Telangana News | Latest Telangana News, Politics & Updates

పర్సు నాటకం.. నకిలీ బంగారు బిస్కెట్.. అసలు గొలుసుతో పరార్.!

ఐదు తులాల బంగారం ఆశ.. రెండున్నర తులాల గొలుసు స్వాహా.! బంగారం ఆశ చూపించి.. అసలు బంగారాన్నే కాజేసే కొత్త తరహా మోసం. కూరగాయలు కొనడానికి మార్కెట్‌కు వెళ్లిన ఓ మహిళను ముగ్గురు కిలాడీ మహిళలు పక్కా ప్లాన్‌తో బురిడీ కొట్టించారు. మొదట మాటలు కలిపారు.. ఆ తర్వాత పర్సు పోయిందంటూ నాటకానికి తెరతీశారు. చివరికి ఐదు తులాల బంగారు బిస్కెట్ ఉందంటూ ఆశ చూపించి, బాధితురాలి మెడలోని అసలు బంగారు గొలుసుతో ఉడాయించారు. అయితే ఈ ముఠా ఆటలు ఎంతోకాలం సాగలేదు. పోలీసుల దర్యాప్తులో వారి బండారం బయటపడింది. సీసీ కెమెరాలు, సాంకేతిక ఆధారాలతో గాలించిన పోలీసులు ముగ్గురు మహిళలను పట్టుకున్నారు. వారి నుంచి వివిధ కేసులకు సంబంధించిన మొత్తం 9.5 తులాల బంగారాన్ని స్వాధీనం చేసుకున్నారు. పర్సు పోయిందంటూ నాటకం.. బంగారం ఆశ చూపించి మోసం.! ఈ ఘటన నవంబర్ 5న రాత్రి 9.30 గంటల సమయంలో హైదరాబాద్‌లోని నార్త్ లాలాగూడ కూరగాయల మార్కెట్‌లో జరిగింది. ఓ మహిళ కూరగాయలు కొనుగోలు చేసేందుకు మార్కెట్‌కు వెళ్లింది. ఇదే అదనుగా భావించిన 40 నుంచి 45 ఏళ్ల వయసున్న ఓ మహిళ ఆమె వద్దకు వచ్చి మాటలు కలిపింది. కొద్దిసేపటికే కింద పడి ఉన్న ఓ పర్సును చూపిస్తూ.. అందులో విలువైన వస్తువులు ఉండొచ్చని నమ్మించింది. ఇంతలో మరో మహిళ అక్కడికి వచ్చి తన పర్సు పోయిందంటూ వెతకడం మొదలుపెట్టింది. మొదటి మహిళ పర్సు దొరకలేదని చెప్పడంతో ఆమె అక్కడి నుంచి వెళ్లిపోయింది. అయితే వెళ్తూ వెళ్తూ తన పర్సులో ఐదు తులాల బంగారు బిస్కెట్ ఉందని చెప్పింది. దీంతో బాధితురాలి ఆసక్తి ఆ పర్సుపై పడింది. తెరిచి చూడగా అందులో బంగారు బిస్కెట్ కనిపించింది. వెంటనే మొదటి మహిళ మరో ఎత్తుగడ వేసింది. ఆ బంగారాన్ని ఇద్దరం సమానంగా పంచుకుందామని బాధితురాలికి ఆశ చూపించింది. అప్పటికే బంగారం చేతికి వస్తుందన్న ఆశతో ఉన్న బాధితురాలు వారి మాటలను నమ్మింది. బంగారం అమ్మిస్తానంటూ మరో ఎంట్రీ.. గొలుసుతో పరార్.! ఇద్దరూ ఏం చేయాలా అని ఆలోచిస్తున్న సమయంలో మరో మహిళ అక్కడికి వచ్చింది. బంగారాన్ని ఎక్కడ అమ్మవచ్చని ఆమెను అడగగా.. తనకు తెలిసిన దుకాణంలో ఉదయం అమ్మిపెడతానని నమ్మించింది. అయితే అందుకు ఓ షరతు పెట్టింది. బంగారు బిస్కెట్‌ను బాధితురాలి వద్దే ఉంచి, బదులుగా ఆమె మెడలో ఉన్న రెండున్నర తులాల బంగారు గొలుసును తమకు ఇవ్వాలని కోరింది. బంగారం అమ్మిన తర్వాత గొలుసును తిరిగి ఇచ్చేస్తామని హామీ ఇచ్చింది. ఐదు తులాల బంగారం దక్కుతుందన్న ఆశతో బాధితురాలు తన మెడలోని అసలు బంగారు గొలుసును వారికి అప్పగించింది. గొలుసు చేతికి చిక్కగానే ముగ్గురూ అక్కడి నుంచి మాయమయ్యారు. వారు ఇచ్చిన ఫోన్ నంబర్ పనిచేయకపోవడం, పర్సులోని బంగారు బిస్కెట్ కూడా నకిలీదని తేలడంతో బాధితురాలికి అసలు విషయం అర్థమైంది. ఆశ చూపించి తనను మోసం చేశారని తెలుసుకుని వెంటనే లాలాగూడ పోలీసులను ఆశ్రయించింది. సీసీ కెమెరాలతో చిక్కిన ముఠా.. లాలాపేట్ వద్ద అరెస్ట్.! బాధితురాలి ఫిర్యాదుతో పోలీసులు BNS సెక్షన్లు 303(2), 318(2) కింద కేసు నమోదు చేసి దర్యాప్తు చేపట్టారు. నేరం జరిగిన ప్రాంతంతో పాటు నిందితులు వెళ్లిన మార్గాల్లోని సీసీ కెమెరాలను పరిశీలించారు. సాంకేతిక ఆధారాలను విశ్లేషించి ఈ మోసానికి పాల్పడింది పాత నేర చరిత్ర కలిగిన మహిళల ముఠాగా గుర్తించారు.దీంతో పోలీసులు నిఘా ముమ్మరం చేశారు. మరోసారి ఇలాంటి నేరానికి పాల్పడేందుకు వచ్చిన ముగ్గురు మహిళలను నవంబర్ 13న లాలాపేట్‌లోని కల్లు దుకాణం వద్ద అదుపులోకి తీసుకున్నారు. ముగ్గురి నేర చరిత్ర తెలిస్తే ఆశ్చర్యపోవాల్సిందే.! పోలీసులు అరెస్టు చేసిన మహిళలను చెల్ల నర్సమ్మ (49), వేముల లక్ష్మి (43), కొమెర అంజలి (45)గా గుర్తించారు.- చెల్ల నర్సమ్మ: రాజేంద్రనగర్‌కు చెందిన ఈమెపై రాజేంద్రనగర్, నార్సింగి, నిజామాబాద్, శంషాబాద్, నారాయణపేట పోలీస్ స్టేషన్ల పరిధిలో సుమారు 18 కేసులు నమోదయ్యాయి.- వేముల లక్ష్మి: బోరబండకు చెందిన ఈమెపై సనత్‌నగర్, బాలానగర్, నిజామాబాద్, జగిత్యాల, నారాయణపేట పోలీస్ స్టేషన్ల పరిధిలో సుమారు 17 కేసులు ఉన్నాయి. కొమెర అంజలి: గోల్కొండలోని హిమాయత్‌సాగర్ వడ్డెర బస్తీకి చెందిన ఈమెకు యాదగిరిగుట్ట, ఉప్పల్, కుషాయిగూడ, లాలాగూడ పోలీస్ స్టేషన్ల పరిధిలో నమోదైన కేసులతో సంబంధం ఉన్నట్లు పోలీసులు గుర్తించారు. జైలు నుంచి వచ్చినా మారని బుద్ధి.. మళ్లీ అదే దందా.! విచారణలో నిందితులు పలు కీలక విషయాలు వెల్లడించినట్లు పోలీసులు తెలిపారు. నర్సమ్మ, లక్ష్మి గతంలో వికారాబాద్ పోలీస్ స్టేషన్ పరిధిలో నమోదైన కేసులో అరెస్టయి జైలుకు వెళ్లారు. ఈ ఏడాది మార్చి 14న విడుదలయ్యారు. అయితే జైలు నుంచి బయటకు వచ్చిన తర్వాత కూడా వారి తీరు మారలేదు. లాలాగూడలో జరిగిన తాజా మోసంతో పాటు యాదగిరిగుట్ట, ఉప్పల్, కుషాయిగూడ తదితర ప్రాంతాల్లోనూ ఇదే తరహాలో మహిళల దృష్టి మరల్చి బంగారు ఆభరణాలను కాజేసినట్లు విచారణలో వెల్లడైంది. దొంగిలించిన బంగారాన్ని వివిధ బంగారు దుకాణాల్లో విక్రయించినట్లు పోలీసులు గుర్తించారు. 9.5 తులాల బంగారం స్వాధీనం.. ముగ్గురికి రిమాండ్.! ముగ్గురు మహిళల నుంచి లాలాగూడ కేసుకు సంబంధించిన రెండున్నర తులాల బంగారు గొలుసుతో పాటు ఇతర కేసులకు సంబంధించిన ఆభరణాలను కలిపి మొత్తం 9.5 తులాల బంగారాన్ని పోలీసులు స్వాధీనం చేసుకున్నారు. నవంబర్ 13న నిందితులను కోర్టులో హాజరుపరచగా, న్యాయస్థానం ఆదేశాల మేరకు చంచల్‌గూడ మహిళా జైలుకు రిమాండ్‌పై తరలించారు. ముగ్గురు కలిసి పన్నిన పక్కా నాటకం.. అమాయకంగా నమ్మిన మహిళకు బంగారం నష్టం.. చివరకు పోలీసుల నిఘాతో కిలాడీ ముఠా కటకటాల వెనక్కి చేరింది. మార్కెట్లు, రద్దీ ప్రాంతాల్లో అపరిచితులు చూపించే ఇలాంటి అత్యాశపూరిత ఆఫర్ల పట్ల అప్రమత్తంగా ఉండాలని ఈ ఘటన మరోసారి హెచ్చరిస్తోంది. మీకు నచ్చవచ్చు: Under 19 Asia Cup: పాక్‌పై చివరి బంతికి భారత్ థ్రిల్లింగ్ విక్టరీ..కప్ మనదే.! [ Lalaguda Police, Hyderabad Crime, Gold Chain Theft, Fake Gold Biscuit, Women Gang, Gold Cheating, Purse Drama, Gold Fraud, Chilkalguda Police, Lalapet Arrest, Telangana Police ]

Published on: Sat Nov 14, 2026 7:30PM

తెలంగాణలో పాలసీ పెరాలసీ లేదు..పెట్టుబడులకు సంపూర్ణ భద్రత: సీఎం రేవంత్

తెలంగాణలో పెట్టుబడులు పెట్టేందుకు వచ్చే పారిశ్రామికవేత్తలకు ప్రభుత్వం పూర్తి సహకారం అందిస్తుందని ముఖ్యమంత్రి ఎ. రేవంత్ రెడ్డి స్పష్టం చేశారు. రాష్ట్రంలో పాలసీ పెరాలసీ లేదని, పెట్టుబడులకు సంపూర్ణ భద్రత కల్పిస్తామని భరోసా ఇచ్చారు. పరిశ్రమల ఏర్పాటుకు అవసరమైన భూములు, నీళ్లు, అనుమతులు, మౌలిక సదుపాయాలను అందించేందుకు ప్రభుత్వం ప్రత్యేక విధానాలు రూపొందించిందని తెలిపారు. విద్య, వైద్యం, పారిశ్రామిక, సేవారంగాల అభివృద్ధికి తమ ప్రభుత్వం అత్యంత ప్రాధాన్యత ఇస్తోందని చెప్పారు. తెలంగాణను ప్రపంచస్థాయి ఆర్థిక శక్తిగా తీర్చిదిద్దడమే తమ లక్ష్యమని సీఎం పేర్కొన్నారు. 2034 నాటికి లక్ష కోట్ల డాలర్ల ఆర్థిక వ్యవస్థగా, 2047 నాటికి మూడు లక్షల కోట్ల డాలర్ల ఆర్థిక వ్యవస్థగా రాష్ట్రాన్ని అభివృద్ధి చేయాలని సంకల్పించామని వెల్లడించారు. దేశ జీడీపీలో తెలంగాణ వాటాను 10 శాతానికి పెంచేందుకు కృషి చేస్తున్నామని తెలిపారు. హైదరాబాద్‌కు అంతర్జాతీయ స్థాయిలో గుర్తింపు రావడంలో ఐఎస్‌బీ, నల్సార్ వంటి ప్రతిష్ఠాత్మక విద్యాసంస్థలు కీలక పాత్ర పోషించాయని రేవంత్ రెడ్డి అన్నారు. వైద్య రంగంలోనూ హైదరాబాద్‌కు ప్రపంచస్థాయి గుర్తింపు తీసుకురావడంలో పీహెచ్‌ఎఫ్‌ఐ వంటి సంస్థలు దోహదపడతాయని ఆశాభావం వ్యక్తం చేశారు. సనత్‌నగర్ టిమ్స్ ఆస్పత్రిని ఇప్పటికే ప్రారంభించామని, మిగతా టిమ్స్ ఆస్పత్రులను కూడా అందుబాటులోకి తీసుకొస్తామని చెప్పారు. గోషామహల్‌లో కొత్త ఉస్మానియా ఆస్పత్రి నిర్మాణం చేపడుతున్నామని, ఆస్పత్రుల అభివృద్ధి కోసం మొత్తం రూ.12 వేల కోట్లు ఖర్చు చేస్తున్నామని వెల్లడించారు. దేశంతో పాటు మధ్యప్రాచ్య, ఆసియా దేశాలకు చెందిన పెట్టుబడిదారులు కూడా హైదరాబాద్ వైపు చూస్తున్నారని సీఎం తెలిపారు. గత నాయకులు తీసుకున్న దూరదృష్టితో కూడిన నిర్ణయాలే నేటి హైదరాబాద్ అభివృద్ధికి పునాదులని పేర్కొన్నారు. స్వాతంత్య్రం వచ్చిన సమయంలో దేశంలో అక్షరాస్యత కేవలం 12 శాతం మాత్రమే ఉండేదని, ఆహార కొరతతో ప్రజలు ఇబ్బందులు ఎదుర్కొన్నారని గుర్తుచేశారు. అప్పటి ప్రధాని జవహర్‌లాల్ నెహ్రూ విద్య, నీటిపారుదల రంగాలకు ప్రాధాన్యత ఇచ్చారని, ఐఐటీ ఖరగ్‌పూర్ వంటి ప్రతిష్ఠాత్మక సంస్థలకు పునాదులు వేశారని చెప్పారు. శ్రీశైలం, భాక్రా నంగల్ వంటి ప్రాజెక్టుల నిర్మాణంతో వ్యవసాయానికి నీటి వసతి పెరిగి, దేశం ఆహార కొరత నుంచి మిగులు ధాన్యాల స్థాయికి చేరుకుందని వివరించారు. సాంకేతిక రంగంలో రాజీవ్ గాంధీ తీసుకొచ్చిన మార్పులు దేశంలో ఐటీ రంగం అభివృద్ధికి బాటలు వేశాయని రేవంత్ రెడ్డి అన్నారు. హైదరాబాద్ పబ్లిక్ స్కూల్‌లో చదువుకున్న అనేక మంది విద్యార్థులు ప్రపంచంలోని ప్రముఖ ఫార్చ్యూన్ 500 కంపెనీల్లో ఉన్నత పదవుల్లో రాణిస్తున్నారని గుర్తుచేశారు. దేశంలోని ప్రతి గ్రామానికి విద్య చేరినా, నాణ్యమైన విద్యను అందించడంపై ఇంకా ప్రత్యేక దృష్టి పెట్టాల్సిన అవసరం ఉందన్నారు. తెలంగాణ పిల్లలు ప్రపంచంతో పోటీపడాలి: సీఎం రేవంత్.! తెలంగాణలోని మారుమూల గ్రామంలో చదువుకునే విద్యార్థి సైతం న్యూయార్క్ వరల్డ్ ట్రేడ్ సెంటర్‌లో పనిచేసే వారితో పోటీపడే స్థాయికి ఎదగాలని ముఖ్యమంత్రి రేవంత్ రెడ్డి ఆకాంక్షించారు. పీవీ నరసింహారావు తీసుకొచ్చిన ఆర్థిక సంస్కరణలు దేశానికి కొత్త దిశను చూపాయని అన్నారు. గతంలో చంద్రబాబు, వైఎస్ రాజశేఖరరెడ్డి, కేసీఆర్ ప్రభుత్వాలు అమలు చేసిన మంచి విధానాలను తమ ప్రభుత్వం కూడా కొనసాగిస్తోందని స్పష్టం చేశారు. రాజకీయంగా, వ్యక్తిగతంగా విభేదాలు ఉన్నప్పటికీ.. రాష్ట్ర అభివృద్ధికి ఉపయోగపడే విధానాలను కొనసాగించాలన్నదే తమ అభిమతమని చెప్పారు. పెట్టుబడిదారులు, విద్యాసంస్థల విషయంలో తమ ప్రభుత్వానికి ఎలాంటి వివక్ష లేదని సీఎం పేర్కొన్నారు. ప్రపంచ ప్రఖ్యాత విశ్వవిద్యాలయాలు హైదరాబాద్‌లో తమ కేంద్రాలను ఏర్పాటు చేస్తున్నాయని, తద్వారా అంతర్జాతీయ స్థాయి విద్య స్థానికంగానే అందుబాటులోకి వస్తోందని తెలిపారు. తెలంగాణను 2047 నాటికి అభివృద్ధి చెందిన రాష్ట్రంగా తీర్చిదిద్దేందుకు 'తెలంగాణ రైజింగ్ 2047' విజన్‌ను రూపొందించామని వెల్లడించారు. హైదరాబాద్ అభివృద్ధిలో ఔటర్ రింగ్ రోడ్డు (ఓఆర్ఆర్) కీలక పాత్ర పోషిస్తోందని, దాని పరిధిలో సుమారు కోటి 34 లక్షల మంది నివసిస్తున్నారని సీఎం తెలిపారు. ఓఆర్ఆర్ లోపల ఉన్న పరిశ్రమలను బయటకు తరలిస్తూ.. ఈ ప్రాంతాన్ని సేవారంగానికి ప్రధాన కేంద్రంగా అభివృద్ధి చేస్తున్నామని చెప్పారు. ఓఆర్ఆర్ అవతల రీజినల్ రింగ్ రోడ్డు (ఆర్ఆర్ఆర్) నిర్మాణం చేపడుతున్నామని, 160 కిలోమీటర్ల రహదారికి టెండర్లు పిలిచామని వెల్లడించారు. రీజినల్ రింగ్ రోడ్డు చుట్టూ సుమారు 10 వేల చదరపు కిలోమీటర్ల పరిధిలో తయారీ రంగాన్ని అభివృద్ధి చేయాలని లక్ష్యంగా పెట్టుకున్నట్లు తెలిపారు. ఆర్ఆర్ఆర్ అవతలి ప్రాంతాన్ని రేర్ (RARE) విధానంలో అభివృద్ధి చేస్తామని చెప్పారు. ప్రపంచస్థాయి దిగ్గజ కంపెనీలను తెలంగాణకు ఆహ్వానిస్తున్నామని, పెట్టుబడులకు అవసరమైన అన్ని సౌకర్యాలు కల్పిస్తామని భరోసా ఇచ్చారు. డిసెంబర్ 7, 8, 9 తేదీల్లో తెలంగాణ గ్లోబల్ సమ్మిట్ నిర్వహించనున్నట్లు ప్రకటించారు. రాష్ట్ర ఆదాయంలో సుమారు 65 శాతం హైదరాబాద్ పరిసర ప్రాంతాల నుంచే వస్తోందని రేవంత్ రెడ్డి తెలిపారు. దేశంలోనే అత్యధిక తలసరి ఆదాయం కలిగిన జిల్లాగా రంగారెడ్డి నిలిచిందని చెప్పారు. 2034 నాటికి ఒక ట్రిలియన్ డాలర్ల ఆర్థిక వ్యవస్థగా, 2047 నాటికి మూడు ట్రిలియన్ డాలర్ల ఆర్థిక వ్యవస్థగా తెలంగాణను తీర్చిదిద్దడమే తమ లక్ష్యమన్నారు. దేశ జీడీపీలో రాష్ట్ర వాటాను 10 శాతానికి పెంచేందుకు కృషి చేస్తున్నామని తెలిపారు. రాష్ట్రంలో పెట్టుబడులకు అనుకూలమైన వాతావరణం ఉందని, పారిశ్రామికవేత్తలు ఎలాంటి సందేహాలు లేకుండా పెట్టుబడులు పెట్టవచ్చని సీఎం భరోసా ఇచ్చారు. రాఫెల్ యుద్ధ విమానాలకు సంబంధించిన విడిభాగాలు కూడా హైదరాబాద్‌లోని జీఎంఆర్ పరిధిలో తయారవుతున్నాయని వెల్లడించారు. ఫార్మా రంగానికి హైదరాబాద్ కేరాఫ్.. భారీ పెట్టుబడులకు అవకాశం.! 1960వ దశకంలో నెహ్రూ, ఇందిరాగాంధీ చొరవతో హైదరాబాద్‌లో ఐడీపీఎల్ ఏర్పాటు కావడం వల్లే రాష్ట్రంలో ఫార్మా రంగానికి పునాదులు పడ్డాయని రేవంత్ రెడ్డి గుర్తుచేశారు. పరిశోధన, అభివృద్ధికి ప్రాధాన్యత ఇవ్వడం వల్ల హైదరాబాద్ ఫార్మా రంగంలో ప్రపంచస్థాయి గుర్తింపు సాధించిందన్నారు. దేశంలోని బల్క్ డ్రగ్స్ ఉత్పత్తిలో 40 శాతం హైదరాబాద్‌లోనే జరుగుతోందని తెలిపారు. ప్రపంచ ప్రఖ్యాత ఫార్మా సంస్థ ఎలీ లిల్లీ హైదరాబాద్‌లో ఒక బిలియన్ డాలర్ల పెట్టుబడి పెట్టేందుకు ముందుకొస్తోందని చెప్పారు. అనేక అంతర్జాతీయ సంస్థలు తమ గ్లోబల్ కేపబిలిటీ సెంటర్లను హైదరాబాద్‌లో ఏర్పాటు చేస్తున్నాయని వెల్లడించారు. గత ప్రభుత్వాలు తీసుకొచ్చిన పారిశ్రామిక విధానాలను తమ ప్రభుత్వం కొనసాగిస్తోందని, పెట్టుబడిదారులకు అన్ని విధాలుగా సహకరిస్తుందని స్పష్టం చేశారు. వైద్య రంగానికి రూ.12 వేల కోట్లు.. ఆరోగ్య డేటాపై ప్రత్యేక దృష్టి.! వైద్య రంగానికి తమ ప్రభుత్వం అత్యంత ప్రాధాన్యత ఇస్తోందని ముఖ్యమంత్రి రేవంత్ రెడ్డి తెలిపారు. ఆరోగ్యశ్రీ, ముఖ్యమంత్రి సహాయనిధి ద్వారా ప్రతి ఏటా సుమారు రూ.2,500 కోట్లు ఖర్చు చేస్తున్నామని వెల్లడించారు. క్యాన్సర్‌ను నోటిఫైడ్ వ్యాధిగా గుర్తించి, రాష్ట్రంలో రోగుల వివరాలను సేకరిస్తున్నామని చెప్పారు. తెలంగాణ డేటా రిచ్ స్టేట్ అని పేర్కొన్న సీఎం.. ఆరోగ్యశ్రీ ద్వారా సేకరించిన సమాచారాన్ని విశ్లేషించడం ద్వారా ఏ ప్రాంతంలో ఎలాంటి ఆరోగ్య సమస్యలు ఉన్నాయో గుర్తించవచ్చని వివరించారు. ఫ్లోరైడ్ సమస్యతో పాటు మూసీ కాలుష్యం నల్గొండ జిల్లా ప్రజల ఆరోగ్యంపై తీవ్ర ప్రభావం చూపుతోందని ఆందోళన వ్యక్తం చేశారు. ముఖ్యంగా పుట్టబోయే పిల్లల ఆరోగ్యంపైనా దుష్ప్రభావం పడుతోందని తెలిపారు. మూసీని ప్రక్షాళన చేయాల్సిన అవసరం ఉందని, నల్గొండ ప్రజల ఆరోగ్యాన్ని కాపాడాలంటే మూసీ శుద్ధి తప్పనిసరని సీఎం స్పష్టం చేశారు. పర్యావరణ పరిరక్షణతో పాటు ప్రజారోగ్యానికి ప్రభుత్వం పెద్దపీట వేస్తుందని చెప్పారు. 2028 జూన్ 2 నాటికి పీహెచ్‌ఎఫ్‌ఐ ప్రాజెక్టు పూర్తి.! పీహెచ్‌ఎఫ్‌ఐ ప్రాజెక్టును 2028 జూన్ 2 నాటికి పూర్తి చేయాలని లక్ష్యంగా పెట్టుకున్నామని రేవంత్ రెడ్డి వెల్లడించారు. ఈ సంస్థ ఏర్పాటుకు ప్రభుత్వం అన్ని విధాలుగా సహకరిస్తుందని హామీ ఇచ్చారు. పీహెచ్‌ఎఫ్‌ఐ ద్వారా హైదరాబాద్‌కు అంతర్జాతీయ స్థాయిలో మరింత గుర్తింపు లభిస్తుందని ఆశాభావం వ్యక్తం చేశారు. ఈ సంస్థ అభివృద్ధికి అవసరమైన సహకారాన్ని అందించడంతో పాటు, తాను స్వయంగా బ్రాండ్ అంబాసిడర్‌గా వ్యవహరిస్తానని ముఖ్యమంత్రి ప్రకటించారు. విద్య, వైద్యం, పరిశ్రమలు, మౌలిక సదుపాయాల రంగాల్లో సమగ్ర అభివృద్ధితో తెలంగాణను ప్రపంచస్థాయి పెట్టుబడుల గమ్యస్థానంగా తీర్చిదిద్దడమే తమ ప్రభుత్వ లక్ష్యమని రేవంత్ రెడ్డి పునరుద్ఘాటించారు. మీకు నచ్చవచ్చు: తెలంగాణ కాంగ్రెస్‌‌కు కొత్త ఇన్‌ఛార్జ్‌.! [ Telangana Rising 2047, CM Revanth Reddy, Telangana Investments, Policy Paralysis, Telangana Global Summit 2026, One Trillion Dollar Economy, Three Trillion Dollar Economy, Telangana Development ]

Published on: Sat Nov 14, 2026 7:14PM

8 బిలియన్ డాలర్ల నుంచి 140 బిలియన్ డాలర్లకు.. అదానీ ఆస్తులు ఎలా పెరిగాయి: రాహుల్ గాంధీ

భారత రాజకీయాల్లో దేశంలోనే అత్యంత సంపన్నుల ఎదుగుదలపై, ముఖ్యంగా పారిశ్రామిక దిగ్గజం గౌతమ్ అదానీ అసాధారణ ప్రగతిపై లోక్‌సభ ప్రతిపక్ష నేత రాహుల్ గాంధీ మరోసారి తీవ్ర స్థాయిలో విరుచుకుపడ్డారు. కేంద్రంలోని బీజేపీ ప్రభుత్వం అనుసరిస్తున్న విధానాలు కొద్దిమంది బిలియనీర్లకు మాత్రమే కొమ్ముకాసేలా ఉన్నాయని ఆయన మండిపడ్డారు. ముఖ్యంగా నరేంద్ర మోదీ ప్రధాని పీఠం అధిష్టించిన తర్వాత కార్పొరేట్ వర్గాలకు, అందులోనూ అదానీ గ్రూప్‌కు కల్పించిన ప్రత్యేక వెసులుబాట్ల వల్ల దేశ సంపద కొద్దిమంది చేతుల్లోనే కేంద్రీకృతమైందని ఆయన ఆరోపించారు. 2014 నుండి 2022 మధ్య కాలంలో గౌతమ్ అదానీ నికర సంపద (Net Worth) కేవలం 8 బిలియన్ డాలర్ల నుంచి ఏకంగా 140 బిలియన్ డాలర్లకు అసాధారణ రీతిలో దూసుకుపోవడం వెనుక ఉన్న మతలబు ఏమిటని రాహుల్ గాంధీ సూటిగా ప్రశ్నించారు. దేశంలోని విమానాశ్రయాలు, నౌకాశ్రయాలు, విద్యుత్ రంగాలు సహా కీలకమైన జాతీయ మౌలిక వసతుల ప్రాజెక్టులన్నీ కేవలం ఒకే ఒక్క పారిశ్రామిక కుటుంబానికి దక్కేలా ప్రభుత్వ యంత్రాంగం ఏవిధంగా సహకరించిందో ఆయన విశ్లేషించారు. ప్రధాని మోదీ విదేశీ పర్యటనలు చేసిన ప్రతీసారీ, సరిగ్గా అదే సమయంలో లేదా ఆ వెంటనే అదానీ ఆయా దేశాల్లో పర్యటించడం, ఆ తర్వాతే అక్కడి భారీ ప్రాజెక్టుల కాంట్రాక్టులు దక్కించుకోవడం కేవలం యాదృచ్ఛికం కాదని ఆయన ఎద్దేవా చేశారు. గుజరాత్ ముఖ్యమంత్రిగా మోదీ బాధ్యతలు నిర్వర్తించిన కాలం నుంచే వీరిద్దరి మధ్య అనుబంధం బలపడిందని, దానికి ప్రతిఫలమే నేడు దేశంలోని వనరులు ఒకే వ్యక్తి చేతుల్లోకి వెళ్లడానికి కారణమని రాహుల్ గాంధీ ఆరోపించారు.ఈ కార్పొరేట్ అనుకూల విధానాల వల్ల దేశంలో నిరుద్యోగం విపరీతంగా పెరిగిపోతోందని, సామాన్య ప్రజలు, యువత, కార్మికులు తీవ్ర ఇబ్బందులు ఎదుర్కొంటున్నారని ఆయన ఆందోళన వ్యక్తం చేశారు. గిగ్ వర్కర్లు అసంఘటిత రంగ కార్మికుల శ్రమను దోచుకుంటూ వారిని కేవలం బానిసలుగా చూసే ధోరణిని బీజేపీ-ఆర్ఎస్ఎస్ భావజాలం ప్రోత్సహిస్తోందని రాహుల్ గాంధీ ధ్వజమెత్తారు. దేశ సంపదలో కోట్లాది మంది సామాన్యులకు దక్కాల్సిన వాటా కరిగిపోతోందని, కొద్దిమంది కార్పొరేట్ కుబేరులకు మాత్రం లక్షల కోట్ల లబ్ధి చేకూరుస్తోందని ఆయన విమర్శించారు. ఈ అంశాలపై బహిరంగ చర్చకు సిద్ధమని సవాల్ విసిరిన రాహుల్ గాంధీ, ప్రజాధనం దేశ వనరుల అక్రమ దోపిడీపై ప్రజలకు వాస్తవాలు వివరించేందుకు తాను ఎప్పుడూ సిద్ధంగా ఉన్నానని స్పష్టం చేశారు. మీకు నచ్చవచ్చు: నటుడిగా..దర్శకుడిగా..నిర్మాతగా..తెలుగు సినీ రంగంలో గిరిబాబు చెరగని ముద్ర.! మీకు నచ్చవచ్చు: స్వీట్ అనుకుని నోట్లో పెట్టుకున్నాడు..క్షణాల్లో పేలిన నాటు బాంబు.! [ Rahul Gandhi, Adani net worth, PM Modi, Bharat Summit, corporate growth, India politics ]

Published on: Sat Nov 14, 2026 4:28PM

ప్రతి కుటుంబానికి రూ.5 లక్షల ఇన్సూరెన్స్.. నవంబర్ 19న ప్రారంభం.!

తెలంగాణ ప్రజలకు రాష్ట్ర ప్రభుత్వం మరో భారీ సంక్షేమ కానుకను అందించేందుకు సిద్ధమైంది. రాష్ట్రంలోని ప్రతి కుటుంబానికి ఆర్థిక భద్రత కల్పించే లక్ష్యంతో సరికొత్త 'ఇందిరమ్మ కుటుంబ జీవిత బీమా' పథకానికి రూపకల్పన చేసింది. మాజీ ప్రధాని ఇందిరా గాంధీ జయంతిని పురస్కరించుకుని నవంబర్ 19వ తేదీ నుంచి ఈ పథకానికి సంబంధించి లబ్దిదారుల నమోదు ప్రక్రియను అధికారికంగా ప్రారంభించనున్నట్లు ఉపముఖ్యమంత్రి మల్లు భట్టి విక్రమార్క ప్రకటించారు. ఈ విప్లవాత్మక పథకం ద్వారా దేశంలోనే ఏ రాష్ట్రంలో లేనివిధంగా ప్రతి కుటుంబానికీ జీవిత బీమా సౌకర్యం కల్పిస్తున్న తొలి రాష్ట్రంగా తెలంగాణ చరిత్రకెక్కనుందని ప్రభుత్వ వర్గాలు పేర్కొంటున్నాయి. కులం, మతం, ఆదాయంతో ఎలాంటి సంబంధం లేకుండా అర్హత ఉన్న ప్రతి కుటుంబానికి ఈ రక్షణ వర్తింపజేయనున్నారు. ఈ స్కీమ్ నిబంధనల ప్రకారం కుటుంబంలో ప్రధానంగా సంపాదన ఆధారపడి ఉన్న వ్యక్తికి రూ.5 లక్షల జీవిత బీమా వర్తింపజేస్తారు. ఒకవేళ కుటుంబంలో ఒకరికంటే ఎక్కువ మంది సంపాదనపరులు ఉన్నట్లయితే, ఎవరి పేరుపై బీమా చేయాలనే అంశాన్ని ఆ కుటుంబ సభ్యులే స్వయంగా నిర్ణయించుకునే వెసులుబాటు కల్పించారు. అలాగే బీమాకు సంబంధించిన నామినీలుగా ఒకరిని లేదా అంతకంటే ఎక్కువ మందిని ఎంపిక చేసుకోవచ్చు. అంతేకాకుండా, వచ్చే బీమా మొత్తంలో ఏ నామినీకి ఎంత శాతం వాటా చెల్లించాలనే విషయాన్ని కూడా కుటుంబసభ్యులే ముందే స్పష్టంగా నిర్దేశించుకునేలా పారదర్శక విధానాన్ని రూపొందించారు. ఈ నమోదు ప్రక్రియను రాష్ట్రవ్యాప్తంగా అత్యంత పారదర్శకంగా నిర్వహించేందుకు అధికారులు ఏర్పాట్లు చేస్తున్నారు. పట్టణాలు, నగరాలు అలాగే ప్రతి గ్రామంలోనూ ఏకకాలంలో ఈ రిజిస్ట్రేషన్ల పర్వం కొనసాగనుంది. నవంబర్ 17, 18 తేదీల్లో గ్రామాల్లో ప్రత్యేకంగా దండోరా వేయించి ప్రజలకు ఈ కార్యక్రమంపై ముందస్తుగా అవగాహన కల్పించాలని అధికారులను ఆదేశించారు. నమోదు ప్రక్రియ ముగిసిన అనంతరం సేకరించిన వివరాలను సంబంధిత కుటుంబ సభ్యుల సమక్షంలో చదివి వినిపించిన తదనంతరమే వారి సంతకాలు తీసుకోవాలని స్పష్టమైన మార్గదర్శకాలు జారీ చేశారు. ప్రభుత్వ ఈ నిర్ణయం పట్ల సామాన్యులు హర్షం వ్యక్తం చేస్తున్నారు. ఇది కూడా చదవండి: భారత జట్టులో ఆడాలన్న కల.. 19 ఏళ్లకే ముగిసిన యువ క్రికెటర్ జీవితం.! [ Telangana Indiramma Bima, Bhatti Vikramarka, Rs. 5 lakh life insurance, Indira Gandhi Jayanti, Telangana government schemes ]

Published on: Fri Nov 13, 2026 8:52PM

భారత జట్టులో ఆడాలన్న కల.. 19 ఏళ్లకే ముగిసిన యువ క్రికెటర్ జీవితం.!

వికారాబాద్‌లో యువ మహిళా క్రికెటర్ సూసైడ్..! క్రికెట్ మైదానంలో బంతిని బౌండరీ దాటిస్తూ.. భారత జట్టు తరఫున ఆడాలనే కలతో అడుగులు వేస్తున్న ఓ యువ క్రీడాకారిణి జీవితం అర్ధాంతరంగా ముగిసింది. చేతిలో బ్యాట్ పట్టుకుని మైదానంలో మెరవాల్సిన ఆ యువతి.. ఇంట్లో విగతజీవిగా కనిపించడం తీవ్ర విషాదాన్ని నింపింది. వికారాబాద్ జిల్లాకు చెందిన 19 ఏళ్ల నందిని ఆత్మహత్య చేసుకోవడం స్థానికంగా కలకలం రేపింది. నందిని అమ్మమ్మ ఇంట్లో ఉంటూ చదువుతోపాటు క్రికెట్‌లో శిక్షణ పొందుతోంది. చిన్న వయసులోనే ఆటపై ఆసక్తి పెంచుకున్న ఆమె.. క్రమంగా తన ప్రతిభతో గుర్తింపు తెచ్చుకుంది. ఇటీవల అండర్-19 స్థాయి క్రికెట్‌లోనూ సత్తా చాటింది. బీసీసీఐ అండర్-19 స్థాయిలో ఎంపికై ఆడినట్లు, పీసీసీఏఐ అండర్-19 స్థాయిలోనూ ప్రాతినిధ్యం వహించినట్లు సమాచారం. భవిష్యత్తులో మరింత ఉన్నత స్థాయికి ఎదిగి భారత జట్టుకు ఆడాలని కలలు కంటోంది. అయితే ఇంతలోనే ఆమె జీవితం విషాదాంతమైంది. శుక్రవారం ఇంట్లో ఎవరూ లేని సమయంలో నందిని ఫ్యాన్‌కు ఉరేసుకుని ఆత్మహత్య చేసుకుంది. సమాచారం అందుకున్న పోలీసులు వెంటనే ఘటనాస్థలానికి చేరుకుని వివరాలు సేకరించారు. అయితే నందిని మృతిపై కుటుంబ సభ్యులు పలు అనుమానాలు వ్యక్తం చేస్తున్నారు. ప్రేమ పేరుతో వేధింపులే కారణమా.? అనిల్, కృష్ణ అనే ఇద్దరు యువకులు కొంతకాలంగా నందినిని వేధిస్తున్నారని కుటుంబ సభ్యులు ఆరోపిస్తున్నారు. అనిల్ ప్రేమ పేరుతో ఇబ్బందులకు గురిచేసేవాడని, కృష్ణ కూడా అతడికి సహకరిస్తూ వేధించేవాడని బంధువులు చెబుతున్నారు. ఈ వేధింపుల కారణంగానే నందిని తీవ్ర మనస్తాపానికి గురై ఆత్మహత్య చేసుకుందని ఆరోపిస్తున్నారు. అయితే ఈ ఆరోపణల్లో నిజానిజాలు పోలీసుల దర్యాప్తులో తేలాల్సి ఉంది. న్యాయం కోసం రోడ్డెక్కిన కుటుంబ సభ్యులు.! నందిని మృతితో తీవ్ర ఆవేదనకు గురైన కుటుంబ సభ్యులు, బంధువులు వికారాబాద్‌లో ఆందోళనకు దిగారు. తమ బిడ్డను వేధించిన వారిపై కఠిన చర్యలు తీసుకోవాలని డిమాండ్ చేస్తూ రాస్తారోకో నిర్వహించారు. దీంతో అక్కడ ఉద్రిక్త వాతావరణం నెలకొంది. నందినికి న్యాయం చేయాలని, ఆమె మృతికి కారణమైన పరిస్థితులపై సమగ్ర విచారణ జరపాలని కుటుంబ సభ్యులు కోరుతున్నారు. ఒకవైపు చదువు.. మరోవైపు క్రికెట్ సాధన.. చిన్న వయసులోనే అండర్-19 స్థాయికి ఎదిగిన ప్రతిభ.. భారత జట్టుకు ప్రాతినిధ్యం వహించాలనే ఆశయం.. ఇలా ఎన్నో కలలతో ముందుకు సాగుతున్న నందిని జీవితం 19 ఏళ్లకే ముగిసిపోవడం అందరినీ కలచివేస్తోంది. మైదానంలో పరుగులు సాధించి దేశం గర్వించేలా చేయాల్సిన ఓ యువ క్రీడాకారిణి ఇలా విగతజీవిగా మారడం విషాదకరం. అసలు నందిని ఆత్మహత్యకు దారితీసిన పరిస్థితులేంటి? కుటుంబ సభ్యులు ఆరోపిస్తున్న వేధింపులు నిజమేనా? ఈ ఘటనలో అనిల్, కృష్ణ పాత్ర ఏంటి? అన్న కోణాల్లో పోలీసులు దర్యాప్తు చేస్తున్నారు. నందిని మృతికి గల అసలు కారణాలు పోలీసుల విచారణలో వెలుగులోకి రావాల్సి ఉంది. మీకు నచ్చవచ్చు: తీన్మార్ మల్లన్న హత్యకు కుట్ర జరిగిందా..? డీజీపీకి ఎమ్మెల్సీ ఫిర్యాదు.! మీకు నచ్చవచ్చు: పసిడి ప్రియులకు గుడ్ న్యూస్..మూడు రోజుల్లోనే భారీగా తగ్గిన గోల్డ్ రేటు..తులం ఎంతంటే.? [ women cricketer Nandini suicide,BCCI Under 19 cricket, Vikarabad crickete, rFemale cricketer suicide ]

Published on: Fri Nov 13, 2026 8:32PM

తీన్మార్ మల్లన్న హత్యకు కుట్ర జరిగిందా..? డీజీపీకి ఎమ్మెల్సీ ఫిర్యాదు.!

బీసీ రాజ్యాధికార పాదయాత్రలో తన వాహనాన్ని లారీ ఢీకొట్టిన ఘటనపై తెలంగాణ రాజ్యాధికార పార్టీ అధినేత, ఎమ్మెల్సీ తీన్మార్ మల్లన్న తెలంగాణ డీజీపీకి ఫిర్యాదు చేశారు. ఈ ప్రమాదం వెనుక కుట్ర కోణం ఉండే అవకాశాలున్నాయని అనుమానం వ్యక్తం చేశారు. తనను హత్య చేసేందుకు పథకం ప్రకారం ఈ ప్రమాదాన్ని సృష్టించి ఉండవచ్చని పేర్కొంటూ సమగ్ర దర్యాప్తు జరపాలని కోరారు. పాదయాత్రలో లారీతో ఢీకొట్టిన ఘటన.! బీసీల రాజకీయ, సామాజిక, రాజ్యాంగబద్ధమైన హక్కులపై ప్రజల్లో అవగాహన కల్పించేందుకు తీన్మార్ మల్లన్న బీసీ రాజ్యాధికార పాదయాత్ర చేపట్టారు. ఈ క్రమంలో వలిగొండ నుంచి తొర్రూరు హైవే వైపు పాదయాత్ర కొనసాగుతుండగా.. యాదాద్రి భువనగిరి జిల్లా మోత్కూర్ మండలం అన్నాజీపురం–తిరుమలగిరి రోడ్డు సమీపంలో ప్రమాదం చోటుచేసుకుంది. వేగంగా వచ్చిన లారీ తన వాహనమైన టయోటా ఫార్చునర్ కారుతో పాటు మరో కారును ఢీకొట్టిందని మల్లన్న ఫిర్యాదులో పేర్కొన్నారు. ఈ ఘటనలో తన సిబ్బందితో పాటు మరో వాహనంలో ఉన్నవారికి కూడా గాయాలయ్యాయని తెలిపారు. హత్యకు కుట్ర జరిగిందని అనుమానం.! ప్రమాదం జరిగిన తీరు అనుమానాస్పదంగా ఉందని తీన్మార్ మల్లన్న పేర్కొన్నారు. తన రాజకీయ కార్యకలాపాలను వ్యతిరేకిస్తున్న కొందరు వ్యక్తులు.. బీసీల రాజకీయ సాధికారత కోసం తాను చేస్తున్న పోరాటాన్ని అడ్డుకునేందుకు ఉద్దేశపూర్వకంగా ఈ ప్రమాదానికి పాల్పడి ఉండవచ్చని అనుమానం వ్యక్తం చేశారు. తనకు శారీరక హాని కలిగించడం లేదా హత్య చేయడం లక్ష్యంగా ఈ ఘటనకు ప్రణాళిక రచించి ఉండవచ్చని ఫిర్యాదులో పేర్కొన్నారు. సమగ్ర దర్యాప్తు జరపాలని డిమాండ్.! ఈ ఘటనపై తక్షణమే క్రిమినల్ కేసు నమోదు చేయాలని డీజీపీని కోరారు. ప్రమాదం వెనుక ముందస్తు కుట్ర ఏమైనా ఉందా అనే కోణంలోనూ దర్యాప్తు జరపాలని విజ్ఞప్తి చేశారు. డీఎస్పీ స్థాయికి తగ్గకుండా సీనియర్ పోలీసు అధికారిని విచారణ అధికారిగా నియమించాలని కోరారు. ప్రమాదానికి కారణమైన లారీ యజమాని, డ్రైవర్ వివరాలతో పాటు వాహనం గతంలో ఎక్కడెక్కడ ప్రయాణించిందనే అంశాలపైనా విచారణ జరపాలని సూచించారు. సీసీటీవీ ఫుటేజీ, ఎలక్ట్రానిక్ ఆధారాలు సేకరించాలి.! ప్రమాద స్థలానికి సమీపంలోని సీసీటీవీ కెమెరాలు, హైవే నిఘా కెమెరాల ఫుటేజీ, వ్యాపార సంస్థలు, భవనాల్లోని కెమెరాల దృశ్యాలను వెంటనే సేకరించి భద్రపరచాలని కోరారు. మొబైల్ ఫోన్ వీడియోలు, కాల్ రికార్డులు సహా అందుబాటులో ఉన్న ఎలక్ట్రానిక్ ఆధారాలను పరిశీలించి వాస్తవాలను వెలికితీయాలని విజ్ఞప్తి చేశారు. రాజకీయ కక్షలు, ముందస్తు నిఘా, నేరపూరిత బెదిరింపుల కోణాల్లోనూ విచారణ జరపాలని కోరారు. బీసీ ఉద్యమాన్ని అడ్డుకునే ప్రయత్నమా.? బీసీ రాజ్యాధికార పాదయాత్ర ప్రజాస్వామ్యబద్ధమైన ఉద్యమమని తీన్మార్ మల్లన్న స్పష్టం చేశారు. వెనుకబడిన తరగతులకు న్యాయం, తగిన ప్రాతినిధ్యం, రాజకీయ సాధికారత కల్పించాలనే లక్ష్యంతో ఈ యాత్ర చేపట్టినట్లు తెలిపారు. ఉద్యమంలో పాల్గొంటున్న వారిని బెదిరించడం, భయభ్రాంతులకు గురిచేయడం లేదా శారీరకంగా హాని కలిగించే ప్రయత్నాలు చేయడం తీవ్రమైన విషయమని పేర్కొన్నారు. పోలీసులపై పూర్తి విశ్వాసం ఉంది.! తెలంగాణ పోలీసుల నిష్పక్షపాత పనితీరుపై తనకు పూర్తి విశ్వాసం ఉందని మల్లన్న తెలిపారు. డీజీపీ వ్యక్తిగతంగా జోక్యం చేసుకుని అన్ని కోణాల్లో సమగ్ర దర్యాప్తు జరిగేలా చూడాలని కోరారు. ఎలాంటి ఆధారాలు నాశనం కాకుండా చర్యలు తీసుకోవాలని, ఘటనకు బాధ్యులైన వారిని గుర్తించి చట్టం ముందు నిలబెట్టాలని విజ్ఞప్తి చేశారు. ఈ ఫిర్యాదు కార్యక్రమంలో తెలంగాణ రాజ్యాధికార పార్టీ వర్కింగ్ ప్రెసిడెంట్ మాదం రజినీ కుమార్ యాదవ్, ప్రధాన కార్యదర్శి అశోక్ ముదిరాజ్, క్రమశిక్షణ కమిటీ చైర్మన్ బంధారపు నర్సయ్య గౌడ్ తదితరులు పాల్గొన్నారు. మీకు నచ్చవచ్చు: పసిడి ప్రియులకు గుడ్ న్యూస్..మూడు రోజుల్లోనే భారీగా తగ్గిన గోల్డ్ రేటు..తులం ఎంతంటే.? మీకు నచ్చవచ్చు: ఒక్క నగ్న ఫొటో కోసం దేశ భద్రతను తాకట్టు పెట్టిన ఐఏఎఫ్ అధికారి.! [ Teenmaar Mallanna, Telangana DGP, BC Rajyadhikara Padayatra, BC Rights, Telangana Rajyadhikara Party, Suspicious Road Accident, Murder Conspiracy Allegations ]

Published on: Fri Nov 13, 2026 7:49PM

ఖాకీ వెనుక ఓ సామాజిక యోధుడు..హైదరాబాద్ కొత్త సీపీ మహేష్ భగవత్ ప్రస్థానం.!

అక్రమ రవాణా ముఠాలకు సింహస్వప్నం.. వేలాది మంది బాధితులకు విముక్తి.. 2 వేల మందికి పైగా సివిల్ సర్వెంట్లకు మార్గదర్శకత్వం.. అంతర్జాతీయ స్థాయిలో గుర్తింపు పొందిన ఐపీఎస్ అధికారి..పోలీస్ అంటే కేవలం నేరస్తులను పట్టుకోవడం, శాంతిభద్రతలను కాపాడటమే కాదు.. ఆపదలో ఉన్నవారికి అండగా నిలవడం.. అణగారిన వర్గాలకు భరోసా కల్పించడం కూడా పోలీస్ బాధ్యతేనని తన సేవలతో నిరూపించిన అధికారి మహేష్ మురళీధర్ భగవత్. మానవ అక్రమ రవాణాపై పోరాటం నుంచి బాల కార్మికుల విముక్తి వరకు.. అంతర్జాతీయ అవార్డుల నుంచి భావితరాల సివిల్ సర్వెంట్లకు మార్గదర్శకత్వం వరకు ఆయన ప్రస్థానం ఎన్నో ప్రత్యేకతల సమాహారం. ఇప్పుడు హైదరాబాద్ నగర పోలీస్ కమిషనర్‌గా బాధ్యతలు చేపట్టిన ఆయన జీవిత ప్రయాణం ఆసక్తికరంగా మారింది. రాచకొండ తొలి సీపీగా ప్రత్యేక ముద్ర..! 1995 బ్యాచ్‌కు చెందిన తెలంగాణ క్యాడర్ ఐపీఎస్ అధికారి మహేష్ భగవత్ పోలీస్ శాఖలో పలు కీలక బాధ్యతలు నిర్వర్తించారు. రాచకొండ తొలి పోలీస్ కమిషనర్‌గా సుమారు ఆరున్నరేళ్ల పాటు పనిచేసి తనదైన ముద్ర వేశారు. అనంతరం అదనపు డీజీపీ హోదాలో సీఐడీ, రైల్వే, రోడ్డు భద్రత విభాగాల్లో సేవలందించారు. 2024 జూలై 10 నుంచి డీజీపీ, లా అండ్ ఆర్డర్ బాధ్యతలు నిర్వహించిన ఆయన.. తాజాగా హైదరాబాద్ పోలీస్ కమిషనర్‌గా బాధ్యతలు చేపట్టారు. అక్రమ రవాణా ముఠాలకు సింహస్వప్నం.! మహేష్ భగవత్ పోలీస్ ప్రస్థానంలో అత్యంత కీలకమైన అధ్యాయం మానవ అక్రమ రవాణా నిరోధం. మహిళలు, చిన్నారులను అక్రమంగా తరలించే ముఠాలపై ఆయన ప్రత్యేకంగా దృష్టి సారించారు. 2004 నుంచి 2022 వరకు 2 వేల మందికి పైగా మహిళలు, చిన్నారులను అక్రమ రవాణా ముఠాల చెర నుంచి విడిపించడంలో కీలక పాత్ర పోషించారు. ఇది కూడా చదవండి: మీ తాత గ్రేట్.. మా తాత గ్రేట్: విశాఖ వేదికగా లోకేష్, ఉపాసనల ఆసక్తికర సంభాషణ.! కేవలం బాధితులను రక్షించడంతోనే ఆయన బాధ్యత ముగియలేదు. వారిని తిరిగి సాధారణ జీవితంలోకి తీసుకురావడం, పునరావాసం కల్పించడం, అక్రమ రవాణా ముఠాలపై చట్టపరమైన చర్యలు తీసుకునేలా కృషి చేయడం వంటి అంశాలపైనా ప్రత్యేక శ్రద్ధ చూపారు. ఇటుక బట్టీలు, ప్రమాదకర పరిశ్రమల్లో వెట్టి చాకిరీకి గురవుతున్న 7 వేల మందికి పైగా బాల కార్మికులు, బాధితులకు విముక్తి కల్పించడంలోనూ విశేష కృషి చేశారు. బాధితుల కన్నీళ్లు తుడవడమే కాకుండా.. నిందితులకు శిక్ష పడేలా పోరాడటం ఆయన సేవల్లో ప్రత్యేకత. రాష్ట్రపతి నుంచి అమెరికా ప్రభుత్వం వరకు అవార్డులు.! మహేష్ భగవత్ సేవలకు జాతీయ, అంతర్జాతీయ స్థాయిలో అనేక పురస్కారాలు లభించాయి. 2004లో రాష్ట్రపతి గ్యాలంట్రీ పోలీస్ మెడల్‌తో పాటు అమెరికాలోని ఇంటర్నేషనల్ అసోసియేషన్ ఆఫ్ చీఫ్స్ ఆఫ్ పోలీస్ నుంచి కమ్యూనిటీ పోలీసింగ్ అవార్డును అందుకున్నారు. 2006లో వెబర్ సావీ లా ఎన్‌ఫోర్స్‌మెంట్, సివిల్ రైట్స్ అవార్డులు దక్కాయి. 2011లో రాష్ట్రపతి మెరిటోరియస్ సర్వీస్ పోలీస్ మెడల్ అందుకున్నారు. 2016లో అప్పటి కేంద్ర హోంమంత్రి రాజ్‌నాథ్ సింగ్ నుంచి ప్రశంసా పత్రం అందుకున్నారు. 2017లో అమెరికా విదేశాంగ శాఖ ప్రకటించే ప్రతిష్ఠాత్మక 'ట్రాఫికింగ్ ఇన్ పర్సన్స్ హీరో అవార్డు'కు ఎంపికయ్యారు. 2018లో IACP సివిల్ అండ్ హ్యూమన్ రైట్స్ అవార్డు, 2022లో FICCI స్మార్ట్ పోలీసింగ్ అవార్డుతో పాటు రాష్ట్రపతి విశిష్ట సేవా పోలీస్ మెడల్ అందుకున్నారు. అంతర్జాతీయ వేదికపై భారత పోలీస్‌కు గుర్తింపు.! 2017లో అమెరికా ప్రభుత్వం అందించే 'ట్రాఫికింగ్ ఇన్ పర్సన్స్ హీరో అవార్డు' మహేష్ భగవత్‌కు అంతర్జాతీయంగా ప్రత్యేక గుర్తింపు తెచ్చిపెట్టింది. మానవ అక్రమ రవాణా నిరోధంలో ప్రపంచవ్యాప్తంగా విశేష కృషి చేసిన నాయకుల్లో ఒకరిగా ఆయనకు గుర్తింపు లభించింది. ఈ అవార్డు అందుకున్న తొలి మరాఠీ ఐపీఎస్ అధికారిగా, మూడో భారతీయుడిగా ఆయన ప్రత్యేకత సాధించారు. 2017 జూన్ 27న వాషింగ్టన్‌లో ఈ అవార్డును ప్రకటించారు. అప్పటి అమెరికా అధ్యక్షుడు డొనాల్డ్ ట్రంప్ కుమార్తె ఇవాంకా ట్రంప్ సమక్షంలో జరిగిన కార్యక్రమం ఈ గుర్తింపునకు మరింత ప్రాధాన్యత తెచ్చింది. రచయితగా.. పరిశోధకుడిగా మరో కోణం.! పోలీసు అధికారిగా క్షేత్రస్థాయిలో పనిచేయడమే కాకుండా.. మానవ అక్రమ రవాణా నిరోధంపై అధ్యయనం, పరిశోధన రంగాల్లోనూ మహేష్ భగవత్ తనదైన పాత్ర పోషించారు. ఐక్యరాజ్యసమితికి చెందిన UNODC, కేంద్ర హోంశాఖ ప్రచురించిన ఎనిమిది పుస్తకాల రూపకల్పనలో సహకరించారు. ఆయనకు ప్రత్యేక గుర్తింపు తెచ్చిన 'సినర్జీ బిట్వీన్ స్టేక్‌హోల్డర్స్' పుస్తకం ఇందిరా గాంధీ నేషనల్ ఓపెన్ యూనివర్సిటీ (IGNOU)లో మానవ అక్రమ రవాణా నిరోధక సర్టిఫికెట్ డిప్లొమా కోర్సుకు రిఫరెన్స్ మెటీరియల్‌గా ఉపయోగపడుతోంది. వియన్నాలో ఐక్యరాజ్యసమితి నిర్వహించిన సదస్సులో పాల్గొనడంతో పాటు, అమెరికాలో ఉగ్రవాద నిరోధక అంశాలపై శిక్షణ పొందారు. జాతీయ పోలీస్ అకాడమీతో పాటు వివిధ రాష్ట్రాల్లో పోలీస్ అధికారులకు శిక్షణ అందించారు. 2 వేల మందికి పైగా సివిల్ సర్వెంట్లకు మార్గదర్శి.! మహేష్ భగవత్‌లో మరో ప్రత్యేక కోణం ఉంది. పోలీస్ అధికారిగా తన విధులకే పరిమితం కాకుండా.. భావితరాల పరిపాలనా అధికారులను తీర్చిదిద్దడంలోనూ ఆయన కీలక పాత్ర పోషిస్తున్నారు. గత పదేళ్లుగా సివిల్ సర్వీసెస్ అభ్యర్థులకు ఇంటర్వ్యూ శిక్షణ, మార్గదర్శకత్వం అందిస్తున్నారు. ఇప్పటివరకు 2 వేల మందికి పైగా IAS, IPS, IFS, ఫారెస్ట్ సర్వీస్, CAPF అధికారులుగా ఎంపిక కావడంలో ఆయన మార్గదర్శకత్వం ఉపయోగపడింది. UPSC 2023లో AIR-1 సాధించిన ఇషితా కిషోర్, 2024లో AIR-3 సాధించిన దోనూరు అనన్యారెడ్డి వంటి ప్రతిభావంతులకు ఆయన మార్గనిర్దేశం చేశారు. 2025లో AIR-2 సాధించిన హర్షిత్ గోయల్‌తో పాటు మరో 220 మందికి ఇంటర్వ్యూ శిక్షణ అందించారు. 2026 UPSC ఫలితాల్లో AIR-3, 4, 6, 7 ర్యాంకర్లు సహా మొత్తం 960 మంది ఎంపికైన అభ్యర్థుల్లో 320 మందికి తాను, తన బృందం మార్గదర్శకత్వం అందించినట్లు వివరించారు. హైదరాబాద్ పోలీసింగ్‌పై కొత్త బాధ్యతలు.! హైదరాబాద్ నగర నూతన పోలీస్ కమిషనర్‌గా డాక్టర్ మహేష్ మురళీధర్ భగవత్, ఐపీఎస్ ఈరోజు (13.11.2026) ఉదయం 11:00 గంటలకు బంజారాహిల్స్‌లోని తెలంగాణ ఇంటిగ్రేటెడ్ కమాండ్ అండ్ కంట్రోల్ సెంటర్ (TG ICCC) భవనంలో అధికారికంగా బాధ్యతలు స్వీకరించారు. మానవ అక్రమ రవాణా నిరోధం, మహిళలు, చిన్నారుల భద్రత, నేర నియంత్రణ, కమ్యూనిటీ పోలీసింగ్.. ఇలా విభిన్న రంగాల్లో అనుభవం సంపాదించిన మహేష్ భగవత్ ఇప్పుడు హైదరాబాద్ నగర పోలీస్ కమిషనర్‌గా బాధ్యతలు చేపట్టారు. అంతర్జాతీయ గుర్తింపు పొందిన అధికారి నగర పోలీస్ బాస్‌గా రావడంతో ఆయన అనుభవం, నాయకత్వంపై ఆసక్తి నెలకొంది. ఖాకీ దుస్తుల వెనుక కఠినమైన పోలీస్ అధికారి మాత్రమే కాదు.. బాధితులకు అండగా నిలిచే మానవతావాది, యువతకు దిశానిర్దేశం చేసే గురువు, సామాజిక మార్పు కోసం కృషి చేసిన వ్యక్తి కూడా ఉన్నారు. నేరాలపై పోరాటంతో పాటు సమాజానికి సేవ చేయడమే పోలీస్ బాధ్యతలో భాగమని మహేష్ భగవత్ ప్రస్థానం చాటిచెబుతోంది. మీకు నచ్చవచ్చు: హైదరాబాద్‌ పోలీస్‌ బాస్‌ మార్పు.. సజ్జనార్‌ స్థానంలో మహేశ్‌ భగవత్‌.! మీకు నచ్చవచ్చు: సజ్జనార్‌ యూనిఫామ్‌లో ఉన్న క్రిమినల్..సీబీఐ మాజీ డైరెక్టర్ సంచలన వ్యాఖ్యలు.! [ CP Mahesh Bhagwat, Hyderabad Police Commissioner, Human Trafficking, Anti Human Trafficking, Rachakonda Police, UPSC Mentorship ]

Published on: Fri Nov 13, 2026 3:54PM

సజ్జనార్‌ యూనిఫామ్‌లో ఉన్న క్రిమినల్..సీబీఐ మాజీ డైరెక్టర్ సంచలన వ్యాఖ్యలు.!

రాష్ట్రంలో ఎప్పుడూ చర్చనీయాంశంగా ఉండే అంశాలపై ప్రముఖులు స్పందిస్తుండడం రాజకీయ వర్గాల్లో తీవ్ర కలకలం రేపుతోంది. తాజాగా హైదరాబాద్ నగర పోలీస్ కమిషనర్ పదవి నుంచి వీసీ సజ్జనార్ బదిలీ కావడం పట్ల సర్వత్రా చర్చ జరుగుతోంది. ఈ పరిణామంపై సీబీఐ మాజీ డైరెక్టర్ నాగేశ్వరరావు చేసిన వ్యాఖ్యలు ప్రస్తుతం రాష్ట్ర రాజకీయాల్లో పోలీసు వర్గాల్లో పెను ప్రకంపనలు సృష్టిస్తున్నాయి. ఎక్స్ (ట్విట్టర్) వేదికగా ఆయన చేసిన సంచలన పోస్ట్ సోషల్ మీడియాలో వైరల్‌గా మారింది. సజ్జనార్‌ను హైదరాబాద్ సీపీ స్థానం నుంచి బదిలీ చేయడంపై ఆయన ముఖ్యమంత్రి రేవంత్ రెడ్డికి, రాష్ట్ర డీజీపీ సీవీ ఆనంద్‌కు ప్రత్యేకంగా ధన్యవాదాలు తెలిపారు. ఈ నిర్ణయం సరైనదేనన్న సంకేతాలు ఆయన మాటల్లో కనిపించాయి. అయితే, కేవలం ధన్యవాదాలతో సరిపెట్టకుండా సజ్జనార్‌పై నాగేశ్వరరావు తీవ్రస్థాయిలో విరుచుకుపడ్డారు. ఆయనను 'యూనిఫామ్‌లో ఉన్న క్రిమినల్' అంటూ అభివర్ణించడం గమనార్హం. తోటి పోలీసు అధికారిగా లేదా మాజీ కొలీగ్‌గా ఇలాంటి వ్యాఖ్యలు చేయడం తనను కూడా బాధిస్తోందని ఆయన స్పష్టం చేశారు. అయినప్పటికీ వాస్తవాలను దాచలేనని, ఇదే నగ్నసత్యమని పేర్కొన్నారు. ఇది కూడా చదవండి: దేవాంశ్ సినిమాల్లోకి వెడతాడేమోనని భయం: లోకేష్ సరదా వ్యాఖ్యలు తెగ వైరల్.! కేవలం బదిలీ చేయడం వల్ల గతంలో జరిగిన తప్పులు లేదా నేరపూరిత చర్యలు మరుగున పడిపోవని నాగేశ్వరరావు అభిప్రాయపడ్డారు. బదిలీ అనేది ఎవరికీ శిక్ష కాదని, ఆ చర్యల స్వభావాన్ని అది మార్చలేదని తేల్చిచెప్పారు. సజ్జనార్‌ పాల్పడినట్లు ఆరోపిస్తున్న వివిధ క్రిమినల్ చర్యలపై ప్రభుత్వం సమగ్రమైన ఉన్నత స్థాయి విచారణ జరపాలని ఆయన డిమాండ్ చేశారు. తప్పు చేసిన వారికి చట్టపరంగా తగిన శిక్ష పడేలా చూడాలని కోరారు. పోలీసు శాఖలో ఉన్నతాధికారుల తీరుపై ఒక మాజీ సీబీఐ డైరెక్టర్ ఈ స్థాయిళో బహిరంగంగా విమర్శలు గుప్పించడం ఇప్పుడు సర్వత్ర చర్చనీయాంశమైంది. ఈ వ్యవహారం రానున్న రోజుల్లో మరింత రాజకీయ అధికారిక దుమారం రేపే అవకాశం ఉంది. మీకు నచ్చవచ్చు: హైదరాబాద్‌ పోలీస్‌ బాస్‌ మార్పు.. సజ్జనార్‌ స్థానంలో మహేశ్‌ భగవత్‌.! [ CV Nageswara Rao, VC Sajjanar, CBI Former Director, Revanth Reddy, CV Anand, Telangana News, TeluguOne News ]

Published on: Fri Nov 13, 2026 1:47PM

తెలంగాణ విద్యావిధానంలో సమూల మార్పులు.. వచ్చే ఏడాది నుంచి 10+2 విధానం.!

తెలంగాణ విద్యా వ్యవస్థలో కీలక సంస్కరణలు తీసుకొచ్చేందుకు రాష్ట్ర ప్రభుత్వం సిద్ధమవుతోంది. ఆధునిక అవసరాలకు అనుగుణంగా విద్యావిధానంలో మార్పులు చేపట్టాలని ముఖ్యమంత్రి రేవంత్ రెడ్డి నిర్ణయించారు. విద్యాశాఖపై అధికారులతో నిర్వహించిన సమీక్షలో పలు కీలక ఆదేశాలు జారీ చేశారు. వచ్చే విద్యా సంవత్సరం నుంచే 10+2 విధానం అమలుకు అవసరమైన చర్యలు తీసుకోవాలని అధికారులను ఆదేశించారు. విద్యార్థులకు నాణ్యమైన విద్య అందించడమే ప్రభుత్వ తొలి ప్రాధాన్యతని సీఎం స్పష్టం చేశారు. విద్యావిధానంలో మార్పులు తీసుకొచ్చే క్రమంలో ఏ ఒక్క విద్యార్థికీ నష్టం జరగకుండా చూడాలని అధికారులకు సూచించారు. నర్సరీ నుంచి 12వ తరగతి వరకు విద్యకు ప్రాధాన్యత ఇస్తున్నామని, విద్యార్థుల భవిష్యత్తుకు ఉపయోగపడేలా బోధనా విధానాన్ని రూపొందించాలని పేర్కొన్నారు. ముఖ్యంగా 9 నుంచి 12వ తరగతి వరకు ఉన్నత విద్యకు పునాదిగా భావించి, ప్రత్యేక విద్య (Specialised Education) అందించేలా ప్రణాళికలు సిద్ధం చేయాలని సూచించారు. 12వ తరగతి నుంచి విద్యార్థుల్లో నైపుణ్యాలను పెంపొందించడంపై ప్రత్యేకంగా దృష్టి సారించాలని అధికారులకు దిశానిర్దేశం చేశారు. మారుతున్న కాలానికి అనుగుణంగా విద్యార్థులకు అకడమిక్ పరిజ్ఞానంతో పాటు వృత్తి నైపుణ్యాలు అందించాల్సిన అవసరం ఉందని ప్రభుత్వం భావిస్తోంది. ఇందుకు అనుగుణంగా విద్యా సంస్థల్లో అవసరమైన మౌలిక సదుపాయాలు కల్పించాలని సీఎం ఆదేశించారు. ప్రైవేటు విద్యాసంస్థలకు దీటుగా ప్రభుత్వ పాఠశాలలను తీర్చిదిద్దడమే ప్రభుత్వ లక్ష్యమని రేవంత్ రెడ్డి స్పష్టం చేశారు. విద్యా వ్యవస్థలో ప్రతిపాదిస్తున్న మార్పులు క్షేత్రస్థాయిలో సమర్థంగా అమలయ్యేలా కార్యాచరణ రూపొందించాలని అధికారులకు సూచించారు. ఇది కూడా చదవండి: జమ్మూకశ్మీర్‌లో ఉగ్రదాడి: సీఆర్పీఎఫ్ క్యాంప్‌పై కాల్పులు..ముగ్గురు జవాన్లకు గాయాలు.! [ Telangana Education Reforms, CM Revanth Reddy, 10+2 Education System, Specialised Education, Telangana Government Schools, Education Policy, Telugu One, Telugu News ]

Published on: Wed Nov 11, 2026 3:15PM

విద్యా ప్రాంగణాల్లో నో సినిమా ప్రమోషన్స్: తెలంగాణ సర్కార్ నిర్ణయం.!

రాష్ట్రంలోని విద్యా ప్రాంగణాలలో సినిమా ప్రమోషన్లు, ఇతర వాణిజ్య కార్యక్రమాల నిర్వహణను పూర్తిగా నిరోధించేందుకు తెలంగాణ ప్రభుత్వం సమాయత్తమైంది. క్యాంపస్‌లను కేవలం విద్య, క్రీడా కార్యకలాపాలకే పరిమితం చేయాలని నిర్ణయించింది. ఇందుకు గతంలో జరిగిన కొన్ని అవాంఛనీయ ఘటనలే కారణమంటున్నారు అధికారులు. ఇటీవలి కాలంలో ఓ ప్రైవేట్ ఇంజినీరింగ్ కళాశాలలో తగిన భద్రతా ప్రమాణాలు పాటించకుండా నిర్వహించిన దాండియా వేడుకలో దురదృష్టవశాత్తు ఒక విద్యార్థి ప్రాణాలు కోల్పోగా, పలువురు గాయపడ్డారు. అలాగే ఒక ప్రైవేట్ విశ్వవిద్యాలయంలో నిబంధనలకు విరుద్ధంగా సినిమా ప్రమోషన్ ఈవెంట్ నిర్వహించడంపై విమర్శలు వెల్లువెత్తాయి. విద్యార్థుల భద్రతను విస్మరించి కొన్ని కళాశాలల యాజమాన్యాలు, వాణిజ్య ప్రయోజనాలు, ప్రచారం కోసం ఇలాంటి వేడుకలకు అనుమతి ఇస్తున్నాయనే విమర్శల నేపథ్యంలో ప్రభుత్వం ఈ నిర్ణయానికి వచ్చినట్లు తెలుస్తోంది. విద్యాలయాల పవిత్రతను కాపాడాల్సిన బాధ్యత అందరిపై ఉందనీ, విద్యార్థుల ప్రాణాలతో చెలగాటమాడితే సహించేది లేదని ప్రభుత్వం స్పష్టం చేసింది. ఈ నేపథ్యంలో విద్యాసంస్థలలో ఏయే కార్యక్రమాలు చేపట్టవచ్చనే అంశంపై సమగ్ర మార్గదర్శకాలు రూపొందించాలని విద్యాశాఖను రేవంత్ సర్కార్ ఆదేశించింది. దీనికి సంబంధించి రాష్ట్ర ఉన్నత విద్యామండలి ఛైర్మన్ బాలకిష్టారెడ్డి ముసాయిదా నివేదికను ప్రభుత్వానికి అందజేశారు. త్వరలోనే దీనిపై అధికారిక ఉత్తర్వులు వెలువడే అవకాశం ఉందని విశ్వసనీయంగా తెలుస్తోంది. ఇది కూడా చదవండి: ఇరుముడి సినిమాకు తెలంగాణ కార్మిక శాఖ షాక్‌.. నిర్మాణ సంస్థకు నోటీసులు.! కొత్త నిబంధనల ప్రకారం విద్యా ప్రాంగణాల్లో సినిమా ప్రమోషన్లకు అవకాశం ఉండదు. అయితే, అత్యవసరంగా పెద్ద ఎత్తున సాంస్కృతిక, క్రీడా కార్యక్రమాలు నిర్వహించాల్సి వస్తే నిర్వాహకులు ముందుగానే పోలీసు, అగ్నిమాపక శాఖల నుంచి అనుమతి పొందాల్సి ఉంటుంది. హాజరయ్యే జనాల సంఖ్యకు తగినట్లుగా కట్టుదిట్టమైన భద్రతా చర్యలు చేపట్టడం తప్పనిసరి చేయనున్నారు. ఈ నిబంధనలను అతిక్రమించి నిబంధనలకు వ్యతిరేకంగా వ్యవహరించే విద్యాసంస్థల యాజమాన్యాలపై భారీ జరిమానాలు విధించడంతో పాటు చట్టపరమైన కఠిన చర్యలు తీసుకోనున్నారు. ప్రభుత్వ తాజా నిర్ణయంతో విద్యాసంస్థలలో అనధికారిక ఈవెంట్లకు చెక్ పడుతుందని, విద్యార్థులకు సురక్షితమైన విద్యా వాతావరణం అందుబాటులోకి వస్తుందని అభిప్రాయాలు వ్యక్తమవుతున్నాయి. మీకు నచ్చవచ్చు: హైదరాబాద్‌లో దారుణం..మదర్సాలో 11 ఏళ్ల బాలుడిపై లైంగిక వేధింపులు.! తెలంగాణను వణికిస్తున్న కోల్డ్ వేవ్: హైదరాబాద్ పై చలిపులి పంజా.! [Movie Promotions Ban in Educationa Institutions, Commercial Events, Telangana Government, Student Safety, First, Telugu One]

Published on: Wed Nov 11, 2026 9:01AM