శ్రీలంకతో జరిగిన కొలంబో రెండవ టెస్ట్ మ్యాచ్‌లో గెలవాల్సిన పోరు డ్రాగా ముగియడంపై క్రికెట్ వర్గాల్లో తీవ్ర చర్చ నడుస్తోంది. మొదటి టెస్టులో 165 పరుగుల తేడాతో ఘనవిజయం సాధించిన భారత్, కొలంబోలో మాత్రం చివరి రోజు ప్రత్యర్థిని ఆలౌట్ చేయలేక విఫలమైంది. రెండు టెస్టుల సిరీస్‌ను 1-0తో గెలుచుకున్నప్పటికీ, వరల్డ్ టెస్ట్ ఛాంపియన్‌షిప్ ఫైనల్ రేసులో అత్యంత కీలకమైన పాయింట్లను చేజార్చుకోవడం అభిమానులను, మాజీ ఆటగాళ్లను తీవ్ర నిరాశకు గురిచేసింది. భారత జట్టు అనుసరించిన వ్యూహాలపై, ముఖ్యంగా నాయకత్వ శైలి మరియు బౌలింగ్ ప్లానింగ్‌పై మాజీ డాషింగ్ బ్యాటర్ మహమ్మద్ కైఫ్ సంచలన రీతిలో మండిపడ్డారు.

ఈ మ్యాచ్‌లో శ్రీలంక యువ ఆల్‌రౌండర్ సొనాల్ దినుష అద్భుతమైన పోరాట పటిమను కనబరిచాడు. ఫాలోఆన్ ఆడుతూ ఒత్తిడిలో ఉన్న సమయాలో ఏకంగా 264 బంతులు ఎదుర్కొని 133 పరుగులతో అజేయంగా నిలిచాడు. తన జట్టును ఓటమి అంచు నుండి కాపాడి మ్యాచ్‌ను డ్రాగా ముగించడంలో కీలక పాత్ర పోషించాడు. గాలే టెస్టులోనూ శతకం బాదిన దినుష, కొలంబో టెస్టులోనూ అదే రకమైన ఇన్నింగ్స్ ఆడుతుంటే భారత బౌలర్లు అతడిని కట్టడి చేయలేకపోవడం అందరినీ విస్తుపోయేలా చేసింది. దినుష బ్యాటింగ్ శైలిలో ఉన్న స్పష్టమైన బలహీనతలను పసిగట్టడంలో టీమ్ ఇండియా డ్రెస్సింగ్ రూమ్ ఘోరంగా వైఫల్యం చెందిందని కైఫ్ తీవ్ర స్థాయిలో విమర్శించారు.

భారత జట్టులో ఒకరిద్దరు కాదు, ఏకంగా 7 నుండి 8 మంది కోచ్‌లు, ప్రత్యేక వీడియో అనలిస్ట్‌లు, స్టాట్స్ విశ్లేషకులు ఉన్నారని గుర్తుచేసిన కైఫ్, అసలు వీరంతా ఉండి ఏం లాభమని ప్రశ్నించారు. "ప్రతి బ్యాటర్‌కు ఏదో ఒక వీక్‌నెస్ ఉంటుంది. దాన్ని బౌలర్లు, కోచ్‌లు ముందుగానే పసిగట్టాలి. కొలంబోలో దినుషకు సులువుగా సింగిల్స్ ఇస్తూ ఫీల్డింగ్ ఓపెన్ చేసి ఉంచారు. అతడికి డ్రైవ్ ఆడే బంతులు వేసి ఊరించాల్సింది, ఎందుకంటే అతడికి డ్రైవ్‌లు ఆడటం ఏమాత్రం ఇష్టం ఉండదు. మొహమ్మద్ సిరాజ్ ఫుల్ లెంగ్త్ బాల్ వేసినప్పుడు అతడు దాన్ని వదిలేశాడు, అలాగే తొలి ఇన్నింగ్స్‌లో సారాంశ్ జైన్ కూడా ఫుల్ డెలివరీతోనే అతడిని అవుట్ చేశాడు. ఇన్ని ఆధారాలు ఉన్నా కనీస వ్యూహాలు అమలు చేయకపోవడం విచారకరం. ఇది ఏమాత్రం క్లబ్ మ్యాచ్ కాదు, ఆలస్యంగా మేల్కోవడానికి" అని కైఫ్ ఆవేదన వ్యక్తం చేశారు.

 

 

 

kaif slams team india tactics colombo test,colombo test draw kaif criticizes gill coaches.