Andhra Pradesh News | AP Latest News, Politics & Updates

అర్నాబ్ ఎఫెక్ట్: దెబ్బతిన్న కేకే లైన్.. రాళ్ల రాకపోకలు నిలిపివేత.!

ఆంధ్రప్రదేశ్‌ను చిగురుటాకులా వణికించిన అర్నాబ్ అతి తీవ్ర తుపాను అర్నాబ్ కారణంగా సంభవించిన ఆస్తినష్టం ఇంతా అంతా కాదు. ప్రాథమిక అంచనాలే అపార ఆస్తినష్టం సంభవించిందని చెబుతున్నాయి. వాస్తవంగా కేంద్ర బృందం, రాష్ట్ర బృందాలు క్షేత్రస్థాయిలో పర్యటించిన తరువాత నివేదికలో పేర్కొనే ఆస్తినష్టం మరింత ఎక్కవగా ఉంటుందని పరిశీలకులు చెబుతున్నారు. ఆస్తి నష్టం పక్కన పెడితే ఆర్నాబ్ ప్రభావంతో రాష్ట్రంలో రవాణా వ్యవస్థ పరిస్థితి దయనీయంగా మారింది. ఇప్పటికే రాష్ట్రవ్యాప్తంగా పెద్ద సంఖ్యలో రైళ్లు రద్దయ్యాయి. ఇక ఇప్పుడు అర్పాబ్ ప్రభావం కారణంగా రైల్వే ట్రాక్ లు దెబ్బతిన్న సంఘటనలు ఇప్పుడు వెలుగు చూస్తున్నాయి. అల్లూరి సీతారామరాజు జిల్లాలోని ప్రముఖ పర్యాటక ప్రాంతమైన అరకులో తుపాను ధాటికి రైల్వే ట్రాక్ ధ్వంసమైంది. కేకే లైన్ (కొత్తవలస-కిరండోల్ మార్గం) పరిధిలో రైల్వే ట్రాక్ ధ్వంసమైంది. అరకు ప్రాంతంలోని బొర్రా గుహలు, కరకవలస మధ్య ఉండే రైల్వే ట్రాక్ భారీ వర్షాలు, వరద ప్రవాహం కారణంగా దెబ్బతింది. ట్రాక్ కింద ఉన్న మట్టి కొట్టుకుపోవడం, రాళ్లు జారిపడటంతో ఆ మార్గంలో రైళ్ల రాకపోకలను నిలిపివేశారు. ఈ మార్గంలో రాకపోకలు నిలిచిపోవడంతో పలు ఎక్స్‌ప్రెస్, ప్యాసింజర్ రైళ్లను మధ్యలోనే నిలిపివేయడం లేదా దారి మళ్లించడం వంటి చర్యలు చేపట్టారు. ట్రాక్ దెబ్బతిన్న స్థలానికి చేరుకున్న రైల్వే ఇంజనీరింగ్, రక్షణ సిబ్బంది యుద్ధ ప్రాతిపదికన ట్రాక్ పై రైళ్ల రాకపోకలు పునరుద్ధరించేలా యుద్ధ ప్రాతిపదికన పనులు ప్రారంభించారు. వాతావరణం ప్రతికూలంగా ఉన్నప్పటికీ, ట్రాక్‌ను వీలైనంత త్వరగా బాగుచేసి రైలు సర్వీసులను పునరుద్ధరించేలా యంత్రాంగం శ్రమిస్తోంది. [Arnab Effect KK Line Festroyed, Araku Railway Track Damaged, Cyclone Arnab Train Services, KK Line Train Cancellation, TeluguOne News]

Published on: Wed Oct 28, 2026 12:44PM

అమిత్ షాకు చంద్రబాబు లేఖ: అర్నాబ్ నష్టం అంచనాకు కేంద్ర బృందాన్ని పంపాలని వినతి.!

ఆంధ్రప్రదేశ్ నుఅతలాకుతలం చేసిన అర్నాబ్ తుపాను ప్రభావం, రాష్ట్ర ప్రభుత్వం చేపట్టిన ముందస్తు నివారణ చర్యలపై ముఖ్యమంత్రి నారా చంద్రబాబు నాయుడు కేంద్ర ప్రభుత్వానికి ఒక లేఖ రాశారు. . బంగాళాఖాతంలో ఏర్పడిన అర్నాబ్ తుపాను కారణంగా ప్రాణనష్టం లేకుండా చేయడానికీ, నష్టాన్ని కనిష్ట స్థాయికి తగ్గించానికి రాష్ట్ర ప్రభుత్వం తీసుకున్న చర్యలను ఆ లేఖలో చంద్రబాబు వివరించారు. ఈ మేరకు కేంద్ర హోంమంత్రి అమిత్ షాకు రాసిన లేఖలో అర్నాబ్ ప్రభావంతో పెద్ద ఎత్తున పంట, ఆస్తి నష్టం సంభవించిందని పేర్కొన్నారు. ముఖ్యంగా ఉమ్మడి ఉభయ గోదావరి జిల్లాలు, కృష్ణా, ఉత్తరాంధ్ర జిల్లాలో బీభత్సం సృష్టించిందని పేర్కొన్నారు. రహదారులపై పడిన వృక్షాలు, దెబ్బతిన్న విద్యుత్ సరఫరా వ్యవస్థ గురించి వివరించారు. ఎడతెరిపి లేకుండా కురుస్తున్న వర్షాల వల్ల లోతట్టు ప్రాంతాలు జలమయమయ్యాయని వివరించారు. వర్షాలముప్పు మరో 24 గంటల పాటు కొనసాగే అవకాశం ఉందని ఆ లేఖలో చంద్రబాబు పేర్కొన్నారు. ఇక పోతే అర్నాబ్ తుపాను ప్రభావం కారణంగా రాష్ట్రంలో జరిగి ఆస్తి నష్టం అంచనాకు సత్వరమే కేంద్ర బృందాన్ని పంపాలని ఆ లేఖలో చంద్రబాబు హోంమంత్రిని కోరారు. అలాగే అర్నాబ్ కారణంగా జరిగిన నష్టాన్ని పూడ్చే విషయంలో కేంద్రం నుంచి ఆర్థిక సహాయాన్ని చంద్రబాబు కోరారు. అలాగే తుపాను పరిస్థితులను ఎదుర్కొన్ని నష్టాన్ని సాధ్యమైనంత వరకూ నివారించేందుకు రాష్ట్ర ప్రభుత్వం అన్ని చర్యలూ తీసుకుందని వివరించారు. తుపాను ప్రభావిత ప్రాంతాలలో 16ఎన్డీఆర్ఎఫ్, 11 సీఆర్డీఎఫ్ బృందాలను నియోగించినట్లు, అలాగే వేల మంది ప్రజలను పునరావాస కేంద్రాలకు తరలించినట్లు వివరించారు. అలాగే ప్రాథమిక అంచనా ప్రకారం తుపాను కారణంగా 180 ఇళ్లు దెబ్బతిన్నాయని, రహదారులపై వందల సంఖ్యలో చెట్లు కూలిపోయాయని, రహదారులు ధ్వంసమయ్యాయనీ చంద్రబాబు ఆ లేఖలో పేర్కొన్నారు. విద్యుత్ స్తంభాలు నేలకొరగడంతో తుపాను ప్రభావిత ప్రాంతంలో విద్యుత్ సరఫరా నిలిచిపోయిందనీ, పునరుద్ధరణ పనులను యుద్ధ ప్రాతిపదికన చేపట్టామనీ వివరించారు. ఇక దాదాపు 10 వేల 450 హెక్టార్లలో ఉద్యాన పంటలకు నష్టం వాటిల్లిందని వివరించారు. తుఫాను నష్టంపై సమగ్ర అంచనాను త్వరలోనే కేంద్రానికి నివేదించనున్నట్లు ఆ లేఖలో పేర్కొన్న చంద్రబాబు, తుపాను సహాయక చర్యలకు ఎన్డీఆర్‌ఎఫ్‌, ఇతర కేంద్ర సంస్థల సహకారం కొనసాగించాలని కోరారు. అలాగే తుపాను నష్టాన్ని అంచనా వేసేందుకు సాధ్యమైనంత త్వరలో కేంద్ర బృందాన్ని పంపాలని కోరారు. [Chandrababu Letter Home Minister Amit Shah, Cyclone Arnab Effect AP, Andhra Pradesh Storm, Central Team, Loss Estimate, TeluguOne]

Published on: Wed Oct 28, 2026 12:28PM

తీరం దాటిన అర్నాబ్: అయినా తప్పని ముప్పు.. మరో 24 గంటలు అప్రమత్తత అనివార్యం.!

ఆంధ్రప్రదేశ్ భయపెట్టి, చిగురుటాకులా వణికించిన అర్నాబ్ తుపాన్ తీరం దాటింది. ఈ ఉదయం పది గంటల ప్రాంతంలో అర్నాబ్ తీవ్ర తుపాను నరసాపురం, యానం మధ్య తీరాన్ని తాకింది. తుపాను తీరం దాటుతున్న సమయంలో భారీ వర్షాలకు తోడు గంటకు దాదాపు 150 కిలోమీటర్ల వేగంతో ప్రచండగాలులు వీచాయి. ఈ గాలుల తీవ్రతకు తీర ప్రాంతాల్లోని వృక్షాలు,విద్యుత్ స్తంభాలు పెద్ద సంఖ్యలో నేలకూలాయి. ఇక గాలుల తీవ్రతకు ఎగసిపడిన రాకాసి అలలు మత్స్యకారుల నివాసాలను ముంచెత్తాయి. తీరం దాటిన తర్వాత అర్నాబ్ బలహీనపడినా దాని ప్రభావం కోస్తాంధ్ర, ఉత్తరాంధ్ర జిల్లాలపై తీవ్రం మరో 24 గంటల పాటు కొనసాగు అవకాశం ఉందని వాతావరణ శాఖ హెచ్చరించింది. ఎడతెరిపి లేకుండా కుండపోత వర్షాలు కొనసాగుతాయనీ, ఈ కారణంగా మెరుపు వరదలు సంభవించే అవకాశం ఉందనీ, లోతట్టు ప్రాంతాలు పూర్తిగా నీట మునిగే ప్రమాదం పొంచి ఉందనీ హెచ్చరించింది. ఈ హెచ్చరికల నేపథ్యంలో అధికార యంత్రాంగం అప్రమత్తమైంది. ఎలాంటి పరిస్థితినైనా సమర్థవంతంగా ఎదుర్కొనేందుకు వీలుగా రాష్ట్రవ్యాప్తంగా ఎన్డీఆర్ఎఫ్, ఎస్డీఆర్ఎఫ్ప్రత్యేక బలగాలు సిద్ధంగా ఉన్నాయి. [Cyclone Arnab, Land Fall Yanam Narasapuram Coast, Heavy Rains, Arnab Storm, Wild Winds, Effect, Another 24 Hours, TeluguOne]

Published on: Wed Oct 28, 2026 11:07AM

చెరువుల్లా మారిన రోడ్లు: బందర్ పై అర్నాబ్ ఎఫెక్ట్.!

అర్నాబ్ తుపాను ప్రభావం బందర్ పై ప్రస్ఫుటంగా కనిపించింది. బందర్ వ్యాప్తంగా ఎక్కడ చూసినా రోడ్లకు అడ్డంగా కూలిపోయిన వృక్షాలు, విద్యుత్ స్తాంభాలే కనిపిస్తున్నాయి. బందర్ లోని కూడళ్లు ఎస్పీ కార్యాలయ పరిసర ప్రాంతాలు కలెక్టర్ బంగ్లా, లక్ష్మీ టాకీస్ సెంటర్ వంటి కీలక ప్రాంతాల్లో భారీ చెట్లు వేళ్లతో సహా కూలిపోయాయి. వీటితో పాటు పలు చోట్ల విద్యుత్ స్తంభాలు, తీగలు తెగిపడటంతో విద్యుత్ సరఫరా నిలిచిపోయింది. బందర్ లోని చాలా ప్రాంతాలలో ట్రాఫిక్ స్తంభించిపోయింది. ఇక భారీ వర్షం కారణంగా బందరు వీధులు చెరువులను తలపించాయి. లోతట్టు ప్రాంతాలు పూర్తిగా నీట మునిగాయి. ఈ నేపథ్యంలో అధికార యంత్రాంగం యుద్ధ ప్రాతిపదికన సహాయ కార్యక్రమాలు చేపట్టింది. రహదారులపై పడిన చెట్లను, కొమ్మలను యంత్రాల సాయంతో తొలగించి దారులను పునరుద్ధరించే పనులు ముమ్మరంగా సాగుతున్నాయి. అలాగే రహదారులపై నీటిని తొలగించే పనులు కూడా శరవేగంగా చేపట్టారు. అయితే తుపాను ప్రభావం ఇంకా కొనసాగుతుండటం, వర్షం కురుస్తుండటంతో ప్రజలెవరూ అత్యవసరమైతే తప్ప ఇళ్ల నుంచి బయటకు రావద్దని అధికారులు సూచించారు. [Arnab Effect On Bandar, Machilipatnam Cyclone Arnab, Heavy Rains, Current Poles, Trees Fall, Streets Water logged, Telugu One]

Published on: Wed Oct 28, 2026 10:26AM

అర్నాబ్ ఎఫెక్ట్: కోనసీమ అంధకారం.. లోతట్టు ప్రాంతాలు జలమయం, తగ్గని గాలుల తీవ్రత.!

డాక్టర్ బీఆర్ అంబేడ్కర్ కోనసీమ జిల్లాను అర్నాబ్ తుపాను తీవ్రంగా వణికించింది. నరసాపురం-యానాం మధ్య తీరం దాటిన ఈ అతి తీవ్ర తుపాను ప్రభావంతో ఉమ్మడి గోదావరి జిల్లాల్లో భీకర ఈదురుగాలులు, కుండపోత వర్షాలు కురిశాయి. తుపాను తీవ్రత కారణంగా కోనసీమ వ్యాప్తంగా జనజీవనం పూర్తిగా స్థంభించిపోయింది. ప్రచండ గాలులకు కోనసీమలోని 19 మండలాల పరిధిలో భారీ వృక్షాలు, వందలాది కొబ్బరి చెట్లు నేలకూలాయి. అలాగే అనేక ప్రాంతాల్లో విద్యుత్ స్తంభాలు విరిగిపడటంతో ఉమ్మడి తూర్పుగోదావరి జిల్లావ్యాప్తంగా విద్యుత్ సరఫరా పూర్తిగా నిలిచిపోయింది. రాత్రి సమయంలో కోనసీమలోని పలు ప్రాంతాలు పూర్తిగా అంధకారంలో మగ్గాయి. రహదారులపై భారీ చెట్లు అడ్డంపడటంతో రాకపోకలకు తీవ్ర అంతరాయం ఏర్పడింది. భారీ వర్షాలకు లోతట్టు ప్రాంతాలు జలమయమయ్యాయి. సముద్రం ముందుకు చొచ్చుకు రావడంతో గతంలో సంభవించిన ఉప్పెనను గుర్తు చేసుకుని తీరప్రాంత ప్రజలు భయంతో వణికి పోయారు. కోనసీమలో వీచిన బలమైన గాలుల హోరు గతంలోని పెను తుపానులను తలపించేలా ఉందని స్థానికులు తెలిపారు. విపత్తు ప్రభావిత ప్రాంతాల్లో సహాయక చర్యలు ముమ్మరం చేశారు. రహదారులపై పడిన చెట్లను తొలగించి ట్రాఫిక్‌ను పునరుద్ధరించేందుకు యంత్రాంగం శ్రమించింది. భారీ వర్షాలు, ఈదురుగాలుల కారణంగా ప్రయాణాలు నిలిచిపోవడంతో ప్రజలు ఇళ్లకే పరిమితమయ్యారు. పలు ప్రాంతాల్లో వరి పంటలు దెబ్బతినే అవకాశం ఉందని రైతులు ఆందోళన వ్యక్తం చేస్తున్నారు. ప్రభుత్వం చేపట్టిన ముందస్తు చర్యలు, నిరంతర పర్యవేక్షణ కారణంగా ప్రాణనష్టం జరగలేదని అధికారులు చెప్పారు. తుపాను కారణంగా జరిగిన ఆస్తినష్టం, విద్యుత్ వ్యవస్థ ధ్వంసం కావడం వంటి సమస్యలతో సాధారణ పరిస్థితులు కుదుటపడటానికి కొంత సమయం పట్టేలా ఉంది. అధికారులు క్షేత్రస్థాయిలో పరిస్థితిని సమీక్షిస్తూ పునరుద్ధరణ పనులను వేగవంతం చేశారు. [Cyclone Arnab Effect on , Konaseema, Power Supply, Heavy Rain, Strong Winds, Waterlogg, TeluguOne]

Published on: Wed Oct 28, 2026 10:04AM

చంద్రబాబు అడ్మినిస్ట్రేషన్: తెల్లవార్లూ సమీక్షలు.. కనిష్టానికి అర్నబ్ నష్టం.!

ఆంధ్రప్రదేశ్‌ పై పంజా విసిరిన అర్నాబ్ తుపానును ఎదుర్కొనేందుకు ముఖ్యమంత్రి నారా చంద్రబాబునాయుడు క్షణం విశ్రాంతి తీసుకోకుండా రాత్రంతా వరుస సమీక్షలతో అధికారులకు దిశా నిర్దేశం చేస్తూనే ఉన్నారు. పెను తుపాను కారణంగా సంభవించే నష్టాన్ని కనిష్టానికి తగ్గించాలన్న ఏకైక లక్ష్యంతో, సంకల్పంతో ఆయన నిద్రపోలేదు, అధికార యంత్రాగాన్ని నిద్రపోనివ్వలేదు. రాష్ట్ర వ్యాప్తంగా పలు జిల్లాల్లో ఎడతెరిపి లేని కుండపోత వర్షాలు, ప్రచండగాలులూ వీస్తుంటే.. చంద్రబాబు అధికారులకు దిశానిర్దేశం చేస్తూ జాగారం చేశారు. అతి తీవ్ర తుపాను అర్నాబ్ కారణంగా ప్రాణనష్టం సంభవించకుండా రాష్ట్రం బయటపడగలిగిందంటే అందుకు చంద్రబాబు నిరంతరం చేసిన సమీక్షలు, అధికారులకు చేసిన దిశా నిర్దేశం, తుపాను నష్టాన్ని తగ్గించడానికి అమలు చేసిన కార్యాచరణే కారణమని పరిశీలకులు విశ్లేషిస్తున్నారు. తుపాను తీవ్రతపై ఎప్పటికప్పుడు ప్రజలను అప్రమత్తం చేస్తూ.. తుపాను ప్రభావం తీవ్రంగా ఉండే జిల్లాలపై ప్రత్యేక శ్రద్ధ చూపుతూ ముఖ్యమంత్రి చంద్రబాబు నాయుడు జిల్లాల కలెక్టర్లు, RTGS అధికారులతో నిరంతరాయంగా సంభాషిస్తూ, నష్ట నివారణ చర్యలు, సహాయ, పునరావాస కార్యాచరణపై ఎప్పటికప్పుడు సూచనలూ, సలహాలు, అవసరమైన ఆదేశాలూ జారీ చేశారు. నేలకొరిగిన చెట్లు, విద్యుత్ స్తంభాలను వెంటవెంటే తొలగించి రాకపోకలను పునరుద్ధరించాలనీ, విద్యుత్ సరఫరా నిలిచిపోయిన ప్రాంతాల్లో పరిస్థితులు అనుకూలించిన వెంటనే మరమ్మతులు చేపట్టి సరఫరాను పునరుద్ధరించాలని సూచించారు. తుపాను ప్రభావిత ప్రాంతాల్లో ప్రజలకు ఎలాంటి ఇబ్బందులు కలగకుండా సహాయక చర్యలు చేపట్టాలని ఆదేశించారు. పరిస్థితులు సాధారణ స్థితికి వచ్చే వరకు అధికారులు క్షేత్రస్థాయిలో అందుబాటులో ఉండాలని విస్పష్ట ఆదేశాలు జారీ చేశారు. [CBN Guidence Helped, Arnab Damage Minimum, Directions, Administration, Cyclone, Seviority, Review, Whole, Night, Telugu One]

Published on: Wed Oct 28, 2026 9:49AM

అర్నబ్ ఎఫెక్ట్: రైళ్లు రద్దు.. విమాన సర్వీసులకు బ్రేక్.!

ఆంధ్రప్రదేశ్‌ను పెను తుపాను అర్నబ్ అతలాకుతలం చేసింది. అత్యంత భారీ వర్షాలు, ప్రచండ గాలులతో రాష్ట్రంలో జనజీవనం దాదాపు స్తంభించిపోయింది. తుపాను కారణగా బస్సు,రైలు, విమాన రాకపోకలకు తీవ్ర అంతరాయం ఏర్పడింది. రాష్ట్రంలోని తీర ప్రాంత గ్రామాలకు బస్సు సర్వీసులు నిలిపివేశారు. దాదాపు 50 రైళ్లు రద్దయ్యాయి. ఇక గన్నవరం ఎయిర్ పోర్టులో విమాన రాకపోకలు బంద్ చేశారు. తుపాను కారణంగా ఇండిగో, ఫ్లై 91, ఎయిర్ ఇండియాకు చెందిన పలు విమానాలు రద్దయ్యాయి. అదలా ఉంటే.. ఉప్పాడ తీరంలో సముద్రం ప్రళయ భీకరంగా మారింది. రాకాసి అలల తాకిడికి బీచ్ రోడ్డు కోతకు గురైంది. బండరాళ్లు సైతంకొట్టుకుపోయాయి. పల్లిపేట, రంగంపేట గ్రామాలను సముద్ర నీరు ముంచెత్తింది. తుపాను తీరం దాటినా దాని ప్రభావం మరో 12 గంటల పాటు ఉంటుందని అధికారులు చెబుతున్నారు. ఈ నేపథ్యంలోనే ఉభయ గోదావరి. కాకినాడ, కోనసీమ, అల్లూరి సీతారామరాజు, అనకాపల్లి, విశాఖపట్నం బాపట్ల, కృష్ణా, ఎన్టీఆర్, ఏలూరు, జిల్లాలకు రెడ్ అలర్ట్ జారీ చేశారు. అలాగే విజయనగరం, శ్రీకాకుళం, పార్వతీపురం మన్యం పల్నాడు, గుంటూరు, జిల్లాలకు ఆరెంజ్ అలర్ట్ జారీ చేశారు. [Arnab Cyclone Effect, Several, Trains, Flights, Busses, Cancelled, Red, Allert, Issued, Telugu One]

Published on: Wed Oct 28, 2026 9:32AM

అర్నబ్ ఎఫెక్ట్: కోనసీమ కకావికలు..125 కిలోమీటర్ల వేగంతో పెనుగాలులు.!

అర్నబ్ తుపాను కోనసీమ జిల్లాను కకావికలం చేసింది. పెను తుపాను ప్రభావంతో గంటకు నూటపాతిక కిలోమీటర్లకు పైగా వేగంతో వీచిన పెనుగాలులకు వేల సంఖ్యలో కొబ్బరి చెట్లు నేలకూలాయి. విద్యుత్ స్తంభాలు పడిపోయి విద్యుత్ సరఫరా నిలిచిపోయింది. తుపాను తీరం దాటే సమయంలో పెనుగాలుల వేగం తీవ్రత గంటకు150 కిలోమీటర్ల వరకూ ఉంది. ఈ ప్రచండ గాలులకు జిల్లాలోని అనేక ప్రాంతాలు అతలాకుతలమయ్యాయి. ఈ గాలుల ధాటికి వేల చెట్లు, విద్యుత్ స్తంభాలు నేలకొరిగాయి. అమలాపురం, అంబాజీపేట, పి.గన్నవరం, రాజోలు, అయినవిల్లి, మామిడికుదురు ముమ్మిడివరం, కాట్రేనికోన, ఐ.పోలవరం సహా పలు మండలాల్లో తుఫాను ప్రభావం తీవ్రంగా ఉంది. భారీ వర్షపాతం నమోదైంది. ఉద్యానపంటలు దెబ్బతిన్నాయి. కోనసీమ జిల్లా వ్యాప్తంగా దాదాపు ఆరువేల విద్యుత్ స్తంభాలు నేలకొరిగాయి. ఇంచుమించుగా జిల్లా అంతటా విద్యుత్ సరఫరా నిలిచిపోయింది. రోడ్లకు అడ్డంగా చెట్లు పడిపోవడంతో జిల్లా వ్యాప్తంగా ట్రాఫిక్ దాదాపు స్తంభించిపోయింది. జిల్లా యంత్రాంగం సహాయక చర్యలు చేపట్టింది. విరిగిపడిన స్తంభాల స్థానంలో కొత్తవి ఏర్పాటు చేసి విద్యుత్ సరఫరాను పునరుద్ధరించేందుకు సిబ్బంది శ్రమిస్తున్నారు. అలాగే రహదారులకు అడ్డంగా పడిపోయిన చెట్లు తొలగించి రవాణా పునరుద్ధరించే పనులు యుద్ధ ప్రాతిపదికన చేపట్టారు. [Cyclone Arnab Effect On Konaseema District, Damage, Amalapuram, Ambajipet, Traffic, Power, Trees, Current, Poles, Telugu One]

Published on: Wed Oct 28, 2026 9:15AM

అర్నబ్ తుఫాన్‌పై సీఎం చంద్రబాబు సమీక్ష.. ప్రజలు అప్రమత్తంగా ఉండాలని విజ్ఞప్తి.!

అర్నబ్ తుఫాన్‌ ప్రభావాన్ని ఎదుర్కొనేందుకు ఆంధ్రప్రదేశ్‌ ప్రభుత్వం పూర్తి అప్రమత్తతతో ఉందని ముఖ్యమంత్రి నారా చంద్రబాబు నాయుడు తెలిపారు. ప్రజల ప్రాణాలు, ఆస్తులకు నష్టం జరగకుండా ముందస్తు జాగ్రత్తలు తీసుకుంటున్నామని స్పష్టం చేశారు. తుఫాన్‌ సన్నద్ధతపై మీడియాతో మాట్లాడిన ఆయన.. ప్రజలు ఆందోళన చెందాల్సిన అవసరం లేదని, అయితే అధికారుల సూచనలను తప్పనిసరిగా పాటించాలని కోరారు. ఎన్నికల పనుల్లో బిజీగా ఉన్నప్పటికీ తుఫాన్‌ సన్నద్ధతపై నిరంతరం సమీక్షిస్తున్నట్లు చంద్రబాబు చెప్పారు. తుఫాన్‌ ప్రభావం శ్రీకాకుళం నుంచి బాపట్ల వరకు ఉండే అవకాశం ఉందని, తీరప్రాంత జిల్లాల్లో భారీ వర్షాలు, బలమైన గాలులు వీచే సూచనలు ఉన్నాయని తెలిపారు. కోనసీమ, ఏలూరు, పశ్చిమ గోదావరి, మన్యం, విజయనగరం, శ్రీకాకుళం, కాకినాడ తదితర ప్రాంతాల్లో ప్రభావం ఎక్కువగా ఉండవచ్చని పేర్కొన్నారు. కొన్ని ప్రాంతాల్లో అతిభారీ వర్షాలు కురిసే అవకాశం ఉందని, తీరప్రాంతాల్లో సముద్రపు నీరు లోతట్టు ప్రాంతాల్లోకి చొచ్చుకొచ్చే ప్రమాదం ఉందని సీఎం హెచ్చరించారు. లోతట్టు ప్రాంతాలు, తీరప్రాంత గ్రామాల ప్రజలు ప్రయాణాలను వాయిదా వేసుకుని సురక్షిత ప్రాంతాల్లో ఉండాలని సూచించారు. అవసరమైన వారు తుఫాన్‌ షెల్టర్లకు తరలివెళ్లాలని విజ్ఞప్తి చేశారు. 290 తుఫాన్‌ షెల్టర్లు.. 84,396 మందిని తరలింపు.! తుఫాన్‌ ప్రభావిత ప్రాంతాల్లో ప్రజలను సురక్షితంగా ఉంచేందుకు 290 షెల్టర్లను ఏర్పాటు చేశామని చంద్రబాబు తెలిపారు. ఇప్పటివరకు 84,396 మందిని సురక్షిత ప్రాంతాలకు తరలించినట్లు వెల్లడించారు. రాష్ట్ర, జిల్లా స్థాయిలో కంట్రోల్‌ రూమ్‌లు 24 గంటలూ పనిచేస్తున్నాయని, ప్రతి గంటకూ తుఫాన్‌ హెచ్చరికల బులెటిన్‌ జారీ చేస్తున్నామని చెప్పారు. మత్స్యకారులకు చెందిన 30 వేలకుపైగా బోట్లను సముద్రం నుంచి వెనక్కి రప్పించామని తెలిపారు. ఒడిశాలోని గోపాల్‌పూర్‌ వద్ద ఏపీకి చెందిన 93 బోట్లు, వాటి సిబ్బంది సురక్షితంగా ఉన్నారని పేర్కొన్నారు. వైద్య సేవల కోసం 1,316 అంబులెన్సులను సిద్ధం చేశామని, సుమారు 5 వేల మంది గర్భిణులను సమీపంలోని ఆరోగ్య కేంద్రాలు, ఆస్పత్రులకు తరలించినట్లు వివరించారు. విద్యుత్‌ అంతరాయాలు తలెత్తకుండా ముందస్తు చర్యలు.! తుఫాన్‌ కారణంగా విద్యుత్‌ సరఫరాకు అంతరాయం కలిగితే వెంటనే పునరుద్ధరించేందుకు 8,400 మంది సిబ్బందిని సిద్ధంగా ఉంచామని సీఎం చెప్పారు. సుమారు 15 వేల విద్యుత్‌ స్తంభాలు పడిపోయే అవకాశం ఉందన్న అంచనాతో ముందస్తు ఏర్పాట్లు చేస్తున్నట్లు వెల్లడించారు. తాగునీటి సరఫరాకు ట్యాంకర్లు, జనరేటర్లను సిద్ధం చేశామని తెలిపారు. భారీ వర్షాలతో నాగావళి, వంశధార నదులకు వరదలు వచ్చే అవకాశం ఉందని చంద్రబాబు హెచ్చరించారు. వివిధ జిల్లాల్లో వాగులు, వంకల్లో నీటి ప్రవాహాలను నిరంతరం పర్యవేక్షిస్తున్నామని, చెరువులకు గండ్లు పడితే వెంటనే మరమ్మతులు చేపట్టేలా చర్యలు తీసుకున్నామని వివరించారు. ముంపు గ్రామాలకు ఆహారం, ఔషధాలు సరఫరా చేసేందుకు డ్రోన్లను వినియోగిస్తున్నట్లు తెలిపారు. వ్యవసాయానికి నష్టం జరగకుండా చర్యలు.! తుఫాన్‌ ప్రభావంతో సుమారు 7.16 లక్షల హెక్టార్ల వ్యవసాయ పంటలు, 16 లక్షల హెక్టార్ల ఉద్యాన పంటలు ప్రభావితమయ్యే అవకాశం ఉందని సీఎం తెలిపారు. అంగన్‌వాడీల ద్వారా పిల్లలకు, బాలింతలకు అవసరమైన ఆహారం అందించడంతో పాటు రేషన్‌ సరఫరాకు కూడా ఏర్పాట్లు చేశామని చెప్పారు. క్యాచ్‌మెంట్‌ ప్రాంతాల్లో కురిసే వర్షపు నీటిని రిజర్వాయర్లలోకి మళ్లించేలా చర్యలు తీసుకుంటున్నట్లు వెల్లడించారు. తుఫాన్‌ వల్ల కలిగే నష్టాన్ని సాంకేతిక పరిజ్ఞానం ఆధారంగా అంచనా వేసి, నష్ట నివారణ చర్యలు చేపడుతున్నామని చంద్రబాబు పేర్కొన్నారు. ఎన్డీఆర్ఎఫ్‌, ఎస్డీఆర్ఎఫ్‌, నౌకాదళం, కోస్ట్‌గార్డ్‌ బృందాలను అప్రమత్తం చేశామని తెలిపారు. ప్రజలు అప్రమత్తంగా ఉండాలి: చంద్రబాబు.! గతంలో బుడమేరు వరదల సమయంలో విజయవాడ కలెక్టరేట్‌లో ఉండి సహాయక చర్యలను పర్యవేక్షించిన విషయాన్ని చంద్రబాబు గుర్తుచేశారు. ఆ సమయంలో ప్రజలు సుమారు రూ.500 కోట్ల మేర విరాళాలు అందించారని తెలిపారు. హుద్‌హుద్‌ తుఫాన్‌తో పోలిస్తే ప్రస్తుత తుఫాన్‌ తీవ్రత తక్కువగా ఉండవచ్చని అంచనా వేస్తున్నట్లు చెప్పారు. అయితే, పరిస్థితిని తేలికగా తీసుకోవద్దని సూచించారు. తుఫాన్‌ ప్రభావిత ప్రాంతాల కలెక్టర్లతో రాత్రి కూడా నిరంతరం సమీక్షలు నిర్వహిస్తామని సీఎం తెలిపారు. ప్రజల ప్రాణ, ఆస్తి నష్టాన్ని సాధ్యమైనంత వరకు తగ్గించడమే ప్రభుత్వ లక్ష్యమని స్పష్టం చేశారు. తీరప్రాంతాలు, ముంపు ప్రాంతాల ప్రజలు తుఫాన్‌ షెల్టర్లకు వెళ్లాలని, భారీ వర్షాలు, బలమైన గాలుల సమయంలో ప్రయాణాలు చేయవద్దని సూచించారు. నదులు, వాగులు, వరద నీటి ప్రవాహాల వైపు వెళ్లకూడదని హెచ్చరించారు.“ప్రజలు ఎవరూ అధైర్యపడాల్సిన అవసరం లేదు. ప్రభుత్వం పూర్తి సన్నద్ధతతో ఉంది. యుద్ధ ప్రాతిపదికన సహాయక చర్యలు చేపట్టేందుకు అధికార యంత్రాంగం సిద్ధంగా ఉంది” అని చంద్రబాబు భరోసా ఇచ్చారు. [ CM Chandrababu reviews Arnab storm, Cyclone Arnab, Chandrababu Naidu, Andhra Pradesh Government, AP Cyclone Alert, Andhra Pradesh Weather, Cyclone Preparedness, AP CM Press Meet, Heavy Rainfall Alert, North Andhra Cyclone, Coastal Andhra, Srikakulam, Vizianagaram ]

Published on: Tue Oct 27, 2026 9:13PM

కడప జడ్పీలో కూటమి జెండా.. 23 స్థానాలు ఏకగ్రీవం.!

మూడు దశాబ్దాల తర్వాత కడప జడ్పీ పీఠం టీడీపీకి దక్కేనా.? వైఎస్సార్ కడప జిల్లా స్థానిక సంస్థల ఎన్నికల్లో ఎన్డీయే కూటమి (టీడీపీ, బీజేపీ, జనసేన) ఆధిపత్యం చాటుకుంది. నామినేషన్ల ఉపసంహరణ ప్రక్రియ ముగిసే సమయానికి జిల్లాలోని 23 జడ్పీటీసీ స్థానాలు కూటమి ఖాతాలో ఏకగ్రీవంగా చేరాయి. ఇందులో తెలుగుదేశం పార్టీ 19 స్థానాలను కైవసం చేసుకోగా, బీజేపీ మూడు, జనసేన ఒక స్థానంలో ఏకగ్రీవంగా విజయం సాధించాయి. దీంతో జిల్లా పరిషత్‌పై కూటమి పట్టు బిగించింది. జిల్లాలోని మొత్తం 39 జడ్పీటీసీ స్థానాల్లో 23 స్థానాలు ఏకగ్రీవం కావడం రాజకీయంగా ప్రాధాన్యం సంతరించుకుంది. ప్రత్యర్థులు పోటీలో లేకపోవడంతో ఈ స్థానాల్లో కూటమి అభ్యర్థులు ఏకగ్రీవంగా ఎన్నికైనట్లు జిల్లా ఎన్నికల అధికారులు ధ్రువీకరించినట్లు సమాచారం. మిగిలిన స్థానాల్లో ఎన్నికల ప్రక్రియ కొనసాగనుంది. నియోజకవర్గాల వారీగా ఏకగ్రీవాల వివరాలు.! కమలాపురం నియోజకవర్గం.! కమలాపురం నియోజకవర్గ పరిధిలో కూటమి ఆరు స్థానాలను ఏకగ్రీవంగా దక్కించుకుంది. సీకే దిన్నె మండలం నుంచి భవాని పాలగిరి, వల్లూరు నుంచి పుత్తా హరితారెడ్డి, చెన్నూరు నుంచి కల్లూరు విజయభాస్కర్ రెడ్డి, వీరపునాయునిపల్లి నుంచి పుత్తా నరసింహారెడ్డి, పెండ్లిమర్రి నుంచి నార్రెడ్డి పద్మజ టీడీపీ తరఫున ఏకగ్రీవంగా ఎన్నికయ్యారు. కమలాపురం మండలం నుంచి కూటమి ఒప్పందంలో భాగంగా జనసేన అభ్యర్థి మోతిమేర రాముడు ఏకగ్రీవంగా గెలుపొందారు. పులివెందుల నియోజకవర్గం.! పులివెందుల నియోజకవర్గ పరిధిలోని మూడు మండలాల్లో టీడీపీ అభ్యర్థులు ఏకగ్రీవంగా ఎన్నికయ్యారు. తొండూరు నుంచి పి. శివమోహన్ రెడ్డి, సింహాద్రిపురం నుంచి మారెడ్డి జై భారత్ రెడ్డి, చక్రాయపేట నుంచి రేణుకకు పోటీ లేకపోవడంతో విజయం వరించింది. మైదుకూరు నియోజకవర్గం.! మైదుకూరు నియోజకవర్గ పరిధిలోని ఖాజీపేట, దువ్వూరు, చాపాడు మండలాల్లో టీడీపీ అభ్యర్థులు ఏకగ్రీవంగా ఎన్నికయ్యారు. ఖాజీపేట నుంచి దేవనబండ వైష్ణవి, దువ్వూరు నుంచి బోరెడ్డి ఇందు, చాపాడు నుంచి పెరుగు వీరనారాయణ యాదవ్ విజయం సాధించారు. జమ్మలమడుగు నియోజకవర్గం.! జమ్మలమడుగు నియోజకవర్గంలో బీజేపీ మూడు స్థానాలను ఏకగ్రీవంగా దక్కించుకుంది. ఎర్రగుంట్ల నుంచి మేకల చైతన్య, ముద్దనూరు నుంచి చాదిపిరాళ్ల గోవర్ధన్ రెడ్డి, జమ్మలమడుగు మండలం నుంచి చాదిపిరాళ్ల రాజేష్ రెడ్డి ఏకగ్రీవంగా ఎన్నికయ్యారు. కొండాపురం మండలం నుంచి టీడీపీ అభ్యర్థి పాముగారి నాగేశ్వర్ రెడ్డి విజయం సాధించారు. ప్రొద్దుటూరు నియోజకవర్గం.! ప్రొద్దుటూరు నియోజకవర్గ పరిధిలోని రెండు గ్రామీణ మండలాల్లో టీడీపీ అభ్యర్థులు ఏకగ్రీవంగా ఎన్నికయ్యారు. ప్రొద్దుటూరు రూరల్ నుంచి బచ్చల వీరప్రతాప్, రాజుపాలెం నుంచి ఉప్పలపాటి గురువయ్యకు పోటీ లేకపోవడంతో విజయం వరించింది. బద్వేలు నియోజకవర్గం.! బద్వేలు నియోజకవర్గ పరిధిలోని మూడు మండలాల్లోనూ టీడీపీ అభ్యర్థులు ఏకగ్రీవంగా ఎన్నికయ్యారు. బద్వేలు నుంచి సింధు జక్కల, పోరుమామిళ్ల నుంచి చాంద్‌భాయ్‌గారి హబీబున్నీసా, అట్లూరు నుంచి పోతాపి నరసింహులు జడ్పీటీసీ సభ్యులుగా ఎన్నికయ్యారు. రాజంపేట నియోజకవర్గం..! రాజంపేట నియోజకవర్గ పరిధిలోని వీరబల్లి, సిద్ధవటం మండలాల్లో టీడీపీ అభ్యర్థులు ఏకగ్రీవంగా విజయం సాధించారు. వీరబల్లి నుంచి చమర్తి శోభ, సిద్ధవటం నుంచి చింతలబోయిన చలమయ్య యాదవ్ ఎన్నికయ్యారు. మూడు దశాబ్దాల తర్వాత టీడీపీకి జడ్పీ పీఠం దక్కేనా.? కడప జిల్లా పరిషత్‌లో మూడు దశాబ్దాల తర్వాత తెలుగుదేశం పార్టీకి చైర్మన్ పీఠం దక్కే అవకాశాలు కనిపిస్తున్నాయి. జిల్లాలోని 39 జడ్పీటీసీ స్థానాల్లో టీడీపీ 19 స్థానాలను ఏకగ్రీవంగా కైవసం చేసుకోగా, కూటమి భాగస్వాములైన బీజేపీ మూడు, జనసేన ఒక స్థానాన్ని దక్కించుకున్నాయి. మొత్తంగా 23 స్థానాలు కూటమి ఖాతాలో చేరడంతో జడ్పీ చైర్మన్ ఎన్నికపై ఆసక్తి నెలకొంది. కూటమి నుంచి టీడీపీకి చైర్మన్ పదవి కేటాయిస్తే ఆ పార్టీకి సుదీర్ఘ విరామం తర్వాత ఈ అవకాశం దక్కినట్లవుతుంది. అయితే, చైర్మన్ ఎంపికపై కూటమి నాయకత్వం తీసుకునే నిర్ణయం కీలకం కానుంది. జడ్పీ చైర్మన్ రేసులో ఎవరున్నారు.? జిల్లా పరిషత్ చైర్మన్ పదవి కూటమికి దక్కే అవకాశాలు ఉండటంతో టీడీపీలో ఆశావహులపై చర్చ మొదలైంది. కూటమి నుంచి గెలుపొందిన మాజీ ఎమ్మెల్సీ పుత్తా నరసింహారెడ్డి పేరు ప్రధానంగా వినిపిస్తోంది. జమ్మలమడుగు నుంచి ఏకగ్రీవంగా ఎన్నికైన చాదిపిరాళ్ల రాజేష్ రెడ్డి కూడా చైర్మన్ పదవిని ఆశిస్తున్నట్లు ప్రచారం జరుగుతోంది. అయితే, దీనిపై అధికారిక ప్రకటన వెలువడాల్సి ఉంది. కడప జడ్పీ పీఠంపై గతంలో ఎవరు.? తెలుగుదేశం పార్టీ ఆవిర్భావం తర్వాత కడప జిల్లా పరిషత్‌లో ఆ పార్టీకి ప్రాతినిధ్యం లభించింది. 1987 ప్రాంతంలో సీఎం బలరామిరెడ్డి టీడీపీ తరఫున జడ్పీ చైర్మన్‌గా ఎన్నికైనట్లు చారిత్రక వివరాలు పేర్కొంటున్నాయి. 1995లో జడ్పీటీసీ సభ్యుల ద్వారా జరిగిన ఎన్నికలో నర్రెడ్డి తులసిరెడ్డి చైర్మన్‌గా ఎంపికయ్యారు. ఆ తర్వాత కాంగ్రెస్ పార్టీ నుంచి కె. సురేష్‌బాబు, దేవిరెడ్డి జ్యోతిరెడ్డి జడ్పీ చైర్మన్లుగా బాధ్యతలు చేపట్టారు. వైసీపీ ఆవిర్భావం తర్వాత గూడూరు రవి, ఆకేపాటి అమర్‌నాథ్‌రెడ్డి ఆ పార్టీ తరఫున ఈ పదవిని చేపట్టారు. అనంతరం రామ్ గోవింద్ రెడ్డి జడ్పీ చైర్మన్‌గా కొనసాగారు. ప్రస్తుత స్థానిక సంస్థల ఎన్నికల్లో కూటమి ఆధిపత్యం చాటుకోవడంతో జిల్లా పరిషత్ చైర్మన్ పీఠంపై రాజకీయ వర్గాల్లో చర్చ మొదలైంది. టీడీపీకి ఈ పదవి దక్కితే దాదాపు మూడు దశాబ్దాల తర్వాత కడప జడ్పీలో ఆ పార్టీ మరోసారి చైర్మన్ స్థానాన్ని దక్కించుకున్నట్లవుతుంది. కూటమి శ్రేణుల్లో సంబరాలు.! జిల్లావ్యాప్తంగా 23 జడ్పీటీసీ స్థానాలు ఏకగ్రీవం కావడంతో కూటమి నాయకులు, కార్యకర్తల్లో ఉత్సాహం నెలకొంది. పలు మండల కేంద్రాల్లో కార్యకర్తలు బాణాసంచా కాల్చి సంబరాలు చేసుకున్నారు. మిగిలిన స్థానాల ఎన్నికల ఫలితాలు, జడ్పీ చైర్మన్ పదవి ఎవరికి దక్కుతుందన్న అంశాలు ఇప్పుడు జిల్లాలో రాజకీయంగా ఆసక్తిని రేకెత్తిస్తున్నాయి. [ Kadapa ZP Elections, Kadapa Zilla Parishad, TDP, Telugu Desam Party, BJP, Jana Sena Party, Chandrababu Naidu, Coalition Victory, ZPTC Elections, Unopposed ZPTC Seats, Kadapa Local Body Elections, 23 ZPTC Seats, TDP Victory, Kadapa ZP Chairperson, Andhra Pradesh Politics ]

Published on: Tue Oct 27, 2026 8:51PM