India News | Latest National News, Politics & Updates

అమెరికా చరిత్రలో ఏమున్నది గర్వకారం: అగ్రరాజ్యం చరిత్ర మొత్తం బానిసత్వం, వలసల కన్నీటి గాథలే.!

ప్రపంచాన్ని శాసిస్తున్న అగ్రరాజ్యం అమెరికా అంటే పారిశ్రామిక ప్రగతి, వ్యాపార సామర్థ్యాలు కాదు. దోపిడీలు, వివక్ష, వలసల కన్నీటి గాధలూ బానిసత్వ పోకడలూ కూడా. ఆ దేశ మూలాల్లో చారిత్రక దోపిడీలు, వివక్షా పూరిత విధానాలు దాగున్నాయి. తాజాగా అమెరికా రాజకీయ వాతావరణంలో చోటుచేసుకున్న పరిణామాలు, ఒక దేశాధినేత చేసిన వ్యాఖ్యలు ప్రపంచవ్యాప్తంగా హాట్ టాపిక్ గా మారాయి. విదేశాల నుంచి వచ్చే అగ్రశ్రేణి శాస్త్రవేత్తలు, ఇంజనీర్లు, వైద్యులు, సాంకేతిక దిగ్గజాలను ఎంతో ఆప్యాయంగా ఆహ్వానించే అమెరికా.. అదే సమయంలో వారి మాతృభూములను, సంస్కృతులను చులకన చేసి మాట్లాడటంలోని పరస్పర విరుద్ధ వైఖరిని మేధావులు తప్పుపడుతున్నారు. ఒకవైపు ప్రపంచ దేశాల నుంచి ప్రతిభను దోచుకుంటూ, మరోవైపు వారి మూలాలను కించపరిచేలా వ్యవహరించే అమెరికన్ రాజకీయ, సామాజిక ధోరణిపై ఇప్పుడు అంతర్జాతీయ స్థాయిలో చర్చ జరుగుతోంది. ఈ మొత్తం పరిణామాల నేపథ్యంలో, అసలు అమెరికా సంపద ఎలా రూపుదిద్దుకుంది? దాని వెనుక ఉన్న శ్రామిక వర్గాల పాత్ర ఏమిటి? అనే విషయాలపై పరిశీలకులు విశ్లేషణలు చేస్తున్నారు. అమెరికా ఇప్పుడు ఎంత శక్తిమంతమైన దేశమైనా, ఆ దేశ గతం అంతా మయని మరకలు, చెరిపివేయలేని మచ్చలేనని అంటున్నారు. అమెరికాకు వలస వచ్చిన వారి స్వదేశంలో పేదరికం, అసమానతలు, సంస్థాగత లోపాలు ఉన్న మాట వాస్తవమే అయినప్పటికీ, దానిని ఆసరాగా చేసుకుని విదేశీ నాగరికతలను కించపరిచే హక్కు ఏ దేశానికీ లేదన్న అభిప్రాయం బలంగా వ్యక్తమౌతోంది. వలసవాద శక్తులు, ఆర్థిక దోపిడీలు, అణగారిన వర్గాల చెమటోడ్చిన శ్రమ మీదనే ఇప్పుడు అమెరికా అగ్రరాజ్యంగా, ప్రపంచానికి పెద్దన్నగా పెత్తనం చేలాయించగలుగుతోందని గుర్తు చేస్తున్నారు. అమెరికా చరిత్రను పరిశీలిస్తే దాని ప్రగతి కేవలం పెట్టుబడిదారీ స్వేచ్ఛా మార్కెట్ వల్ల మాత్రమే రాలేదు.. యూరోపియన్ వలసదారులు అడుగుపెట్టక ముందే వేల సంవత్సరాల పాటు అక్కడ నివసించిన స్థానిక ఆదివాసీలను నిర్వాసితులను చేయడం ద్వారానే ఆ భూభాగాలపై ఆధిపత్యం సంపాదించారు. ఆ తర్వాత ఆఫ్రికా ఖండం నుంచి లక్షలాది మందిని బలవంతంగా తరలించి వారిని బానిసలుగా మార్చారు. బానిసల శ్రమతోనే అమెరికా ప్లాంటేషన్ వ్యవసాయ రంగం విపరీతంగా అభివృద్ధి చెందింది. ఆ కాలంలో పేరుకుపోయిన బానిసత్వ సంపద క్రమంగా షిప్పింగ్, బీమా, ఆర్థిక రంగాలకు పాకి, నేటి భారీ కార్పొరేట్ సామ్రాజ్యాలకు పునాది అయింది. స్వేచ్ఛను ప్రబోధించిన రాజ్యాంగం పుట్టిన దేశంలోనే దశాబ్దాల పాటు బానిసత్వం కొనసాగింది, సమానత్వాన్ని కొనియాడిన నేలమీదే వర్ణవివక్ష ఆధారిత వేర్పాటువాదం వేళ్లూనుకుంది. ఈ అంశాలు అమెరికన్ ప్రజాస్వామ్యంలోని వైరుధ్యాలకు నిలువెత్తు సాక్ష్యాలు. ప్రపంచానికి అంతర్జాతీయ నియమ నిబంధనలను బోధించే అగ్రరాజ్యం.. తన వ్యూహాత్మక ప్రయోజనాల కోసం అనేకసార్లు ఇతర సార్వభౌమ దేశాల హక్కులను కాలరాసిందన్న విమర్వలను ఇసుమంతైనా కొట్టి పారేయలేం. అమెరికా అమలు చేస్తున్న అంతర్జాతీయ వాణిజ్య విధానాలు, వలస చట్టాలు కేవలం ఆర్థిక అవకాశాల కల్పన కోసమే కాకుండా, ఇతర దేశాలపై భౌగోళిక రాజకీయ ఆధిపత్యం చెలాయించే సాధనాలుగా మారుతున్నాయన్న ఆరోపణలూ వెల్లువెత్తుతున్నాయి. సుంకాలు, మార్కెట్ ప్రవేశ నిబంధనలు, నియంత్రణలు, ఆంక్షల అస్త్రాలతో అగ్రరాజ్యం తన దేశీయ పరిశ్రమలను కాపాడుకుంటూనే, అభివృద్ధి చెందుతున్న దేశాల ఆర్థిక వ్యవస్థలపై ఒత్తిడిని తెస్తోంది. ముఖ్యంగా వలస విధానాల విషయంలోనూ ఇదే విధమైన ద్వంద్వ ప్రమాణాలు కనిపిస్తున్నాయి. అమెరికన్ విశ్వవిద్యాలయాలు, బహుళజాతి సంస్థలు విదేశాల నుంచి నైపుణ్యం కలిగిన నిపుణులను ఆహ్వానిస్తున్నప్పటికీ, కఠినమైన వీసా నిబంధనలు, రాజకీయ అనిశ్చితి కారణంగా ఆ వలస కార్మికులు తీవ్ర ఇబ్బందులు ఎదుర్కొంటున్నారు. హెచ్ వీసా వ్యవస్థ అమెరికన్ కంపెనీలకు నిపుణులను రిక్రూట్ చేసుకునే వెసులుబాటు కల్పిస్తున్నప్పటికీ, ఉద్యోగుల భద్రతను మాత్రం పూర్తిగా యాజమాన్యాల దయాదాక్షిణ్యాలకు వదిలేస్తోంది. ఈ విధానాలన్నీ అంతర్జాతీయ వాణిజ్యాన్ని సంక్లిష్టంగా మారుస్తున్నాయి. బలహీనమైన దేశాలతో జరిగే చర్చల్లో అమెరికా తన ప్రయోజనాలకే పెద్దపీట వేయడం వల్ల గ్లోబల్ కామర్స్ అసమతుల్యతకు గురవుతోంది. ఈ పరిస్థితిని ఎదుర్కొనేందుకు వర్ధమాన దేశాలు కేవలం ఆందోళనలకే పరిమితం కాకుండా, తమ స్వదేశీ తయారీ రంగాన్ని బలోపేతం చేసుకోవడం, ఎగుమతులను వైవిధ్యభరితం చేసుకోవడం కీలకమని నిపుణులు అంటున్నారు. అమెరికా అగ్రరాజ్యంగా కొనసాగడంలో ఆ దేశ సైనిక శక్తి, రక్షణ పరిశ్రమల పాత్ర కీలకం. ప్రపంచవ్యాప్తంగా వివిధ ఖండాలలో జరుగుతున్న ఘర్షణలలో అమెరికన్ బలగాలు లేదా వాటి మద్దతు ఉన్న రక్షణ సంస్థలే కీలక పాత్ర పోషిస్తున్నాయి. స్టాక్హోమ్ ఇంటర్నేషనల్ పీస్ రీసెర్చ్ ఇన్‌స్టిట్యూట్ (ఎస్ఐపీఆర్ఐ) నివేదికల ప్రకారం, ప్రపంచవ్యాప్తంగా రక్షణ రంగంపై జరుగుతున్న ఖర్చులో సింహభాగం అమెరికాదే. జాతీయ భద్రత పేరుతో భారీ ఎత్తున ఆయుధాలను విక్రయించడం, యుద్ధ వాతావరణాన్ని ప్రోత్సహించడం ద్వారా కొన్ని కార్పొరేట్ శక్తులు లాభాలను ఆర్జిస్తున్నాయనే ఆరోపణలు బలంగా ఉన్నాయి. భద్రతాపరమైన ఆందోళనలను సరిదిద్దడం ఒకెత్తు అయితే, శాంతి స్థాపనే లక్ష్యంగా ఉండాల్సిన చోట యుద్ధాలను ఒక లాభదాయక వ్యాపార మార్కెట్‌గా మార్చడం మానవాళికి పెను ముప్పుగా పరిణమించింది. ఆయుధ బదిలీలు కొన్ని సందర్భాల్లో ఉద్రిక్తతలను తగ్గించినప్పటికీ, మరికొన్నిసార్లు సంఘర్షణలను మరింత దీర్ఘకాలికంగా మార్చి అమాయక ప్రాణాల నష్టానికి కారణమవుతున్నాయి. రక్షణ రంగాన్ని కేవలం వాణిజ్య ప్రయోజనాల కోసమే కాకుండా, అంతర్జాతీయ చట్టాలు, దౌత్యపరమైన పరిష్కారాల ద్వారా నియంత్రించాల్సిన అవసరం ఎంతైనా ఉంది. గూగుల్ మాతృసంస్థ ఆల్ఫాబెట్ అధిపతి సుందర్ పిచాయ్, మైక్రోసాఫ్ట్ బాస్ సత్య నాదెళ్ల, అడోబ్ సీఈవో శాంతను నారాయణ్, ఐబీఎం అధిపతి అరవింద్ కృష్ణ, ఫెడెక్స్ రాజ్ సుబ్రమణియన్, పాలో ఆల్టో నెట్‌వర్క్స్ నికేష్ అరోడా, యూట్యూబ్ అధిపతి నీల్ మోహన్ వంటి ఎంతోమంది భారత నిపుణులు ప్రముఖ అమెరికన్ కార్పొరేట్ సంస్థల ఉన్నత స్థానాలను అలంకరించారు. ఈ దిగ్గజాల విజయాల వెనుక వారి వ్యక్తిగత ప్రతిభ, కుటుంబాల త్యాగాలు, అంకితభావం ఉన్నాయి. అమెరికాలో అందిన వాతావరణం వారికి ఎదిగేందుకు తోడ్పడినప్పటికీ, వారి ప్రాథమిక విద్యాభ్యాసానికి, సంస్కృతికి మూలమైన భారత్ దేశ పాత్రను ఎట్టి పరిస్థితుల్లోనూ విస్మరించలేము. అయితే, విదేశాల్లో అత్యున్నత స్థాయికి చేరిన ఈ ప్రవాస భారతీయులు తమ మాతృభూమి అభివృద్ధికి ఏ విధంగా తోడ్పడుతున్నారు అనే చర్చ తరచూ జరుగుతుంటుంది. కోట్లాది రూపాయల విదేశీ మారకద్రవ్యాన్ని పంపడం ద్వారా వీరు దేశ ఆర్థిక వ్యవస్థకు ఆసరాగా నిలుస్తున్నప్పటికీ, దానిని కేవలం ధర్మసహాయంగా చూడలేము. కార్పొరేట్ సంస్థల నియమ నిబంధనలకు లోబడి పనిచేసే ఈ అగ్రశ్రేణి నాయకులు, భారతదేశంలో పబ్లిక్ ఎడ్యుకేషన్, శాస్త్రీయ పరిశోధనలు, నాణ్యమైన ఆరోగ్య సేవలు, అణగారిన వర్గాల అభ్యున్నతి కోసం మరింతగా భాగస్వాములు కావాల్సిన ఆవశ్యకత ఉంది. అందరూ తిరిగి స్వదేశానికి రావాలని కోరడం సాధ్యం కాకపోయినా, వారి మేధస్సును, అనుభవాన్ని జాతీయ పునర్నిర్మాణానికి ఉపయోగించేలా మార్గాలను అన్వేషించాలి. అమెరికా కేవలం సైనిక బలంతో మాత్రమే కాకుండా, డాలర్ ఆధిపత్యం, ఫైనాన్షియల్ మార్కెట్లు, టెక్నాలజీ ప్లాట్‌ఫారమ్‌ల ద్వారా ప్రపంచంపై పట్టు బిగిస్తోంది. అంతర్జాతీయ లావాదేవీలలో డాలర్ ప్రధాన పాత్ర పోషించడం వల్ల వాషింగ్టన్ ఏకపక్షంగా ఆర్థిక ఆంక్షలను విధించే శక్తిని పొందుతోంది. ఇండియా లాంటి అభివృద్ధి చెందుతున్న దేశాలు అమెరికన్ ఆవిష్కరణలతో భాగస్వామ్యం పంచుకుంటూనే, తమ సొంత వ్యూహాత్మక స్వయంప్రతిపత్తిని కాపాడుకోవడం ముఖ్యం. సెమికండక్టర్లు, ఆర్టిఫిషియల్ ఇంటెలిజెన్స్, దేశీయ పరిశోధనలు, అధునిక తయారీ రంగాలలో భారత్ స్వయంసమృద్ధి సాధించినప్పుడే నిజమైన సాంకేతిక అభివృద్ధి సాధ్యమవుతుంది. దేశంలోని ప్రతిభావంతులు సరైన అవకాశాలు లేక విదేశాలకు వలస వెళ్లే బ్రెయిన్ డ్రైన్' సమస్యకు శాశ్వత పరిష్కారం లభించాలంటే, ఇక్కడే అంతర్జాతీయ స్థాయి పరిశోధనా సౌకర్యాలు, వృత్తిపరమైన స్వేచ్ఛను కల్పించాల్సిన బాధ్యత ప్రభుత్వాలపై ఉంది. ఇండియన్ అమెరికన్లు వ్యాపార, శాస్త్ర, వైద్య, సాంకేతిక రంగాలలో అత్యున్నత స్థానాల్లో రాణిస్తున్నప్పటికీ, సమాజంలో వర్ణవివక్షా ధోరణులు పూర్తిగా తొలగిపోయాయని చెప్పలేం. చైనా వలసదారుల బహిష్కరణలు, రెండో ప్రపంచ యుద్ధ సమయంలో జపనీస్ అమెరికన్ల నిర్బంధాలు, ఆఫ్రికన్ అమెరికన్లపై జరిగిన దశాబ్దాల అణచివేత అమెరికన్ చరిత్రలో చీకటి అధ్యాయాలుగా నిలిచాయి. ఇప్పటికీ వలసదారులపై కొన్ని వర్గాల నుంచి వ్యక్తమవుతున్న వ్యతిరేకత, వారి పట్ల చూపే వివక్ష సమాజంలో అంతర్గతంగా ఉన్న అసమానతలను బయటపెడుతోంది. విదేశీ నిపుణుల సేవలను అభినందిస్తూనే, వారి స్వదేశాలను చులకన చేసే ద్వంద్వ వైఖరి మారాలని మేధావులు అభిప్రాయపడుతున్నారు. [America History And Indian Expatriate Intellectuals, American Hegemony, Immigration American History, Immigration Policies, H1B Visa Policies,Telugu One]

Published on: Sat Oct 24, 2026 3:54PM

ఒంగోలు గిత్తలు: బ్రెజిల్ ఆర్థిక ప్రగతి ప్రదాతలు.!

ఆంధ్రప్రదేశ్ మట్టిలో పుట్టి, సముద్రాలు దాటి, బ్రెజిల్ ఆర్థిక వ్యవస్థను శాసిస్తున్న ఘనత ఒంగోలు జాతి పశువులది. నాటి ఉమ్మడి గుంటూరు, నెల్లూరు జిల్లాల పరిధిలోని గుండ్లకమ్మ నదీ తీరంలో రూపుదిద్దుకున్న ఈ పశు సంపద, నేడు ప్రపంచ పశుసంవర్ధక రంగానికే మకుటాయమానంగా ఎదిగింది. కఠినమైన వాతావరణ పరిస్థితులను తట్టుకుంటూ, బలంలో, రాజసంతో ఉట్టిపడే ఆకారంతో ఒంగోలు గిత్తలు గిత్తలు బ్రెజిల్ లో నెలోర్' పేరుతో ఆ దేశ ఆర్థిక వ్యవస్థ పురోగతిలో కీలకంగా నిలుస్తున్నాయి. ఆ దేశ మాంస ఎగుమతులకు, గ్రామీణ ఆర్థిక పురోగతికి మన ఒంగోలు గిత్తలే మూలస్తంభాలు అనడం ఇసుమంతైనా అతి శయోక్తి కాదు. ఆంధ్రప్రదేశ్ కీర్తి కిరీటమైన ఒంగోలు జాతి పశువులు, వేల మైళ్ల దూరంలో ఉన్న ఒక విదేశీ సామ్రాజ్య జీవనాడిగా మారడం గర్వకారణం. ఒంగోలు గిత్త అనగానే దేహదారుఢ్యం, రాజసానికి ప్రతీకగా నిలిచే మూపురం, వెడల్పాటి నుదురు భాగం, , దగదగ మెరిసే తెల్లని లేదా బూడిద రంగు ఛాయల శరీరం కళ్ల ముందు మొదులుతాయి. రూపంలోనే కాదు, సహనంలోనూ ఈ జాతికి సాటిలేదు. దాదాపు 45 నుంచి 50 డిగ్రీల తీవ్రమైన ఉష్ణోగ్రతలను సునాయాసంగా తట్టుకోగల అసాధారణ రోగనిరోధక శక్తి ఒంగోలు గిత్తల సొంతం. ప్రాచీన కాలం నుంచి వీటిని వ్యవసాయ పనులకు, బరువులు లాగడానికి, పాలు, మాంస అవసరాల కోసం పెంచుకునేవారు. నాటి నుంచి నేటి వరకు ఒంగోలు గిత్తల హుందాతనం తెలుగువారి గ్రామీణ సంస్కృతికి, ఆత్మగౌరవానికి ప్రతీకలుగా మారాయి. ఇటువంటి విశిష్ట లక్షణాలే బ్రెజిల్ పశుపోషకులను ఆకర్షించింది, మన ఒంగోలు గిత్తలే బ్రెజిల్ ఆర్థిక పునాదులను పటిష్టం చేశాయి. ఇండియా నుంచి నుంచి బ్రెజిల్‌కు ఒంగోలు జాతి పశువుల పయనం (రవాణా) 19వ శతాబ్దపు ద్వితీయార్థంలో ప్రారంభమైంది. క్రీస్తుశకం 1868 ప్రాంతంలో ఇంగ్లాండ్ వైపు వెళ్తున్న ఒక ఓడ బ్రెజిల్‌లోని సాల్వడార్ తీరంలో ఆగగా, అందులోని రెండు ఒంగోలు పశువులను అక్కడి స్థానికులు కొనుగోలు చేశారు. బ్రెజిల్ ఆర్థిక పురోగతికి అదే తొలి బీజం అని చెప్పచ్చు. ఆ తర్వాత 1870వ దశకంలో బ్రెజిలియన్ పశుపోషకుడు మనోయెల్ ఉబెల్హార్ట్ లెంబ్రూగర్ జర్మనీలోని హాంబర్గ్ జంతుప్రదర్శనశాలలో మెరిసిన ఒంగోలు గిత్తల రాజసానికి ముగ్ధుడై వాటిని తమ దేశానికి తీసుకు వెళ్లాడు. ఒంగోలు గిత్తల సామర్థ్యాన్ని గుర్తించిన బ్రెజిల్ వ్యాపారులు.. 19వ శతాబ్దం చివరలో, అలాగే 20వ శతాబ్దం ప్రారంభంలో భారతదేశం నుంచి పెద్ద ఎత్తున జీబూ రకం పశువులను దిగుమతి చేసుకోవడం ప్రారంభించారు. ఈ ప్రయాణంలో అత్యంత కీలకమైన ఘట్టం 1960-1962 మధ్యకాలంలో చోటుచేసుకుంది. ఆ సమయంలో భారతదేశం నుంచి బ్రెజిల్‌కు ఎగుమతి అయిన 100కు పైగా ఒంగోలు పశువులు అక్కడి పశుసంపద రూపురేకలనే మార్చివేశాయి. ముఖ్యంగా కర్వాది, గోదావరి, గోలియాస్, తాజ్‌మహల్ వంటి ప్రసిద్ధ వంశావళులకు చెందిన ఆంబోతులు బ్రెజిల్ చేరుకుని, నేటి ఆధునిక నెలోర్ పశుమందల సృష్టికి పునాది వేశాయి. 1938 నాటికే బ్రెజిల్ ప్రభుత్వం ఈ పశువుల కోసం ప్రత్యేక వంశావళి నమోదు వ్యవస్థను ఏర్పాటు చేసింది, మన ఒంగోలు పశువులు తమ జన్యు సామర్థ్యంతో బ్రెజిల్ వాతావరణంలో అద్భుతాలు సృష్టించాయి. నెల్లూరు జిల్లా పేరు మీదనే అక్కడ వీటికి నెలోర్' అనే పేరు స్థిరపడిపోయింది. బ్రెజిల్ దేశలో విస్తారమైన గడ్డి మైదానాలు, ఉష్ణమండల వాతావరణ పరిస్థితులకు ఒంగోలు జాతి పశువులు అతి తక్కువ కాలంలోనే అలవాటుపడ్డాయి. యూరోపియన్ రకాల పశువులు అక్కడి వేడికి, కీటకాల దాడికి తట్టుకోలేక విఫలమైన చోట, మన ఒంగోలు జాతి నెలోర్ పశువులు ఆ వాతావరణంలో ఇమిడిపోయాయి. వీటి దట్టమైన చర్మం, స్వేద గ్రంథుల నిర్మాణం ఉష్ణ ఒత్తిడిని సులువుగా తట్టుకునేందుకు దోహదపడ్డాయి. బాహ్య మరియు అంతర్గత పరాన్నజీవులు, ఈగలు, నల్లుల వంటి క్రిమికీటకాల దాడిని తట్టుకునే సహజ రోగనిరోధక శక్తి ఒంగోలు జాతి పశువులలో పుష్కలంగా ఉండటం బ్రెజిల్ రైతులకు కొండంత అండగా మారింది. తక్కువ నాణ్యత కలిగిన గడ్డిని మేసినప్పటికీ, శరీరం బరువును వేగంగా పెంచుకోగల ప్రత్యేక జీవక్రియ వీటి సొంతం. అంతేకాకుండా, నెలోర్ ఆవులలో ఉండే అత్యుత్తమ సంతానోత్పత్తి సామర్థ్యం, దూడలను సంరక్షించే మాతృత్వ లక్షణాలు ఈ పశువుల మందల సంఖ్య పెరుగుదలకు దోహదం చేశాయి. బ్రెజిల్ పశుపోషకులు కేవలం పశువులను మేపడమే కాకుండా, శాస్త్రీయ పద్ధతిలో జన్యు ఎంపిక ప్రక్రియను చేపట్టారు. వేగంగా బరువు పెరిగే తత్వం, నాణ్యమైన మాంస దిగుబడి, రోగనిరోధకత వంటి లక్షణాలను ప్రామాణికంగా తీసుకుని తరాల తరబడి అత్యుత్తమ జాతులను అభివృద్ధి చేశారు. ఫలితంగా, భారతదేశ ఒంగోలు పశువుల మూలాలు కలిగిన నెలోర్ జాతి, నేడు బ్రెజిల్ దేశపు వాణిజ్య ఉత్పత్తిలో కొత్త రికార్డులను సృష్టిస్తూ, ఆ దేశాన్ని ప్రపంచంలోనే అతిపెద్ద మాంస ఎగుమతిదారుగా నిలబెట్టింది. బ్రెజిల్‌లో ఒంగోలు మూలాలున్న నెలోర్ పశువుల నిర్వహణ అత్యంత శాస్త్రీయంగా సాగుతుంది. అక్కడి అపారమైన పచ్చిక బయళ్లనే వీటికి ప్రధాన ఆహార వనరుగా ఉపయోగిస్తారు. ముఖ్యంగా ఉష్ణమండల ప్రాంతాల్లో బాగా పెరిగే బ్రకేరియా రకం గడ్డి జాతులను, పియాటా, మారాండు వంటి పోషక విలువలున్న గడ్డి రకాలను విస్తృతంగా సాగు చేస్తారు. వర్షాకాలంలో పచ్చిక సమృద్ధిగా దొరికినప్పుడు పశువులు వేగంగా బరువు పెరుగుతాయి. అయితే ఎండాకాలంలో గడ్డి నాణ్యత, అందులోని మాంసకృత్తులు తగ్గే అవకాశం ఉన్నందున, రైతులు ముందుగానే ప్రత్యామ్నాయ దాణా ప్రణాళికలను సిద్ధం చేసుకుంటారు. కాలానుగుణంగా పశువులకు అవసరమైన ఖనిజ లవణాలు, ప్రొటీన్ సప్లిమెంట్లను అందిస్తూ ఉత్పాదకత తగ్గకుండా చర్యలు తీసుకుంటారు. పచ్చిక బయళ్ల నిర్వహణలోనూ బ్రెజిల్ రైతులు వినూత్న పద్ధతులను పాటిస్తున్నారు. భూమిని చిన్న చిన్న భాగాలుగా విభజించి, ఒక భాగంలో గడ్డి మేసిన తర్వాత పశువులను మరొక భాగానికి తరలిస్తారు. దీనివల్ల మొదటి భాగంలో గడ్డి మళ్లీ బలంగా పెరగడానికి తగిన సమయం దొరుకుతుంది. నేల సారాన్ని నిరంతరం పరీక్షించడం, అవసరమైన ఎరువుల వినియోగంతో గడ్డి ఉత్పత్తిని గరిష్టం చేస్తారు. ఈ విధమైన క్రమబద్ధమైన యాజమాన్య పద్ధతుల వల్ల తక్కువ విస్తీర్ణంలో ఎక్కువ పశువులను సమర్థవంతంగా పోషించడం సాధ్యమవుతోంది. నేటికీ వాతావరణం, నీటి లభ్యత, మేత నాణ్యత ఆధారంగా ఉత్పాదకత మారినప్పటికీ, ప్రాథమికంగా ఒంగోలు జాతికి ఉన్న సహజ సామర్థ్యమే ఈ విజయాలన్నింటికీ పునాదిగా నిలిచింది. ఒంగోలు జాతి పశువుల విస్తరణ బ్రెజిల్ ఆర్థిక వ్యవస్థను ఏ స్థాయిలో ప్రభావితం చేసిందో తెలిపేందుకు ఆ దేశ అధికారిక గణాంక సంస్థ ఐబీజీఈ నివేదికలో విడుదల చేసిన వివరాలే నిదర్శనం. ఆ నివేదిక ప్రకారం, ప్రస్తుతం బ్రెజిల్‌లో మొత్తం పశువుల సంఖ్య 23.43 కోట్లు. విచిత్రమేమిటంటే, ఆ దేశ జనాభా కంటే పశువుల సంఖ్యే ఎక్కువ! ఇందులో మన ఒంగోలు జాతి మూలాలున్న నెలోర్ పశువుల సంఖ్యే దాదాపు 1.10 కోట్ల కంటే ఎక్కువగా ఉంది. బ్రెజిల్ నమోదు చేసిన మొత్తం పశుసంపదలో సగానికి పైగా నెలోర్ జాతి మరియు దాని శంకర జాతులే ఆక్రమించాయంటే, ఆ దేశ ఆర్థిక రంగాన్ని మన ఒంగోలు గిత్తలు ఎంతగా శాసిస్తున్నాయో అర్థం చేసుకోవచ్చు. ఈ పశువుల ద్వారా బ్రెజిల్ ప్రతిఏటా బిలియన్ల కొద్దీ డాలర్ల విదేశీ మారకద్రవ్యాన్ని అర్జిస్తోంది. చైనా, అమెరికా, ఐరోపా, అరబ్ దేశాలకు బ్రెజిల్ ఎగుమతి చేసే నాణ్యమైన మాంసంలో అత్యధిక శాతం ఈ నెలోర్ పశువుల నుంచే వస్తోంది. ఒకప్పుడు ఆంధ్రప్రదేశ్ గ్రామీణ వీధుల్లో, పొలాల గట్ల వెంబడి సాధారణంగా తిరిగిన ఒంగోలు జాతి కోడెలు, బ్రెజిల్ దేశ వాణిజ్య రహిత ఆస్తిగా మారడం తెలుగు నేల జన్యు వైభవానికి దక్కిన అంతర్జాతీయ గుర్తింపు. విదేశాల్లో మన ఒంగోలు జాతి పశువులు కోట్లాది రూపాయల ఆర్థిక వ్యవస్థను నిర్మిస్తుంటే, స్వదేశంలో ముఖ్యంగా మన ఉమ్మడి ఆంధ్రప్రదేశ్ ప్రాంతంలో ఈ పశువుల సంఖ్య క్రమంగా తగ్గుతుండటం ఆందోళనకరం. ఆధునిక యంత్రాల రాక, వ్యవసాయంలో ట్రాక్టర్ల వాడకం పెరగడం, మేత స్థలాలు తగ్గిపోవడం వల్ల ఒంగోలు ఆంబోతుల పెంపకం నెమ్మదించింది. అయితే, బ్రెజిల్ సాధించిన విజయాన్ని స్పూర్తిగా తీసుకుని, మన రాష్ట్రంలో కూడా ఒంగోలు జాతి పరిరక్షణకు, సంవర్ధనకు ప్రభుత్వం, పశుపోషకులు నడుం బిగించాల్సిన అవసరం ఎంతైనా ఉంది. ఆధునిక కృత్రిమ గర్భధారణ సాంకేతికతలు, జన్యు మూల్యాంకనం, నాణ్యమైన పిండ మార్పిడి మ పద్ధతులను విస్తృతంగా అందుబాటులోకి తీసుకురావడం ద్వారా మన దేశంలోనూ ఒంగోలు జాతి విశిష్టతను పునరుద్ధరించవచ్చు. ఆంధ్రప్రదేశ్ పశుసంవర్ధక శాఖ కూడా ఒంగోలు జాతి సంరక్షణ కేంద్రాలను బలోపేతం చేసే దిశగా అడుగులు వేస్తోంది. బ్రెజిల్ దేశం ఒంగోలు గిత్తలను ఉపయోగించుకుని ప్రపంచ పశుపోషణ రంగానికే మహారాజుగా మారినట్లే, మనం కూడా మన సొంత ఒంగోలు జాతి పశువుల ప్రాముఖ్యతను గుర్తించి, వాణిజ్యపరంగా, సాంకేతికంగా మరింత ముందుకు తీసుకెళ్లాలి. ప్రపంచ పశు సంపద చరిత్ర పుటల్లో ఆంధ్రప్రదేశ్ పేరును చిరస్థాయిగా నిలిపిన ఒంగోలు జాతి పశు సంపదను కాపాడుకోవడం అందరి బాద్యత. [Ongole bulls Key Brazil Finance Progress, , Brazilian Nelore cattle, Livestock Prakasam District, Ongole Breed, Andhra Pradesh, Telugu One]

Published on: Sat Oct 24, 2026 2:36PM

Air Pollution: సరిగ్గా వాడితే ప్రాణవాయువు.. అతి చేస్తే కాలకూట విషం.!

మనిషికి ప్రాణాధారం గాలి. అటువంటి గాలి విషపూరితమైతే.. మానవాళి మనుగడే ప్రమాదంలో పడుతుంది. ఇప్పుడు ప్రపంచ వ్యాప్తంగా వాయు కాలుష్యం ఆందోళనకర స్థాయిలో పెరిగి.. మనిషి జీవన్మరణ సమస్యలతో సమతమమౌతున్నాడు. ప్రతి శ్వాసా ఆరోగ్యానికి ముప్పుగా మారుతూ.. మానవ జీవితాన్ని మరణంవైపు తరుముతున్న పరిస్థితి. ప్రపంచం ఎదుర్కొంటున్న అతి పెద్ద ఆరోగ్య సమస్యల్లో వాయు కాలుష్యానిదే సింహభాగం. వాయు కాలుష్యం పర్యావరణ సమతుల్యతను దెబ్బతీయడంతో ఆగదు.. అది మనికి అవయవాలపై తీవ్ర ప్రభావం చూపుతుంది. ఊపిరితిత్తులు, గుండె, మెదడు, కాలేయం, కిడ్నీలు ఇలా ప్రతి అవయవం పని తీరుపై ప్రతికూల ప్రభావం చూపుతుంది. మూత్రపిండాలు సహా అనేక అవయవాలపై ప్రభావం చూపుతోంది. హెల్త్ ఎఫెక్ట్స్ ఇన్‌స్టిట్యూట్, యూనిసెఫ్ భాగస్వామ్యంతో స్టేట్ ఆఫ్ గ్లోబల్ ఎయిర్‌–2024 నివేదిక మేరకు 221లో ప్రపంచవ్యాప్తంగా వాయు కాలుష్యం కారణంగా సంభవించిన మరణాల సంఖ్య మరణాలు రమారమి 81 లక్షలు. వాయుకాలుష్య సంబంధిత మరణాలలో ఇండియా టాప్ లో ఉంది. భారత్ లో 2021లో వాయు కాలుష్యం కారణంగా సంభవించిన మరణాల సంఖ్య 21 లక్షల పైచిలుకు. అయితే ఇక్కడ గమనించాల్సిన అంశమంటే.. వాయు కాలుష్యం అంటే.. నగరాలు, పట్టణాల్లో కనిపించే పొగమంచు మాత్రమే కాదు.. అది మనిషి ఆయుర్దాయాన్ని హరించేసే కాలకూట విషయం. స్విస్‌ సంస్థ ఐక్యూఎయిర్‌ విడుదల చేసిన 2024 ప్రపంచ వాయు నాణ్యత నివేదిక ప్రకారం, ప్రపంచంలోని అత్యంత కలుషితమైన టాప్ 20 నగరాలలో 13 ఇండియాలోనే ఉన్నాయి. ఆ జాబితాలో టాప్ ప్లేస్ లో అసోంలోని బైర్నిహాట్‌ నిలిచింది. అక్కడ వాయు కాలుష్యం సగటున పీఎమ్ 2.5 స్థాయులో నమోదైంది. దేశ రాజధాని హస్తినలో కూడా వాయు కాలుష్యం ఆందఓళనకరస్థాయిలో ఉన్నప్పటికీ.. ఈ జాబితాలో టాప్ 20లో లేదు. ఇక విషయానికి వస్తే.. పీఎమ్ 2.5 అంటే అతి సూక్ష్మమైన కాలుష్య కణాలు. ఇవి ఊపిరితిత్తుల్లోకి లోతుగా చొచ్చుకెడతాయి. కొన్ని కణాలు రక్తప్రసరణ వ్యవస్థపై కూడా ప్రభావం చూపుతాయి. అందుకే వీటి ముప్పు సాధారణ దుమ్ముతో పోలిస్తే కొన్ని రెట్లు అధికంగా ఉంటుంది. అది పక్కన పెడితే కాలుష్య స్థాయులు కాలానుగుణంగా మారుతుంటాయి. ఒక సంవత్సరం జాబితాను ప్రస్తుత పరిస్థితికి యథాతథంగా అన్వయించడం సరికాదు. టాప్ 20 జాబితాలో లేనంత మాత్రాన ఆ జాబితాలో లేని నగరాలు పొల్యూషన్ ఫ్రీ నగరాలుగా భావించడానికి వీల్లేదు. సాధారణంగా వాయు కాలుష్యం అనగానే మనకు ఢిల్లీ, ముంబై వంటి మహానగరాలు గుర్తుకొస్తాయి. ఆ నగరాల్లోనే వాయు కాలుష్య సమస్య తీవ్రంగా ఉందని భావించడం కద్దు. కానీ అది కరెక్ట్ కాదు. ఏపీ, తెలంగాణ సహా పలు రాష్ట్రాలలో వాయు కాలుష్యం ప్రజారోగ్యంపై తీవ్ర ప్రభావం చూపే స్థాయిలోనే ఉ:ది. 2024లో పార్లమెంటు వేదికగా వెల్లడించిన వివరాల మేరకు ఏపీలోని 13 నగరాలో వాయు కాలుష్య ప్రభావం తీవ్రాతి తీవ్రంగా ఉంది. విశాఖపట్నం, విజయవాడ, గుంటూరు, రాజమహేంద్రవరం, విజయనగరం, ఏలూరు, శ్రీకాకుళం, అనంతపురం, చిత్తూరు, కర్నూలు, ఒంగోలు, నెల్లూరు, కడప నగరాలు కాలుష్య ప్రభావితం అని పార్లమెంటు వేదికగా వెల్లడైంది. విశాఖపట్నంలో పారిశ్రామిక కార్యకలాపాలు, వాహనాల రాకపోకలు, నిర్మాణ పనులు వాయు కాలుష్యానికి ప్రధాన కారణాలుగా నిలుస్తున్నాయి. విజయవాడ, గుంటూరు తదితర నగరాలు వాహనాల రద్దీ, నిర్మాణాలు, వ్యర్థాల నిర్వహణ వైఫల్యం కారణంగా కాలుష్య కుహారాలుగా మారాయి. గాలిలోకి విషం ఎలా చేరుతోంది? ఇక గాలి కాలకూట విషంగా మరడానికి దారి తీస్తున్న కారణాలు ఏమిటని చూస్తే.. అదుపులేకుండా పెరిగిన వాహనాలు.. ఆ కారణంగా పెరిగిన పెట్రోల్‌, డీజిల్‌ వినియోగం. ఈ కారణంగా వెలువడే ఉద్గారాలు అలాగే.. బొగ్గు ఆధారిత విద్యుత్‌ ఉత్పత్తి, పరిశ్రమల కాలుష్యం, వ్యర్థాలను బహిరంగంగా కాల్చడం వంటివి వాయు కాలుష్యాన్ని ఇనుమడింప చేస్తున్నాయి. అతి సూక్ష్మ ధూళి, ఇతర కణాలు. ఊపిరితిత్తుల్లోకి చేరి ఆరోగ్య సమస్యల తీవ్రం చేస్తున్నాయి. వాటిలో ప్రధానంగా వాహనాలు, వాటిలో ఉపయోగించే ఇంధన ఇంధన దహనం కారణంగా వెలువడే పొగ, అలాగే.. పారిశ్రామిక ప్రక్రియలు, శిలాజ ఇంధనాల దహనం ఇంధనం పూర్తిగా మండనప్పుడు ఏర్పడే ప్రమాదకర వాయువు, ఇంకా సూర్యరశ్మి సమక్షంలో ఇతర కాలుష్య కారకాల మధ్య జరిగే రసాయన చర్యలు.. ఇవన్నీ వాయు కాలుష్యం ప్రమాదకరస్తాయికి చేరడానికి దోహదం చేస్తున్న కారణాలు. వీటికి తోడు పొగాకు పొగ, బూజు, పుప్పొడి వంటి పదార్థాలు, పంట వ్యర్థాల దగ్ధం వల్ల వెలువడే వాయువు, అడవుల్లో కార్చిచ్చు, గృహాల్లో ఘన ఇంధనాల వినియోగం కూడా కాలుష్యానికి కారణమవుతాయి. వాయు కాలుష్య నియంత్రణకు ప్రభుత్వ విధానాలు, పరిశ్రమల బాధ్యత, పట్టణ ప్రణాళిక, ప్రజా రవాణా వ్యవస్థలు పూచీపడాలి. అదెలాగంటే.. సౌర, పవన వంటి పునరుత్పాదక ఇంధనాల వినియోగాన్ని ఇతోథికంగా పెంచడం, అదే సమయంలో చమురు వినియోగం నుంచి వెలువడే కాలుష్యాన్ని తగ్గించడం. ఇక ప్రజారవాణాను బలోపేతం చేయడం, అంటే.. మెట్రో, బస్సులు, రైలు సేవలను విస్తరించి మరింతగా జన బాహుల్యానికి వాటిని అందుబాటులోకి తీసుకురావాలి. సైకిల్‌ మార్గాలు, నడకకు అనువైన రహదారులను అభివృద్ధి చేయాలి. కాలుష్య నియంత్రణ పరికరాలు సక్రమంగా పనిచేస్తున్నాయా లేదా అన్న పరిశీలన నిరంతరాయంగా జరగాలి. అలాగే నిబంధనలు ఉల్లంఘించి కాలుష్యాన్ని వెదజల్లుతున్న సంస్థలపై చట్టప్రకారం కఠిన చర్యలు తీసుకోవాలి. ఇంకా, నిర్మాణ ధూళి, చెత్త దహనంపై నియంత్రణ విధించాలి. నిర్మాణ ప్రాంతాల్లో ధూళి వ్యాప్తిని తగ్గించేందుకు అవసరమైన చర్యలు తీసుకోవాలి. చర్యలు తీసుకోవాలి. చెత్తను బహిరంగంగా కాల్చకుండా అందుకు శాస్త్రీయ విధానాన్ని అవలంబించాలి. పంట వ్యర్థాలను కాల్చకుండా నిర్వహించేందుకు అవసరమైన యంత్రాలు, సాంకేతికత, ఆర్థిక సహాయాన్ని రైతులకుఅందించాలి. వీటితో పాటు జనం కూడా ఎవరికి వారుగా వ్యక్తిగత స్థాయిలో కాలుష్య నివారణకు తమ వంతు తోడ్పాటు అందించాల్సిన అవసరం ఎంతైనా ఉంది. ఎవరికి వారు తమ నివాసాలలో పొగ, ధూళి తగ్గించేలా చర్యలు తీసుకోవాలి. ఒకప్పుడు తీవ్ర వాయు కాలుష్యంతో కూనారిల్లిన చైనా రాజధాని బీజింగ్.. ఇప్పుడు కాలుష్య నివారణ చర్యలతో కాలుష్య రహిత నగరంగా తలెత్తుకు నిలబడుతోంది. ఆ నగరంలో కాలుష్య నివారణకు తీసుకున్న చర్యలను స్ఫూర్తిగా తీసుకుని ఇండియన్ సిటీస్ ముందుకు సాగాలి. బీజింగ్‌ లో కాలుష్య నియంత్రణకు వాహనాలు, పరిశ్రమల ఉద్గారాలపై నియంత్రణలు, స్వచ్ఛమైన ఇంధనాల వినియోగం, నిరంతర పర్యవేక్షణ చర్యలు చేపట్టారు. కాలుష్యాన్ని తగ్గించాలంటే తాత్కాలిక చర్యలు కాదు శాస్త్రీయ ప్రణాళిక, దీర్ఘకాలిక ఆచరణ ముఖ్యమని బీజింగ్ అనుభవం చాటుతోంది. కాలుష్యంపై చర్చ ఏటా ఒక్క సీజన్ కు మాత్రమే పరిమితమౌతోంది. ఆ తరువాత దానిపై చర్చ ఉండటం లేదు, కాలుష్య నివారణ చర్యలకు చెల్లు చీటీ పాడేస్తున్నారు. ఇదే పరిస్థితి కొనసాగితే కాలుష్య నివారణ అన్నది ఎప్పటికీ సాధ్యం కాని, సాధించలేని ప్రణాళికగానే మిగిలిపోతుంది. ఎందుకంటే.. స్వచ్ఛమైన గాలి అన్నది లగ్జరీ కాదు.. ప్రపంచంలో జీవించే ప్రతిమనిషి ప్రథమిక హక్కు. అభివృద్ధి పేరుతో కాలుష్యాన్ని వెదజల్లుతూ ప్రభుత్వాలు, వాటి విధానాలూ గాలిని కాలుకూట విషంగా మార్చడం ఎంత మాత్రం క్షంతవ్యం కాదు. [Air Pollution Effect On Public Health, Health Problems, Air Pollution India, Andhra Pradesh, Visakhapatnam, Pollution Prevention, Telugu One]

Published on: Sat Oct 24, 2026 12:53PM

హాస్టళ్లలో విద్యార్థుల ఆత్మహత్యల నివారణకు వినూత్న ప్రయోగం..యాంటీ సూసైడ్ ఫ్యాన్స్.!

విద్యాసంస్థల్లో విద్యార్థులు బలవన్మరణాలకు పాల్పడకుండా ఉండేందుకు గుజరాత్‌లోని ప్రముఖ విశ్వవిద్యాలయం వినూత్న ఆచరణాత్మక భద్రతా చర్యకు శ్రీకారం చుట్టింది. హాస్టల్ గదుల్లో విద్యార్థులు తీవ్ర ఒత్తిడితో తనువు చాలించే ఘటనలను అడ్డుకునే దిశగా సరికొత్త సాంకేతికతను అందుబాటులోకి తెచ్చింది. దేశవ్యాప్తంగా వివిధ కాలేజీలు, హాస్టళ్లలో చదువుకునే విద్యార్థులు అకడమిక్ ఒత్తిడి, వ్యక్తిగత సమస్యల కారణంగా అఘాయిత్యాలకు పాల్పడుతున్న ఉదంతాలు ఆందోళన కలిగిస్తున్నాయి. ముఖ్యంగా హాస్టల్ గదుల్లో ఫ్యాన్లకు ఉరివేసుకుని ప్రాణాలు కోల్పోతున్న ఘటనలు విద్యావర్గాలను కలవరపెడుతున్నాయి. ఈ నేపథ్యంలో ఇటువంటి విషాదాలకు శాశ్వత బ్రేక్ వేసేందుకు గుజరాత్‌లోని వీర్ నర్మద్ సౌత్ గుజరాత్ యూనివర్సిటీ (VNSGU) కీలక నిర్ణయం తీసుకుంది. తన పరిధిలోని హాస్టల్ గదులన్నింటిలోనూ ప్రత్యేకంగా రూపొందించిన 'యాంటీ సూసైడ్' ఫ్యాన్లను ఏర్పాటు చేసింది. గుజరాత్‌లో ఈ రకమైన భద్రతా చర్యలు చేపట్టిన తొలి విశ్వవిద్యాలయంగా ఈ సంస్థ నిలిచింది. విద్యార్థుల భద్రతకు అత్యంత ప్రాధాన్యతనిస్తూ మొత్తం 354 గదుల్లో ఈ అత్యాధునిక ఫ్యాన్లను విజయవంతంగా బిగించారు. ఈ ప్రత్యేక ఫ్యాన్ల పనితీరు అత్యంత విభిన్నంగా ఉంటుంది. దీని తయారీలో ఒక ప్రత్యేకమైన స్ప్రింగ్ మెకానిజాన్ని అమర్చారు. ఫ్యాన్ సాధారణ బరువు కంటే ఎక్కువగా, అంటే సుమారు 10 కిలోలకు మించి భారం పడగానే ఆ స్ప్రింగ్ వెంటనే విడిపోతుంది. భారం పడిన క్షణంలోనే ఫ్యాన్ కిందకు దిగిపోవడంతో పాటు, విద్యుత్ సరఫరా కూడా స్వయంచాలకంగా నిలిచిపోతుంది. దీనివల్ల మనిషి బరువును ఫ్యాన్ మోయలేకపోవడంతో ఉరివేసుకునే ప్రమాదం పూర్తిగా తొలగిపోతుందని నిపుణులు స్పష్టం చేస్తున్నారు. వర్సిటీ వైస్ ఛాన్సలర్ స్వయంగా ఈ ఫ్యాన్ పనితీరును గదిలో పరిశీలించి ప్రదర్శించి చూపించారు. ఈ సరికొత్త ప్రయోగంపై విద్యావేత్తలు, సామాజిక విశ్లేషకుల నుంచి భిన్నాభిప్రాయాలు వ్యక్తమవుతున్నాయి. కేవలం భౌతిక పరమైన చర్యలతో పాటు విద్యార్థులకు సకాలంలో మానసిక కౌన్సెలింగ్ అందించడం కూడా చాలా ముఖ్యమని కొందరు సూచిస్తున్నారు. ఇటువంటి చర్యలు తాత్కాలిక భద్రతను చేకూర్చినా, విద్యార్థులలో మానసిక ఒత్తిడిని మూలాల నుంచి తొలగించే వ్యవస్థలు కూడా అవసరమని అభిప్రాయపడుతున్నారు. తక్కువ ఖర్చుతో కూడిన ఈ అద్భుతమైన సాంకేతికత దేశంలోని ఇతర విద్యా సంస్థలకు కూడా ఒక చక్కటి మార్గదర్శకంగా నిలుస్తుందని ఆశిస్తున్నారు. [ Anti-suicide fans, VNSGU hostel safety, student mental health, Gujarat University News, Suicide prevention measures, Telugu News, Telugu One ]

Published on: Fri Oct 23, 2026 7:14PM

ప్రేమించండి.. కానీ గర్ల్‌ఫ్రెండ్‌ను తల్లిని చేసి వదిలేయొద్దు.. యువకులకు గవర్నర్‌ కీలక సూచన.!

సమాజంలో మారుతున్న జీవన శైలి, యువత పోకడలపై ఉత్తరప్రదేశ్ గవర్నర్ ఆనందీబెన్ పటేల్ చేసిన వ్యాఖ్యలు ప్రస్తుతం సర్వత్ర చర్చనీయాంశంగా మారాయి. సంబంధాల విషయంలో నేటి యువత మరింత బాధ్యతాయుతంగా ప్రవర్తించాలని ఆమె హితవు పలికారు. లక్నోలోని మహర్షి యూనివర్సిటీ ఆఫ్ ఇన్ఫర్మేషన్ టెక్నాలజీలో నిర్వహించిన ఒక ప్రత్యేక కార్యక్రమంలో ఆమె ముఖ్య అతిథిగా పాల్గొన్నారు. ఈ వేదికగా విద్యార్థులు, యువతను ఉద్దేశించి ఆమె ప్రసంగించారు. నేటి తరం అనుసరిస్తున్న రిలేషన్‌షిప్‌ల ధోరణిపై ఆమె తనదైన శైలిలో స్పందించారు. గర్ల్‌ఫ్రెండ్‌ను కలిగి ఉండటంలో ఎలాంటి తప్పు లేదని, కానీ ఆ బంధానికి తగిన గౌరవం ఇవ్వాలని ఆనందీబెన్ సూచించారు. ఒక అమ్మాయితో సహజీవనం చేయడం లేదా సన్నిహితంగా ఉండి, ఆమె గర్భం దాల్చిన తర్వాత మధ్యలోనే వదిలివేయడం చాలా పెద్ద నేరమని, అమానుషమని ఆమె పేర్కొన్నారు. అలాంటి పరిస్థితుల్లో ఆ యువతిని వెంటనే పెళ్లి చేసుకుని ఆమె జీవితానికి భరోసా కల్పించాలని గవర్నర్ స్పష్టం చేశారు. భాగస్వామి పట్ల మోసపూరితంగా వ్యవహరించకుండా, తీసుకున్న నిర్ణయాలకు కట్టుబడి ఉండాల్సిన బాధ్యత ప్రతి యువకుడిపై ఉంటుందని ఆమె పునరుద్ఘాటించారు. యువత తొందరపాటు నిర్ణయాలు తీసుకునే బదులు, ముందుగా ఆర్థికంగా స్థిరపడాలని ఆనందీబెన్ పటేల్ సలహా ఇచ్చారు. తమకంటూ ఒక కెరీర్ ఏర్పరచుకుని, స్వయం సమృద్ధి సాధించిన తర్వాతే వివాహం లేదా ఇతర వ్యక్తిగత బంధాల వైపు అడుగులు వేయడం మంచిదని అభిప్రాయపడ్డారు. గవర్నర్ స్థాయి వ్యక్తి ఇలాంటి వ్యక్తిగత సామాజిక అంశాలపై బహిరంగంగా మాట్లాడటం ఇదే మొదటిసారేమి కాదు. గతంలోనూ ఆమె సహజీవన సంబంధాలు, ఆధునిక సమాజంలో మహిళల భద్రత, వారి పాత్రపై చేసిన కొన్ని వ్యాఖ్యానాలు తీవ్ర దుమారం రేపాయి, అలాగే పెద్దఎత్తున చర్చకు దారితీశాయి. ఆమె చేస్తున్న ఈ వ్యాఖ్యలను కొందరు మహిళా హక్కుల కోణంలో సమర్థిస్తుంటే, మరికొందరు ఆధునిక వ్యక్తిగత స్వేచ్ఛ దృక్పథంతో విమర్శిస్తున్నారు. ఏది ఏమైనప్పటికీ, ప్రస్తుత కాలంలో పెరుగుతున్న బాధ్యత రహిత ధోరణులకు అడ్డుకట్ట వేయాలంటే ఇటువంటి సామాజిక స్పృహ అవసరమని విశ్లేషకులు భావిస్తున్నారు. యువత తమ శారీరక, మానసిక పరిపక్వతతో పాటు చట్టపరమైన బాధ్యతలను గుర్తెరిగి నడుచుకోవాల్సిన అవసరం ఎంతైనా ఉంది. భవిష్యత్తులో ఇలాంటి విభిన్న అంశాలపై సమాజంలో మరింత విస్తృతమైన చర్చ జరిగే అవకాశం ఉందని పరిశీలకులు అంచనా వేస్తున్నారు. [ Anandiben Patel, UP Governor, youth relationships advice, girlfriend pregnancy news, social responsibility, TeluguOne news, national updates, Live in relationships India, Lucknow Maharishi University, Women safety and responsibility ]

Published on: Fri Oct 23, 2026 6:22PM

ఛత్తీస్ గఢ్ లేడీ సింగం, ఐపీఎస్ అధికారి అంకితా శర్మకు షోకాజ్: కారణమేంటో తెలుసా?

ఛత్తీస్‌గఢ్ లో లేడీ సింగంగా గుర్తింపు పొందిన సీనియర్ మహిళా ఐపీఎస్ అధికారి, రాజ్‌నంద్‌గావ్ ఎస్పీ అంకితా శర్మ వివాదంలో చిక్కుకున్నారు. ఆయుధ పూజ పేరుతో దసరా పర్వదినాన ఏకే 47తో గాలిలో కాల్పులు జరిపారు. ఈ కారణంగా సీనియర్ మహిళా ఐపీఎస్ అధికారి అంకితా శర్మకు ఛత్తీస్ గడ్ పోలీసు ప్రధాన కార్యాలయం గురువారం (అక్టోబర్ 22) షోకాజ్ నోటీసు జారీ చేసింది. రాజ్‌నంద్‌గావ్ ఎస్పీ అంకితా శర్మ దసరా రోజున జరిగిన ఒక సాంప్రదాయ ఆయుధ పూజ కార్యక్రమంలో భాగంగా ఏకే-47 రైఫిల్‌తో గాలిలోకి కాల్పులు జరిపారు. ఇందుకు సంబంధించిన వీడియో సోషల్ మీడియాలో తెగ వైరల్ అయ్యింది. ఈ నేపథ్యంలో అంకితా శర్మ కాల్పుల ఘటన పెద్ద ఎత్తున చర్చకు దారి తీసింది. క్రమశిక్షణ, ఆయుధ నిర్వహణ నిబంధనలు, నియమాలకు విరుద్ధంగా ఆమె ఎకే 47 రైఫిల్ తో గాలిలోకి కాల్పులు జరిపారని పేర్కొంటూ ఆమెకు షో కాజ్ నోటీసు జారీ అయ్యింది. అక్టోబర్ 20న పోలీస్ లైన్స్‌లో జరిగిన సాంప్రదాయ స్త్ర పూజ అనంతరం అంకితా శర్మ ఏకే 47తో కాల్పులు జరిపినట్లు రాజ్‌నంద్‌గావ్ రేంజ్ ఇన్‌స్పెక్టర్ జనరల్ ఆఫ్ పోలీస్ అజయ్ యాదవ్ ధృవీకరించారు. ఇలా ఉండగా ఆయుధ పూజ రోజు ఆమె ఎకే 47తో గాలిలోకి పలు రౌండ్లు కాల్పులు జరపడాన్ని పలువురు తప్పుపడుతున్నా.. అదే సంఖ్యలో ఆమె చర్యకు మద్దతు కూడా లభిస్తోంది. ఛత్తీస్ గడ్ లో ఇది సాధారణ సాంప్రదాయం అంటున్నారు. అయితే.. ఐపీఎస్ అధికారి హోదాలో ఉండి బహిరంగంగా ఆయుధాన్ని నిబంధనలకు విరుద్ధంగా, నిర్లక్ష్యంగా ఉపయోగించడం తగదని పలువురు అంటున్నారు. ఉపయోగించడం పట్ల తీవ్ర అభ్యంతరం వ్యక్తం చేశారు. [Show Cause Notice To IPS Officer Ankita Sharma, AK47 Firing, Chhattisgarh Police , Rajnandgaon SP Ankita Sharma, Chhattisgarh Police Department, Telugu One]

Published on: Fri Oct 23, 2026 3:39PM

తెలుగు రాష్ట్రాలలో ఈడీ దాడులు: పూణె కేసు ఆధారంగా తనిఖీలు.!

తెలుగు రాష్ట్రాల్లో ఈడీ మెరుపు దాడులు కలకలం రేపాయి. . ఆన్‌లైన్ బెట్టింగ్‌లు, ఫేక్ఇన్వెస్ట్‌మెంట్ యాప్‌ల ముసుగులో అమాయకులను మోసగించి, భారీ మొత్తంలో సొమ్మును కొల్లగొడుతున్న ముఠాల ఆటకట్టించేందుకు ఎన్‌ఫోర్స్‌మెంట్ డైరెక్టరేట్ రంగంలోకి దిగింది. ఇందులో భాగంగా హైదరాబాద్, విజయవాడతో పాటు ఉభయ తెలుగు రాష్ట్రాలలోని పలు కీలక ప్రాంతాలలో శుక్రవారం (అక్టోబర్ 23) మెరుపుదాడులు నిర్వహించింది. మహారాష్ట్రలోని పూణే సైబర్ క్రైమ్ పోలీస్ స్టేషన్‌లో నమోదైన ఒక ఎఫ్‌ఐఆర్ ఆధారంగా ఈ దాడులు కొనసాగుతున్నాయి. మనీలాండరింగ్ నిరోధక చట్టం కింద ఈ తనిఖీలు జరుగుతున్నాయి. వివిధ ఆకర్షణీయ పథకాలు, నకిలీ ఆన్‌లైన్ బెట్టింగ్ ప్లాట్‌ఫారమ్‌లు ఫేక్ ఇన్వెస్ట్‌మెంట్ యాప్‌ల ద్వారా ఈ ముఠాలు ప్రజలను ఆకర్షించి, స్వల్ప కాలంలోనే ఎక్కువ లాభాలంటూ ప్రలోభపెట్టి వందల కోట్ల రూపాయలు వసూలు చేసినట్లు ప్రాథమిక విచారణలో తేలింది. ఇలా అక్రమ మార్గాల్లో బాధితుల నుంచి కొల్లగొట్టిన భారీ మొత్తాన్ని నిందితులు విదేశాలకు తరలించినట్లు ఈడీ గుర్తించింది. హవాలా మార్గాల ద్వారా నిధుల మళ్ళింపు ఎలా జరిగింది? ఈ కుంభకోణంలో ఎవరెవరు భాగస్వాములుగా ఉన్నారు? అనే కోణంలో అధికారులు లోతుగా దర్యాప్తు చేస్తున్నారు. ప్రధాన నిందితుల ఆస్తులు, బ్యాంకు ఖాతాలు, డిజిటల్ లావాదేవీలకు సంబంధించిన కీలక పత్రాలను ఈడీ బృందాలు పరిశీలిస్తున్నాయి. ఈ తనిఖీల ద్వారా అభించిన లభించిన ఆధారాలతో ఈడీ మరిన్ని తదుపరి చర్యలు తీసుకునే అవకాశం ఉంది. [ED Raids Telugu states, ED Searches Hyderabad Vijayawada, Online Betting Scam, Investment APPs Enforcement Directorate, Telugu One]

Published on: Fri Oct 23, 2026 2:20PM

ఎయిర్ ఇండియా విమానానికి తప్పిన ముప్పు: 109 మంది ప్రయాణీకులు సురక్షితం.!

ఎయిర్ ఇండియా విమానానికి పెను ప్రమాదం తప్పింది. శంషాబాద్ రాజీవ్ గాంధీ అంతర్జాతీయ విమానాశ్రయం నుంచి శుక్రవారం (అక్టోబర్ 23) బయలుదేరిన ఎయిర్ ఇండియా విమానంలో టేకాఫ్ అయిన ఐదు నిముషాలలోనే సాంకేతిక లోపం తలెత్తింది. దీంతో విమాన పైలట్ వెంటనే తిరిగి శంషాబాద్ విమానాశ్రయంలో విమానాన్ని ల్యాండ్ చేశారు. దీంతో విమానంలో ఉన్న 109 మంది ప్రయాణీకులు సురక్షితంగా బటయపడ్డారు. విమానం ల్యాండ్ అయిన వెంటనే గ్రౌండ్ స్టాఫ్, ఇంజనీరింగ్ విభాగం మరియు సాంకేతిక నిపుణుల బృందాలు ప్రయాణికులను సురక్షితంగా టెర్మినల్ బిల్డింగ్‌కు తరలించారు. అనంతరం ఇంజనీర్లు విమానంలోని లోపాలను పరిశీలించారు. ఏది ఏమైనా విమాన పైలట్ సమయస్ఫూర్తితో వ్యవహరించి, విమానాన్ని తిరిగి శంషాబాద్ విమానాశ్రయంలో ఎమర్జెన్సీ ల్యాండింగ్ చేయడంతో ఆ విమానంలో ఉన్న 109 మంది ప్రయాణీకులు, సిబ్బంతి ప్రాణాలు నిలిచాయి. పరిస్థితిని సకాలంలో అంచనా వేసి అత్యవసర నిర్ణయం తీసుకుని ప్రయాణికుల ప్రాణాలను కాపాడిన పైలట్ పై ప్రశంసల వర్షం కురుస్తోంది. కాగా ఈ విమానం సాంకేతిక తనిఖీలు పూర్తయిన తరువాత తిరిగి బయలు దేరుతుందని ఎయిర్ ఇండియా వర్గాలు తెలిపాయి. [Air India Flight Emergency Landing Shamshabad Airport, Rajiv Gandhi International Airpor, Disaster Averted, Technical Lapse, Pilot Timely Action, Telugu One]

Published on: Fri Oct 23, 2026 12:14PM

కోతిబంధించి, ఊరేగించి సంబరాలు చేసుకున్నారు: ఇంతకీ ఆ మర్కటం ఏం చేసిందంటే.?

ఓ కోతి తలపై 51 వేల రూపాలయ రివార్డును ఉంది. స్థానికులు ఆ కోతి కారణంగా గత కొన్ని రోజులుగా కంటి మీద కునుకు లేకుండా గడుపుతున్నారు. ఎట్టకేలకు గురువారం (అక్టోబర్ 23) ఆ మర్కటం పట్టుబడటంతో దానిని బంధించి పట్టణ వీధుల్లో ఊరేగించి మరీ సంబరాలు జరుపుకున్నారు. ఈ సంఘటన హర్యానాలోని హథీన్ పట్టణంలో జరిగింది. వివరాలిలా ఉన్నాయి.. హధీన్ పట్టణంలో గత కొద్ది రోజులుగా ఓ మర్కటం వీరవిహారం చేస్తోంది. కనిపించిన వారిని కనిపించినట్లు కరిచి గాయపరుస్తోంది. కొద్ది రోజుల వ్యవధిలోనే ఆ కోతి ఏకంగా 30 మందిని కరిచి గాయపరిచింది. దీంతో ఇంట్లోంచి అడుగు బయటపెట్టాలంటేనే పట్టణవాసులు భయపడే పరిస్థితికి వచ్చారు. దీంతో వారు మునిసిపల్ అధికారులకు ఫిర్యాదు చేశారు. కోతి కారణంగా గాయపడిన వారిని పరామర్శాంచిన మునిసిపల్ చైర్ పర్సన్.. ఆ కోతిని బంధించిన వారికి తన సొంత నిధుల నుంచి 51 వేల రూపాయలు రివార్డు ఇస్తానని ప్రకటించారు. ఆ కోతిని స్థానికుడొకరు గురువారం (అక్టోబర్ 23) బంధించగలిగాడు. బంధించిన కోతి చేతులు, కాళ్లూ కట్టేసి స్థానికులు పట్టణ వీధుల్లో దానిని ఊరేగించి సంబరాలు చేసుకున్నారు. ఇందుకు సంబంధించిన దృశ్యాలు సోషల్ మీడియాలో వైరల్ అయ్యాయి. కోతిని బంధించడం, హింసించడంపై కొందరు నెటిజనులు ఆగ్రహం వ్యక్తం చేశారు. ఏది ఏమైనా రోజుల తరబడి తమకు కంటిమీద కునుకు లేకుండా చేసిన కోతి ఎట్టకేలకు బంధించడంతో హధీన్ వాసులు సంబరాలు చేసుకుంటున్నారు. [Haryanas Most Wwanted Monkey Caught, Reward Monkey Head, Hathin People Celebrate, Telugu One]

Published on: Fri Oct 23, 2026 11:57AM

జీఎస్టీ విధానంలో మార్పులు.. వ్యాపారులపై పడే ప్రభావం ఏంటంటే.?

దేశంలో వ్యాపార నిర్వహణను మరింత సరళం చేయడానికి మరియు పన్ను చెల్లింపుదారులకు ఇబ్బందులు లేకుండా చేయడానికీ కేంద్ర ప్రభుత్వం నడుంబిగించింది. ఇందులో భాగంగా జీఎస్టీ విధానాన్ని మరింత సరళతరం, సులభతరం చేయనుంది. ప్రధానంగా చిన్న వ్యాపారాలు, ఈ కామర్స్ విక్రేతలు, పన్నుచెల్లింపుదారులు దీర్ఘ కాలంగా ఎదుర్కొంటున్న సమస్యలకు చెక్ పెట్టేలా నూతన సంస్కరణలకు కేంద్రం శ్రీకారం చుట్టింది. పన్ను చెల్లింపుల ప్రక్రియను పారదర్శకంగా మార్చడంతో పాటు, అనవసరమైన లీగల్ చిక్కులను తగ్గించడమే ఈ సంస్కరణల లక్ష్యంగా చెబుతోంది. ఈ కొత్త నిబంధనల ప్రకారం దేశవ్యాప్తంగా దాదాపు 9.5 లక్షల మంది చిన్న వ్యాపారులకు నేరుగా లబ్ధి చేకూరనుంది. వివిధ రాష్ట్రాల్లో విడిగా భౌతిక కార్యాలయాలు లేదా గోదాములు ఏర్పాటు చేయాల్సిన అవసరం లేకుండా, ఈ కామర్స్ ప్లాట్‌ఫారమ్‌ల వేర్‌హౌస్‌ల ద్వారానే జాతీయ మార్కెట్‌ను సులువుగా యాక్సెస్ చేసే సదుపాయం ఈ సంస్కరణల ద్వారా కలుగుతుంది. దీనివల్ల చిన్న వ్యాపారస్తుల పై పడే అదనపు పన్ను భారం భారీగా తగ్గుతుంది. అలాగే నెలకు రెండున్నర లక్షల రూపాయల వరకూ ఇన్‌పుట్ ట్యాక్స్ క్రెడిట్ (ఐటీసీ) బదిలీ చేసుకునే వెసులుబాటు లభిస్తుంది. రిజిస్ట్రేషన్ ప్రక్రియను మరింత వేగవంతం చేయడానికి జీఎస్టీ పోర్టల్‌లో యూజర్ ఫ్రెండ్లీ ఫీచర్లు, డ్రాప్, డౌన్ ఆప్షన్లు అందుబాటులోకి వస్తాయి. దీనివల్ల తప్పుల తడకగా పేర్కొంటూ దరఖాస్తులు తిరస్కరణ గణనీయంగా తగ్గిపోతుంది. మరోవైపు, ఎలక్ట్రానిక్ క్యాష్ లెడ్జర్ రిఫండ్‌లను ఎలాంటి ఆఫీసర్ జోక్యం లేకుండా పూర్తిగా ఆటోమేటెడ్ వ్యవస్థద్వారా వేగంగా మంజూరు అవుతుంది. జీరో రేటెడ్ సప్లైస్, ఇన్వర్టెడ్ డ్యూటీ స్ట్రక్చర్ కింద క్లెయిమ్ చేసిన రిఫండ్ మొత్తంలో 90 శాతం నిధులను ఎలాంటి ఆటంకాలు లేకుండా ప్రొవిజినల్ పద్ధతిలో తక్షణమే విడుదల అవుతాయి. అలాగే అనవసరమైన వివాదాలను తగ్గించేందుకు షో కాజ్ నోటీసులు జారీ చేయడానికి 10 వేల కనీస పరిమితి నిబంధన అందుబాటులోకి వస్తుంది. ఈ కీలక మార్పుల ద్వారా ట్యాక్స్ అడ్మినిస్ట్రేషన్ వేగవంతం కావడంతో పాటు, వ్యాపార వర్గాల వర్కింగ్ క్యాపిటల్ సమస్యలు దాదాపుగా పరిష్కారమవుతాయని ఆర్థిక నిపుణులు అంటున్నారు. [Union Governmeny Gst Reforms, Central Government Gst, Ease Doing Business, Fast Gst Refunds, Telugu One]

Published on: Fri Oct 23, 2026 10:58AM