India News | Latest National News, Politics & Updates

రైలు 5 గంటలు లేట్: ప్రయాణికుడికి రూ. 500 జరిమానా..ఎందుకంటే.!

భారతీయ రైల్వే శాఖకు సంబంధించిన విచిత్రమైన నిబంధనలు, కొన్నిసార్లు ప్రయాణికులకు తీవ్ర ఇబ్బందులను, ఆశ్చర్యాన్ని కలిగిస్తుంటాయి. తాజాగా ముంబైలోని ప్రముఖ కళ్యాణ్ జంక్షన్‌లో జరిగిన ఒక అనూహ్య ఘటన సోషల్ మీడియాలో తీవ్ర చర్చకు దారితీసింది. తన కుటుంబ సభ్యులను సురక్షితంగా రైలు ఎక్కించేందుకు వచ్చిన ఒక వ్యక్తి, రైలు ఆలస్యం కావడంతో చివరకు రూ. 500 జరిమానా చెల్లించాల్సి వచ్చింది. ఈ విచిత్ర ఉదంతం ప్రస్తుతం సోషల్ మీడియాలో హాట్ టాపిక్‌గా మారింది. పూర్తి వివరాల్లోకి వెళితే, ఆ వ్యక్తి తన కుటుంబ సభ్యులను సాగనంపేందుకు నిబంధనల ప్రకారం ప్లాట్‌ఫాం టికెట్ కొనుగోలు చేసి స్టేషన్‌లోకి ప్రవేశించాడు. అయితే ఆ కుటుంబం ఎక్కాల్సిన రైలు సమయానికి రాకపోగా, ఏకంగా ఐదు గంటల పాటు ఆలస్యంగా నడిచింది. ప్రయాణికుడు ఎలాంటి నిబంధనలను ఉల్లంఘించాలనే దురుద్దేశంతో కాకుండా, తన కుటుంబ సభ్యులకు సాయంగా ఉండాలనే ఉద్దేశంతోనే ప్లాట్‌ఫామ్‌పై సుమారు ఐదు గంటల పాటు వేచి ఉండాల్సి వచ్చింది. రైలు రాక కోసం ఓపికగా ఎదురుచూసి, చివరికి కుటుంబం రైలు ఎక్కిన తర్వాత అతను బయటకు వెళ్తున్న సమయంలో టికెట్ కలెక్టర్ (TTE) అతన్ని అడ్డుకున్నారు. అతని వద్ద ఉన్న ప్లాట్‌ఫాం టికెట్‌ను పరిశీలించగా, దాని గడువు ముగిసిందని తేలింది. సాధారణంగా ప్లాట్‌ఫాం టికెట్ కేవలం నిర్దిష్ట గంటల పాటు మాత్రమే చెల్లుబాటు అవుతుంది. రైళ్లు గంటల తరబడి ఆలస్యం కావడం రైల్వే శాఖ అధికారుల చేతుల్లో ఉండే విషయమైనప్పటికీ, ఆ ఆలయానికి ప్రయాణికుడిని బాధ్యుడిని చేస్తూ అధికారులు ఏకంగా రూ. 500 జరిమానా విధించడం వివాదాస్పదమైంది. రైలు ఐదు గంటలు ఆలస్యం కావడం వల్లనే తాను ప్లాట్‌ఫామ్‌పై ఎక్కువ సమయం ఉండాల్సి వచ్చిందని ఆ వ్యక్తి వాపోయినప్పటికీ, అధికారులు చలించలేదు. ప్లాట్‌ఫాం టికెట్‌కు, రైళ్ల రాకపోకల సమయానికి ఎలాంటి సంబంధం ఉండదని, నిర్ణీత గడువు దాటితే జరిమానా కట్టాల్సిందేనని స్పష్టం చేశారు. ఈ ఉదంతానికి సంబంధించిన వీడియో వివరాలు ఆన్‌లైన్‌లో వైరల్ కావడంతో నెటిజన్లు తీవ్రంగా స్పందిస్తున్నారు. రైల్వే శాఖ వైఫల్యం వల్ల ట్రైన్లు గంటల తరబడి ఆలస్యమైతే, దానికి ప్రయాణికులను శిక్షించడం ఎంతవరకు కరెక్టు అని పలువురు ప్రశ్నిస్తున్నారు. మరోవైపు, నిబంధనలు నిబంధనలేనని, నిర్దిష్ట సమయం దాటితే మరో టికెట్ తీసుకోవాలి కదా అని కొంతమంది వాదిస్తున్నారు. ఏది ఏమైనప్పటికీ, రైల్వే విచిత్ర నిబంధనలు ప్రయాణికుల ఇబ్బందులు మరోసారి దేశవ్యాప్తంగా పెద్ద చర్చకు తెరలేపింది. [ Indian Railways, Platform Ticket Fine, Train Delay, Kalyan Junction, Viral News, Passenger Rights, Mumbai, PM MODI, Telugu One, Telugu News ]

Published on: Mon Oct 5, 2026 4:56PM

Indigo Airlines: విమాన ప్రయాణికులకు బిగ్ షాక్..ఛార్జీలు పెంపు. !

దేశీయ విమానయాన రంగంలో ప్రయాణికులకు బిగ్ షాక్ తగిలింది. ప్రముఖ విమానయాన సంస్థ ఇండిగో (IndiGo) దేశీయ అంతర్జాతీయ విమాన సర్వీసులపై ఫ్యూయెల్ సర్‌ఛార్జ్‌లను (Fuel Surcharge) భారీగా పెంచుతున్నట్లు అధికారికంగా ప్రకటించింది. అంతర్జాతీయ మార్కెట్లో ఏవియేషన్ టర్బైన్ ఫ్యూయెల్ (ATF - విమాన ఇంధనం) ధరలు విపరీతంగా పెరుగుతుండటంతో ఈ నిర్ణయం తీసుకున్నట్లు సంస్థ వెల్లడించింది. ముఖ్యంగా నెలవారీ ప్రాతిపదికన జెట్ ఫ్యూయెల్ ధరలలో 14 శాతానికి పైగా భారీ పెరుగుదల నమోదు కావడం విమానయాన సంస్థల నిర్వహణ భారాన్ని తారాస్థాయికి చేర్చింది. దశాబ్ద కాలంలోనే ఇంధన ధరలు అత్యధిక స్థాయికి చేరుకోవడంతో, ప్రయాణ ఖర్చులు పెరగడం అనివార్యమైందని ఇండిగో స్పష్టం చేసింది. ఈ కొత్త సవరించిన సర్‌ఛార్జ్ నిబంధనలన్నీ అక్టోబర్ 6, 2026 నుంచి అమల్లోకి రానున్నాయి. ఈ తేదీ నుంచి జరిగే అన్ని కొత్త బుకింగ్‌లకూ ఈ పెంపు వర్తిస్తుందని ఎయిర్‌లైన్స్ స్పష్టం చేసింది. ఈ తాజా పెంపుతో దేశీయ మార్గాల్లో ప్రయాణించే ప్రయాణికులు దూరాన్ని బట్టి అదనపు భారాన్ని మోయాల్సి ఉంటుంది. దేశీయ రంగంలో దూరాన్ని బట్టి ఫ్యూయెల్ ఛార్జీలను రూ. 375 నుండి రూ. 1,300 వరకు సవరించారు. ఉదాహరణకు, 0 నుండి 500 కిలోమీటర్ల దూరం వరకు ప్రయాణించే వారు ఇకపై రూ. 375 ఫ్యూయెల్ ఛార్జ్ చెల్లించాల్సి ఉంటుంది. అలాగే 501 నుండి 1,000 కిలోమీటర్ల పరిధిలోని ప్రయాణాలకు రూ. 600, 1,001 నుండి 1,500 కిలోమీటర్ల మధ్య దూరానికి రూ. 900గా ఛార్జ్ నిర్ణయించారు. ఇక 1,501 నుండి 2,000 కిలోమీటర్ల దూరం ప్రయాణించే వారికి రూ. 1,150గా సర్‌ఛార్జ్ ఉండగా, 2,000 కిలోమీటర్లకు మించి ప్రయాణించే సుదూర దేశీయ మార్గాలపై గరిష్టంగా రూ. 1,300 వరకు ఫ్యూయెల్ ఛార్జ్ వడ్డించనున్నారు. గతంలో ఏప్రిల్ నెలలో అమలు చేసిన దూరపు శ్లాబుల కంటే ఈ తాజా ధరలు మరింత పెరగడం ప్రయాణికులకు ఆర్థికంగా మరో ఎదురుదెబ్బగా మారింది. మరోవైపు అంతర్జాతీయ విమాన ప్రయాణికులపై ఈ ఫ్యూయెల్ సర్‌ఛార్జ్ భారం మరింత భారీగానే ఉండనుంది. వివిధ దేశాలకు వెళ్లే మార్గాలను బట్టి ఈ ఛార్జీలు రూ. 1,000 నుండి ఏకంగా రూ. 10,000 వరకు మారనున్నాయి. సార్క్ (SAARC) దేశాల విషయానికి వస్తే, 500 కి.మీ లోపు ప్రయాణాలకు రూ. 1,000, అంతకంటే ఎక్కువ దూరానికి రూ. 3,000 ఫ్యూయెల్ ఛార్జ్ వర్తిస్తుంది. ఇక ఆగ్నేయాసియా, జీసీసీ (GCC), మధ్యప్రాచ్యం, అలాగే ఉత్తర, తూర్పు ఆసియా ప్రాంతాలకు వెళ్లే ప్రయాణికులు రూ. 5,500 చెల్లించాలి. ఆఫ్రికా దేశాలకు రూ. 6,000 ఉండగా, యూరప్ (Europe) దేశాలకు ప్రయాణించే ప్రయాణికులకు అత్యధికంగా రూ. 10,000 వరకు ఫ్యూయెల్ ఛార్జ్ భారాన్ని మోపారు. పశ్చిమాసియాలో నెలకొన్న భౌగోళిక రాజకీయ పరిణామాలు, ఇంధన మార్కెట్ అస్థిరత కారణంగానే జెట్ ఫ్యూయెల్ ధరలు ఈ స్థాయిలో ఎగబాకాయని విశ్లేషకులు చెబుతున్నారు. ఏవియేషన్ రంగంలో ఇంధన ఖర్చులే అత్యధిక భాగం ఆక్రమిస్తుండటంతో, ఎయిర్‌లైన్స్ తమ ఆపరేటింగ్ మార్జిన్లను కాపాడుకునేందుకు ఈ భారాలను ప్రయాణికులకు బదలాయించక తప్పని పరిస్థితి ఏర్పడింది. [ IndiGo fuel surcharge, ATF price hike, IndiGo flight tickets, aviation turbine fuel, domestic flight charges, international flight tax, Telugu One, Telugu News ]

Published on: Mon Oct 5, 2026 3:36PM

తప్పు చేస్తే వదిలి పెట్టం: రుజువులు లేకుండా తొలగించం.. సుప్రీం కోర్టు.!

కేంద్ర ఎన్నికల సంఘం ప్రధాన కమిషనర్ జ్ణానేశ్ కుమార్ తప్పు చేసినట్లు నిరూపితమైతే కచ్చితంగా చర్యలు తీసుకుంటామని దేశ సర్వోన్నత న్యాయస్థానం పేర్కొంది. సర్ ప్రక్రియ చేపట్టిన తర్వాత దేశవ్యాప్తంగా కోట్ల మంది ఓటు హక్కు కోల్పోవడంపై పెద్ద ఎత్తున నిరసనలు వెల్లువెత్తడం, దేశ వ్యాప్తంగా ఆందోళనలు పెచ్చరిల్లుడం తెలిసిందే. ముఖ్యంగా కొత్తగా ఓటు హక్కు కోసం దరఖాస్తు చేసుకునే వారు ఫామ్-6 లో కూడా 2002 నాటి ఓటర్ల జాబితాలో తాతలు, తండ్రులు, కుటుంబ సభ్యుల వివరాలను పేర్కొనాలంటూ ఎన్నికల సంఘం నిబంధనలు పెట్టడం తీవ్ర విమర్శలకు దారితీసింది. ఎన్నికల సంఘంలో జ్ఞానేష్ కుమార్ ఒంటెత్తు పోకడలతో వ్యవహరిస్తున్నారన్న ఆరోపణలు వస్తున్న నేపథ్యంలో, ఆయనను ఆ పదవి నుంచి తప్పించాలంటూ సుప్రీంకోర్టులో ప్రజాప్రయోజనాల వ్యాజ్యం దాఖలైంది. ఈ పిల్ ను విచారించిన సుప్రీం కోర్టు జ్ణానేశ్ తీరుపై కీలక వ్యాఖ్యలు చేసింది. ఆయన తప్పు చేసినట్లు రుజువైతే నిస్సందేహంగా కఠిన చర్యలు తీసుకుంటామని సుప్రీం కోర్టు విస్పష్టంగా చెప్పింది. అయితే ఇప్పటికిప్పుుడు ఆయనను తలగించే అవకాశం లేదని స్పష్టం చేసింది. అయితే, మీడియా వార్తలను, పేపర్లలో వచ్చే కథనాలను నేరుగా విశ్వసించలేమని, వాటిని అధికారికంగా ధ్రువీకరించుకోవాల్సి ఉంటుందని స్పష్టం చేసింది. ఏ వ్యవస్థ అయినా సరే రాజ్యాంగం, చట్టం ప్రకారం పని చేయాల్సిందేనని తేల్చిచెప్పింది. ప్రజాస్వామ్యంలో ప్రతి ఒక్కరి ఓటు హక్కుకు భద్రత కల్పించాల్సిన పూర్తి బాధ్యత ఎన్నికల సంఘానిదేనని సుప్రీం కోర్టు కుండబద్దలు కొట్టింది. ఒకవేళ ఫామ్-6 లో చేసిన మార్పులు వ్యక్తిగతంగా, ఏకపక్షంగా తీసుకున్న నిర్ణయాలు అయితే, తగిన మూల్యం చెల్లించుకోవాల్సి ఉంటుందని హెచ్చరించింది. అదే సమయంలో.. జ్ఞానేష్ కుమార్‌ను ఇప్పటికిప్పుడు ఆ పదవి నుంచి తొలగించలేమని సుప్రీంకోర్టు పేర్కొంది. ఈ వ్యవహారంపై జ్ఞానేష్ కుమార్‌కు వ్యక్తిగతంగా నోటీసులు జారీ చేసిన ధర్మాసనం, దీనిపై పూర్తి వివరాలతో కౌంటర్ దాఖలు చేయాలని ఆదేశించింది. మరోవైపు, ఫామ్-6 పై తీవ్ర ఆరోపణలు రావడం, ప్రజల నుంచి వ్యతిరేకత పెరగడంతో కేంద్ర ఎన్నికల సంఘం కూడా వెనక్కి తగ్గింది. వివాదాస్పదమైన నిబంధనలను సవరించుకుని, గతంలో ఉన్న మాదిరిగానే ఫామ్-6 ని అనుసరించాలని స్పష్టం చేసింది. [Chief Election Commissioner Gyanesh Kumar, Supreme Court, Election Commission, Form 6, Voter List, Political News, Telugu One]

Published on: Mon Oct 5, 2026 3:08PM

ఇండియా అమెరికా వాణిజ్య ఒప్పందం: దారులు మూసుకుపోయాయా.. విత్త మంత్రి మాటల సారాంశం అదేనా?

ఇటీవలి కాలంలో ఇండియా, అమెరికా మధ్య ద్వైపాక్షిక సంబంధాలు ఎన్నో ఒడిదుడుకులు, కుదుపులు ఎదుర్కొన్నాయి. అమెరికా అధ్యక్షుడు ఉన్న డొనాల్డ్ ట్రంప్ అనుసరిస్తున్న సుంకాల విధింపు విధానాల వల్ల ఇరు దేశాల మధ్యా వాణిజ్య రంగంలో తీవ్రమైన అనిశ్చితి, సందిగ్ధత నెలకొంది. ఈ నేపథ్యంలో వాణిజ్య ఒప్పందాల పురోగతిపై నీలి నీడలు కమ్ముకున్నాయి. ఇరు దేశాల మధ్యా వాణిజ్య ఒప్పందం చర్చలు విఫలమైనట్లేననీ, ఒప్పందానికి దారులు మూసుకుపోయినట్లేననీ పరిశీలకులు అంటున్నారు. ఇండియా విత్త మంత్రి నిర్మలా సీతారామన్ కూడా అమెరికాతో వాణిజ్య ఒప్పందాలపై ఆశలు వదిలేసుకున్నట్లే అని పరోక్షంగా చెప్పారు. ఒప్పందం కుదరడం పట్ల ఆశ ఇసుమంతైనా లేదన్నట్లుగా మాట్లాడారు. అమెరికాతో వాణిజ్య ఒప్పందంపై చర్చలు సాగుతున్నప్పటటికీ, ఇరు పక్షాలు డెడ్ ఎండ్ కు చేరుకున్నాయనీ రాయితీలు ఇచ్చి పుచ్చుకునే విషయంలో అనేక అడ్డంకులు ఏర్పడ్డాయని నిర్మలా సీతారామన్ అన్నారు. ఒకవేళ ఇంకా చర్చలకు, మార్పులకు అవకాశం ఉంటే.. ఆ దిశగా ఇరు దేశాలు ప్రయత్నిస్తాయని ఒకింత నిరాశా జనకంగా చెప్పారు. అయితే.. భారత్ మరియు అమెరికా మధ్య వాణిజ్య సంబంధాలలో ప్రధాన అంశం వాణిజ్య సమతుల్యత మనకు అనుకూలంగా ఉండటం అన్న నిర్మలా సీతారామన్.. సహజంగానే, వారి వైపు లోటు ఉంది. అంటే వాణిజ్య సమతుల్యత అగ్రరాజ్యానికి ప్రతికూలంగా మారుతోందని చెప్పారు. అదే సమయంలో ఇరు దేశాల మధ్యా చర్చలు ప్రస్తుతం నిలిచిపోయాయని అంగీకరించిన ఆమె.. ఇక రాయతీలు ఇచ్చి పుచ్చుకోవడం కుదరకపోవచ్చని చెప్పారు. [India US trade Deal, Dead End, Dead Lock, Nirmala Sitharaman, US Tariffs, Donald Trump, India US Relations, Telugu One]

Published on: Mon Oct 5, 2026 2:29PM

10 నుంచి బొద్దింకల ఉద్యమం ఉధృతం: అభిజీత్ అరెస్టుకు రంగం సిద్ధం.?

కేంద్ర ఎన్నికల సంఘం ప్రధాన కమిషనర్ జ్జానేశ్ కుమార్ రాజీనామా డిమాండ్ తో బొద్దింకల పార్టీ చేపట్టిన ఆందోళనతో ముంబైలోని శివాజీ పార్క్ ప్రాంతంలో తీవ్ర ఉద్రిక్త పరిస్థితులు నెలకొన్నాయి. పోలీసులు ఈ ఆందోళనలకు అనుమతి నిరాకరించినప్పటికీ బొద్దింకల పార్టీ వెనకడుగు వేయలేదు. అయితే జంతర్ మంతర్ వద్ద జరిగిన నిరసనలతో పోల్చుకుంటే శివాజీ పార్క్ వద్ద కాక్రోచ్ పార్టీ నిర్వహిస్తున్న ఆందోళనకు ఒకింత తక్కువ ప్రజాదరణే లభించిందని చెప్పాలి. అది పక్కన పెడితే.. ఈ నెల 10 నుంచి ఆందోళనను మరింత ఉధృతం చేయనున్నట్లు కాక్రోచ్ జనతా పార్టీ అధినేత అభిజీత్ దిప్కే ప్రకటించిన నేపథ్యంలో పోలీసులు అప్రమత్తమయ్యారు. కాక్రోచ్ జనతాపార్టీ అధినేతను ముందస్తుగా అదుపులోనికి తీసుకునే అవకాశం ఉందని వార్తలు వినవస్తున్నాయి. ఈ పరిణామాలపై స్పందించిన కాక్రోచ్ జనతా పార్టీ అధికార ప్రతినిధి సౌరవ్ దాస్ తనతో పాటు అభిజీత్‌, అశుతోష్, రత్న తదితర సీజేపీ ముఖ్య నేతలను అకారణంగా అరెస్టు చేయాలని ప్రభుత్వం కుట్ర పన్నుతోందని మండిపడ్డారు. ఇటువంటి కక్షసాధింపు చర్యలకు తాము భయపడేది లేదని, యువత ఇప్పటికే చైతన్యవంతమైందని హెచ్చరించారు. నాయకులు జైలుపాలైనంత మాత్రాన హక్కుల సాధన కోసం సాగే పోరాటం ఆగదన్నారు. గతంలో నీట్ ప్రశ్నపత్రాల లీకేజీ వ్యవహారంలో నాటి విద్యాశాఖ మంత్రి ధర్మేంద్ర ప్రధాన్ రాజీనామా చేసేలా సీజేపీ పెద్ద ఎత్తున ఉద్యమాన్ని నడిపించిన చరిత్ర ఉంది. ఆ సమయంలో విద్యార్థులు రోడ్లపైకి వచ్చి ప్రభుత్వ నిర్ణయాలను తిప్పికొట్టారు. ఇప్పుడు అదే జోరుతో, ఈసారి మరింత పెద్ద లక్ష్యంతో మరో ప్రజా ఉద్యమానికి కాక్రోచ్ జనతా పార్టీ సిద్ధమవుతున్నట్లు తెలుస్తోంది. ముఖ్యంగా అక్టోబర్ 10 నుంచి భారీ ప్రజా సమీకరణతో ఉద్యమాన్ని ఉధృతం చేయాలని భావిస్తున్న తరుణంలో, ఈ అరెస్టు వార్తలు తెరపైకి రావడం, దానికి సీజేపీ ఘాటుగా స్పందించడం ప్రాధాన్యత సంతరించుకుంది. [Cockroach Janata Party Agitation, Gyanesh Kumar, CJP Protests, Abhijit arrest, Gyanesh Kumar, Mumbai Shivaji Park Agitation, Telugu One]

Published on: Mon Oct 5, 2026 1:20PM

నేహాబోరా, విద్యార్థి సమస్యలపై అలుపెరుగని పోరు: యువతరం ప్రతినిథిగా జాతీయ గుర్తింపు.!

దేశవ్యాప్తంగా విద్యా రంగానికి సంబంధించిన సమస్యలు, పరీక్షల నిర్వహణలో లోపాలు, నేషనల్ టెస్టింగ్ ఏజెన్సీ (ఎన్టీఏ తీరుపై జరుగుతున్న ఆందోళనల్లో ప్రముఖంగా వినిపిస్తున్న పేరు నేహా బోరా. జవహర్‌లాల్ నెహ్రూ యూనివర్సిటీకి (జేఎన్ యూ) చెందిన పీహెచ్‌‌డీ విద్యార్థి అయిన నేహాబోరా ప్రస్తుతం ఆల్ ఇండియా స్టూడెంట్స్ అసోసియేషన్ (ఏఐఎస్ఏ) జాతీయ అధ్యక్షురాలిగా ఉన్నారు. ఆమె వాగ్ధాటి, విద్యార్థి లోకం ఎదుర్కొంటున్న సమస్యలపై ఆమె అవగాహన, విశ్లేషణ నేహాబోరాను వర్సిటీ క్యాంపస్ స్థాయి నుంచి జాతీయ రాజకీయ చర్చల్లోకి అడుగుపెట్టేలా చేశాయి. వామపక్ష విద్యార్థి సంఘమైన ఏఐఎస్ఏ జాతీయ అధ్యక్షురాలిగా బాధ్యతలు చేపట్టిన నాటి నుంచి నేహా బోరా దేశవ్యాప్తంగా వివిధ ప్రాంతాల్లో విద్యార్థి సమస్యలపై గళం వినిపిస్తున్నారు. నీట్ , యూజీసీ నెట్వంటి జాతీయ స్థాయి ప్రవేశ పరీక్షల పేపర్ లీకులు, పరీక్షల నిర్వహణలో అవకతవకలను ఆమె తీవ్రంగా తప్పుపడుతున్నారు. కేంద్రీకృత పరీక్షా విధానం వల్ల కోట్లాది మంది యువత భవిష్యత్తు ప్రమాదంలో పడుతోందని ఆందోళన వ్యక్తం చేస్తూ, నేషనల్ ఎడ్యుకేషన్ పాలసీ ) ని వెనక్కి తీసుకోవాలని, ఎన్టీఏను ను రద్దు చేయాలని ఆమె డిమాండ్ చేస్తున్నారు. ఈ పోరాటంలో భాగంగా ఢిల్లీలోని జంతర్ మంతర్ వద్ద నేహా బోరా చేపట్టిన 23 రోజుల నిరశన దీక్ష ఆమెకు జాతీయ స్థాయిలో గుర్తింపు తెచ్చిపెట్టింది. పేపర్ లీకులకు బాధ్యత వహిస్తూ అప్పటి కేంద్ర విద్యాశాఖ మంత్రి రాజీనామా చేయాలనే డిమాండ్‌తో ఆమె ఈ దీక్షచేశా. దేశవ్యాప్తంగా విద్యార్థులు, యువతను ఒకే వేదికపైకి తెచ్చేందుకు జెన్-జెడ్ రైజింగ్ కార్యక్రమాలను నిర్వహిస్తూ ఆమె దేశ వ్యాప్తంగా పలు రాష్ట్రాలలో పర్యటించారు. కేవలం ఢిల్లీకే పరిమితం కాకుండా జార్ఖండ్, పశ్చిమ బెంగాల్ వంటి రాష్ట్రాల్లోని స్థానిక విద్యా నియామక సమస్యలపై కూడా నేహాబోరా గళమెత్తారు. తాజాగా అక్టోబర్ 3న ఢిల్లీలో జరిగిన ఓ నిరసన కార్యక్రమంతో నేహా బోరా మరోసారి జాతీయస్థాయి వార్తల్లో నిలిచారు. ఓటర్ల జాబితాల సవరణ ప్రక్రియలోని అవకతవకలు, ఓటర్ల పేర్ల తొలగింపునకు వ్యతిరేకంగా చేపట్టిన ఆందోళనలో ప్రధాన ఎన్నికల కమిషనర్ రాజీనామా కోరుతూ నిరసనకారులు గళం విప్పారు. ఈ ఆందోళనలో నేహా బోరాతో పాటు యోగేంద్ర యాదవ్, ప్రశాంత్ భూషణ్, కపిల్ సిబల్ వంటి ప్రముఖులు కూడా పాల్గొన్నారు. ఈ సందర్భంగా రెండో రోజు నిరసనల్లో భాగంగా పోలీసులు ఆమెను అదుపులోకి తీసుకోవడం జాతీయ స్థాయిలో చర్చనీయాంశమైంది. వ్యవస్థీకృత సమస్యలను వ్యక్తిగత అంశాలుగా కాకుండా విధానపరమైన లోపాలుగా ప్రస్తావించడం, ప్రత్యక్ష ఆందోళనల్లో చురుగ్గా పాల్గొనడం, సోషల్ మీడియా వేదికగా యువతను సమీకరించడం వంటి లక్షణాలు నేహా బోరాను నేటి యువ నాయకురాలిగా ప్రత్యేకంగా నిలబెడుతున్నాయి. ఆమె రాజకీయ భావజాలంతో ఏకీభవించని వారు కూడా, విద్యార్థుల హక్కుల కోసం ఆమె చేస్తున్న పోరాటాన్ని స్వాగతిస్తున్నారు. ప్రస్తుతిస్తున్నారు. దేశ వ్యాప్తంగా యువత నేహాబోరాను తన నేతగా గుర్తించి ఆదరిస్తున్నారు. విద్యార్థి ఉద్యమాలలో ఒక బలమైన గళంగా నిలుస్తున్నారు, యావత్ విద్యార్థిలోకం ప్రతినిథిగా ముందు వరుసలో ఉన్నారు. [Neha Bora, AISA Leader, JNU Research Scholar, NTA Controversy, Student Movements]

Published on: Mon Oct 5, 2026 10:38AM

అమృత్ సర్ లో పట్టపగలే కాల్పుల కలకలం: సోషల్ మీడియా ఇన్ ఫ్లుయెన్సర్ మ్యాడ్ సంధు హత్య.!

పంజాబ్‌లోని అమృత్‌సర్‌లో పట్టపగలు జరిగిన కాల్పుల ఘటన కలకలం రేపింది. గుర్తు తెలియని దుండగులు ప్రముఖ సోషల్ మీడియా ఇన్‌ఫ్లుయెన్సర్, మేకప్ ఆర్టిస్ట్ మధుసూదన్ సంధు అలియాస్ మ్యాడ్ సంధు ను పట్టపగలు కాల్పులు జరిపి హత్య చేశారు. సోషల్ మీడియాలో ఎంతో చురుగ్గా ఉంటూ లక్షలాది మంది ఫాలోవర్లను సంపాదించుకున్న మ్యాడ్ సంధు హత్య పంజాబ్ వ్యాప్తంగా సంచలనం సృష్టించింది. శనివారం సాయంత్రం సమయంలో మ్యాడ్ సంధు తన కారును శుభ్రం చేయించుకునేందుకు లోహర్కా రోడ్‌లోని ఒక కార్ వాష్ షాప్‌కు వెళ్లారు. అదే సమయంలో మోటార్‌సైకిల్‌పై వచ్చిన ఇద్దరు దుండగులు ఆయనపై అతి సమీపం నుంచి విచక్షణారహితంగా కాల్పులు జరిపి క్షణాలలో పరారయ్యారు. దుండగుల కాల్పుల్లో తీవ్రంగా గాయపడి కుప్పకూలిన మ్యాడ్ సంధును వెంటనే స్థానికులు, కుటుంబ సభ్యులు సమీపంలోని ఓ ప్రైవెట్ ఆసుపత్రికి తరలించారు. అక్కడ చికిత్స పొందుతూ మ్యాడ్ సంధు తుది శ్వాస విడిచారు. సమాచారం అందుకున్న వెంటనే రంగంలోకి దిగిన పోలీసులు ఘటనాస్థలాన్ని పరిశీలించి, అక్కడ లభించిన ఖాళీ బుల్లెట్ షెల్స్‌ను స్వాధీనం చేసుకున్నారు. నిందితులను పట్టుకునేందుకు ప్రత్యేక పోలీసు బృందాలను ఏర్పాటు చేసి దర్యాప్తు వేగవంతం చేశారు. హత్యకు గల అసలు కారణాలు ఏమిటనే దానిపై స్పష్టత రావాల్సి ఉంది. ఘటనా స్థలానికి సమీపంలోని సీసీటీవీ ఫుటేజ్‌ను క్షుణ్ణంగా పరిశీలించడంతో పాటు, మృతుడి కుటుంబ సభ్యుల వాంగ్మూలాన్ని కూడా రికార్డ్ చేశారు. ఇన్‌స్టాగ్రామ్‌లో మేకప్ ఆర్టిస్ట్రీకి సంబంధించి విభిన్నమైన కంటెంట్‌‌ను షేర్ చేస్తూ మంచి పాపులారిటీ తెచ్చుకున్న మ్యాడ్ సంధు, గతంలో తన వస్త్రధారణ, కొన్ని వీడియోల కారణంగా వివాదాలలో ఇరుక్కున్నారు. ఈ నేపథ్యంలో జరిగిన ఈ హత్యకు పాత కక్షలు, వ్యక్తిగత వివాదాలు కారణమై ఉండొచ్చని పోలీసులు భావిస్తున్నారు. [Madhusudan Sandhu, Mad Sandhu Murder, Amritsar Shooting, Punjab Crime, Social Media Influencer Murder, Telugu One]

Published on: Sun Oct 4, 2026 7:37AM

వెండి తెర ప్రయోగాలకు కేరాఫ్ అడ్రస్: సింగీతం శ్రీనివాసరావు కన్నుమూత.!

భారత చలనచిత్ర పరిశ్రమ గర్వించదగ్గ దర్శకుడు, వినూత్న ప్రయోగాల బ్రాండ్ అంబాసిడర్ సింగీతం శ్రీనివాసరావు కన్నుమూశారు, ఆయన వయస్సు 94 ఏళ్లు. చెన్నైలోని కావేరి ఆసుపత్రిలో చికిత్స పొందుతూ శనివారం (అక్టోబర్ 3) తుదిశ్వాస విడిచారు. 1931 సెప్టెంబర్ 21న నెల్లూరు జిల్లా ఉదయగిరిలో జన్మించిన ఆయన.. తెలుగు, తమిళ, కన్నడ, హిందీ భాషల్లో 60కి పైగా చిత్రాలకు దర్శకత్వం వహించారు. తనవైన వినూత్న ప్రయోగాలతో సింగీతం శ్రీనివాసరావు దక్షిణ భారత సినిమా రూపురేకలను పూర్తిగా మార్చివేశారు. వాణిజ్య సూత్రాలకు కట్టుబడకుండా, వైవిధ్యమైన కథాంశాలతో సినిమాలను తెరకెక్కించి ఆయన సినిమాలు చిరస్మరణీయంగా నిలిచిపోతాయి. ఒక్క మాట కూడా లేకుండా, కేవలం హావభావాలతో తెరకెక్కిన మూకీ చిత్రం 'పుష్పక విమానం' ప్రపంచ వ్యాప్తంగా సంచలనం సృష్టించగా, తెలుగు తెరపై తొలి సైన్స్ ఫిక్షన్ చిత్రంగా ఆదిత్య 369 అపూర్వ విజయాన్ని అందుకుంది. అలాగే జానపద చిత్రాలకు సరికొత్త జీవం పోసిన భైరవద్వీపం తెలుగు ప్రేక్షకుల గుండెల్లో శాశ్వత స్థానం సంపాదించుకుంది. తన సుదీర్ఘమైన సినీ ప్రయాణంలో లెజెండరీ నటులు డాక్టర్ రాజ్‌కుమార్, విశ్వనటుడు కమల్ హాసన్‌లతో ఆయన చేసిన కాంబినేషన్లు బాక్సాఫీస్ వద్ద చరిత్రాత్మక విజయాలను నమోదు చేశాయి. కమల్ హాసన్‌తో తెరకెక్కించిన అపూర్వ సహోదరరులు, 'మైఖేల్ మదన కామరాజు, అమావాస్య చంద్రుడు చిత్రాలు ప్రేక్షకులను అలరించాయి. 94 ఏళ్ల వయసులోనూ సినిమాపై మక్కువతో చాటుకుంటూ, నాగ్ అశ్విన్ నిర్మాణంలో స్వప్న సినిమా బ్యానర్‌పై సింగ్ గీతం అనే మ్యూజికల్ ఫాంటసీ చిత్రానికి దర్శకత్వం వహించి యువ దర్శకులకు సైతం ఆదర్శంగా నిలిచారు. తన కెరీర్‌లో 2 జాతీయ చలనచిత్ర అవార్డులు, 5 నంది అవార్డులు, 3 కర్ణాటక రాష్ట్ర చలనచిత్ర అవార్డులు, 3 ఫిల్మ్‌ఫేర్ అవార్డ్స్ సౌత్‌తో పాటు 2011లో ఫిల్మ్ ఫెడరేషన్ ఆఫ్ ఇండియా నుంచి జీవిత సాఫల్య పురస్కారాన్ని అందుకున్నారు. ఆయన భౌతికకాయానికి పలువురు సినీ ప్రముఖులు, అభిమానులు ఘన నివాళులు అర్పించారు. సింగీతం శ్రీనివాసరావు మృతి పట్ల టాలీవుడ్, కోలీవుడ్ ప్రముఖులు తీవ్ర సంతాపం వ్యక్తం చేశారు, చలనచిత్రపరిశ్రమకుర సింగీతం అందించిన సేవలు మరువరానివని పేర్కొన్నారు. [Singeetham Srinivasa Rao, Veteran Director Passes Away, Tollywood, Aditya 369, Pushpaka Vimanam, Legendary Filmmaker, Bhairava Dweepam, Telugu One]

Published on: Sun Oct 4, 2026 7:25AM

మమతా బెనర్జీ కాలి గాయం నిజమేనా?.. 2021 ఘటనపై మళ్లీ విచారణ.!

పశ్చిమ బెంగాల్ రాజకీయాల్లో మరోసారి తీవ్ర ఉత్కంఠ రేకెత్తించే పరిణామం చోటుచేసుకుంది. 2021లో జరిగిన సార్వత్రిక అసెంబ్లీ ఎన్నికల సమయంలో అప్పట్లో ముఖ్యమంత్రిగా ఉన్న తృణమూల్ కాంగ్రెస్ అధినేత్రి మమతా బెనర్జీ కాలికి గాయమైన ఘటన రాజకీయంగా ఎంతటి సంచలనం సృష్టించిందో అందరికీ తెలిసిందే. నందిగ్రామ్ నియోజకవర్గంలోని బిరులియా వద్ద ప్రచారం చేస్తుండగా, కొందరు గుర్తు తెలియని వ్యక్తులు ఉద్దేశపూర్వకంగా తనను తోసేశారని, దీనివల్ల కారు డోర్ బలముగా తగలడంతో కాలికి తీవ్ర గాయమైందని మమతా బెనర్జీ ఆరోపించారు. ఆ తర్వాత వెంటనే కోల్‌కతాలోని ఎస్ఎస్‌కేఎం ఆసుపత్రిలో చేరగా, వైద్యులు ఆమె కాలి ఎముకకు, మోకాలికి గాయమైనట్లు ప్రకటించారు. అప్పట్లో ఈ ఘటనపై రాష్ట్రవ్యాప్తంగా తీవ్ర చర్చ జరగడమే కాకుండా, మమత వీల్‌చైర్‌పైనే సుదీర్ఘ ప్రచారం కొనసాగించి ప్రజల నుంచి అపారమైన సానుభూతిని కూడగట్టుకున్నారు. ఈ అనూహ్య సానుభూతి పవనాలే ఆమెకు ఎన్నికల్లో అఖండ విజయాన్ని తెచ్చిపెట్టాయని రాజకీయ విశ్లేషకులు భావించారు. ఆ ఎన్నికల్లో మమతా బెనర్జీ నేతృత్వంలోని టీఎంసీ పార్టీ ఏకంగా 210 స్థానాల్లో ఘన విజయం సాధించి మూడోసారి అధికారంలోకి రాగా, ప్రధాన ప్రతిపక్షమైన బీజేపీ కేవలం 77 సీట్లకే పరిమితం కావాల్సి వచ్చింది. అయితే, ఆ నాటి నాటకీయ పరిణామాలపై ప్రస్తుతం బెంగాల్ రాజకీయ సమీకరణాలు పూర్తిగా మారిపోయిన నేపథ్యంలో సీఎం సువేందు అధికారి తీవ్ర ఆరోపణలు గుప్పించారు. మమతా బెనర్జీకి 2021లో తగిలిన కాలి గాయం నిజమైనది కాదని, అది పూర్తిగా సానుభూతి కోసం ఆడిన నాటకమని ఆయన విమర్శించారు. మమత కాలు విరిగినట్లు లేదా ఎముకకు బలమైన గాయమైనట్లు ఎక్కడా సరైన వైద్యపరమైన లేదా శాస్త్రీయ ఆధారాలు లేవని ఆయన స్పష్టం చేశారు. కేవలం రాజకీయ లబ్ధి కోసమే ప్రజలను మోసం చేసి, తప్పుడు ప్రచారంతో ఎన్నికల్లో లబ్ధి పొందారంటూ సువేందు అధికారి సంచలన వ్యాఖ్యలు చేశారు. ఈ నేపథ్యంలోనే ఆ నాటి ఘటనపై పూర్తి స్థాయి విచారణ జరపాలంటూ ఆయన శనివారం అధికారికంగా ఆదేశాలు జారీ చేశారు. ప్రస్తుతం అదే నందిగ్రామ్ నియోజకవర్గంలో ఉప ఎన్నిక జరుగుతుండటం, అక్కడ ఎన్నికల కోడ్ అమల్లో ఉండటంతో ఈ అంశంపై మరింత లోతైన వివరాలను త్వరలోనే వెల్లడిస్తామని సీఎం తెలిపారు. మరోవైపు, సీఎం సువేందు అధికారి చేసిన ఈ వ్యాఖ్యలను టీఎంసీ తీవ్రంగా ఖండించింది. మమతా బెనర్జీకి గాయం కాలేదని ప్రస్తుత ముఖ్యమంత్రి ఎలా నిరూపిస్తారని, ఇది కేవలం రాజకీయ కక్షసాధింపు చర్యేనని టీఎంసీ నేతలు మండిపడుతున్నారు. 2021 నాటి కాలి గాయం వివాదం మళ్లీ తెరపైకి రావడం పశ్చిమ బెంగాల్‌లో రాజకీయంగా తీవ్ర దుమారం రేపుతోంది. [ Mamata Banerjee, Suvendu Adhikari, West Bengal elections, leg injury controversy, TMC party, Nandigram bypoll, Trinamool Congress, Bengal BJP,Telugu News, Telugu One ]

Published on: Sat Oct 3, 2026 7:48PM

ఫ్లైదుబాయ్ విమాన ఘటన: ప్రయాణికుల ప్రాణాలు కాపాడిన చిన్నారి.!

ఫ్లైదుబాయ్ విమానంలో ఇటీవల చోటుచేసుకున్న భయానక ఘటనకు సంబంధించి విస్తుపోయే మరిన్ని నిజాలు ఒక్కటొక్కటిగా వెలుగులోకి వస్తున్నాయి. సరిగ్గా సరైన సమయంలో ఓ చిన్నారి చూపిన సమయస్ఫూర్తి వల్లే పెద్ద ప్రమాదం తప్పుకుందని తెలుస్తోంది. ఈ ప్రయాణంలో చోటుచేసుకున్న ఈ అనూహ్య పరిణామం విమానయాన రంగంలో చర్చనీయాంశంగా మారింది. ఆ చిన్నారి చూపిన తెగువ కారణంగా వందలాది మంది ప్రయాణికులు ఊపిరి పీల్చుకున్నారు. సంఘటన జరిగిన రోజు విమానంలో ప్రయాణిస్తున్న త్వివికా మానేస్ అనే వ్యక్తి మీడియాతో మాట్లాడుతూ ఈ కీలక విషయాలను పంచుకున్నారు. తన ఆరేళ్ల కూతురు నినా అప్రమత్తతే ఈ ఘోర ప్రమాదాన్ని నివారించిందని ఆయన స్పష్టం చేశారు. నినా విమానంలోని కాక్‌పిట్‌కు సమీపంలో ఉన్న వాష్‌రూమ్‌కు వెళ్లిన సమయంలో ఈ అనూహ్య ఘటన జరిగినట్లు తండ్రి వివరించారు. అక్కడ అసాధారణమైన అరుపులు, కేకలు వినిపించడంతో ఆ చిన్నారి ఒక్కసారిగా ఉలిక్కిపడింది. భయంతో వణికిపోయిన నినా వెంటనే తన సీటు వద్దకు పరుగెత్తుకుంటూ వచ్చి, జరిగిన విషయాన్ని తండ్రికి భయంగా వివరించింది. కూతురు చెప్పిన మాటలతో అప్రమత్తమైన త్వివికా మానేస్ వెంటనే కాక్‌పిట్ వైపు వెళ్లారు. ఆ సమయంలో కాక్‌పిట్ దగ్గర స్మిత్ అనే వ్యక్తి తీవ్ర రక్తపు మడుగులో పడి ఉండటంతోపాటు, డోర్ తెరుచుకుని ఉండటాన్ని ప్రయాణికులు గుర్తించారు. ఈ పరిణామంతో విమానంలో ఒక్కసారిగా కలకలం చెలరేగింది. అయితే, సమయానికి డోర్ తెరుచుకోవడం, చిన్నారి ఇచ్చిన సమాచారంతో ప్రయాణికులు సిబ్బంది తక్షణమే అప్రమత్తం కావడంతో పెను ముప్పు తప్పుకుందని స్పష్టమైంది. లేదంటే పరిస్థితి మరింత తీవ్రంగా ఉండేదని ప్రయాణికులు ఆందోళన వ్యక్తం చేశారు. ఇలాంటి విమాన ప్రయాణాల్లో చిన్నపాటి అప్రమత్తత కూడా ఎంతటి ప్రాణాలనైనా కాపాడుతుందనేందుకు ఈ ఘటనే నిదర్శనంగా నిలిచింది. ఈ సాహస బాలిక నినా చురుకుదనాన్ని పలువురు అభినందిస్తున్నారు. విమానంలో కెప్టెన్‌పై సహ పైలట్ దాడి చేసిన ఘటన నేపథ్యంలో, దుబాయ్‌కు చెందిన ఫ్లైదుబాయ్ సంస్థ టెల్ అవీవ్‌కు విమాన సర్వీసులను తాత్కాలికంగా నిలిపివేసింది. తదుపరి ఆదేశాలు వచ్చే వరకు ఈ నిర్ణయం అమల్లో ఉంటుందని సంస్థ సీఈఓ గైత్ అల్ గైత్ వెల్లడించారు.సెప్టెంబర్ 30న దుబాయ్ నుంచి 172 మంది ప్రయాణికులతో టెల్ అవీవ్‌కు బయలుదేరిన FZ 1073 విమానంలో ఈ ఘటన జరిగింది. భారతీయ కెప్టెన్ స్మిత్ మచ్చర్‌పై సహ పైలట్ దాడి చేయడంతో విమానం ఒక్క నిమిషంలోనే దాదాపు 17 వేల అడుగుల కిందకు పడిపోయింది. తీవ్రంగా గాయపడినప్పటికీ కెప్టెన్ ధైర్యంగా వ్యవహరించి కాక్‌పిట్ డోర్ తెరవడంతో, సిబ్బంది నిందితుడిని అదుపులోకి తీసుకున్నారు. అనంతరం విమానాన్ని సౌదీ అరేబియాలోని తబుక్‌లో అత్యవసరంగా, సురక్షితంగా ల్యాండ్ చేశారు. ఈ ఘటనపై ప్రధాని నరేంద్ర మోదీ కెప్టెన్ మచ్చర్‌తో వీడియో కాల్‌లో మాట్లాడి ఆయన ధైర్యసాహసాలను ప్రశంసించారు. ఇజ్రాయెల్ ప్రధాని బెంజమిన్ నెతన్యాహు సైతం కెప్టెన్‌ను హీరోగా కొనియాడారు.దాడికి పాల్పడిన ఒమన్ జాతీయుడైన సహ పైలట్‌ను సౌదీ అధికారులు అరెస్టు చేశారు. ఘటన వెనుక ఉగ్రవాద కోణం ఉందా అనే అంశంపై యూఏఈ అధికారులు దర్యాప్తు చేస్తున్నారు. మరోవైపు, ఎమిరేట్స్ కూడా టెల్ అవీవ్‌కు వెళ్లే కోడ్‌షేర్ విమానాలను రద్దు చేసింది. యూఏఈలో చిక్కుకున్న ఇజ్రాయెల్ పౌరులను స్వదేశానికి తరలించేందుకు ప్రత్యేక విమానాలను ఏర్పాటు చేస్తున్నారు. [ Flydubai incident, Nina Maneesh, Flydubai news in Telugu, cockpit incident, TeluguOne news, aviation safety, flight emergency news, Telugu News ]

Published on: Sat Oct 3, 2026 3:07PM