Home  
కవితలు

హీరోయిన్లందరూ

హీరోయిన్లందరూ దిగుమతి సరుకే పోన్లే తెలుగమ్మల మానం దక్కింది పేదోళ్ళంటే ఇంత ప్రేమేమిటబ్బా ? యురేకా... ! ఎలక్షన్లంటే మరి మజాకా...? సూర్యుడు సంచారం సిటీ రోడ్లపై నైతే ఉదాయాస్తమయాలు రొజూ లేటే ! డా. వై. రామకృష్ణారావు.

నీడలు

నీడలు - డా.సి. భవానీదేవి   నీడలు నీడలు చుట్టూ రంగు రంగుల నీడలు అస్పష్ట  రూప భ్రమణాలు లోతుగా ఆ కళ్ళలోకి చూడు అసూయను పుత్కరిస్తుంది పెదాలు సాగదీసి ఎలా నవ్వుతుందో ! ఆ వెక్కిరింత విశాల మైదానమంత ఈ చూపుల పరిధిలో చిరంతనాశ్రువుల జల్లులు నడకలోని నైరాశ్యం పరివ్యాప్త దుఃఖ సముద్రాన్ని నిశబ్దంగా మింగేస్తుంది నన్ను రాసుకుంటూ వెళ్ళే మరోనీడ ఇంకా వ్యక్తిత్వం విచ్చుకోని మొగ్గ తడవని ప్రేమ చినుకులా ఉరికే సెలయేటి ప్రవాహంలాగా నాకే అర్ధం కాని నా నీడ మాత్రం మెల్ల మెల్లగా నా నుంచి దూరంగా జరిగిపోతుంది ఇప్పుడు  నేనొక నీడ లేని మనిషిని నడిచే ఓ నీడని !  

నా చెలి పారాణి పాదాలు

నా చెలి పారాణి పాదాలు - ఇల్లిందల పద్మా శ్రీనివాస్ నా చెలి పారాణి పాదాలు ఆ నేల తాకే వేళ ఆనందాల ఆకాశం నీలి రంగుల కాంతులై నా చెలి మోము తాకుతూ తన నీలి కురులలో తారాజాబిలి తారాట్లాడుతూ నా చెలి నన్ను చేరి ఓ కౌగిలి ఇస్తే ఆ రోజు మరువలేని ఓ తీపి గుర్తు నా  కళ్ళలో నీ రూపం కదలాడుతూ ఉంటే రెప్పయినా వేయను నేను ఎందుకంటే ఎక్కడ నీ రూపం కరిగిపోతుందో అని భయం ఎడారిలో ఒయాసిస్సులా ఉండేనాలో వలపుల వానలు చిలికి చిరునవ్వుల పూలు పూయించే నీకు ఏమిచ్చి రుణం తీర్చుకోను నీలో సగమయితే తప్ప నింగినేల ఉన్నంత కాలం మన ప్రేమ ఉంటుంది ఎందుకంటే వాటిలాగే ఇప్పటికి మనం కూడా కలవలేం కానీ నీకు తెలుసా? నీలా నింగి వాన కురిపిస్తేనే నాలా నేల పులకరిస్తుంది. ఈ జన్మకు ఈ బంధం చాలు

వేగు సుక్కా వోలె

వేగు సుక్కా వోలె అరుదేంచి నావె వేయి జన్మల శాప మే బాపినావె వేలుపట్టుకొని కోవెల్లు తిరిగొచ్చి కావిళ్ళు భాగ్యాల కామితార్ధము తీర్చి కలకాల సుఖము కలిసుండునంటివె కలలాగ జరితివే నా... జాబిలమ్మ వి బ్రహ్మానంద చారి

ప్రేమంటే

ప్రేమంటే ఈ సృష్టినే తన కనుసన్నలలో నడిపిస్తున్న దైవ శక్తి ప్రేమంటే నన్ను నన్ను గా ఉండనియ్యని తీయని బాధ ప్రేమంటే ఎప్పుడూ నాతోనే ఉండే నానేస్తం ప్రేమంటే నా బలం , నా బాధ్యత నా జీవితానికి అర్ధం ప్రేమంటే నాలో చిన్ని ఆశను రేకెత్తించి నను తన వశం చేసుకున్న శక్తి ప్రేమంటే నాకు నేనేంటో చూపే అద్దం ప్రేమంటే మానవ మనుగడకి మూలాధారం ప్రేమ మూర్ఖుణ్ణి  మనిషిని చెయ్యాలి కాని మనలోని మానవత్వాన్ని చంపెయ్యకూడదు... ప్రేమను ప్రేమించండి ప్రేమ పేరుతో ఆటలాడకండి...   - ప్రియా  

ఎదురు దెబ్బకి

ఎదురు దెబ్బకి ఏడుస్తావ్ ! నా బ్రతుకు వస్త్రం చూడు ఎన్ని రక్తం మరకలో రక్తం ప్రవహిస్తోంది అన్నం జీర్ణమవుతుంది నువ్వెందుకిలా నిష్క్రియగా ? కొడుకు యూ.ఎస్.లో * నెటిజన్ తండ్రి ఇండియాలో దిక్కులేని సీనియర్ సిటిజన్ Person working or using internet... డా. వై. రామకృష్ణారావు  

నాకోసం

నా కోసం - డా.సి. భవానీదేవి     నాకో మాటివ్వు అక్షరలక్షలతో అమృతాన్ని కురిపిస్తాను నాకో ఓదార్పునివ్వు గుండెని గుడిగా చేస్తాను అనంతంగా ఆరాధిస్తాను నాకో స్నేహన్నివ్వు గాయాల దారంతా మందహసాన్ని పరుస్తాను నాకో చిటికెడు ప్రేమనివ్వు నీకోసం నిట్టుర్పునౌతాను ప్రపంచాన్నెదిరిస్తాను ప్రాణాలైన ఇచ్చేస్తాను నాక్కొంచం విషమివ్వు నీకోసం నిష్క్రమిస్తాను సమాధిలేని జ్ఞాపకన్నౌతాను

కవితాభినందనం పాదాభివందనం

కవితాభినందనం పాదాభివందనం - డా. రాధశ్రీ     కదులుతున్న కవితలా నడుస్తున్న నవతలా చరిస్తున్న చరితలా, మసలే మానవతలా అలరారే శ్రీ సి. నా.రె. రాజ్యసభా సభ్యత్వం పొందినట్లు తెలియగానే పొంగి పొరలె " కవిత్వం " ! అవధి లేని అభిమానపు పూపొదలో  దాగి దాగి మహితోన్నత మహానందం మకరందం త్రాగి త్రాగి మత్తిల్లిన హృదయ భ్రమర ఝుంకారోద్ద్రుతి ఇది ! కృతిలా ఆకృతి దాల్చిన వినయ నమస్కృతి ఇది !!

పూటలో రాలే పూవు కోసం

  పూటలో రాలే పూవు కోసం ఆకులతో ఎంత చాకిరీ చేయిస్తుంది చెట్టు! మబ్బులు తెర తొలగిపోయింది ఇక మొదలు ఆకాశ రూపకం. కిరణం పెట్టింది చక్కిలి గింత కులికి మెరిసింది రత్నకాంత   డా. వై . రామకృష్ణారావు.  

రమ్మనుచు లక్షిని

రమ్మనుచు లక్షిని నారసింహుని బిలిచి గొంతెత్తి పాడి నువు వేడుకొంటివి గదనే పూజలూ వ్రతములు నిష్టతో నువు జేయ ఇష్టముతో దేవతలు రప్పించుకొనిరేమొ కష్టమంతయు నాది పుణ్యమంతయు నీక ? ఏ జన్మ ఋణమె యిది నా..... జాబిలమ్మ వి. బ్రహ్మానంద చారి.  

నాటి చిగురు స్పర్శ

నాటి చిగురు స్పర్శ తీపి  తలపయింది కట్టె అయి ఇంటి తలుపయింది నీడ పడితే నిశ్చలంగానే ఉంది నేనే దిగితే చెదిరిపోయింది చెరువు. కొవ్వొత్తి కన్నీరు కారుస్తోంది హృదయం కరగడమంటే ఇదే.

పాపం! అమ్మ

పాపం! అమ్మ - డా. సి. భవానీదేవి   ఇంతకి నువ్వు ఎవరివి ? కంటేనే అమ్మంటారు ప్రేమను పంచినా అమ్మే ! అద్దె అమ్మగా నన్నుకనిపెట్టిన యంత్రానివి పుట్టకముందే నీకు సంపాదించిపెట్టాను కదా! తల్లి రుణం తీరిందనుకొనా ? ఎక్కడో పెరిగి అక్కడక్కడా తిరుగుతూ ఏ సిగ్నల్ దగ్గర్లో నిస్సహాయంగా చాపిన నీ అరచేతిలోకి కారు అద్దం దించి కాసొకదాన్ని విసిరేస్తానేమో అని భయం గా ఉందమ్మా వెలిసిపోయిన నీ ఇంటి గోడపై ఫోటోగా మిగిలిన నా బోసి నవుల్ని చూసి నీ కళ్ళ తడి మసకేసినప్పుడైనా నీది కాకుండా పోయిన నీ బిడ్డకోసం కన్న పేగు కదలకుండా ఉంటుందా ?

చుక్క పొద్దున్న లేచి

చుక్క పొద్దున్న లేచి - వి. బ్రహ్మానందచారి   చుక్క పొద్దున్న లేచి మాలక్ష్మీకీ మొక్కి తులసి పూజలు చేసి చుట్టూర తిరుగుతూ కలుములా రాణివై కదిలింతనె చాలు కనకవర్షము కురిసె కలతలన్నీ తీరు చిరునగవు దివ్వెలూ బ్రతుకంత వెలిగించి కరిగిపోతివే నీవు నా.... జాబిలమ్మ

భయం.. భయం

భయం.. భయం - డా. సి. భవానీదేవి అప్పుడింక సూర్యుణ్ణి చూస్తే కమలానికి భయం చంద్రుడికి దూరంగా  నక్షత్రాలు పారిపోవాల్సిందే ! సూర్యోదయానికి పక్షుల జడుపు తుమ్మెదల్ని చూసి పూవులు విప్పారావు తెమ్మరలంటే చిగురుటాకుల గజగజ వానకి భూమి,నీళ్ళంటే చేపలు ఆమెకి అతడు, అంతా భయం భయం కూరగాయల భయం ముసుగేసుకున్నై రోబో కంప్యూటర్ల ఆలింగనాలు రక్తం చిందించే ప్రేమలు ఎయిడ్స్,ఆల్ట్రా,మాలిన్యాలు,కాలుష్యాలు ప్రాణాంతక వైరస్లు, ఇన్పెక్షన్లు మనిషిని చూస్తే తోటి మనిషికి భయం ఇంకా ఈ నేలని చూసి ఆకాశం కూడా భయపడి పారిపోతుందేమో !

జగన్మాత

జగన్మాత డా.రాధశ్రీ   కైలాస శిఖరాన కొలువున్న తల్లీ శంకరుని  హృదయాన నెలవున్న దేవి కరుణించి కాపాడుమో జగజ్జననీ రక్షించి మము బ్రోవుమో జగన్మాతా ! నీ దివ్య శుభ చరణ మంజీర నాదాలు భక్త హృదయాలలో కలిగించు మోదాలు సుందరము సుమధురము నీ  దయాదృష్టి కురిపించు ప్రతి ఇంట సంపదల వృష్టి నగపతి పుత్రివై, పశుపతికి పత్నివై గణపతికి జననివై, అల జగజ్జననివై మహిశాసురని గూల్చి, మహికి మోదము గూర్చి శాంతి నొసగిన తల్లి శివకంకరీ! రోషాలు ద్వేషాలు రగిలేటి యుగమందు నేరాలు ఘోరాలు చలరేగు జగమందు ఘోర నరకాసుల,క్రూర మహిషాసురుల దృష్ట దుశ్మాసనుల దునుమాడవమ్మ నీ పాదపద్మాల నెరనమ్మి యున్నటి హృదయ వేదిక మీద నిను నిలుపుకున్నట్టి నిజ భక్త వర్యులను రక్షించవమ్మ ఆయురారోగ్యాలు అందించి రమ్మా!!

కన్నీటి పరిమళంతో

కన్నీటి పరిమళంతో -డా.వై.రామకృష్ణారావు.     కన్నీటి పరిమళంతో పోల్చుకున్నా అవును ఈ రుమాలు ఆమెదే. భావోదయమైందా ? కవిత్వం కొమ్మపైకి అక్షరాలు పక్షుల్లా ఎగిరొస్తాయి. కుండలో కంకర రాళ్లేసిందికాకి నీళ్ళ కోసం. కుండ చిల్లి పడింది.

తెల్ల వారంగానె

తెల్ల వారంగానె - బ్రహానంద చారి తెల్ల వారంగానె పల్లె లేవంగానే నీ కండ్ల సుడాల నీలాల మురిపాలు కొంగు నడుముకు జుట్టి పొంగునదిమీ పట్టి తొలి సందె పొద్దుల్లొ సెలిసోకు సుడాల పగలంతా నీ కులుకె కండ్లల్లొ మెదలంగ పొలికేక బెడితినె నా.... జాబిలమ్మ

ఇదేమిటి

ఇదేమిటి - డా.వై. రామకృష్ణారావు ఇదేమిటి ముల్లులా మాట్లాడుతాడు గత జన్మలో తుమ్మ చెట్టేమో ! మోయలేని బరువుతో కుంగిపోతున్నాడు గుండె నిండా ద్వేషమేగా మరి. అప్పుడు ముఖం చేటంత ఇప్పుడేమో చాటుకు ప్రేమకు దిష్టి తగిలిందా ?

అవన్నీ వొట్టి జ్ఞాపకాలే

అవన్నీ వొట్టి జ్ఞాపకాలే - డా.సి. భవానీదేవి. అవన్నీ వొట్టి జ్ఞాపకాలే ! పుట్టిన ఇల్లు, చదివిన స్కూలు ఆడుకున్న స్నేహితులు,ఊగిన ఊడలు పూలిచ్చిన చెట్లు,పళ్ళు ఇచ్చిన వృక్షాలు అన్నీ ఫోటోల్లాంటి జ్ఞాపకాలే ! బాల్యన్ని దోచుకున్న మావూరు ఇప్పుడు కూలిన ఇల్లయ్యింది మారిన స్కూలయ్యింది మోడైన చెట్టయింది బీడయిన నేలయ్యింది శివుడులేని శిధిలాలయమయింది పక్షులు ఎగిరిపోయినప్పుడు దుఖంతో తలొంచి తల్లి వృక్షమయింది అయినా పచ్చని స్మృతి మైదానంలో పదిలమైన జ్ఞాపకాల పుటలు అమ్మ బొమ్మంత సజీవంగా ఆవిరి కాని స్వప్నంలా కడదాకా నాతోనే !

లేత చిగురుల తీరు

లేత చిగురుల తీరు - వి. బ్రహ్మానంద చారి లేత చిగురుల తీరు నాతి తనువూ ఎదిగి పూత పూసిన తీరు బాల కన్యగ మారె కొంగ్రొత్త అందాల పొంగులూ ఎదగంగ ఎద బరువుతో నడుము నాట్యమె ఆడంగ నవ వధువు తడబాటు నగుమోము తిలకించి నవనీతమాయె మది నా.... జాబిలమ్మ