భవిష్యత్తు ఏపీ ఎలా ఉండబోతోంది.. సీఎం  చంద్రబాబుతో జర్నలిస్ట్ పాల్కి శర్మ ముఖాముఖి.!

సాంకేతిక రంగంలో భవిష్యత్తును ముందుగానే అంచనా వేసి, అందుకు అనుగుణంగా నిర్ణయాలు తీసుకునే నాయకుడిగా ముఖ్యమంత్రి చంద్రబాబు నాయుడు గుర్తింపు పొందారు. దశాబ్దాల క్రితమే కంప్యూటర్లు, ఐటీ రంగం ప్రాధాన్యతను గుర్తించి, ఉమ్మడి ఆంధ్రప్రదేశ్‌లో సాంకేతిక విప్లవానికి బాటలు వేశారు. అప్పట్లో ఆయన ఆలోచనలను కొందరు పెద్దగా పట్టించుకోకపోయినా.. కాలక్రమంలో ఐటీ రంగం సాధించిన ప్రగతి ఆ విజన్ ప్రాధాన్యతను చాటిచెప్పింది.

తాజాగా విశాఖపట్నంలో జరిగిన సీఐఐ భాగస్వామ్య సదస్సు–2026 సందర్భంగా ప్రముఖ జర్నలిస్ట్ పాల్కి శర్మతో జరిగిన ప్రత్యేక ముఖాముఖిలో ముఖ్యమంత్రి పలు కీలక అంశాలపై తన అభిప్రాయాలను వెల్లడించారు. యువత ఎదుర్కొంటున్న నిరుద్యోగ సమస్య, సంపద అసమానతలు, పేదరిక నిర్మూలన, అమరావతి నిర్మాణం, క్వాంటమ్ టెక్నాలజీతో పాటు భవిష్యత్తు సవాళ్లపై తన ఆలోచనలను వివరించారు.

నిరుద్యోగ సమస్యకు నైపుణ్యాభివృద్ధే పరిష్కారం.!

దేశంలో ఆర్థిక వృద్ధి వేగంగా కొనసాగుతున్నప్పటికీ.. లక్షలాది మంది యువతకు తగిన ఉద్యోగాలు లభించకపోవడం ఆందోళన కలిగించే అంశం. ఇంజనీరింగ్, ఉన్నత విద్య పూర్తి చేసినా పరిశ్రమల అవసరాలకు అనుగుణమైన నైపుణ్యాలు లేకపోవడంతో చాలామంది ఉపాధి కోసం ఎదురుచూడాల్సి వస్తోంది. ఈ పరిస్థితిని మార్చాలంటే విద్యా విధానాన్ని ఉద్యోగ, ఉపాధి అవకాశాలకు అనుగుణంగా తీర్చిదిద్దాలని చంద్రబాబు అభిప్రాయపడ్డారు. కేవలం డిగ్రీలు అందించడం కాకుండా, యువతలో నైపుణ్యాలను పెంపొందించడం ద్వారా వారిని ఉద్యోగాలకు, స్వయం ఉపాధికి సిద్ధం చేయాలని సూచించారు.

సంపద సృష్టితో పాటు సమాన అవకాశాలు.!

సమాజంలో ఒకవైపు సంపన్నులు మరింత సంపన్నులవుతుండగా.. మరోవైపు పేదలు, రైతులు, సామాన్య ప్రజలు అనేక ఆర్థిక ఇబ్బందులు ఎదుర్కొంటున్నారని చంద్రబాబు పేర్కొన్నారు. సంపద సృష్టి ఎంత ముఖ్యమో.. ఆ సంపద ఫలాలు సమాజంలోని చివరి వ్యక్తికి చేరడం కూడా అంతే ముఖ్యమని స్పష్టం చేశారు. ఆర్థిక అసమానతలు పెరిగితే సామాజిక అసంతృప్తి, అశాంతి తలెత్తే ప్రమాదం ఉందని హెచ్చరించారు. ఐరోపా దేశాల్లో చోటుచేసుకుంటున్న నిరసనలు, ఆందోళనలను ఈ సందర్భంగా ప్రస్తావించారు.

పేదరిక నిర్మూలనకు పీ-4 మోడల్.!

సమాజంలోని ఆర్థిక అసమానతలను తగ్గించి, పేదరికాన్ని నిర్మూలించేందుకు చంద్రబాబు ప్రతిపాదిస్తున్న విధానం పీ-4 (Public, Private, People's Partnership). ప్రభుత్వం, ప్రైవేట్ సంస్థలతో పాటు ప్రజలను కూడా భాగస్వాములను చేయడమే ఈ విధానం ప్రధాన ఉద్దేశం. ఆర్థికంగా స్థిరపడిన ప్రతి ఒక్కరూ కనీసం పది పేద కుటుంబాలకు అండగా నిలవాలని ఆయన పిలుపునిచ్చారు.

ఇది కూడా చదవండి: సజ్జనార్‌ యూనిఫామ్‌లో ఉన్న క్రిమినల్..సీబీఐ మాజీ డైరెక్టర్ సంచలన వ్యాఖ్యలు.!

ప్రభుత్వం అందించే సంక్షేమ పథకాలతో పాటు సమాజంలోని సంపన్నులు, స్వచ్ఛంద సంస్థలు పేద కుటుంబాల అభ్యున్నతికి సహకరిస్తే పేదరిక నిర్మూలన మరింత వేగవంతమవుతుందని ఆయన భావిస్తున్నారు. ఈ విధానం ద్వారా పేద కుటుంబాలకు ఆర్థిక భరోసా కల్పించడంతో పాటు వారి జీవన ప్రమాణాలను మెరుగుపరచవచ్చని చెబుతున్నారు.

సంక్షేమంతో సామాన్యులకు భరోసా.!

ఆంధ్రప్రదేశ్‌లో అమలవుతున్న సంక్షేమ కార్యక్రమాలను కూడా చంద్రబాబు ప్రస్తావించారు. వృద్ధులు, దివ్యాంగులకు పింఛన్లు, మహిళలకు ఉచిత బస్సు ప్రయాణం, ఉచిత గ్యాస్ సిలిండర్లు, విద్యార్థుల తల్లులకు ఆర్థిక సాయం వంటి కార్యక్రమాల ద్వారా సామాన్య కుటుంబాలకు ప్రభుత్వం అండగా నిలుస్తోందని వివరించారు. అభివృద్ధి, సంక్షేమం రెండింటికీ సమాన ప్రాధాన్యత ఇవ్వాల్సిన అవసరాన్ని ఆయన నొక్కిచెప్పారు.

అమరావతి.. క్వాంటమ్ టెక్నాలజీకి కేంద్రంగా.!

భవిష్యత్తులో ఆంధ్రప్రదేశ్‌ను సాంకేతిక రంగంలో అగ్రగామిగా నిలబెట్టడమే లక్ష్యంగా ప్రభుత్వం ప్రణాళికలు రూపొందిస్తోందని చంద్రబాబు తెలిపారు. అమరావతి రాజధాని నిర్మాణంతో పాటు విశాఖపట్నంలో డేటా సెంటర్ల అభివృద్ధికి ప్రాధాన్యత ఇస్తున్నట్లు చెప్పారు. అమరావతిలో దేశంలోనే తొలి క్వాంటమ్ కంప్యూటర్‌ను అందుబాటులోకి తీసుకురావాలనే లక్ష్యాన్ని కూడా వెల్లడించారు.

అయితే రాజధాని అంటే కేవలం భారీ భవనాలు, రోడ్ల నిర్మాణం మాత్రమే కాదని.. పచ్చదనం, పర్యావరణ పరిరక్షణ, జీరో పొల్యూషన్ లక్ష్యాలు, అత్యాధునిక మౌలిక సదుపాయాలతో కూడిన నగరంగా అమరావతిని తీర్చిదిద్దాలన్నదే తమ ఆలోచనగా వివరించారు.

మొత్తంగా చంద్రబాబు పాల్కి శర్మతో జరిపిన ముఖాముఖిలో సాంకేతిక అభివృద్ధి నుంచి సామాజిక సమానత్వం వరకు అనేక అంశాలు ప్రస్తావనకు వచ్చాయి. సంపద సృష్టి, ఉపాధి కల్పన, సంక్షేమం, పేదరిక నిర్మూలనలను సమన్వయం చేస్తూ భవిష్యత్తు ఆంధ్రప్రదేశ్‌ను నిర్మించాలన్న లక్ష్యం ఈ చర్చలో స్పష్టమైంది.

మీకు నచ్చవచ్చు: 1999లోనే చంద్రబాబు ముందుచూపు.. నేడు రూ.75 వేల కోట్ల ఆదాయం: గ్రాంధి మల్లికార్జున రావు 

మీకు నచ్చవచ్చు:  సీఐఐ సదస్సు: తొలి రోజు ఎంవోయూల విలువెంతో తెలుసా.?

[ Palki Sharma Interview, CM Chandrababu, CII Partnership Summit 2026, Amaravati Development, P4 Model, Quantum Computing ]