ఆంధ్రప్రదేశ్ రాజకీయంలోనూ, స్థానిక పరిపాలనా వ్యవస్థలోనూ   కీలక  మార్పులకు శ్రీకారం చుడుతూ రాష్ట్ర ప్రభుత్వం తీసుకొచ్చిన సవరణ చట్టాలకు గవర్నర్ ఆమోదముద్ర వేశారు.   రాష్ట్రంలో పురపాలక, పంచాయతీ రాజ్ చట్టాల్లో సవరణలు చేస్తూ రూపొందించిన బిల్లులపై గౌరవ గవర్నర్ జస్టిస్ ఎస్. అబ్దుల్ నజీర్ సంతకం చేశారు. గవర్నర్ ఆమోదముద్ర పడటంతో ఈ నూతన సంస్కరణలు  అమలులోకి వచ్చాయి. రానున్న స్థానిక సంస్థల ఎన్నికలను పూర్తిగా నూతన విధానంలో నిర్వహించేందుకు మార్గం సుగమమైంది.

గవర్నర్ ఆమోదం పొందిన మున్సిపల్ చట్ట సవరణ ప్రకారం.. ఇకపై రాష్ట్రంలోని కార్పొరేషన్ మేయర్లు, పురపాలక సంఘాల ఛైర్‌పర్సన్లను ప్రజలే నేరుగా ఎన్నుకోనున్నారు. ఇప్పటివరకు అమల్లో ఉన్న పరోక్ష ఎన్నికల విధానానికి స్వస్తి పలుకుతూ, వార్డు కౌన్సిలర్లు లేదా కార్పొరేటర్లతో సంబంధం లేకుండా ఓటర్లే స్వయంగా తమ పురపాలక నాయకుడిని ఎన్నుకునేలా ప్రత్యక్ష ఎన్నికల పద్ధతిని పునరుద్ధరించారు. ఈ నిర్ణయంతో స్థానిక సంస్థలలో నాయకత్వ ఎన్నిక ప్రక్రియ  పారదర్శకంగా మారడమే కాకుండా, రాజకీయ వ్యూహాలు, క్యాంప్ రాజకీయాలకు అడ్డుకట్ట పడుతుందని భావిస్తున్నారు.

మరోవైపు పంచాయతీ రాజ్ చట్టంలో కూడా ప్రభుత్వం మార్పులు తీసుకొచ్చింది. ఇందులో భాగంగా మున్సిపల్ కార్పొరేషన్లు, మున్సిపాలిటీలలో గతంలో ఉన్న రెండు డిప్యూటీ మేయర్, రెండు వైస్ ఛైర్‌పర్సన్ పదవుల సంఖ్యను ఒక్కదానికి కుదించారు. పాలనా వ్యయాన్ని తగ్గించడంతో పాటు పదవుల కేటాయింపులో స్పష్టత తీసుకురావడానికి ఈ నిర్ణయం తోడ్పడుతుందని భావిస్తున్నారు. దీనితో పాటు రాష్ట్రంలో జిల్లాల పునర్వ్యవస్థీకరణకు అనుగుణంగా జిల్లా పరిషత్‌ల సంఖ్యను పెంచేందుకు చట్టసవరణ చేశారు. గతంలో 13గా ఉన్న జిల్లా పరిషత్‌లను ఇప్పుడు 28 జెడ్పీలుగా విస్తరిస్తూ నిర్ణయం తీసుకున్నారు.

జిల్లాల సంఖ్య పెరిగినప్పటికీ జిల్లా పరిషత్ బోర్డుల విభజన సరిగ్గా జరగకపోవడం వల్ల ఎదురవుతున్న పాలనాపరమైన ఇబ్బందులను తొలగించడమే లక్ష్యంగా  28 జెడ్పీల ఏర్పాటు నిర్ణయం సాగింది. కొత్తగా ఏర్పడిన జిల్లాలకు వేర్వేరుగా జిల్లా పరిషత్‌లు ప్రాతినిధ్యం వహించడం వల్ల  గ్రామీణాభివృద్ధి వేగవంతమవుతుందని అంచనా వేస్తున్నారు. జిల్లా పరిషత్ ఛైర్మన్ల ఎన్నిక కూడా ప్రత్యక్ష పద్ధతిలోనే జరిగేలా కొత్త చట్టంలో స్పష్టమైన నిబంధనలను పొందుపరిచారు.

{AP Local Body Elections, Governor Abdul Nazeer Municipal Act Amendment, Direct Mayor Elections AP, AP Panchayat Raj Act Amendment, 28 Zilla Parishads Andhra Pradesh}