World News | Latest International News & Global Updates

ఎల్ నినో ఎఫెక్ట్: ఐరోపాలో మృత్యు ఘోష.!

ఆహ్లాదకర వాతావరణం అనగానే ఎవరికైనా గుర్తుకు వచ్చేది ఐరోపా ఖండం. చల్లటి వాతావరణం, మనసును మైమరపింప చేసే పర్యాటక ప్రాంతాలకు నెలవైన ఐరోపాపై ఎల్ నినో ప్రభావం అక్కడి పరిస్థితిని ఒక్కసారిగా మార్చేసింది. ఈ సారి వేసవి ఐరోపాలో ఎడారి వాతావరణాన్ని తీసుకువచ్చింది. ఎల్‌నినో ప్రభావంతో ఐరోపాలో ఏడు వేసవి నిప్పులు చెరిగింది. ఆసాధారణ ఉష్ణోగ్రతలతో జనం మలమల పాడిపోతున్నట్లుగా ఫీలౌతున్నపరిస్థితి. జూన్, జులై, ఆగస్టు నెలల్లో సంభవించిన భీకర వడగాల్పుల ధాటికి ఐరోపాలోని వివిధ దేశాల్లో ఏకంగా 50 వేల 400 మంది వరకూ మృత్యువాత పడ్డారు. ఇంపీరియల్ కాలేజ్ లండన్ పరిశోధకుల అధ్యయనం మేరకు గతంలో రికార్డు స్థాయి ఉష్ణోగ్రతలు నమోదైన 2022 వేసవితో పోలిస్తే, ఈ ఏడాది మరణాల సంఖ్య 71 శాతం పెరిగింది. సాధారణంగా ఐరోపా దేశాల్లో ఉష్ణోగ్రతలు 12 నుండి 35 డిగ్రీల సెల్సియస్ మధ్య ఉంటాయి. అయితే ఈ ఏడాది ఫ్రాన్స్‌లో గరిష్ఠంగా 43.8 డిగ్రీల సెల్సియస్, జర్మనీలో 41.7 డిగ్రీలు, బ్రిటన్‌లో 37.3 డిగ్రీల సెల్సియస్‌ వరకు ఉష్ణోగ్రతలు నమోదయ్యాయి. బొగ్గు, చమురు, గ్యాస్ వంటి శిలాజ ఇంధనాలను విపరీతంగా మండించడం వల్ల వాతావరణం వేడెక్కి ప్రాణ నష్టం సంభవించిందని ఆ అధ్యయనం పేర్కొంది. ఈ విపరీత వాతావరణం కారణంగా ఇటలీ, ఫ్రాన్స్, స్పెయిన్, జర్మనీ దేశాల ప్రజలు అత్యధికంగా బలయ్యారు. జూన్ 17 నుండి జులై 1 మధ్య కాలంలో వడగాలులు తీవ్ర స్థాయికి చేరుకోవడంతో, ఒక్క ఆ పక్షం రోజుల వ్యవధిలోనే మూడో వంతు మరణాలు నమోదయ్యాయి. మృతుల్లో ఎక్కువ మంది వృద్ధులే. 85 ఏళ్లకు పైబడిన వారే సగం మందికి పైగా ప్రాణాలు కోల్పోయారు. [Elnio Effect Europe Heat Wave, El Nino Europe Deaths, Imperial College London Study, Extreme Summer Temperatures, TeluguOne]

Published on: Sat Oct 24, 2026 11:13AM

3000 పుస్తకాల పఠనం, 141 ఐక్యూ: ఐదేళ్లకే మెన్సా లో చోటు..భారత సంతతి బాల మేధావి.!

సాధారణంగా ఐదేళ్ల వయసులో పిల్లలు.. మెరుపు మెరిస్తే..వాన కురిస్తే..ఆకసమున హరివిల్లు విరిస్తే అవి మాకే అని ఆనందించే మానసిక స్థితిలో ఉంటారు. పాపం పుణ్యం ప్రపంచ మార్గం.. కష్టం సౌఖ్యం ఏమీ తెలియని పువ్వుల్లా ఉంటారు. మహా అయితే.. అక్షరాలు దిద్దుతూ, అంకెలను వల్లె వేస్తూ, ఆటపాటలతో సందడిసందడిగా తిరుగుతుంటారు. అయితే ఈ శైశవ దశలో కెనడాలో నివసిస్తున్న భారత సంతతి బాలుడు అర్జున్ ప్రజాపతి అసాధారణమైన మేధస్సుతో ప్రపంచాన్ని విస్మయానికి గురిచేస్తున్నాడు. కేవలం ఐదేళ్ల వయసులోనే అర్జున్ ప్రజాపతి మూడు వేలకు పైగా పుస్తకాలను చదివి ఆకళింపు చేసుకున్నాడు. ఈ బాలమేధావి ప్రపంచంలోనే అత్యంత ప్రతిష్ఠాత్మకమైన హై-ఐక్యూ సొసైటీలుగా పేరుగాంచిన మెన్సా, ఇంటర్‌టెల్ సంస్థల్లో సభ్యత్వం సంపాదించాడు. ఈ చిన్నారి ప్రతిభ ప్రపంచవ్యాప్తంగా ప్రముఖులు, మేధావులనే విస్మయపరుస్తోంది. అర్జున్ తల్లిదండ్రులు ఇండియాలోని గుజరాత్ రాష్ట్రానికి చెందిన వడోదర ప్రాంతానికి చెందిన వారు. తండ్రి డాక్టర్ విశాల్ వి ప్రజాపతి వైద్యుడిగా, క్లినికల్ రీసెర్చర్‌గా సేవలనందిస్తుండగా, తల్లి మహిత న్యాయవాదిగా పనిచేస్తున్నారు. కెనడాలో స్థిరపడిన ఈ దంపతుల గారాల పట్టి అర్జున్, అనితర సాధ్యమైన రీతిలో కేవలం 18 నెలల ప్రాయంలోనే పుస్తకాలు చదవడం ప్రారంభించాడు. అప్పటి నుంచి మొదలైన అతడి పఠనాసక్తి ఇప్పుడు అతడిని అద్భుతమైన శిఖరాలకు చేర్చింది. ఇప్పటివరకు అర్జున్ గణితం, ఖగోళశాస్త్రం, మానవ శరీరధర్మశాస్త్రం, జన్యుశాస్త్రం, మైక్రోబయాలజీ, ప్రపంచ చరిత్ర వంటి క్లిష్టమైన, పెద్దలు సైతం అర్థం చేసుకోవడానికి కష్టపడే అంశాలకు సంబంధించి 3వేలకు పైగా పుస్తకాలను చదివి అర్ధం చేసుకున్నాడు. ఇటీవల స్టాన్‌ఫర్డ్ బినెట్ ఇంటెలిజెన్స్ స్కేల్స్ పరీక్షను నిర్వహించగా, అర్జున్ ఏకంగా 141 ఐక్యూ స్కోర్‌ను నమోదు చేసి తన ప్రతిభను నిరూపించుకున్నాడు. ఈ అద్భుత మేధో సంపత్తి కారణంగా ప్రపంచ జనాభాలో కేవలం టాప్ 1 శాతం మేధావులకు మాత్రమే లభించే మెన్సా ఇంటర్‌టెల్' సొసైటీల్లో అతి పిన్న వయస్కుడిగా ప్రవేశం పొందాడు. చిన్న వయసులోనే శాస్త్ర, ఖగోళ, వైద్య రంగాలపై అపారమైన పట్టు సాధించిన ఈ బాల మేధావి ప్రతిభను కెనడా ప్రధానితో పాటు ఒంటారియో ప్రీమియర్ ప్రత్యేకంగా అభినందించారు. [Five Year Old Genius Arjun Prajapati, mensa society, 141IQ, indian Origin Boy, ChildPprodigy, Telugu One]

Published on: Sat Oct 24, 2026 10:17AM

సౌదీ అరేబియాపై హౌతీల కొత్త వ్యూహం: జెఫ్రీ ఎప్‌స్టీన్‌ కేసు పత్రాలతో వ్యతిరేక ప్రచార యుద్ధం.!

యెమెన్ ను తమ గుప్పిట్లో ఉంచుకున్న హౌతీ తిరుగుబాటుదారులు ఇప్పుడు సౌదీ అరేబియాను లక్ష్యంగా చేసుకుని సరికొత్త వ్యూహానికి తెరలేపారు. సాధారణంగా క్షిపణులు, డ్రోన్లు వంటి ఆయుధాలతో విరుచుకుపడే హౌతీ తిరుగుబాటుదారులు, ఈసారి శక్తిమంతమైన ప్రచార అస్త్రాన్ని ప్రయోగించారు. అంతర్జాతీయంగా సంచలనం సృష్టించిన అమెరికన్ సెక్స్ నేరగాడు జెఫ్రీ ఎప్‌స్టీన్‌కు సంబంధించిన కేసు పత్రాలను ఆధారం చేసుకుని సౌదీ అరేబియా ప్రతిష్టను దెబ్బతీసేందుకు ప్రయత్నాలు మొదలెట్టారు. గత కొంతకాలంగా అమెరికా న్యాయ శాఖ బహిర్గతం చేసిన ఎప్‌స్టీన్ దర్యాప్తు పత్రాలు ప్రపంచవ్యాప్తంగా పెను ప్రకంపనలు సృష్టించిన విషయం విదితమే. ఈ నివేదికలు, పత్రాల్లో పేర్కొన్న కొన్ని కీలక అంశాలను హౌతీలు తమ రాజకీయ లబ్ధి కోసం వాడుకుంటున్నారు. ముఖ్యంగా సౌదీ రాజకుటుంబానికి సన్నిహితంగా ఉండే వ్యక్తులు కొందరు దివంగత ఫైనాన్షియర్ జెఫ్రీ ఎప్‌స్టీన్‌కు ఇస్లాం మత పవిత్ర స్థలమైన మక్కాలోని కాబా అలంకరణ వస్త్రాలను బహుమతిగా సమర్పించారనే ఆరోపణలను హౌతీలు తెరపైకి తెచ్చారు. ఈ సున్నితమైన అంశాన్ని సోషల్ మీడియా వేదికగా ప్రచారం చేస్తూ సౌదీ పాలకులపై విమర్శలు గుప్పిస్తున్నారు. తమను తాము నిజమైన ఇస్లాం మత రక్షకులుగా, సాంప్రదాయ పరిరక్షకులుగా ప్రొజెక్ట్ చేసుకుంటున్న హౌతీలు.. సౌదీ అరేబియా నాయకత్వం ఇస్లాం పవిత్రతకు వ్యతిరేకంగా వ్యవహరిస్తోందనే భావనను ముస్లింలలో వ్యాప్తి చేసే ప్రయత్నాలను ముమ్మరం చేశారు. సాధారణ సామాజిక మాధ్యమాలే కాకుండా, ఆన్‌లైన్ ఇన్‌ఫ్లుయెన్సర్లు, ప్రత్యేక డిజిటల్ నెట్‌వర్క్‌లను ఉపయోగించి ఈ ప్రచారాన్ని హోరెత్తిస్తున్నారు. సౌదీ అరేబియా ప్రతిష్టను అంతర్జాతీయ వేదికలపై దిగజార్చడమే లక్ష్యంగా ఈ వ్యూహాత్మక ప్రచార యుద్ధాన్ని హౌతీలు చేపట్టారని పరిశీలకులు విశ్లేషిస్తున్నారు. యెమెన్ అధికార ప్రభుత్వానికి అండగా నిలుస్తున్న సౌదీ అరేబియాపై ఇప్పటికే పలుమార్లు సైనిక దాడులకు పాల్పడిన హౌతీలు, ఇప్పుడు దాడులతో పాటు సౌదీ ప్రతిష్ఠ దిగజార్చేందుకు ప్రచార యుద్ధాన్ని ముమ్మరం చేశారు. పశ్చిమాసియా రాజకీయాల్లో ఈ పరిణామం కలకలం రేపుతోంది. అమెరికా పత్రాలను తమకు అనుకూలంగా మలుచుకుంటూ ప్రత్యర్థి దేశంపై బురదజల్లే ప్రయత్నం చేయడం ద్వారా ప్రాంతీయ ఆధిపత్య పోరును హౌతీలు తీవ్రతరం చేశారని పరిశీలకులు అంటున్నారు. మతపరమైన మనోభావాలను ముడిపెట్టి సాగిస్తున్న ఈ ప్రచారాన్ని తిప్పికొట్టేందుకు సౌదీ అరేబియా వ్యూహరచన చేస్తున్నట్లు తెలుస్తోంది. ఏది ఏమైనా డిజిటల్ యుగంలో ఆయుధాల కంటే సమాచార పంపిణీ, తప్పుడు ప్రచారాలు ఎక్కువ నష్టాన్ని కలిగిస్తాయనడానికి హౌతీల ప్రచార యుద్ధం తాజా ఉదాహరణగా చెబుతున్నారు. [Houthis New Wepon To Demoralise Saudi Arabia, Jeffrey Epstein case, Yemen Rebels, Middle East Politics, Telugu One]

Published on: Sat Oct 24, 2026 9:20AM

బెంబేలెత్తిస్తున్న మరో మహమ్మారి: షమొండా వైరస్.. జంతువుల నుంచి మనుషులకు.!

కరోనా మహమ్మారి మృత్యు పంజా విషాద జ్ణాపకాల నుంచి మానవాళి ఇప్పుడిప్పుడే బయటపడుతోంది. అంతలోనే మరో ప్రాణాంతక మహమ్మారి విజృంభణకు రంగం సిద్ధమైందన్న వార్తలు బెంబేలెత్తిస్తున్నాయి. కరోనాయే కాకుండా పలు రకాల వైరస్ లు మానవ మనుగడకు పెను ముప్పుగా పరిణమించిన తరుణంలో మరో కొత్త వైరస్ కోరలు చాస్తోందన్న వార్త మానవాళిని భయపెడుతోంది. ఈ కొత్త మహమ్మారి పేరు షమొండా వైరస్. ఇంత కాలం ఈ వైరస్ జంతువులలోనే కనిపించింది. కానీ తాజాగా ఈ వైరస్ జంతువుల నుంచి మనుషులకూ వ్యాపిస్తోందన్న సంకేతాలు వెలువడ్డాయి. ఫ్రాన్స్‌లో ఈ షమొండా వైరస్ కారణంగా ఓ వ్యక్తి మరణించాడు. తూర్పు ఫ్రాన్స్‌లో ఈ ఏడాది ప్రారంభంలో ఈ వైరస్ పశువుల్లో వ్యాప్తించింది. అయితే ఈ మహమ్మారి జంతువుల నుంచి మనుషులకూ వ్యాప్తిస్తుందన్న వాస్తవం తాజాగా వెలుగులోకి వచ్చింది. లియోన్ నగరంలోని ఓ వ్యక్తి షమొండా వైరస్ సోకి మృత్యు ఒడికి చేరాడు. షమొండా వైరస్‌ను మొట్టమొదటిసారిగా 1965లో నైజీరియాలో శువులలో గుర్తించారు. కాలక్రమేణా ఇది యూరప్ దేశాలైన ఫ్రాన్స్, జర్మనీ, స్పెయిన్, ఐర్లాండ్ వంటి ప్రాంతాలకు విస్తరించింది. సాధారణంగా ఈ వైరస్ సన్నని ఈగలను పోలిన మిడ్స్ అనే కీటకాలు లేదా ఈగల కాటు ద్వారా జంతువులకు వ్యాపిస్తుంది. పశువులకు ఈ వైరస్ సోకితే తీవ్రమైన జ్వరం, విరేచనాలు రావడం, పాల ఉత్పత్తి తగ్గిపోవడం, గర్భస్రావం కావడం, నాడీ వ్యవస్థ దెబ్బతినడం వంటి లక్షణాలు కలుగుతాయి. ఇప్పటివరకు జంతువులకే పరిమితమైన ఈ వైరస్ మొదటిసారిగా ఫ్రాన్స్‌లో ఒక మనిషి ప్రాణాలను బలిగొనడంతో ఒక్కసారిగా ప్రపంచం ఉలిక్కి పడింది. జంతువుల నుంచి మనుషులకు సోకే ఈ అరుదైన వైరస్ వ్యాప్తిపై ప్రపంచ ఆరోగ్య సంస్థ, ఆరోగ్య నిపుణులు పరిశోధనలు జరుపుతున్నారు. ఈ వ్యాధి రోగనిరోధక శక్తి తక్కువగా ఉన్న వ్యక్తులపై తీవ్ర ప్రభావం చూపుతుందంటున్నారు. ఇప్పటి వరకూ ఈ వైరస్ కు వ్యాక్సిన్ లేదని చెబుతున్నారు. పశువుల పెంపకం జరిగే ప్రాంతాల్లో పనిచేసేవారు తగిన జాగ్రత్తలు తీసుకోవాలని, ఈగలు, దోమల కాటు నుంచి రక్షణ పొందడానికి తగిన నివారణ చర్యలు పాటించాలని సూచిస్తున్నారు. మనుషుల్లో ఈ వైరస్ వ్యాప్తి వేగం ఎంత, ఇది సోకిన తరువాత మనిషిలో వచ్చే అనారోగ లక్షణాలేంటి, వాటి తీవ్రత ఎంత అన్న అంశాలపై పరిశోధనలు సాగుతున్నాయి. ఏది ఏమైనప్పటికీ, పశువుల నుంచి మనుషులకు సోకే ఇన్ఫెక్షన్ల జాబితాలో షమొండా వైరస్ చేరడం ఆందోళన కలిగిస్తోంది. [New Pendamic Threatening Mankind, Shamonda virus, France, Human Death, Animals Human Shamonda Virus, Spread, Telugu One]

Published on: Fri Oct 23, 2026 3:59PM

నోబెల్ ప్రైజ్ రాలేదని అలిగిన ట్రంప్.. కనీసం ఆ అవార్డు అయినా ఇవ్వాలని డిమాండ్.!

అమెరికా ప్రెసిడెంట్ డొనాల్డ్ ట్రంప్‌కు అవార్డుల మీద ఉన్న ఆసక్తి గురించి ప్రత్యేకంగా చెప్పనవసరం లేదు. ప్రపంచవ్యాప్తంగా ఎన్నో యుద్ధాలను ఆపేశానని, ప్రపంచ శాంతి కోసం విశేషంగా కృషి చేశానని తరచూ గొప్పలు చెప్పుకునే ట్రంప్.. తనకు ప్రతిష్టాత్మకమైన నోబెల్ శాంతి బహుమతి దక్కుతుందని చాలా గట్టిగా ఆశలు పెంచుకున్నారు. పరోక్షంగా నోబెల్ కమిటీకి సైతం తనకు ఆ అవార్డు ఇవ్వాలని అనేకసార్లు విజ్ఞప్తి చేశారు. కానీ, అనూహ్యంగా 2026 సంవత్సరానికి సంబంధించిన నోబెల్ శాంతి బహుమతి భారత సంతతికి చెందిన నవీ పిళ్లైకి దక్కడంతో ట్రంప్ ఆశలు పూర్తిగా అడియాశలయ్యాయి. నోబెల్ రాదనే అసంతృప్తితో రగిలిపోతున్న ఆయన, తాజాగా సౌత్ కరోలినాలో జరిగిన ఒక భారీ రాజకీయ ర్యాలీలో మాట్లాడుతూ తన మనసులోని అసలు కోరికను బయటపెట్టారు. తనకు నోబెల్ బహుమతి రాలేదని, కనీసం తన రచనలకు గుర్తింపుగా పులిట్జర్ ప్రైజ్ అయినా వచ్చి ఉండాల్సిందని బహిరంగంగానే వ్యాఖ్యానించారు. జర్నలిజం, సాహిత్యం, నాటకం సంగీత రంగాలలో అద్భుతమైన విజయాలు సాధించిన వారికి అందించే అత్యున్నత మరియు అత్యంత ప్రతిష్టాత్మకమైన వార్షిక పురస్కారాలలో పులిట్జర్ బహుమతి ఒకటి. అయితే, ఈ అవార్డుల విషయంలోనూ ట్రంప్ తన అక్కసును, అసంతృప్తిని వెళ్లగక్కారు. రష్యా దర్యాప్తునకు సంబంధించిన కవరేజీలో రిపోర్టింగ్ జర్నలిస్టులు రాసిన కథనాలు తప్పని, వాస్తవానికి ఆ అవార్డును వారు పొందకూడదని ట్రంప్ వ్యంగ్యంగా విమర్శించారు. రష్యా అంశంపై వారు చేసిన రచనలకు అవార్డులు ఇచ్చినా వారందరూ పొరబడ్డారని ఆయన ఆరోపించారు. నోబెల్ శాంతి బహుమతి తిరస్కరణకు గురైన క్షోభలోనే ఈ వ్యాఖ్యలు చేయడం విశేషం. మరి ట్రంప్ రాసిన పుస్తకాలు, రచనల విషయానికి వస్తే.. ఆయన ఇప్పటివరకు తన రాజకీయ మరియు వ్యాపార జీవితంలో దాదాపు 20కి పైగా పుస్తకాలను ప్రచురించారు. తన ట్రూత్ సోషల్ ప్లాట్‌ఫారమ్‌లో చేసే వివాదాస్పద వ్యాఖ్యలు కాకుండా, బిజినెస్, వ్యూహాలు, రాజకీయాలు, సెల్ఫ్-హెల్ప్, పర్సనల్ ఫైనాన్స్ ఆటోబయోగ్రఫీ వంటి అంశాలపై ఆయన పుస్తకాలు రాశారు. అయితే వీటిలో చాలా వరకు పుస్తకాలను ఆయన స్వయంగా రాయకుండా గోస్ట్‌రైటర్ల సహాయం తీసుకున్నారనే వాదన ఉంది. తన రాజకీయ జీవితం ప్రారంభం కాకముందే, 1987వ సంవత్సరంలో టోనీ స్క్వార్ట్జ్ అనే గోస్ట్‌రైటర్ సహాయంతో ఆయన ది ఆర్ట్ ఆఫ్ ది డీల్ అనే తన మొదటి ప్రముఖ పుస్తకాన్ని ప్రచురించారు. ఇలా ఎన్నో పుస్తకాలను ప్రచురించినప్పటికీ, తనకు ఇప్పటివరకు ఎలాంటి అధికారిక సాహిత్య లేదా జర్నలిజం అవార్డులు దక్కకపోవడంతో, తనకు కనీసం పులిట్జర్ ప్రైజ్ లాంటి ప్రతిష్టాత్మక పురస్కారం రావాలని కోరుకోవడం ప్రస్తుతం రాజకీయ వర్గాల్లో హాట్ టాపిక్‌గా మారింది. [ Donald Trump, Nobel Peace Prize, Pulitzer Prize, Trump books, US politics, Navi Pillay, UNO, Narve, South Carolina Rally, US Presidential Elections, Media Criticism, Telugu One, Telugu News ]

Published on: Thu Oct 22, 2026 4:38PM

దావూద్ ఇబ్రహీం ఎక్కడున్నాడో తెలుసా: ఐరాస వేదికగా ఇండియా ఏం చెప్పిందంటే.?

కరుడు కట్టిన ఉగ్రవాది, ఇండియాస్ మోస్ట్ వాంటెడ్ క్రిమినల్, టెర్రరిస్ట్ దావూద్ ఇబ్రహీంవిషయంలోఐక్యరాజ్య సమితి ప్రత్యేక ప్రతినిధి రూపొందించిన నివేదికలో దొర్లిన తప్పులను ఇండియా తప్పుపట్టింది. ఖండించింది. ఇండియాస్ మోస్ట్ వాంటెడ్ అండర్ వరల్డ్ డాన్, టెర్రరిస్ట్ దావూద్ ఇబ్రహీం భారత్‌లో ఆశ్రయం పొందుతున్నాడంటూ ఐరాస నివేదిక పేర్కొనడాన్ని ఇండియా ఖండించింది. ఇటువంటి తప్పుడుప్రచారం ఐరాస ప్రతిష్టను దిగజారుస్తుందనిహెచ్చరించింది. ఐక్య రాజ్య సమితి ప్రత్యేక ప్రతినిధి బెన్ సాల్ జూలై నెలలో విడుదల చేసిన నివేదికలో, అల్-ఖైదాతో సంబంధాలున్న నేపథ్యంలో భద్రతా మండలి 2003లో డి కంపెనీ అధిపతి దావూద్ ఇబ్రహీంను ఉగ్రజాబితాలో చేర్చినట్లు పేర్కొంటూ, అతను భారత్‌లోనే ఉన్నట్లు పరోక్షంగా పేర్కొన్నారు. ఈ అంశంపై ఐక్యరాజ్యసమితి సమావేశంలో భారత శాశ్వత ప్రతినిధి బృందంలోని ఫస్ట్ సెక్రటరీ రాఘూ పూరి మాట్లాడారు. ఐక్యరాజ్యసమితి తప్పిదాన్నిఎత్తి చూపారు. దావూద్‌ను ఉగ్రవాద జాబితాలో చేర్చడానికి ఎంతో కాలం ముందే అతను దేశం నుంచి పారిపోయాడని ఆధారాలతో సహా వెల్లడించారు. విదేశీ గడ్డపై తలదాచుకుంటూ అల్ ఖైదా, ఒసామా బిన్ లాడెన్‌తో సంబంధాలు కలిగి ఉన్నందువల్లనే అతనిని అంతర్జాతీయ ఉగ్రవాదులజాబితాలో చేర్చడం జరిగిందని రాఘూ పూరి గుర్తుచేశారు. నేటికీ అతను భారతదేశానికి మోస్ట్ వాంటెడ్ క్రిమినల్ అనీ, ఐక్యరాజ్యసమితి నిబంధనల ప్రకారం ఉగ్రవాది ఒసామా బిన్ లాడెన్ తలదాచుకుని అంతమొందిన దేశంలోనే అంటే పాకిస్థాన్ లోనే దావూద్ కూడా నివసిస్తున్నాడని విస్పష్టంగా చెప్పారు. 1993 ముంబై వరుస పేలుళ్ల ఘటన తర్వాత నుంచే దావూద్ ఇబ్రహీం భారత్‌కు మోస్ట్ వాంటెడ్‌గా ఉన్నాడని గుర్తు చేసిన రాఘూ పూరి ఆంక్షల కమిటీ జాబితాలో ఈ వాస్తవాలన్నీ స్పష్టంగా ఉన్నప్పటికీ, బాధ్యతాయుతమైన నివేదికలో వాటిని విస్మరించడం దురదృష్టకరమన్నారు. ప్రత్యేక ప్రతినిధుల కార్యాలయం నుంచి ఇలాంటి పొరపాట్లు జరగడం ఐక్యరాజ్య సమితి ప్రతిష్ఠను మసకబారుస్తుందని హెచ్చరించారు. ఈ నివేదికలోని కొన్ని విభాగాల్లో స్పష్టమైన పక్షపత ధోరణి కనిపిస్తోందన్న రాఘూ పూరి ఈ కార్యాలయంపై వస్తున్న విమర్శలు ఆందోళన కలిగిస్తున్నాయన్నారు. ఉగ్రవాద కార్యకలాపాలకు ఆర్థిక వనరులు సమకూర్చే దేశాలు, అంతర్జాతీయ సమాజం నుంచి తప్పించుకోవడానికి మానవ హక్కుల ముసుగును వాడుకోవడం పరిపాటిగా మారిందని పరోక్షంగా పాకిస్థాన్ ను పేర్కొన్నారు. ఇదే సమావేశంలో పాకిస్థాన్ ప్రతినిధి జమ్మూకశ్మీర్ అంశాన్ని అనవసరంగా ప్రస్తావించగా, భారత బృందం దానిని తీవ్రంగా తిప్పికొట్టింది. సంకుచిత రాజకీయ లబ్ధి కోసమే పాకిస్థాన్ ఇలాంటి నిరుపయోగమైన ప్రచారాలకు పాల్పడుతోందని కొట్టిపారేసింది. జమ్మూకశ్మీర్, లడఖ్ ప్రాంతాలు ఎప్పటికీ భారతదేశంలో అంతర్భాగమని స్పష్టం చేస్తూ, పాక్ ప్రతినిధి వ్యాఖ్యలకు అంతకంటే ప్రాధాన్యత ఇవ్వలేమని తేల్చిచెప్పింది. [India Condemn UN Report On Dawood Ibrahim, India UN Statement, Pakistan Terrorism, Raghu Puri UN, Mumbai Blasts, Most Wanted Criminal, Telugu One]

Published on: Thu Oct 22, 2026 12:15PM

ఆకలితో ఉంటే స్వర్గానికి వెళ్తారట.. 191 మందిని బలిగొన్న మూఢనమ్మకం.!

దేవుణ్ని కలుస్తామంటూ 191 మందిని ఆకలితో పొట్టనబెట్టుకున్న మతబోధకుడు.! కెన్యా దేశంలో సంచలనం సృష్టించిన భయానక ఆకలి చావుల ఉదంతంలో న్యాయస్థానం కీలక తీర్పు వెలువరించింది. స్వయం ప్రకటిత మతబోధకుడు పాల్‌ మెకెంజీతో పాటు మరో 28 మందిని కోర్టు దోషులుగా నిర్ధారించింది. అమాయక ప్రజల మూఢనమ్మకాలను ఆసరాగా చేసుకుని, వారిని పొట్టనబెట్టుకున్న ఈ దారుణ ఘటన అంతర్జాతీయంగా తీవ్ర దిగ్భ్రాంతిని కలిగించింది. మతబోధకుడు పాల్‌ మెకెంజీ తన అనుచరులను విపరీతమైన భావజాలంతో ప్రభావితం చేశాడు. యేసు క్రీస్తును నేరుగా కలుసుకోవాలంటే ప్రాపంచిక సుఖాలను వదిలేయాలని, ఆహారం తీసుకోకుండా కఠినమైన ఉపవాసాలతో ప్రాణాలు విడవాలని నమ్మబలికాడు. ఈ ప్రచారంతో మోసపోయిన వందలాది మంది ఆయన మాటలను గుడ్డిగా నమ్మి ప్రాణాల మీదకు తెచ్చుకున్నారు. కెన్యా తీర ప్రాంతంలోని మాలిండి సమీపంలో ఉన్న దట్టమైన షకహోలా అటవీ ప్రాంతం ఈ ఘోరానికి వేదికైంది. మెకెంజీ ఆధీనంలో ఉన్న సుమారు 800 ఎకరాల విస్తీర్ణంలోని ఈ ప్రాంతంలో అనుచరులను ఉంచి క్రూరమైన ఆంక్షలు విధించారు. మొదట చిన్న పిల్లలు, ఆ తర్వాత టీనేజర్లు, మహిళలు, చివరగా పురుసులు క్రమపద్ధతిలో ఆకలికి బలయ్యేలా ఒక వ్యవస్థను నడిపినట్లు ప్రాసిక్యూషన్ కోర్టులో నిరూపించింది. దేవుణ్ని కలుస్తామంటూ 191 మందిని ఆకలితో పొట్టనబెట్టుకున్న మతబోధకుడు.! ఈ కేసు విచారణ సందర్భంగా వెలుగుచూసిన నిజాలు అధికారులను సైతం నివ్వెరపరిచాయి. మృతుల్లో అత్యధికంగా 190 మంది చిన్నారులు ఉండటం అందరినీ కలచివేసింది. కొందరు ఆకలితో మరణించగా, మరికొందరిని ఊపిరాడకుండా చేసి, తీవ్రంగా కొట్టి హత్య చేసినట్లు పోస్ట్‌మార్టం నివేదికలు స్పష్టం చేశాయి. కన్న తల్లులే తమ పిల్లలను సైతం ఆకలితో అలమటించి చనిపోయేలా చేసిన వైనం మానవత్వాన్ని మంటగలిపింది. మొంబాసా కోర్టు న్యాయమూర్తి డయానా కవెడ్జా మొచాచే ఈ కేసుపై సోమవారం తుది తీర్పును వెల్లడించారు. నిందితుల నేరాలు రుజువు కావడంతో మెకెంజీతో పాటు సహచరులను దోషులుగా తేల్చారు. ఈ ఘోరానికి పాల్పడిన మత సంస్థలు అనుచరులను బయటి ప్రపంచానికి దూరం చేసి, వారిపై మానసిక ఆధిపత్యం చెలాయించాయని న్యాయస్థానం తీవ్రంగా తప్పుబట్టింది. ఈ దారుణ కాండలో కుటుంబ సభ్యులను కోల్పోయిన బాధితులు కొంతమేర ఊరట చెందుతున్నప్పటికీ, వారి గుండెల్లో గూడుకట్టుకున్న శోకం ఇంకా వీడలేదు. తమ అత్మీయులు ఎప్పటికీ తిరిగిరారన్న వేదనను వారు వ్యక్తం చేస్తున్నారు. మరోవైపు, దోషిగా తేలిన మెకెంజీ తరఫు న్యాయవాదులు ఈ తీర్పుపై పైకోర్టులో అప్పీల్‌ చేస్తామని వెల్లడించారు. నవంబర్‌ 6న నిందితులకు శిక్షలను ఖరారు చేసే అవకాశం ఉంది. ఈ భయానక ఉదంతం వెలుగులోకి రావడంతో కెన్యా ప్రభుత్వంతో పాటు ఆ దేశ మానవ హక్కుల సంఘాలు అప్రమత్తమయ్యాయి. దేశవ్యాప్తంగా సాగుతున్న అక్రమ మత సంస్థలు, కల్ట్‌ల కార్యకలాపాలపై కఠినమైన నియంత్రణలు విధించాలని ప్రజలు, మేధావులు డిమాండ్ చేస్తున్నారు. ఇలాంటి దురాచారాలకు పాల్పడే సంస్థలపై నిరంతరం నిఘా ఉంచాల్సిన అవసరం ఎంతైనా ఉందని భవిష్యత్ పరిణామాలు హెచ్చరిస్తున్నాయి. [ Paul Mackenzie conviction, Kenya starvation cult, Shakahola Forest massacre, Kenya cult deaths, Paul Mackenzie conviction, Kenya cult deaths,Good News International Ministries ]

Published on: Tue Oct 20, 2026 2:51PM

కిమ్ జోంగ్ ఉన్ కోమాలో ఉన్నారా.. వైరల్ ప్రచారం వెనుక అసలు నిజమేంటి.?

అంతర్జాతీయ రాజకీయాల్లో ఎప్పుడూ అత్యంత ఉత్కంఠను రేకెత్తించే ఉత్తర కొరియా అధినేత కిమ్ జోంగ్ ఉన్ ఆరోగ్య పరిస్థితిపై ప్రస్తుతం ప్రపంచవ్యాప్తంగా పెను దుమారం రేగుతోంది. నార్త్ కొరియాను తన గుప్పిట్లో పెట్టుకుని, ఉక్కుపాదంతో పాలిస్తున్న 42 ఏళ్ల నియంత కిమ్ జోంగ్ ఉన్ తీవ్ర అనారోగ్యం పాలయ్యారంటూ వస్తున్న వార్తలు అంతర్జాతీయంగా కలకలం సృష్టిస్తున్నాయి. ప్రముఖ బ్రిటన్ మీడియా సంస్థ కథనం ప్రకారం.. కిమ్‌కు తీవ్రమైన బ్రెయిన్ హెమరేజ్ (మెదడులో రక్తస్రావం) సంభవించిందని, దీనివల్ల ఆయన అకస్మాత్తుగా కోమాలోకి జారుకున్నారని తెలుస్తోంది. దేశంలో తగినంత అత్యాధునిక వైద్య వసతులు లేకపోవడం వల్ల లేదా అత్యవసర పరిస్థితిని దృష్టిలో ఉంచుకుని ఆయనను అత్యవసరంగా చైనా రాజధాని బీజింగ్‌కు తరలించినట్లు ఆ కథనంలో పేర్కొన్నారు. చైనాలోని ప్రముఖ 'పీకింగ్ యూనియన్ మెడికల్ కాలేజ్ ఆసుపత్రి' నిపుణుల పర్యవేక్షణలో ఆయనకు చికిత్స అందించినప్పటికీ పరిస్థితి విషమించిందంటూ సోషల్ మీడియా వేదికగా రకరకాల ఊహాగానాలు వేగంగా వ్యాపిస్తున్నాయి. ఈ అనూహ్య పరిణామాల వెనుక చైనా డెమోక్రసీ పార్టీ (సీడీపీ) ఛైర్మన్ వాంజున్ క్సీ చేసిన సంచలన సోషల్ మీడియా పోస్టులు ప్రధాన కారణంగా నిలిచాయి. కిమ్ జోంగ్ ఉన్ అక్టోబర్ 13న వర్కర్స్ పార్టీ ఆఫ్ కొరియా 81వ వ్యవస్థాపక దినోత్సవం సందర్భంగా ఏర్పాటు చేసిన నూతన క్షిపణి ప్రదర్శనశాలను సందర్శించిన తర్వాతే బహిరంగ వేదికలపై కనిపించలేదని విశ్లేషకులు గుర్తు చేస్తున్నారు. ఆ తర్వాత నుంచి ఆయనకు సంబంధించిన ఎలాంటి అధికారిక ఫోటోలు లేదా వీడియోలు బయటకు రాకపోవడం ఈ అనుమానాలకు మరింత బలం చేకూరుస్తోంది. మరోవైపు, ఉత్తర కొరియా ప్రభుత్వ అధికారిక ఆంగ్ల వార్తా పత్రిక 'పాంగ్యాంగ్ టైమ్స్' వెబ్‌సైట్ అకస్మాత్తుగా మూతపడటం, గ్లోబల్ వెబ్‌సైట్ ట్రాకర్లు సైతం దీని సర్వర్లు డౌన్ అయినట్లు ధ్రువీకరించడంతో అంతర్జాతీయంగా తీవ్ర గందరగోళం నెలకొంది. ఏదైనా అత్యంత కీలకమైన, దేశాధినేతకు సంబంధించిన పెద్ద వార్తను ప్రకటించే ముందే ఇలాంటి అధికారిక వెబ్‌సైట్లను నిలిపివేయడం ఆ దేశంలో సాధారణమని రాజకీయ నిపుణులు విశ్లేషిస్తున్నారు. ఇదిలాఉంటే, కిమ్ జోంగ్ ఉన్ ఆరోగ్యం క్షీణించిందన్న వార్తల నేపథ్యంలో సరిహద్దు ప్రాంతాల్లో ఉద్రిక్తతలు తారాస్థాయికి చేరాయి. ఉత్తర కొరియాలో ఎలాంటి అంతర్గత కల్లోలాలు లేదా అస్థిరత తలెత్తితే ఎదుర్కొనేందుకు చైనా పీపుల్స్ లిబరేషన్ ఆర్మీ (పీఎల్‌ఏ) నార్తర్న్ థియేటర్ కమాండ్‌ను లెవెల్-3 హై అలర్ట్‌లో ఉంచినట్లు, సైనికుల సెలవులను సైతం రద్దు చేసినట్లు ప్రచారం జరుగుతోంది. అణు ఆయుధాలు కలిగిన ఒక దేశాధినేత ఆరోగ్యంపై స్పష్టత లేకపోవడం ఆసియా ఖండంతో పాటు ప్రపంచ దేశాలను కలవరపెడుతోంది. గతంలోనూ 2020 సంవత్సరంలో కిమ్ కొన్ని వారాల పాటు కనిపించకపోవడంతో ఇదే విధంగా అనేక మరణ వార్తలు, కోమా రూమర్లు తెరపైకి వచ్చాయి. అయితే, ఇప్పటివరకు ఉత్తర కొరియా ప్రభుత్వం గానీ, అధికారిక ప్యాంగాంగ్ వర్గాలు గానీ ఈ తాజా వార్తలను ధ్రువీకరించడాని కానీ, ఖండించడానికి కానీ ముందుకు రాకపోవడం గమనార్హం. త్వరలోనే అక్కడి ప్రభుత్వం నుంచి స్పష్టత రాకపోతే ఈ అనిశ్చితి మరింత ముదిరే ప్రమాదం ఉందని అంతర్జాతీయ రాజకీయ పరిశీలకులు ఆందోళన వ్యక్తం చేస్తున్నారు. మరోవైపు ఉత్తర కొరియా అధ్యక్షుడు కిమ్ జోంగ్ ఉన్ మరణించారంటూ ప్రచారం జరుగుతున్న వేళ.. ఆయనకు సంబంధించిన కొత్త ఫొటోలను ఆ దేశం విడుదల చేసింది. ఈ నేపథ్యంలో తాజాగా విడుదలైన ఫొటోలు ఆసక్తికరంగా మారాయి. [ Kim Jong Un, North Korea dictator, brain hemorrhage, coma rumors, Pyongyang times down, Beijing medical treatment, KCNA, Telugu One, Telugu News ]

Published on: Tue Oct 20, 2026 12:55PM

అమెరికాపై సడలిన నమ్మకం: భారత్ తో బంధమే శ్రీరామరక్ష.. ఇండియాపై నెతన్యాహు పొగడ్తలు.!

ప్రపంచ భౌగోళిక రాజకీయాల్లో అనూహ్య పరిణామాలు చోటుచేసుకుంటున్న తరుణంలో ఇజ్రాయెల్ ప్రధాన మంత్రి బెంజమిన్ నెతన్యాహు సంచలన వ్యాఖ్యలు చేశారు. అమెరికాపై సడలిన విశ్వాసం, భారత్ తో బంధం బలోపేతానికి ఆయన తహతహ ఆ వ్యాఖ్యలలో ప్రస్ఫుటంగా ప్రతిఫలించాయి. నెతన్యాహు వ్యాఖ్యలు ఇప్పుడు అంతర్జాతీయ స్థాయిలో హాట్ టాపిక్ గా మారాయి. భవిష్యత్తులో అమెరికా అధ్యక్షుడిగా బాధ్యతలు చేపట్టే వ్యక్తి ఇజ్రాయెల్‌కు వ్యతిరేకంగా, శత్రుభావంతో వ్యవహరించే అవకాశాలు మెండుగా ఉన్నాయని నెతన్యాహు అన్నారు. అగ్రరాజ్యం రాజకీయాల్లో భవిష్యత్తులో తలెత్తగల ఇటువంటి ఊహించని సవాళ్లను ఎదుర్కొనేందుకు, ముందస్తు వ్యూహంగా భారత్ వంటి బలమైన దేశాలతో వ్యూహాత్మక కూటములను ఏర్పరచుకోవాల్సిన అవసరం ఉందని నెతన్యాహు అభిప్రాయపడ్డారు. ఇజ్రాయెల్‌ ఎన్నికల వేళ నెతన్యాహు చేసిన వ్యాఖ్యలు అగ్రరాజ్యంపై సడలిన ఆయన నమ్మకానికి నిలువెత్తు నిదర్శనంగా నిలిచాయి. ప్రస్తుతం అంటే ఇప్పుడు అమెరికాతో ఉన్న అనుకూల వాతావరణాన్ని సద్వినియోగం చేసుకుంటూ ఇజ్రాయెల్ తన స్థానాన్ని మరిత పటిష్టం చేసుకోవాలన్న నెతన్యాహు.. ప్రస్తుత అధ్యక్షుడు డోనాల్డ్ ట్రంప్ హయాంలో అగ్రరాజ్యం ఇజ్రాయెల్ అనుకూల విధానాలను అవలంబిస్తోందనీ, అయితే ఇదే పరిస్థితి అమెరికా తదుపరి అధ్యక్షుడి హయాంలో ఉంటుందన్న నమ్మకం ఇసుమంతైనా లేదనీ పేర్కొన్నారు. వచ్చే రెండేళ్లలో అమెరికా నుంచి గరిష్ట ప్రయోజనాలను సాధించుకోవాలని, అదే సమయంలో భవిష్యత్ అనిశ్చితిని దృష్టిలో ఉంచుకొని, అంటే డోనాల్డ్ ట్రంప్ తరువాత అమెరికా అధ్యక్ష బాధ్యతలు చేపట్టే వ్యక్తి హయాంలో ఇజ్రాయెల్ ప్రతికూల విధానాలకు అమెరికా ఉపక్రమించే అవకాశాలను దష్టిలో ఉంచుకుని ప్రత్యామ్నాయ భాగస్వామ్యాలను విస్తరించుకోవాలని ఆయన నొక్కి చెప్పారు. భారత్ చిన్న దేశం కాదని, అంతర్జాతీయంగా అపారమైన శక్తి సామర్థ్యాలు కలిగిన దేశమని నెతన్యాహు ప్రస్తుతించారు. ఇండియా, లాటిన్ అమెరికా, బ్రెజిల్ వంటి దేశాలతోనూ సత్సంబంధాలు పెంపొందించుకోవడంపై తాను ప్రత్యేక దృష్టి సారించానని వెల్లడించారు. కాగా నెతన్యాహు ఇండియాపై పొగడ్తల వర్షం కురిపించడం ఇదే తొలి సారి కాదు. ఈ ఏడాది మేలో కూడా ఆయన ఇండియాను భారీ శక్తిగా అభివర్ణించిన సంగతి విదితమే. ఇండియా, ఇజ్రాయెల్ మధ్య ప్రత్యేకమైన సంబంధాలన్నాయన్న ఆయన, అలాగే ఇండియాలో ఇజ్రాయెల్ పట్ల సానుకూల వాతావరణం ఉందని చెప్పుకొచ్చారు. అయితే తాజాగా అమెరికాతో సంబంధాలు దెబ్బతినే అవకాశాలున్నాయంటూ నెతన్యాహు చేసిన వ్యాఖ్యలు అమెరికాలో భవిష్యత్ రాజకీయ మార్పులపై స్పష్టమైన సంకేతాలు ఇచ్చాయి. వచ్చే ఎన్నికలలో అమెరికాలో డెమొక్రాట్ లు అధికారంలోకి వచ్చే అవకాశాలున్నాయన్న సంకేతాలను నెతన్యాహు తన వ్యాఖ్యల ద్వారా ఇచ్చారు. గతంలో అంటే అమెరికాలో డెమోక్రట్ల పాలన సమయంలో ఇజ్రాయెల్, అమెరికా సంబంధాల మధయ ఒడిదుడుకులు తలెత్తాయి. ఈ నేపథ్యంలో నెతన్యాహు చేసిన అమెరికా తదుపరి అధ్యక్షుడు వ్యాఖ్య రిపబ్లికన్ల ఓటమిని సూచిస్తోందని అంతర్జాతీయ రాజకీయ పరిశీలకులు విశ్లేషిస్తున్నారు. మరోవైపు, ఇజ్రాయెల్‌లో అక్టోబర్ 27న జరగనున్న సార్వత్రిక ఎన్నికలకు ముందు నెతన్యాహు ఈ వ్యూహాత్మక ప్రకటన చేయడంపై ఆయన రాజకీయ ప్రత్యర్థుల నుంచి విమర్శలు వెల్లువెత్తుతున్నాయి. నెతన్యాహు ప్రధాన ప్రత్యర్థి, ఇజ్రాయెల్ రక్షణ దళాల మాజీ చీఫ్ ఆఫ్ స్టాఫ్ గాడి ఐసెన్‌కోట్.. ఎన్నికల సమయంలో ప్రజలను భయభ్రాంతులకు గురిచేసి, దేశంలో నెలకొన్న ఇతర ప్రధాన సమస్యల నుంచి ప్రజల దృష్టిని మళ్లించేందుకే నెతన్యాహు ఇలాంటి నినాదాలు, వివాదాలు తెరపైకి తెస్తున్నారని ఆరోపించారు. దేశ రక్షణకు సంబంధించి స్పష్టమైన విధానం లేకపోవడంతోనే ఇలాంటి వ్యూహాలను ఆశ్రయిస్తున్నారని ఐసెన్‌కోట్ మండిపడ్డారు. [Benjamin Netanyahu Lost Faith America, Speak Strong India Relations, US Future President Warnings, Netanyahu Strategy, Foreign Policy, Israel Elections, Telugu One]

Published on: Mon Oct 19, 2026 3:11PM

ప్రేమ కోసం ఆస్తులన్నీ అమ్మేశాడు.. తీరా చూస్తే ప్రియురాలు మనిషే కాదు.!

ఆమెతో కొత్త జీవితం మొదలుపెట్టాలని కలలు కన్నాడు.. ఉన్న ఆస్తులన్నీ అమ్ముకున్నాడు.. 1,900 కిలోమీటర్లు ప్రయాణించాడు. కానీ తీరా అక్కడికి వెళ్లాక తెలిసిన నిజం అతడి గుండెను పిండేసింది. తాను ప్రేమించింది ఓ అందమైన యువతిని కాదు.. కృత్రిమ మేధస్సు సృష్టించిన ఓ కల్పిత పాత్రను!ప్రేమంటేనే అంతే.. మనసుకు నచ్చిన మనిషి కోసం ఏమైనా చేయాలనిపిస్తుంది. జీవితంలో ఒంటరితనం వెంటాడుతున్నప్పుడు చిన్న పలకరింపు కూడా కొండంత ఆనందాన్నిస్తుంది. నాలుగు ప్రేమ మాటలు మనసులో కొత్త ఆశలు చిగురింపజేస్తాయి. కానీ ఆ మాటల వెనుక ఉన్నది మనిషి కాకుండా ఓ మాయా ప్రపంచమని తెలిస్తే.. ఆ బాధను భరించడం ఎంత కష్టమో మాటల్లో చెప్పలేం. బ్రెజిల్‌కు చెందిన ఓ వ్యక్తి జీవితంలోనూ ఇలాంటి విషాదమే చోటుచేసుకుంది. ఒంటరి జీవితంలోకి వచ్చిన పరిచయం..! బ్రెజిల్‌లోని ఇంపిరాట్రిజ్ ప్రాంతానికి చెందిన 49 ఏళ్ల ఎడిమర్ రోచా మార్టిన్స్ వృత్తిరీత్యా తాపీ మేస్త్రీ. తల్లి మరణం తర్వాత ఆయన ఒంటరి జీవితాన్ని గడుపుతున్నాడు. ఆ ఒంటరితనంలో తనకంటూ ఓ తోడు ఉంటే బాగుంటుందని ఆశపడ్డాడు. అలాంటి సమయంలో సోషల్ మీడియాలో ‘జెస్సికా ఒలివెరా’ పేరుతో ఉన్న ఓ ప్రొఫైల్ అతడి దృష్టిని ఆకర్షించింది. అందమైన ఫొటోలు.. ఆకట్టుకునే వీడియోలు.. తన జీవితంలోకి ఓ కొత్త వెలుగును తీసుకొచ్చినట్లుగా అనిపించాయి. ఆ ప్రొఫైల్‌లోని మహిళ తనను తాను వితంతువుగా పరిచయం చేసుకుంది. తన పొలానికి వచ్చి నివసించవచ్చని, అక్కడ ఎలాంటి పని చేయాల్సిన అవసరం లేదని, ఆర్థికంగానూ సహాయం చేస్తానని పేర్కొన్నట్లు సమాచారం. ఆ మాటలు మార్టిన్స్ మనసులో ఆశలు రేకెత్తించాయి. ప్రేమ కోసం ఆస్తులన్నీ అమ్ముకున్నాడు..! రోజులు గడిచేకొద్దీ జెస్సికాతో కలిసి జీవించాలనే కోరిక అతడిలో బలపడింది. ఆమెతో కొత్త జీవితాన్ని ప్రారంభించవచ్చని కలలు కన్నాడు. తన జీవితంలో ఇక ఒంటరితనం ఉండదని ఆశపడ్డాడు. ఆ ఆశతోనే తనకున్న ఆస్తులన్నింటినీ అమ్ముకుని, ఆమె దగ్గరకు వెళ్లాలని నిర్ణయించుకున్నాడు. అక్టోబర్ తొలివారంలో తన ప్రయాణాన్ని ప్రారంభించాడు. బస్సులో దాదాపు 36 గంటలపాటు ప్రయాణించి, సుమారు 1,900 కిలోమీటర్ల దూరంలో ఉన్న బెలొ హారిజొంటె నగరానికి చేరుకున్నాడు. తన ప్రియురాలిని కలుసుకోబోతున్నాననే ఆనందంతో వెళ్లిన అతడికి.. అక్కడ తన కోసం ఓ కొత్త జీవితం ఎదురుచూస్తోందని అనిపించి ఉండొచ్చు. కానీ అతడి ఆశలన్నీ కొద్దిసేపట్లోనే ఆవిరైపోయాయి.! ఫొటో పట్టుకుని వీధులన్నీ వెతికాడు..! జెస్సికా ఫొటోను చేతిలో పట్టుకుని ఆమె కోసం వెతకడం ప్రారంభించాడు. వీధుల్లో తిరిగాడు. తనకు తెలిసిన వివరాల ఆధారంగా ఆమె ఆచూకీ తెలుసుకునేందుకు ప్రయత్నించాడు. కానీ ఎంత వెతికినా ఆమె కనిపించలేదు. ఆమె గురించి తెలిసినవారూ ఎవరూ కనిపించలేదు. తాను ఇంత దూరం వచ్చింది ఎవరిని కలవడానికి? తనను ఇక్కడికి రప్పించిన ఆ వ్యక్తి ఎక్కడ? అనే ప్రశ్నలు అతడిని వెంటాడి ఉంటాయి. చివరకు తాను ప్రేమించిన జెస్సికా నిజమైన మహిళ కాదని తెలిసింది. ఆమె ఫొటోలు, వీడియోల వెనుక ఉన్నది కృత్రిమ మేధస్సు (ఏఐ) సృష్టించిన ఓ కల్పిత పాత్ర అని తెలుసుకుని మార్టిన్స్ తీవ్ర దిగ్భ్రాంతికి గురయ్యాడు.ఎన్నో ఆశలతో బయలుదేరిన ప్రయాణం.. కన్నీళ్లతో ముగిసింది. తన జీవితంలో తోడుంటుందని నమ్మిన వ్యక్తి అసలు మనిషే కాదని తెలిసిన క్షణం అతడి మనసును ఎంతగా కలచివేసి ఉంటుందో ఊహించడం కూడా కష్టమే. మూడు లక్షల మంది ఫాలోవర్లు.. చివరకు ఖాతా మాయం! ఈ వ్యవహారంలో మరో ఆసక్తికరమైన అంశం ఏమిటంటే.. జెస్సికా పేరుతో ఉన్న టిక్‌టాక్ ఖాతాకు మూడు లక్షలకు పైగా ఫాలోవర్లు ఉన్నట్లు సమాచారం. ఈ వివాదం వెలుగులోకి రావడంతో ఆ ప్రొఫైల్ నిర్వాహకులు స్పందించారు. మార్కెటింగ్ ప్రయోజనాల కోసమే ఏఐ పాత్రను సృష్టించామని, తాము ఎవరితోనూ వ్యక్తిగతంగా మాట్లాడలేదని వెల్లడించినట్లు సమాచారం. ఆ తర్వాత ఆ ఖాతాను సోషల్ మీడియా నుంచి తొలగించారు. అయితే, అప్పటికే మార్టిన్స్ జీవితం తలకిందులైంది. తనకున్న ఆస్తులను అమ్ముకుని, వేల కిలోమీటర్లు ప్రయాణించి వచ్చిన అతడికి అక్కడ ఆశ్రయం కూడా లేకుండా పోయింది. చేతిలో డబ్బు లేక, ఉండటానికి ఇల్లు లేక చివరకు స్థానిక సిటీ హాల్‌ను ఆశ్రయించాడు. సామాజిక కార్యకర్తల సహాయంతో తిరిగి తన స్వస్థలానికి వెళ్లేందుకు ఏర్పాట్లు చేసుకున్నాడు. తోడు కోసం వెళితే.. కన్నీళ్లే మిగిలాయి.! జీవితంలో ఒంటరితనాన్ని జయించాలని కోరుకున్నాడు. తనకంటూ ఓ తోడు దొరికిందని సంబరపడ్డాడు. ఆమెతో కలిసి జీవితాన్ని గడపాలని తనకున్నదంతా త్యాగం చేశాడు. కానీ చివరకు చేతిలో ఏమీ మిగలని పరిస్థితిని ఎదుర్కొన్నాడు. మనసులో ప్రేమను నింపుకున్న అతడికి చివరకు మిగిలింది నిరాశ, వేదన మాత్రమే.ఈ ఘటన కేవలం ఓ వ్యక్తి ఎదుర్కొన్న విషాదం మాత్రమే కాదు.. డిజిటల్ ప్రపంచంలో మనం ఎవరిని నమ్ముతున్నామనే ప్రశ్నను కూడా లేవనెత్తుతోంది. ఏఐ సాంకేతికతతో నిజమైన వ్యక్తుల్లా కనిపించే చిత్రాలు, వీడియోలు సృష్టించడం సులభమవుతున్న తరుణంలో.. తెరపై కనిపించేదంతా నిజమని నమ్మడం ప్రమాదకరంగా మారుతోంది. సోషల్ మీడియాలో పరిచయమైన వ్యక్తుల వివరాలను ధ్రువీకరించకుండా ఆర్థిక నిర్ణయాలు తీసుకోవడం, ఆస్తులను అమ్ముకోవడం, అపరిచితుల కోసం సుదూర ప్రయాణాలు చేయడం ఎంతటి ప్రమాదాలకు దారితీయవచ్చో ఈ ఘటన హెచ్చరిస్తోంది.ప్రేమ కోసం సర్వస్వం అర్పించిన ఓ వ్యక్తికి చివరకు దక్కింది కన్నీళ్లే. మనిషి కోసం వెతుకుతూ బయలుదేరిన అతడికి.. తాను ప్రేమించింది ఓ డిజిటల్ మాయ అని తెలిసింది. సాంకేతికత ఎంత వేగంగా పెరుగుతున్నా.. దాని వెనుక ఉన్న నిజానిజాలను గుర్తించే విచక్షణ మనిషికి మరింత అవసరమని ఈ విషాద ఘటన గుర్తుచేస్తోంది. [ Edimar Rocha Martins, AI Romance Scam, Jessica Oliveira AI, Brazil AI Love Scam, AI Girlfriend Scam, Brazil Online Fraud, TikTok AI Character, Artificial Intelligence Fraud, Digital Love Scam, AI Romance,Telugu One, Telugu News ]

Published on: Sun Oct 18, 2026 3:52PM