వారణాసిలో సీఎం చంద్రబాబు అద్భుత ప్రసంగం.. !

ప్రధానమంత్రి నరేంద్ర మోదీ జన్మదిన వేడుకల సందర్భంగా వారణాసిలో నిర్వహించిన కాశీ-వాద్‌నగర్ సేవా సంకల్ప అభియాన్ కార్యక్రమంలో సీఎం చంద్రబాబు నాయుడు తన వాగ్ధాటితో ప్రత్యేక ఆకర్షణగా నిలిచారు. రుద్రాక్ష్ కన్వెన్షన్ సెంటర్‌లో జరిగిన ఈ వేడుకల్లో చంద్రబాబు ప్రసంగిస్తూ దేశ ప్రధాని దార్శనికతను, పాలనా శైలిని ఎంతో ఆసక్తికరంగా వివరించారు. ఈ సందర్భంగా ఆయన ప్రధాని ప్రస్థానాన్ని వివరిస్తూ 'VKS' అనే సరికొత్త మంత్రాన్ని సభికుల ముందుకు తీసుకువచ్చారు.

'V' అంటే మోదీ జన్మస్థలమైన వాద్‌నగర్ అని, 'K' అంటే ఆయన కర్మభూమి అయిన కాశీ అని, 'S' అంటే ఆయన జన్మించిన సెప్టెంబర్ 17 అని చంద్రబాబు వివరించారు. ఈ మంత్రం ప్రజాస్వామ్యంలో ఎంతో శక్తివంతమైనదని, సానుకూల దృక్పథంతో అంకితభావంతో పనిచేస్తే ఎవరైనా అత్యున్నత శిఖరాలకు చేరవచ్చని మోదీ నిరూపించారని అన్నారు. సామాన్య కుటుంబం నుంచి వచ్చి దేశ ప్రధాని స్థాయికి ఎదగడం యువతకు గొప్ప స్ఫూర్తి అని ఆయన అభివర్ణించారు. గత పదేళ్లలో మోదీ నాయకత్వంలో పేదరిక నిర్మూలన, డిజిటల్ విప్లవం, రక్షణ రంగంలో భారత్ సాధించిన ప్రగతిని ఆయన అంకెలు  ఉదాహరణలతో సహా సభికులకు తెలియజేశారు.

ఈ కార్యక్రమంలో భాగంగా చంద్రబాబు అయోధ్య రామమందిర నిర్మాణ ప్రస్తావన తెచ్చి, సభికులతో కలిసి జై శ్రీరామ్ నినాదాలు చేయించారు. అలాగే పవిత్ర కాశీ నగరంలో తిరుమల శ్రీ వేంకటేశ్వర స్వామి ఆలయ నిర్మాణం కోసం 5 నుంచి 10 ఎకరాల భూమిని కేటాయించాలని ఉత్తరప్రదేశ్ ప్రభుత్వాన్ని కోరారు. కేంద్రంలో ఎన్డీఏ కూటమి ప్రభుత్వంతో రాష్ట్ర అభివృద్ధి వేగవంతమైందని, అమరావతి, పోలవరం ప్రాజెక్టులకు కేంద్రం సంపూర్ణ మద్దతు ఇస్తోందని ఆయన స్పష్టం చేశారు. సహకార సమాఖ్య స్ఫూర్తి కేవలం నినాదం కాదని, అది నిజమైన అనుభవమని పేర్కొన్నారు.

దేశ భవిష్యత్తు కోసం సరైన సమయంలో సరైన నాయకుడు ఉండటం అదృష్టమని, ఆ బాధ్యతను మోదీ విజయవంతంగా నిర్వర్తిస్తున్నారని కొనియాడారు. ఈ ప్రసంగం ముగింపులో సభికులు లేచి నిలబడి ఆయనకు అభినందనలు తెలిపారు. ఇలాంటి ఉన్నత స్థాయి రాజకీయ వేదికలు దేశ సమైక్యతను, రాష్ట్రాల మధ్య పరస్పర సహకారాన్ని మరింత బలపరుస్తాయని రాజకీయ విశ్లేషకులు భావిస్తున్నారు. భవిష్యత్తులో ఆధ్యాత్మిక పర్యాటక రంగం మరింత వృద్ధి చెందడానికి ఈ పరిణామాలు దోహదపడతాయని ప్రజలు ఆశిస్తున్నారు.

 వారణాసి పర్యటనలో భాగంగా చంద్రబాబు శ్రీ కాశీ విశ్వనాథ స్వామిని దర్శించుకున్నారు. రాజ్‌నాథ్ సింగ్, చిరాగ్ పాశ్వాన్, యోగి ఆదిత్యనాథ్‌తో కలిసి ఆలయంలో ప్రత్యేక పూజలు నిర్వహించారు. శ్రీ కాశీ విశ్వనాథునికి పవిత్ర జలాలతో అభిషేకం చేశారు. అనంతరం ఆలయ పండితులు చంద్రబాబుకు ఆశీర్వచనం అందించగా, అర్చకులు ప్రసాదాన్ని అందించారు. కేంద్ర మంత్రులు, యూపీ సీఎం యోగి ఆదిత్యనాథ్‌తో కలిసి చంద్రబాబు భక్తులకు ప్రసాదాన్ని పంచారు. వారణాసి-వాద్నగర్ సేవాయాత్రలో భాగంగా కాశీ విశ్వనాథుడికి పూజలు నిర్వహించిన చంద్రబాబు.. అనంతరం సేవా సంకల్ప్ అభియాన్ కార్యక్రమంలో పాల్గొన్నారు. ఈ కార్యక్రమంలో టీడీపీ ఎంపీలు లావు శ్రీకృష్ణదేవరాయలు, సానా సతీష్ కూడా పాల్గొన్నారు.

[ CM Chandrababu in Varanasi, Sri Kashi Vishwanath Swamy, UP CM Yogi Adityanath, Rajnath Singh, UP BJP President Pankaj Chaudhary, Chirag Paswan, Telugu One, Telugu News ]