంధించిన రిఫరెన్స్‌లు, స్పూఫ్ ఎపిసోడ్లు థియేటర్లలో నవ్వులు పూయిస్తున్నాయట.
ప్లస్ పాయింట్లు: వినూత్నమైన కథాంశం, తరుణ్ భాస్కర్ నటన, జేడీ చక్రవర్తి నెగటివ్ రోల్, నేచురల్ కామెడీ డైలాగులు
మైనస్ పాయింట్లు: కథాంశం కొన్ని చోట్ల ముందే ఊహించేలా ఉండటం, సెకండ్ హాఫ్‌లో కొన్ని సన్నివేశాలు సాగదీసినట్లు అనిపించడం.
మొత్తం మీద ట్విట్టర్ టాక్ ను బట్టి చూస్తే.. 'గాయపడ్డ సింహం' ఐడియా బాగున్నప్పటికీ, ఆ ఆసక్తికరమైన ఆలోచనను తెరపైకి తీసుకురావడంలో దర్శకుడు తడబడినట్లు కనిపిస్తోంది. వినూత్న కథాంశం, కొన్ని నవ్వుల కోసం ఈ సినిమాను ఒకసారి చూడొచ్చు అనిపిస్తోంది.
