India News | Latest National News, Politics & Updates

రష్యా చమురు కోనుగోళ్లపై ట్రంప్ కొరడా.. ఇండియాకు చిక్కులు తప్పవా?

ఇరాన్ దేశాలపై కఠిన ఆంక్షలు విధించే దిశగా అమెరికా ప్రభుత్వం అడుగులు వేస్తోంది. ఈ మేరకు అమెరికా ప్రతినిధుల సభ ఒక కీలకమైన బిల్లుకు ఆమోదం తెలిపింది. ప్రస్తుతం ఈ ప్రతిపాదిత చట్టం అమెరికా అధ్యక్షుడు డొనాల్డ్ ట్రంప్ సంతకం తరువాయిగా మిగిలింది. ఈ పరిణామం రష్యా నుంచి భారీ ఎత్తున ముడి చమురును దిగుమతి చేసుకుంటున్న ఇండియాకు కొత్త సవాళ్లను సృష్టిస్తుందనే ఆందోళనలు వ్యక్తమవుతున్నాయి. అంతర్జాతీయ రాజకీయాల్లో ఈ తాజా పరిణామం హాట్ టాపిక్ గా మారింది. (సెప్టెంబర్ 16) జరిగిన ఓటింగ్‌ ప్రక్రియలో లిండ్సే ఓ.గ్రాహం సాంక్షనింగ్ రష్యా అండ్ ఇరాన్ యాక్ట్ ఆఫ్ 2026 బిల్లుకు హౌస్ ఆమోద ముద్ర వేసింది. అంతకుముందే గత నెలలో అమెరికా సెనేట్ కూడా ఈ బిల్లును ఆమోదించింది. ఈ కొత్త చట్టం ప్రకారం, రష్యా నుంచి ముడి చమురు, సహజ వాయువును అధిక పరిమాణంలో కొనుగోలు చేస్తున్న ఐదు దేశాలపై వంద శాతం వరకు భారీ టారిఫ్‌లు విధించే విసృతమైన అధికారాలను అమెరికా అధ్యక్షుడికి దఖలు పడతాయి. ఈ జాబితాలో రష్యా నుంచి చమురు దిగుమతులు జరుపుతున్న భారత్, చైనాలు ముందువరుసలో ఉన్నాయి. వీటితో పాటు హంగేరీ, స్లోవేకియా, అజర్‌బైజాన్ దేశాలపై కూడా ఈ చట్టం ప్రభావం పడే అవకాశం ఉంది. అయితే, రష్యా ఇంధన వనరులపై ఆధారపడటాన్ని క్రమంగా తగ్గించుకుంటున్న కొన్ని యూరోపియన్ మిత్రదేశాలకు మాత్రం ఈ నిబంధనల నుంచి ప్రత్యేక మినహాయింపులు కల్పించారు. రష్యా, ఉక్రెయిన్ యుద్ధం ప్రారంభమైన నాటి నుంచి, అంటే 2022 నుంచి భారత్ రాయితీ ధరలకే రష్యా నుంచి పెద్ద ఎత్తున ముడి చమురును కొనుగోలు చేస్తూ వస్తోంది. దేశీయ ఇంధన అవసరాలను తీర్చుకోవడానికి, ద్రవ్యోల్బణాన్ని అదుపులో ఉంచడానికీ ఈ చమురు దిగుమతులు భారత్‌కు ఎంతో ప్రయోజనకరంగా మారాయి. అయితే, అమెరికా తాజా చట్టం అమలులోకి వస్తే, భారత దిగుమతిదారులు, ఎగుమతిదారులలో తీవ్ర ఆందోళన నెలకొనే అవకాశం ఉంది. రష్యన్ చమురు దిగుమతులపై వంద శాతం వరకు టారిఫ్‌లు విధించే అధికారం రావడంతో వాణిజ్య సంబంధాలు దెబ్బతింటాయనే వాదనలు వినిపిస్తున్నాయి. అయితే.. ఈ కఠినమైన టారిఫ్‌ల విధింపు ప్రక్రియ వెంటనే అమలవుతుందా లేదా అనేదానిపై స్పష్టత రావాల్సి ఉంది. ఈ చట్టం కింద టారిఫ్‌లు విధించాలా వద్దా అనే దానిపై తుది నిర్ణయం పూర్తిగా అమెరికా అధ్యక్షుడి విచక్షణకే వదిలివేయడం గమనార్హం. అంతే కాకుండా, అమెరికా జాతీయ ప్రయోజనాలు, దౌత్యపరమైన అంశాలను దృష్టిలో ఉంచుకుని నిర్దిష్ట దేశాలకు టారిఫ్‌ల నుంచి మినహాయింపునిచ్చే వెసులుబాటు కూడా ఈ బిల్లులో పొందుపరిచారు. దీనివల్ల పరిస్థితులను బట్టి దౌత్య చర్చలకు ఇంకా అవకాశం ఉంటుందని నిపుణులు అభిప్రాయపడుతున్నారు. గతంలో కూడా 2025 ఆగస్టు నెలలో ట్రంప్ పాలకవర్గం రష్యా నుంచి చమురు కొనుగోళ్లు చేస్తున్నారనే కారణంతో భారత దిగుమతులపై పాతిక శాతం అదనపు టారిఫ్‌లను విధించింది. అయితే ఆ తర్వాత ద్వైపాక్షిక చర్చల అనంతరం 2026 ఫిబ్రవరిలో ఆ అదనపు టారిఫ్‌లను ఎత్తివేశారు. ఇప్పుడు తాజాగా ప్రతిపాదించిన ఈ కొత్త బిల్లు ద్వారా అమెరికా అధ్యక్షుడి చేతికి మరింత శక్తివంతమైన అధికారాలు రానున్నాయి. ప్రస్తుత అధ్యక్షుడు డొనాల్డ్ ట్రంప్ ఈ బిల్లుకు సంపూర్ణ మద్దతు ఇస్తున్నట్లు సంకేతాలు వెలువడుతున్నాయి. ఆయన ఈ చట్టంపై అధికారికంగా సంతకం చేసిన తర్వాతే భారత్‌పై టారిఫ్‌ల విధింపు విషయంలో వాస్తవ పరిస్థితి ఏమిటనేది స్పష్టమౌతుంది. ఇండియా దేశీయ ఇంధన భద్రతకే అత్యంత ప్రాధాన్యత ఇస్తూ వస్తోంది. ముడి చమురు సరఫరా విషయంలో దేశ ప్రయోజనాలను కాపాడుకునేందుకు విభిన్న మార్గాలను అన్వేషిస్తోంది. రష్యాతో దీర్ఘకాలిక వాణిజ్య సంబంధాలు, అలాగే అమెరికాతో వ్యూహాత్మక భాగస్వామ్యాన్ని సమతుల్యం చేసుకోవడం భారత విదేశాంగ విధానానికి ప్రస్తుతం ఒక పెద్ద పరీక్షగా మారింది. అమెరికా ఆంక్షల కత్తి వేలాడుతున్నప్పటికీ, దేశ ఆర్థిక స్థిరత్వం దెబ్బతినకుండా ప్రభుత్వం ఎలాంటి దౌత్యపరమైన చర్యలు తీసుకుంటుందనేది చూడాల్సి ఉంది. రాబోయే రోజుల్లో ట్రంప్ నిర్ణయాలు, విధివిధానాలు అంతర్జాతీయ చమురు మార్కెట్‌పై ప్రభావాన్ని చూపే అవకాశం ఉంది. భారత్ వంటి అభివృద్ధి చెందుతున్న దేశాలు తమ ఇంధన అవసరాల కోసం ఏకపక్ష ఆంక్షలకు తలవంచకుండా ప్రత్యామ్నాయ వ్యూహాలను రూపొందించుకోవాల్సిన అవసరం ఎంతైనా ఉంది. ఈ పరిణామాలు ప్రపంచ వ్యాప్తంగా వాణిజ్య సమీకరణాలను మార్చేయగలవు కాబట్టి, రానున్న కాలంలో భారత్-అమెరికా-రష్యా సంబంధాలు ఏ విధంగా ముందుకు వెళ్తాయనే అంశంపై ప్రపంచ దేశాలు కూడా నిశితంగా దృష్టి సారిస్తున్నాయి. [US sanctions on Russia, India Russia oil trade, US tariffs on India, Donald Trump Russian oil, Russian oil sanctions 2026, Telugu One]

Published on: Thu Sep 17, 2026 9:47AM

విదేశాలకు వెళ్లే వారికి బిగ్ అలర్ట్.!

విదేశీ ప్రయాణాలు చేయాలనుకునే భారతీయ పాస్‌పోర్ట్ హోల్డర్లకు ఇది బిగ్ అలర్ట్. 2026లో ప్రపంచవ్యాప్తంగా 9 దేశాలు తమ వీసా నిబంధనలను సవరించాయి. గతంలో మాదిరిగా విమానం దిగిన తర్వాత లేదా ఆ దేశానికి వెళ్లిన వెంటనే వీసా లభించే వీసా ఆన్ అరైవల్ సౌకర్యాన్ని ఆ దేశాలు రద్దు చేశాయి. దీని స్థానంలో ప్రయాణానికి ముందే ఆన్‌లైన్‌లో ఇ-వీసా లేదా ఎలక్ట్రానిక్ ట్రావెల్ ఆథరైజేషన్ పొందడాన్ని తప్పనిసరి చేశాయి. ఈ కొత్త నిబంధనల కారణంగా విదేశీ పర్యటనలు వెళ్లే పర్యాటకులు మరింత అప్రమత్తంగా ఉండాలని ట్రావెల్ నిపుణులు హెచ్చరిస్తున్నారు. పాస్‌పోర్ట్ ఇండెక్స్ తాజా డేటా ప్రకారం.. ప్రస్తుతం భారత పాస్‌పోర్ట్ ప్రపంచవ్యాప్తంగా 73వ స్థానంలో కొనసాగుతోంది. 2025 నాటి డేటాతో పోలిస్తే, కొన్ని ప్రముఖ దేశాల్లో మన దేశ పౌరులకు వీసా ఆన్ అరైవల్ సదుపాయం పూర్తిగా దూరమైంది. ఈ కొత్త నిబంధనల ప్రకారం ప్రయాణికులు తమ ప్రయాణ ప్రణాళికలను మార్చుకోవాల్సి ఉంటుంది. ప్రధానంగా లావోస్, ఖతార్ దేశాలలో ఇప్పటివరకు అమల్లో ఉన్న వీసా ఆన్ అరైవల్ విధానం రద్దైంది. ఇకపై ఈ దేశాలకు వెళ్లాలంటే ప్రయాణానికి ముందే ఇ-వీసా కోసం దరఖాస్తు చేసుకోవడం తప్పనిసరి. అలాగే మన పొరుగు దేశమైన శ్రీలంక సైతం త గతంలో ఉన్న ఇ-వీసా ఆన్ అరైవల్ స్థానంలో.. ప్రయాణానికి ముందే ఎలక్ట్రానిక్ ట్రావెల్ ఆథరైజేషన్ (ఈటీఏ) పొందాలని స్పష్టం చేసింది. ఇక పశ్చిమాసియా దేశమైన ఇరాన్ 2025 నవంబర్ నుంచే వీసా ఆన్ అరైవల్ సౌకర్యాన్ని నిలిపివేయగా, ప్రస్తుతం అక్కడ కూడా ఇ-వీసా ఉంటేనే ప్రవేశం లభిస్తుంది. మరోవైపు కేప్ వెర్డే దేశం 2026 జనవరి 1 నుంచి భారత్‌తో సహా మొత్తం 96 దేశాల పౌరులకు వీసా ఆన్ అరైవల్ సదుపాయాన్ని ఎత్తివేసింది. నికరాగ్వా కూడా 2026 ఫిబ్రవరి 14 నుంచి భారత పాస్‌పోర్ట్ హోల్డర్లకు ఆన్‌లైన్ ద్వారా ఎలక్ట్రానిక్ వీసా లేదా ఇమ్మిగ్రేషన్ అధికారులకు ఈమెయిల్ ద్వారా దరఖాస్తు చేసుకునే కొత్త విధానాన్ని తీసుకొచ్చింది. అయితే, కొన్ని దేశాలు మాత్రం భారతీయుల కోసం వీసా ప్రక్రియను కొంతమేర సులభతరం చేయడం కాస్త ఊరటనిచ్చే అంశం. గతంలో సాంప్రదాయ విధానాన్ని అనుసరించిన చిలీ, ఘనా, వెనిజులా దేశాలు ఇప్పుడు ఇ-వీసా ఆప్షన్లను అందుబాటులోకి తెచ్చాయి. వీసా నిబంధనలు ఎప్పటికప్పుడు మారుతుండటంతో, ఎవరైనా విదేశాలకు వెళ్లే ముందు సంబంధిత దేశాల ఎంబసీ వెబ్‌సైట్లను పరిశీలించి పూర్తి వివరాలు తెలుసుకోవడం మంచిది. లేదంటే విమానాశ్రయాల్లో తీవ్ర ఇబ్బందులు ఎదుర్కొనే ప్రమాదం ఉంది. [indian travelers, visa rules changed, visa on arrival, e-visa requirements, international travel alert, indian passport, Telugu One]

Published on: Thu Sep 17, 2026 9:35AM

హ్యాపీ బర్త్ డే మోడీ.!

దేశ రాజకీయాలలో చెరగని ముద్ర వేసిన ప్రధానమంత్రి నరేంద్ర మోదీ గురువారం ( సెప్టెంర్ 17) 76వ వసంతంలోకి అడుగుపెట్టారు. ఆయన జన్మదినం సందర్భంగా రాజకీయ ప్రముఖులు, వివిధ రాష్ట్రాల ముఖ్యమంత్రులు శుభాకాంక్షలు తెలియజేస్తున్నారు. గుజరాత్ లోని వాద్‌నగర్‌లో రైల్వే స్టేషన్ పక్కన చిన్న టీ అమ్ముకునే కుటుంబంలో పుట్టిన ఒక సామాన్యుడు, దేశ అత్యున్నత పీఠమైన ఢిల్లీలోని లోక్ కల్యాణ్ మార్గ్ చేరేవరకు సాగిన ఆయన ప్రయాణం స్ఫూర్తిదాయకం. మోదీ రాజకీయ ప్రస్థానం ఒక వ్యక్తి విజయగాథ మాత్రమే కాదు. అంకితభావం, కఠిన శ్రమ ఉంటే అతి సామాన్యుడు కూడా ఉన్నత స్థానానికి ఎదగవచ్చనడానికి నిదర్శనం. ఆరెస్సెస్ సిద్ధాంతాలకు ఆకర్షితుడై పూర్తికాల కార్యకర్తగా బాధ్యతలు చేపట్టిన నరేంద్ర మోడీ.. క్రమశిక్షణతో కూడిన సంస్థాగత పనుల ద్వారా తన నాయకత్వ లక్షణాలను మెరుగుపరుచుకున్నారు. అహ్మదాబాద్ కేంద్రంగా గుజరాత్ రాజకీయాల్లోకి అడుగుపెట్టిన ఆయన.. బీజేపీ సంస్థాగత బలోపేతంలో కీలక పాత్ర పోషించారు. పార్టీలో వివిధ బాధ్యతలను సమర్థవంతంగా నిర్వర్తించిన ఆయన ప్రతిభను గుర్తించిన బీజేపీ హైకమాండ్, 2001 అక్టోబర్‌లో గుజరాత్ ముఖ్యమంత్రి బాధ్యతలను అప్పగించింది. గుజరాత్ ముఖ్యమంత్రిగా పన్నెండు సంవత్సరాలకు పైగా సేవలందించిన ఆయన.. తన పాలనా దక్షతతో రాష్ట్రాన్ని దేశంలోనే అగ్రగామిగా నిలిపారు. పారిశ్రామికాభివృద్ధి, మౌలిక వసతుల కల్పన, విద్యుత్ సరఫరా, పెట్టుబడుల ఆకర్షణలో గుజరాత్ మోడల్‌ను దేశానికి పరిచయం చేసి ప్రశంసలు అందుకున్నారు. ఆ తర్వాత 2014 సార్వత్రిక ఎన్నికల్లో బీజేపీ తరఫున ప్రధానమంత్రి అభ్యర్థిగా జాతీయ రాజకీయాలలోకి రంగప్రవేశం చేశారు. ప్రజల నుంచి లభించిన ఆదరణ ఆయనను భారీ మెజారిటీతో గెలిపించింది. 2014 మే 26న తొలిసారిగా దేశ ప్రధానిగా బాధ్యతలు స్వీకరించారు. ఆ తర్వాత 2019లో జరిగిన ఎన్నికల్లోనూ ఘన విజయం సాధించి రెండోసారి పగ్గాలు చేపట్టారు. ప్రజల నిరంతర ఆదరాభిమానాలతో 2024 జూన్‌లో మూడోసారి కూడా ప్రధానమంత్రిగా ప్రమాణ స్వీకారం చేసి రికార్డు సృష్టించారు. ప్రధానిగా బాధ్యతలు చేపట్టిన నాటి నుంచి దేశ ఆర్థిక వ్యవస్థను బలోపేతం చేయడం, డిజిటల్ ఇండియా, మేక్ ఇన్ ఇండియా వంటి విప్లవాత్మక పథకాల ద్వారా దేశాన్ని స్వావలంబన దిశగా నడిపించడంలో ఆయన కీలక పాత్ర పోషిస్తున్నారు. పేదల సంక్షేమమే ధ్యేయంగా పలు పథకాలను అమల్లోకి తెస్తూ, అంతర్జాతీయ వేదికలపై భారతదేశ కీర్తి ప్రతిష్టలను కొత్త శిఖరాలకు చేర్చారు. ఒకవైపు సంక్షేమ కార్యక్రమాలను సమర్థవంతంగా అమలు చేస్తూనే, మరోవైపు దేశ రక్షణ, విదేశీ విధానాల్లో భారత్ ను అగ్రపీఠిన నిలబెట్టడం ద్వారా గ్లోబల్ లీడర్‌గా గుర్తింపు పొందారు. ప్రధాని మోదీ నాయకత్వ శైలి, నిరంతరం దేశం కోసం పరితపించే తత్వం కోట్లాది మంది యువతకు ఆదర్శంగా నిలుస్తున్నాయి. మోదీ జన్మదినాన్ని పురస్కరించుకుని బీజేపీ దేశవ్యాప్తంగా పలు కార్యక్రమాలు చేపట్టింది. పార్టీ జాతీయ నాయకత్వం పిలుపు మేరకు రాబోయే నెల రోజుల పాటు దేశవ్యాప్తంగా సేవా సంకల్ప్ అభియాన్ కార్యక్రమాలను నిర్వహించనున్నారు. ఈ కార్యక్రమంలో భాగంగా సమాజంలోని వివిధ వర్గాల ప్రజలకు సేవ చేయడం, ప్రభుత్వ అభివృద్ధి కార్యక్రమాలను ప్రజలకు వివరించడం వంటి కార్యక్రమాలను చేపట్టనున్నారు. అలాగే వారణాసి సహా పలు ప్రధాన నగరాల్లో రక్తదాన శిబిరాలు, మొక్కలు నాటే కార్యక్రమాలను నిర్వహిస్తున్నారు. ఎన్డీఏ పాలిత రాష్ట్రాల ముఖ్యమంత్రులు, ప్రముఖులు ఈ వేడుకల్లో పాల్గొని ప్రధానికి శుభాకాంక్షలు తెలిపారు. దేశ రాజకీయాల్లో సుదీర్ఘమైన పరిపాలనా అనుభవం కలిగిన అతికొద్ది మంది నాయకులలో మోదీ ఒకరిగా నిలిచారు. ముఖ్యమంత్రిగా పాతికేళ్ల కిందట ప్రారంభమైన ఆయన పాలనా ప్రస్థానం.. నిరాఘాటంగా కొనసాగుతోంది. వికసిత భారత్' లక్ష్య సాధన దిశగా దేశాన్ని ముందుకు నడిపిస్తున్న ఆయన ప్రయాణం రాబోయే తరాలకు రాజకీయ, సామాజిక పాఠంగా నిలుస్తుందనడంలో ఇసుమంతైనా సందేహం లేదు. [Prime Minister Narendra Modi birthday, PM Modi 76th birthday journey, RSS Pracharak to Prime Minister, BJP Seva Sankalp Abhiyan, Narendra Modi political career highlights]

Published on: Thu Sep 17, 2026 8:56AM

దిశ సాలియన్ కేసులో బిగ్ ట్విస్ట్.. ఆదిత్య థాక్రే కీలక ప్రకటన..!

దేశవ్యాప్తంగా రాజకీయ సినీ వర్గాల్లో తీవ్ర సంచలనం సృష్టించిన దిశ సాలియన్ మరణం కేసులో శివసేన నాయకుడు, మహారాష్ట్ర మాజీ మంత్రి ఆదిత్య థాక్రే మరోసారి స్పష్టతనిచ్చారు. దిశ సాలియన్ మృతికి తనకూ ఎలాంటి సంబంధం లేదని, ఆమెను తాను జీవితంలో ఎప్పుడూ కలవలేదని ఆయన స్పష్టం చేశారు. తనపై వస్తున్న ఆరోపణలన్నీ పూర్తిగా నిరాధారమైనవని, రాజకీయ దురుద్దేశంతోనే కొందరు కావాలనే తన పేరును ఈ కేసులోకి లాగుతున్నారని ఆయన తీవ్రంగా ఖండించారు. ఈ కేసులో ప్రత్యక్షంగా గానీ, పరోక్షంగా గానీ తన ప్రమేయం ఉందనడంలో ఎలాంటి నిజం లేదని ఆదిత్య థాక్రే స్పష్టం చేశారు. దిశ సాలియన్ మరణం జరిగి ఇన్ని సంవత్సరాలు గడుస్తున్నప్పటికీ, తరచూ ఈ అంశాన్ని రాజకీయంగా తెరపైకి తీసుకురావడం వెనుక పెద్ద కుట్ర దాగి ఉందని ఆయన ఆరోపించారు. ఒక ప్రముఖ రాజకీయ కుటుంబానికి చెందిన తన ప్రతిష్ఠ దెబ్బతీయడమే లక్ష్యంగా కొందరు పనిగట్టుకుని అసత్య ప్రచారాలు చేస్తున్నారని ఆయన మండిపడ్డారు. ఈ కేసులో విచారణను ఎదుర్కొనేందుకు తాను ఎప్పుడూ సిద్ధంగా ఉన్నానని, అయితే ఎటువంటి ఆధారాలు లేనప్పటికీ తనపై బురదజల్లే ప్రయత్నాలు చేయడం బాధాకరమని పేర్కొన్నారు. పోలీసులు మరియు దర్యాప్తు సంస్థలు ఇప్పటివరకు జరిపిన విచారణలోనూ తన ప్రమేయం ఉన్నట్లు ఎక్కడా ఎలాంటి లభించలేదని ఆయన గుర్తుచేశారు. ప్రముఖ బాలీవుడ్ నటుడు సుశాంత్ సింగ్ రాజ్‌పుత్ మేనేజర్‌గా పనిచేసిన దిశ సాలియన్, ముంబైలోని ఒక భవనంపై నుంచి అనుమానాస్పద రీతిలో కిందపడి మరణించిన ఘటన ఆ సమయంలో దేశవ్యాప్తంగా కలకలం రేపింది. ఆ ఘటన జరిగిన వెంటనే ముంబై పోలీసులు ఈ కేసుకు సంబంధించి విస్తృత దర్యాప్తు చేపట్టారు. అయితే, ఈ కేసులో ప్రతిపక్షాలు రాజకీయ లబ్ధి కోసమే తనను టార్గెట్ చేస్తున్నాయని ఆదిత్య థాక్రే ఆరోపిస్తున్నారు. చట్టం తన పని తాను చేసుకుపోతుందని, నిత్యం తనపై జరుగుతున్న ఈ అసత్య ప్రచారాలను ప్రజలు గమనించాలని ఆయన కోరారు. ఈ తాజా ప్రకటనతో మహారాష్ట్ర రాజకీయాల్లో మరోసారి వేడి రాజుకుంది. [ Disha salian case, Aaditya thackeray, Shiv sena ubt, Mumbai news, Maharashtra politics, Sushant singh rajput ]

Published on: Wed Sep 16, 2026 9:08PM

అనంతనాగ్‌కు దాదాసాహెబ్ ఫాల్కే అవార్డు..!

భారతీయ చలనచిత్ర పరిశ్రమలో తనదైన నటనతో దశాబ్దాలుగా ప్రేక్షకుల హృదయాలను కొల్లగొడుతున్న ప్రముఖ సీనియర్ నటుడు అనంతనాగ్‌కు అరుదైన గౌరవం దక్కింది. భారతీయ సినిమా రంగంలో అత్యున్నత పురస్కారంగా భావించే ప్రతిష్టాత్మకమైన 'దాదాసాహెబ్ ఫాల్కే అవార్డు' 2024 సంవత్సరానికి గాను అనంతనాగ్‌ను వరించింది. ఈ మేరకు కేంద్ర ప్రభుత్వం ఈ పురస్కారాన్ని ప్రకటించడంతో దేశవ్యాప్తంగా ఉన్న సినీ ప్రముఖులు, అభిమానులు ఆయనకు అభినందనల వర్షం కురిపిస్తున్నారు. వైవిధ్యభరితమైన పాత్రలతో, అద్భుతమైన అభినయంతో ఆయన చేసిన సేవలకు ఈ పురస్కారం నిజమైన గుర్తింపుగా విశ్లేషకులు అభివర్ణిస్తున్నారు. కన్నడతో పాటు పలు భారతీయ భాషల్లో తనదైన ముద్ర వేసిన అనంతనాగ్, తన సుదీర్ఘమైన సినీ ప్రయాణంలో ఇప్పటివరకు దాదాపు 300లకు పైగా సినిమాల్లో నటించి అసాధారణ రికార్డు సృష్టించారు. కేవలం ఒకే భాషకు పరిమితం కాకుండా వివిధ భాషల్లో వైవిధ్యమైన పాత్రలను పోషించి, భారతీయ చలనచిత్ర రంగానికి ఆయన అందించిన సేవలు అనన్యసామాన్యం. పాత్ర ఏదైనా అందులో పరకాయ ప్రవేశం చేసి ప్రేక్షకులను మంత్రముగ్ధులను చేయడం ఆయన ప్రత్యేకత. ఎన్నో తరాల ప్రేక్షకులను అలరించిన ఆయన అనుభవం, అంకితభావం ఎంతో మంది యువ నటులకు రోల్ మోడల్‌గా నిలిచాయి. ఈ నెల 22వ తేదీన గుజరాత్‌లోని కేవడియా వేదికగా అత్యంత వైభవంగా జరగనున్న 72వ జాతీయ చలనచిత్ర పురస్కారాల వేడుకలో ఈ పురస్కారాన్ని అధికారికంగా ప్రదానం చేయనున్నారు. దేశ ప్రఖ్యాత ప్రతిష్టాత్మక వేదికపై రాష్ట్రపతి చేతుల మీదుగా అనంతనాగ్ ఈ అత్యున్నత పురస్కారాన్ని అందుకోనున్నారు. భారతీయ చలనచిత్ర పరిశ్రమకు ఆయన చేసిన అమూల్యమైన సేవలను గుర్తించి ఈ వేడుకలో సత్కరించనుండటం తెలుగు మరియు కన్నడ చిత్రసీమతో పాటు యావత్ భారతీయ సినీ లోకానికి ఎంతో గర్వకారణంగా మారింది. ఈ అరుదైన గౌరవం ద్వారా ఆయన చేసిన దశాబ్దాల కళాసేవకు తగిన ప్రతిఫలం దక్కిందని అభిమానులు ఆనందం వ్యక్తం చేస్తున్నారు. [ Ananth Nag, Dadasaheb Phalke Award, National Film Awards, Senior Actor Ananth Nag, Indian Cinema, Kevadia Gujarat, Telugu One, Telugu News ]

Published on: Wed Sep 16, 2026 6:50PM

విధులకు వెళ్లకుండానే నెలకు రూ.70 వేల జీతం తీసుకుంటున్న ఎమ్మెల్యే మేనకోడలు..!

కర్ణాటక రాజకీయ వర్గాలలోనూ, వైద్య రంగంలోనూ ప్రస్తుతం ఒక విచిత్రమైన ఉదంతం తీవ్ర చర్చనీయాంశమైంది. ప్రభుత్వ ఆసుపత్రిలో కాంట్రాక్ట్ వైద్యురాలిగా నియమితులైన ఓ యువతి, అసలు విధులకు హాజరుకాకుండానే ప్రతి నెలా భారీ మొత్తంలో వేతనం అందుకున్న వైనం వెలుగులోకి వచ్చింది. బాగల్‌కోట్ నియోజకవర్గ కాంగ్రెస్ ఎమ్మెల్యే ఉమ మేటి మేనకోడలైన డాక్టర్ అంకిత యారగల్ ఈ వివాదంలో ప్రధాన ముఖంగా నిలిచారు. బాగల్‌కోట్‌లోని వాంబే కాలనీలో గల ప్రభుత్వ అనుబంధ ‘నమ్మ క్లినిక్’లో ఆమెను మెడికల్ ఆఫీసర్‌గా నియమించారు. అయితే ఆమె ఆ పదవిలో ఉంటూనే మరోవైపు ప్రైవేట్ వైద్య కళాశాలలో పీజీ (ఎండీ) కోర్సులో చేరినట్లు విచారణలో తేలింది. గత మార్చి నెల నుంచి ఆమె ఆ క్లినిక్ ముఖమే చూడలేదని స్థానికులు, రోగుల నుంచి పెద్ద ఎత్తున ఫిర్యాదులు అందాయి. క్లినిక్‌లో డాక్టర్ లేకపోవడంతో పేషెంట్లు తీవ్ర ఇబ్బందులు పడ్డారని, కనీసం నర్సులే మందులు ఇవ్వాల్సి వస్తోందని సమాచారం అందింది. అయినప్పటికీ ఆమెకు ప్రతి నెలా రూ. 70 వేలకు పైగా వేతనం ఎలాంటి ఆటంకం లేకుండా ఖాతాలో జరిగిపోవడం విస్మయానికి గురిచేసింది. ఈ వ్యవహారంపై స్థానిక పంచాయతీ యంత్రాంగం సీరియస్‌గా స్పందించింది. బాగల్‌కోట్ జిల్లా పంచాయతీ సీఈవో గజానన్ బాలే రంగంలోకి దిగి సంబంధిత డాక్టర్‌కు అధికారికంగా నోటీసులు జారీ చేశారు. అనధికారిక ద్వంద్వ నియామకం, విధుల్లో తీవ్ర నిర్లక్ష్యంపై వివరణ ఇవ్వాలని ఆదేశించారు. తొలి విచారణకు ఆమె గైర్హాజరు కావడంతో, సెప్టెంబర్ 18న జరిగే తదుపరి విచారణకు కచ్చితంగా హాజరుకావాలని స్పష్టం చేశారు. మరోవైపు ఈ కుంభకోణంలో ఆమె తండ్రి, జిల్లా ఆరోగ్య అధికారి (డీహెచ్‌వో) పాత్రపై కూడా అనుమానాలు వ్యక్తమవుతున్నాయి. డీహెచ్‌వో రాజ్‌కుమార్ యారగల్ తన కూతురిని వివాదం ముదరడంతో విధుల నుంచి తొలగిస్తున్నట్లు ప్రకటించారు. అయితే తన కుమార్తె ఎండీ కోర్సులో చేరినప్పటి నుంచి జీతం తీసుకోలేదని ఆయన వాదిస్తున్నారు. ఇలాంటి అనధికారిక డ్యూటీల ద్వారా ప్రజాధనాన్ని దుర్వినియోగం చేస్తే తీవ్ర పరిణామాలు ఉంటాయని అధికారులు హెచ్చరిస్తున్నారు. తదుపరి విచారణకు గైర్హాజరైతే ఏకపక్షంగా నిర్ణయం తీసుకుని, ఇప్పటివరకు చెల్లించిన వేతనాన్ని రికవరీ చేస్తామని స్పష్టం చేశారు. ఈ ఘటనపై కర్ణాటక మెడికల్ కౌన్సిల్ అలాగే నేషనల్ మెడికల్ కమిషన్ కూడా క్రమశిక్షణ చర్యలు తీసుకునే అవకాశం ఉన్నట్లు తెలుస్తోంది. [ Karnataka MLA niece scam, Dr Ankita Yaragal Namma Clinic, Bagalkot medical officer salary controversy, Umesh Meti niece news, ghost employee government doctor Karnataka, Telugu News, Telugu One ]

Published on: Wed Sep 16, 2026 6:29PM

వెడ్డింగ్ డెస్టినేషన్ తిరుమల, తిరుపతి.!

సంక్షోభాలలోనే అవకాశాలను అణ్వేషించడం, ఏమీ లేని స్థితిలో కూడా అద్భుతాలను సాధించడం ఏపీ సీఎం చంద్రబాబునాయుడికి వెన్నతో పెట్టిన విద్య. పేరు తప్ప ఇంకేమీ మిగలని విభజిత ఆంధ్రప్రదేశ్ ను దేశానికి ఆదర్శవంతమైన రాష్ట్రంగా మార్చేందుకు అరహారం శ్రమపడిన, పడుతున్న చంద్రబాబు ఇప్పుడు తాజాగా తిరుమల, తిరుపతిని వెడ్డింగ్ డెస్టినేషన్ గా మార్చేందుకు ప్రణాళికా బద్ధంగా అడుగులు వేస్తున్నారు. తిరుమల, తిరుపతిని వెడ్డింగ్ డెస్టినేషన్లుగా తీర్చిదిద్దే సమగ్ర ప్రణాళికను ఆయన స్వయంగా ప్రకటించారు. వెడ్డింగ్ డెస్టినేషన్ గా తిరుమల, తిరుపతి అన్న చంద్రబాబు ఆలోచన ఒక గేమ్ చేంజర్ గా మారే అవకాశం ఉందని పరిశీలకులు విశ్లేషిస్తున్నారు. ఎందుకంటే తిరుమల వేంకటేశ్వరస్వామి కొలువై ఉన్న తిరుమల ప్రాంతానికి ఉన్న సాంస్కృతిక, ఆధ్యాత్మిక ప్రాధాన్యత ఉందన్న సంగతి తెలిసిందే. తిరుమలలో వివాహం చేసుకోవడాన్ని ఒక సంప్రదాయంగా భావించే కుటుంబాలు ఉన్నాయి. తిరుమలలో పెళ్లి చేసుకోలేకపోయినా... వివాహం తరువాత నూతన వధూవరులు తిరుమల వెంకటేశ్వరస్వామిని దర్శించుకోవడం విధాయకంగా భావిస్తారు. అటువంటిది తరుపతి, తిరుమలనే వెడ్డింగ్ డెస్టినేషన్ అంటే.. ఈ ఆలోచన స్వాగతించదగినదిగా ఉందని పరిశీలకులు అంటున్నారు. అయితే తిరుమల వెడ్డింగ్ డెస్టినేషన్ అన్న దానిపై ప్రభుత్వం చొరవ తీసుకుని ప్రోత్సహిస్తే ఇది.. విస్తృత ప్రాచుర్యం పొందే అవకాశాలు మెండుగా ఉన్నాయి. ఉదాహరణకు.. బాలీవుడ్ నటి జాన్వీ కపూర్ తరచుగా తిరుపతి గురించి, అక్కడ వివాహం చేసుకోవాలనే తన కోరిక గురించి ప్రస్తావిస్తుంటారు. ప్రభుత్వం, ప్రచార విభాగం నుండి తగిన మద్దతు లభిస్తే, ఆమె వివాహం ఇక్కడ జరిగేలా చూడటం చంద్రబాబు ప్రతిపాదించిన ఈ కార్యక్రమానికి గొప్ప ఊతాన్నిచ్చే పరిణామం అవుతుంది. భారతదేశంలో వివాహ రంగం అతిపెద్ద ఆర్థిక వనరులలో ఒకటి. చంద్రబాబు రూపొందించిన ఈ డెస్టినేషన్ వెడ్డింగ్ ప్రాజెక్ట్ ద్వారా ఆ అవకాశాన్ని అందిపుచ్చుకోగలిగితే, దీనికి అపారమైన అవకాశాలు ఉంటాయి.ఆంధ్రప్రదేశ్ ప్రభుత్వం దీనిని సమర్థవంతంగా అమలు చేస్తే, ఇది ఆర్థిక ప్రాజెక్టుగా మారుతుంది. ముఖ్యమంత్రి చంద్రబాబు నాయుడు ఇప్పుడు ఈ ప్రతిపాదనను ముందుకు తెచ్చారు. ఇక అంతా దీని అమలు పైనే ఆధారపడి ఉంటుంది. ప్రముఖ పుణ్యక్షేత్రంగా భావించే తిరుపతి ప్రాంతాన్ని కేవలం భక్తుల రాకపోకలకే పరిమితం చేయకుండా, దేశ విదేశాల నుంచి వచ్చే కుటుంబాలు తమ వివాహాది శుభకార్యాలను వైభవంగా నిర్వహించుకునేలా గమ్యస్థానంగా మార్చాలని చంద్రబాబు భావిస్తున్నారు. అందుకు అవసరమైన మౌలిక సదుపాయాలను మెరుగుపరచడంపై దృష్టి పెట్టారు. తిరుమల, తిరుపతి నగరంలో ఉన్న జలవనరులు, చెరువులను సుందరీకరించడంతో పాటు పర్యాటక రంగాన్ని అభివృద్ది చేసే దిశగా చర్యలు తీసుకోనున్నారు. దీనివల్ల స్థానిక ఆర్థిక వ్యవస్థ బలపడటంతో పాటు పరోక్షంగా ఎంతోమందికి ఉపాధి అవకాశాలు లభిస్తాయని చంద్రబాబు విశ్వసిస్తున్నారు. ఈ ప్రతిష్టాత్మక ప్రణాళిక అమలు కోసం సంబంధిత పర్యాటక శాఖాధికారులు, స్థానిక యంత్రాంగం, టీటీడీ సహకారంతో ప్రత్యేక ప్యాకేజీలను రూపొందించేందుకు ప్రణాళికలు రూపొందిస్తున్నారు. తిరుపతిలో, తిరుమలలో అందుబాటులో ఉన్న కళ్యాణ మండపాలు, కన్వెన్షన్ హాల్స్, ప్రైవేట్ వివాహ వేదికలను ఒక వ్యవస్థ కిందకు తీసుకువచ్చేలా కసరత్తు చేస్తున్నట్లు చంద్రబాబు వెల్లడించారు. వివాహ వేడుకలకు హాజరయ్యే అతిథులకు ఎలాంటి అసౌకర్యం కలగకుండా రవాణా, వసతి, క్యాటరింగ్ తదితర సేవలను నాణ్యతతో అందించేలా సర్వీస్ ప్రొవైడర్లను కూడా ఈ బృహత్తర కార్యంలో భాగస్వాములను చేసేలా ప్రణాళికలు రచిస్తున్నట్లు తెలిపారు. సంప్రదాయ హిందూ వివాహ పద్ధతులు ఉట్టిపడేలా.. అదే సమయంలో ఆధునిక హంగులతో కూడిన సౌకర్యాలు అందుబాటులో ఉండేలా ఈ ప్రణాళికలు రూపొందుతున్నాయని చంద్రబాబు వివరించారు. కొంతకాలంగా ప్రపంచ వ్యాప్తంగా డెస్టినేషన్ వెడ్డింగ్స్‌పై ఆసక్తి పెరుగుతున్న నేపథ్యంలో, తెలుగు ఎన్.ఆర్.ఐలు, ఇతర దేశాల నుంచి వచ్చే హిందూ కుటుంబాలు తిరుపతిని మేరేజ్ డెస్టినూషన్ గా ఎంచుకునేందుకు అవసరమై, అనుకూలమైన వాతావరణాన్ని కల్పించడమే ఈ తిరుపతి, తిరుమల డెస్టినేషన్ వెడ్డింగ్ ప్రాజెక్టు ప్రధాన లక్ష్యమని చంద్రబాబు చెప్పారు. [Tirupati wedding destination, Chief Minister Chandrababu Naidu, Infrasrtucture, Develope, NRI, Celebreties, Prestgious, Project]

Published on: Wed Sep 16, 2026 4:56PM

యూపీఐ సేవలపై వడ్డింపు వెనుక అమెరికా హస్తం?

భారతదేశంలో అత్యంత ప్రజాదరణ పొందిన డిజిటల్ చెల్లింపుల వ్యవస్థ అయిన యూనిఫైడ్ పేమెంట్స్ ఇంటర్‌ఫేస్ (యూపీఐ) లావాదేవీలపై తాజాగా ప్రతిపాదించిన మర్చంట్ డిస్కౌంట్ రేట్ (MDR) నిబంధనల వ్యవహారం రాజకీయంగా తీవ్ర దుమారం రేపుతోంది. దేశవ్యాప్తంగా కోట్లాది మంది వినియోగదారులు నిత్యం సులభంగా ఉపయోగించే యూపీఐ సేవలపై ఛార్జీల విధింపునకు మార్గం సుగమం చేయడం వెనుక అమెరికా ఒత్తిడి స్పష్టంగా కనిపిస్తోందని విపక్ష పార్టీలు తీవ్ర స్థాయిలో ఆరోపిస్తున్నాయి. అమెరికా చెల్లింపుల దిగ్గజ కంపెనీలకు అనుకూలంగా వ్యవహరించేందుకే కేంద్ర ప్రభుత్వం ఈ నిర్ణయం తీసుకుందని కాంగ్రెస్ పార్టీ అగ్రనేతలు మండిపడుతున్నారు. కేంద్ర ప్రభుత్వం ప్రవేశపెట్టిన నూతన ఎండీఆర్ ఫ్రేమ్‌వర్క్ ప్రకారం, రెండు వేలు అంత కంటే ఎక్కువ మొత్తంలో జరిగే కొన్ని నిర్దిష్ట వ్యాపార లావాదేవీలపై 0.4 శాతం మేర మర్చంట్ డిస్కౌంట్ రేట్ వర్తించనుంది. రూ.75 వేలు అంతకంటే ఎక్కువ విలువైన లావాదేవీలకు ఈ రుసుమును గరిష్టంగా మూడు వందల రూపాయలకు పరిమితం చేశారు. అయితే, సాధారణ వ్యక్తుల మధ్య జరిగే లావాదేవీలతో పాటు, రెండు వేల రూపాయల లోపు ఉండే చిన్న చెల్లింపులు యథావిధిగా పూర్తిగా ఉచితంగానే కొనసాగుతాయి. అంతేకాకుండా ఈ ఛార్జీలను వినియోగదారులు నేరుగా చెల్లించాల్సిన అవసరం లేదని, ఇది పూర్తిగా వ్యాపార వ్యవస్థ పరిధిలోనిదంటూ కేంద్ర ఆర్థిక మంత్రిత్వ శాఖ వివరణ ఇచ్చింది. అయితే ప్రభుత్వ వివరణపై అభ్యంతరాలు వ్యక్తం చేస్తున్న విపక్షాలు.. ఈ నిర్ణయం పరోక్షంగా సామాన్య ప్రజలపై తీవ్ర భారాన్ని మోపుతుందని ఆరోపిస్తున్నాయి. లోక్‌సభలో ప్రతిపక్ష నేత రాహుల్ గాంధీ.. అమెరికా ఒత్తిడికి తలొగ్గి మోదీ సర్కార్ దేశీయ డిజిటల్ పేమెంట్స్ విధానాన్ని నీరుగారుస్తోందని ఆరోపించారు. గతంలో యూపీఐ సేవలు పూర్తిగా ఉచితంగా లభించేలా చూసిన జీరో ఎండీఆర్ విధానానికి స్వస్తి పలికేలా ప్రస్తుత మార్పులు ఉన్నాయని విమర్శించారు. వీసా, మాస్టర్ కార్డ్ వంటి అమెరికన్ సంస్థలు భారతీయ మార్కెట్‌లో పోటీ పడలేకపోతున్నాయనే కారణంతోనే, అమెరికా ఒత్తిడి మేరకు ఈ నిర్ణయం తీసుకున్నారంటూ విపక్ష నేతలు ఆరోపణలు గుప్పిస్తున్నారు. మరోవైపు కాంగ్రెస్ రాజ్యసభ సభ్యుడు జైరామ్ రమేష్ కూడా ఈ అంశంపై కేంద్రాన్ని నిలదీశారు. అమెరికా ట్రేడ్ రిప్రజెంటేటివ్ ( గతంలో యూపీఐ జీరో ఎండీఆర్ విధానాన్ని తీవ్రంగా వ్యతిరేకించిందని, ఇప్పుడు అదే ఒత్తిడి కారణంగా భారత్ తన విధానాన్ని మార్చుకుంటోందనీ పేర్కొన్నారు. కేవలం వ్యాపారులపైనే ఈ భారం పడుతుందని ప్రభుత్వం చెబుతున్నప్పటికీ, ఆ భారాన్ని వ్యాపారులు తమ వస్తువుల ధరల్లో సర్దుబాటు చేసుకుంటారని, ఫలితంగా అంతిమంగా ఆ భారం వినియోగదారుడి జేబుపైనే పడుతుందని ఆర్థిక నిపుణులు హెచ్చరిస్తున్నారు. గత కొద్ది సంవత్సరాలుగా భారతదేశంలో డిజిటల్ లావాదేవీల వృద్ధికి యూపీఐ ఒక ప్రధాన బలమైన మూల స్తంభంగా నిలిచింది. ఎలాంటి అదనపు రుసుములు లేకపోవడంతో వీధి వ్యాపారుల నుంచి కార్పొరేట్ల వరకు అందరూ దీనిని ఆశ్రయించారు. అయితే ఇప్పుడు ప్రభుత్వం డిజిటల్ చెల్లింపుల వ్యవస్థ నిర్వహణ, భద్రత ప్రమాణాలు, సాంకేతిక మౌలిక వసతుల కల్పన కోసం సుస్థిరమైన ఆదాయ వనరు అవసరమని భావిస్తోంది. ఈ నేపథ్యంలోనే పెద్ద మొత్తాల వ్యాపార లావాదేవీలపై ఎండీఆర్ వసూలు చేయాలని నిర్ణయించినట్లు రిజర్వ్ బ్యాంక్ వర్గాలు చెబుతున్నాయి. ఈ మొత్తం పరిణామాలు రాబోయే రోజుల్లో దేశ ఆర్థిక రంగంలో పెను మార్పులకు దారితీసే అవకాశం ఉందన్న అభిప్రాయం పరిశీలకులు వ్యక్తం చేస్తున్నారు. ప్రభుత్వం చెబుతున్నట్లుగా ఈ విధానం కేవలం మర్చంట్ వ్యవస్థకే పరిమితమవుతుందా, లేక పరోక్షంగా వినియోగదారులపై ధరల రూపంలో భారం మోపుతుందా అనేదానిపై స్పష్టత రావాల్సి ఉంది. మరోవైపు.. ఈ అంశాన్ని రాజకీయంగా తమకు అనుకూలంగా మలచుకుంటున్న విపక్షాలు, దేశ ఆర్థిక సార్వభౌమత్వాన్ని అమెరికా ఒత్తిళ్లకు తాకట్టు పెడుతున్నారంటూ ప్రభుత్వాన్ని నిలదీస్తున్నాయి. మొత్తం మీద ఉచితం నుంచి వడ్డింపు వరకూ సాగిన ఇండియా యూపీఐ ప్రస్థానం ఇప్పుడు సవాళ్లు ఎదుర్కొంటున్నదనే చెప్పాలి.

Published on: Wed Sep 16, 2026 4:13PM

అరేబియా సముద్రంలో ఇండియన్ నౌకను ఢీ కొన్న పాకిస్థాన్ షిప్.. బరితెగింపు కాకమరేంటి?

కవ్వింపులకు పాల్పడటం, ఆ తరువాత కాళ్ల బేరానికి రావడం పాకిస్థాన్ కు రివాజుగా మారిపోయినట్లు కనిపిస్తున్నది. తాజాగా పాకిస్థాన్ మళ్లీ అటువంటి కవ్వింపు చర్యకు పాల్పడింది. ఉపేక్షించడానికి వీలులేని, వీలు కాని తీరుగా వ్యవహరించింది. తాజాగా పాక్ నౌకాదళానికి చెందిన నౌక ఒకటి భారత యుద్ధ నౌకను ఉద్దేశపూర్వకంగా ఢీ కొట్టింది. ఈ ఘటనపై భారత ప్రభుత్వం సీరియస్ గా స్పందించింది. న్యూఢిల్లీలోని పాకిస్థాన్ హైకమిషన్ తాత్కాలిక దౌత్యవేత్తను విదేశాంగ శాఖకు పిలిపించి మరీ సీరియస్ వార్నింగ్ ఇచ్చింది. నావికాదళం తీరు ఇసుమంతైనా అంగీకారయోగ్యం కాదని గర్హించింది. నిబంధనలను తుంగలోకి తొక్కి పాక్ నౌకాదళం వ్యవహరించిన తీరు రెండు దేశాల మధ్య రక్షణ రంగంలో కొత్త ఉద్రిక్తతలకు దారితీయడం ఖాయంగా పరిశీలకులు విశ్లేషిస్తున్నారు. వివరాల్లోకి వెడితే.. ఉత్తర అరేబియా సముద్రంలో ఒమన్ తీరానికి దాదాపు 220 కిలోమీటర్ల తూర్పు దిశలో అంతర్జాతీయ జలాల్లో ఈ ఘటన జరిగింది. ఇండియన్ నేవీకి చెందిన ఒక ఫ్రంట్‌లైన్ యుద్ధనౌక సాధారణ నిఘా, పెట్రోలింగ్ విధులను నిర్వర్తిస్తున్న తరుణంలో పాకిస్థాన్ నౌకాదళానికి చెందిన పీఎన్ఎస్ హునైన్ అనే పెట్రోలింగ్ నౌక వేగంగా, ఎలాంటి ముందస్తు సంకేతాలు ఇవ్వకుండా.. భద్రతా ప్రమాణాలను తుంగలోకి తొక్కి మరీ భారత నౌక సమీపానికి దూసుకొచ్చింది. భారత నౌక సిబ్బంది స్పందించి అంతర్జాతీయ సముద్ర మార్గ నిబంధనల ప్రకారం రేడియో ఛానెల్ ద్వారా పదే పదే హెచ్చరికలు జారీ చేసినప్పటికీ ఖాతరు చేయకుండా పాక్ నౌక తన వేగాన్ని మరింత పెంచింది. ఎటువంటి వృత్తిపరమైన బాధ్యత లేకుండా అత్యంత ప్రమాదకర రీతిలో వ్యహరించిన పాక్ నౌక, భారత నౌకను పక్క నుంచి తాకుతూ ముందుకు వెళ్లింది. అయితే, ఈ ఘటనలో భారత యుద్ధనౌకకు ఎలాంటి నిర్మాణపరమైన (స్ట్రక్చరల్) నష్టం జరగలేదని, నౌక సామర్థ్యానికి ఎటువంటి భంగం వాటిల్లలేదని రక్షణ వర్గాలు స్పష్టం చేశాయి. భారత నౌకలోని సిబ్బంది ఎవరికీ గాయాలు కాలేదని, ప్రమాదం జరిగిన వెంటనే పరిస్థితిని అదుపులోకి తెచ్చి నౌక తన నిర్దేశిత విధులను ఎలాంటి అంతరాయం లేకుండా కొనసాగించిందని అధికార వర్గాలు వెల్లడించాయి. తక్షణమే రెండు నౌకలు వేర్వేరు దిశలకు మళ్లినప్పటికీ, పాక్ నౌకాదళ సిబ్బంది అనుసరించిన ప్రమాదకర విన్యాసాలు మాత్రం సముద్ర భద్రతా నిబంధనలను ఉల్లంఘించేలా ఉన్నాయి. ఈ వ్యవహారంపై భారత నావికాదళం ఇప్పటికే సైనిక మార్గాల ద్వారా పాకిస్థాన్ సైనిక అధికారులతో సంప్రదింపులు జరిపి, ఈ తరహా బాధ్యతారహిత చర్యలపై అభ్యంతరం వ్యక్తం చేసింది. ఈ దుర్ఘటనపై దౌత్యపరంగా గట్టి చర్యలు చేపట్టిన భారత విదేశాంగ మంత్రిత్వ శాఖ ), పాకిస్థాన్ అధికారుల తీరుపై నిరసన పత్రం అందించింది. 1991 ఏప్రిల్‌లో భారత్, పాకిస్థాన్ మధ్య సైనిక విన్యాసాలు, కదలికలపై కుదిరిన ద్వైపాక్షిక ఒప్పందంలోని ఆర్టికల్ 10 నిబంధనలను పాకిస్థాన్ నౌక ప్రత్యక్షంగా ఉల్లంఘించిందని భారత్ స్పష్టం చేసింది. అంతర్జాతీయ జలాల్లో సైనిక నౌకలు కదులుతున్నప్పుడు పాటించాల్సిన కనీస జాగ్రత్తలను, పరస్పర అవగాహన ఒప్పందాలను పాక్ బేఖాతరు చేసిందని విదేశాంగ శాఖ పేర్కొంది. భవిష్యత్తులో ఇలాంటి ముప్పులు పునరావృతం కాకుండా అరికట్టేందుకు పాకిస్థాన్ ప్రభుత్వ, సైనిక యంత్రాంగం తమ నౌకాదళ సిబ్బందిని కట్టడి చేయాల్సిన అవసరం ఉందని దౌత్యవేత్తకు తేల్చిచెప్పారు. ఇస్లామాబాద్‌లోని భారత దౌత్య కార్యాలయం కూడా ఇదే అంశంపై పాకిస్థాన్ విదేశాంగ మంత్రిత్వ శాఖకు ప్రత్యేకంగా నిరసన తెలపాలని స్పష్టమైన ఆదేశాలు జారీ అయ్యాయి. భారత్, పాకిస్థాన్ నౌకాదళాల మధ్య ఇటువంటి ఘర్షణలు చోటుచేసుకోవడం ఇదే తొలిసారి కాదు. పదిహేనేళ్ల క్రితం, అంటే 2011 జూన్‌లో గల్ఫ్ ఆఫ్ అడెన్ ప్రాంతంలో కూడా ఇలాంటిదే ఒక ఉద్రిక్త సంఘటన వెలుగుచూసింది. సోమాలి పైరేట్ల బారి నుంచి విముక్తి పొందిన ఒక వాణిజ్య నౌకను రక్షించే క్రమంలో, పాకిస్థాన్ నౌక 'పీఎన్ఎస్ బాబర్' అత్యంత వేగంగా దూసుకొచ్చి భారత యుద్ధనౌక 'ఐఎన్ఎస్ గోదావరి'ని ఢీకొట్టింది. ఆ ఘటనలో ఐఎన్ఎస్ గోదావరికి చెందిన హెలికాప్టర్ డెక్ ఫ్లైట్ డెక్‌ నెట్‌ దెబ్బతిన్నది. నాటి ఘటనలోనూ పాకిస్థాన్ నౌకాదళం తప్పును కప్పిపుచ్చుకునే యత్నం చేయగా, భారత్ ఆధారాలతో సహా నిరూపించింది. మళ్లీ ఇన్నాళ్లకు సరిగ్గా అదే తరహాలో ఉత్తర అరేబియా సముద్రంలో పాక్ నౌక పీఎన్ఎస్ హునైన్ ప్రవర్తించడం పట్ల రక్షణ నిపుణులు ఆందోళన వ్యక్తం చేస్తున్నారు. సముద్రయాన భద్రతను, అంతర్జాతీయ శాంతి సూత్రాలను దెబ్బతీసే ఈ చర్యలను భారత్ అత్యంత తేలిగ్గా తీసుకోబోదని దౌత్య పరిణామాలు స్పష్టం చేస్తున్నాయి. రాబోయే రోజుల్లో సముద్ర సరిహద్దుల వద్ద రక్షణ నిఘాను మరింత కట్టుదిట్టం చేసే దిశగా భారత నావికాదళం అడుగులు వేయనుంది. అంతర్జాతీయ జలాల్లో వాణిజ్య నౌకల రక్షణ, ఉగ్రవాద నిరోధక పెట్రోలింగ్, సముద్రపు దొంగల ఏరివేత వంటి మానవతా విధులతో పాటు, శత్రు దేశాల కవ్వింపు చర్యలను తిప్పికొట్టేలా సరికొత్త వ్యూహాలను సిద్ధం చేస్తున్నది. భవిష్యత్తులో ఇలాంటి సంఘటనలు జరగకుండా సముద్ర మార్గాల్లో నిరంతరం కమ్యూనికేషన్ ప్రోటోకాల్స్‌ను పటిష్టం చేయాలని, ఒకవేళ పాకిస్థాన్ నావికాదళం మళ్లీ ఇలాంటి నిబంధనల ఉల్లంఘనకు పాల్పడితే అంతర్జాతీయ వేదికలపై మరింత గట్టిగా ఎండగట్టాలని రక్షణ రంగ నిపుణులు సూచిస్తున్నారు. [Indian Navy, Pakistan Navy Ship, Arabian Sea Confrontation, Indian Ministry of External Affairs, Summoning of Pakistani Diplomat, Telugu One]

Published on: Wed Sep 16, 2026 3:39PM

ఇకపై యూపీఐ పేమెంట్స్‌పై ఛార్జీలు వసూలు.. అక్టోబర్ 15 నుంచి అమల్లోకి..!

యూపీఐ ద్వారా బ్యాంకులు, సంస్థలకు వేల కోట్ల రాబడి..! దేశవ్యాప్తంగా విప్లవాత్మక మార్పులు సృష్టించిన యూపీఐ డిజిటల్ చెల్లింపుల వ్యవస్థలో కీలక పరిణామం చోటుచేసుకుంది. నేషనల్ పేమెంట్స్ కార్పొరేషన్ ఆఫ్ ఇండియా తీసుకున్న సరికొత్త నిర్ణయం ఆర్థిక రంగంలో చర్చనీయాంశమైంది. ఎంపిక చేసిన కొన్ని రకాల యూపీఐ లావాదేవీలపై మర్చంట్ డిస్కౌంట్ రేట్‌ను ప్రవేశపెట్టాలని నిర్ణయించారు. ఈ నిబంధనల ప్రకారం అక్టోబర్ 15వ తేదీ నుంచి నూతన మార్గదర్శకాలు అమల్లోకి రానున్నాయి. నిపుణుల విశ్లేషణల ప్రకారం, రూ.2,000 దాటిన బిజినెస్ లావాదేవీలపై 0.4 శాతం మేర ఎండీఆర్‌ ఛార్జ్ వర్తిస్తుంది. అయితే సాధారణ ప్రజలకు ఈ నిబంధన నుంచి పూర్తి మినహాయింపు కల్పించారు.సామాన్యులు చేసే చెల్లింపులపై ఎలాంటి అదనపు భారం పడకుండా జాగ్రత్తలు తీసుకున్నారు. కేవలం వ్యాపారులు మాత్రమే ఈ నిర్దిష్ట రుసుమును చెల్లించాల్సి ఉంటుందని స్పష్టం చేశారు.పెద్ద మొత్తంలో జరిగే లావాదేవీలకు గరిష్ట పరిమితిని కూడా నిర్ణయించారు. రూ.75,000 అంతకంటే ఎక్కువ విలువ కలిగిన చెల్లింపులకు ఈ రుసుమును గరిష్టంగా రూ.300 వరకు మాత్రమే వసూలు చేస్తారు. ఈ నిర్ణయం ద్వారా బ్యాంకులు మరియు డిజిటల్ పేమెంట్ సేవలు అందించే సంస్థలకు భారీ ఆర్థిక ప్రయోజనం చేకూరనుంది. అంతర్జాతీయ బ్రోకరేజ్ సంస్థల అంచనాల ప్రకారం దీనివల్ల ఏటా సుమారు రూ.20,000 కోట్ల వరకు అదనపు ఆదాయం సమకూరే అవకాశం ఉంది.ప్రముఖ గ్లోబల్ ఆర్థిక సంస్థల విశ్లేషణల ప్రకారం ఈ రాబడిలో సింহభాగం బ్యాంకులకే దక్కుతుంది. భవిష్యత్తులో డిజిటల్ వాలెట్లు మరియు పేమెంట్ యాప్‌ల నిర్వహణ మరింత లాభసాటిగా మారుతుందని అంచనా వేస్తున్నారు. వ్యాపార వర్గాల్లో ఈ నిబంధనలపై భిన్న స్పందనలు వ్యక్తమవుతున్నప్పటికీ, డిజిటల్ ఆర్థిక వ్యవస్థ మరింత పటిష్టంగా మారడానికి ఈ చర్య దోహదపడుతుందని ఆర్థిక నిపుణులు భావిస్తున్నారు. రూ. 2వేలు దాటితే 0.4 శాతం ఎండీఆర్..! అయితే, రూ. 2వేలు దాటిన మర్చంట్ యూపీఐ పేమెంట్లపై మాత్రం 0.4శాతం ఎండీఆర్ వర్తిస్తుంది. ఈ ఛార్జీని వినియోగదారులు కాకుండా మర్చంట్లే భరించాల్సి ఉంటుంది. రూ. 75వేలు లేదా అంతకంటే ఎక్కువ లావాదేవీలకు ఛార్జీ గరిష్టంగా రూ. 300కు మాత్రమే పరిమితంగా ఉంటుంది. ఉదాహరణకు.. యూపీఐ ద్వారా రూ. 1 లక్ష చెల్లింపుపై సాధారణంగా రూ. 400 అవ్వాల్సి ఉన్నా గరిష్ట పరిమితి కారణంగా రూ. 300 మాత్రమే వసూలు చేయనుంది. ఎంత పేమెంట్ చేస్తే ఎంత ఛార్జీ పడుతుందంటే..? వ్యాపారులకు వ్యక్తులు చేసే యూపీఐ పేమెంట్లపై ఛార్జీలు ఇవే : రూ.2000 నుంచి 3000 మధ్య రూ.5 ఛార్జీ రూ.3000కు రూ.12 రూ.50,000కు రూ.200 రూ.75,000 ఆ పైన చెల్లింపులకు రూ.300 చిరు వ్యాపారులకు రూ.లక్ష వరకు ఎలాంటి MDR ఉండదు. రూ.2వేలు పైబడిన లావాదేవీలపై ఫిక్స్‌డ్‌గా రూ.5 MDR వర్తిస్తుంది. [ UPI New Charges, NPCI MDR Policy, Digital Payments India, P2M Transaction Fees, Bank Revenue Growth Telugu One, Telugu News ]

Published on: Wed Sep 16, 2026 3:29PM