దేశ రాజధాని రాజకీయాల్లో కలకలం రేపే సంచలన ఘటన వెలుగు చూసింది. ఆమ్ ఆద్మీ పార్టీ కన్వీనర్, ఢిల్లీ మాజీ ముఖ్యమంత్రి అరవింద్ కేజ్రీవాల్‌తో పాటు ఆయన కుమార్తెకు తీవ్రస్థాయిలో ప్రాణహెచ్చరికలు అందాయి. లారెన్స్ బిష్ణోయ్ పేరుతో గుర్తుతెలియని వ్యక్తులు ఈ బెదిరింపులకు పాల్పడినట్లు సమాచారం.

తిలక్ నగర్ నియోజకవర్గానికి చెందిన ఆప్ ఎమ్మెల్యే జర్నైల్ సింగ్‌కు వచ్చిన ఫోన్ కాల్, వాట్సాప్ సందేశాల ద్వారా ఈ హెదిరింపుల విషయం బయటపడింది. కేజ్రీవాల్ కుటుంబానికి సంబంధించిన భద్రతను తీవ్రంగా కలవరపెట్టే ఈ వ్యవహారం రాజకీయ వర్గాల్లో తీవ్ర చర్చనీయాంశంగా మారింది.

నిందితులు ఎలాంటి షరతులు పెట్టారంటే.. కేవలం ఫోన్ కాల్‌కే పరిమితం కాకుండా వాట్సాప్ ద్వారా కూడా బెదిరింపు సందేశాలు పంపినట్లు తెలుస్తోంది. అరవింద్ కేజ్రీవాల్, ఆయన కుమార్తె సురక్షితంగా ఉండాలంటే వెంటనే రూ. 7 కోట్లు చెల్లించాలని, లేనిపక్షంలో తీవ్ర పరిణామాలు ఎదుర్కోవాల్సి వస్తుందని దుండగులు హెచ్చరించారు.

ఈ భారీ మొత్తాన్ని డిమాండ్ చేసిన వ్యక్తి తనను తాను అసాంఘిక ముఠా సభ్యుడిగా పరిచయం చేసుకున్నట్లు సమాచారం. ఈ బెదిరింపులన్నింటినీ జర్నైల్ సింగ్ ఒక మాధ్యమంగా ఉపయోగించి కేజ్రీవాల్‌కు చేరవేసే ప్రయత్నం చేసినట్లు ఫిర్యాదులో పేర్కొన్నారు.

సమాచారం అందుకున్న వెంటనే అప్రమత్తమైన ఆప్ నేతలు, ఎమ్మెల్యే జర్నైల్ సింగ్ ద్వారా పోలీసులకు అధికారికంగా ఫిర్యాదు అందజేశారు. పంజాబ్‌లోని మొహాలి సీనియర్ సూపరింటెండెంట్ ఆఫ్ పోలీస్ కార్యాలయంలో ఈ మేరకు ఫిర్యాదు దాఖలైంది.

ఇది కూడా చదవండి: శ్రీకాళహస్తి అన్నప్రసాదపోటులో అగ్నిప్రమాదం: భారీగా ఎగసిపడిన మంటలు: తప్పిన పెను ప్రమాదం.!

పోలీసులు ఈ ఘటనను అత్యంత సీరియస్‌గా తీసుకుని భారతీయ న్యాయ సంహిత (BNS), అలాగే ఐటీ చట్టంలోని వివిధ సెక్షన్ల కింద కేసు నమోదు చేశారు. ప్రస్తుతం సైబర్ క్రైమ్ విభాగం అధికారులు రంగంలోకి దిగి సాంకేతిక ఆధారాలను సేకరిస్తున్నారు.

బెదిరింపు కాల్స్ వచ్చిన మొబైల్ నంబర్, వాట్సాప్ చాట్ వివరాలు, ఐపీ లాగ్స్, లొకేషన్ డేటాను విశ్లేషిస్తున్నారు. అసలు ఈ కాల్స్ వెనుక అంతర్జాతీయ ముఠాల హస్తం ఉందా లేక ఎవరైనా ఆకతాయిలు కావాలనే ఈ విధంగా భయభ్రాంతులకు గురి చేస్తున్నారా అనే కోణంలో పోలీసులు కూపీ లాగుతున్నారు.

గతంలోనూ జైళ్లలో ఉన్న గ్యాంగ్‌స్టర్ల నెట్‌వర్క్‌లు, వాటి ద్వారా సాగుతున్న వసూళ్ల దందాలపై కేజ్రీవాల్ బహిరంగంగానే పలుమార్లు విమర్శలు గుప్పించారు. తాజా బెదిరింపుల నేపథ్యంలో ఆయనకు, కుటుంబ సభ్యులకు మరింత కట్టుదిట్టమైన భద్రత కల్పించాలని పార్టీ వర్గాలు ప్రభుత్వాన్ని డిమాండ్ చేస్తున్నాయి.

ఈ కేసులో పోలీసులు త్వరలోనే నిందితులను అదుపులోకి తీసుకునే అవకాశం ఉందని భావిస్తున్నారు. డిజిటల్ ఆధారాల ద్వారా కూపీ లాగుతున్న దర్యాప్తు బృందాలు త్వరలోనే నిజానిజాలు బయటపెడతాయని ప్రజలు, రాజకీయ వర్గాలు ఆసక్తిగా ఎదురుచూస్తున్నాయి.

మీకు నచ్చవచ్చు: కేవలం రూ.100 పెట్టుబడి..కోటి రూపాయల వ్యాపారం సామ్రాజ్యంగా ఎదిగిన రైతు సక్సెస్ స్టోరీ.!

 

 

[ Arvind Kejriwal death threat, Delhi former CM Kejriwal extortion, Lawrence Bishnoi gang threat, AAP Jarnail Singh complaint, Mohali police ]