India News | Latest National News, Politics & Updates

మూడేళ్ల తర్వాత భారత్‌కు పాక్ మంత్రి.. ఎందుకో తెలుసా?

భారత్‌, పాకిస్థాన్‌ దేశాల మధ్య దౌత్యపరమైన సంబంధాలలో ఉద్రిక్తతలు కొనసాగుతున్న తరుణంలో ఒక కీలక పరిణామం చోటుచేసుకుంది. జమ్మూకశ్మీర్‌లోని పహల్గామ్‌లో ఉగ్రదాడి జరిగిన అనంతరం, భారత్‌ చేపట్టిన 'ఆపరేషన్‌ సిందూర్' (Operation Sindoor) సైనిక చర్య తర్వాత తొలిసారిగా ఒక పాకిస్థాన్ కేంద్ర మంత్రి భారత్‌లో పర్యతించనున్నారు. నవంబర్ 20 నుంచి 22 వరకు దిల్లీ వేదికగా ప్రతిష్టాత్మకంగా జరగనున్న షాంఘై సహకార సంస్థ (SCO) సివిలైజేషన్ డైలాగ్‌ ఫోరమ్ సమావేశాలకు పాకిస్థాన్ పర్యావరణ, వాతావరణ మార్పుల శాఖ మంత్రి ముసాదిక్ మసూర్ మాలిక్ (Musadik Masood Malik) హాజరుకానున్నారు. ఈ మేరకు పాకిస్థాన్ విదేశాంగ మంత్రిత్వ శాఖ అధికారికంగా ప్రకటన విడుదల చేసింది. చివరిసారిగా 2023 మే నెలలో గోవాలో జరిగిన ఎస్‌సీఓ విదేశాంగ మంత్రుల సమావేశానికి అప్పటి పాకిస్థాన్ విదేశాంగ మంత్రి బిలావల్‌ భుట్టో జర్దారీ హాజరయ్యారు. ఆ తదుపరి గత మూడేళ్ల కాలంలో ఏ ఒక్క పాకిస్థాన్ మంత్రి కూడా అధికారికంగా భారత్‌లో పర్యటించలేదు. ఇప్పుడు ముసాదిక్ మాలిక్ పర్యటన ఖరారు కావడంతో, దాదాపు మూడేళ్ల సుదీర్ఘ విరామం తర్వాత పాక్‌ మంత్రి నుంచి భారత్‌కు జరుగుతున్న తొలి అధికారిక పర్యటన ఇదే కావడం గమనార్హం. ఈ ఏడాది సెప్టెంబర్ 1 నుంచి బిష్కెక్ శిఖరాగ్ర సమావేశంలో పాకిస్థాన్ ఎస్‌సీఓ రొటేటింగ్ చైర్మన్‌షిప్‌ను స్వీకరించింది. అంతేకాకుండా 2027 ఆగస్టులో ఇస్లామాబాద్ వేదికగా జరగనున్న ఎస్‌సీఓ నేతల శిఖరాగ్ర సమావేశానికి పాకిస్థాన్ ఆతిథ్యం ఇవ్వనుంది. ఈ నేపథ్యంలో భారత్ ప్రతిపాదించిన ఈ ప్రత్యేక సంస్కృతుల సంభాషణ వేదికకు (SCO Civilisational Dialogue) హాజరుకావాలని భారత్ పంపిన ఆహ్వానాన్ని పాకిస్థాన్ అంగీకరించింది. యూరేషియా ప్రాంతంలో సాంస్కృతిక సంబంధాలను, ప్రజల మధ్య పరస్పర బంధాలను బలోపేతం చేసే లక్ష్యంతో ఈ వేదికను భారత్ ప్రారంభించింది. గత ఏడాది సెప్టెంబర్‌లో చైనా టియాంజిన్ (Tianjin) వేదికగా జరిగిన ఎస్‌సీఓ శిఖరాగ్ర సమావేశంలో ప్రధాన మంత్రి నరేంద్ర మోదీ ఈ సివిలైజేషన్ డైలాగ్ ప్రతిపాదనను తెచ్చారు. ప్రస్తుతం ఈ సమావేశాలకు ఎస్‌సీఓ సభ్య దేశాలతో పాటు డైలాగ్ పార్ట్‌నర్లు, పరిశీలకులు సహా దాదాపు 25 దేశాల ప్రతినిధులు హాజరుకానున్నారు. కాగా, గత ఏడాది ఏప్రిల్‌లో జరిగిన పహల్గామ్ ఉగ్రదాడిలో 26 మంది అమాయక పౌరులు ప్రాణాలు కోల్పోగా, ఆ తర్వాత దెబ్బతిన్న దౌత్య సంబంధాల నడుమ ముసాదిక్ మాలిక్ దిల్లీ పర్యటన ప్రాధాన్యత సంతరించుకుంది. ఈ సమావేశాల నేపథ్యంలో ఉద్రిక్తతల నడుమ ఇరు దేశాల మధ్య దౌత్య చర్చలకు మళ్లీ తెరలేస్తుందా లేదా అనేది సర్వత్రా ఆసక్తి రేకెత్తిస్తోంది. మీకు నచ్చవచ్చు: పర్సు నాటకం.. నకిలీ బంగారు బిస్కెట్.. అసలు గొలుసుతో పరార్.! [ Musadik Malik India visit, Pakistan minister India trip, SCO Civilisational Dialogue Delhi, Pakistan climate minister, Operation Sindoor, India Pakistan diplomacy ]

Published on: Sat Nov 14, 2026 7:49PM

ప్రధాని మోదీ ఫోన్లు ట్యాప్ చేయించరు..ఫోన్ ట్యాపింగ్‌పై శామ్ పిట్రోడా కీలక వ్యాఖ్యలు.!

భారత రాజకీయ వర్గాల్లో ప్రస్తుతం ఫోన్ ట్యాపింగ్ అంశం హాట్ టాపిక్‌గా మారింది. దేశ ప్రధాని నరేంద్ర మోదీపై కాంగ్రెస్ అగ్రనేత రాహుల్ గాంధీ ఇటీవల సంచలన ఆరోపణలు గుప్పించిన సంగతి తెలిసిందే. అయితే ఈ వివాదంలో తాజాగా కాంగ్రెస్ పార్టీకి చెందిన కీలక నేత, ఓవర్సీస్ కాంగ్రెస్ అధ్యక్షులు శామ్ పిట్రోడా చేసిన వ్యాఖ్యలు ఇప్పుడు అందరి దృష్టిని ఆకర్షిస్తున్నాయి. కేంద్ర ప్రభుత్వం తన ఫోన్‌ను ట్యాప్ చేస్తోందని రాహుల్ గాంధీ అంతకుముందు తీవ్రస్థాయిలో మండిపడ్డారు. దీనిపై తాజాగా ఓ ఇంటర్వ్యూలో స్పందించిన శామ్ పిట్రోడా.. రాహుల్ ఆరోపణలను బహిరంగంగానే తోసిపుచ్చారు. దేశ ప్రధాని నరేంద్ర మోదీ స్వయంగా ఇలాంటి చవకబారు పనులకు పాల్పడరని తాను గట్టిగా నమ్ముతున్నట్లు ఆయన స్పష్టం చేశారు. తన వ్యక్తిగత ఫోన్ ట్యాప్ అవుతోందనే అనుమానం తనకు ఎప్పుడూ రాలేదని శామ్ పిట్రోడా తేల్చిచెప్పారు. దేశంలో ప్రస్తుతం ప్రజలు ఎదుర్కొంటున్న ఆర్థిక, సామాజిక సమస్యలతో పాటు దృష్టి సారించాల్సిన ప్రధానాంశాలు ఎన్నో ఉన్నాయని ఆయన పేర్కొన్నారు. ప్రధాని స్థాయి వ్యక్తి ఇలాంటి అనవసరమైన విషయాలపై దృష్టి పెడతారని తాను భావించడం లేదని అన్నారు. ఇది కూడ చదవండి: టాయిలెట్‌లో ఓ కాగితం..గాల్లోనే ప్రయాణికులకు బాంబు టెన్షన్.! మరోవైపు రాహుల్ గాంధీతో తనకున్న సంబంధాల గురించి కూడా పిట్రోడా మాట్లాడారు. రాహుల్‌తో తనకు ఎంతో కాలంగా మంచి స్నేహసంబంధాలు ఉన్నాయని, ఇద్దరి మధ్య పరస్పర గౌరవం ఉందని తెలిపారు. అయితే ప్రజాస్వామ్యంలో వివిధ అంశాలపై ఒకే పార్టీలో ఉన్నప్పటికీ భిన్నాభిప్రాయాలు వ్యక్తమవడం చాలా సహజమని ఆయన అభిప్రాయపడ్డారు. పార్టీకి చెందిన అత్యున్నత నాయకుడైన రాహుల్ గాంధీ చేసిన తీవ్రమైన ఆరోపణలను, అదే పార్టీకి చెందిన మరో సీనియర్ నేత బహిరంగంగా విభేదించడం రాజకీయ వర్గాల్లో తీవ్ర చర్చకు దారితీసింది. ప్రత్యర్థులు ఈ వ్యాఖ్యలను తమకు అనుకూలంగా మలుచుకుంటుండగా, కాంగ్రెస్ పార్టీ శ్రేణుల్లో మాత్రం ఈ పరిణామం విస్మయాన్ని కలిగిస్తోంది. భారతీయ రాజకీయాల్లో గోప్యత, నిఘా వర్గాల జోక్యంపై నిత్యం ఏదో ఒక వివాదం చెలరేగుతూనే ఉంటుంది. ముఖ్యంగా ఎన్నికల సమయాల్లో లేదా కీలక రాజకీయ పరిణామాలు చోటుచేసుకునే వేళ ఫోన్ ట్యాపింగ్ ఆరోపణలు రాజకీయ పార్టీల మధ్య తీవ్ర వాగ్వాదాలకు కారణమవుతుంటాయి. ఇలాంటి సమయంలో పార్టీ అంతర్గత నాయకుల మధ్యే భిన్నాభిప్రాయాలు వ్యక్తమవడం విశేషం. రాబోయే రోజుల్లో ఈ అంశంపై కాంగ్రెస్ అధిష్టానం లేదా ఇతర ప్రతిపక్షాలు ఏ విధంగా స్పందిస్తాయనేది వేచి చూడాలి. ఈ పరిణామాలు జాతీయ రాజకీయాల్లో ఎలాంటి మలుపులు తిప్పుతాయనే దానిపై సర్వత్రా ఆసక్తి నెలకొంది. మీకు నచ్చవచ్చు: పులితో వీడియో షూటింగ్..ఊహించని విషాదం..19 ఏళ్ల యువకుడు మృతి.! [ Sam Pitroda, Rahul Gandhi, PM Narendra Modi, Phone Tapping Allegations, Congress Party News]

Published on: Sat Nov 14, 2026 5:40PM

టాయిలెట్‌లో ఓ కాగితం..గాల్లోనే ప్రయాణికులకు బాంబు టెన్షన్.!

శంషాబాద్‌లో ఇండిగో విమానం ఎమర్జెన్సీ ల్యాండింగ్.! ఆకాశంలో ప్రశాంతంగా సాగుతున్న విమాన ప్రయాణం.. ఒక్కసారిగా బాంబు భయంతో ఉత్కంఠగా మారింది. విమానం బాత్రూంలో కనిపించిన ఓ చిన్న కాగితం ప్రయాణికులను తీవ్ర భయాందోళనకు గురిచేసింది. అందులో బాంబు ఉన్నట్లు రాసి ఉండటంతో కలకలం రేగింది. దీంతో అప్రమత్తమైన పైలట్ విమానాన్ని అత్యవసరంగా ల్యాండ్ చేయాల్సి వచ్చింది. హైదరాబాద్ శంషాబాద్ అంతర్జాతీయ విమానాశ్రయంలో ఈ ఘటన చోటుచేసుకుంది. వివరాల్లోకి వెళ్తే.. కేరళలోని కన్నూర్ నుంచి హైదరాబాద్‌కు బయలుదేరిన ఇండిగో విమానం 6E 244లో ఈ ఘటన జరిగింది. విమానం గాల్లో ప్రయాణిస్తున్న సమయంలో బాత్రూంలో ఓ గుర్తుతెలియని వ్యక్తి బాంబు బెదిరింపుతో కూడిన కాగితాన్ని అతికించాడు. దాన్ని గమనించిన ప్రయాణికులు వెంటనే విమాన సిబ్బందికి సమాచారం అందించారు. దీంతో అప్రమత్తమైన విమాన సిబ్బంది పైలట్‌కు సమాచారం అందించారు. పరిస్థితి తీవ్రతను అంచనా వేసిన పైలట్.. వెంటనే సంబంధిత అధికారులను అప్రమత్తం చేసి విమానాన్ని శంషాబాద్ విమానాశ్రయంలో అత్యవసరంగా ల్యాండ్ చేశారు. ఇది కూడ చదవండి: నటుడిగా..దర్శకుడిగా..నిర్మాతగా..తెలుగు సినీ రంగంలో గిరిబాబు చెరగని ముద్ర.! విమానం సురక్షితంగా దిగిన వెంటనే ప్రయాణికులందరినీ కిందకు దించారు. అనంతరం విమానాన్ని ప్రత్యేక ఐసోలేషన్ బేకు తరలించారు. రంగంలోకి దిగిన బాంబ్ స్క్వాడ్, సీఐఎస్ఎఫ్ భద్రతా సిబ్బంది విమానాన్ని క్షుణ్ణంగా తనిఖీ చేశారు. ప్రతి భాగాన్ని పరిశీలించి అనుమానాస్పద వస్తువుల కోసం గాలించారు. అయితే తనిఖీల్లో ఎలాంటి పేలుడు పదార్థాలు లేదా అనుమానాస్పద వస్తువులు లభించకపోవడంతో అధికారులు, ప్రయాణికులు ఊపిరి పీల్చుకున్నారు. దీంతో అంతా ప్రమాదం నుంచి బయటపడినట్లయింది. అయితే విమానంలో బాంబు ఉన్నట్లు కాగితం అతికించిన వ్యక్తి ఎవరన్నది ఇప్పుడు మిస్టరీగా మారింది. ఇది ఆకతాయి చర్యనా? కావాలనే భయాందోళనలు సృష్టించేందుకు చేసిన ప్రయత్నమా? అనే కోణాల్లో అధికారులు దర్యాప్తు చేస్తున్నారు. ఓ చిన్న కాగితం.. వందల అడుగుల ఎత్తులో ప్రయాణిస్తున్న విమానంలో ఒక్కసారిగా కలకలం సృష్టించింది. ప్రయాణికుల అప్రమత్తత, పైలట్ సమయస్ఫూర్తితో పెను ప్రమాద భయం తప్పింది. అయినప్పటికీ ఈ ఘటన విమానయాన భద్రతపై మరోసారి ఆందోళన కలిగిస్తోంది. మీకు నచ్చవచ్చు: క్వాలిటీ రాజకీయాలు ఇక పనిచేయవు.. మైండ్‌సెట్ మార్చుకుంటాం: బొత్స [ Indigo Flight, Shamshabad Airport, Bomb Threat, Kannur Hyderabad Flight, Emergency Landing, CISF ]

Published on: Sat Nov 14, 2026 5:22PM

కంగనా రనౌత్‌పై కేసు నమోదు...ఎందుకంటే.!

భారతీయ జనతా పార్టీ ఎంపీ, ప్రముఖ నటి కంచనా రనౌత్ మరోసారి తీవ్ర వివాదంలో చిక్కుకున్నారు. గాంధీ కుటుంబంపై ఆమె సోషల్ మీడియా వేదికగా చేసిన కొన్ని వివాదాస్పద వ్యాఖ్యలు తీవ్ర దుమారాన్ని రేపాయి. నవంబర్ 10వ తేదీన కంగనా రనౌత్ తన అధికారిక సోషల్ మీడియా ఖాతాల ద్వారా మాజీ ప్రధాని ఇందిరా గాంధీ, సంజయ్ గాంధీ అలాగే రాజీవ్ గాంధీల మరణాలపై అత్యంత సంచలన వ్యాఖ్యలు చేస్తూ పోస్టులు షేర్ చేశారు. ఈ పరిణామాల నేపథ్యంలో హిమాచల్ ప్రదేశ్‌లోని షిమ్లాలో ఆమెపై పోలీసులు అధికారికంగా ఎఫ్‌ఐఆర్ (FIR) నమోదు చేశారు.షిమ్లాకు చెందిన రిటైర్డ్ కెప్టెన్ అతుల్ శర్మ ఇచ్చిన ఫిర్యాదు మేరకు పోలీసులు ఈ చర్యలు చేపట్టారు. నవంబర్ 13వ తేదీ రాత్రి 7:51 గంటలకు డైరెక్టర్ జనరల్ ఆఫ్ పోలీస్ (DGP) కార్యాలయానికి ఈమెయిల్ ద్వారా ఫిర్యాదు అందినట్లు అధికారులు వెల్లడించారు. కంగనా రనౌత్ తన పోస్టులలో సోనియా గాంధీని 'మిస్టరీ ఫారిన్ నేషనల్' (విదేశీ మహిళ) అంటూ అభివర్ణించడమే కాకుండా, గాంధీ కుటుంబంలోని వారసుల వరుస మరణాల తర్వాత ఆమె రాజకీయంగా ఎదగడం వెనుక అనుమానాలున్నట్లు ప్రస్తావించారు. సంజయ్ గాంధీ మరణం తర్వాత మేనకా గాంధీని నివాసం నుంచి బయటకు గంటేశారు అనే అంశాలను కూడా ఆ పోస్టులలో లేవనెత్తినట్లు ఫిర్యాదులో పేర్కొన్నారు. ఈ వ్యాఖ్యలు కేవలం రాజకీయ విమర్శల పరిధిని దాటి, సమాజంలో మతపరమైన సామరస్యాన్ని దెబ్బతీసేలా, ప్రజల మధ్య శత్రుత్వాన్ని పెంచేలా ఉన్నాయని ఫిర్యాదుదారు ఆరోపించారు. దీనివల్ల ప్రజల్లో భయాందోళనలు తలెత్తే అవకాశం ఉందని పేర్కొంటూ కంగనాపై కఠినమైన సైబర్-ఫోరెన్సిక్ దర్యాప్తు జరపాలని డిమాండ్ చేశారు. ఈ ఫిర్యాదును తీవ్రంగా పరిగణించిన షిమ్లాలోని బలుగంజ్/షిమ్లా వెస్ట్ పోలీస్ స్టేషన్ అధికారులు భారతీయ న్యాయ సంహిత (BNS) 2023లోని సెక్షన్లు 196(1)(b), 353(2), మరియు 356(2) కింద కేసులు నమోదు చేశారు. ప్రస్తుతం ఈ కేసుకు సంబంధించి సమగ్ర దర్యాప్తు కొనసాగుతోందని, ఆరోపణల నిజానిజాలను నిరూపించేందుకు అన్ని కోణాల్లోనూ పరిశీలిస్తున్నామని పోలీసు వర్గాలు వెల్లడించాయి. మీకు నచ్చవచ్చు: గిగ్ వర్కర్లకు రాహుల్ గాంధీ భరోసా.. ప్రతి డెలివరీపై 1 శాతం సంక్షేమ నిధికి.! మీకు నచ్చవచ్చు: హనీట్రాప్ వలలో మాజీ సైనికుడు: లిఫ్ట్ ఇచ్చిన పాపానికి బ్లాక్ మెయిల్.! [ Kangana Ranaut, Gandhi family, Shimla Police, BJP MP, FIR registered, Sonia Gandhi controversy]

Published on: Sat Nov 14, 2026 2:12PM

నా ఫోన్ ట్యాప్ చేస్తున్నారు.. మోదీకి అన్నీ తెలుసు: రాహుల్ గాంధీ షాకింగ్ కామెంట్స్.!

భారత రాజకీయాల్లో మరోసారి తీవ్ర ప్రకంపనలు రేపుతూ లోక్‌సభలో ప్రతిపక్ష నాయకుడు రాహుల్ గాంధీ కేంద్ర ప్రభుత్వంపై, ప్రధాన మంత్రి నరేంద్ర మోదీపై అత్యంత తీవ్రమైన సంచలన ఆరోపణలు గుప్పించారు. సోషల్ మీడియా వేదికగా ఇన్‌స్టాగ్రామ్ ప్రత్యేక "ఆస్క్ మీ" సెషన్‌లో ఆయన మాట్లాడుతూ, తన మొబైల్ ఫోన్‌ను స్వయంగా ప్రధాని మోదీనే ట్యాప్ చేయిస్తున్నారని ఘాటుగా విమర్శించారు. తన ఫోన్ నిరంతరం నిఘా నీడలో ఉందని, తాను చేస్తున్న ప్రతి ఆరోపణకు సంబంధించిన పక్కా ఆధారాలు, డిజిటల్ సాక్ష్యాలు అన్నీ తన దగ్గర ఉన్న ఈ మొబైల్ ఫోన్లోనే భద్రంగా ఉన్నాయని రాహుల్ గాంధీ స్పష్టం చేశారు. ప్రధాని మోదీకి కూడా ఈ విషయాలన్నీ క్షుణ్ణంగా తెలుసని, ఎందుకంటే ఆ ట్యాపింగ్ వ్యవహారం ఆయన కనుసన్నల్లోనే జరుగుతోందని ఆయన ఆరోపణల వేడిని మరింత పెంచారు. ఇదే సమయంలో ప్రధాని నరేంద్ర మోదీకి రాహుల్ గాంధీ మరోసారి బహిరంగ చర్చకు సవాల్ విసిరారు. దేశ ప్రయోజనాలు, విదేశీ శక్తుల జోక్యం, జాతీయ భద్రత ఆర్థిక వ్యవస్థపై ఎక్కడైనా, ఎప్పుడైనా ముఖాముఖి చర్చకు సిద్ధంగా ఉండాలని ఆయన సవాల్ చేశారు. ప్రధాని మోదీ తనకు భయపడి పారిపోతున్నారని, ఒకసారి ఆయన చర్చకు వస్తే దేశద్రోహులు ఎవరూ, విదేశీ శక్తుల కనుసన్నల్లో నడుస్తున్నదెవరు, దేశం వెనుక అసలు నిజాలు ఏమిటనే విషయాలన్నీ బయటపడతాయని రాహుల్ పేర్కొన్నారు. ఇది కూడా చదవండి: సజ్జనార్‌ యూనిఫామ్‌లో ఉన్న క్రిమినల్..సీబీఐ మాజీ డైరెక్టర్ సంచలన వ్యాఖ్యలు.! గతంలో కూడా పెగాసస్ (Pegasus) వంటి స్పైవేర్ ద్వారా తనతో పాటు దేశంలోని అనేక మంది ప్రతిపక్ష రాజకీయ నాయకుల ఫోన్లు ట్యాప్ అయ్యాయని రాహుల్ గాంధీ చేసిన వ్యాఖ్యలు అప్పట్లో దేశవ్యాప్తంగా సంచలనం సృష్టించిన విషయం తెలిసిందే. ఈ పరిణామాల నేపథ్యంలో అధికార భారతీయ జనతా పార్టీ (BJP) మరియు ఎన్డీయే పక్షాలు రాహుల్ గాంధీ ఆరోపణలను తీవ్రంగా ఖండించాయి. రాహుల్ గాంధీ కేవలం పబ్లిసిటీ కోసం, నిత్యం వార్తల్లో నిలవడం కోసమే నిరాధారమైన ఆరోపణలు చేస్తున్నారని అధికార పార్టీ నేతలు మండిపడ్డారు. పార్లమెంట్ వేదికగా ఏ అంశంపై అయినా చర్చించడానికి ప్రభుత్వం సిద్ధంగా ఉందని, కానీ పార్లమెంట్ సమావేశాలు జరిగే సమయంలో చర్చల్లో పాల్గొనకుండా ఇలా బయట విమర్శలు చేయడం సరికాదని నేతలు కౌంటర్ ఇచ్చారు. ఏది ఏమైనప్పటికీ, ఫోన్ ట్యాపింగ్ ఆరోపణలు బహిరంగ చర్చ సవాల్ అంశం ప్రస్తుతం జాతీయ రాజకీయాల్లో అత్యంత వేడెక్కిన చర్చనీయాంశంగా మారింది. మీకు నచ్చవచ్చు: ఆంధ్రప్రదేశ్ అభివృద్ధికి గేట్ వే భోగాపురం ఎయిర్‌పోర్ట్ : లోకేష్ మీకు నచ్చవచ్చు: ఇంటికో పారిశ్రామికవేత్త ఏపీ లక్ష్యం: మంత్రి లోకేష్ [ Rahul Gandhi, Phone Tapping, PM Narendra Modi, Congress Party, National News, Political Controversy ]

Published on: Fri Nov 13, 2026 5:00PM

ఎల్‌నినో ఎఫెక్ట్ : హెల్త్ ఎమర్జెన్సీ.. ప్రపంచ ఆరోగ్య సంస్థ హెచ్చరిక.!

ఎల్ నినో ప్రభావం ప్రజారోగ్యంపై తీవ్ర ప్రభావం చూపే అవకాశం ఉందని ప్రపంచ ఆరోగ్య సంస్థ హెచ్చరించింది. ముఖ్యంగా ఇండియాలో ఈ ప్రభావం తీవ్రంగా ఉండే అవకాశాలున్నాయని డబ్ల్యుహెచ్ వో పేర్కొంది. అసాధారణ ఉష్ణోగ్రతలు, సమతుల్యత లేని వర్షపాతం ప్రజారోగ్యంపై ప్రభావం చూపుతాయని పేర్కొంది. ఈ పరిస్థితిని ఎదుర్కొనేందుకు అంతర్జాతీయ స్థాయిలో అత్యున్నత స్థాయి అత్యవసర స్పందన ప్రణాళికను డబ్ల్యుహెచ్ వో ప్రకటించింది. వాతావరణ పరిస్థితుల ఆధారంగా ఆరోగ్యంపై పడే దుష్ప్రభావాలను విశ్లేషించిన డబ్ల్యూహెచ్‌ఓ, అధికంగా ఆరోగ్య ముప్పు ఎదుర్కొనే దేశాలలో ఇండియాను కూడా చేర్చింది. అలాగే బంగ్లాదేశ్, భూటాన్, నేపాల్, శ్రీలంక మాల్దీవులలో కూడా ఇదే ప్రజారోగ్యం ప్రమాదంలో పడే అవకాశం ఉందని హెచ్చరించింది. ఎల్ నినో నేరుగా వ్యాధుల వ్యాప్తికి కారణం కాదు కానీ, వాతావరణంలో ఏర్పడిన, ఏర్పడుతున్న విపరీత మార్పులు, కరవు పరిస్థితుల కారణంగా ప్రజారోగ్యానికి ప్రమాదం ఏర్పడే పరిస్థితులు ఉత్పన్నమౌతాయని ప్రపంచ ఆరోగ్య సంస్థ హెచ్చరించింది. ఈ ముప్పును ఎదుర్కొనేందుకు డబ్ల్యూహెచ్‌ఓ రూపొందించిన ప్రణాళికలో భాగంగా, వ్యాధుల కట్టడి, సకాలంలో గుర్తింపు, వైద్య సిబ్బందికి శిక్షణ, ఆసుపత్రులలో మౌలిక వసతుల కల్పన, దేశాల మధ్య సమన్వయం వంటి అంశాలపై దృష్టి సారించింది. ఇందు కోసం నిధులను కేటాయించి, ప్రాథమిక దశలోనే ముందస్తు నివారణ చర్యలు చేపట్టాలని లక్ష్యంగా పెట్టుకుంది. భారత్‌లో ఎల్‌నినో ప్రభావం వల్ల తలెత్తబోయే ప్రధాన సమస్యలలో తీవ్రమైన వడగాలులు మొదటి స్థానంలో ఉన్నాయి. ఉష్ణోగ్రతలు అసాధారణంగా పెరగడం వల్ల డీహైడ్రేషన్, వడదెబ్బ తగలడంతో పాటు గుండె, శ్వాసకోశ, మూత్రపిండాల సంబంధిత వ్యాధులతో బాధపడేవారి సంఖ్య పెరుగుతుందని హెచ్చరించింది. ముఖ్యంగా చిన్నారులు, వృద్ధులు, దీర్ఘకాలిక రోగులు, ఎండలో నిత్యం పనిచేసే శ్రామికులు ఈ వడగాలుల బారిన పడే ప్రమాదం ఎక్కువగా ఉందని వైద్య నిపుణులు ఆందోళన వ్యక్తం చేస్తున్నారు. ఇది కూడా చదవండి: సూపర్ ఎల్ నినో ఎఫెక్ట్: ఈ ఏడాది చలికాలం గాయబ్.! మరోవైపు, వర్షపాతంలో మార్పులు, తాగునీటి కొరత కారణంగా డెంగీ, మలేరియా వ్యాధుల వ్యాప్తి తీవ్రమౌతుంది. అలాగే నీటి కాలుష్యం కారణంగా ఉదర సంబధిత వ్యాధుల బారిన పడే వారి సంఖ్య ఇబ్బడి ముబ్బడిగా పెరుగుతుంది. ఈ విపత్కర పరిస్థితిని ఎదుర్కొనేందుకు కేంద్ర, రాష్ట్ర ప్రభుత్వాలు ఇప్పటి నుంచే వైద్య మరియు ఆరోగ్య రంగాలను పూర్తి సన్నద్ధం చేయాలని డబ్ల్యూహెచ్‌ఓ సూచించింది. ఆసుపత్రులలో తగినన్ని మందులు, ఓఆర్ఎస్ ప్యాకెట్లు, అత్యవసర వైద్య పరికరాలు అందుబాటులో ఉంచాలని, గ్రామీణ ప్రాంతాల్లో తాగునీటి శుద్ధిపై ప్రత్యేక నిఘా పెట్టాలని కోరింది. ప్రజలను ఎండ తీవ్రత నుంచి రక్షించేందుకు ముందస్తు అవగాహన కార్యక్రమాలు చేపట్టడం ద్వారా ప్రాణనష్టాన్ని గణనీయంగా తగ్గించవచ్చని నిపుణులు అభిప్రాయపడుతున్నారు. మీకు నచ్చవచ్చు: ఎల్ నినో ఎఫెక్ట్: ఆసియాలో ఆహార సంక్షోభం.. ఇండియాలో కరవు.! డిసెంబర్ లోనే వడగాల్పులు: ఎల్ నినో ప్రభావంతో తెలుగు రాష్ట్రాలలో విపత్కర పరిస్థితులు.! [El Nino, Effect, HealthEmergency, WHO Warning, India, Heatwave, TeluguOne]

Published on: Fri Nov 13, 2026 4:58PM

బంగాళాఖాతంలో మరో వాయుగండం: నవంబర్ 15 నాటికి తుపానుగా బలపడే అవకాశం.!

ఆగ్నేయ బంగాళాఖాతంలో ఏర్పడిన అల్పపీడనం క్రమంగా బలపడుతూ రాబోయే రెండు రోజుల్లో వాయుగుండంగా మారే అవకాశం ఉందని వాతావరణ శాఖ పేర్కొంది. మధ్య అండమాన్ సముద్రం, దానికి ఆనుకుని ఉన్న అండమాన్ నికోబార్ దీవుల ప్రాంతంలో కొనసాగిన ఉపరితల ఆవర్తనం బలపడి అల్పపీడనంగా మారిందనీ, ఇది వాయువ్య దిశగా పయనించి వచ్చే 24 నుంచి 48 గంటల్లో తీవ్ర అల్పపీడనంగా ఆ తరువాత నవంబర్ 15 నాటికి వాయుగుండంగా బలపడుతుందని పేర్కొంది. ఇది కూడా చదవండి: తీరం దాటిన మురసు: బాపట్లలో వర్ష బీభత్సం: తెల్లవారు జామున చంద్రబాబు సమీక్ష.! దీని ప్రభావంతో సముద్రం అల్లకల్లోలంగా మారుతుందనీ, బలమైన ఈదురుగాలులు వీచే అవకాశం ఉందనీ హెచ్చరించింది. అండమాన్ సముద్ర ప్రాంతంలో గంటకు 60 కిలోమీటర్ల వేగంతో గాలులు వీయవచ్చని హెచ్చరించారు. అలాగే ఆగ్నేయ బంగాళాఖాతంలో రాబోయే కొన్ని రోజుల పాటు ఇదే తరహాలో ఈదురుగాలుల ప్రభావం ఉంటుందని స్పష్టం చేశారు. అయితే ఈ అల్పపీడనం ఏ దిశగా పయనిస్తుంది, తీవ్ర వాయుగుండంగా, తుపానుగా బలపడుతుందా అన్న విషయం ఇప్పుడే చెప్పలేమని వాతావరణ శాఖ పేర్కొంది. భవిష్యత్తులో ఈ వాయుగుండం మరింత బలపడితే తీర ప్రాంతాలపై పెను ప్రభావం చూపే ప్రమాదం ఉందని వాతావరణ శాఖ పేర్కొంది. తీర ప్రాంతాలలో భారీ నుంచి అతి భారీ వర్షాలు కురిసే అవకాశం ఉందని హెచ్చరించింది. లోతట్టు ప్రాంతాల ప్రజలు అప్రమత్తంగా ఉండాలని, అధికారిక యంత్రాంగం కూడా అప్రమత్తం కావాలని హెచ్చరించింది. సముద్ర ప్రయాణాలు చేసే వారు మరియు నౌకాయాన రంగానికి చెందిన వారు వాతావరణ సూచనలను ఎప్పటికప్పుడు గమనించాలని కోరారు. మీకు నచ్చవచ్చు: మురసు తుపాను ప్రభావిత ప్రాంతాల్లో కేంద్ర బృందాల పరిశీలన: నష్టం అంచనా, కేంద్రానికి నివేదిక.! [Bay of Bengal, Depression, IMD Warning, Supertides, Wildwins, TeluguOne]

Published on: Fri Nov 13, 2026 4:11PM

యాక్సెస్ ఈక్వాలిటీలో ఏపీ టాప్: నారా చంద్రబాబు.!

టెక్నాలజీ రంగంలో భారత్ సాధించిన ప్రగతి, భవిష్యత్ ప్రణాళికలపై ఆంధ్రప్రదేశ్ ముఖ్యమంత్రి చంద్రబాబు నాయుడు తన అభిప్రాయాలను విపులంగా వివరించారు. విశాఖపట్నంలో జరుగుతున్న సీఐఐ భాగస్వామ్య సదస్సు సందర్భంగా ప్రముఖ జర్నలిస్ట్ పాల్కి శర్మ నిర్వహించి ముఖాముఖి కార్యక్రమంలో పాల్గొన్న చంద్రబాబు దేశంలో ఇన్ఫర్మేషన్ టెక్నాలజీ (ఐటీ) రంగాన్ని ప్రోత్సహిం చడంలో తాను ఎదుర్కొన్న ఇబ్బందులు, సవాళ్లు, సాధించిన విజయాలను ఈ సందర్భంగా గుర్తుచేసుకున్నారు. దేశంలో 90వ దశకం ఆరంభంలో ఆర్థిక సంస్కరణల తర్వాత ఆలోచనా విధానంలో మార్పు వచ్చిందన్న ఆయన.. మూడు దశాబ్దాల కిందట తాను కష్టపడి ఐటీ రంగాన్ని ప్రోత్సహించానని, ఆ కాలంలో ప్రధానులతో సైతం చర్చలు జరిపి టెలికాం రంగంలో సంస్కరణలు వచ్చేలా కృషి చేశానని వివరించారు. వ్యవసాయ ఆధారిత ఆర్థిక వ్యవస్థ నుంచి భారత్ నేరుగా సేవా రంగం వైపు దూసుకెళ్లడానికి ఐటీ రంగమే ప్రధాన కారణమన్నారు. ప్రపంచవ్యాప్తంగా టెక్ రంగంలో భారతీయుల పాత్ర ఎంతో కీలకమని, గ్లోబల్ కంపెనీలలో భారతీయులు అత్యున్నత స్థానాల్లో రాణిస్తున్నారని చెప్పారు. బిల్ గేట్స్‌ను ఒప్పించి హైదరాబాద్‌కు మైక్రోసాఫ్ట్ తొలి అభివృద్ధి కేంద్రాన్ని తీసుకువచ్చిన జ్ఞాపకాలను ఆయన నెమరువేసుకున్నారు. తొలుత రాజకీయ నాయకుడిగా తనను కలవడానికి నిరాకరించిన బిల్ గేట్స్‌ను తన లాప్‌టాప్ ప్రెజెంటేషన్‌తో 45 నిమిషాల పాటు చర్చించేలా ఒప్పించాననీ, గణితం, ఆంగ్ల భాష భారతీయులకు ఉన్న పట్టు టెక్ రంగంలో విజయానికి బలమైన పునాది అయిందని చంద్రబాబు చెప్పారు. కేవలం ఐటీ మాత్రమే కాకుండా భవిష్యత్తులో అమరావతిని క్వాంటం టెక్నాలజీ హబ్‌గా మారుస్తామన్నారు. వచ్చే ఏడాది ఫిబ్రవరిలో అమరావతిలో దేశంలోనే తొలి క్వాంటం కంప్యూటర్‌ను ప్రారంభించనున్నట్లు చెప్పారు. రాష్ట్ర రాజధాని అమరావతి కేవలం నిర్మాణ ప్రాజెక్ట్ మాత్రమే కాదనీ, అద్భుత, ఆధునిక నగరమన్న చంద్రబాబు, భూసమీకరణ విధానం ద్వారా ఒక్క రూపాయి ఖర్చు లేకుండా 29 వేల మంది రైతుల సహకారంతో వేల ఎకరాల భూమిని సేకరించి ల్యాండ్ మోనిటైజేషన్ ను విజయవంతం చేశామని చెప్పారు. అమరావతిలో ఎటువంటి పైప్‌లైన్ సమస్యలు రాకుండా డక్ట్ సిస్టమ్, గ్రీన్ ఎనర్జీ, జీరో పొల్యూషన్ విధానాలను అమలు చేస్తున్నామని వివరించారు. భవిష్యత్తులో ఈ నగరం ప్రపంచ స్థాయి ప్రమాణాలతో నిలుస్తుందన్నారు. ఇది కూడా చదవండి: దేవాంశ్ సినిమాల్లోకి వెడతాడేమోనని భయం: లోకేష్ సరదా వ్యాఖ్యలు తెగ వైరల్.! సమాజంలో సంపద సృష్టితో పాటు చివరి గడప వరకు సంక్షేమం అందాలనే ఉద్దేశంతో పీ4 విధానాన్ని తీసుకు వచ్చానని వివరించారు. ధనికులు మరింత ధనవంతులు కావడం కాకుండా, కింది స్థాయిలోని పేద కుటుంబాలను కూడా పైకి తీసుకురావాల్సిన బాధ్యత అందరిపై ఉందన్నారు. సంపద సృష్టితో పాటు రాష్ట్రంలో అమలు చేస్తున్న సూపర్ సిక్స్ పథకాలు, తల్లికి వందనం, రైతులకు ఆర్థిక భరోసా వంటి కార్యక్రమాల ద్వారా ప్రతి కుటుంబానికి మేలు జరుగుతోందని వివరించారు. యాక్సెస్ ఈక్వాలిటీలో దేశంలోనే ఏపీ అగ్రగామిగా ఉందని పేర్కొన్నారు. మీకు నచ్చవచ్చు: ప్రభుత్వంతో మంచు మనోజ్ భార్య ఎంవోయూ: సీఐఐ వేదికగా సంతకాలు.! ఏపీలో మారిటైమ్ రోబోటిక్స్ స్కిల్లింగ్ సెంటర్: ఇండో-పసిఫిక్ ఎక్స్‌పోర్ట్ హబ్‌గా జువ్వలదిన్నె.! [ChandrababuNaidu, Palki Sharma Interview, CIIPartnershipSummit, QuantumComputerLaunch, TeluguOne]

Published on: Fri Nov 13, 2026 1:19PM

గ్లోబల్ క్లైమేట్ చేంజ్ పెర్ఫార్మెన్స్ ఇండెక్స్: దిగజారిన ఇండియా ర్యాంక్.!

అంతర్జాతీయ స్థాయిలో వివిధ దేశాల పర్యావరణ పరిరక్షణ చర్యలు, వాతావరణ మార్పుల నియంత్రణ పనితీరును అంచనా వేసే గ్లోబల్ క్లైమేట్ చేంజ్ పెర్ఫార్మెన్స్ ఇండెక్స్ తాజా ర్యాంకింగ్స్ విడుదలయ్యాయి. ఈ జాబితాలో ఇండియా 28వ స్థానంలో నిలిచింది. గత ఏడాదితో పోలిస్తే.. ఐదు స్థానాలు దిగజారింది. ప్రపంచవ్యాప్తంగా మొత్తం 64 దేశాలు, యూరోపియన్ యూనియన్ పనితీరును విశ్లేషించి రూపొందించిన ఈ నివేదికలో భారత్ ఐదు స్థానాలు దిగజారి 28వ స్థానంలో నిలిచింది. టర్కీలోని అంటాల్య వేదికగా జరుగుతున్న ఐక్యరాజ్యసమితి వాతావరణ సదస్సు నేపథ్యంలో అంతర్జాతీయ పర్యావరణ సంస్థలు ఈ వార్షిక నివేదికను ప్రకటించాయి. మొత్తం 60.85 పాయింట్లతో భారత్ తన స్థానంలో వెనుకబడినప్పటికీ, ఓవరాల్ రేటింగ్‌లో మాత్రం మధ్యస్థ కేటగిరీని మాత్రం నిలుపుకోగలిగింది. అయితే ఇక్కడ చెప్పుకోవలసిందేంటంటే.. ఇండియా రెండేళ్లలో ఈ గ్లోబల్ క్లైమేట్ చేంజ్ పెర్ఫార్మెన్స్ ఇండెక్స్ లో ఏకంగా 18 స్థానాలు దిగజారింది. 2024లో ఇండియా 10వ స్థానంలో నిలిచింది. గత ఏడాది ఈ స్థానం 23కు పడిపోయింది. తాజాగా 28వస్థానంలో నిలిచింది. అంటే కేవలం రెండేళ్ల వ్యవధిలో గ్లోబల్ క్లైమేట్ చేంజ్ పెర్ఫార్మెన్స్ ఇండెక్స్ ఇండియా ఏకంగా 18 స్థానాలకు దిగజారిందన్నమాట. గ్రీన్‌హౌస్ వాయువుల ఉద్గారాలు, ఇంధన వినియోగం, పర్యావరణ హిత విధానాల విధానాల అమలు వంటి అంశాల్లో ఇండియా మరింత మెరుగుపడాల్సిన ఆవశ్యకతను తాజా నివేదిక తేటతెల్లం చేసింది. అన్నిటికీ మించి 2024లో పదో స్థానంలో నిలిచిన ఇండియా రెండేళ్ల వ్యవధిలోనే 28వ స్థానానికి దిగజారడం ఆందోళన కలిగిస్తోంది. 2024లో విడుదలైన నివేదికలో ప్రపంచంలోని అత్యుత్తమ పనితీరు కనబరిచిన మొదటి పది దేశాల జాబితాలో భారత్ సగర్వంగా నిలిచింది. అయితే ఆ తర్వాత ఏడాది అంటే 2025లో ఏకంగా 13 స్థానాలు కోల్పోయి 23వ ర్యాంక్‌కు పడిపోయింది. ఇప్పుడు తాజాగా మరో ఐదు స్థానాలు దిగజారింది. సౌర, పవన విద్యుత్ వంటి పునరుత్పాదక ఇంధన వనరుల విస్తరణలో భారత్ వేగంగా అడుగులు వేస్తున్నప్పటికీ, బొగ్గు ఆధారిత విద్యుత్ ఉత్పత్తిపై ఇంకా ఎక్కువగా ఆధారపడుతుండటం ఇందుకు కారణంగా నిపుణులు విశ్లేషిస్తున్నారు. పెరుగుతున్న ఇంధన అవసరాలకు తగ్గట్టుగా కర్బన ఉద్గారాల తగ్గింపు వేగం లేకపోవడం, విద్యుత్ సరఫరా, నిల్వ సామర్థ్యాలలో ఉన్న సాంకేతిక ఇబ్బందులు భారత్ గ్లోబల్ క్లైమేట్ చేంజ్ పెర్ఫార్మెన్స్ పై ప్రతికూల ప్రభావాన్ని చూపుతున్నాయి. ఇది కూడా చదవండి: చలి చంపేస్తోంది.. ఎండలు మాడ్చేస్తాయి.. వాతావరణ మార్పులతో జనం బెంబేలు పునరుత్పాదక ఇంధన రంగానికి సంబంధించిన ట్రెండ్‌లో భారత్‌కు హై రేటింగ్ దక్కినప్పటికీ, ఇతర విభాగాల్లో ఆశించిన పురోగతి కనిపించలేదు. ప్రపంచవ్యాప్తంగా 90 శాతానికి పైగా గ్రీన్‌హౌస్ వాయువులను విడుదల చేసే 64 దేశాలు, యూరోపియన్ యూనియన్‌ల పనితీరును నాలుగు ప్రధాన విభాగాల కింద 14 సూచికల ఆధారంగా ఈ ఇండెక్స్ మదింపు చేస్తుంది. విశేషమేమిటంటే, ఏ దేశం కూడా అన్ని విభాగాల్లో అత్యుత్తమ ప్రమాణాలను అందుకోలేకపోవడంతో ఈసారి కూడా మొదటి మూడు ర్యాంకులను ఖాళీగా ఉంచారు. ఈ ర్యాంకింగ్స్ లో నాలుగో స్థానంలో డెన్మార్క్ అగ్రగామిగా నిలిచింది. ఆ తర్వాతి స్థానాల్లో వరుసగా లిథువేనియా, లక్సెంబర్గ్, యూకే నిలిచాయి. అమెరికా, రష్యా, ఇరాన్ వంటి దేశాలు అట్టడుగు స్థానాల్లో ఉన్నాయి.భవిష్యత్తులో భారత్ తన ర్యాంకింగ్‌ను తిరిగి మెరుగుపరుచుకోవాలంటే పునరుత్పాదక ఇంధన సామర్థ్యాన్ని పెంచడంతో పాటు గ్రిడ్ మౌలిక సదుపాయాలపై భారీగా పెట్టుబడులు పెట్టాల్సిన అవసరం ఉంది. బొగ్గు వినియోగాన్ని దశలవారీగా తగ్గించుకోవడం, పారిశ్రామిక ఉద్గారాలపై కఠినమైన నియంత్రణ విధించడం మరియు వాతావరణ అనుకూల విధానాలను క్షేత్రస్థాయిలో సమర్థవంతంగా అమలు చేయడం ద్వారానే అంతర్జాతీయ వేదికపై భారత్ మళ్లీ టాప్-10 జాబితాలోకి చేరుకునే అవకాశం ఉంటుందని పర్యావరణ విశ్లేషకులు అభిప్రాయపడుతున్నారు. మీకు నచ్చవచ్చు: తెలంగాణను వణికిస్తున్న కోల్డ్ వేవ్: హైదరాబాద్ పై చలిపులి పంజా. సూపర్ ఎల్ నినో భయం: భారత్‌లో 15,800 మంది ప్రాణాలకు ముప్పు? [GlobalClimateIndex, IndianRank, Decrease, Twoyears, Drop, TeluguOne]

Published on: Fri Nov 13, 2026 9:30AM

కాశ్మీర్ లో కొత్త ఉగ్రసంస్థ: కుల్గామ్ దాడి దాని పనే.!

జమ్ముకశ్మీర్‌లోని కుల్గామ్ జిల్లాలో సెంట్రల్ రిజర్వ్ పోలీస్ ఫోర్స్ సిబ్బందిని లక్ష్యంగా చేసుకుని జరిగిన ఉగ్రదాడి దేశవ్యాప్తంగా కలకలం రేపింది. కాగా ఈ దాడికి పాల్పడినది పాస్దారన్-ఎ-హురియత్ కాశ్మీర్ అనే సరికొత్త ఉగ్రవాద సంస్థ అని తేలింది. ఈ దాడికి బాధ్యత వహిస్తూ ఈ నూతన ఉగ్రసంస్థ ప్రకటనతో ఆ సంస్థ ఉనికి వెలుగులోకి వచ్చింది. కుల్గామ్ జిల్లాలో మోటార్ సైకిళ్లపై వచ్చిన సాయుధ ఉగ్రవాదులు వ్యూహాత్మకంగా సీఆర్‌పీఎఫ్ చెక్‌పోస్టుపైకి విచక్షణారహితంగా కాల్పులు జరిపారు. ఈ హఠాత్పరిణామంలో ముగ్గురు సీఆర్‌పీఎఫ్ సిబ్బంది తీవ్రంగా గాయపడ్డారు. వెంటనే అప్రమత్తమైన బలగాలు ఎదురుకాల్పులు జరపడంతో ఉగ్రవాదులు అక్కడి నుంచి పరారయ్యారు. కాగా, ఈ దాడి మధ్యాహ్నం సమయంలో మీర్ బజార్ సమీపంలో చోటుచేసుకుంది. ఈ ఉగ్రదాడికి తామే పూర్తి బాధ్యులమని పాస్దారన్-ఎ-హురియత్ కాశ్మీర్ సంస్థ ప్రకటించింది. కాశ్మీర్ లోయలో ఇప్పటికే పలు ఉగ్ర సంస్థలు క్రియాశీలంగా ఉండగా, ఇప్పుడు కొత్తగా మరో ఉగ్ర సంస్థ కూడా క్రియాశీలంగా వ్యవహరించడం సంచలనంగా మారింది. భద్రతా బలగాలు మరింత అప్రమత్తంగా ఉండాల్సిన అవసరాన్ని ఎత్తి చూపింది. అదే సమయంలో నిఘా వైఫల్యం కూడా కళ్లకు కట్టింది. తాజా దాడి నేపథ్యంలో భద్రతా బలగాలు, ఇంటెలిజెన్స్ వర్గాలు అప్రమత్తమయ్యాయి. స్థానిక యువతను ఆకర్షించడానికి, కాశ్మీర్ లో భద్రత కరవు అన్న విషయాన్ని చాటే లక్ష్యంతో ఉగ్రవాద నెట్‌వర్క్‌లు ఎప్పటికప్పుడు కొత్త పేర్లతో తెరపైకి వస్తున్నాయని పరిశీలకులు విశ్లేషిస్తున్నారు. ఇది కూడా చదవండి: జమ్మూకశ్మీర్‌లో ఉగ్రదాడి: సీఆర్పీఎఫ్ క్యాంప్‌పై కాల్పులు..ముగ్గురు జవాన్లకు గాయాలు.! నిఘా సంస్థలు కూడా పాత ఉగ్రసంస్థలే.. కొత్త పేర్లతో కన్ఫ్యూజ్ చేయడానికి ప్రయత్నిస్తున్నాయని భావిస్తున్నాయి. ఇప్పుడు కుల్గామ్ దాడికి బాధ్యత మేమేనని ప్రకటించుకున్నఈ కొత్త సంస్థ వెనుక ఉన్న సూత్రధారులు ఎవరనే దానిపై నిఘా వర్గాలు, భద్రతా దళాలు ఆరా తీస్తున్నాయి. ఆరా తీస్తున్నారు. ఇటీవల కొంత కాలంగా కశ్మీర్‌లో ప్రశాంత వాతావరణం ఏర్పడిందని భావిస్తున్న తరుణంలో ఏకంగా సీఆర్పీఎఫ్ స్థావరంపైనే ఉగ్రదాడి జరగడం కలకలం రేపింది. ఈ దాడికి పాల్పడిన ఉగ్రవాదుల ఆచూకీ కోసం కుల్గామ్ పరిసర ప్రాంతాలలో సైన్యం, సీఆర్‌పీఎఫ్, పోలీసు బలగాలు సంయుక్తంగా గాలింపు చర్యలు చేపట్టాయి. సీసీటీవీ పుటేజీలను పరిశీలిస్తూ పరారైన దుండగుల కోసం గాలిస్తున్నారు. మీకు నచ్చవచ్చు: జవాన్ సాహసం: భారీ ఉగ్ర దాడి భగ్నం.! రిపబ్లిక్ డే టార్గెట్ గా ఉగ్ర కుట్ర.. నిఘావర్గాల సమాచారం [New terror outfit, Jammukashmir, Kulgam, Attack, TeluguOne]

Published on: Fri Nov 13, 2026 8:18AM