సీఐఐ భాగస్వామ్య సదస్సు-2026లో భాగంగా విశాఖపట్నంలోని నోవోటెల్ హోటల్‌లో ముఖ్యమంత్రి చంద్రబాబు వరుస సమావేశాలు నిర్వహిస్తున్నారు. వివిధ దేశాలకు చెందిన ప్రతినిధులతో భేటీ అవుతూ రాష్ట్రంలో పెట్టుబడులకు ఉన్న అవకాశాలను వివరిస్తున్నారు. ఇందులో భాగంగా యూఏఈ మంత్రి అబ్దుల్లా బిన్ అల్ తౌక్ మర్రితో చంద్రబాబు సమావేశమయ్యారు.

ఈ భేటీలో ఆంధ్రప్రదేశ్‌లో ఫుడ్ క్లస్టర్ ఏర్పాటు సహా పలు రంగాల్లో పెట్టుబడులపై చర్చించారు. ప్రముఖ అగ్రిఫుడ్ సంస్థ సిలాల్ (Silal)ను ఏపీలో పెట్టుబడులు పెట్టాలని ముఖ్యమంత్రి ఆహ్వానించారు. అనంతపురంలో ఫుడ్ క్లస్టర్ ఏర్పాటు చేసేందుకు యూఏఈ కంపెనీలు ముందుకు రావాలని కోరారు. ఫుడ్ ప్రాసెసింగ్ రంగంలో పనిచేసేందుకు 12 యూఏఈ సంస్థలు సిద్ధంగా ఉన్నాయని ఆ దేశ ప్రతినిధి బృందం వెల్లడించింది.

ఏపీ వంటి రాష్ట్రానికి మంచి విజన్ ఉన్న నాయకుడు ఉండటం సంతోషకరమని యూఏఈ ప్రతినిధులు ప్రశంసించారు. బ్లూచిప్ కంపెనీలు, డేటా సెంటర్లు రాష్ట్రానికి రావడం శుభపరిణామమని యూఏఈ మంత్రి పేర్కొన్నారు. ఏపీ నుంచి రొయ్యలను దిగుమతి చేసుకునేందుకు కూడా ఆసక్తి చూపించారు.

ఈ సందర్భంగా రాష్ట్రంలో చేపడుతున్న పారిశ్రామిక, సాంకేతిక అభివృద్ధి కార్యక్రమాలను చంద్రబాబు వివరించారు. త్వరలోనే అమరావతిలో క్వాంటం కంప్యూటర్‌ను ప్రారంభించనున్నట్లు తెలిపారు. పుట్టపర్తికి సమీపంలో ఐదో తరం యుద్ధ విమానాల తయారీ చేపడుతున్నామని వెల్లడించారు. సెమీకండక్టర్ కంపెనీల ఏర్పాటుకు అవసరమైన భూ కేటాయింపులు చేస్తామని, ఈ రంగంలో కేంద్ర ప్రభుత్వం కూడా సహకారం అందిస్తోందని వివరించారు.

ఇది కూడా చదవండి: సోనియా గాంధీతో వైఎస్ షర్మిల భేటీ..ఆసక్తికరంగా మారిన పుస్తకం బహూకరణ.!

రాష్ట్రంలో పరిశ్రమలకు, వ్యవసాయానికి నీటి కొరత లేకుండా చర్యలు తీసుకుంటున్నామని సీఎం తెలిపారు. గోదావరి-కావేరి నదుల అనుసంధానానికి ప్రణాళికలు సిద్ధం చేస్తున్నామని చెప్పారు. గ్రావిటీ కెనాళ్ల ద్వారా విశాఖపట్నం, అమరావతికి నీటిని తరలించే ప్రయత్నాలు చేస్తున్నట్లు యూఏఈ బృందానికి వివరించారు.

మారిటైమ్ కార్గో రంగంలో ఏపీలో ఉన్న అవకాశాలను అందిపుచ్చుకోవాలని యూఏఈ సంస్థలకు చంద్రబాబు సూచించారు. ఆర్టీఐహెచ్ ద్వారా వివిధ రంగాల్లో ఆవిష్కరణలకు ప్రాధాన్యత ఇస్తున్నామని, ఈ కార్యక్రమాల్లో యూఏఈ భాగస్వామ్యం కావాలని ఆహ్వానించారు. పౌర సేవలు, ప్రభుత్వ పాలనలోనూ ఏఐ స్టాక్‌ను వినియోగిస్తూ ముందుకు సాగుతున్నామని వివరించారు.

ఏపీ, యూఏఈ మధ్య మరింత బలమైన భాగస్వామ్యాలు ఏర్పడాలని ముఖ్యమంత్రి ఆకాంక్షించారు. పెట్టుబడులు, సాంకేతిక పరిజ్ఞానం, ఆహార శుద్ధి, మారిటైమ్ రంగాల్లో పరస్పర సహకారంతో రాష్ట్ర అభివృద్ధికి కొత్త అవకాశాలు సృష్టించుకోవాలని పిలుపునిచ్చారు.

మీకు నచ్చవచ్చు: మాజీ ఉపరాష్ట్రపతి జగదీప్ ధన్‌ఖడ్‌కు తీవ్ర అస్వస్థత.. ఎయిమ్స్‌లో అత్యవసర చికిత్స.!

[ CII Partnership Summit 2026, Chandrababu Naidu, UAE Investments, Abdullah Bin Touq Al Marri, Silal ]