హైదరాబాద్ మార్కెట్ కమిటీ డైరెక్టర్ బుడ్డ సత్యనారాయణను హత్య చేసేందుకు కుట్ర జరిగిందన్న ఆరోపణలు కలకలం రేపుతున్నాయి. ఈ రోజు ఉదయం మన్సూరాబాద్‌లో సత్యనారాయణ నిర్వహిస్తున్న రేషన్ షాప్ వద్ద నలుగురు యువకులు అనుమానాస్పదంగా గంటసేపు తిరుగుతూ కనిపించారు. యువకుల కదలికలపై అనుమానం వచ్చిన స్థానికులు వారిని పట్టుకునేందుకు ప్రయత్నించగా, ముగ్గురు అక్కడి నుంచి పరారయ్యారు. మరో యువకుడిని స్థానికులు పట్టుకుని పోలీసులకు అప్పగించారు. పట్టుబడిన యువకుడు తన పేరు గార్లపాటి అరవింద్ రెడ్డిగా పోలీసులకు చెప్పాడు. అంతేకాకుండా అరవింద్ రెడ్డిపోలీసుల ఎదుట కీలక విషయాలు వెల్లడించాడు. యూత్ కాంగ్రెస్ రాష్ట్ర అధ్యక్షుడు జక్కిడి శివచరణ్ రెడ్డి పంపించడంతోనే తాము సత్యనారాయణపై రెక్కీ నిర్వహించేందుకు వచ్చినట్లు అతను చెప్పాడు. 

అయితే ఈ ఆరోపణలను పోలీసులు పూర్తిస్థాయిలో దర్యాప్తు కొనసాగిస్తున్నారు.. ఇదిలా ఉండగా మరోవైపు గత కొంతకాలంగా బుడ్డ సత్యనారాయణకు జక్కిడి శివచరణ్ రెడ్డి, ఆయన తండ్రి ప్రభాకర్ రెడ్డితో వివాదం కొనసాగుతున్నది. ప్రభాకర్ రెడ్డిపై సత్యనారాయణ ఎస్సీ, ఎస్టీ అట్రాసిటీ కేసు పెట్టాడు. ఈ నేపథ్యంలో ఇరువర్గాల మధ్య విభేదాలు మరింత ముదిరాయి. సత్యనారాయణపై ఆగ్రహంతో ఉన్న శివచరణ్ రెడ్డి, ప్రభాకర్ రెడ్డిలే ఈ రెక్కీ వెనుక ఉన్నారన్న అనుమానాలు వ్యక్తమవుతున్నాయి. నలుగురు యువకులు సత్యనారాయణ రేషన్ షాప్ వద్దకు వచ్చి.. అతని కదలికలను గమనించడం, వారిలో ఒకరు పట్టుబడటంతో ఈ వ్యవహారం వెలుగులోకి వచ్చింది.

ఈ ఘటనపై బుడ్డ సత్యనారాయణ ఎల్బీనగర్ పోలీస్ స్టేషన్‌లో ఫిర్యాదు చేశారు. తనకు ప్రాణహాని ఉందని, తనపై హత్యకు కుట్ర జరిగిందని ఆరోపిస్తూ జక్కిడి శివచరణ్ రెడ్డి, ప్రభాకర్ రెడ్డిలపై చర్యలు తీసుకోవాలని ఆయన పోలీసులను కోరారు. ఈ వ్యవహారంపై స్పందించిన గిరిజన సంఘాల నాయకులు... జక్కిడి శివచరణ్ రెడ్డి, ప్రభాకర్ రెడ్డిలను వెంటనే అరెస్టు చేసి సమగ్ర దర్యాప్తు చేయాలని డిమాండ్ చేశారు. హత్య కుట్ర ఆరోపణలు ఎదుర్కొంటున్న శివచరణ్ రెడ్డిని కాంగ్రెస్ పార్టీ నుంచి సస్పెండ్ చేయాలని కూడా వారు కోరారు. అయితే ఈ ఘటనకు సంబంధించి పోలీసుల దర్యాప్తులో వాస్తవాలు వెలుగులోకి రావాల్సి ఉంది. పట్టుబడిన యువకుడి వాంగ్మూలం, రెక్కీకి వచ్చిన నలుగురు యువకుల వెనుక ఉన్న వ్యక్తులు, హత్యకు సంబంధించిన కుట్ర నిజంగా జరిగిందా అనే అంశాలపై పోలీసులు దర్యాప్తు చేస్తున్నారు.

Market Committee Director  Budda Satyanarayana, Jakkidi Shivacharan Reddy, Jakkidi Prabhakar Reddy, Congress party, CM Revanth reddy