తెలంగాణా రాస్త్ర సమితి పార్లమెంట్ సభ్యురాలు విజయశాంతి ఏ పని చేసినా వెనుకా ముందూ ఆలోచించదు. తనకు తోచిందే చేస్తానంటుంది. తెలంగాణా జాయింట్ యాక్షన్ కమిటీ చైర్మన్ ప్రొఫెసర్ కోదండరామ్ పరకాలలో టి.ఆర్.ఎస్. అభ్యర్థికి మద్దతు ప్రకటించిన వెంటనే బిజెపిని పరకాల ఉప ఎన్నికల పోతీలోనుంచి తప్పుకోమని అల్టిమేటం జారీ చేసేసింది. అంతటితో ఆగిందా? ఇంకాస్త ముందుకు వెళ్ళి తెలంగాణా ఇస్తాం ... తెస్తామనే బిజెపికి చిత్తశుద్ధి ఉంటే టి.జె.ఎ.సి. నిర్ణయానికి మద్దతు ఇవ్వాలని పేర్కొంది. ఇంకో కొసమెరుపుగా టి.జె.ఎ.సి. మద్దతు ఇచ్చినందున టి.ఆర్.ఎస్. అభ్యర్థి మొలుగూరి భిక్షపతి గెలిచినట్లే అని ప్రకటించింది. దీంతో వెంటనే స్పందించిన బిజెపి తము కోదండరామ్ ప్రకటించిన అశాస్త్రీయమైన సర్వేలు నమ్మబోమనీ, ప్రత్యేక తెలంగాణాపై తాము అనేక సంవత్సరాల క్రితమే కాకినాడలో తీర్మానం చేసిన విషయం గతంలో బిజెపిలో ఉన్న విజయశాంతికే తెలుసునని ప్రకటించింది. కవ్వింపుచర్యల వల్ల ఉపయోగం లేదనీ, ఓటరు వేసే ఓట్లే విజయానికి ప్రాతిపదిక అని హితవు పలికింది. విజయశాంతి తన నోరును అదుపులో పెట్టుకోకపోతే పరకాలలో తమ కార్యకర్తలు ఆమెను అడుగడుగునా అడ్డుకుంటారని కమలనాథులు హెచ్చరిస్తున్నారు.