హైదరాబాద్ రోడ్డుపై మరమరాలు అమ్ముకుంటున్న బీఆర్ఎస్ మాజీ సర్పంచ్..!

రాజకీయ అధికార మార్పిడి అనేక మంది సామాన్య కార్యకర్తలు, స్థానిక ప్రజాప్రతినిధుల జీవితాలను ఏ విధంగా ఛిన్నాభిన్నం చేస్తుందో చెప్పడానికి మంచిర్యాల జిల్లా చెన్నూరు మండలం చింతలపల్లి గ్రామానికి చెందిన మాజీ సర్పంచ్ సుమలత దంపతుల కన్నీటి గాథే ప్రత్యక్ష నిదర్శనం. నిన్నటివరకు ఊరికి పెద్దగా, గ్రామాభివృద్ధికి పాటుపడిన సర్పంచ్ కుటుంబం.. ఈరోజు మహానగరం హైదరాబాద్‌ వీధుల్లో బతుకుదెరువు కోసం రోడ్డు పక్కన మరమరాలు, పల్లీలు అమ్ముకుంటూ జీవనం సాగిస్తోంది. 

పదవి ఉన్నప్పుడు పదిమందికి నీడ.. నేడు హైదరాబాద్ రోడ్డుపై పోరాటంమంచిర్యాల జిల్లా చెన్నూరు నియోజకవర్గ పరిధిలోని చింతలపల్లి సర్పంచ్‌గా సుమలత భర్త రాజయ్య సేవలు అందించారు. స్థానికంగా పార్టీ కోసం, ఊరి ప్రజల కోసం నిరంతరం శ్రమించిన ఆ కుటుంబం.. ప్రభుత్వం మారిన తర్వాత రాజకీయ కక్షసాధింపు చర్యలకు గురైంది. అధికారంలోకి వచ్చిన కొత్త నాయకులు తమ పార్టీలోకి మారాలని ఒత్తిడి చేసినా, BRS పార్టీపై ఉన్న అభిమానంతో తమ సిద్ధాంతాలకు కట్టుబడి ఉన్నారు. 

పార్టీ మారలేదనే ఏకైక కక్షతో తమ కుటుంబంపై అక్రమ కేసులు బనాయించారని, ఎస్సీ, ఎస్టీ అట్రాసిటీ కేసులతో తీవ్రంగా వేధించారని సుమలత ఆవేదన వ్యక్తం చేశారు. కనీసం చదువుకుంటున్న చిన్న కుమారుడినైనా కేసు నుంచి మినహాయించాలని స్థానిక ప్రజాప్రతినిధుల కాళ్లపై పడి వేడుకున్నా కనికరం చూపలేదని, చివరికి ఇల్లు, వాకిలి విడిచి పెట్టాల్సిన పరిస్థితి దాపురించిందని కన్నీరుముక్కలయ్యారు. ప్రతీ నెలా కోర్టు ఖర్చులు.. కూలి పనులకు పరిమితమైన జీవితంరాజకీయ వేధింపులతో పాటు కోర్టు వాయిదాల ఖర్చులు భరించలేక ఈ కుటుంబం గ్రామాన్ని వదిలి హైదరాబాద్‌కు చేరుకుంది. 

ప్రస్తుతం భర్త రాజయ్య ఓ ప్రైవేట్ సంస్థలో సెక్యూరిటీ గార్డుగా పనిచేస్తుండగా, సుమలత బండమైసమ్మ ప్రాంతంలో రోడ్డు పక్కన పల్లీలు, మరమరాలు అమ్ముకుంటూ రోజుకు ₹300 నుండి ₹500 సంపాదిస్తున్నారు.ఆదిలాబాద్ కోర్టు వాయిదాల కోసం ప్రతీ నెలా ₹10,000 వరకు లాయర్లకు, ప్రయాణాలకు ఖర్చు చేయాల్సి వస్తోందని, సంపాదించేది అంతా కోర్టు ఖర్చులకే సరిపోతోందని వాపోయారు. ఊరిలో గౌరవంగా బతికిన తాము, ఈరోజు పొట్టకూటి కోసం పడుతున్న అగ్నిపరీక్ష స్థానిక నాయకుల పక్షపాత వైఖరికే నిదర్శనమని ఆవేదన వ్యక్తం చేశారు.

కార్యకర్తల త్యాగాలు.. క్షేత్రస్థాయి నాయకత్వ లోపంపార్టీ కోసం, భావజాలం కోసం సర్వస్వం కోల్పోయినప్పటికీ, కష్టకాలంలో తమను ఆదుకునేందుకు పెద్ద నాయకులు లేదా క్షేత్రస్థాయి స్థానిక నాయకులు ముందుకు రాలేదని సుమలత ఆవేదన వ్యక్తం చేశారు. అయినప్పటికీ BRS పార్టీ పట్ల, కేసీఆర్, కేటీఆర్, బాల్క సుమన్ నాయకత్వం పట్ల తమకున్న అభిమానం చెక్కుచెదరలేదని స్పష్టం చేశారు.రాజకీయాల్లో నాయకులు మారినా, ప్రభుత్వాలు మారినా.. అధికార పోరాటంలో నలిగిపోతున్నది మాత్రం నిబద్ధత కలిగిన సామాన్య కార్యకర్తలేనని ఈ సంఘటన నిరూపిస్తోంది.

(Telangana Politics, Ex Sarpanch Street Vendor, Chennur Politics, Mancherial News, BRS Political Victims, Sumalatha Sarpanch Story, Hyderabad Street Vendor Ex Sarpanch, Balka Suman Supporter, Telangana Political Revenge Cases)