జగన్ వర్గం ఫై వేటు: సంక్రాంతి వరకు సస్పెన్స్
Publish Date:Jan 3, 2012
Advertisement
హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి వర్గం ఎమ్మెల్యేలపై అనర్హత వేటుకు సంబంధించి సంక్రాంతి వరకు ఉత్కంఠ తప్పదు. పండుగ తర్వాత స్పీకర్ నాదెండ్ల మనోహర్ ఆ ఎమ్మెల్యేల విషయంలో ఓ నిర్ణయం తీసుకునే అవకాశాలు కనిపిస్తున్నాయి. ఆపై కాంగ్రెస్లో ప్రజారాజ్యం పార్టీ విలీనంపై సభాపరంగా ఆయన చర్యలు చేపట్టే వీలుంది. తొలిసారిగా ఎన్నికైన 129 ఎమ్మెల్యేలు సభాపతి మనోహర్ నేతృత్వంలో ఈ నెల 9-12 తేదీల మధ్య విశాఖ జిల్లాలో భేటీ కానున్నారు. వారంతా అరకులో బస చేసి గిరిజన సమస్యలు, సంప్రదాయాలు, అభివృద్ధి కార్యక్రమాలు, పౌర సేవా విధానం వంటి పలు అంశాలపై చర్చిస్తారు. అంటే 12వ తేదీ వరకు స్పీకర్ మనోహర్తో పాటు అసెంబ్లీ కార్యదర్శి రాజా సదారామ్ కూడా బిజీగా ఉంటారు. తర్వాత భోగి, సంక్రాంతి పర్వదినాలైనందున 17 తర్వాతే జగన్ వర్గ ఎమ్మెల్యేల విషయంలో స్పీకర్ దృష్టి సారించి ఓ నిర్ణయం తీసుకునే వీలుంది.
తెలుగుదేశం పార్టీ అవిశ్వాస తీర్మానానికి అనుకూలంగా జగన్వర్గ ఎ మ్మెల్యేలు ఓటేసిన విషయం తెలిసిందే. తాను విప్ను ఎందుకు ధిక్కరించాల్సి వచ్చిందో వివరిస్తూ తొలుత ప్రజారాజ్యం పార్టీ శాసనసభ్యురాలు శోభా నాగి రెడ్డి స్పీకర్ మనోహర్కు సుదీర్ఘ లేఖ రాశారు. దీంతో పాటు రాజీనామా లేఖనూ పంపారు. అయితే విప్ను ధిక్కరించడానికి గల కారణాలను వివరిస్తూ మళ్లీ లేఖ పంపారు. దీంతో న్యాయవాదుల సమక్షంలో శోభా నాగి రెడ్డిని స్పీకర్ విచారించనున్నారు. ఇక మిగిలిన 16 మంది కాంగ్రెస్ ఎమ్మెల్యేల విషయంలోనూ ఇదే విధానాన్ని అవలంభించవలసి ఉంటుంది. రోజుకు నలుగురు ఎమ్మెల్యేల చొప్పున నాలుగు పని దినాల్లో ఈ విచారణ కార్యక్రమాన్ని పూర్తి చేయాల్సి వస్తుందని స్పీకర్ కార్యాలయం చెబుతోంది. ఇవన్నీ పరిశీలిస్తే ఈ నెలఖారు నాటికి జగన్ వర్గ ఎమ్మెల్యేలపై అనర్హత వేటు విషయం ఓ కొలిక్కి వచ్చే అవకాశాలు కన్పిస్తున్నాయి. శాసనసభా బడ్జెట్ సమావేశాల నాటికి జగన్ వర్గ ఎమ్మెల్యేల విషయంలో ఒక నిర్ణయం వెలువడుతుందని అసెంబ్లీ వర్గాలు వివరిస్తున్నాయి.మరోవైపు ఈ నెల 9న ఆరంభమయ్యే విశాఖ మన్యం పర్యటన సందర్భంగానే యువ ఎమ్మెల్యేలకు ఏయే రంగాల్లో ఆసక్తి ఉందో స్పీకర్ తెలుసు కోనున్నారు. వారి ఆసక్తికి అనుగుణంగా శాసనసభా కమిటీల్లో వారిని సభ్యులుగా నియమించే వీలుందని అంటున్నారు.
http://www.teluguone.com/news/content/ysr-congress-party-24-10575.html





