తెలంగాణ రాష్ట్రంలో నెలకొన్న దుర్భిక్ష పరిస్థితులు, వర్షాభావ పరిస్థితులపై తెలంగాణ రక్షణ సేన  పార్టీ అధ్యక్షురాలు కల్వకుంట్ల కవిత తీవ్ర ఆవేదన వ్యక్తం చేశారు. రాష్ట్రవ్యాప్తంగా అలుముకున్న కరవు ఛాయలు హృదయాన్ని కలచివేస్తున్నాయని ఆమె ఆందోళన వ్యక్తం చేశారు. గత కొన్ని నెలలుగా సరిగా వర్షాలు కురవకపోవడంతో అన్నదాతలు తీవ్ర ఇబ్బందులను ఎదుర్కొంటున్నారని కవిత పేర్కొన్నారు. సరైన వర్షపాతం నమోదు కాకపోవడం వల్ల రాష్ట్రంలోని పలు ప్రాంతాల్లో భూగర్భ జలాలు గణనీయంగా పడిపోయాయని, దీనివల్ల వేలాది ఎకరాల్లో పంటలు ఎండిపోయే ప్రమాదం ఏర్పడిందని తెలిపారు.

ప్రభుత్వం ఇప్పటికైనా స్పందించి రాష్ట్రంలో తక్షణమే కరువు మండలాలను ప్రకటించాలని ఆమె డిమాండ్ చేశారు. పొరుగున ఉన్న మహారాష్ట్ర, కర్ణాటక, ఆంధ్రప్రదేశ్ తదితర రాష్ట్రాలు ఇప్పటికే కరువు మండలాలు ప్రకటించి కేంద్ర సహాయం కోసం చర్యలు తీసుకుంటుంటే, ఇక్కడ మాత్రం ఎలాంటి నిర్ణయాలు తీసుకోకపోవడం ప్రభుత్వ నిర్లక్ష్యానికి నిదర్శనమని విమర్శించారు.

వ్యవసాయ రంగం సంక్షోభంలో కూరుకుపోతున్నప్పటికీ అధికార యంత్రాంగం  మంత్రులు కనీస సమీక్షా సమావేశాలు కూడా నిర్వహించలేదని కవిత తప్పుబట్టారు. కేవలం పూజలు మరియు యాగాలకే పరిమితమైతే ప్రజల సమస్యలు పరిష్కారం కావని ప్రభుత్వాన్ని ఎద్దేవా చేశారు. పంటలను కాపాడుకోవడానికి రైతులకు నిరంతరం విద్యుత్ అందించాల్సిన బాధ్యత ప్రభుత్వంపై ఉందని ఆమె స్పష్టం చేశారు. కానీ క్షేత్రస్థాయిలో సరైన విద్యుత్ సరఫరా లేకపోవడంతో బోర్ల కింద ఉన్న పంటలు కూడా ఎండిపోయే దుస్థితి నెలకొందని తెలిపారు.

ఇలాంటి విపత్కర పరిస్థితులలో కేంద్ర ప్రభుత్వం కూడా జోక్యం చేసుకుని దక్షిణ భారతదేశంలోని కరవు పీడిత రాష్ట్రాలను ప్రత్యేకంగా ఆదుకోవాలని కవిత విజ్ఞప్తి చేశారు. లేనియెడల గ్రామీణ ఆర్థిక వ్యవస్థ పూర్తిగా కుప్పకూలి రైతులు సర్వస్వం కోల్పోయే ప్రమాదం ఉందని హెచ్చరించారు. ప్రభుత్వం ఇప్పటికైనా మొద్దునిద్ర వీడి ప్రత్యేక మంత్రివర్గ సమావేశాన్ని ఏర్పాటు చేయాలని, రాష్ట్రంలో రైతులు ఎదుర్కొంటున్న సమస్యలపై సమగ్ర కార్యాచరణను రూపొందించాలని ఆమె డిమాండ్ చేశారు. అన్నదాతలను కాపాడేందుకు ప్రతి ఒక్కరూ బాధ్యతగా వ్యవహరించాలని పిలుపునిచ్చారు.

[ Telangana drought, Kalvakuntla Kavitha, Telangana  government, farmer problems, drought mandals, CM Revanth reddy, Telugu One, Telugu News ]