ఫీజు రీయింబర్స్‌మెంట్ బకాయిలు వెంటనే చెల్లించాలని డిమాండ్ చేస్తూ తెలంగాణ బీజేపీ అధ్యక్షుడు ఎన్. రాంచందర్ రావు చేపట్టిన నిరాహార దీక్షను మంగళవారం విరమించారు. రాజ్యసభ సభ్యులు డాక్టర్ కె. లక్ష్మణ్, నిమ్మరసం ఇచ్చి రాంచందర్ రావు చేత ఈ పోరాట దీక్షను ముగించేలా చేశారు.

"ఫీజు బకాయి - బీజేపీ లడాయి" పేరిట హైదరాబాద్‌లోని నాంపల్లి బీజేపీ రాష్ట్ర కార్యాలయంలో ఈ దీక్ష కొనసాగింది. రాష్ట్రంలో పేరుకుపోయిన రూ. 15 వేల కోట్ల ఫీజు రీయింబర్స్‌మెంట్ నిధులను కాంగ్రెస్ ప్రభుత్వం తక్షణమే విడుదల చేయాలని ఈ సందర్భంగా బీజేపీ నాయకత్వం బలంగా డిమాండ్ చేసింది. దీక్షా వేదికపై పలువురు ప్రజాప్రతినిధులు, పార్టీ ముఖ్య నేతలు పాల్గొని తమ మద్దతు తెలిపారు.

రాష్ట్ర ప్రభుత్వం నిధుల విడుదలలో తీవ్ర అలసత్వం వహిస్తుండటంతో విద్యార్థుల భవిష్యత్తు అంధకారంలో పడుతోందని రాంచందర్ రావు ఆరోపించారు. ప్రభుత్వ వైఖరి కారణంగా కళాశాలల యాజమాన్యాలు విద్యార్థులకు సంబంధించిన సర్టిఫికెట్లను నిలిపివేస్తున్నాయని, దీంతో వేలాది మంది ఉన్నత విద్యకు, ఉద్యోగ అవకాశాలకు దూరమవుతున్నారని ఆయన ఆవేదన వ్యక్తం చేశారు.

గత బీఆర్‌ఎస్ ప్రభుత్వ హయాంలో నిలిచిపోయిన బకాయిలతో పాటు ప్రస్తుత కాంగ్రెస్ పాలనలో కూడా సమస్య పరిష్కారం కాకపోవడం పట్ల బీజేపీ ఆందోళన వ్యక్తంచేసింది. దాదాపు 40 లక్షల మంది విద్యార్థుల జీవితాలతో ఆడుకోవడం తగదని, ఇచ్చిన హామీలను నెరవేర్చడంలో రేవంత్ రెడ్డి సర్కార్ విఫలమైందని నేతలు విమర్శించారు.

ఈ పోరాటానికి విద్యార్థి సంఘాలు, వివిధ కాలేజీల యాజమాన్యాలు, న్యాయవాద సంఘాల ప్రతినిధులు సైతం సంఘీభావం తెలిపారు. దీక్షా స్థలి వద్దకు పెద్ద సంఖ్యలో తరలివచ్చిన విద్యార్థులు, యజమానులు తమ ఇబ్బందులను రాంచందర్ రావు దృష్టికి తీసుకెళ్లారు. మరోవైపు ఈ దీక్షపై స్పందించిన అధికార కాంగ్రెస్ వర్గాలు, పాత బకాయిలను విడతలవారీగా తీరుస్తున్నామని, దీక్షల పేరుతో రాజకీయాలు చేయడం సరికాదని వ్యాఖ్యానించాయి.

రాష్ట్రవ్యాప్తంగా విద్యార్థులు ఎదుర్కొంటున్న ఈ క్లిష్టమైన సమస్యపై ప్రభుత్వం తక్షణమే స్పందించి నిధులు విడుదల చేయకపోతే, భారతీయ జనతా యువమోర్చా (బిజెవైఎం) ఆధ్వర్యంలో పోరాటాన్ని మరింత ఉధృతం చేస్తామని పార్టీ వర్గాలు స్పష్టం చేశాయి.

Fee dues BJPs fight, BJP state chief Ramchandra Rao, MP K. Lakshman, BJYM,  BJP State Office Nampally, Fee Reimbursement Dues, Hyderabad Hunger Strike