మన దైనందిన జీవితంలో నడుస్తున్నప్పుడు, కుర్చీలో నుండి లేచేటప్పుడు లేదా మెట్లు ఎక్కుతున్న సమయంలో మోకాళ్ల నుండి కటకట (Cracking or Popping) అనే శబ్దాలు రావడం చాలామంది ఎదుర్కొనే ఒక సాధారణ సమస్య. వైద్య భాషలో ఈ పరిస్థితిని  క్రెపిటస్  (Crepitus) అని పిలుస్తారు. చాలామంది ఈ శబ్దాలు వినబడగానే తమ మోకాళ్లు అరిగిపోయాయని తీవ్ర భయాందోళనకు గురవుతుంటారు. కానీ వైద్య నిపుణులు మరియు ఆర్థోపెడిక్ సర్జన్ల అభిప్రాయం ప్రకారం, మోకాళ్లలో వచ్చే ప్రతి శబ్దం ప్రమాదకరం కాదు. ఉదాహరణకు, మన కీళ్ల మధ్య ఉండే సైనోవియల్ ద్రవంలో (Synovial Fluid) చిన్న చిన్న వాయు బుడగలు (Gas Bubbles) ఏర్పడుతుంటాయి. మనం మోకాలును వంచినప్పుడు లేదా కదిలించినప్పుడు కీళ్ల కవచంలో కలిగే ఒత్తిడి మార్పుల వల్ల ఆ గాలి బుడగలు ఒక్కసారిగా పగిలి కటకట అనే సౌండ్ వస్తుంది. దీనిని కేవిటేషన్ (Cavitation) అంటారు. ఇది 100% సహజమైన ప్రక్రియ మరియు దీనివల్ల శరీరానికి ఎలాంటి హానీ కలగదు.

అలాగే, వయస్సుతో పాటు లేదా అధిక శారీరక శ్రమ వల్ల మోకాళ్లలోని లిగమెంట్లు, స్నాయువులు (Tendons) ఎముకల ఉపరితలంపై కదిలినప్పుడు కూడా ఇటువంటి సౌండ్లు వస్తుంటాయి. అయితే, ఈ శబ్దాలతో పాటు ఎలాంటి నొప్పి, వాపు లేదా బిగుసుకుపోవడం (Stiffness) లేనంత వరకు అసలు ఆందోళన చెందాల్సిన అవసరమే లేదని పరిశోధనలు స్పష్టం చేస్తున్నాయి. కీళ్లలో నొప్పి లేనంతవరకు ఈ శబ్దాల వల్ల మన కదలికలపైగానీ, జీవన నాణ్యతపైగానీ ఎలాంటి ప్రతికూల ప్రభావం పడదు. కాబట్టి ఎటువంటి నొప్పి లేకపోతే ఎవరికీ ఎటువంటి ప్రత్యేక వైద్య చికిత్స లేదా ఫిజియోథెరపీ అవసరం లేదు.

How to stop knee cracking naturally, knee joint pain and crepitus treatment.