Top Stories

తెగ తాగేశారు...మద్యం విక్రయాల్లో ఆ జిల్లా రికార్డు!

ఎంపీ రాఘవ్ చద్దాపై వేటు వెనుక అసలు కారణాలేంటి?

తారామతి డ్రగ్స్ పార్టీ....ఆరుగురికి పాజిటివ్!

ఇరాన్–అమెరికా/ఇజ్రాయెల్ సంఘర్షణ.. కార్యాచరణ పరిణామాలు మరియు వ్యూహాత్మక ప్రభావాలు

గోల్కొండ తారామతి రిసార్ట్స్‌లో ఈగల్ టీం సోదాలు... డ్రగ్స్ పరీక్షలు కలకలం

ఏపీలో భూ ప్రకంపనలు.. భయంతో పరుగులు తీసిన జనాలు

కోహ్లీ విదేశీ ప్లేయరా?.. స్టార్ బ్యాటర్ ఏమంటున్నాడు..

తెగ తాగేశారు...మద్యం విక్రయాల్లో ఆ జిల్లా రికార్డు!

కడప జిల్లా మద్యం బాంబులు తెగ తాగేశారు. జిల్లాను మద్యం మత్తులో ముంచేశారు. సర్కారు ఖజానాకు కాసుల వర్షం కురిపించారు. మమూడురోజుల క్రితం ముగిసిన గత ఏడాది ఆర్ధిక సంవత్సరంలో ఏకంగా వెయ్యి కోట్లకు పైగా గుట గుటా తాగేశారు. చంద్రబాబు కూటమి ప్రభుత్వం నాణ్యమైన మద్యం అందిస్తున్నామని చెబుతున్న ఈ మధ్యం విక్రయాలకు వేలా పాలా లేదు. తెల్లవారుజాము నుంచే విక్రయాలు సాగిస్తూ ఉండడం తో ఎప్పుడు కావాలంటే అప్పుడు మందు దొరికే పరిస్థితి రోడ్లపై కనిపిస్తుంది. ఇందుకు తోడు బెల్ట్ షాపులు జిల్లా వ్యాప్తంగా వ్యాప్తి చెందడంతో కావలసిన వారికి కావల్సినంత మందు దొరుకుతుంది. దీంతో ముందు బాబులు మద్యం మత్తులో మునిగి జిల్లాను కూడా మత్తులో తడిపేశారు *ఖజానాకు కాసుల వర్షం ఏడాదికి రూ. 1,155.77 కోట్ల ఆదాయం అంటే నెలకు సగటున రూ. 96.31 కోట్ల రూపాయలు మధ్యం తాగేశారు .కొత్త మద్యం విధానంతో నాణ్యమైన బ్రాండ్ల పేరుతో గత ప్రభుత్వంలో కనిపించని బ్రాండ్ లు అందుబాటులోకి రావడంతో విక్రయాలు మరింత పుంజుకున్నాయి. కేవలం మార్చి నెలలోనే రూ. 101.96 కోట్లు ఆదాయం రావడం గమనార్హం. *కష్టం జీవుల వాటానే అధోకం కోట్ల రూపాయల ఆదాయంలో 80 శాతం వాటా రెక్కాడితే గానీ డొక్కాడని పేదవాడిదేనని చెప్పవచ్చు.కొందరైతే సాయంత్రం వేళ కూలీ డబ్బులతో నేరుగా మద్యం షాపులకే చేరుతున్నారు. దీంతో ఆ కుటుంబాలు చిన్నా భిన్నం అవుతున్నాయి.మద్యానికి బానిసలై వారి పిల్లలు భవిష్యత్తు పై ఈ ప్రభావం పడుతోంది. తండ్రి తాగుడుకు బానిస కావడంతో ఫీజులు కట్టలేక పిల్లలు చదువు మానేసి బాలకార్మికులుగా మారుతున్నారు. మితిమీరి మద్యం సేవించడం వల్ల వల్ల లివర్, కిడ్నీ వ్యాధులతో చిన్న వయసులోనే పురుషులు మరణిస్తున్నారు. దీంతో అనేక కుటుంబాల్లో మహిళలు అనాథలుగా, పిల్లలు దిక్కులేని వారిగా మారుతున్నారు. *రూ,1155.77 కోట్ల విక్రయాలు జిల్లాలో ఏర్పాటైన 139 మద్యం షాపుల ద్వారా 2025- 26 ఆర్థిక సంవత్సరంలో రికార్డు స్థాయిలో మద్యం విక్రయాలు జరిగాయి. జిల్లాలోని 9 ఎక్సైజ్ స్టేషన్ల పరిధిలో 1155. 77 కోట్ల రూపాయల మద్యం విక్రయాలు జరగడం చూస్తే మందుబాబులు మద్యం తాగడానికి మాత్రం లోటు లేదనే చెప్పాలి. ఎక్సైజ్ పోలీస్ స్టేషన్ లవారిగా జరిగిన మద్యం అమ్మకాలు పరిశీలిస్తే బద్వేలు పోలీస్ స్టేషన్ పరిధిలో 128.85 కోట్ల రూపాయలు మద్యం విక్రయాలు జరిగాయి. అలాగే జమ్మలమడుగులో 84.57 కోట్లు, కడప లో 312. 37 కోట్లు ,ముద్దనూరు లో 47.76 కోట్లు ,మైదుకూరులో 112.23 కోట్ల రూపాయల మద్యం విక్రయాలు జరిగాయి. ప్రొద్దుటూరు పోలీసు స్టేషన్ పరిధిలో రూ,202.72 కోట్లు, పులివెందులలో 138.77 కోట్లు, సిద్ధవటంలో 36.79, కోట్లు , ఎర్రగుంట్ల లో91.71 కోట్ల రూపాయలు మద్యం విక్రయాలు జరిగాయి. తొమ్మిది పోలీస్ స్టేషన్లో పరిధిలో 1155.77 కోట్ల రూపాయల మధ్య విక్రయాలు కరువు కడపన రికార్డు సృష్టించాయి *మొదటి స్థానంలో కడప మద్యం సేవించడంలో కడపలో మందుబాబులు మొదటి స్థానంలో ఉన్నారు. కడప ఎక్సైజ్ స్టేషన్ పరిధిలో 312.37 కోట్ల రూపాయలు మద్యం తాగేశారు .రెండో స్థానంలో ప్రొద్దుటూరు లో 202. 72 కోట్ల రూపాయలు మద్యం విక్రయాలు జరిగాయి. మూడో స్థానంలో 138.77 కోట్లతో పులివెందుల ఉంది .నాలుగో స్థానంలో బద్వేలు లో 128 .85 కోట్ల రూపాయల మద్యం సేవించారు. మొత్తంగా ఏడాదికి 1155.77 కోట్ల రూపాయలు మద్యం తాగారంటే కడప కు ఏస్థాయిలో మత్తెక్కించారో ఊహించ వచ్చు. *ఒక్క నెలలో 11.66 లక్షల బీర్లు గుట గుట వేసవి తాపం తీరేలా చిల్డ్ చిల్డ గా గుట గుట బీర్లు తాగేశారు. గత నెల లో ముదిరిన ఎండలు బీర్లకు బలే గిరాకీ తెచ్చాయి. ఈ మర్చ నెలలో జిల్లాలో 97424 కేసులు అంటే 1168088 బీర్లు తాగేశారు. ఫిబ్రవరి వారిలో 66965 కేసుల బీర్లు‌ అమ్మకాలు జరిగితే మార్చి లో అంతకు మించి 32759 బీర్లు అదనంగా అమ్మకాలు జరిగాయి. నియోజకవర్గాల వారీగా 'మత్తు' లెక్కలు (మార్చి నెల గణాంకాలు): జిల్లాలోని ప్రధాన కేంద్రాల్లో మద్యం విక్రయాల సరళిని పరిశీలిస్తే, పట్టణ ప్రాంతాల్లో వినియోగం అత్యధికంగా ఉంది. ఒక్క మార్చి నెలలోనే 101 కోట్ల రూపాయలు వ్యాపారం జరిగింది.ఏప్రిల్ ఒకటి నుండి మొదలైన 2026- 27 ఆర్థిక సంవత్సరంలో మరెంత స్థాయిలో మద్యం మత్తు కడప ను ముంచెత్తిందో చూడాలి.

Publish Date: Apr 5, 2026 1:45PM

పరువు హత్య కేసు... మాచర్ల సీఐపై వేటు

పల్నాడు జిల్లా మాచర్ల పట్టణంలో సంచలనం సృష్టించిన చౌడేశ్వరి పరువు హత్య కేసులో పోలీసు యంత్రాంగం దిద్దుబాటు చర్యలకు దిగింది. విధి నిర్వహణలో ఘోరంగా విఫలమైన మాచర్ల సీఐ వెంకటరమణను సస్పెండ్ చేస్తూ గుంటూరు రేంజ్ ఐజీ ఉత్తర్వులు జారీ చేశారు. ప్రేమ పెళ్లి చేసుకున్న యువతి ప్రాణాలు రక్షించాల్సింది పోయి, ఆమెను మృత్యువు ఒడిలోకి నెట్టేలా వ్యవహరించారనే ఆరోపణలు రావడంతో ఈ కఠిన నిర్ణయం తీసుకున్నారు. గత నెలలో యాదవ బజార్‌కు చెందిన చౌడేశ్వరి (22) నాగరాజు అనే యువకుడిని ప్రేమ వివాహం చేసుకుంది. రక్షణ కోరుతూ దంపతులు పోలీసులను ఆశ్రయించగా, నిబంధనలకు విరుద్ధంగా సీఐ వెంకటరమణ ఆమెను తల్లిదండ్రులకు అప్పగించారు. ఇంటికి వెళ్లిన కొద్దిసేపటికే తండ్రి చంద్ర శ్రీను ఆమెను గొంతు నులిమి హత్య చేసి, ఆత్మహత్యగా చిత్రీకరించే ప్రయత్నం చేశాడు. అయితే, పోస్టుమార్టం నివేదికలో అది హత్య అని తేలడంతో ఒక్కసారిగా కలకలం రేగింది. ఈ ఘటనపై ప్రజా సంఘాలు మరియు రాజకీయ నేతలు తీవ్ర స్థాయిలో మండిపడుతున్నారు. "రక్షణ కల్పించాల్సిన పోలీసులే బాధితురాలిని నిందితుల చేతికి చిక్కేలా చేయడం క్షమించరాని నేరం" అని మహిళా సంఘాలు ధ్వజమెత్తాయి. ప్రతిపక్ష పార్టీలు సైతం ఈ వ్యవహారంలో పోలీసుల వైఫల్యాన్ని ఎండగడుతూ ఆందోళనలకు పిలుపునిచ్చాయి. ప్రభుత్వ పరువు తీసేలా వ్యవహరించిన అధికారులపై కఠిన చర్యలు తీసుకోవాలని వారు డిమాండ్ చేశారు. ప్రస్తుతం నిందితుడు చంద్ర శ్రీను పోలీసుల అదుపులో ఉన్నాడు. ఈ కేసులో సీఐ పాత్రపై మరింత లోతైన విచారణకు ఉన్నతాధికారులు ఆదేశించారు. పరువు హత్యలకు పాల్పడే వారికి పోలీసుల సహకారం ఉంటే పరిణామాలు ఎంత తీవ్రంగా ఉంటాయో ఈ ఘటన హెచ్చరిస్తోంది. రానున్న రోజుల్లో మరికొంత మంది కింది స్థాయి సిబ్బందిపై కూడా చర్యలు తీసుకునే అవకాశం ఉన్నట్లు తెలుస్తోంది. మాచర్ల ప్రాంతంలో పరువు హత్య వంటి దారుణ ఘటన జరిగినప్పుడు, శాంతిభద్రతలను పరిరక్షించాల్సిన బాధ్యత స్థానిక సీఐపై ఉంటుంది. అయితే, వెంకటరమణ ఆ బాధ్యతను గాలికొదిలేశారు. బాధితుల పక్షాన నిలబడాల్సింది పోయి, ఆర్థిక ప్రయోజనాల కోసం నిందితులతో చేతులు కలిపారనే విమర్శలు వెల్లువెత్తాయి. పోలీసు వ్యవస్థపై ప్రజల్లో ఉన్న నమ్మకాన్ని ఈ ఘటన దెబ్బతీసిందని, అందుకే శాఖాపరమైన చర్యలు ఇంత కఠినంగా ఉన్నాయని విశ్లేషకులు భావిస్తున్నారు.

Publish Date: Apr 5, 2026 1:27PM

ఎంపీ రాఘవ్ చద్దాపై వేటు వెనుక అసలు కారణాలేంటి?

రాఘవ్ చద్దా, ఆమ్ ఆద్మీ పార్టీ మధ్య తలెత్తిన అంతర్గత విభేదాలు ఇప్పుడు బహిరంగ యుద్ధంగా మారాయి. గతంలో పార్టీకి వెన్నెముకగా, కేజ్రీవాల్‌కు అత్యంత ఆప్తుడిగా ఉన్న రాఘవ్ చద్దాపై ఇప్పుడు పార్టీ నాయకత్వమే విమర్శలు గుప్పించడం రాజకీయ వర్గాల్లో సంచలనం సృష్టిస్తోంది. ఈ పరిణామాలపై రాఘవ్ చద్దా స్పందిస్తూ.. తనపై వస్తున్న ఆరోపణలన్నీ నిరాధారమని, ఇది తనను అణచివేసేందుకు జరుగుతున్న కుట్ర అని కొట్టిపారేశారు. రాజకీయ పరిస్థితి : ఆప్ వర్సెస్ రాఘవ్ చద్దారాజ్యసభలో ఆప్ డెప్యూటీ లీడర్ పదవి నుంచి రాఘవ్ చద్దాను తొలగించి, ఆయన స్థానంలో అశోక్ మిట్టల్‌ను నియమించడంతో ఈ వివాదం మొదలైంది. అంతేకాకుండా, రాజ్యసభలో పార్టీ కోటా నుంచి చద్దాకు మాట్లాడే అవకాశం ఇవ్వవద్దని పార్టీ సెక్రటేరియట్‌కు లేఖ రాయడం పరిస్థితి తీవ్రతను తెలియజేస్తోంది. పంజాబ్ సమస్యలను పార్లమెంట్‌లో ప్రస్తావించలేదని, ప్రతిపక్షాల వాకౌట్‌లో పాల్గొనలేదని మరియు ప్రధానమంత్రిపై విమర్శలు చేయడానికి భయపడుతున్నారని పంజాబ్ ఆప్ నాయకులు ఆయనపై ఆరోపణలు చేస్తున్నారు. దీనికి ప్రతిగా చద్దా ఒక వీడియో విడుదల చేస్తూ, "నేను గాయపడ్డాను, అందుకే మరింత ప్రమాదకరంగా మారాను" అంటూ హెచ్చరించారు. పార్లమెంట్‌లో తాను లేవనెత్తిన అంశాల ట్రాక్ రికార్డ్ చూడాలని, సీసీటీవీ ఫుటేజ్ పరిశీలించాలని ఆయన సవాల్ విసిరారు. తన గొంతు నొక్కడమే లక్ష్యంగా ఈ "స్క్రిప్టెడ్" ప్రచారం జరుగుతోందని ఆయన ఆవేదన వ్యక్తం చేశారు.వ్యూహం మరియు అంతరార్థంఈ పరిణామాల వెనుక లోతైన రాజకీయ వ్యూహాలు ఉన్నట్లు కనిపిస్తున్నాయి పార్టీ నియంత్రణ : 2025 ఢిల్లీ ఎన్నికల తర్వాత పార్టీలో అంతర్గత ప్రక్షాళన జరుగుతున్నట్లు కనిపిస్తోంది. కేజ్రీవాల్‌కు అత్యంత సన్నిహితంగా ఉంటూ జాతీయ స్థాయిలో గుర్తింపు తెచ్చుకున్న నాయకులను పక్కన పెట్టడం ద్వారా పార్టీపై పట్టు సాధించే ప్రయత్నం జరుగుతోంది. క్రమశిక్షణ పేరుతో ప్రక్షాళన: రాఘవ్ చద్దా తన వ్యక్తిగత ఇమేజ్‌ను పెంచుకోవడానికి ప్రాధాన్యత ఇస్తున్నారని, పార్టీ ఎజెండాను పక్కన పెట్టారని ఆరోపించడం ద్వారా ఆయనను నైతికంగా దెబ్బతీసే వ్యూహం కనిపిస్తోంది. పంజాబ్ సెంటిమెంట్: పంజాబ్ నుంచి ఎన్నికైన ఎంపీగా ఆయన రాష్ట్ర ప్రయోజనాలను కాపాడలేదని ఆరోపించడం ద్వారా, పంజాబ్ కేడర్‌లో ఆయనపై వ్యతిరేకత పెంచేలా పార్టీ పావులు కదుపుతోంది.భవిష్యత్తు రాజకీయ ప్రభావంఈ వివాదం ఆమ్ ఆద్మీ పార్టీ భవిష్యత్తుపై తీవ్ర ప్రభావం చూపే అవకాశం ఉంది. రాఘవ్ చద్దా వంటి యువ మరియు విద్యావంతుడైన నాయకుడు పార్టీకి దూరం కావడం జాతీయ స్థాయిలో ఆప్ ఇమేజ్‌కు నష్టం కలిగించవచ్చు. ఇప్పటికే ఆయన తన సోషల్ మీడియా బయో నుంచి 'AAP' పేరును తొలగించడం, ఆయన పార్టీని వీడతారనే ఊహాగానాలకు బలాన్నిస్తోంది. ఒకవేళ చద్దా పార్టీని వీడి బీజేపీలో చేరితే, అది ఆప్‌కు పెద్ద దెబ్బ అవుతుంది. ముఖ్యంగా ఢిల్లీ మరియు పంజాబ్ రాజకీయాల్లో కేజ్రీవాల్ వ్యూహాలను ఎరిగిన నాయకుడు ప్రత్యర్థి పక్షంలో ఉండటం ఆప్‌కు సవాలుగా మారుతుంది. మరోవైపు, పార్టీలో ఉంటూనే తిరుగుబాటు బావుటా ఎగురవేస్తే, అది అంతర్గత కుమ్ములాటలకు దారితీసి కేడర్ మనోస్థైర్యాన్ని దెబ్బతీస్తుంది. ఏది ఏమైనా, "బ్లూ ఐడ్ బాయ్" నుంచి "రెబెల్" గా మారిన చద్దా ఉదంతం భారత రాజకీయాల్లో ఆసక్తికర మలుపుగా మారింది.

Publish Date: Apr 5, 2026 12:39PM

తారామతి డ్రగ్స్ పార్టీ....ఆరుగురికి పాజిటివ్!

హైదరాబాద్ శివార్లలోని గండిపేట పరిసరాల్లో ఉన్న ప్రముఖ తారామతి బారాదరి రిసార్ట్స్‌లో శనివారం అర్ధరాత్రి ‘ఈగల్’ ఫోర్స్ నిర్వహించిన మెరుపు దాడులు రాష్ట్రవ్యాప్తంగా సంచలనం సృష్టిస్తున్నాయి. ‘జాక్ అండ్ జాన్సన్’ అనే పేరుతో జరిగిన ఈ హై-ప్రొఫైల్ ఈవెంట్‌పై పక్కా సమాచారంతో దాడులు చేసిన అధికారులు, విస్తుపోయే నిజాలను వెలుగులోకి తెచ్చారు. ఈ పార్టీలో పాల్గొన్న వారిలో ఆరుగురు వ్యక్తులు గంజాయి సేవించినట్లు ప్రాథమిక పరీక్షల్లో తేలింది. వీరిలో ఒక మహిళా జూనియర్ ఆర్టిస్ట్ కూడా ఉన్నట్లు సమాచారం. అసలేం జరిగింది? రాష్ట్ర ప్రభుత్వం డ్రగ్స్‌ను రూపుమాపేందుకు ప్రతిష్టాత్మకముగా ఏర్పాటు చేసిన ‘ఈగల్’ ఫోర్స్, శనివారం రాత్రి 11 గంటల సమయంలో తారామతి రిసార్ట్స్‌ను చుట్టుముట్టింది. సుమారు 36 మందిని అదుపులోకి తీసుకుని స్పాట్‌లోనే యూరిన్ డ్రగ్ కిట్లతో పరీక్షలు నిర్వహించగా.. ఆరుగురికి పాజిటివ్ వచ్చింది. పార్టీలో పెద్ద ఎత్తున డ్రగ్స్ సరఫరా జరిగినట్లు పోలీసులు అనుమానిస్తున్నారు. ఈ ఈవెంట్‌కు టాలీవుడ్‌తో పాటు బాలీవుడ్‌కు చెందిన పలువురు చిన్న తరహా నటులు, వ్యాపారవేత్తలు హాజరైనట్లు తెలుస్తోంది. ఎందుకు ఇది ఆందోళనకరం? నగరంలోని పబ్ లపై నిఘా పెరగడంతో, డ్రగ్స్ మాఫియా తన అడ్డాను శివార్లలోని రిసార్ట్స్ మరియు ఫామ్ హౌస్‌లకు మార్చింది. ఇటీవల కొండాపూర్‌లోని ఒక పబ్‌లో జరిగిన దాడిలో ఐఏఎస్ అధికారి కుమారుడు దొరికిన ఘటన మరువకముందే, ఇప్పుడు తారామతి వంటి ప్రభుత్వ అనుబంధ రిసార్ట్స్‌లో ఇలాంటి ఘటన జరగడం తీవ్ర చర్చనీయాంశమైంది. ఇది కేవలం పార్టీ మాత్రమే కాదు, యువతను వ్యసనాలకు బానిసలుగా చేస్తున్న వ్యవస్థీకృత నేరంగా పోలీసులు భావిస్తున్నారు. రాజకీయ మరియు సామాజిక స్పందనలు: ఈ ఘటనపై రాజకీయ వర్గాల్లో తీవ్ర దుమారం రేగుతోంది. "హైదరాబాద్‌ను డ్రగ్స్ రహిత నగరంగా మారుస్తామని చెబుతున్న ప్రభుత్వం, ప్రభుత్వ రిసార్ట్స్‌లోనే ఇలాంటివి జరుగుతుంటే ఏం చేస్తోంది?" అని ప్రతిపక్షాలు ప్రశ్నిస్తున్నాయి. మరోవైపు, డ్రగ్స్ వినియోగంపై ఉక్కుపాదం మోపుతామని, ఎవరినీ వదిలిపెట్టే ప్రసక్తి లేదని హోం శాఖ వర్గాలు స్పష్టం చేశాయి. పౌర సమాజం కూడా ఈ పోకడల పట్ల తీవ్ర ఆందోళన వ్యక్తం చేస్తోంది. తదుపరి పరిణామాలు: ప్రస్తుతం పాజిటివ్ వచ్చిన ఆరుగురిని పోలీసులు లోతైన విచారణ కోసం అదుపులోకి తీసుకున్నారు. వీరికి డ్రగ్స్ సరఫరా చేసిన పెడ్లర్లు ఎవరు? ఈ ఈవెంట్ వెనుక ఉన్న అసలు నిర్వాహకులు ఎవరు? అనే కోణంలో దర్యాప్తు సాగుతోంది. నిందితుల ఫోన్ డేటాను విశ్లేషిస్తున్న అధికారులు, మరిన్ని అరెస్టులు జరిగే అవకాశం ఉందని సూచనప్రాయంగా తెలిపారు. రిసార్ట్ యాజమాన్యంపై కూడా కఠిన చర్యలు తీసుకునే దిశగా అడుగులు పడుతున్నాయి.

Publish Date: Apr 5, 2026 11:58AM

ఇరాన్–అమెరికా/ఇజ్రాయెల్ సంఘర్షణ.. కార్యాచరణ పరిణామాలు మరియు వ్యూహాత్మక ప్రభావాలు

సంఘర్షణ 35వ రోజులోకి ప్రవేశిస్తున్న తరుణంలో, కార్యాచరణ వాతావరణం మరింత సంక్లిష్టమైన మరియు తీవ్రమైన దశలోకి మారుతోంది. ఇటీవలి పరిణామాలు సంప్రదాయ పోరాటాల నుండి ఇరాన్ యొక్క వ్యూహాత్మక సైనిక మౌలిక సదుపాయాలను, ముఖ్యంగా దాని క్షిపణి మరియు అణు సామర్థ్యాలను లక్ష్యంగా చేసుకుని దెబ్బతీయడం వైపు దృష్టి మళ్లుతున్నట్లు సూచిస్తున్నాయి. 1. కీలక కార్యాచరణ పరిణామాలు అబూ మూసా ద్వీప ఆపరేషన్ అబూ మూసా ద్వీపంపై అమెరికా జరిపిన సమన్వయంతో కూడిన ఉభయచర దాడి ద్వారా ఒక ముఖ్యమైన వ్యూహాత్మక మైలురాయిని సాధించారు. సుమారు 2,500 మంది సైనికులు, F-35 వైమానిక రక్షణ మద్దతుతో, ఆరు గంటల్లోనే ద్వీపాన్ని స్వాధీనం చేసుకున్నారు. ఈ ఆపరేషన్ ఐఆర్‌జిసి క్షిపణి బ్యాటరీలు మరియు రాడార్ వ్యవస్థలను నిర్వీర్యం చేయడంపై దృష్టి సారించింది. ద్వీపం నియంత్రణను యునైటెడ్ అరబ్ ఎమిరేట్స్ (యూఏఈ)కి బదిలీ చేసే అవకాశం ఉందని సూచనలు ఉన్నాయి, ఇది విస్తృత ప్రాంతీయ సమన్వయానికి సంకేతం. అమెరికా ఆస్తుల నష్టాలు ఇరాన్ తీవ్ర ప్రతిఘటన మరియు అధునాతన విమాన నిరోధక వ్యవస్థల కారణంగా అమెరికా 9-11 విమానాలు, హెలికాప్టర్లను కోల్పోయిందని నివేదికలు సూచిస్తున్నాయి. గల్లంతైన పైలట్ కోసం గాలింపు చర్యలు కొనసాగుతున్నాయి, ఇది వివాదాస్పద గగనతలంలో కార్యాచరణపరమైన ప్రమాదాలను ఎత్తి చూపుతోంది. ఇరాన్ వ్యూహాత్మక మౌలిక సదుపాయాలను లక్ష్యంగా చేసుకోవడం ఇరాన్ ఆర్థిక, లాజిస్టికల్ వెన్నెముకను దెబ్బతీయాలనే లక్ష్యంతో, అమెరికా మరియు ఇజ్రాయెల్ దళాలు ఖుజెస్తాన్ ప్రావిన్స్‌లోని పెట్రోకెమికల్ సౌకర్యాలపై క్రమబద్ధమైన దాడులు నిర్వహిస్తున్నాయి. అదే సమయంలో, ఇస్ఫాహాన్‌లోని లోతైన భూగర్భ సొరంగాల నెట్‌వర్క్‌లను మ్యాప్ చేయడానికి మరియు విశ్లేషించడానికి ప్రయత్నాలు జరుగుతున్నాయి. వీటిలో అణు మరియు బాలిస్టిక్ క్షిపణి ఆస్తులు ఉన్నాయని భావిస్తున్నారు. 2. ఇరాన్ రక్షణ నిర్మాణం: భూగర్భ సొరంగాల నెట్‌వర్క్‌లు గత రెండు దశాబ్దాలుగా అభివృద్ధి చేసిన ఇరాన్ విస్తృతమైన భూగర్భ మౌలిక సదుపాయాలలోనే దాని సైనిక పటిష్టత గణనీయంగా పాతుకుపోయింది. నిర్మాణ సంక్లిష్టత రైలు నెట్‌వర్క్‌లు, క్షిపణి నిల్వ మరియు ప్రయోగ వేదికలను కలిగి ఉన్న బహుళ-పొరల సొరంగ వ్యవస్థలు. వేలాది క్షిపణులు మరియు మానవరహిత వైమానిక వ్యవస్థలను ఉంచగల సామర్థ్యం. లోతు మరియు పటిష్టత కీలకమైన స్థావరాలు తరచుగా పర్వత ప్రాంతాలలో, 150–200 మీటర్ల లోతులో భూగర్భంలో పాతిపెట్టబడి ఉంటాయి. ఈ లోతుల కారణంగా, అవి సాంప్రదాయ వైమానిక దాడులను అత్యంత సమర్థవంతంగా తట్టుకోగలవు. చలనశీలత మరియు రహస్యత వేగంగా మోహరించేందుకు వీలుగా రూపొందించబడిన ఈ స్థావరాలు, నిమిషాల వ్యవధిలోనే క్రియాశీలమై మూసివేయబడతాయి. దీనివల్ల ఉపగ్రహ నిఘా నుండి వాటిని గుర్తించడం చాలా వరకు తగ్గుతుంది. భద్రత మరియు భూతల రక్షణ ప్రధాన స్థావరాలలో సుమారు 10,000–15,000 మంది ఐఆర్‌జిసి (IRGC) సిబ్బంది వీటికి రక్షణ కల్పిస్తారు. ఈ రక్షణ వ్యవస్థలు, భూమిపై ఆధారపడిన ఏ నిర్వీర్య వ్యూహానికైనా ఒక ముఖ్యమైన సవాలును విసురుతున్నాయి. 3. వ్యూహాత్మక సందర్భం జిసిసి ప్రాంతీయ ఆందోళనలు కువైట్, బహ్రెయిన్, మరియు యుఎఇతో సహా గల్ఫ్ సహకార మండలి (జిసిసి) దేశాలు, ఇరాన్ యొక్క క్షిపణి మరియు అణు సామర్థ్యాలపై నిర్ణయాత్మక చర్య తీసుకోవాలని ఒత్తిడి చేస్తున్నట్లు సమాచారం. ఈ దేశాలు ఇరాన్ యొక్క పెరుగుతున్న సైనిక మౌలిక సదుపాయాలను ఒక దీర్ఘకాలిక ప్రాంతీయ ముప్పుగా పరిగణిస్తున్నాయి. అంతర్జాతీయ ప్రమేయం ఇరాన్‌కు, ముఖ్యంగా రష్యా మరియు చైనా నుండి బాహ్య మద్దతు లభిస్తున్నట్లు సూచనలు ఉన్నాయి: గూఢచార మరియు లక్ష్య నిర్ధారణ మద్దతు అధునాతన లక్ష్య నిర్ధారణ వ్యవస్థలు మరియు యుద్ధరంగ గూఢచారంలో సహాయం, ఇది ఇరాన్ యొక్క నౌకాదళ మరియు వైమానిక ఆస్తులను ఎదుర్కొనే సామర్థ్యాన్ని పెంపొందించే అవకాశం ఉంది. మౌలిక సదుపాయాలు మరియు సాంకేతిక నైపుణ్యం అణు కర్మాగారాల నిర్వహణ మరియు మద్దతులో రష్యన్ నిపుణులు పాలుపంచుకుంటున్నట్లు సమాచారం. బలవర్థకమైన మరియు భూగర్భ యుద్ధంలో తమ నైపుణ్యాన్ని ఉపయోగించి, భూగర్భ సొరంగ వ్యవస్థల రూపకల్పన మరియు నిర్మాణానికి రష్యన్ మరియు చైనీస్ నిపుణులు ఇద్దరూ దోహదపడ్డారని భావిస్తున్నారు. తరలింపు కార్యకలాపాలు మధ్య ఆసియా మీదుగా ఇరాన్ నుండి సుమారు 200 మంది విదేశీ సిబ్బందిని తరలించినట్లు నివేదికలు సూచిస్తున్నాయి, ఇది అక్కడ విదేశీ సైనిక కార్యకలాపాలు స్పష్టంగా ఉన్నాయని సూచిస్తోంది. 4. వ్యూహాత్మక దృక్పథం ఈ సంఘర్షణ, సంప్రదాయ పోరాటాల నుండి ఇరాన్ యొక్క ప్రధాన సైనిక సామర్థ్యాలను, ముఖ్యంగా పటిష్టమైన మరియు రహస్య మౌలిక సదుపాయాలలో నిక్షిప్తమై ఉన్న వాటిని బలహీనపరిచే లక్ష్యంతో కూడిన పోరాటంగా మారుతున్నట్లు కనిపిస్తోంది. అయితే, ఇరాన్ యొక్క లోతుగా పాతుకుపోయిన మరియు అత్యంత పటిష్టమైన సొరంగ వ్యవస్థలు ఒక ముఖ్యమైన వ్యూహాత్మక సవాలును విసురుతున్నాయి, దీనికి బహుశా ఇవి అవసరం కావచ్చు: అధునాతన బంకర్-చొచ్చుకుపోయే సామర్థ్యాలు, లేదా అధిక-ప్రమాదకరమైన భూతల కార్యకలాపాలు ఈ మారుతున్న గతిశీలత, ఈ సంఘర్షణ సుదీర్ఘమైన మరియు మరింత సంక్లిష్టమైన దశలోకి ప్రవేశిస్తోందని, దీనికి విస్తృత ప్రాంతీయ మరియు ప్రపంచవ్యాప్త పరిణామాలు ఉంటాయని సూచిస్తోంది. -కంఠంనేని సీతారాం. అమెరికా

Publish Date: Apr 5, 2026 11:21AM

పులి సంచారంతో భయంభయం

పోలవరం ప్రాజెక్టు నిర్వాసిత గ్రామాల్లో పెద్దపులి సంచారం ప్రజలను తీవ్ర భయాందోళనలకు గురి చేస్తున్నది. గత కొన్ని రోజులుగా అల్లూరి సీతారామరాజు జిల్లా దేవీపట్నం మండలంలోని అటవీ ప్రాంతాల్లో పులి కదలికలు కనిపించడంతో స్థానిక ప్రజలు తీవ్ర భయాందోళనలకు గురవుతున్నారు. ముఖ్యంగా కొండ ప్రాంతాల్లో నివసించే గిరిజనులు, వ్యవసాయ పనులకు వెళ్లే రైతులు ప్రాణాలు అరచేతిలో పెట్టుకుని జీవిస్తున్నారు. ప్రస్తుతం దేవీపట్నం మండలంలోని నేలకోట కొండ ప్రాంతాన్ని ఈ పులి తన ఆవాసంగా మార్చుకున్నట్లు అధికారులు గుర్తించారు. గత నాలుగు రోజులుగా ఈ పరిసరాల్లోనే పులి తిరుగుతున్నట్లు స్థానికులు గుర్తించారు. పశువుల కాపరులు, కొండపైకి వెళ్లే గ్రామస్థులు పులిని నేరుగా చూడటంతో విషయం వెలుగులోకి వచ్చింది. రామదుర్గం కొండపై పులి కదలికలను కొందరు సెల్ ఫోన్లలో చిత్రీకరించారు కూడా. అయితే మనుషులను చూస్తే సాధారణంగా పులులు వయలెంట్ అవుతాయి. కానీ ఈ పులి మాత్రం మనుషులను చూసి నెమ్మదిగా వెనక్కు పోయినట్లు స్థానికులు చెబుతున్నారు. సమాచారం అందుకున్న అటవీశాఖ అధికారులు తక్షణమే రంగంలోకి దిగారు. పులి అడుగుజాడల ఆధారంగా అది ఎటువైపు వెళ్తుందో పర్యవేక్షిస్తున్నారు. పులిని బంధించేందుకు అవసరమైన చర్యలు చేపట్టారు. ఇందులో భాగంగా పులి సంచరిస్తున్న ప్రాంతాల్లో బోన్లు ఏర్పాటు చేశారు. నిరంతరం నిఘా ఉంచేందుకు ప్రత్యేక బృందాలను రంగంలోకి దించారు. ప్రజల రక్షణ దృష్ట్యా అటవీశాఖ అధికారులు పలు కీలక ఆదేశాలు జారీ చేశారు. పొలం పనులకు వెళ్లేవారు ఒంటరిగా వెళ్లకూడదని, గుంపులుగా వెళ్లాలని సూచించారు. సాయంత్రం వేళల్లో అటవీ ప్రాంతాలకు సమీపంలో ఉన్న ఇళ్ల నుంచి బయటకు రావద్దని హెచ్చరించారు. పశువులను అడవి వైపు తీసుకెళ్లరాదని స్పష్టం చేశారు. పులి కనిపిస్తే వెంటనే అధికారులకు సమాచారం అందించాలని కోరారు. గండి పోచమ్మ ఆలయ సందర్శనకు వచ్చే భక్తులు కూడా అప్రమత్తంగా ఉండాలని అధికారులు కోరుతున్నారు. వీలైనంత త్వరగా పులిని బంధించి సురక్షిత ప్రాంతానికి తరలించాలని స్థానికులు డిమాండ్ చేస్తున్నారు.

Publish Date: Apr 5, 2026 10:12AM

MOVIE NEWS

Get all the updates about andhra pradesh news, political news, articles, sr journalists books, regional news, telugu cinema news etc. Find information about Telugu film news, regional news, current affairs, gallery, wallpapers, etc. See Telugu news, news videos along with latest news only at TeluguOne.com.

TeluguOne Services

» TOne Home
» Movie News
» Movies
» Photos
» Grandalayam

» Short Films
» Bhakti
» Videos
» KidsOne
» TORi (Radio)

» Sahityam
» Recipes
» Astrology
» Comedy
» Vanitha

» NRI Corner
» Greetings
» Health
» Charity
» News

TeluguOne For Your Business
» Ad Tariff
About TeluguOne
» About TeluguOne
KEYWORDS: TELUGU NEWS

Disclaimer: All content on this website—including text, images, videos, graphics, and audio—is the property of ObjectOne Information Systems Ltd. or its associates. Unauthorized reproduction, distribution, modification, or publication of any material is strictly prohibited without prior written consent..