Telangana News | Latest Telangana News, Politics & Updates

పెళ్లి చేసుకుంటానని నమ్మించి.. కోటికి పైగా కాజేసిన కేటుగాడు.!

పెళ్లి చేసుకుంటానని నమ్మించి ఓ మహిళ నుంచి భారీ మొత్తంలో డబ్బులు వసూలు చేసిన ఘటన మేడిపల్లి పోలీస్ స్టేషన్ పరిధిలో వెలుగుచూసింది. కమ్మ మ్యాట్రిమోనీ వెబ్‌సైట్‌ ద్వారా పరిచయమైన కోనేటి ప్రదీప్ అనే వ్యక్తి.. పెళ్లి పేరుతో మహిళకు దగ్గరై, మూడేళ్లుగా వివాహం చేసుకోకుండా కాలయాపన చేస్తూ రూ.1.18 కోట్లు వసూలు చేసినట్లు ఆరోపణలు ఉన్నాయి. అంతటితో ఆగకుండా, మహిళకు సంబంధించిన వ్యక్తిగత ఫొటోలను బయటపెడతానని బెదిరించి మరో రూ.4 లక్షలు తీసుకున్నట్లు ఫిర్యాదు అందింది. మ్యాట్రిమోనీ పరిచయం.. ఆపై మోసం.! కమ్మ మ్యాట్రిమోనీ వెబ్‌సైట్‌ ద్వారా బాధితురాలికి పరిచయమైన ప్రదీప్.. ఆమెను పెళ్లి చేసుకుంటానని నమ్మించి సన్నిహిత సంబంధం ఏర్పరచుకున్నట్లు తెలుస్తోంది. ఈ క్రమంలో వివిధ కారణాలు చెబుతూ ఆమె నుంచి భారీ మొత్తంలో డబ్బులు వసూలు చేసినట్లు ఆరోపణలు ఉన్నాయి. మూడేళ్లుగా పెళ్లి ప్రస్తావనను వాయిదా వేస్తూ వచ్చిన నిందితుడు.. చివరకు వ్యక్తిగత ఫొటోలను అడ్డం పెట్టుకుని బెదిరింపులకు పాల్పడినట్లు బాధితురాలు పోలీసులను ఆశ్రయించింది. ఆమె ఫిర్యాదు మేరకు కేసు నమోదు చేసిన మేడిపల్లి పోలీసులు ప్రదీప్‌ను అరెస్ట్ చేశారు. పాత కేసుల్లోనూ నిందితుడే.! పోలీసుల సమాచారం ప్రకారం, కోనేటి ప్రదీప్‌కు గతంలోనూ నేర చరిత్ర ఉన్నట్లు గుర్తించారు. మేడిపల్లి పరిధిలో నమోదైన ఓ హత్య కేసులో అతడు నిందితుడిగా ఉన్నట్లు, గోల్కొండ, తిరుమలగిరి పోలీస్ స్టేషన్ల పరిధిలో అతడిపై రెండు గంజాయి కేసులు నమోదైనట్లు సమాచారం. ప్రదీప్‌ చేతిలో మరికొందరు మహిళలు కూడా మోసపోయి ఉండొచ్చన్న అనుమానాలు వ్యక్తమవుతున్నాయి. రిమాండ్‌కు తరలింపు.. మరిన్ని వివరాలపై ఆరా.! నిందితుడిని అరెస్ట్ చేసిన పోలీసులు కోర్టులో హాజరుపరిచి రిమాండ్‌కు తరలించారు. ప్రదీప్‌ను పోలీసు కస్టడీలోకి తీసుకుని విచారిస్తే మరిన్ని బాధితుల వివరాలు వెలుగులోకి వచ్చే అవకాశం ఉందని భావిస్తున్నారు. బాధితురాలి నుంచి వసూలు చేసిన నగదు, బెదిరింపులకు సంబంధించిన ఆధారాలు, ఇతర మహిళలతో అతడికి ఉన్న సంబంధాలపై పోలీసులు దర్యాప్తు కొనసాగిస్తున్నారు.పెళ్లి సంబంధాల కోసం మ్యాట్రిమోనీ వెబ్‌సైట్లను వినియోగించే వారు పరిచయమైన వ్యక్తుల వివరాలు, ఆర్థిక లావాదేవీల విషయంలో అప్రమత్తంగా ఉండాలని పోలీసులు సూచిస్తున్నారు. [ Koneti Pradeep, Medipally Police, Matrimony Fraud, Marriage Scam, Kamma Matrimony, Matrimonial Website Fraud, ₹1.18 Crore Fraud, Blackmail Case, Personal Photos Threat, Cybercrime, Hyderabad Crime News, Medipally Police Station, Woman Cheated on Marriage Promise, hyderabad police, CP Sajjanar, DGP C.V.Anand ]

Published on: Sun Oct 25, 2026 1:02PM

శంషాబాద్ ఎయిర్ పోర్టులో భారీగా విదేశీ కరెన్సీ స్వాధీనం: దంపతుల అరెస్టు.!

హైదరాబాద్‌ రాజీవ్ గాంధీ అంతర్జాతీయ విమానాశ్రయంలో డైరెక్టరేట్ ఆఫ్ రెవెన్యూ ఇంటెలిజెన్స్ (డీఆర్ఐ) అధికారులు విదేశీ కరెన్సీ అక్రమ రవాణా గుట్టు రట్టు చేశారు. విదేశాలకు అక్రమంగా తరలించేందుకు యత్నించిన ఇద్దరు నిందితులను అదుపులోనికి తీసుకుని దాదాపు కోటీ 56 లక్షల రూపాయల విలువైన విదేశీ కరెన్సీని స్వాధీనం చేసుకున్నారు. వివరాలిలా ఉన్నాయి. మలేషియా రాజధాని కౌలాలంపూర్‌కు వెళ్లేందుకు ఎయిర్ ఏషియా విమానం ఎక్కేందుకు సిద్ధమైన ఓ ప్రయాణికుడి కదలికలు అనుమానాస్పదంగా ఉండటంతో అధికారులు అతడిని అడ్డుకుని లగేజీని క్షుణ్ణంగా తనిఖీ చేశారు. ఈ తనిఖీలో అతడి ట్రాలీ బ్యాగులోని దుస్తుల మధ్య నల్లటి ప్లాస్టిక్ కవర్లలో విదేశీ కరెన్సీని దాచిన విషయం బయటపడింది. అతడి వద్ద నుంచి 66 వేల 600 అమెరికా డాలర్లు, ఇతర విదేశీ కరెన్సీని స్వాధీనం చేసుకున్నారు. స్వాధీనం చేసుకున్న విదేశీ కరెన్సీ విలువ భారత కరెన్సీలో సుమారు రూ. 63 లక్షల 62 వేల రూపాయలుగా అంచనా వేశారు. ఈ ప్రయాణికుడిని అదుపులోకి తీసుకుని విచారించగా, విమానంలో వేరే సీటులో ప్రయాణిస్తున్న అతని భార్య కూడా ఈ అక్రమ రవాణాలో భాగస్వామిగా ఉన్నట్లు తేలింది. వెంటనే అప్రమత్తమైన డీఆర్ఐ సిబ్బంది ఆమెను కూడా అడ్డుకుని తనిఖీలు చేపట్టారు. ఆమె లగేజీలోనూ సరిగ్గా అదే పద్ధతిలో దుస్తుల మధ్య దాచిన 97 వేల 600 అమెరికా డాలర్లను గుర్తించారు. వీటి విలువ ఇండియన్ కరెన్సీలో 91.94 లక్షల రూపాయలని అధికారులు తెలిపారు. ఈ భారీ మొత్తానికి సంబంధించి ఎలాంటి చట్టబద్ధమైన అనుమతి పత్రాలు గానీ, ఆధారాలు గానీ ఆ దంపతుల వద్ద లేకపోవడంతో, కస్టమ్స్ చట్టం ప్రకారం నగదుతో పాటు రవాణాకు ఉపయోగించిన బ్యాగులను సీజ్ చేసిన డిఆర్ఐ అధికారులు నిందితులను అరెస్ట్ చేసి రిమాండ్‌కు తరలించారు. [Foriegn Currency Seized Shamshabad Airport, DRI Seizure Hyderabad, Foreign Currency Smuggling, RGIA Airport , Kuala Lumpur Flight, TeluguOne]

Published on: Sat Oct 24, 2026 1:58PM

ఎల్‌నినో ఎఫెక్ట్: ఆదివాసీలకు 125 రోజుల ఉపాధి పనులు.!

రాష్ట్రంలో ఎల్‌నినో ప్రభావంతో తలెత్తే కరువు పరిస్థితులను సమర్థంగా ఎదుర్కొనేందుకు తెలంగాణ ప్రభుత్వం ముందస్తు వ్యూహాలకు పదును పెట్టింది. ముఖ్యంగా గ్రామీణ ప్రాంతాల్లో, మారుమూల అడవుల్లో జీవిస్తున్న ఆదివాసీ, గిరిజన కుటుంబాల రక్షణ కోసం ప్రత్యేక కార్యాచరణకు శ్రీకారం చుట్టింది. వాతావరణ మార్పుల కారణంగా భవిష్యత్తులో ఏర్పడబోయే ఇబ్బందులను ముందే అంచనా వేసిన సర్కార్.. గిరిజనులకు అండగా నిలవాలని నిర్ణయించింది. ఇందులో భాగంగా వారికి పెద్ద ఎత్తున ఉపాధి కల్పించి, పొట్టచేత పట్టుకుని ఇతర ప్రాంతాలకు వలస వెళ్లకుండా ఆపేందుకు పకడ్బందీ చర్యలు చేపట్టింది. ఈ మేరకు రాష్ట్ర పంచాయతీరాజ్, గ్రామీణాభివృద్ధి శాఖ మంత్రి సీతక్క ప్రత్యేక ఆదేశాలు జారీ చేశారు. మంత్రి మార్గదర్శకాలకు అనుగుణంగా ఆ శాఖ కమిషనర్ దివ్య దేవరాజన్ జిల్లాల యంత్రాంగానికి స్పష్టమైన ఆదేశాలు ఇస్తూ అధికారిక ఉత్తర్వులు వెలువరించారు. ఈ ప్రత్యేక పథకం కింద అర్హత కలిగిన ప్రతి గిరిజన కుటుంబానికి ఉపాధి హామీ కింద అందే పని దినాలను ఏకంగా 125 రోజులకు పెంచి కల్పించాలని నిర్ణయించారు. దీనివల్ల కష్టకాలంలోనూ ఆ కుటుంబాలకు కనీస ఆర్థిక భద్రత చేకూరుతుందని ప్రభుత్వం భావిస్తోంది. ఇప్పటివరకు జాబ్ కార్డులు లేని అర్హులైన ప్రతి ఆదివాసీ కుటుంబానికి తక్షణమే కొత్త జాబ్ కార్డులను మంజూరు చేయాలని అధికారులను ఆదేశించారు. అంతేకాకుండా, ఇప్పటికే ఉన్న జాబ్ కార్డుల్లో 18 సంవత్సరాలు నిండిన కుటుంబ సభ్యుల పేర్లన్నీ విధిగా నమోదు చేయాలని స్పష్టం చేశారు. ఈ ప్రక్రియను వేగవంతం చేయాలని రాష్ట్రంలోని అన్ని జిల్లాల కలెక్టర్లకు స్పష్టమైన ఆదేశాలు అందాయి. క్షేత్రస్థాయిలో ఎక్కడా ఎలాంటి అలసత్వం ప్రదర్శించకుండా, అర్హులైన ప్రతి గిరిజన కుటుంబం జాబ్ కార్డు పొందేలా పర్యవేక్షించాలని సూచించారు. వాతావరణ పరిస్థితులు అనుకూలించని తరుణంలో వ్యవసాయ పనులు దెబ్బతిని, గ్రామీణ ఉపాధి కుంటుపడే ప్రమాదం ఉంది. ఈ నేపథ్యంలో ప్రభుత్వం తీసుకున్న ఈ నిర్ణయం గిరిజన వర్గాలకు ఎంతో ఊరటనిస్తుందని నిపుణులు అభిప్రాయపడుతున్నారు. ఈ ముందస్తు చర్యలు అమల్లోకి రావడం ద్వారా గిరిజన ప్రాంతాల్లో ఉపాధి భద్రత పెరుగుతుందని, ఉపాధి వెతుక్కుంటూ పట్టణాలకు సాగే వలసలకు అడ్డుకట్ట పడుతుందని భావిస్తున్నారు. తద్వారా స్థానికంగానే ఆర్థిక స్థిరత్వం ఏర్పడుతుందని ప్రభుత్వం ఆశిస్తోంది. [ Telangana Government, Tribal Employment, 125 Days Employment Guarantee, El Nino Impact, Minister Seethakka, Telugu News, Telugu One ]

Published on: Fri Oct 23, 2026 9:34PM

కిలో సన్నబియ్యం రూ. 95కి చేరడానికి అసలు కారణం ఇదే.. సీఎం రేవంత్ కీలక ప్రకటన.!

తెలంగాణ రాజకీయాల్లో సన్నవడ్ల సాగు అంశం ప్రస్తుతం తీవ్ర చర్చనీయాంశంగా మారింది. రాష్ట్రంలో ఎల్ నినో ప్రభావం కారణంగా వరి సాగు నిత్యావసరాల ధరలపై తీవ్ర ప్రభావం పడిందని, ఈ నేపథ్యంలోనే సన్నవడ్ల ధర కిలో ఏకంగా 95 రూపాయలకు చేరిందని ముఖ్యమంత్రి రేవంత్ రెడ్డి స్పష్టం చేశారు. రాష్ట్ర ప్రభుత్వం సన్నవడ్ల సాగును పెద్దఎత్తున ప్రోత్సహిస్తున్న సమయంలో ప్రతిపక్ష పార్టీల నుంచి తీవ్ర విమర్శలు ఎదురయ్యాయని, కొందరైతే తనకు వ్యవసాయంపై అవగాహన లేదని కూడా విమర్శించారని ఆయన గుర్తుచేశారు. ఈ విమర్శలను తీవ్రంగా తిప్పికొట్టిన రేవంత్ రెడ్డి, ప్రజల సంక్షేమం కోసం తాము తీసుకుంటున్న నిర్ణయాలు సరైనవని సమర్థించుకున్నారు. ప్రస్తుతం రాష్ట్ర ప్రభుత్వం సుమారు 3.48 కోట్ల మంది ప్రజలకు నాణ్యమైన సన్నబియ్యాన్ని పంపిణీ చేస్తూ పేద ప్రజలకు భరోసా కల్పిస్తోందని ముఖ్యమంత్రి వెల్లడించారు. గత ప్రభుత్వాల హయాంలో అమలు చేసిన సంక్షేమ పథకాలను కొనసాగించడమే కాకుండా, వాటి ప్రయోజనాలను రెట్టింపు చేశామని ఆయన పేర్కొన్నారు. గత బీఆర్ఎస్ ప్రభుత్వం రైతు బంధు కింద ఎకరానికి 10,000 రూపాయలు ఇస్తే, తాము రేవైతు భరోసా కింద దానిని 12,000 రూపాయలకు పెంచి అమలు చేస్తున్నామని తెలిపారు. ఏ ఒక్క రైతుకు కూడా అన్యాయం జరగకుండా పారదర్శకమైన పాలన అందిస్తున్నామని, వ్యవసాయ రంగాన్ని మరింత బలోపేతం చేయడమే తమ ప్రభుత్వ ప్రధాన ధ్యేయమని ఆయన ఉద్ఘాటించారు. సాగు రంగంలో వస్తున్న మార్పులు, వాతావరణ పరిస్థితుల హెచ్చుతగ్గులను ఎదుర్కొనేందుకు ప్రభుత్వం ప్రణాళికాబద్ధంగా ముందుకు వెళ్తోందని సీఎం తెలిపారు. సన్నవడ్ల సాగును ప్రోత్సహించడం వల్ల భవిష్యత్తులో రాష్ట్ర రైతాంగానికి మంచి మద్దతు లభిస్తుందని, ప్రజలకు నాణ్యమైన ధాన్యం అందుబాటులోకి వస్తుందని ఆయన ధీమా వ్యక్తం చేశారు. కేవలం రాజకీయ లబ్ధి కోసమే కొందరు నాయకులు అర్థం లేని విమర్శలు చేస్తున్నారని మండిపడ్డారు. ఏదేమైనా రైతుల సంక్షేమం, రాష్ట్రాభివృద్ధే లక్ష్యంగా కాంగ్రెస్ ప్రభుత్వం పనిచేస్తుందని, ఎలాంటి ఆటంకాలు ఎదురైనా సంక్షేమ పథకాలను విజయవంతంగా అమలు చేసి తీరుతామని సీఎం రేవంత్ రెడ్డి తేల్చిచెప్పారు. [ CM Revanth Reddy, fine rice cultivation, BRS criticism, Telangana news, Rythu Bharosa, El Nino rice price,Telugu News, Telugu One ]

Published on: Fri Oct 23, 2026 9:10PM

ఎల్ నినో ఎఫెక్ట్: బాసర త్రిపుల్ ఐటీ దసరా సెలవులు పొడగింపు.!

ఎల్ నినో ఎఫెక్ట్ వ్యవసాయంపైనే తీవ్రంగా చూపుతోందని అంతా భావిస్తున్నారు. కానీ విద్యా సంస్థలపైనా, విద్యార్థులపైనా కూడా ఎల్ నినో ప్రభావం పడింది. విద్యాలయాల్లో, హాస్టళ్లలో నీటి లభ్యత గణనీయంగా పడిపోయింది. తీవ్ర వర్షాభావ పరిస్థితులు విద్యా సంస్థలపైనా పడుతోంది. తాజాగా బాసర త్రిబుల్ ఐటీ విద్యార్థులకు దసరాసెలవులను పొడిగించారు. బాసరలోని రాజీవ్ గాంధీ వైజ్ఞానిక సాంకేతిక విశ్వవిద్యాలయం ట్రిపుల్ ఐటీ లో అసాధారణ పరిణామాలు చోటుచేసుకున్నాయి. క్యాంపస్‌లో వేలాది మంది విద్యార్థులు చదువుకుంటున్నారు. ఎల్ నినో ఎఫెక్ట్ తో అక్కడ నీటి ఎద్దడి తీవ్రతరమైంది. వర్షాభావ పరిస్థితుల కారణంగా, స్థానిక నీటివనరుల్లో నీటి లభ్యత లేకుండా పోయింది. భూగర్భ జలాలు అడుగంటిపోయాయి. దీంతో బాసర త్రిబుల్ ఐటీలో విద్యార్థులకు అవసరమైన తాగునీరు, ఇతర అవసరాలకు కావలసిన నీటి సరఫరా నిలిచిపోయే పరిస్థితి తలెత్తింది. పరిస్థితి తీవ్రతను గ్రహించిన విశ్వవిద్యాలయ పాలనా యంత్రాంగం, క్యాంపస్‌లో నెలకొన్న ఈ తాగునీటి సంక్షోభం కొద్దిరోజుల్లో పరిష్కారం కాకపోవచ్చని భావించి, విద్యార్థుల ఇబ్బందిని నివారించేందుకు దసరా సెలవులను పొడిగిస్తున్నట్లు ప్రకటించారు. సెలవులు ముగిసి విద్యార్థులు క్యాంపస్‌కు తిరిగి వస్తే నీటి సమస్య మరింత జఠిలమయ్యే అవకాశం ఉండటంతో ఈ నిర్ణయం తీసుకున్నారు. సెలవుల పొడిగింపునకు సంబంధించిన సమాచారాన్ని అధికారికంగా ప్రకటించారు. విద్యార్థులు తమ ఇళ్ల నుంచి క్యాంపస్‌కు ఎప్పుడు రావాలనే సమాచారాన్ని త్వరలోనే మళ్లీ వెల్లడిస్తామని పేర్కొన్నారు. [Elnino Effect On Basara IIIT, RGUKT Basara, Dasara Holidays Extended, Basara IIIT Water Crisis, Telangana, Telugu One]

Published on: Fri Oct 23, 2026 5:25PM

KCR కోసం దేశ ప్రజలు ఎదురుచూస్తున్నారు.. KTR సంచలన వ్యాఖ్యలు.!

తెలంగాణ భవన్ వేదికగా జరిగిన మీడియా సమావేశంలో భారత్ రాష్ట్ర సమితి (BRS) వర్కింగ్ ప్రెసిడెంట్ కేటీఆర్ రాష్ట్ర రాజకీయాలపై తీవ్ర స్థాయిలో మండిపడ్డారు. కాంగ్రెస్ బీజేపీ పార్టీల వైఫల్యాలను ఎత్తిచూపుతూ ఆయన చేసిన వ్యాఖ్యలు ప్రస్తుతం రాజకీయ వర్గాల్లో తీవ్ర చర్చనీయాంశంగా మారాయి. ప్రజా సమస్యలను గాలికొదిలేసి రాజకీయ కక్ష సాధింపు చర్యలకే అధికార పార్టీ పరిమితమైందని కేటీఆర్ ఆరోపించారు. రాష్ట్రంలో అమలవుతున్న పాలనపై ప్రజలు తీవ్ర నిరాశలో ఉన్నారని ఆయన పేర్కొంటూ, గత బీఆర్ఎస్ హయాంలో జరిగిన అభివృద్ధిని, ప్రస్తుత అస్తవ్యస్త పరిస్థితులను గణాంకాలతో సహా విశ్లేషించారు. రాష్ట్రంలో కాంగ్రెస్ ప్రభుత్వం అధికారంలోకి వచ్చిన తర్వాత ప్రజలకు ఇచ్చిన హామీలు నీటి మూటలుగానే మిగిలిపోయాయని కేటీఆర్ దుయ్యబట్టారు. ఎన్నికల సమయంలో వందలాది హామీలు గుప్పించి, అధికారంలోకి వచ్చాక అమలు చేయడంలో పూర్తిగా విఫలమయ్యారని మండిపడ్డారు. ముఖ్యంగా తాగు, సాగునీటి రంగాలలో తీవ్రమైన అలసత్వం ప్రదర్శిస్తున్నారని ఆగ్రహం వ్యక్తం చేశారు. గతంలో కేసీఆర్ నాయకత్వంలో కోట్లాది ఎకరాలకు సాగునీరు అందించిన ఘనత బీఆర్ఎస్ ప్రభుత్వానిదని, కానీ నేడు సరైన నిర్వహణ లేక రైతులు అష్టకష్టాలు పడుతున్నారని ఆవేదన వ్యక్తం చేశారు. రాష్ట్రంలో విద్యుత్ కోతలు మళ్లీ ప్రారంభమయ్యాయని, దీనివల్ల వ్యవసాయ రంగం తీవ్రంగా దెబ్బతింటున్నదని ఆయన స్పష్టం చేశారు. అంతేకాకుండా, కేంద్రంలో అధికారంలో ఉన్న బీజేపీ ప్రభుత్వంపై కూడా కేటీఆర్ తీవ్రమైన విమర్శలు గుప్పించారు. తెలంగాణకు రావాల్సిన నిధులు, ప్రాజెక్టుల విషయంలో కేంద్రంలోని బీజేపీ నేతలు రాష్ట్రానికి తీవ్రమైన అన్యాయం చేస్తున్నారని ఆరోపించారు. కేంద్ర బడ్జెట్‌లో తెలంగాణకు కేటాయింపులు నామమాత్రంగానే ఉన్నాయని, రాష్ట్ర ప్రయోజనాల కోసం పోరాడటంలో బీజేపీ, కాంగ్రెస్ పార్టీలు ఒక్కటేనని విమర్శించారు. పార్లమెంట్ ఎన్నికల్లో పదే పదే గొప్పలు చెప్పుకున్న బీజేపీ నాయకులు, రాష్ట్రానికి ఇచ్చిన ఒక్క హామీనైనా నిలబెట్టుకున్నారా అని సూటిగా ప్రశ్నించారు. రాష్ట్రంలో శాంతిభద్రతలు క్షీణిస్తున్నాయని, ప్రజా సంక్షేమాన్ని పక్కనబెట్టి ప్రతిపక్ష నేతలను అణచివేయడమే లక్ష్యంగా ప్రభుత్వాలు పనిచేస్తున్నాయని కేటీఆర్ హెచ్చరించారు. బీఆర్ఎస్ పార్టీ ఎప్పుడూ ప్రజలక్ష్యాల కోసం, రాష్ట్ర హక్కుల కోసం పోరాడుతూనే ఉంటుందని స్పష్టం చేశారు. ప్రజా వ్యతిరేక విధానాలను త్వరలోనే ప్రజాక్షేత్రంలో ఎండగడతామని, ప్రజలందరూ ఏకమై ఈ వైఫల్యాలను ప్రశ్నించాలని పిలుపునిచ్చారు. ఈ ప్రెస్ మీట్ ద్వారా రాబోయే కాలంలో పార్టీ అనుసరించాల్సిన వ్యూహాలపై స్పష్టతనిచ్చిన కేటీఆర్, తెలంగాణ ప్రజల ఆకాంక్షలను కాపాడుకోవడానికి బీఆర్ఎస్ పోరాటం నిరంతరం కొనసాగుతుందని ధైర్యం చెప్పారు. ప్రజలు మళ్లీ బీఆర్ఎస్ వైపు చూస్తున్నారు.! కాంగ్రెస్ పార్టీ ఇచ్చిన హామీలను నమ్మి మోసపోయామని వివిధ వర్గాల ప్రజలు భావిస్తున్నారని కేటీఆర్ పేర్కొన్నారు. ప్రభుత్వంపై ప్రజల్లో అసంతృప్తి పెరుగుతోందని, ప్రజలు మళ్లీ బీఆర్ఎస్ వైపు చూస్తున్నారని అన్నారు. రేవంత్ రెడ్డి ప్రభుత్వ హడావిడి మరికొద్దిరోజులే ఉంటుందని వ్యాఖ్యానిస్తూ, రాష్ట్రంలో తిరిగి బీఆర్ఎస్ అధికారంలోకి వస్తుందనే విశ్వాసాన్ని వ్యక్తం చేశారు. జాతీయ రాజకీయాల్లో కేసీఆర్ పాత్రపై ధీమా.! జాతీయ రాజకీయాలపై స్పందించిన కేటీఆర్.. భవిష్యత్తులో కాంగ్రెస్, బీజేపీయేతర పార్టీలు దేశ రాజకీయాల్లో నిర్ణయాత్మక పాత్ర పోషిస్తాయని అభిప్రాయపడ్డారు. కాంగ్రెస్ అగ్రనేత రాహుల్ గాంధీ ఎన్ని ప్రయత్నాలు చేసినా ఆశించిన ఫలితాలు సాధించలేరని విమర్శించారు. ప్రధాని నరేంద్ర మోదీ పాలనలోనూ దేశానికి ఆశించిన ప్రయోజనాలు చేకూరలేదని ఆరోపించారు. తెలంగాణ ఎంపీలపై విమర్శలు.! తెలంగాణ నుంచి ఎన్నికైన ఎంపీలు రాష్ట్ర ప్రయోజనాల కోసం పార్లమెంటులో గట్టిగా తమ గళాన్ని వినిపించడం లేదని కేటీఆర్ విమర్శించారు. రాష్ట్ర సమస్యలను జాతీయ స్థాయిలో ప్రస్తావించి పరిష్కారాల కోసం కృషి చేయాల్సిన బాధ్యత ఎంపీలపై ఉందని అన్నారు. మొత్తంగా, తెలంగాణలో తిరిగి అధికారంలోకి రావడంతో పాటు జాతీయ రాజకీయాల్లోనూ కీలక పాత్ర పోషించాలనే బీఆర్ఎస్ లక్ష్యాన్ని కేటీఆర్ తన వ్యాఖ్యల ద్వారా స్పష్టం చేశారు. అయితే, కేసీఆర్ తిరిగి ముఖ్యమంత్రి అవుతారన్నది, జాతీయ రాజకీయాల్లో బీఆర్ఎస్ నిర్ణయాత్మక శక్తిగా ఎదుగుతుందన్నది కేటీఆర్ రాజకీయ అంచనా మాత్రమే. ఆ అంచనాలు ఎంతవరకు నిజమవుతాయన్నది రాబోయే రాజకీయ పరిణామాలపై ఆధారపడి ఉంటుంది. [ KTR press meet, Telangana Bhavan, BRS party, Congress failures, KTR speech, Telangana politics, Bharat Rashtra Samithi,National Politics, BJP, Congress, Rahul Gandhi, Narendra Modi, Non-BJP Non-Congress Parties, Telangana Farmers, Power Cuts, El Nino Effect ]

Published on: Fri Oct 23, 2026 3:45PM

గడ్డం పెంచుకుంటే సీఎం అయిపోతారా.? కేటీఆర్‌కు బీజేపీ ఎంపీ సెటైర్లు.!

కేటీఆర్‌కు ఎవరో తప్పుడు సలహా ఇచ్చారు.. సీఎం మాత్రం కాలేరంటూ ఎద్దేవా.! తెలంగాణ రాజకీయాల్లో మరోసారి నేతల మధ్య మాటల యుద్ధం తారాస్థాయికి చేరింది. అధికార, ప్రతిపక్ష పార్టీల మధ్య విమర్శలు, ప్రతివిమర్శలు జోరుగా సాగుతున్నాయి. ఇదే క్రమంలో బీజేపీ నేత చేసిన వ్యాఖ్యలు ప్రస్తుతం రాష్ట్ర రాజకీయ వర్గాల్లో తీవ్ర చర్చనీయాంశంగా మారాయి. నిజామాబాద్‌లో ఏర్పాటు చేసిన మీడియా సమావేశంలో పాల్గొన్న ఇందూర్ ఎంపీ ధర్మపురి అర్వింద్ ప్రత్యర్థులపై తీవ్ర స్థాయిలో విరుచుకుపడ్డారు. ముఖ్యంగా రాష్ట్రంలో మారుతున్న రాజకీయ సమీకరణాలపై ఆయన తనదైన శైలిలో విశ్లేషణలు అందించారు. ఏ పార్టీతోనూ పొత్తు పెట్టుకునే ప్రసక్తే లేదని స్పష్టం చేశారు. ఈ సందర్భంగా బీఆర్ఎస్ వర్కింగ్ ప్రెసిడెంట్ కేటీఆర్ లక్ష్యంగా అర్వింద్ చేసిన వ్యాఖ్యలు అందరి దృష్టిని ఆకర్షించాయి. కేటీఆర్ తన లుక్ మార్చడంపై వ్యంగ్యాస్త్రాలు సంధిస్తూ ఎద్దేవా చేశారు. గడ్డం పెంచుకుంటే ఎవరైనా ముఖ్యమంత్రి అయిపోతారా అంటూ ఆయన ప్రశ్నించారు. గతంలోనూ కొందరు నేతలు ముఖ్యమంత్రి పదవిని ఆశించి ఇలాంటి ప్రయత్నాలు చేశారని అర్వింద్ గుర్తుచేశారు. అప్పట్లో ఉత్తమ్‌కుమార్ రెడ్డి సైతం గడ్డం పెంచిన విషయాన్ని ప్రస్తావించారు. అయితే అలా చేయడం వల్ల నాయకుల గడ్డం పెరిగింది తప్ప పార్టీలు అధికారంలోకి రాలేదని చురకలంటించారు. ఇదే సమయంలో గత బీఆర్ఎస్ పాలన తీరుపైనా ఆయన విమర్శలు గుప్పించారు. గతంలో సెంటిమెంట్లు, సలహాల పేరుతో తీసుకున్న నిర్ణయాలను ప్రస్తావిస్తూ కేసీఆర్ పై కూడా సెటైర్లు వేశారు. పాత సచివాలయానికి వెళ్తే ముఖ్యమంత్రి పదవి పోతుందనే మూఢనమ్మకంతోనే కొత్త సచివాలయాన్ని నిర్మించారని ఆరోపించారు. ప్రస్తుత కాంగ్రెస్ ప్రభుత్వంపై కూడా ఆయన విమర్శల వర్షం కురిపించారు. రాష్ట్రంలో కాంగ్రెస్, బీఆర్ఎస్ పార్టీలు అంతర్గతంగా కలిసిపోయి రాజకీయాలు నడుపుతున్నాయని ఆరోపించారు. కాంగ్రెస్ హైకమాండ్ ప్రస్తుత ముఖ్యమంత్రి పనితీరుపై తీవ్ర అసంతృప్తితో ఉందని ఆయన పేర్కొన్నారు. రాబోయే అసెంబ్లీ ఎన్నికల్లో రాష్ట్రంలో రాజకీయ సమీకరణాలు పూర్తిగా మారిపోతాయని ఎంపీ అర్వింద్ జోస్యం చెప్పారు. 2028 ఎన్నికల్లో తెలంగాణ గడ్డపై కాషాయ జెండా ఎగరడం ఖాయమని, బీజేపీ అధికారంలోకి రావడం తథ్యమని ధీమా వ్యక్తం చేశారు. డిజిటల్, మీడియా వేదికలుగా రానున్న రోజుల్లో మరింత దూకుడుగా వ్యవహరిస్తామని హెచ్చరించారు. [ MP Dharmapuri Aravind, KTR, BJP Telangana, BRS Party, Telangana Politics, 2028 Assembly Elections, CM Revanth reddy, KCR, Telugu One news, Telugu News ]

Published on: Thu Oct 22, 2026 4:15PM

ప్రియుడి మోజులో పడి భర్త మర్మాంగాన్ని కోసి హత్య చేసిన భార్య.!

జీవితాంతం కలిసుంటామని మూడు ముళ్ల బంధంతో ఒక్కటైన దంపతుల మధ్య వివాహేతర సంబంధం చిచ్చు పెట్టింది. తన సంబంధానికి భర్త అడ్డుగా మారాడని భావించిన ఓ మహిళ.. అతడిపై కక్ష పెంచుకుని చివరకు ప్రాణాలు తీసినట్లు పోలీసుల విచారణలో వెల్లడైంది. మద్యం మత్తులో జరిగిన ఘర్షణ కాస్తా హత్యకు దారితీసిన ఘటన మహబూబ్‌నగర్‌ జిల్లాలో కలకలం రేపింది. నవాబ్‌పేట మండలం తిగులపల్లి గ్రామానికి చెందిన పెద్దమోని శ్రీను (50)కు లక్ష్మమ్మతో 24 ఏళ్ల క్రితం వివాహమైంది. ఈ దంపతులకు ఇద్దరు కుమారులు ఉన్నారు. జీవనోపాధి కోసం మహబూబ్‌నగర్‌కు వచ్చిన వీరు హనుమాన్‌నగర్‌లో నివాసముంటూ కూలి పనులు చేసుకుంటున్నారు. అయితే లక్ష్మమ్మకు మద్యపానం అలవాటుతోపాటు మరో వ్యక్తితో పరిచయం ఏర్పడింది. ఆ పరిచయం వివాహేతర సంబంధానికి దారితీసింది. ఈ విషయం తెలుసుకున్న శ్రీను భార్యను నిలదీయడంతో ఇద్దరి మధ్య తరచూ గొడవలు జరిగేవి. తన వ్యక్తిగత సంబంధానికి భర్త అడ్డుగా ఉన్నాడని భావించిన లక్ష్మమ్మ అతడిపై అసహనం పెంచుకున్నది. ఈ నేపథ్యంలోనే దంపతుల మధ్య విభేదాలు మరింత తీవ్రమయ్యాయి. 19వ తేదీన భార్యాభర్తల మధ్య గొడవ జరిగిన అనంతరం భర్త శీను మరణించాడు.. రంగంలోకి దిగిన పోలీసులు కేసు నమోదు చేసుకుని దర్యాప్తు కొనసాగిస్తుండగా భార్య లక్ష్మమ్మపై అనుమానం వచ్చి ఆమెను అదుపులోకి తీసుకొని విచారణ చేయడంతో విస్సుపోయే విషయాలు వెలుగులోకి వచ్చాయి. ఈ నెల 19వ తేదీ రాత్రి శ్రీను, లక్ష్మమ్మ ఇద్దరూ మద్యం సేవించారు. ఈ క్రమంలో మరోసారి వారి మధ్య వాగ్వాదం చోటుచేసుకుంది. గొడవ తీవ్రం కావడంతో లక్ష్మమ్మ భర్తను బలంగా తోసివేసింది. కిందపడిపోయిన శ్రీనుపై ఆమె దాడికి పాల్పడింది.భర్త మర్మాంగాలపై తీవ్రంగా దాడి చేయడంతోపాటు, సమీపంలో ఉన్న అద్దాన్ని పగలగొట్టి దాని ముక్కతో మర్మంగాన్ని కోసి వేసింది. అంతేకాకుండా అతడి కంటిలో బలంగా పొడిచింది. దీంతో తీవ్ర గాయాలతో శ్రీను అక్కడికక్కడే మృతిచెందాడు. భర్త మరణించిన అనంతరం లక్ష్మమ్మ అక్కడినుంచి వెళ్లిపోయింది. ఈ ఘటన వెలుగులోకి రావడంతో వెంటనే పోలీసులు లక్ష్మమ్మను అరెస్టు చేసి రిమాండ్‌కు తరలించారు. వివాహేతర సంబంధం నేపథ్యంలో చోటుచేసుకున్న ఈ ఘటన స్థానికంగా చర్చనీయాంశమైంది. [ Mahabubnagar Crime, Wife Kills Husband, Extramarital Affair, Illegal Relationship, Husband Murder Case, Telangana Crime News, Nawabpet Mandal, Tigulapalli Village, Lakshmamma, Pedda Moni Srinu, Domestic Dispute, Brutal Murder, Crime News Telugu, Telangana Police ]

Published on: Thu Oct 22, 2026 3:37PM

హైదరాబాద్ లో రియల్ సంక్షోభం: నిర్మాణాలు వేగం.. కొనుగోళ్లు దాదాపు శూన్యం.!

హైదరాబాద్ రియల్ ఎస్టేట్‌ రంగం కనీవినీ ఎరుగనిసంక్షోభాన్ని ఎదుర్కొంటున్నది. నిర్మాణాలు వేగంగా జరుగుతున్నా.. ఇళ్లు అమ్ముడుపోక రియల్ రంగం కుదేలౌతోంది. విశ్వనగరంలో రియల్ ఎస్టేట్ రంగం పెను సవాళ్లు ఎదుర్కొంటోంది. గత కొన్నేళ్లుగా వేగంగా విస్తరించిన నివాస గృహాల నిర్మాణాలు ఇప్పుడు కొనుగోలుదారులు లేక వెతలెలబోతున్నాయి. ప్రజలు ఇళ్లను కొనుగోలు చేసే వేగం కంటే కూడా రియల్ ఎస్టేట్ డెవలపర్లు నూతన ప్రాజెక్టులను నిర్మించే వేగమే ఎక్కువగా కనిపిస్తోంది. ఈ పరిస్థితి బిల్డర్లలోనూ, రియల్టర్లలోనూ తీవ్ర కలకలం రేపుతోంది. గృహాల సరఫరా, డిమాండ్ మధ్య ఏర్పడిన ఈ గ్యాప్ హైదరాబాద్ హౌసింగ్ మార్కెట్‌ను ఒత్తిడిలో పడేస్తోంది. అందుబాటులో ఉన్న గణాంకాలు, నివేదికలు, సమాచారం మేరకు హైదరాబాద్ వ్యాప్తంగా రమారమి 29.6 కోట్ల చదరపు అడుగుల నివాస స్థలం విక్రయాలు జరగకుండా నిలిచిపోయింది. దేశవ్యాప్తంగా ప్రధాన నగరాల్లో అమ్ముడుపోకుండా మిగిలిపోయిన మొత్తం గృహ నిర్మాణ విస్తీర్ణంలో హైదరాబాద్ వాటా దాదాపు 30 శాతాం. ఇది హైదరాబాద్ రియల్ ఎస్టేట్ చరిత్రలోనే ఎన్నడూ లేని పరిణామమని పరిశీలకులు విశ్లేషిస్తున్నారు. నగరంలోని పశ్చిమ భాగంతో పాటు ఐటీ కారిడార్లు, ఔటర్ రింగ్ రోడ్డు పరిసర ప్రాంతాల్లో గడిచిన ఐదేళ్లలో భారీ ఎత్తున హైరైజ్ అపార్ట్‌మెంట్లు, విల్లాలు నిర్మితమయ్యాయి. డెవలపర్లు డిమాండ్‌ను మించి సరికొత్త ప్రాజెక్టులను ప్రారంభించడం.. నిర్మాణ వ్యయాలు పెరగడం వల్ల ఇళ్ల ధరలు విపరీతంగా పెరిగిపోయాయి. ప్రస్తత దయనీయ స్థితికి ఇదే కారణమని అంటున్నారు. సాధారణ, మధ్యతరగతి కొనుగోలుదారుల శక్తికి మించి ప్రాజెక్టుల ధర ఉండటం వల్ల విక్రయాలు మందగించాయని చెబుతున్నారు.మరోవైపు గృహ రుణాలపై వడ్డీ రేట్లు పెరగడం, అంతర్జాతీయ ఆర్థిక పరిస్థితులు కారణంగా ఐటీ ఉద్యోగుల్లో తమ ఉద్యోగాల కొనసాగింపు పట్ల వ్యక్తమౌతున్న అనిశ్చితి కూడా కొత్త కొనుగోళ్లు మందగించడానికి కారణంగా పరిశీలకులు విశ్లేషిస్తున్నారు. నివాస గృహాలను వేగంగా పూర్తి చేయడంపై చూపిన శ్రద్ధ, మార్కెట్ కొనుగోలు సామర్థ్యాన్ని అంచనా వేయడంలో ప్రదర్శించకపోవడంతోనే ఈ స్థాయిలో కోట్ల చదరపు అడుగుల స్థలం ఖాళీగా ఉండిపోయిందంటున్నారు. గతంలో హైదరాబాద్ నగరం తక్కువ ధరలో మెరుగైన మౌలిక వసతులతో కూడిన నివాసాలను అందించే ప్రాంతంగా ప్రత్యేక గుర్తింపు ఉండేది. కానీ ఇటీవల ప్రైమింగ్ వ్యూహాలు, విలాసవంతమైన ప్రాజెక్టులపై రియల్టర్లు, బిల్డర్లు అతిగా దృష్టి సారించడం వల్ల ధరలు విపరీతంగా పెరిగి.. ఇళ్లు కొనుగోలు అంటేనే సాధారణ, మధ్య తరగతి, వేతన జీవులు వణికిపోయే పరిస్థితి ఏర్పడింది. దీంతో ఇప్పటికిప్పుడు ఇళ్లు కొనడం కంటే వేచి చూడటమే మేలన్న అభిప్రాయానికి ప్రజలు వచ్చేశారు. ఈ కారణంగానే రెడీ టు ఆక్యుపై స్థాయిలో ఉన్న గృహాలను కొనడానికి కూడాపెద్దగా ఎవరూ ముందుకు రావడంలేదు. ఈ కారణంగా రియల్ ఎస్టేట్, నిర్మాణ రంగంలో పెట్టుబడులు పెట్టిన బిల్డర్లు, ఆర్థిక సంక్షోభంలో కూరుకుపోతున్న పరిస్థితి నెలకొంది. బ్యాంకుల వద్ద తీసుకున్న రుణాలకు వడ్డీల భారం పెరగడంతో పాటు, రాబోయే రోజుల్లో కొత్త ప్రాజెక్టులు ప్రారంభించేందుకు అవసరమైన మూలధనం కొరతను బిల్డర్లు ఎదుర్కొంటున్నారు. డెవలపర్లు తమ వ్యాపార వ్యూహాలను మార్చుకుంటేనే ఈ పరిస్తితి నుంచి గట్టెక్కే అవకాశం ఉంటుందని పరిశీలకులు అంటున్నారు. గృహాల ధరల్లో సవరణలు చేయడం, కొనుగోలుదారులను ఆకట్టుకునేలా రాయితీలు ప్రకటించడం, అందుబాటు ధరల ప్రాజెక్టులపై దృష్టి సారించడం ద్వారా మాత్రమే ఈ పరిస్థితిని అధిగమించడానికి వీలౌతుందని విశ్లేషిస్తున్నారు. లేకుంటే ముందు ముందు హైదరాబాద్ ప్రాపర్టీ మార్కెట్‌లో ధరల తగ్గుదల అనివార్యమౌతుందంటున్నారు. [Crisis in Hyderabad Real Estate, Unsold Housing, Hyderabad Residential Property, Real Estate Demand Supply, Hyderabad Housing Market, Telugu One]

Published on: Thu Oct 22, 2026 10:35AM

సమ్మక్క, సారక్క గుడి కూల్చివేత: భద్రాద్రి కొత్తగూడెం జిల్లాలో దుండగుల దుశ్చర్య.!

భద్రాద్రి కొత్తగూడెం జిల్లా అనంతోగు గ్రామ పంచాయతీ శివారు ప్రాంతంలో కొలువుదీరిన వనదేవతలు సమ్మక్క-సారక్క గుడిని దుండగులు ధ్వంసం చేయడం కలకలం సృష్టించింది. ఈ సంఘటన స్థానికంగా తీవ్ర ఉద్రిక్తత పరిస్థితికి కారణమైంది. స్థానికంగా తీవ్ర ఆందోళనకు దారి తీసింది. వనదేవతలు పూజలందుకునే గుడిని గుర్తుతెలియని వ్యక్తులు కూల్చివేయడం పట్ల భక్తులు, గిరిజనులు ఆగ్రహం వ్యక్తం చేస్తున్నారు. గ్రామ శివారులో వెలసిన ఈ ఆలయంలో స్థానికులు నిత్యం పూజలు చేస్తుంటారు. అటువంటి సమ్మక్క-సారక్క గద్దెలను, గుడిని కూల్చివేత పట్ల భక్తుు ఆగ్రహం వ్యక్తం చేస్తున్నారు. విషయం తెలుసుకున్న స్థానికులు పెద్ద సంఖ్యలో ఘటనా స్థలికి చేరుకున్నారు. ఈ ఘటనపై క పోలీసులు ఘటనా స్థలాన్ని పరిశీలించి, ఆలయాన్ని ధ్వంసం చేసిన నిందితుల కోసం గాలింపు చర్యలు ముమ్మరం చేశారు. శాంతిభద్రతలకు విఘాతం కలిగించే ఇలాంటి చర్యలకు పాల్పడే వారిపై చట్టపరంగా కఠిన చర్యలు తీసుకోవాలని స్థానికులు, ప్రజా సంఘాల నాయకులు డిమాండ్ చేస్తున్నారు. [Sammakka Sarakka Temple Destroyed Ananthogu, Bhadradri Kothagudem District, Destruction Sammakka Sarakka Temple, Telugu One]

Published on: Wed Oct 21, 2026 9:53AM