మహిళా ఎమ్మెల్యేల పట్ల బీఆర్ఎస్ నేతలది దారుణమైన ప్రవర్తన..!

విజువల్స్ విడుదల చేసిన మంత్రి సీతక్క..!

సొంత పార్టీకి చెందిన మహిళా ఎమ్మెల్యేల పట్ల బీఆర్ఎస్ ఎమ్మెల్యేలు అనుచితంగా, అసభ్యంగా వ్యవహరించడంపై మంత్రి సీతక్క తీవ్రంగా స్పందించారు. అసెంబ్లీ గేట్ వద్ద జరిగిన ఘటనకు సంబంధించిన విజువల్స్‌ను మంత్రి సీతక్క విడుదల చేశారు.

మహిళా ఎమ్మెల్యేలు సబితా ఇంద్రారెడ్డి, కోవా లక్ష్మిల పట్ల బీఆర్ఎస్ ఎమ్మెల్యేలు గంగుల కమలాకర్, సుధీర్ రెడ్డి, ఎమ్మెల్సీ నవీన్ రెడ్డి తదితరులు వ్యవహరించిన తీరు ఆ విజువల్స్‌లో స్పష్టంగా కనిపిస్తోందని మంత్రి సీతక్క పేర్కొన్నారు.

“మహిళా ఎమ్మెల్యేలను వెనుక నుంచి నెట్టుకుంటూ ముందుకు వెళ్లాల్సిన అవసరం ఏముంది? ఇద్దరు మహిళా ఎమ్మెల్యేలు పక్కపక్కనే నిల్చున్నప్పుడు వారి మధ్యకు చొరబడాల్సిన అవసరం ఏమొచ్చింది? మహిళా ఎమ్మెల్యేలను తాకుతూ, నెడుతూ ముందుకు దూసుకెళ్లాల్సిన అవసరం ఏముంది?” అని మంత్రి ప్రశ్నించారు.

మహిళా ఎమ్మెల్యేల పట్ల బీఆర్ఎస్ ఎమ్మెల్యేల ప్రవర్తన అత్యంత అభ్యంతరకరంగా ఉందని ఆమె అన్నారు. ప్రజా ప్రతినిధులుగా మహిళల పట్ల గౌరవం పాటించాల్సిన బాధ్యత ప్రతి ఎమ్మెల్యేపై ఉంటుందని స్పష్టం చేశారు.“ధర్నా చేయొచ్చు.. నిరసన తెలపొచ్చు.. స్పీకర్‌ను కలిసి తమ సమస్యను చెప్పొచ్చు. కానీ మహిళా ఎమ్మెల్యేల పట్ల అనుచితంగా ప్రవర్తించే హక్కు ఎవరికీ లేదు” అని సీతక్క అన్నారు.

విజువల్స్‌తో కేటీఆర్ కుట్ర బయటపడింది..!

“విజువల్స్ అన్నీ ప్రజల ముందు ఉన్నాయి. ఎవరు ఎవరిని తోశారు? ఎవరు ఎవరిని నెట్టారు? ఎవరు ఎవరిని తాకుతూ ముందుకు వెళ్లారు? అన్నది ప్రజలే చూస్తున్నారు. కేటీఆర్ సైగలు చేసిన తీరు కూడా ఈ విజువల్స్‌లో కనిపిస్తోంది. కేటీఆర్ సైగ చేయగానే.. Brs మహిళా ఎమ్మెల్యేల ను వారి పార్టీ ఎమ్మెల్యేలు ముందుకు తోశారు. వారిని తాకుతూ అభ్యంతరకరంగా ప్రవర్తించారు. రాజకీయాల కోసం ఇంతలా దిగజారాలా  ” అని సీతక్క మండిపడ్డారు.“మహిళల గౌరవం గురించి మాట్లాడే బీఆర్ఎస్ నేతలు ముందు తమ పార్టీ ఎమ్మెల్యేల ప్రవర్తనను చూసుకోవాలి. బయట నీతులు చెప్పడం కాదు.. ముందు తమ ఇంట్లో ఏం జరుగుతుందో చూసుకోవాలి” అని మంత్రి అన్నారు.

మహిళా ఎమ్మెల్యేలే కాదు.. మహిళా పోలీసుల పట్ల కూడా ఇదే తీరుగా వ్యవహరించారు..!

అసెంబ్లీ వద్ద విధులు నిర్వహిస్తున్న మహిళా పోలీసుల పట్ల కూడా బీఆర్ఎస్ నేతలు అనుచితంగా వ్యవహరించిన ఘటనలను మంత్రి సీతక్క ప్రస్తావించారు.ప్రజలను, ముఖ్యంగా మహిళలను రక్షించాల్సిన మహిళా పోలీసులపైనే దురుసుగా వ్యవహరించడం దారుణం. విధుల్లో ఉన్న మహిళా పోలీసుల పట్ల కూడా గౌరవం లేకుండా ప్రవర్తించడం ఏ సంస్కారం?. కేటీఆర్ మహిళా పోలీస్ నడుము పై చేయి వేసి తోసేశారు అని మండిపడ్డారు.

“మహిళలను గౌరవించడం అంటే మాటల్లో చెప్పడం కాదు.. చేతల్లో చూపించాలి. సొంత పార్టీ మహిళా ఎమ్మెల్యేలనే గౌరవించలేని వారు రాష్ట్రంలోని మహిళల భద్రత, గౌరవం గురించి మాట్లాడటం హాస్యాస్పదం.” “అసెంబ్లీ ప్రజాస్వామ్యానికి దేవాలయం లాంటిది. ఇక్కడ నిరసనకు హక్కు ఉంది.. ప్రశ్నించే హక్కు ఉంది.. కానీ మహిళల పట్ల అసభ్యంగా, అనుచితంగా ప్రవర్తించే హక్కు ఎవరికీ లేదు. బీఆర్ఎస్ ఎమ్మెల్యేల ప్రవర్తనను ప్రజలు గమనిస్తున్నారు. విజువల్స్ అన్నీ ప్రజల ముందే ఉన్నాయి. నిజం ఏంటో ప్రజలే నిర్ణయిస్తారు.” అని స్పష్టం చేశారు.

(Minister Sitakka, BRS MLAs Gangula Kamalakar, Sudheer Reddy, MLC Naveen Reddy, KTR, KCR, BRS Party, Telangana Assembly session, CM Revanth Reddy, Telangana political news, Telugu One, Telugu News)