ఎవరి మీదైనా చర్య తీసుకోవాలంటే వెనుకాడే పార్టీగా కాంగ్రెస్ పార్టీకి గుర్తింపు వచ్చింది. క్రమశిక్షణా రాహిత్యాన్ని సహించబోమంటూ ... షోకాజ్ నోటీసులు ఇస్తామంటూనే రోజులు గడిపేస్తారు. దీంతో ఆ పార్టీ ఏమీ చేయలేని, చేతకాని పార్టీ అని అందరూ విమర్శించటానికి అవకాశం లభిస్తోంది. ఇటీవల వై.ఎస్.ఆర్. కాంగ్రెస్ పార్టీ అధినేత జగన్మోహన రెడ్డి సిబీఐ ఎదుట తొలిరోజు హాజరైనప్పుడు ఆయన వెంట ఏలూరు ఎమ్మెల్యే ఆళ్ళ నాని ఉన్నారు. ఆయన తాను కాంగ్రెస్ పార్టీకి రాజీనామా చేసినా జగన్ వెనుకే ఉంటానని ఖచ్చితంగా చెప్పేశారు. దీంతో పీసీసీ చీఫ్ బొత్సా సత్యనారాయణ క్రమశిక్షణా సంఘ చైర్మన్ తో అత్యవసరంగా సమావేశమయ్యారు. ఆళ్ళ నానికి షోకాజ్ నోటీసు ఇస్తామని ఈ సందర్భంగా ప్రకటించారు. ఆ తరువాత ఒక్క ఎమ్మెల్యేను కూడా వాడులుకోలేమన్నట్లు మౌనం వహించారు. పర్యావసానంగా ఆళ్ళ నాని ఆ తరువాత బొబ్బిలి ఎమ్మెల్యే రంగారావు, కాకినాడ ఎమ్మెల్యే ద్వారంపూడి చంద్రశేఖర రెడ్డి, పార్వతీపురం ఎమ్మెల్యే జయమణి కూడా పార్టీని వదిలేస్తున్నారు. అనుకున్నట్లుగా ఆళ్ళ నానికి నోటీసు కూడా ఇవ్వలేకపోయారు. కానీ, ఆళ్ళ నాని తన కాంగ్రెస్ సభ్యత్వానికీ, ఎమ్మెల్యే పదవికీ రాజీనామా చేశారు. జాతీయస్థాయి పార్టీగా గొప్పలు చెప్పుకుంటూ తిరిగే కాంగ్రెస్ పెద్దలు షోకాజ్ నోటీసును శిలాక్షరాలతో తయారు చేసేలోపే నాని యమస్పీడయ్యారని ఇతర పార్టీలు విమర్శిస్తున్నాయి.