నటసింహం నందమూరి బాలకృష్ణ (Nandamuri Balakrishna), టాలెంటెడ్ యువ దర్శకుడు వివేక్ ఆత్రేయ (Vivek Athreya) కాంబినేషన్లో ఒక భారీ యాక్షన్ ఎంటర్టైనర్ సినిమా రాబోతున్న సంగతి తెలిసిందే. అయితే, గత కొన్ని రోజులుగా సోషల్ మీడియా వేదికగా ఈ ప్రాజెక్ట్ గురించి రకరకాల రూమర్స్ షికారు చేస్తున్నాయి. ముఖ్యంగా బాలకృష్ణ డేట్స్ అడ్జస్ట్ కాకపోవడం వల్ల ఈ సినిమా పూర్తిగా రద్దయిందని, ఈ క్రేజీ ప్రాజెక్ట్ పక్కన పెట్టేశారంటూ సోషల్ మీడియాలో పెద్ద ఎత్తున ప్రచారం సాగింది. ఈ వార్తలతో నందమూరి అభిమానులు ఒక్కసారిగా తీవ్ర నిరాశకు గురయ్యారు. అయితే ఈ ప్రచారంలో ఎలాంటి వాస్తవం లేదు. ఈ ప్రతిష్టాత్మక చిత్రం క్యాన్సిల్ కాలేదు, పైగా అంతా అనుకున్నట్లుగానే చాలా పకడ్బందీగా ముందుకు సాగుతోంది.
ఫిలింనగర్ నుంచి అందుతున్న సమాచారం ప్రకారం, ఈ సినిమాకు సంబంధించిన ప్రీ-ప్రొడక్షన్ పనులు ఇప్పటికే ప్రారంభమయ్యాయి. చిత్ర యూనిట్ నిశ్శబ్దంగా తమ పనులను పూర్తి చేసుకుంటూ వెళ్తోంది. ఈ ప్రాజెక్ట్ కోసం ఇండస్ట్రీలోనే అగ్రశ్రేణి సాంకేతిక నిపుణులను రంగంలోకి దించుతున్నారు. అందులో భాగంగానే, ఈ చిత్రానికి సినిమాటోగ్రాఫర్గా ప్రముఖ విజువల్ మేజిషియన్ సిద్ధార్థ నూనిని ఎంపిక చేశారు. గతంలో ధనుష్ హీరోగా వచ్చిన సంచలన చిత్రం 'కెప్టెన్ మిల్లర్'తో పాటు 'ఆంధ్రా కింగ్ తాలూకా' లాంటి చిత్రాలకు అద్భుతమైన విజువల్స్ అందించి మంచి మార్కులు కొట్టేసిన సిద్ధార్థ నూని, ఇప్పుడు బాలయ్య సినిమా కోసం సరికొత్త మాస్ విజువల్స్ ప్లాన్ చేస్తున్నారు. ఆయన రాకతో ఈ సినిమా టెక్నికల్ వాల్యూస్ సరికొత్త రేంజ్కు చేరడం ఖాయంగా కనిపిస్తోంది.
మరోవైపు కాస్టింగ్ పరంగా కూడా సరికొత్త అప్డేట్స్ బయటకు వస్తున్నాయి. ఈ సినిమాలో ఒక అత్యంత కీలకమైన పాత్ర కోసం తమిళ నటుడు రిషికాంత్ను ఫైనలైజ్ చేశారు. కథను మలుపు తిప్పే ఒక పవర్ఫుల్ రోల్ లో ఆయన కనిపించబోతున్నట్లు సమాచారం. ఈ చిత్రంలో బాలయ్య రెండు వైవిధ్యమైన షేడ్స్ ఉన్న పాత్రల్లో కనిపించనున్నారని టాక్. మైత్రీ మూవీ మేకర్స్ భారీ బడ్జెట్తో నిర్మించనున్న ఈ సినిమా క్యాన్సిల్ అయిందంటూ వస్తున్న పుకార్లన్నీ అబద్ధం అని సన్నిహిత వర్గాలు చెబుతున్నాయి.
బాలకృష్ణ ప్రస్తుతం గోపీచంద్ మలినేని దర్శకత్వంలో 'NBK 111' సినిమా షూటింగ్లో బిజీగా ఉన్నారు. ఆ తర్వాత కొరటాల శివ దర్శకత్వంలో 'NBK 112' లైన్ లో ఉంది. ఈ రెండు ప్రాజెక్ట్ లు ముగిసిన వెంటనే వివేక్ ఆత్రేయ సినిమా సెట్స్పైకి వెళ్లనుందని ఇండస్ట్రీ వర్గాలు స్పష్టం చేస్తున్నాయి.
