హరియాణాలో దారుణం: తరగతి గదిలో ఆరేళ్ల చిన్నారిపై మూడో తరగతి బాలుడి దాడి.!
Publish Date:Oct 31, 2026
Advertisement
పాఠశాలలు విద్యార్థులకు విద్యాబుద్ధులు నేర్పించే దేవాలయాలు. కానీ, అక్కడే కొద్దిరోజులుగా జరుగుతున్న కొన్ని దారుణమైన పరిణామాలు సమాజాన్ని కలవరపెడుతున్నాయి. చిన్నారుల మధ్య చోటుచేసుకునే చిన్నపాటి మనస్పర్థలు కూడా కొన్నిసార్లు ఎంతటి దారుణానికి దారితీస్తాయో చెప్పడానికి హరియాణాలో వెలుగుచూసిన ఘటనే ప్రత్యక్ష నిదర్శనం. హరియాణాలోని పంచకుల ప్రాంతంలో ఉన్న ఓ మోడల్ పాఠశాలలో దారుణ ఘటన కలకలం రేపింది. కిండర్గార్డెన్ అభ్యసిస్తున్న ఆరేళ్ల పసిపాపపై, అదే పాఠశాలలో మూడో తరగతి చదువుతున్న ఎనిమిదేళ్ల బాలుడు అత్యంత పాశవికంగా దాడికి పాల్పడ్డాడు. ఈ ఘటనకు సంబంధించిన దృశ్యాలు ప్రస్తుతం సోషల్ మీడియాలో వైరల్ కావడంతో దేశవ్యాప్తంగా తీవ్ర విమర్శలు వ్యక్తమవుతున్నాయి. తరగతి గదిలో ఎవరూ లేని సమయంలో ఆ బాలుడు తెగించి ఈ అరాచకానికి ఒడిగట్టాడు. తొలుత చిన్నారిని బలవంతంగా బల్లకేసి కొట్టి, కిందకి పడేసి కాళ్లతో తన్నాడు. అంతటితో ఆగకుండా అక్కడే ఉన్న రాళ్లు, పూలకుండీని ఉపయోగించి ఆమెపై విచక్షణారహితంగా దాడి చేశాడు. చిన్నారి స్పృహ కోల్పోయి రక్తపు మడుగులో పడిపోయినా ఆ చిన్నారిపై బాలుడి క్రూరత్వం తగ్గకపోవడం గమనార్హం. పాఠశాల వేళలు ముగిసిన తర్వాత కూడా కూతురు ఇంటికి రాకపోవడంతో ఆందోళన చెందిన కుటుంబ సభ్యులు పాఠశాలకు చేరుకున్నారు. అయితే, "మీ పాప అక్కడ పడివుంది" అంటూ దాడి చేసిన ఆ బాలుడే స్వయంగా బాధితురాలి తండ్రిని ఘటనా స్థలానికి తీసుకెళ్లడం విశేషం. అ అక్కడ రక్తపు మడుగులో పడివున్న చిన్నారిని చూసి కుటుంబ సభ్యులు కంగుతిన్నారు. ఈ ఉదంతంపై బాధిత కుటుంబ సభ్యులు తీవ్ర ఆగ్రహం వ్యక్తం చేస్తున్నారు. పాఠశాలలో సీసీటీవీ నిఘా వ్యవస్థ సరిగ్గా పనిచేయకపోవడం వల్లే ఈ ఘోరం జరిగిందని వారు ఆరోపిస్తున్నారు. ఉపాధ్యాయులు, సిబ్బంది పర్యవేక్షణ లోపం స్పష్టంగా కనిపిస్తోందని, పిల్లలను బడికి పంపాలంటేనే తల్లిదండ్రులు భయపడేలా ఈ ఉదంతం ఉందని వాపోయారు. ఈ దారుణ ఘటనపై హరియాణా ప్రభుత్వం అత్యంత సీరియస్గా స్పందించింది. విద్యాసంస్థల్లో భద్రతా లోపాలపై సమగ్ర విచారణ నిమిత్తం ఉన్నత స్థాయి కమిటీని ఏర్పాటు చేసినట్లు ఆ రాష్ట్ర విద్యాశాఖ మంత్రి మహిపాల్ ధండా వెల్లడించారు. విధుల్లో నిర్లక్ష్యం వహించిన ఎవరినైనా ఉపేక్షించేది లేదని, పిల్లల రక్షణే ధ్యేయంగా కఠిన చర్యలు తీసుకుంటామని ఆయన స్పష్టం చేశారు. ప్రస్తుతం తీవ్ర గాయాలపాలైన ఆరేళ్ల చిన్నారి చండీగఢ్లోని ప్రతిష్టాత్మక పీజీఐఎంఈఆర్ ఆసుపత్రిలో అత్యవసర విభాగంలో చికిత్స పొందుతోంది. ఆమె ఆరోగ్య పరిస్థితి అత్యంత విషమంగా ఉన్నట్లు వైద్యులు వెల్లడించారు. మరోవైపు పోలీసులు కేసు నమోదు చేసి దర్యాప్తు వేగవంతం చేశారు. ఇలాంటి ఘటనలు పునరావృతం కాకుండా విద్యా సంస్థల్లో కఠినమైన మార్గదర్శకాలు అమలు చేయాలని ప్రజలు డిమాండ్ చేస్తున్నారు. [ Haryana school attack, Panchkula news, student violence in school, child safety in schools, kindergarten girl attacked, Telugu One news, Telugu News ]
http://www.teluguone.com/news/content/haryana-school-attack-23-235930.html





