ఆంధ్రప్రదేశ్‌లో  పురపాలక (మున్సిపాలిటీలు, నగర పంచాయతీలు) ఎన్నికల ఓట్ల లెక్కింపులో అధికార తెలుగుదేశం కూటమి తిరుగులేని ఆధిక్యాన్ని ప్రదర్శిస్తూ విజయాలు సాధిస్తోంది.   రాష్ట్రవ్యాప్తంగా మొత్తం 87 మున్సిపాలిటీలకు నిర్వహించిన పోరులో కూటమి పక్షాలు ఏకపక్షంగా విజయం సాధించి పట్టణ ఓటర్లపై తమకున్న   పట్టును మరోసారి రుజువు చేసుకున్నాయి. మంగళవారం (నవంబర్ 3) ఉదయం ప్రారంభమైన ఓట్ల లెక్కింపు ఆరంభం నుంచే కూటమి అభ్యర్థుల ఆధిక్యత ఏకపక్షంగా సాగింది.

రాష్ట్రవ్యాప్తంగా వెలువడిన అధికారిక ఫలితాల వివరాల ప్రకారం.. మొత్తం 87 మున్సిపాలిటీలలో ఎన్డీయే కూటమి ఏకంగా 63 స్థానాలను కైవసం చేసుకుని రికార్డు విజయాన్ని నమోదు చేసింది.   తెలుగుదేశం పార్టీ ఒంటరిగానే 45 మున్సిపాలిటీలను గెలుచుకోగా, జనసేన   15 స్థానాల్లోనూ, భారతీయ జనతా పార్టీ 3 స్థానాల్లోనూ విజయం సాధించాయి. మరోవైపు, వైసీపీ   5 మున్సిపాలిటీలకే పరిమితమై భారీ పరాజయాన్ని మూటగట్టుకుంది.  ఇతరులు   3 స్థానాలను దక్కించుకున్నారు.

 రాయలసీమతో పాటు కోస్తాంధ్ర, ఉత్తరాంధ్ర ప్రాంతాల్లోని అనేక కీలక పురపాలక సంఘాల్లో టీడీపీ, జనసేన అభ్యర్థులు భారీ మెజార్టీలతో విజయం సాధించారు. కృష్ణా జిల్లా పెడన మున్సిపల్ చైర్‌పర్సన్‌గా జనసేన అభ్యర్థి జ్యోత్స్నరాణి 4,380 ఓట్ల భారీ మెజార్టీతో విజయం సాధించడమే కాకుండా, ఉమ్మడి కడప జిల్లాలోని బద్వేల్, ఎర్రగుంట్ల, పులివెందుల వంటి వైసీపీ కంచుకోటలుగా భావించే ప్రాంతాల్లోనూ కూటమి అభ్యర్థులు ముందంజ వేసి తమ సత్తా చాటారు.

గతంలో రాష్ట్రంలోని పట్టణ స్థానిక సంస్థల్లో తిరుగులేని ఆధిక్యాన్ని ప్రదర్శించిన వైసీపీకి ఈ ఎన్నికల ఫలితాలు మింగుడుపడటంలేదు. మెజారిటీ స్థానాల్లో వైసీపీ అభ్యర్థులు కనీస పోటీ కూడా ఇవ్వలేక చతికిల పడ్డారు 

ఈ చారిత్రాత్మక విజయంతో రాష్ట్రవ్యాప్తంగా ఎన్డీయే కూటమి శ్రేణులు పెద్ద ఎత్తున సంబరాలు జరుపుకుంటున్నాయి. పట్టణ ప్రజలు కూటమి సుపరిపాలనపై ఉంచిన నమ్మకానికి ఈ ఫలితాలే నిదర్శనమని, రాబోయే రోజుల్లో రాష్ట్రంలోని అన్ని మున్సిపాలిటీలు, కార్పొరేషన్లలో మౌలిక వసతుల కల్పనకు పెద్దపీట వేస్తామని కూటమి ముఖ్య నాయకులు స్పష్టం చేశారు.  

[AP Municipal Election Results, TDP Janasena BJP Alliance Victory, AP Local Body Polls, YSCP Defeat,  Municipal Elections AP]