30 ఏళ్ల తర్వాత మహిళలు ఎలాంటి ఆహారం తీసుకోవాలి! 30ఏళ్లు దాటిన మహిళలు తమ ఆరోగ్యం పట్ల శ్రద్ధ వహించాలి. ఏయే ఆరోగ్య పరీక్షలు చేయించుకోవాలి...ఎలాంటి ఆహారం తీసుకోవాలనే విషయం గురించి పూర్తి సమాచారం తెలుసుకుందాం. ఒత్తిడి, కుటుంబ బాధ్యతలు, ఉద్యోగం ఇలా ఎన్నో కారణాల వల్ల మహిళలు తమ ఆరోగ్యం పట్ల అశ్రద్ధ వహిస్తుంటారు. ముఖ్యంగా 30ఏళ్లు పైబడిన తర్వాత మహిళల తమ ఆరోగ్యాన్ని పూర్తిగా నిర్లక్ష్యం చేస్తుంటారు. ఉదయానే లేవడం, వంట పనులు చేయడం, ఆఫీసులకు వెళ్లడం, సాయంత్రం కుటుంబాన్ని చూసుకోవడం..ఈ పనులకే సమయం గడిచిపోతుంది. ఆమెకు తన ఆరోగ్యానికి సమయం కేటాయించడం మర్చిపోతుంది. కానీ 30ఏళ్లు నిండిన తర్వాత ప్రతిస్త్రీ ఆరోగ్యంపై శ్రద్ధ వహించాలి. లేదంటే లేనిపోని అనారోగ్య సమస్యలు చుట్టుముడుతాయి. శరీర బరువు, కండరాల బలాన్ని పెంచడానికి ఎలాంటి ఆహారం తీసుకోవాలి.ఇప్పుడు చూద్దాం. ఎలాంటి ఆహారం తినాలి? 30 నుంచి 35 సంవత్సరాల మధ్య, మీ హార్మోన్ స్థాయిలు పడిపోతాయి. ఇది శరీరంలో చక్కెరను ఉపయోగించుకునే హార్మోన్ల పెరుగుదలకు కారణమవుతుంది. అసమతుల్యమైన ఆహారాలు తినడం వల్ల బరువు పెరుగుతారు.కాబట్టి మీ ఆహారంలో ఫైబర్ అధికంగా ఉండే బెర్రీలు, ధాన్యాలు, గింజలు ఉండేలా చూసుకోండి. అలాగే అల్పాహారం మానేయకండి. సమయానికి భోజనం చేయండి. వ్యాయామం చేయండి: రోజూ వ్యాయామం చేయడం వల్ల శరీరాన్ని, మనసును ప్రశాంతంగా ఉంచుకోవచ్చు. ఇది బరువును నియంత్రించడమే కాకుండా, అనేక ఆరోగ్య సమస్యల నుండి ఉపశమనం పొందుతుంది. ప్రతిరోజూ చురుకైన, సాధారణ వ్యాయామాలు చేయండి. 30 ఏళ్ల తర్వాత, కండర ద్రవ్యరాశి దశాబ్దానికి 3-8% తగ్గుతుంది. మొత్తంగా వ్యాయామం మానసిక ఆరోగ్యానికి కూడా చాలా మంచిది. కాల్షియం ఆహారాన్ని తినండి: చిన్న వయసులోనే ఎముకల సాంద్రత ఏర్పడుతుంది. అలాగే, 25, 30 సంవత్సరాల మధ్య కొత్త ఎముక నిర్మాణం పూర్తవుతుంది. ఎముకల సాంద్రతను నిర్వహించడానికి, మీరు కాల్షియంతో కూడిన ఆహారాన్ని తినాలి. పాలు, పెరుగు, చీజ్, బ్రోకలీ, బచ్చలికూర, కాలే, బాదం వంటి కాల్షియం అధికంగా ఉండే ఆహారాన్ని తీసుకోవడం చాలా ముఖ్యం. సరిగ్గా నిద్రపోండి: నిద్ర మానసిక ఆరోగ్యం, శరీర బరువును ప్రభావితం చేస్తుందని గుర్తుంచుకోండి. మీరు ప్రతిరోజూ తగినంత నిద్రపోయేలా చూసుకోండి.అలాగే, మీ ఆహారంలో ఫోలేట్ తీసుకోవడం పెంచండి. ఈ ఫోలేట్ ఆహారాల యొక్క ఇతర వనరులు బచ్చలికూర.సిట్రస్ పండ్లు వంటి ఆకుపచ్చ ఆకు కూరలు. అలాగే, 30 తర్వాత మధుమేహం , రక్తపోటు, కొలెస్ట్రాల్, థైరాయిడ్ చెక్ చేసుకోండి.
మహిళలూ ఈ లక్షణాలను విస్మరించకూడదు.. బ్రెస్ట్ క్యాన్సర్ కావచ్చు! బ్రెస్ట్ క్యాన్సర్ ( రొమ్ము క్యాన్సర్) నేటికాలంలో మహిళలకు ప్రాణాంతకంగా మారిన ఆరోగ్య సమస్యల్లో ఇదీ ఒక్కటి. ప్రపంచవ్యాప్తంగా ప్రతియేటా ఈ మహమ్మారి వల్ల దాదాపు పదిమిలియన్ల మంది ప్రాణాలు కోల్పోతున్నారు. అందులో 2.26మిలియన్ల మంది బ్రెస్ట్ క్యాన్సర్ వల్ల చనిపోతున్నారని WHO వెల్లడించింది. మనదేశంలో ఏటా దీని బారినపడి మరణిస్తున్నవారి సంఖ్య లక్షల్లో ఉందంటే ఈ మహమ్మారి ఏ స్థాయిలో విరుచుకుపడుతుందో అర్థం చేసుకోవచ్చు. 40ఏళ్లుదాటిన మహిళలకు రొమ్ము క్యాన్సర్ వచ్చే ప్రమాదం ఎక్కువగా ఉంది. కానీ నేటికాలంలో మూడుపదుల వయస్సు దాటనివారిపై కూడా ఈ మహమ్మారి పంజావిరుస్తోంది. సరైన అవగాహన ఉన్నట్లయితే... ఈ వ్యాధిని ప్రారంభ దశలోనే గుర్తించవచ్చు. స్త్రీలు తమ ఆరోగ్యాన్ని జాగ్రత్తగా చూసుకోవల్సిన సమయంలో ఎన్నో బాధ్యతలు వారిని నిర్లక్ష్యం చేస్తాయి. కుటుంబ బాద్యత ఆమెదే. కానీ ఆమె ఆరోగ్యం విషయంలో మాత్రం వెనక్కు తగ్గుతుంది. ఈ నిర్లక్ష్యమే వారిలో ఎన్నో జబ్బులకు కారణం అవుతుంది. ముఖ్యంగా మహిళలు ఎదుర్కొంటున్న జబ్బుల్లో బ్రెస్ట్ క్యాన్సర్. నేటికాలంలోనూ చాలామంది మహిళల్లో ఈ మహమ్మారి గురించి అవగాన లేదు. చాలామందిలో మూడోదశకు వచ్చినప్పుడు మాత్రమే గుర్తిస్తున్నారు. గ్రామీణ, అరబ్ ప్రాంతాల నుండి మెట్రో పాలిటిక్స్ సిటీ వరకు, మహిళలు ఇప్పటికీ బ్రెస్ట్ స్క్రీనింగ్ లేదా ఇతర రకాల రొమ్ము పరీక్ష ప్రక్రియలకు భయపడుతున్నారు. మహిళలు తమ ఆరోగ్య పరీక్షలకు నిరాకరిస్తున్నారు. రొమ్ము క్యాన్సర్ అంటే ఏమిటి? స్త్రీలలో వచ్చే వ్యాధులలో ఒకటి రొమ్ము క్యాన్సర్. ఇది రొమ్ములో అభివృద్ధి చెందుతుంది. ఈ క్యాన్సర్ పురుషుల్లో కూడా వచ్చే అవకాశం ఉంటుంది. కానీ మహిళలకు మాత్రమే అవకాశం ఎక్కువ. రొమ్ము క్యాన్సర్ అనేది చిన్న గడ్డలతో ఏర్పడుతుంది. రొమ్ము లోపల లేదా బయట ఏర్పడతాయి. ఇది ప్రారంభ దశలో చిన్నపాటి నొప్పితో ఉంటుంది. ఆ సమయంలోనే గుర్తించినట్లయితే...ప్రాణాపాయం నుంచి తప్పించుకోవచ్చు. మహిళల్లో రొమ్ము క్యాన్సర్ లక్షణాలు ఎలా ఉంటాయో చూద్దాం. రొమ్ము క్యాన్సర్ లక్షణాలు: -రొమ్ములోని ఏ భాగంలోనైనా భరించలేని నొప్పి -రొమ్ము ఆకృతిలో మార్పు -చనుమొన నుండి పాలు కాకుండా ద్రవం కారడం. -రొమ్ము వాపు, నొప్పి, బిగుతుగా అనిపించడం -చనుమొన ఎరుపు రొమ్ము క్యాన్సర్ ప్రమాద కారకాలు: -పీరియడ్స్ ముందుగానే రావడం. -శారీరకంగా చురుకుగా లేకపోవడం. -కుటుంబ చరిత్ర -గర్భనిరోధక మాత్రలు -వ్యాయామం చేయకపోవడం. -అనారోగ్యకరమైన ఆహారం రొమ్ము క్యాన్సర్ చికిత్స: రొమ్ము క్యాన్సర్‌ను గుర్తించడానికి మామోగ్రామ్, అల్ట్రాసౌండ్, బయాప్సీని ఉపయోగిస్తారు. సరైన సమయంలో రొమ్ము క్యాన్సర్ ను గుర్తిస్తే చికిత్స, నివారణ రెండూ సాధ్యమే. డైటరీ థెరపీ, బ్రెస్ట్ సర్జరీ, మందులు, హార్మోన్ల ఇంజెక్షన్లు మొదలైన వాటిని నివారించాలి. అయితే, దాని చికిత్స అనేక అంశాలపై ఆధారపడి ఉంటుంది. వీటిలో క్యాన్సర్ దశ, రోగి వయస్సు, స్థానం, మానసిక ఆరోగ్యం, రోగి యొక్క వ్యక్తిగత ప్రాధాన్యతపై ఆధారపడి ఉంటుంది.
ప్రసవం తరువాత మహిళల్లో డిప్రెషనా... ఇదిగో మెడిసిన్ వచ్చేస్తోంది! తల్లి కావడం మహిళలకు దక్కిన ఓ గొప్ప వరం. అయితే మహిళలు ప్రసవానంతరం డిప్రెషన్ కు లోనవుతారు. ఈ కారణంగా మహిళల మానసిక ఆరోగ్యం దెబ్బ తినడమే కాకుండా తల్లీబిడ్డల బంధానికి సమస్య ఎదురయ్యే అవకాశం కూడా ఉంటుంది. ఇలా ప్రసవం తరువాత మహిళల్లో ఎదురయ్యే డిప్రెషన్ ను ఇన్నాళ్లు తల్లిదండ్రులు, భర్త, అత్తమామల సహకారంతో అధిగమించేవారు. అయితే ఇప్పుడు ఈ సమస్యకు పరిష్కారంగా శాస్త్రవేత్తలు మెడిసిన్ కనిపెట్టారు. ప్రసవానంతరం మహిళలు ఈ మెడిసిన్ తీసుకోవడం వల్ల డిప్రెషన్ అధిగమించవచ్చు. Zurzuve.. ప్రసవానంతరం మహిళల్లో డిప్రెషన్ అరికట్టడానికి తయారుచేస్తున్న మెడిసిన్ పేరు Zurzuve. US డ్రగ్ ఎన్‌ఫోర్స్‌మెంట్ అడ్మినిస్ట్రేషన్ నుండి ఆమోదం పొందిన తర్వాత 2023 సంవత్సరం చివరి మూడు నెలల్లో Zurzuve డ్రగ్‌ను ప్రారంభించవచ్చని తెలుస్తోంది. మేజర్ డిప్రెసివ్ డిజార్డర్ (MDD) ఉన్న పెద్దలకు చికిత్స చేయడానికి Zurzuway మెడిసిన్ అప్లికేషన్ కోసం FDA జారీ చేసిన ఒక ప్రకటనలో, ఔషధం ఎంత ప్రభావవంతంగా ఉందో చూపించడానికి ప్రస్తుతం తగిన ఆధారాలు లేవు. ప్రస్తుతం దీనికి మరింత అధ్యయనం అవసరం అవుతుందని తెలిపారు. తీవ్రమైన మానసిక ఆరోగ్య సమస్యలతో బాధపడుతున్న మహిళలు, ముఖ్యంగా ప్రసవానంతర వ్యాకులతను నోటి ద్వారా తీసుకోగలిగే ఈ మెడిసిన్ ద్వారా ప్రయోజనం పొందవచ్చని ఈ మెడిసిన్ తయారుచేస్తున్న వైద్యులు తెలిపారు. ప్రసవానంతర డిప్రెషన్ చికిత్సకు ఇప్పటి వరకు ఇంట్రావీనస్ ఇంజెక్షన్ మాత్రమే వాడుతున్నామని, మెడిసిన్ ద్వారా ఈ దిశగా ప్రత్యేక ప్రయోజనాలు ఉంటాయని, అయితే ఇందులో జుర్జువే ఎంత ప్రభావవంతంగా ఉందో అర్థం చేసుకోవాల్సిన అవసరం ఉందని ఎఫ్‌డిఎ నిపుణులు తెలిపారు. ప్రసవానంతర డిప్రెషన్ కోసం ప్రత్యేకంగా ఈ మాత్రను రూపొందించారు. ఇతర యాంటిడిప్రెసెంట్ డ్రగ్స్ దీని కంటే వేగంగా పనిచేస్తాయి. ఇది కేవలం రెండు వారాల తక్కువ వ్యవధిలో తీసుకునేలా రూపొందించబడింది. కాబట్టి ఇది ప్రమాదకరమైనది కాదని నిపుణులు చెబుతున్నారు. ప్రసానంతర ఔషధం తీసుకోవడం వల్ల డిప్రెషన్ లక్షణాలను తగ్గించడంలో సహాయపడుతుంది. ఈ మెడిసిన్ వల్ల ఏవైనా దుష్ప్రభావాలు కలుగుతాయా అనే దిశగా పరిశోధనలు జరుగుతున్నాయి. ఇవన్నీ పూర్తయి, మెడిసిన్ సక్సెస్ అయితే ఎంతో మంది మహిళలకు డిప్రెషన్ సమస్య తొలగిపోతుంది. ఆరోగ్య నిపుణులు ఏం చెబుతున్నారంటే.. ప్రతి ఎనిమిది మంది మహిళల్లో ఒకరు ప్రసవానంతర డిప్రెషన్‌ను అనుభవిస్తున్నారని ఆరోగ్య నిపుణులు చెబుతున్నారు. విచారించాల్సిన విషయం ఏమిటంటే, దాదాపు 75 శాతం మంది మహిళలు సమస్యను గుర్తించలేరు లేదా చికిత్స పొందలేరు. ఈ సంఖ్య కూడా ప్రపంచవ్యాప్తంగా వేగంగా పెరుగుతున్నట్లు తెలుస్తోంది. ప్రపంచవ్యాప్తంగా మాతాశిశు మరణాల సమస్యకు ప్రసవానంతర డిప్రెషన్ కూడా ఒక కారణం అనే విషయం కలవరపాటుకు గురిచేస్తోంది. ప్రసవానంతర డిప్రెషన్ కు మెడిసిన్ సక్సెస్ అయితే ఈ సమస్యలకు అన్నిటికీ పరిష్కారం లభించినట్లే. *నిశ్శబ్ద.
ఇలా చేయడం వల్ల థైరాయిడ్ సమస్యకు చెక్ పెట్టవచ్చు ఈ రోజుల్లో థైరాయిడ్ సమస్య ఎక్కువ అయ్యింది. . థైరాయిడ్ గ్రంధిలో అసమతుల్యత కారణంగా, హార్మోన్లు అవసరమైన దానికంటే ఎక్కువ లేదా తక్కువ ఉత్పత్తి చేస్తుంది. కొన్ని సూపర్‌ఫుడ్స్‌ థైరాయిడ్ గ్రంథి పనితీరును మెరగుపరచడంలో సహాయపడతాయి. శరీరంలో హార్మోన్లను ఉత్పత్తి చేసే ఈ గ్రంథి పనితీరు దెబ్బతింటే హార్మోన్ల అసమతుల్యత ఏర్పడుతుంది. తద్వారా బరువు పెరగడం లేదా తగ్గడం, జుట్టు రాలడం, అలసట, నెలసరి సక్రమంగా రాకపోవడం, గర్భం దాల్చకపోవడం లాంటి సమస్యలు వస్తాయి. థైరాయిడ్ గ్రంధిలో అసమతుల్యత కారణంగా, హార్మోన్లు అవసరమైన దానికంటే ఎక్కువ లేదా తక్కువ ఉత్పత్తి చేస్తుంది. కొన్నిసార్లు ఈ సమస్య వంశపారంపర్యంగా రావచ్చు. బరువు పెరిగిపోతారు. థైరాయిడ్ ఈ సమస్యకు చెక్ పెట్టి థైరాయిడ్ గ్రంథి పనితీరును మెరుగుపరచుకోవాలంటే అందుకు మనం తీసుకునే ఆహారం, చేసే వ్యాయామాలు ఎంతగానో సహాయపడతాయి. * ఉసిరి: ఉసిరికాయలో నారింజ కంటే 8 రెట్లు ఎక్కువ విటమిన్ సి, దానిమ్మపండు కంటే 17 రెట్లు ఎక్కువ విటమిన్ సి ఉంటుంది. మీ థైరాయిడ్ గ్రంధి అతిగా క్రియాశీలంగా పనిచేస్తుంటే.. ఉసిరి థైరాయిడ్ హార్మోన్ల ఉత్పత్తిని నియంత్రించడంలో సహాయపడుతుంది. మనం నేరుగా ఉసిరిని ఎక్కువగా తినలేం కాబట్టి, దీనిని ఉడకబెట్టి, పచ్చడి చేసుకుని తినవచ్చు. తేనెతో కూడా తినవచ్చు. ఖాళీ కడుపుతో ఉసిరిని తినడం వల్ల ఆరోగ్యానికి ఎంతో మంచిది. * గుమ్మడి గింజలు: గుమ్మడి గింజల్లో మెగ్నీషియం, జింక్ పుష్కలంగా లభిస్తాయి. ముఖ్యంగా జింక్.. శరీరం ఇతర విటమిన్లు, మినరల్స్ గ్రహించడంలో సహాయపడుతుంది. జింక్ శరీరంలో థైరాయిడ్ హార్మోను ఉత్పత్తి , నియంత్రణకు సహాయపడుతుంది. * ఇవే కాకుండా ప్రతిరోజు ఉదయాన్నే యోగా చేయడం వల్ల కూడా థైరాయిడ్ కంట్రోల్ చేయవచ్చు .. అలాగే మనం తీసుకునే ఆహారం కూడ లైట్ ఫుడ్ తీసుకోవాలి. ఫాస్ట్ ఫుడ్స్, మసాలా ఫుడ్స్ మానేసి పండ్లు తినడం అలవాటు చేసుకోవాలి. ఇలా చేస్తే థైరాయిడ్‌ని కంట్రోల్ చేయడమే కాకుండా ఆరోగ్యంగా కూడా ఉంటారు.
కొల్లాజెన్ అంటే ఏంటి.. మహిళల్లోనే ఇది ఎందుకు లోపిస్తుంది... దీన్ని ఎలా భర్తీ చేయాలి? శరీరం సరైన రీతిలో పనిచేయడానికి అనేక రకాల ప్రొటీన్లు, విటమిన్లు అవసరం. కొల్లాజెన్ అటువంటి ప్రోటీన్లలో ఒకటి. ఇది శరీరంలో ప్రత్యేక పాత్రను కలిగి ఉంటుంది. శరీరం దానిని సహజంగా తయారు చేస్తుంది. అయితే శరీరంలో కొల్లాజెన్ పాత్ర ఏంటి? అనే విషయం గురించి తెలుసుకుంటే.. మొత్తం శరీరానికి మెరుగైన నిర్మాణాన్ని, బలాన్ని అందించడం కొల్లాజెన్ పాత్ర. ముఖ్యంగా చర్మం, జుట్టు ఆరోగ్యంగా ఉంచడానికి ఇది చాలా ముఖ్యమైనదిగా పరిగణించబడుతుంది. మహిళల్లో కాలక్రమేణా ఈ కొల్లాజెన్ స్థాయి తగ్గుతోందని ఆరోగ్య నిపుణులు అంటున్నారు. సాధారణంగా వయసు పెరగడంతో పాటు కొల్లాజెన్ స్థాయి కూడా తగ్గుతుంది. ఈ కారణంగానే వృద్దాప్యం సంభవిస్తుంది. అయితే కొల్లాజెన్ తగ్గడానికి వయసు పెరగడమే కారణం కాదు.. శరీరంలో ఏర్పడే కొన్ని లోపాల కారణంగా కూడా కొల్లాజెన్ లోపం ఏర్పడుతుంది. కొల్లాజెన్ పాత్ర ఏమిటంటే.. శరీరంలోని మొత్తం ప్రోటీన్‌లో 30% కొల్లాజెన్ ఉంటుంది. ఇది చర్మం, కండరాలు, ఎముకలు, కణజాలాలను ఆరోగ్యంగా ఉంచడానికి ఇది చాలా ముఖ్యం. ఆహారం సరిగ్గా తీసుకుంటూ ఉంటే శరీరానికి కావలసిన కొల్లాజెన్ భర్తీ అవుతుంది. ఒకవేళ ఆహారం సరిగ్గా తీసుకోకపోతే కొల్లాజెన్ లోపం ఏర్పడుతుంది. మహిళలు ఆహారం విషయంలో చాలా నిర్లక్ష్యంగా ఉంటారు కనుక మహిళల్లలో ఈలోపం ఎక్కువగా ఉంటుంది. ఈ మూడు ఇతర కారణాల వల్ల కొల్లాజెన్ లోపం ఏర్పడుతుంది.. వృద్ధాప్యం రాకుండా శరీరంలో కొల్లాజెన్ స్థాయిని తగ్గించడానికి కారణమయ్యే ఇతర అంశాలు కూడా ఉన్నాయి. సూర్యరశ్మి, ధూమపానం, చక్కెర అధికంగా తీసుకోవడం ఇందులో ప్రముఖమైనవి. అతినీలలోహిత కిరణాల ప్రభావం వలన ఇది ప్రభావితం అవుతుంది. ఇది కాకుండా, సిగరెట్ పొగలో ఉండే అనేక రసాయనాలు కూడా కొల్లాజెన్ ను దెబ్బతీస్తాయి, దీని కారణంగా చర్మం వదులుగా మారిపోయి ముడతలు పడుతుంది. కొల్లాజెన్ చర్మానికి చాలా ముఖ్యమైనది. దీని లోపాన్ని భర్తీ చేయడానికి కొల్లాజెన్ సప్లిమెంట్లను తీసుకోవడం వల్ల చర్మ స్థితిస్థాపకత మెరుగుపడుతుందని, ముడతలను తగ్గించడంలో ప్రయోజనాలు ఉన్నాయని పరిశోధనలు చెబుతున్నాయి. అయితే కొల్లాజెన్ లోపం ఉన్నవారిలో అకాల వృద్దాప్యం స్పష్టంగా చూడవచ్చు. కొల్లాజెన్ ఎముక బలానికి కూడా చాలా ముఖ్యమైనది. ఈ కారణంతో చేతి, తుంటి, మోకాలి ఆస్టియో ఆర్థరైటిస్ ఉన్న రోగులు క్రమం తప్పకుండా కొల్లాజెన్ ను తీసుకోవడం వల్ల మూడు నెలల్లో వాటి తాలుకూ నొప్పి తగ్గుతుంది. అయితే కొల్లాజెన్ సప్లిమెంట్లను ఎక్కువ కాలం తీసుకోవజం వల్ల ప్రమాదం ఎదురయ్యే అవకాశాలు ఉన్నాయి. అందుకే కొల్లాజెన్ ను సప్లిమెంట్ల ద్వారా కంటే ఆహారం ద్వారా భర్తీ చేయడం చాలా మంచిది. కొల్లాజెన్ జంతు ఆధారిత ఆహారాలలో పుష్కలంగా లభిస్తుంది. వీటి వినియోగం కొల్లాజెన్ భర్తీకి మంచి ప్రత్యామ్నాయంగా చెప్పుకోవచ్చు. అయితే ఈ జంతు ఆధారిత ఉత్పత్తులలో రెడ్ మీట్ ఎక్కువగా తీసుకోవడం వల్ల శరీరానికి హాని కలుగుతుంది. కాబట్టి ఈ విషయంలో కూడా జాగ్రత్త వహించాలి. వైద్యులు ఏమి చెబుతారంటే మహిళలు కొల్లాజెన్ లోపంతో ఇబ్బంది పడుతున్నారని చెప్పడానికి ముఖ చర్మం వదులుగా మారి, ముడుతలు పడుతూ వృద్దాప్యం మీద పడుతున్నట్టు కనిపిస్తుంది. ఈ లక్షణాలు గమనించిన తరువాత వారు వైద్యులను కలిసి వైద్యుల సలహా మేరకు కొల్లాజెన్ ను తీసుకోవడం సురక్షితం. *నిశ్శబ్ద.
మహిళల్లో అకాల వృద్దాప్యమా.. ఈ మూడు విషయాలు తప్పక తెలుసుకోవాలి! ఇనుము చాలా బలమైనది మరియు శక్తివంతమైనది. సుత్తితో కొట్టినా కూడా అది విరిగిపోదు, కానీ తుప్పు మాత్రం ఇనుమును కబళిస్తుంది. అదే విషయం శరీరానికి కూడా వర్తిస్తుంది. కొన్ని అలవాట్లు శరీరాన్ని దెబ్బ తీస్తాయి. దానివల్ల వయసు పైబడిన తరువాత రావలసిన వృద్ధాప్యం ముందే వస్తుంది. దీన్నే అకాల వృద్ధాప్యం అంటారు. ముఖ్యంగా ఇది మహిళల్లో ఎక్కువగా కనిపిస్తుంది. కారణం మహిళల శరీరం హార్మోన్స్ పరంగానూ, ఒత్తిడి కారణంగానూ వివిధ మార్పులకు లోను కావడం. అకాల వృద్ధాప్యం లక్షణాలు: యవ్వనంలో జుట్టు నెరిసిపోయి, బలహీనత-అలసట, శరీరంలో ఎముకల శబ్ధం, ముడతలు, మధుమేహం రక్తపోటు వంటి సమస్యలతో బాధపడుతున్నట్లయితే, అకాల వృద్ధాప్యంతో బాధపడుతున్నారని అర్థం. దీన్ని నివారించడానికి 3 విషయాలను తప్పక తెలుసుకోవాలి. మూడు అలవాట్లు తొందరగా వృద్ధాప్యం రావడానికి కారణం అవుతుంది. ఈ అలవాట్లు వృద్ధాప్యాన్ని తొందరగా తీసుకువస్తాయి. అవేంటో తెలుసుకుంటే.. మెలటోనిన్.. మెలటోనిన్ ఒక యాంటీఆక్సిడెంట్, దీనిని స్లీపింగ్ హార్మోన్ అని కూడా అంటారు. ఇది చీకటిలో లేదా రాత్రి సమయంలో మాత్రమే శరీరంలో ఉత్పత్తి అవుతుందని చాలామంది అనుకుంటారు. కానీ ఇది పగటి వెలుగులో ప్రకృతికి దగ్గరగా ఉన్నప్పుడు కూడా విడుదల అవుతుంది. నేటి కృత్రిమ జీవితాల్లో ప్రకృతికి దగ్గరగా ఉండటం తక్కువ. అందుకే రోజులో కొంతభాగం ప్రకృతికి దగ్గరగా ఉండాలి. ఈ పని చేయడం వల్ల ఇది వృద్ధాప్యాన్ని పెంచే హైడ్రోజన్ పెరాక్సైడ్‌ను తగ్గిస్తుంది . వ్యాయామం.. కొంతమంది తమకు ఇష్టం వచ్చినప్పుడు శారీరక శ్రమ చేస్తుంటారు. అదే సమయంలో, కొందరు ప్రతిరోజూ వ్యాయామం, జిమ్ లేదా నడక వంటి తేలికపాటి వ్యాయామం చేస్తారు. ఈ రెండు వర్గాల వారిని గమనిస్తే క్రమం తప్పకుండా ఒక ప్రణాళికతో వ్యాయామం చేసేవారికి వృద్ధాప్య ఛాయలు ఆమడ దూరంలో ఉంటాయి. క్రమం తప్పకుండా వ్యాయామం చేయడం వల్ల శరీరం సహజంగా యాంటీఆక్సిడెంట్లను విడుదల చేస్తుంది. కాబట్టి వ్యాయామం దగ్గర బోల్తా పడకండి. ఎక్కువగా తినడం.. ఎప్పుడూ ఏదో ఒకటి నోట్లో వేసుకుని నములుతూనే ఉంటారు చాలామంది. ఇలా ఎప్పుడూ ఏదో ఒకటి తింటూ ఉండేవారిలో యాంటీఆక్సిడెంట్ లోపం ఏర్పడుతుంది. దీన్ని సరిచేయడానికి, శరీరం విశ్రాంతి తీసుకోవాలి. జీర్ణవ్యవస్థ, ఇతర అవయవాలు కాస్త సేదతీరాలి. అందుకే రోజులో భోజనాన్ని 2 నుండి 3 సార్లు మాత్రమే తీసుకోవాలి. ఇవే మాత్రమే కాకుండా.... రోజూ తగినంత నీరు త్రాగాలి. శరీరంలో తేమ శాతం తగ్గితే చర్మం వాడిపోతుంది. జ్యుసి పండ్లు తినాలి. ఇందులో ముఖ్యంగా నారింజ, నిమ్మ వంటి సిట్రస్ పండ్లు ఉండాలి. రోజుకు రెండు పూటలా భోజనం చేయాలి. అది కూడా సమయానికి తినడం అలవాటు చేసుకోవాలి. నానబెట్టిన డ్రై ఫ్రూట్ తినాలి. ఇవి వృద్ధాప్యాన్ని నివారిస్తాయి. మహిళలు పై విషయాలు తెలుసుకుని ఫాలో అయితే వృద్ధాప్యాన్ని దూరంగా ఉంచొచ్చు. *నిశ్శబ్ద.
1. కొలెస్ట్రాల్ ముప్పును తప్పించుకోవాలంటే ముందుగా కొలెస్ట్రాల్ పరీక్షలు చేయించుకోవాలి. దీనివల్ల కొలెస్ట్రాల్ ఏ స్థాయిలో ఉందో, కొలెస్ట్రాల్ వల్ల ముప్పు ఏర్పడే అవకాశం ఉందా లేదా అనే విషయాలు తెలుసుకోవాలి. 2. ప్రతిరోజు తీసుకునే ఆహారంలో 5 నుంచి 10గ్రాముల ఫైబర్(పీచు పదార్థాలు) ఉండేలా చూసుకోవాలి. ఉదయపు అల్పాహారంలో ఓట్‌మీల్ తీసుకోవడం, కూరగాయలు ఎక్కువగా తినడం చేయాలి. 3. నూనె వాడకం బాగా తగ్గించాలి. ఆలివ్ ఆయిల్, సోయాబీన్ ఆయిల్ వంటి అన్‌శాచురేటెడ్ వెజిటబుల్ ఆయిల్స్‌ను వాడితే మరీ మంచిది. 4. తక్కువ కొవ్వు ఉన్న ఆహార పదార్థాలు తీసుకోవడం ద్వారా కొలెస్ట్రాల్ పెరిగే అవకాశాలు తగ్గిపోతాయి. పండ్లు, కూరగాయలు, తృణధాన్యాలు రోజు వారి మెనూలో ఉండేలా చూసుకుంటే కొవ్వు దరిచేరకుండా ఉంటుంది. 5. ప్రతిరోజు కనీసం అరగంట పాటు క్రమం తప్పకుండా వ్యాయామం చేయాలి. కొలెస్ట్రాల్‌ను తగ్గించుకోవడానికి వ్యాయామం బాగా ఉపకరిస్తుంది. 6. చేపల్లో ఒమెగా 3 ఫ్యాటీ యాసిడ్ ఉంటుంది. దీనిలో కొలెస్ట్రాల్‌ను తగ్గించే గుణం ఉంది. కాబట్టి వారంలో రెండు, మూడుస్లార్లు చేపను ఆహారంగా తీసుకోవాలి. ముఖ్యంగా ట్రైగ్లిజరైడ్ లెవెల్స్ అదుపులో ఉండటానికి ఒమెగా 3 ఫ్యాటీ యాసిడ్ బాగా ఉపయోగపడుతుంది. 7. రోజూ సరిపడా సమయం నిద్రపోవాలి. మంచి నిద్ర వల్ల శరీరం తిరిగి పునరుత్తేజం అవుతుంది. బ్లడ్ షుగర్ లెవెల్స్ మెయింటేన్ అవుతాయి. మానసిక ఆరోగ్యం బాగుంటుంది. కొలెస్ట్రాల్ ముప్పు తప్పుతుంది. 8. వెల్లుల్లిలో ఆర్గనో సల్ఫర్ అనే పదార్థం ఉంటుంది. ఇది రక్తంలో చెడు కొవ్వు శాతం పెరగకుండా కాపాడుతుంది. అంతేకాకుండా, కొలెస్ట్రాల్‌ను కాలేయానికి రవాణా చేస్తుంది. అందుకే రోజు రెండు మూడు రెబ్బల వెల్లుల్లి తీసుకోండి. 9. మెనూలో కూరగాయాల భోజనం ఉండేలా చూసుకోండి. వివిధ రకాల కూరగాయలు తీసుకోవడం వల్ల శరీరానికి అవసరమైన విటమిన్స్, మినరల్స్, యాంటీ ఆక్సిడెంట్లు అందుతాయి. 10. రోజూ కార్డియో ఎక్సర్‌సైజులు చేయండి. ఇది కొలెస్ట్రాల్ లెవెల్స్‌ను అదుపులో ఉంచుతుంది. గుండె జబ్బులు రాకుండా కాపాడుతుంది. ఈ జాగ్రత్తలు పాటించడం ద్వారా కొలెస్ట్రాల్‌తో వచ్చే ముప్పుకు చెక్ పెట్టవచ్చనడంలో సందేహం లేదు! 11. మాంసాహారం తక్కువగా తినాలి. మాంసాహారం ఎక్కువగా తీసుకుంటే కొలెస్ట్రాల్ లెవెల్స్ పెరిగిపోతాయి. అందుకే మాంసాహారం తీసుకోవడం తగ్గించాలి. మాంసాహారం బదులుగా చేపలు తీసుకోవచ్చు.
బరువు తగ్గాలంటే ఈ పండ్లు తినాల్సిందే! అధిక బరువు అంటే కాస్త భయపడాల్సిన కాలమిది. అధిక బరువు ఉన్నవారికి మధుమేహం, క్యాన్సర్, థైరాయిడ్ వంటి అనేక జబ్బులు సులువుగా వస్తాయి. మరీ ముఖ్యంగా మహిళల్లో ఈ సమస్య కాసింత ఎక్కువ ఉంటుంది. ఈ కారణంగా బరువు తగ్గడానికి రకరకాల డైట్ ప్లాన్‌లు ఫాలో అవుతుంటారు. జిమ్‌లో గంటల తరబడి చెమటలు పట్టిస్తారు. అయితే ఎక్కువ శ్రమ లేకుండా పొట్ట తగ్గాలంటే, ఆహారంలో పండ్లను ఎక్కువగా చేర్చుకోవాలి. చాలా పండ్లలో కేలరీలు తక్కువగా ఉంటాయి, ఫైబర్ పుష్కలంగా ఉంటుంది, ఇవి బరువు తగ్గడంలో సహాయపడతాయి. మరీ ముఖ్యంగా 8 రకాల పండ్లు బరువు తగ్గడంతో మ్యాజిక్ చేస్తాయి. అవేంటో తెలుసుకుంటే.. ద్రాక్ష.. ద్రాక్షపండులో కేలరీలు తక్కువ ఉంటాయి. కాబట్టి ఇది బరువు తగ్గించే పండుగా పరిగణించబడుతుంది . ఇది రోజువారీ కావాల్సిన విటమిన్ సి లో 51% అందిస్తుంది. ఇందులో తక్కువ చక్కెర ఉంటుంది. అందువల్ల బరువు నియంత్రణలో సహాయపడుతుంది. దీని వాడకం వల్ల శరీరంలోని కొవ్వు తగ్గుతుంది. యాపిల్స్.. యాపిల్స్ లో క్యాలరీలు తక్కువ, ఫైబర్ అధికంగా ఉంటుంది. ఒక పెద్ద ఆపిల్‌లో 5.4 గ్రాముల ఫైబర్ ఉంటుంది. యాపిల్స్ తినే వ్యక్తులు 4 సంవత్సరాల కాలంలో ప్రతిరోజూ సగటున 0.56 కిలోల బరువు కోల్పోతారని పరిశోధనలో తేలింది. బెర్రీస్.. ఇవి తక్కువ కేలరీల పండ్లు. ఒక కప్పు రాస్ప్బెర్రీస్ లో కేవలం 64 కేలరీలు కలిగి ఉంటే, ఒక కప్పు స్ట్రాబెర్రీలో 50 కంటే తక్కువ కేలరీలు ఉంటాయి. వీటిలో ఫైబర్స్ ఎక్కువగా ఉంటాయి. బెర్రీలు తినడం వల్ల కొలెస్ట్రాల్, బిపి, ఇన్‌ఫ్లమేషన్‌ను తగ్గించడంలో సహాయపడుతుంది, ఇది అధిక బరువు నియంత్రించడానికి సహాయపడుతుంది. కివి.. కివి పండ్లు ఆకుపచ్చ రంగులో ఉంటుంది. కివీస్ విటమిన్ సి, విటమిన్ కె, ఫోలేట్, ఫైబర్ పుష్కలంగా కలిగి ఉంటాయి. 12 వారాల పాటు రోజూ కివిని తింటే ఎంత ఎక్కువ ఉన్న బిపి అయినా తగ్గుతుంది. పొట్ట కొవ్వు, నడుము కొవ్వు కూడా గణనీయంగా తగ్గిస్తుంది. పుచ్చకాయ.. పుచ్చకాయలో కేలరీలు తక్కువగా ఉంటాయి, నీటి శాతం ఎక్కువగా ఉంటుంది. దీని కారణంగా ఇది బరువు నియంత్రణకు సహాయపడుతుంది. ఇది కాకుండా, నారింజ వంటి పండ్లు కూడా అదనపు కొవ్వును తగ్గించడంలో సహాయపడతాయి. అరటిపండ్లు, అవకాడోలు, పీచెస్, ప్లమ్స్, చెర్రీస్, ఆప్రికాట్ వంటి పండ్లు కూడా బరువు తగ్గడానికి గొప్ప ఎంపికలు. ◆నిశ్శబ్ద
ప్రసవం తరువాత మహిళలు ఇవి తింటే అద్భుతమైన శక్తి సొంతమవుతుంది! ప్రసవం తరువాత స్త్రీలలో శారీరక, భావోద్వేగ మార్పులు చాలా ఉంటాయి. ఇవన్నీ హార్మోన్ల మార్పుల వల్ల జరిగేవి.. ఈ కారణంగా తల్లి, బిడ్డ ఇద్దరికీ చాలా జాగ్రత్త అవసరం. డెలివరీ తరువాత కూడా తల్లిబిడ్డలకు ఇద్దరికీ సరైన జాగ్రత్త, సరైన వైద్య సేవలు అవసరమవుతాయి. ఈ హార్మోన్స్ ను, శారీరక స్థితిని తిరిగి మాములు స్థాయికి తిరిగి తీసుకుని రావడానికి అవి మాత్రమే కాకుండా ఆహారం కూడా ప్రముఖ పాత్ర పోషిస్తుంది. ప్రసవం తర్వాత శరీర మార్పులకు, స్థితికి తగ్గట్టు ఆహారాన్ని కూడా మార్పు చేసుకోవాల్సి ఉంటుంది. అదే సందర్భంలో పోషకాలు అవసరమైన ఆహారం కూడా పుష్కలంగా తీసుకోవాలి. లేకపోతే శరీరం తొందరగా అలసిపోతుంది. బిడ్డకు పాలు ఇవ్వవడంలో సమస్యలు ఏర్పడటం నుండి మహిళల్లో అలసట, రక్తహీనత, ఎముకలు బలహీనంగా మారడం వంటి ఎన్నో సమస్యలు చాప కింద నీరులా చుట్టుముడతాయి. మీరు ప్రసవానంతరం తొందరగా కోలుకోవడానికి ఈ ఆహారాలు డైట్ లో భాగం చేసుకోవలసిన అవసరం ఎంతో ఉంది. పెసరపప్పు.. పెసరపప్పులో ఐరన్, పొటాషియం, కాపర్ మెగ్నీషియం, అలాగే ఫైబర్, విటమిన్ B6, ఫోలేట్ వంటి ఖనిజాలు ఉంటాయి. బి కాంప్లెక్స్ విటమిన్లు కార్బోహైడ్రేట్ల విచ్ఛిన్నానికి సహాయపడతాయి. శరీరంలో శక్తి స్థాయిని పెంచుతాయి బాదం.. బాదంపప్పులు నాణ్యమైన ప్రోటీన్ ఉంటుంది. ఇందులో ఉండే ఫైబర్, ఆరోగ్యకరమైన మోనోశాచురేటెడ్ కొవ్వులను కలిగి ఉంటుంది. ఇవి తీసుకునే ఆహారం శరీరంలో శక్తిగా మార్చడంలో సహాయపడతాయి. వేయించిన గుమ్మడికాయ గింజలు మెగ్నీషియం కంటెంట్, ఆరోగ్యకరమైన కొవ్వులు, ఫైబర్ పుష్కలంగా ఉండటం వల్ల గుమ్మడికాయ గింజలు అద్భుతంగా పనిచేస్తాయి. వేయించిన గుమ్మడి గింజలను ప్రతిరోజూ కొద్దిగా తీసుకుంటే మంచిది. బొప్పాయి బొప్పాయిలో ఫ్రక్టోజ్, గ్లూకోజ్, సుక్రోజ్ వంటి సహజ చక్కెరలు ఉంటాయి. ఇవి శరీరంలో సులభంగా శోషించబడతాయి, త్వరగా శక్తిని అందిస్తాయి. అదనంగా, బొప్పాయిలో పాపైన్, చైమోపాపైన్ వంటి ఎంజైమ్‌లు ఉంటాయి, ఇవి జీర్ణక్రియలో సహాయపడతాయి, పోషకాల శోషణను మెరుగుపరుస్తాయి. ఇది ఆహారం నుండి పోషకాలను బాగా ఉపయోగించుకోవడంలో శరీరానికి సహాయపడుతుంది, శరీరానికి కావల్సిన శక్తి స్థాయిలను పెంచుతుంది. నెయ్యి అలసట అనేది అంతర్లీన ఒమేగా-3 లోపం వల్ల ఏర్పడే సాధారణ లక్షణం, కాబట్టి నెయ్యి (ఒమేగా 3 గొప్ప మూలంగా నెయ్యిని పరిగణిస్తారు)ని ఆహారంలో ఎక్కువగా తీసుకుంటూ ఉంటే శరీరానికి కావలసిన శక్తి అందుతుంది. ప్రసవం అనంతరం పైన చెప్పుకున్నా ఆహారాలు తీసుకుంటే ఎంతో ఆరోగ్యంగానూ, శారీరక, మానసిక స్థాయిలు సక్రమంగా నిర్వహించడంలోనూ సహాయపడుతాయి. ◆నిశ్శబ్ద.
గర్భధారణ సమయంలో వచ్చే మధుమేహం గురించి షాకింగ్ నిజాలు! ఈమధ్య కాలంలో మహిళలు గర్భము ధరించిన తరువాత మధుమేహ సమస్యను ఎదుర్కొంటున్నారు. ఈ మధుమేహం గర్భధారణ సమయంలో అభివృద్ధి చెందే ఒక రకమైన మధుమేహం. సాధారణంగా రెండవ లేదా మూడవ నెలలో శరీరంలో సంభవించే హార్మోన్ల మార్పుల వల్ల ఈ పరిస్థితి ఏర్పడుతుంది, ఇది ఇన్సులిన్ ఎలా ఉత్పత్తి మీద, దాని అది శరీరంలో ఎలా వినియోగం అవుతుంది అని దానిమీద ఆధారపడి ఉంటుంది. ఇన్సులిన్ అనేది రక్తంలో చక్కెర స్థాయిలను నియంత్రించడంలో సహాయపడే హార్మోన్. గర్భధారణ మధుమేహం ఉన్న స్త్రీలు ఆ సమయంలో ఇంకా ప్రసవ సమయంలో ప్రీక్లాంప్సియా వంటి సమస్యలను ఫేస్ చేసే ప్రమాదం ఉంది. ఇది అధిక రక్తపోటు, మూత్రపిండాలు, కాలేయం వంటి అవయవాలకు హాని కలిగించే పరిస్థితి. అలాగే మధుమేహం ఉన్న గర్భవతులలో నెలలు నిండకనే ప్రసవం జరిగే అవకాశాలు ఎక్కువ ఉంటాయి. గర్భధారణ మధుమేహం శిశువు అధిక బరువుతో పుట్టడానికి దారితీస్తుంది. ఇది షోల్డర్ డిస్టోసియా (డెలివరీ సమయంలో శిశువు భుజం ఇరుక్కున్నప్పుడు) లేదా సిజేరియన్ డెలివరీ వంటి డెలివరీ సమస్యలకు దారితీయవచ్చు. ఈ సమస్య వల్ల పుట్టిన తర్వాత శిశువులో తక్కువ షుగర్ లెవల్స్ ఏర్పడే అవకాశం ఉంటుంది. మూర్ఛలు, ఇతర సమస్యలను కలిగిస్తుంది. ప్రసవ తర్వాత స్త్రీలలో టైప్ 2 మధుమేహం వచ్చే ప్రమాదం కూడా ఎక్కువగా ఉంటుంది. అందువల్ల, దీనిని పూర్తిగా నిరోధించడానికి సరైన చర్యలు తీసుకోవడం చాలా అవసరం. గర్భధారణ సమయంలో వచ్చే మధుమేహ ప్రమాదాన్ని తగ్గించడానికి తినవలసిన ఆహారాలు: కార్బోహైడ్రేట్స్ లేని కూరగాయలు పచ్చని ఆకు కూరలు, బ్రోకలీ, క్యారెట్లు బెల్ పెప్పర్స్ వంటి ఇతర పిండి లేని కూరగాయలలో ఫైబర్, అవసరమైన విటమిన్లు, ఖనిజాలు అధికంగా ఉంటాయి. అవి తక్కువ కేలరీలను కలిగి ఉంటాయి. రక్తంలో చక్కెర స్థాయిలను స్థిరంగా ఉంచడంలో సహాయపడతాయి. తృణధాన్యాలు శుద్ధి చేసిన ధాన్యాల నుండి బ్రౌన్ రైస్, క్వినోవా, హోల్ వీట్ బ్రెడ్ వంటి తృణధాన్యాలకు మారడం ఇన్సులిన్ సెన్సిటివిటీని మెరుగుపరచడంలో, గర్భధారణ మధుమేహ ప్రమాదాన్ని తగ్గించడంలో సహాయపడుతుంది. తృణధాన్యాలు శక్తిని, మంచి ఫైబర్ ను కలిగి ఉంటాయి. ప్రోటీన్-రిచ్ ఫుడ్స్ ప్రొటీన్లు అధికంగా ఉండే ఆహారాన్ని తీసుకోవడం వల్ల గర్భిణీ స్త్రీలలో రక్తంలో చక్కెర స్థాయిలను స్థిరంగా ఉంచుకోవచ్చు. మాంసం, చేపలు, పౌల్ట్రీ, గుడ్లు, బీన్స్ మరియు చిక్కుళ్ళలో మంచి ప్రోటీన్ లభిస్తుంది. పాల ఉత్పత్తులు పాలు, పెరుగు, చీజ్ వంటి తక్కువ కొవ్వు పాల ఉత్పత్తులు కాల్షియం, విటమిన్ డి మరియు ప్రోటీన్లకు మంచి మూలం. అవి ఇన్సులిన్ సెన్సిటివిటీని మెరుగుపరచడంలో సహాయపడతాయి. రక్తంలో చక్కెర స్థాయిలను అదుపులో ఉంచుతాయి. పండ్లు పండ్లలో సహజ చక్కెరలు ఉంటాయి, కానీ వాటిలో ఫైబర్, విటమిన్లు, ఖనిజాలు కూడా ఎక్కువగా ఉంటాయి. గర్భిణీ స్త్రీలు పండ్ల రసాలు లేదా ప్రాసెస్ చేసిన పండ్ల స్నాక్స్ కంటే తాజా పండ్లను ఎంచుకోవాలి, ప్రాసెస్ చేసిన వాటిలో చక్కెరలు ఎక్కువగా ఉంటాయి. గింజలు మరియు విత్తనాలు గింజలు, విత్తనాలు ఆరోగ్యకరమైన కొవ్వులు, ప్రొటీన్లు, ఫైబర్ లను కలిగి ఉంటాయి. గర్భిణీ స్త్రీలకు ఇవి మంచి స్నాక్ లా ఉపయోగపడతాయి. బాదం, వాల్‌నట్‌లు, చియా గింజలు ఆహారంలో చేర్చుకోవడానికి కొన్ని మంచి ఎంపికలు. ఆరోగ్యకరమైన కొవ్వులు అవోకాడో, ఆలివ్ నూనె వంటి వాటిలో ఉండే ఆరోగ్యకరమైన కొవ్వులు ఇన్సులిన్ సెన్సిటివిటీని మెరుగుపరచడంలో మరియు గర్భధారణ మధుమేహం ప్రమాదాన్ని తగ్గించడంలో సహాయపడతాయి. గర్భిణీ స్త్రీలకు కడుపు నిండుగా సంతృప్తిగా ఉండటానికి కూడా ఇవి సహాయపడతాయి. గర్భధారణ మధుమేహానికి వ్యతిరేకంగా మహిళలు నివారణ చర్యలు తీసుకోవడం చాలా ముఖ్యం. గర్భధారణ మధుమేహం అధిక ప్రమాదం ఉన్న మహిళలు, కుటుంబంలో ఎవరికైనా మధుమేహం సమస్య ఉన్నవారు, గర్భధారణ సమయంలో రెగ్యులర్ బ్లడ్ షుగర్ టెస్ట్ చేయించుకోవడం ద్వారా జాగ్రత్త పడచ్చు. ◆నిశ్శబ్ద.
ముప్పై ఏళ్ళు దాటిన మహిళలు తప్పకుండా తెలుసుకోవలసిన విషయం! ప్రస్తుత కాలంలో 30 నుండి 40 ఏళ్ళ మహిళల్లో ఎక్కువగా ఎదురవుతున్న సమస్య ఎండోమెట్రియోసిస్. గర్భాశయం (ఎండోమెట్రియం) లోపలి భాగంలో ఉండే కణజాలం గర్భాశయం వెలుపల అండాశయాలు, ఫెలోపియన్ ట్యూబ్‌లు, పెల్విస్‌లోని ఇతర భాగాలలో పెరిగినప్పుడు ఈ సమస్య వస్తుంది. ఎండోమెట్రియోసిస్ కటి నొప్పి, నెలసరి ఎక్కువరోజులు కొనసాగడం, పిల్లలు కలగడంలో ఇబ్బంది వంటి అనేక లక్షణాలకు దారి తీస్తుంది. ఈ సమస్య ఎన్నో శారీరక, మానసిక సమస్యలు సృష్టించి, మహిళల లైఫ్ స్టైల్ పై గణనీయమైన ప్రభావాన్ని చూపుతుంది. ఇది పునరుత్పత్తి, లైంగిక, వృత్తిపరమైన, సామాజిక పనితీరులను ప్రభావితం చేస్తుంది. మొదట్లోనే ఈ సమస్య గురించి తెలుసుకుంటే.. దీన్ని గుర్తిస్తే.. దీన్ని అధిగమించడం సులువు అవుతుంది. ఎండోమెట్రియోసిస్ ఈస్ట్రోజెన్ హార్మోన్ స్థాయిలతో ముడిపడి ఉంటుంది. ఈస్ట్రోజెన్ హార్మోన్ అధికంగా ఉంటే కణజాల పెరుగుదల, వాపుకు దారితీయవచ్చు, ఇది పరిస్థితిని మరింత బాధాకరంగా మారుస్తుంది. అయినప్పటికీ, కొన్ని ఆహారాలు ఎండోమెట్రియోసిస్‌ను నియంత్రించడంలో సహాయపడతాయి. ఎండోమెట్రియోసిస్ ఉన్న మహిళలు తీసుకోవలసిన ఆహారాలు ఏమిటంటే.. పసుపు పసుపులో ప్రధాన క్రియాశీల పదార్ధమైన కర్కుమిన్, ఎస్ట్రాడియోల్ ఉత్పత్తిని తగ్గించడం ద్వారా ఎండోమెట్రియోసిస్ ను కంట్రోల్ చేయడంలో సహాయపడుతుంది., అలాగే కర్కుమిన్ గర్భాశయం యొక్క లైనింగ్ కణజాల వ్యాప్తిని అణిచివేస్తుంది. వీట్ గ్రాస్ వీట్ గ్రాస్ అత్యంత ఆల్కలీన్ గ్రీన్ లీఫీ వెజిటేబుల్స్ లో ఒకటి. క్లోరోఫిల్ సమృద్ధిగా ఈస్ట్రోజెన్ ఉత్పత్తిని ప్రేరేపించడానికి, వాపును తగ్గించడానికి, ప్రో-ఇన్ఫ్లమేటరీ సమ్మేళనాల కార్యకలాపాలను నిరోధించడానికి సహాయపడుతుంది. ఈ క్లోరోఫిల్ వీట్ గ్రాస్ లో లభ్యమవుతుంది. మునగ ఆకు.. మునగ ఆకు రసంలో మొరింగ ఒలిఫెరా ఉంటుంది. ఇది ఆండ్రోజెన్ గ్రాహకాల ప్రభావాన్ని తగ్గిస్తుంది, తద్వారా ఎండోమెట్రియం యొక్క మందాన్ని కూడా తగ్గిస్తుంది. అశ్వగంధ ఎండోమెట్రియోసిస్ సమస్య ఉన్నవారిలో కార్టిసాల్ స్థాయిలు ఎక్కువగా ఉంటాయి. ఒత్తిడిని తగ్గించడంలో సహాయపడటానికి అనుబంధంగా అశ్వగంధ ఉపయోగిస్తే ఒత్తిడిని పెంచే హార్మోన్లను నియంత్రిస్తుంది. శతావరి శాతవరి ఎండోమెట్రియోసిస్ సంశ్లేషణలను తగ్గించడంలో సహాయపడే మాక్రోఫేజ్‌ల ఫాగోసైటిక్ చర్యను పెంచుతుంది. ఎండోమెట్రియోసిస్‌ను నివారించడానికి లేదా చికిత్స చేయడానికి చిట్కాలు: ఆరోగ్యకరమైన, సమతుల్య ఆహారం తీసుకోవడం, చురుకైన జీవనశైలిని నిర్వహించడం వలన నెలసరిలో తిమ్మిరి, ఉబ్బరం తగ్గించవచ్చు, ఇవి ఎండోమెట్రియోసిస్ సాధారణ లక్షణాలు. ఒత్తిడి ఎండోమెట్రియోసిస్ లక్షణాలను మరింత ఎక్కువ చేస్తుంది, కాబట్టి దానిని నియంత్రించడానికి యోగా, ధ్యానం, లోతైన శ్వాస వ్యాయామాలు వంటి రిలాక్సేషన్ పద్ధతులు సహాయపడతాయి. ఎండోమెట్రియోసిస్ లక్షణాలను తగ్గించడంలో హార్మోన్ థెరపీ సహాయపడుతుంది. దీనివల్ల ఋతుచక్రాన్ని నియంత్రించవచ్చు. ఆక్యుపంక్చర్ లేదా హెర్బల్ రెమెడీస్ వంటి ప్రత్యామ్నాయ చికిత్సలు ఎండోమెట్రియోసిస్ లక్షణాల నుండి ఉపశమనం పొందడంలో, నొప్పిని తగ్గించడంలో సహాయపడతాయి. మరీ ముఖ్యంగా ఈ సమస్యలో గైనకాలజిస్ట్ ను సంప్రదించడం చాలా ముఖ్యం. ◆నిశ్శబ్ద.
గర్భవతులకు మలబద్దకం రాకుండా ఉండాలంటే ఇలా చేయాలి! గర్భం ధరించిన స్త్రీల శరీరంలో చాలా మార్పులు చోటుచేసుకుంటాయి. డెలివరీకి ముందు అనేక సమస్యలు ఎదుర్కోవాల్సి వస్తుంది. డెలివరీ తర్వాత అంతా నార్మల్‌గా అయిపోతుందని అనుకుంటారు కానీ చాలావరకు అది జరగదు. చాలా మంది మహిళలకు బిడ్డ ప్రసవం తర్వాత కూడా పైల్స్ సమస్యలు అలాగే ఉంటాయి. . ప్రెగ్నెన్సీకి ముందు పైల్స్ సమస్య లేకపోయినా, ప్రెగ్నెన్సీ సమయంలో, డెలివరీ తర్వాత పైల్స్ వ్యాధి వచ్చే ప్రమాదం పెరుగుతుంది. అయితే, మహిళలు గర్భధారణ సమయంలో కొన్ని విషయాలు తెలుసుకుని, కొన్ని జాగ్రత్తలు పాటించడం వల్ల ఈ సమస్యను చాలావరకు అధిగమించవచ్చు. అసలు పైల్స్ అంటే ఏంటి? మానవ శరీరంలో పురీషనాళం చుట్టూ సిరలు ఉంటాయి. ఈ సిరలు ఉబ్బుతాయి. అసాధారణమైన వాపు ఏర్పడుతుంది. ఈ సమస్య కారణంగా, ప్రేగు కదలిక సమయంలో దురద, నొప్పి ఉంటుంది. ఇవి బయటికి పొడుచుకు వచ్చిన చిన్న గింజలా ఉంటాయి. గర్భవతుల్లో ఎందుకొస్తుంది? నిజానికి, గర్భధారణ సమయంలో గర్భాశయం పరిమాణం పెరుగుతుంది. రక్త ప్రసరణ పెరగడం ప్రారంభమవుతుంది. దీని కారణంగా, సిరలు సులభంగా ఉబ్బుతాయి. అంతే కాకుండా ప్రొజెస్టిరాన్ అనే హార్మోన్ పెరగడం వల్ల గర్భిణీ స్త్రీలో మలబద్ధకం ఏర్పడుతుంది. మలబద్ధకం సమయంలో, మలం చాలా గట్టిగా మారుతుంది. ఈ కారణంగా పైల్స్ పరిస్థితి తీవ్రంగా మారుతుంది. సరళంగా చెప్పాలంటే, గర్భిణీ స్త్రీలు మలబద్ధకం కారణంగా పైల్స్‌కు గురవుతారు. డెలివరీ సమయంలో అధిక ఒత్తిడి కారణంగా హేమోరాయిడ్లు సంభవించవచ్చు. పైల్స్ సమస్యను ముందే గుర్తుపట్టడం ఎలా? పైల్స్ వ్యాధిలో, మలద్వారంలో నొప్పి, మంట, దురద ఉంటుంది. ప్రేగు కదలిక సమయంలో నొప్పి పెరుగుతుంది. కూర్చున్నప్పుడు కూడా పైల్స్ కారణంగా నొప్పి ఉంటుంది. పైల్స్ కారణంగా, మల విసర్జన తర్వాత కూడా ఇబ్బందిగానే ఉంటుంది. పురీషనాళం సమీపంలోని కణజాలంలో వాపు, పుండ్లు, రక్తస్రావం కనబడతాయి. పైల్స్ తగ్గడానికి, రాకుండా ఉండటానికి గర్భవతులు ఏమి చేయాలంటే.. ఫైబర్ అధికంగా ఉండే ఆహారాన్ని తీసుకోవాలి.. గర్భధారణ సమయంలో మలబద్ధకంతో బాధపడే మహిళలు తమ ఆహారంలో ఫైబర్ అధికంగా ఉండే ఆహారాన్ని చేర్చుకోవాలి. దీని కోసం, పండ్లు, కూరగాయలు, తృణధాన్యాలు తీసుకోవచ్చు. ఫైబర్ అధికంగా ఉండే ఆహారం మలబద్ధకం నుండి ఉపశమనం కలిగిస్తుంది. మలాన్ని మృదువుగా ఉంచుతుంది. ఇది పైల్స్ ప్రమాదాన్ని తగ్గిస్తుంది. మలవిసర్జన ఆపకూడదు.. గర్భవతులు బాత్రూమ్‌కు వెళ్లాలని అనిపించినప్పుడు, వెంటనే టాయిలెట్‌కు వెళ్లిపోవాలి. కారణాలు చెప్పుకుని మెలాన్ని బిగపట్టుకుని కాలం వెళ్లబుచ్చకూడదు. ఇలా చేస్తే కడుపు అస్తవ్యస్తం అవుతుంది. పేగులు ఎప్పటికపుడు శుద్ధి అవుతుంటేనే ఆరోగ్యంగా ఉండొచ్చు. శరీరాన్ని హైడ్రేట్ గా ఉంచుతాయి గర్భిణీ స్త్రీలు తమను తాము హైడ్రేటెడ్ గా ఉంచుకోవాలి. దీని కోసం నీరు బాగా త్రాగాలి. కొబ్బరి నీరు, నిమ్మరసం, పండ్ల రసాలు వంటి ద్రవాలను తీసుకుంటూ ఉండాలి. దీనివల్ల పైల్స్ సమస్యను కూడా దూరం చేసుకోవచ్చు. ◆నిశ్శబ్ద.
మహిళల్లో జుట్టు ఏ కండిషన్ లో ఉంటే ఏ సమస్య ఉన్నట్టో తెలుసా? ఇప్పటి కాలంలో మహిళల ఆరోగ్యం చాలా దయనీయమైన పరిస్థితిలో ఉందని చెప్పవచ్చు. నెలసరి సమస్యల నుండి ఎన్నో రకాల జబ్బులు మహిళలను చుట్టుముడుతున్నాయి. ఇవన్నీ మహిళలను బలహీనంగా మారుస్తాయి. కొన్ని సార్లు తాము అనారోగ్యంతో ఉన్నామనే విషయం కూడా మహిళలు స్వతహాగా గుర్తించలేరు. చాలా చిన్నవే.. అనే నిర్లక్ష్యంతో కొన్ని దాటవేస్తుంటారు. చాలామంది వైద్యులు మహిళలు ఆరు నెలలు లేదా ఏడాదికి ఒకసారి హెల్త్ చెకప్ చేయించుకుని, అన్ని రకాల పరీక్షలు చేయించడం ఉత్తమం అని అంటుంటారు. కానీ అందరికీ ఆర్థిక పరిస్థితులు సరిపడినట్టు ఉండవు. చాలామంది జుట్టు, చేతి గోర్ల కండిషన్ ను బట్టి ఎలాంటి ఆరోగ్య సమస్యలు ఉండొచ్చో చెప్పచ్చంటున్నారు. ముఖ్యంగా జుట్టు కండిషన్ ఎలా ఉంది?? ఎంత మొత్తంలో రాలిపోతోంది అనే దాన్ని బట్టి ఏ ఆరోగ్య సమస్యలు ఉండొచ్చో గెస్ చేయవచ్చట. ఇంతకూ జుట్టు ఏ కండిషన్ లో ఉంటే ఏ సమస్యలు ఉన్నట్టో తెలుసుకుంటే.. జుట్టు రాలడం.. ఇది చాలా సాధారణ సమస్య. సాధారణంగా తల స్నానం తరువాత 100 వెంట్రుకల వరకు రాలిపోతుంది, ఈ నష్టం తీవ్రమైన ఆరోగ్య సమస్యకు సంకేతం. పోషకాహార లోపాలు ఉన్నట్టుగా అర్థం చేసుకోవాలి. ఈ క్రమంలో వైద్యుడిని సంప్రదిస్తే థైరాయిడ్, రక్తహీనతతో పాటు విటమిన్ డి లోపంతో సహా కొన్ని విటమిన్, ఖనిజ లోపాలను గుర్తించే పరీక్షలు చేయవచ్చు.. పెళుసుదనం … జుట్టు ఆరోగ్యంగా ఉండాలంటే.. కొంత తేమ అవసరం. ముఖ్యంగా పెళుసుగా ఉండే జుట్టు జింక్ మరియు, ఐరన్ లోపాన్ని సూచిస్తుంది. జింక్ ఐరన్ లేకపోవడం జుట్టు సామర్థ్యాన్ని తగ్గిస్తుంది. ఎందుకంటే కెరాటిన్ ఏర్పడటానికి ఈ పోషకాలు అవసరం. ఐరన్, జింక్ ను ఆహారం నుండి అయినా లేదా సప్లిమెంట్స్ ద్వారా అయినా సరిపడినంత తీసుకోవడం మంచిది. బూడిద జుట్టు దీర్ఘకాలిక ఒత్తిడి వల్ల DNA దెబ్బతింటుంది. ఇది వెంట్రుకల కుదుళ్లలో వర్ణద్రవ్యం ఉత్పత్తి చేసే కణాల సంఖ్యను తగ్గిస్తుంది. ఇంకా చెప్పాలంటే.. జుట్టు రాలడం అనే సమస్య ఒత్తిడి వల్ల కూడా సంభవిస్తుంది. అయితే జుట్టు నెరవడం జన్యువుల వల్ల కూడా సంభవిస్తుంది. చాలామందిలో ఇది వంశపరంపర్యంగా వస్తూంటుంది. జుట్టు పొడిబారడం ఆరోగ్యకరమైన కొవ్వులు జుట్టు మృదువుగా ఉండేలా చేస్తాయి. ఆరోగ్య కరమైన కొవ్వులు లోపిస్తే.. జుట్టంతా పొడిబారిపోయి పీచులాగా కనిపిస్తుంది. శరీరంలో ఆరోగ్యకరమైన కొవ్వులు లోపిస్తున్నాయనే దానికి ఇది చక్కని సూచన. ఆహారంలో అవకాడో, ఆలివ్ ఆయిల్ సాల్మన్ ఫిష్ వంటి ఆరోగ్యకరమైన కొవ్వులు కలిగి ఉండే పదార్థాలను తీసుకోవడం ద్వారా ఈ సమస్యను పరిష్కరిచవచ్చు. చుండ్రు చుండ్రు జుట్టులో పొట్టు పొట్టుగా ఏర్పడే ఒకానొక సమస్య. ఇది పసుపు లేదా తెలుపు రంగులో ఉంటుంది. చుండ్రు సరైన విధంగా ప్రయత్నం చేస్తే తొందరగానే తగ్గిపోతుంది. సెబోర్హెయిక్ డెర్మటైటిస్ ఎరుపు, జిడ్డుగల చర్మంతో ఉంటుంది, ఇది తెల్లటి లేదా పసుపు రంగు పొలుసులతో కప్పబడి ఉంటుంది. మలాసెజియా, ఈస్ట్ లాంటి శిలీంధ్రం జుట్టు కుదుళ్లలో ఏర్పడటం వల్ల ఈ సమస్య వస్తుంది. జుట్టు పొడిబారడం ఈ సమస్యకు కారణం కావచ్చు. ఈ విధంగా జుట్టు కండిషన్ ను బట్టి శరీర స్థితిని కూడా తెలుసుకోవచ్చు. ◆నిశ్శబ్ద.
నడుమునొప్పికి అధిక కారణాలు ఇవే… పరిష్కారాలు కూడా... చాలామంది మహిళలలో తరచుగా వినిపించే ఫిర్యాదు నడుమునొప్పి. నడుమునొప్పి అనేది ఒకప్పుడు పెద్ద వయసు వారికి మాత్రమే వాచ్చేది. కానీ ఇప్పుడు అలా కాదు వయసుతో సంబంధం లేకుండా నడుమునొప్పి వచ్చేస్తోంది. నడుమునొప్పి నివారణ కోసం ఎన్నో రకాల మందులు, పెయిన్ రిలీఫ్ జెల్, పెయిన్ రిలీఫ్ క్రీమ్ లు వాడుతుంటారు. అయితే అసలు నడుము నొప్పి ఎందుకు వస్తుంది అని కారణం తెలుసుకుంటే దీన్ని నివరించుకోవడం అందరి చేతుల్లోనే ఉంది. మరి నడుము నొప్పి ఎలా వస్తుంది దానికి కారణం ఏమిటి వంటి వివరాలు తెలుసుకుంటే… నడుమునొప్పి ఎలా వస్తుంది?? ఎందుకు వస్తుంది?? నడుము అనేది శరీరానికి మధ్యభాగంలో ఉన్న అవయవం. కడుపు పై భాగం నుండి ఉన్న బరువు మొత్తం నడుము మీద పడుతూ ఉంటుంది. ఏదైనా పని చేసేటప్పుడు లేదా సాధారణంగా అలవాటు ప్రకారము వంగినప్పుడు నడుము భాగం వంచుతూ ఉంటాం. ఫలితంగా నడుము భాగం ప్రభావానికి గురవుతుంది. నడుము వంచిన భంగిమ లేదా నడుము మీద బరువు పడే ప్రాంతాన్ని బట్టి నడుము ప్రాంతం ఒత్తిడికి లోనయ్యి నొప్పి వస్తుంది. ఒకే వైపు బరువు పడటం, ఒకే వైపు వంగి కూర్చోవడం, ఒకే వైపు బరువులు ఎత్తడం, నడవడంలో కూడా ఒకేవైపు బెండ్ కావడం వంటివి జరిగినప్పుడు నడుము ప్రభావానికి గురయ్యి నొప్పి వస్తుంది. ఈ నడుము నొప్పి వచ్చే కొన్ని కారణాల, వాటి నివారణకు మార్గాలు ఉన్నాయి… కూర్చునేటప్పుడు:- కూర్చునేటప్పుడు వీపును నిటారుగా ఉంచి కూర్చోవాలి. దీనివల్ల శరీరం సమాంతరంగా ఉండి బరువు ఒకే ప్రాంతంలో పడకుండా ఉంటుంది. నడుము నొప్పి రాకుండా ఉండటం కోసం మాత్రమే కాకుండా నడుమునొప్పి వచ్చినప్పుడు కూడా వీలైనంతవరకు ఇలా కూర్చోవడం అలవాటు చేసుకుంటే నడుమునొప్పి తగ్గిపోతుంది. చాలామంది బరువులు ఎత్తుతూ ఉన్నపుడు కాళ్ళను నిటారుగా ఉంచుతారు. ఇలా ఎత్తేటప్పుడు నడుము మీద చాలా ఒత్తిడి పడుతుంది. నడుము భాగంలో కండరాలు, ఎముకలు బిగుసుకున్నట్టు అవుతాయి. అయితే ఇలా బరువు ఎత్తేటప్పుడు ఏమాత్రం బ్యాలెన్స్ కాస్త తప్పిన అది నడుము మీద చాలా ప్రభావాన్ని చూపిస్తుంది. కాబట్టి బరువులు ఎత్తేటపుడు కాళ్ళను 'మోకాళ్ళవద్ద వంచి, బరువులు ఎత్తాలి. ఇకపోతే నిలబడినప్పుడు కూడా పద్దతిగా నిలబడాలి. కొండస్రు నిలబడినప్పుడు బరువు మొత్తం ఒక కాలు మీద వేసి నిలబడటం, లేదా ఒకవైపుకు వంగి నడుము ఒకవైపు భాగం మీద బరువు వేయడం, ఒకవైపు మాత్రమే నడుము వంచి ఎక్కువ సేపు ఉండటం వంటివి చేస్తుంటారు. దీనివల్ల నడుమునొప్పి చాలా తొందశరగా వస్తుంది. కాబట్టి నిలబడినట్టు అటు ఇటు బెండ్ అవ్వకుండా నిటారుగా నిలబాడ్స్ట్స్మ్ ఎంతో ముఖ్యం. పడుకునే సమయంలో కూడా భంగిమ ఎంతో ప్రధాన పాత్ర పోషిస్తుంది. ఒకవైపుకు తిరిగి పడుకోవడం లేదా పడుకున్న తీరు ఏదైనా శరీరం అస్తవ్యస్తంగా కాకుండా కాస్త నిటారుగా ఉండటం ముఖ్యం. లేకపోతే శరీరం అస్తవ్యస్తంగా ఉన్నట్టు నిద్రపోతే నడుము భాగంలో కండరాలు పట్టేస్తాయి. పొట్ట కింద భాగంలో ఉండే అబ్డామినల్ కండరాలు ఎఫెక్ట్ అవుతాయి. ఒకవేళ ఎలాగంటే అలా పడుకునే అలవాటు ఉన్నవాళ్లకు నడుము నొప్పి రాకూడదు అంటే ఒక మంచి చిట్కా ఉంది. పడుకునేటప్పుడు మోకాళ్ళ కింద దిండు పెట్టుకుంటే పడుకునే విధానం కాస్త మెరుగ్గా ఉంటుంది. ఫలితంగా నడుము ఒత్తిడికి గురి కాదు. కుర్చీలో కూర్చున్నప్పుడు నిటారుగా కూర్చోవాలి. అంతే కానీ ఒకవైపుకు అనుకుని మూలకు కూర్చోకూడదు. అలాగే కుర్చీ నుండి లేచేతప్పుడు ఒకేసారి పైకి లేవకుండా ఒక కాలిని ముందుకు, మరొక కాలిని వెనక్కు పెట్టి లేవడానికి ప్రయత్నించాలి. ఇలా చేస్తే నడుమునొప్పి రాదు. ఆడవారిలో ఈమధ్య బాగా విస్తృతం అయిపోయిన అలవాటు హై హీల్స్ వేసుకోవడం. ఇలా హైహీల్స్ వేసుకొంటే నడుమునొప్పి వచ్చే అవకాశాలు ఎక్కువ ఉంటాయి. చాలామంది ఆడవారు ఇతరులతో మాట్లాడేటప్పుడు రెండు కాళ్ళను ఇంటూ ఆకారంలో ఉంచి మాట్లాడుతూ ఉంటారు. దీనివల్ల నడుమునొప్పి వచ్చే అవకాశాలు చాలా ఎక్కువ ఉన్నాయి. కాబట్టి ఈ అలవాటు ఉంటే మానుకోవడం మంచిది. పైన చెప్పుకున్న కొన్ని చిట్కాలు గమనిస్తే మహిళలు తమకు తెలియకుండా నడుము నొప్పిన బారిన ఎలా పడుతున్నారో కూడా అర్థమవుతుంది. వాటికి సూచించిన జాగ్రత్తలు తీసుకుంటే నడుము నొప్పికి చెప్పచ్చు బై బై.. ◆నిశ్శబ్ద.
బరువు పెరుగుతున్నామని భయం వద్దు.. ఇలా చేస్తే చాలు! మనం భోజనం చేయడం సహజం. అయితే చాలా మంది మహిళలు తిన్న కొద్ది సేపటికే ఆకలి అంటూ ఉంటారు. ఇలా అనిపించడం సర్వసాధారణం, కానీ అనారోగ్యకరమైన ఆహారాలు తినడం వల్ల ఆరోగ్యానికి హాని కలుగుతుంది. శరీరం ఆకలి సంకేతాలను వినడం ముఖ్యం అయినప్పటికీ, సరైన ఆహారాన్ని ఎంచుకోవడం చాలా అవసరం. అనారోగ్యకరమైన తిండిని నివారించడానికి, మంచి ఆహారం ఎంపిక చేసుకోోడానికి గందరగోళ పడుతున్నట్టైతే ఈ చిట్కాలు తప్పకుండా ఫాలో అవ్వండి.. ఆహారం ట్రాక్‌లో ఉండేలా చేసుకోవడం ఇలా.... ముందుగా ప్లాన్ చేసుకోవాలి.. ఆరోగ్యకరమైన ఆహారాన్ని ఎంపికంచేసుకోవాలి. లేకుపితే చాలా ఈజీగా దగ్గరలో ఉన్న జంక్ ఫుడ్ వైపుకు వెళ్ళిపోతారు. తీసుకునే ఏ ఆహారం అయినా స్నాక్స్ తో సహా ముందే ప్లాన్ చేసుకోవాలి. దీనివల్ల ఎప్పుడూ పోషకమైన ఆహారం మీరు తీసుకునే అవకాశం ఏర్పడుతుంది. తాజా పండ్లు కూరగాయలను తీసుకోవాలి. ఎనర్జీ బార్ లు స్నాక్ లో చేర్చుకోవాలి. ఆకలితో ఉన్నప్పుడు ఇవి మంచి ఆప్షన్. ఆరోగ్యం కూడా.. ఇంటి ఆహారమే.. మహాభాగ్యం.. బయట కొన్న ఆహారంలో జోడించిన చక్కెర, అనారోగ్య కొవ్వులతో నిండి ఉంటాయి. అందుకే, పూర్తి పోషక పదార్ధాలను ఉపయోగించి ఇంట్లో స్వంతగా తయారు చేయడానికి ప్రయత్నించాలి. హైడ్రేటెడ్ గా ఉండాలి.. ఎవ్వరికీ ఎక్కువగా తెలియని షాకింగ్ నిజం ఏమిటంటే.. శరీరంలో తేమ శాతం తక్కువైతే చాలా మందికి దాన్ని ఆకలి అనుకుంటారు. చాలాసార్లు ఆకలి అనిపించి ఆహారం తీసుకున్నా తృప్తి కలగకపోవడానికి కారణం ఇదే.. నదుకే నీటిని సరిపడినంత తీసుకోవాలి. ఆకలి అనిపించినప్పుడు ఒక గ్లాసు నీరు తాగి ఆ తరువాత కూడా అదే విధంగా ఆకలి అనిపిస్తే అపుడు ఆహారం తినాలి. అల్పాహారం చేసేటప్పుడు జాగ్రత్త మైండ్‌ఫుల్ ఈటింగ్.. ఫాలో అవ్వాలి. అంటే మీరు తినే వాటిపై శ్రద్ధ చూపడం ప్రతి బైట్ ను ఆస్వాదించడం. అల్పాహారం చేసేటప్పుడు, టీవీ, మొబైల్ ఫోన్‌లు, సోషల్ మీడియా చూడటం వంటివి నివారించండి. ఆహారం రుచి, అందులో పదార్థాలు దాని వాసన ఇలాంటివి అనుభూతి చెందుతూ తింటే చాలా తొందరగా తృప్తి చెందిన ఫీల్ కలుగుతుంది. ఆప్షన్స్ కూడా.. ఆహారం తీసుకునేటప్పుడు, పండ్లు, కూరగాయలు, గింజలు వంటి పోషకాలు ఎక్కువగా ఉండే ఆహారాన్ని ఎంచుకోవడానికి ప్రయత్నించాలి. ఈ ఆహారాలలో విటమిన్లు, ఖనిజాలు, ఫైబర్, యాంటీఆక్సిడెంట్లు పుష్కలంగా ఉంటాయి, ఇవి మొత్తం ఆరోగ్యానికి తోడ్పడతాయి. అవి జీర్ణం కావడానికి ఎక్కువ సమయం తీసుకుంటాయి, ఎక్కువసేపు నిండుగా ఉన్నట్లు అనిపిస్తుంది. బ్లడ్ షుగర్ స్పైక్‌లు, క్రాష్‌లకు కారణమయ్యే అవకాశం తక్కువ. వీటిని ఫాలో అయితే మహిళల్లో బరువు పెరగడం అనే సమస్య ఉండదు.. ◆నిశ్శబ్ద.
మీకు జుట్టు రాలే సమస్య వేధిస్తోంటే అసలు కారణం ఇదే కావ్చచు! ఇప్పటికాలంలో అమ్మాయిలు జుట్టు రాలడమనే సమస్యతో చాలా ఇబ్బందులు పడుతున్నారు. దీనికి సరైన కారణాన్ని తెలుసుకోకుండా కనిపించిన మార్గమల్లా ఫాలో అవ్వడంతో కేవలం జుట్టు రాలే సమస్య కాస్తా జుట్టు పలుచగా, సున్నితంగా మారిపోవడానికి, జీవం కోల్పోవడానికి కారణం అవుతుంది. అయితే దీనికి అసలు కారణం.. కారణానికి తగిన పరిష్కారం తెలుసుకుంటే.. శరీరంలో కొన్ని విటమిన్లు మరియు మినరల్స్ లోపించడం వల్ల వివిధ ఆరోగ్య సమస్యలు తలెత్తుతాయి. అలాంటి సమస్యల్లో ఒకటి జుట్టు రాలడం. ఈ రోజుల్లో చాలా మంది జుట్టు రాలడం గురించి ఫిర్యాదు చేస్తున్నారు. రోజురోజుకూ తమ జుట్టు పల్చబడి పొడిబారడంతోపాటు చిట్లిపోతుందని కూడా కొందరు ఫిర్యాదు చేస్తున్నారు. పరిష్కారాలను వెతుక్కుంటూ చాలామంది బ్యూటీ ప్రొడక్ట్స్, షాంపూల వైపు మొగ్గు చూపుతున్నారు. కానీ, కొన్నిసార్లు, శరీరంలో ఇదొక్కటి తగినంత మొత్తంలో లేకపోవడం వల్ల జుట్టురాలిపోవడం జరుగుతుంది. మీ గుండె ఆరోగ్యాన్ని జాగ్రత్తగా చూసుకోవడం నుండి శరీరంలో వివిధ రకాల విధులను సజావుగా నిర్వహించడం వరకు సహాయపడేది ఇదే.. ఇంత ప్రముఖ పాత్ర పోషించే పదార్థమే ఒమేగా-3 ఫ్యాట్స్.. జుట్టు రాలే సమస్య బాగా ఎదుర్కొంటుంటే లేదా మీ జుట్టు పలుచబడటం లేదా పొడిగా, పెళుసుగా ఉన్నట్లు అనిపిస్తే, ఒమేగా-3 తీసుకోవడం గురించి ఆలోచించాల్సిందే.. ఒమేగా-3 కొవ్వులు చర్మంలో తేమను నిలుపుకోవడంలో సహాయపడతాయి, అవి జుట్టును ఆరోగ్యంగా ఉంచడంలో కూడా సహాయపడతాయి. జుట్టు చక్కగా.. అందంగా, మందంగా లేకపోతే ఒమేగా-3 శరీరానికి తగిన మోదాదులో అందడం లేదని అర్థం. ఇలాంటి పరిస్థితిలో తప్పనిసరిగా తినవలసిన ఆహారాలను ఆరోగ్య నిపుణులు సూచించారు. నెయ్యి, ఆలివ్ నూనె, బాదం, వాల్‌నట్‌లు, అవిసె గింజలు, చియా విత్తనాలు ఒమేగా-3 పుష్కలంగా ఉండే ఆహార పదార్థాలు. ఇవి మాత్రమే కాకుండా.. ఆరోగ్యకరమైన, సమతుల్య ఆహారం జుట్టు రాలడాన్ని నియంత్రించడంలో సహాయపడుతుంది. మొత్తం జుట్టు నాణ్యతను పెంచుతుంది. ఒమేగా-3 అధికంగా ఉండే ఆహారాలు కాకుండా, మీ జుట్టుకు మంచి చేసే ఇతర ఆహారాలు.. గుడ్లు, బచ్చలికూర, గింజలు, నల్ల శనగలు, అవకాడోలు మరియు ఆకుపచ్చ ఆకు కూరలు మొదలయినవి. ◆ నిశ్శబ్ద
ఆడవారి దారుణమైన నెలసరి వెనుక షాకింగ్ సమస్య ఇదే! ఎండోమెట్రియోసిస్ అనేది గర్భాశయ కుహరం వెలుపల గర్భాశయ లైనింగ్ కణజాలం పెరిగే ఒక సమస్య. గర్భాశయంలోని పొరను ఎండోమెట్రియం అంటారు. ఈ పొరమీద కణజాలం పెరిగితే దాన్ని ఎండోమెట్రియోసిస్ అని అంటున్నారు. దీని ప్రభావం కారణంగా దీన్ని ఒక జబ్బుగా పరిగణిస్తున్నారు. అండాశయాలు, ప్రేగులు కటి మొదలైన భాగాల్లో ఎండోమెట్రియల్ కణజాలం పెరిగినప్పుడు ఎండోమెట్రియోసిస్ వస్తుంది. కణజాలం పెల్విక్ ప్రాంతం దాటి వ్యాప్తి చెందడం చాలా అరుదుగా జరుగుతుంది. గర్భాశయం వెలుపల పెరుగుతున్న ఎండోమెట్రియల్ కణజాలాన్ని ఎండోమెట్రియల్ ఇంప్లాంట్ అంటారు. ఎండోమెట్రియోసిస్ ప్రతి స్త్రీని వేర్వేరుగా ప్రభావితం చేస్తుంది కాబట్టి దీనికి ఒక ప్రామాణికమైన చికిత్స లేదు. కొన్ని జీవనశైలి సర్దుబాట్లు, ఇంటి నివారణలు, చికిత్సా వ్యూహాలు, ఇంకా ప్రిస్క్రిప్షన్ మందులు ఈ సమస్య నుండి ఊరటను ఇస్తాయి. ఎండోమెట్రియోసిస్ సమస్య గర్భం దాల్చడాన్ని కష్టతరం చేస్తుంది. ఇలాంటి సమయంలో వైద్యుడిని కలిసి చికిత్స తీసుకోవడం చాలా ముఖ్యం. సంతానోత్పత్తి చికిత్సలో అండాశయాలను ప్రేరేపించడం నుండి ఇన్ విట్రో ఫెర్టిలైజేషన్ వరకు అన్ని ఉంటాయి . ఎండోమెట్రియోసిస్ శారీరకంగా మానసికంగా ఎదుర్కోవడం చాలా కష్టమైన అనారోగ్యం గా పేర్కొనవచ్చు. కానీ దీన్నుండి ఉపశమనం పొందడానికి కొన్ని మార్గాలు ఉన్నాయి. పోషణపై నిఘా ఉంచాలి.. సరైన భోజనం తీసుకోవడం వల్ల ఎండోమెట్రియోసిస్ నుండి రక్షణ పొందవచ్చు. మంట, ప్రోస్టాగ్లాండిన్ జీవక్రియ, ఈస్ట్రోజెన్ స్థాయిలు ఈ సమస్యపై ప్రభావితం చూపిస్తాయి. ఆహారంలో పోషకాలు సమృద్ధిగా ఉండటం, అలాగే తీసుకునే ఆహారం నాణ్యమైనదిగా రసాయనాలు కాకుండా సేంద్రీయంగా ఉత్పత్తి చేసినవి తీసుకోవడం మంచిది. రసాయనాలు ఎక్కువ ఉన్న ఆహారం ఎండోమెట్రియోసిస్ కు కారణం అవుతుంది. హీటింగ్ ప్యాడ్ ఇలా ఉండాలి.. నెలసరి సమస్యల్లో అధికంగా ఋతు రక్తం పోవడం, పొత్తి కడుపు నొప్పి, కటి భాగంలో నొప్పి వంటి సమస్యలు వస్తుంటాయి. దీనికి పరిష్కారంగా హీటింగ్ ప్యాడ్ వాడుతుంటారు చాలామంది. అయితే ఇది ఎలక్ట్రానిక్ తరహా హీటింగ్ ప్యాడ్ కాకపోతే మంచిది. ఆరోగ్య వంతమైన హీటింగ్ ప్యాడ్ పొత్తికడుపు నొప్పి, కండరాల తిమ్మిర్లు తగ్గించడంలో సహాయపడుతుంది. సహజమైనవి తీసుకోవాలి.. పశుగ్రాసంలో ఉండే కొన్ని పురుగుమందులు డయాక్సిన్ అనే టాక్సిన్ ను కలిగి ఉంటాయి. ఇవి ఎండోమెట్రియోసిస్ రావడానికి కారణం అవుతాయి. మాంసాహారం వినియోగాన్ని తగ్గించడం ద్వారా వీలైనంత వరకు తక్కువ గ్లూటెన్, సేంద్రీయ ఆహారాన్ని తీసుకోవడం ద్వారా ఆరోగ్యంగా ఉండొచ్చు. ఇవి హార్మోన్లను సమతుల్యంగా ఉంచుతాయి. అదే రసాయనాలు ఉన్న ఆహారం తీసుకుంటే అది హార్మోన్లను అస్తవ్యస్తం చేస్తుంది. శస్త్రచికిత్స.. గర్భం దాల్చకూడదనుకునే మహిళల్లో ఏకంగా , గర్భాశయం యొక్క తొలగింపు వరకు ఈ సమస్య వెళ్తుంది. అధిక నెలసరి ప్రవాహం,గర్భాశయ తిమ్మిరి కారణంగా బాధాకరమైన ఋతుస్రావం జరుగుతుంది . ఇలాటి సమయాల్లో చాలామంది ఇక గర్భాశయమే వద్దనుకునే స్థితిలోకి జారుకుంటారు. 35ఏళ్ల లోపు ఈ సమస్య ఎదురైతే ఆరోగ్యంపై దీర్ఘకాలిక ప్రభావాన్ని చూపుతుంది. విటమిన్ డి, విటమిన్ బి విటమిన్లను కచ్చితంగా తీసుకోవాలి.. విటమిన్ డి ని "హ్యాపీ విటమిన్" అని పిలుస్తారు, ఇది ఆందోళన, నిరాశను తగ్గిస్తుంది. ఎండోమెట్రియోసిస్ లక్షణాలు చాలా తీవ్రంగా ఉన్న రోజుల్లో విటమిన్ B శక్తిని పెంచుతుంది. ఆహారంలో కొవ్వు ఎండోమెట్రియోసిస్ అవకాశాలను ప్రభావితం చేస్తుంది. ఒక అధ్యయనం ప్రకారం, అత్యధికంగా ట్రాన్స్ ఫ్యాట్‌లను తిన్నవారిలో ఎండోమెట్రియోసిస్ వచ్చే ప్రమాదం 48% పెరిగింది. ఒమేగా-3 నూనెలు ఎక్కువగా తీసుకునేవారు తక్కువ తీసుకునే వారితో పోలిస్తే ఎండోమెట్రియోసిస్ ప్రమాదాన్ని 22% తగ్గించారు. సాల్మన్, అవిసె గింజలు వాల్‌నట్స్ వంటి ఒమేగా-3 ఫ్యాటీ యాసిడ్ ఎక్కువగా ఉన్న ఫుడ్స్ తీసుకోవడం ఎండోమెట్రియోసిస్ తగ్గించడంలో ఉపయోగపడతాయి. ◆నిశ్శబ్ద.
పండంటి బిడ్డ పుట్టాలంటే గర్భిణీ స్త్రీలు వీటిని తప్పక తీసుకోవాలి! స్త్రీలు సాధారణ సమయాల్లో తీసుకునే జాగ్రత్తల కంటే.. వారు గర్భవతులుగా ఉన్న సమయంలో తీసుకునే జాగ్రత్తలు చాలా ముఖ్యం. ఆరోగ్యకరమైన బిడ్డ పుట్టడం కోసం, గర్భిణీ స్త్రీ తన ఆరోగ్యంపై ప్రత్యేక శ్రద్ధ వహించాలి. దీని కోసం, గర్భధారణ సమయంలో తీసుకునే ఆహారంపై ప్రత్యేక శ్రద్ధ తీసుకోవాలి. మంచి ఆహారం గర్భిణీ స్త్రీని ఆరోగ్యంగా ఉంచుతుంది. అలాగే ఆ ఆహారం పిల్లల ఆరోగ్యంపై ప్రత్యక్ష ప్రభావాన్ని చూపుతుంది. అదే సమయంలో, గర్భిణీ స్త్రీ ఆహారం ద్వారా డెలివరీ సమయంలో సంభవించే సమస్యలను కూడా నివారించవచ్చు. గర్భధారణ సమయంలో స్త్రీ ఏది తింటే అది పుట్టబోయే బిడ్డపై ప్రభావం చూపుతుంది. గర్భిణీ స్త్రీలకు పూర్తి పోషకాహారం లభిస్తే, ప్రసవం తర్వాత ఆరోగ్యకరమైన బిడ్డ పుడుతుంది. కాబట్టి గర్భధారణ సమయంలో స్త్రీ తప్పనిసరిగా కొన్ని పదార్థాలు తినాలి. గర్భిణీ స్త్రీకి, పుట్టబోయే బిడ్డకు మేలు చేసే ప్రెగ్నెన్సీ సూపర్ ఫుడ్స్ గురించి తెలుసుకుందాం. గర్భిణీ స్త్రీలు ఏమి తినాలంటే… పాలకూర పచ్చి కూరగాయలలో అన్ని పోషకాలు ఉంటాయి. ఇందులో పాలకూర తీసుకోవడం వల్ల చాలా మేలు జరుగుతుంది. పాలకూరలో ప్రొటీన్లు, ఫైబర్, విటమిన్లు అనేక ఖనిజాలు ఉంటాయి. పిల్లల అభివృద్ధికి, మెరుగైన ఆరోగ్యానికి బచ్చలికూర తీసుకోవడం అవసరం. గర్భిణీ స్త్రీలు పాలకూర తీసుకోవడం వల్ల పుట్టబోయే బిడ్డకు మంచి ఆరోగ్యం, తీక్షణమైన బుద్ధి లభిస్తాయి. గుడ్డు గుడ్డు కూడా పోషకాలతో నిండి ఉంది. గుడ్డులో ప్రొటీన్లతో పాటు విటమిన్లు, మినరల్స్ ఉంటాయి. గుడ్లలో విటమిన్ డి ఎక్కువగా ఉంటుంది. శిశువు మెదడు అభివృద్ధికి విటమిన్ డి ముఖ్యమైనది. అందుకే గర్భిణీ స్త్రీలు గుడ్లు తినాలి. బాదం బాదంలో చాలా పోషకాలు ఉన్నాయి. బాదంపప్పు తింటే గుండె ఆరోగ్యం పదునవుతుంది. ఇది గర్భిణీ స్త్రీలకు వారి పిల్లలకు కూడా మంచిది. బాదంపప్పులో ఎన్నో పోషకాలు లభిస్తాయి. గర్భధారణ సమయంలో స్త్రీలు బాదంపప్పును తీసుకోవాలి. ఇది పిల్లల మెదడు అభివృద్ధిని మెరుగుపరుస్తుంది. తాజా పండ్లు తాజా పండ్లు ఆరోగ్యానికి మేలు చేస్తాయి. తాజా పండ్ల నుండి విటమిన్లు లభిస్తాయి. స్త్రీ గర్భధారణ సమయంలో నారింజ, అరటి, మామిడి, ద్రాక్ష, యాపిల్ మొదలైన పండ్లను తీసుకోవాలి. కావాలంటే ఫ్రూట్ జ్యూస్ చేసి తాగొచ్చు. పెరుగు గర్భిణీ స్త్రీలు పెరుగు తీసుకోవడం వల్ల బిడ్డకు ఆరోగ్యకరం. ఇది చాలా మేలు చేస్తుంది. పెరుగులో విటమిన్ సి సహా చాలా ప్రోటీన్లు ఉంటాయి. రోజూ పెరుగు తీసుకోవడం వల్ల డెలివరీ తర్వాత ఆరోగ్యవంతమైన మరియు అభివృద్ధి చెందిన బిడ్డ పుడుతుంది. పాలు పిల్లలైనా, పెద్దలైనా, ప్రతి ఒక్కరూ పాలు తీసుకోవాలని సూచిస్తారు. ఒక గ్లాసు పాలలో పుష్కలమైన పోషకాలు ఉంటాయి. గర్భిణీ స్త్రీకి కఫుపులో బిడ్డకు పాలు చాలా ఉపయోగకరంగా ఉంటాయి. దీంతో శరీరానికి బలం చేకూరుతుంది. ఆరోగ్యం ఏర్పడుతుంది. అందరికీ అందుబాటులో ఉండే ఈ పదార్థాలు తీసుకోవడం గర్భిణీ స్త్రీలకు ఎంతో ముఖ్యం. ◆నిశ్శబ్ద.