ఇది నా దేశం

ఇది నా దేశం   ఒంటిపై కప్పుకోడానికి బట్టల్లేక చలికి వణికే అనాధ పిల్లలు ఒంటిపైనున్న బట్టలు ఏ మానవ మృగం లాగుతుందోనన్న భయంతో ఆడపిల్లలు  ఆహరం లేక, ఆక్సిజన్ అందక చనిపోయేవాళ్లు కొందరు ఆహరం, ఆక్సిజన్ తో వ్యాపారం చేస్తూ బ్రతికేవాళ్లు కొందరు  మానవత్వాన్ని మరిచి సాటి మనిషికి సాయం చేయని మనుషులు మతం మత్తులో, కులం కుళ్ళులో మనిషిగా బ్రతకడం మరచిన మనుషులు  ఇది నా దేశం దేశ గౌరవాన్ని మువ్వన్నెల జెండాకి పరిమితం చేసిన ప్రదేశం  ఇది నా దేశం మంచితనం, మానవత్వమని మాటలు చెప్పడంలో ముందున్నాం ఆచరణలో వెనక పడుతున్నాం  ఇది నా దేశం "నా ఉచ్వాస నిశ్వాసలు జాతీయ జెండా రెపరెపలు నా హృదయ స్పందన జనగణమన" అని ఘనంగా చెప్పుకుందాం అంతకన్నా ముందు మనిషిగా బ్రతకడం నేర్చుకుందాం దేశ గౌరవాన్ని నిలబెడదాం.  -గంగసాని

కలలు రాలే కాలం

కలలు రాలే కాలం   కలలు రాలే కాలం జీవితంలో ఎదురవుతుందప్పడప్పడు శాశ్వతంగా ఏదుండదు ఎవరెస్ట్ నుండి జారిపడిన మళ్ళీ మరో కలకై  అడుగేయాల్సిందే అందుకునేవరకు ఆశతో.... సి. శేఖర్(సియస్సార్)  

స్వేచ్ఛ

స్వేచ్ఛ ఇరుకు గదుల్లో ఇమిడిపోయిన ఓ పరుగెత్తే జీవపరికరమా నవశకాన్ని నాలుగు పాదాలపై నడిపే ఓ నవచైతన్యమా ఆ బానిస సంకెళ్ళను తెంచుకొని ‘స్వేచ్ఛ’గా ఎగిరిపో ఎక్కడికని అడగకు... ఎవరినీ అడుగకు.. కృత్రిమ నవ్వులతో లేని అపోహాలతో ఆగిపోకు నవీనంతో వెనుకపడిపోతున్న ఓ సంప్రదాయమా వెల్లకిలా అడ్డం పడుకున్నా ఎవరూ ఆగరూ వెక్కివెక్కి ఏడ్చినా ఎవరూ పట్టించుకోరు నువ్వు నిమిత్తం నీ బ్రతుకు సమాజానికి అంకితం ఇంతే ఈ నిశ్శబ్ధం ఇదియే నీ జీవితం   -Malleshailu  

మంచుదుప్పటి

మంచుదుప్పటి కాలచక్ర ప్రవాహంలో సూరీడు మంచుముద్దలా ఉదయిస్తున్నడు మంచుతెరలను చీల్చుతూ తొలి వేకువలో  పండు ముసలిలా మేలుకుంటున్నడు ప్రకృతి కప్పిన మంచుపొత్తిళ్ళలోంచి పసిబాలుడై భానుడు కళ్ళుతెరచి ఒళ్ళు విరుచుకుంటూ మంచు చీకట్లను తరిమేందుకు బుడిబుడి అడుగులతో తడబడుతున్నడు పుడమినంతా పరచుకున్న మంచుపారావారాన్ని పారద్రోలేందుకు ఇనుడు  కాంతికిరణాలతో దండెత్తుతున్నడు ప్రకృతికాంత చలికి వణుకుతూ అణువణువునా తుహినకిరణాలతో అలంకరించుకుని  గజగజలాడుతూ భానోదయానికై వేచియున్న అభిసారికలా.....     సి. శేఖర్(సియస్సార్)  

వీరుడా సలాం!!

వీరుడా సలాం!!   ముష్కరులు సృష్టించే రణరంగంలో  ఎదురొడ్డి నిలబడే తెగువ  లోకంలో ఎక్కడెతికినా కనబడదు దేశం నీ రక్షణలో వెలిగే దీపం ఆరిపోకుండా అహర్నిశలు నీవు తనువడ్డుపెట్టీ క్షణం క్షణం కాపాడుతున్న కంచెవైనవు నీ గుండెధైర్యం ఎగిరేజెండా రెపరెపలలో కనిపిస్తుంది అమ్మ నాన్నలు ఆలుబిడ్డలు బందుమిత్రులు అందరూ నీకు నీ దేశమే  యుద్దరంగంలో అడుగెట్టినపుడు సడలని సంకల్పంతో జాతిని కాపాడే పిరంగివై దూసుకెల్తావ్ అణుబాంబులకు సైతం ఎదురెల్లే బెదురులేని దేశగౌరవం నీవు తనువుమొత్తం తునాతునకలై మాంసపుముద్దలుగా ప్రాణాలర్పించినపుడు జెండాపై ఎగిసిపడే  అశోకచక్రం మీరౌతరు భరతమాత గర్భగుడిలో పరమవీరచక్రలు మీరే మీ వీరత్వం భరతజాతి చరగని చరిత్రలో చిరంజీవులెపుడు మీరే మీ సేవకు మేమెపుడు చేస్తాం సలాం సలాం   సి. శేఖర్(సియస్సార్)  

సంక్రాంతి స్పెషల్ కవిత

జనని జన్మభూమి

జనని జన్మభూమి   అమ్మ ఆలనాపాలనలో అమ్మ చెప్పే మంచి మాటలో అమ్మ ప్రేమకు రూపం అందమైన వివేకం ఎదుగుతున్న తరుణంలో అల్లరితనంతో నేస్తాలతో ఆడిన ఆటపాటలతో అలుపెరుగని చైతన్యం చిలిపితనంతో అల్లరి సృష్టించిన చదువునెపుడు తనమదిలో ముద్రించుకున్న జ్ఞాన తేజస్సు నరేంద్రుడి సొంతం ఆటల ప్రపంచం నుండి జ్ఞనలోకం చేరేపుడు పుస్తకాలను నేస్తాలుగా మలుచుకున్న జ్ఞాన సూర్యుడు గురువుతో నేర్చిన జ్ఞానం ఆద్యాత్మిక లోకం చూయించింది తనేంటో తెలుసుకుని అడుగెసిన యువకుడు సమాజంలో ప్రతిపరిస్థితినుండి ప్రతికూలతలకు పరిష్కారం వెదికిన వేదజ్ఞాని అమ్మనేర్పిన సంస్కారం అమెరికాను సైతం ఆశ్చర్యపరిచింది భారతీయుల ఖ్యాతి నలుదశలకు వెలిగింది యువతకు మేలుకొలుపు ఆయన చెప్పిన ప్రతిపలుకు నిర్లక్ష్యం తరిమేందుకు లక్ష్యం చేరేంతవరకు సి. శేఖర్(సియస్సార్)

తీరంలేని కాలినడక...

   తీరంలేని కాలినడక...   పడమటి దారులెంత దూరంగా ఉంటాయో తెలుసా ఎప్పటికీ అందుకోవాలనిపించనంత దూరంగా వెళితే తిరిగి రావాలనిపించనంత దూరంగా ఉషోదయాల్ని కోరుకోవటం మాత్రమే బావుంటుంది ఆ కోరుకోవటం మానేసాక గుడ్డిదీపాల్ని వెలిగించటం మరెవరూ నేర్పరు..అసలక్కర్లేదేమో పైరగాలి పెదవంచున నిశ్శబ్ధాలు తీరం లేని కాలినడకలు మన్ను తాకిన మిన్నుల్లో కాయితప్పడవలు ఇక మరెన్ని నోస్టాల్జియాలు నిన్ను మాత్రమే మిగిల్చినపుడు నవ్వుకో ఏడుపుకో కాసేపు నిన్ను నువ్వు అరువిచ్చేసి మళ్ళీ తిరిగొచ్చెయ్ శూన్యం మాత్రమే దోసిట్లో ఒలకబోస్తున్న దారుల్లోకి అసలేమీ వినిపించనంత ఇంకేమీ కనిపించనంత నీలోకి ప్రేమించబడాలనే ఆశలేమీ లేనపుడు ప్రేమించటం మాత్రమే నేర్చుకున్న నీలోకి -సరిత భూపతి

చెలి దూరమాయే

చెలి దూరమాయే   చెలిమి చేసిన చెలి దూరమాయే కలలోని రూపం కనుమరుగాయే గడచిన కాలం గుణపాఠమాయే గడవనున్న కాలం భారమాయే. -నవీన్

ఎవరికి వారు

ఎవరికి వారు     ఎవరిని అడగాలి ఆ ఎవరెస్టు ఎంత పాతది... ఆ పడమటి కనుమలు ఎంత పాతవి... ఆకాశంలోని తారలు ఎప్పటివి... ఎవరికి వారు ఇలానే ఆలోచిస్తారా.. లేక ఎవరి పనుల్లో వారు నిమగ్నులైపోయారా.. ఎవరికి వారు ఏమీ కారు ఎవరి దేహం వారిదే కాల్చాక ఎవరి బూడిద వారిదే ఉన్నప్పుడు ఎవరికి వారు... లేనప్పుడు ఎవరికి వారు... ఎవరున్నారు ఈ లోకంలో ఎవరికి ఎవరు ఏమవుతారు ఈలోకంలో ఏది శాశ్వతం కాదు అనుకుంటూనే ఎవరికి వారు బ్రతికే సమాజంలో ఎవరో ఒకరు ఎప్పుడో అప్పుడు మునుముందు తరాల భవిష్యత్తుకు పోరాడుతూనే ఉంటారు పోరా అని తిడుతూనే ఉంటారు... ఐనా... ఇవన్నీ మనకెందుకు... ఇవేవి మనకు పట్టవు... మనకు మనం కూడా ఏమీ కాము... ఎందుకంటే ఎవరికి వారు కదా...   - -Malleshailu

పక్షులు

పక్షులు   చిన్నతనంలో నన్ను మేల్కొలిపే కిలకిలా రవాలు  లేవిపుడు ఇంటిలో తనకోగూడును నిర్మించుకుని ఇల్లంతా సందడినింపేవి తన మిత్రు‌లనపుడపుడు పిలిపించుకుని తన ఇంటిని పరిచయం చేసి అల్లరిగా తిరిగేవి ఋతువులు మారినపుడల్లా తమకాలానికనుగుణంగా సుమధురంగా తమ గాత్రాలతో మమ్మల్ని సంతోషంగా లాలించేవి కలివిడితనంతో కలిసిమెలిసి ఉండేవి అంబరవీదుల్లో సుందరంగా పయనించేవి ఆ దృశ్యాలు ఎదలో ఇప్పటికి శాశ్వతంగా నిలిచాయి అనేకానేక ప్రకృతి రమణీయతలకు చిరునామా పక్షులు సాంకేతిక ఆలోచనలిపుడు కృత్రిమ చెట్లను, పువ్వులను పక్షులను చూస్తూ ఆనందించే  నవీన నాగరికత మానవుడు ఆనాడు ఎన్నో రాగాలు ఎన్నో అందాలు  ఈనాడు ఎంత మార్పు  పక్షులు కనరాని ప్రపంచం భద్రతలేని భవిష్యత్తు   సి. శేఖర్(సియస్సార్)  

మిగిలిపోయిన కథలు

మిగిలిపోయిన కథలు   మనసు పలకలేని రాగాలు అన్నీ పలకల మీద బలపాల్లా కరిగిపోతున్నాయి రాళ్ళు చూపలేని కళలు అన్నీ శిల్పాల మీద రంగుల్లా మిగిలిపోతున్నాయి కథలు అన్నీ మిగిలిపోయినవే కొన్ని పాతవి... మరి కొన్ని కొత్తవి... వాటి స్వరూపమే మారింది మిగిలిపోయే తత్వమైతే అలానే ఉంది చడీచప్పుడు లేని మామూలు జీవితం గడపాలనుకునేవారు కోట్లలో ఉంటారు కానీ సమాజం చేత ఏమీ చేయకుండా చేతకానివాళ్లలా మిగిలిపోయిన మనుషులెందరో మిగిలిపోయిన కథలెన్నో ఒకరి కథ నిద్రపుచ్చితే... మరో కథ నిద్రలో కూడా మనల్ని నిద్రపోనివ్వదు...     -Malleshailu

నువ్వే నా ప్రపంచం

నువ్వే నా ప్రపంచం     కాలం మారిపోయింది నాకు నీ మీదున్న ప్రేమ గతంగా మారిపోలేదు. ప్రపంచం పరుగెడుతుంది నేను నీ జ్ఞాపకాలతో అక్కడే ఉండిపోయాను. దూరం పెరిగిపోయింది నీకు దగ్గరవుతానన్న నమ్మకం దూరమవలేదు. కాలం మారినా, దూరం పెరిగినా నీ మీదున్న ప్రేమ పోదు నీ జ్ఞాపకాలు దూరం కావు. ఎందుకంటే ప్రపంచం.. నువ్వే నా ప్రపంచం నీకే నా జీవితం అంకితం.                                                                                                                                      గంగసాని

ఓ ఉదయం

ఓ ఉదయం   మేల్కొంటున్న కనులు విరబూస్తున్నా పూలు ఎగురుతున్న పక్షులు కల్లాపితో ముస్తాబవుతున్న వాకిళ్ళు ఇంటి పనుల్లో ఆడవాళ్ళు... మొదలైన ఉరుకులు పరుగులు శబ్ధాలు నిశ్శబ్దాలు వీధి అంతా కుక్కల అరుపులు.. వెలుగు నీడల దాగుడుమూతలు మనుషుల నడకలు వాహనాల మోతలు ... ముక్కలైన ఏకాంతం విస్తుపోతున్న ధ్యానమందిరం ప్రశాంతతను బయటకు గెంటేసిన మెదళ్లు.. ఇది ఓ ఉదయం నిన్నటిని నేటిని వేరు చేసిన ఉదయం పై పైకి అందాన్ని మోసుకొచ్చిన ఉదయం లో లోపల కర్తవ్య భయాన్ని తీసుకొచ్చిన ఉదయం కొందరికి ధైర్యాన్ని ఇచ్చే ఉదయం మరికొందరికి నమ్మకాన్ని ఇచ్చే ఉదయం...!   - Malleshailu  

అప్పు...

అప్పు..   అవసరాల కోసం చేసే అప్పు మనిషిని పీక్కుతినే రాబందు గబ్బిళాల్లాంటి ఇరుగు పొరుగు వాళ్ళు గది నిండా అనవసరపు ఖర్చులు ఘడియ ఘడియకు డబ్బుల తిప్పలు మనిషి ఆశలకు అంతులేకుండా పోతుంటే ఆ ఆశలు చేసే అప్పులు వడ్డీలా రోజు రోజుకి పెరిగిపోతుంటే ఆ అప్పు పెట్టే బాధలు భరించలేక మనిషికి , పురుగులను చంపే పురుగుల మందే ప్రాణభిక్ష పెడుతుంది కదా... అప్పు ఎంతలా ఎదుగుతుంది అంటే మనిషిని అందనంత ఎత్తు నుండి కనపడనంత లోతులో పడేస్తుంది.   -Malleshailu  

కన్ను పెన్ను

కన్ను... పెన్ను షాలిబండ నుండి ఖాళీగున్న నేను పాళీ ఉన్న పెన్నుతో... విరుగుతుందో లేదో అన్న పన్నుతో నిద్రకి, మెలుకువకి మధ్య ఊగిసలాడుతున్న కన్నుతో... కలలు కన్న కన్నులో... మెలుకవలో ఉన్న మిన్నులో... కలవరమవుతుంది నాలో... - Malleshailu    

డబ్బు చేసే నాటకం

డబ్బు చేసే నాటకంలో మనుషులు  మమతలు కపటాలు అంటూ  భావాలు పలికిస్తూ ఉంటారు. ఇందులో ముఖ్యంగా అవసరం ఉన్నప్పుడు మాత్రం వినయాన్ని  అవసరం తీరాక చులకనగా పరిస్థితులను బట్టి డబ్బు మనుషుల భావాలను  లిఖిస్తుంది శాసిస్తుంది. ఇక్కడ మనం గుర్తుంచుకోవాల్సిన విషయం ఏంటంటే ఎంత సంపాదించినా ప్రశాంతత లేకుంటే వృధా అవసరానికి మించి చేసేది ఏది మనకి సుఖాన్ని ఇవ్వదు - Malleshailu

జీవితం.. ఓ ప్రయాణం

జీవితం.. ఓ ప్రయాణం     జనన మరణాల మధ్య సాగే ప్రయాణమే జీవితం. ఆ ప్రయాణంలో మీరు కోరుకునేది  ఆస్తులా? ఆప్తులా? ఆనందమా? విచారమా? ప్రేమా? ప్రతీకారమా ? నవ్వులా? ఏడుపులా? పలకరింపులా? చివాట్లా? అన్నీ మీ చేతుల్లోనే ఉన్నాయి. ఎందుకంటే మీ జీవిత ప్రయాణానికి మీరే రథ సారథి. మీ ప్రయాణం ఎలా ఉండాలో మీరే నిర్ణయించుకోండి. కానీ ఒక్కటి మాత్రం నిజం మీ ప్రయాణంలో మీరేం సాధించినా చివరికి చేరాల్సిన గమ్యం మరణం. 'మరణం మిమ్మల్ని గెలిచేలోపు ఆప్తుల్ని గెలుచుకోండి.. ఆనందాన్ని పంచుకోండి.. సాటి మనుషులను ప్రేమగా పలకరిస్తూ నవ్వులు పంచండి'. అప్పుడే కదా 'బ్రతికుండగా మనిషి అనిపించుకుంటారు మరణించాక కూడా బ్రతికుంటారు'.   - గంగసాని

మండేలా-స్వేచ్ఛ సూర్యుడు

మండేలా-స్వేచ్ఛ సూర్యుడు ఏ జాతైనా ఏ తెగైనా ఏ దేశమైనా ఏ మనిషైనా ఒకరి కబంధ హస్తాలలో చిక్కుకుని బానిసలా బతకాలనుకోదు తిన్నదేదైనా కడుపునింపుకుని కంటినిండా నిద్రిస్తే స్వేచ్ఛగా హాయిగా మనదైన రాజ్యంలో జీవనగమనం సాగాలి వర్ణాలతో  మనిషిని బానిసలా చేసే శ్వేతవర్ణ రాబందులు దోచుకునే నెపంతో దాడిచేసే దొంగలు వర్ణవివక్షతను నీ మొక్కవోని ధైర్యంతో తిరుగుబాటుతో తరిమావు ఎన్నోసార్లు నిన్ననగదొక్కాలని చూసినా నల్లసూర్యుడివై తెల్లోడిగుండెల్ని అదిరిపడేలాచేసావ్ నిన్ను బందించిన కారాగారం ప్రపంచమే నీవైపొచ్చేలా నీవంటే తెలిసేలా నిన్ను నీవే తెలుసుకునేలా విప్లవంకాదని అహింస అస్త్రాన్ని ధరింపజేసింది నీ సహనమే తెల్లసింహం తలదించుకునేలా స్వాతంత్య్రం చేతుల్లో పెట్టి తోకముడుచుకునెళ్ళిపోయింది జగతంతా నిన్నభినందించిన వారే సత్కారహారాలెన్నో నిన్నెతుక్కుంటూ చేరాయ్ భారతావని భారతరత్ననిచ్చి విశ్వశాంతికి నీ కృషికి నోబెల్ శాంతి బహుమానం నీకు సొంతమైంది గాంధీ శాంతి బహుమానంతో ఆఫ్రికా గాంధివైనావు మండేలా నీ జాతిగుండేల్లో ఆరిపోని స్వేచ్ఛ కాంక్షను మండించి జాతిరత్నమై నిలిచావు ధృవతారగా వెలిగావు సి.శేఖర్

తేల్చుకో....ఓటరన్న

తేల్చుకో....ఓటరన్న     వచ్చెచ్చె రానేవచ్చే నీకంటూ ఓరోజు అది ఈరోజు నిన్ను నీవు తెలుసుకుని మసలుకునే రోజు రానేవచ్చే అధికారం అందుకుంటావో సోమరివై దారపోస్తవో పచ్చని నోట్లకమ్ముడుపోయి బతుకుల చిచ్చుదెచ్చుకుంటవో మందుసీసలకు బానిసై మత్తులోదిగి జిందగీలున్న వెలుగునంత చీకటిజేసుకుంటవో వాగ్ధానాలకు ఉబ్బితబ్బిబ్బై ఊతమిచ్చి(ఓటు) ఉపాసముంటవో జరంత ఆలోచనజేయ్ తర్వాతనే ఓటేయ్ నాయకుడికుండే సేవ దృక్పధం చూడు లొంగావో ఐదేళ్ళ నరకం ఇక్కడే చూస్తవ్ ఇప్పుడు నీవో ఫైటర్ ఆలోచనల్లో ఉండాలి మెచ్యూర్ ఓటరన్న నీకుండాలి ఫ్యూచర్ లేదంటే నీకెపుడు డేంజర్   సి. శేఖర్