తెలంగాణా జాయింట్ యాక్షన్ కమిటీ చైర్మన్ ప్రొఫెసర్ కోదండరామ్ కు బిజెపి మద్దతు లభించింది. ప్రస్తుతం ప్రొఫెసర్ కోదండరామ్ కు టి.ఆర్,ఎస్, అధినేత కేసీఆర్ కు మధ్య ప్రచ్చన్నయుద్ధం జరుగుతోంది. ప్రొఫెసర్ కోదండరామ్ ను జె.ఎ.సి. చైర్మన్ పదవి నుంచి తప్పించాలని కేసీఆర్ ప్రయత్నిస్తున్నారు. ప్రొఫెసర్ కోదండరామ్ తన మాట వినకుండా స్వతంత్ర నిర్ణయాలు తీసుకుంటున్నారన్న అక్కసును కేసీఆర్ వెళ్లగక్కుతున్నారు. జాయింట్ యాక్షన్ కమిటీని తానే ఏర్పాటు చేశానని, కోదండరామ్ ను కూడా తానే నియమించానని, ఇప్పుడు కోదండరామ్ తననే దిక్కరిస్తున్నరనే భావనతో కేసీఆర్ ఉన్నారు. అయితే కేసీఆర్ వైఖరిని బిజెపి నాయకులు తప్పుపడుతున్నారు.

జె.ఎ.సి. నుంచి కోదండరామ్ ను తొలగించే ప్రయత్నాలు మానుకోవాలని బిజెపి రాష్ట్ర ఉపాధ్యక్షుడు రామకృష్ణారెడ్డి అన్నారు. తెలంగాణా జె.ఎ.సి. టి.ఆర్.ఎస్. ఏర్పాటు చేయలేదని, జె.ఎ.సి. టి.ఆర్.ఎస్. కు జేబు సంస్థ కాదని ఆయన అన్నారు. సకలజనుల సమ్మె ఉధృతంగా సాగుతున్న సమయంలో కేసీఆర్ ఢిల్లీ వెళ్ళి సమ్మెను నీరుగార్చారని ఆయన విమర్శించారు. ఈ విషయమై కేసీఆర్ ను నిలదీసినందుకే కోదండరామ్ ను తప్పించాలని ప్రయత్నిస్తున్నారని రామకృష్ణారెడ్డి అంటున్నారు.