గచ్చిబౌలిలోని ఓ ఎలైట్ కోలివింగ్‌లో ఒక యువతి తన జీవితానికి చివరి అధ్యాయం రాసుకున్నది. 23 ఏళ్ల యువతి నానక్‌రామ్‌గూడాలోని ఒక ప్రైవేట్ కంపెనీలో టెలీకాలర్‌గా ఉద్యోగం చేస్తూ, అదే కోలివింగ్‌లో సాయికుమార్ అనే వ్యక్తితో కలిసి సహజీవనం చేస్తోంది. ఇద్దరి మధ్య ప్రారంభంలో సాధారణం గానే ఉన్న సంబంధం, క్రమంగా అనుమానాల ఛాయలో చిక్కుకుంది. 

ఆ అనుమానం చివరికి వేధింపుల రూపం దాల్చిందని సమాచారం. సాయికుమార్ తరచూ మద్యం సేవించి ఆ మత్తులో కోలివింగ్‌కు వచ్చి ఆమెను ప్రశ్నించడం, అనుమానంతో గొడవలు చేయడం మొదలుపెట్టాడు. ఈ క్రమంలోనే మద్యం మత్తులో వచ్చిన సాయికుమార్ ప్రవర్తన నియంత్రణ తప్పిందని, ఇద్దరి మధ్య తీవ్ర వాగ్వాదం జరిగింది. దీంతో తీవ్ర మనస్తాపానికి లోనైన యువతి, తట్టుకోలేని స్థితికి చేరుకుందని తెలుస్తోంది. ఆ క్షణాల్లో తీసుకున్న నిర్ణయం ఆమె జీవితాన్నే ముగించింది—భవనం ఐదో అంతస్తు నుండి దూకి ఆత్మహత్య చేసుకుంది. 

ఘటనతో కోలివింగ్ మొత్తం ఒక్కసారిగా షాక్‌లోకి వెళ్లింది. సహజీవనం చేస్తున్న ఇద్దరి మధ్య వ్యక్తిగత సమస్యలు చివరకు ఇంత తీవ్రమైన దారికి రావడం అక్కడి వారిని కూడా కలచివేసింది. సమాచారం అందుకున్న పోలీసులు వెంటనే చేరుకుని ఘటన స్థలాన్ని పరిశీలించారు. మృతదేహాన్ని పోస్టుమార్టం నిమిత్తం ప్రభుత్వ హాస్పిటల్ కి  తరలించారు. కేసు నమోదు చేసి అన్ని కోణాల్లో దర్యాప్తు కొనసాగిస్తున్నారు. ఇంకా పూర్తి వివరాలు తెలియాల్సి ఉంది.