ఆంధ్రప్రదేశ్‌లో స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పించాలన్న రాష్ట్ర ప్రభుత్వ ప్రయత్నానికి సుప్రీంకోర్టులో ఎదురుదెబ్బ తగిలింది. ఈ రిజర్వేషన్లకు సంబంధించిన ప్రభుత్వ ఉత్తర్వులను రద్దు చేస్తూ హైకోర్టు ఇచ్చిన తీర్పును సవాల్‌ చేస్తూ రాష్ట్ర ప్రభుత్వం దాఖలు చేసిన స్పెషల్‌ లీవ్‌ పిటిషన్‌ను సుప్రీంకోర్టు కొట్టివేసింది. 

స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పిస్తూ రాష్ట్ర ప్రభుత్వం 2026 ఆగస్టులో ఉత్తర్వులు జారీ చేసింది. అయితే ఎస్సీ, ఎస్టీ, బీసీ వర్గాలకు కలిపి అమలయ్యే రిజర్వేషన్లు 50 శాతం పరిమితిని మించుతున్నాయనే అభ్యంతరాలు వ్యక్తమయ్యాయి. ప్రభుత్వ ఉత్తర్వులను సవాల్‌ చేస్తూ దాఖలపై  పిటిషన్లపై  విచారణ చేపట్టిన ఆంధ్రప్రదేశ్ హైకోర్టు ఈ నెల 1న తీర్పు వెలువరిస్తూ, 50 శాతానికి మించిన రిజర్వేషన్లను అనుమతించలేమని స్పష్టం చేసింది. 

హైకోర్టు తీర్పుతో బీసీ రిజర్వేషన్ల అమలుకు ఆటంకం ఏర్పడటంతో ఏపీ ప్రభుత్వం సుప్రీంకోర్టును ఆశ్రయించింది. బీసీలకు రిజర్వేషన్లు నిర్ణయించేందుకు సమగ్ర కుటుంబ సర్వే నిర్వహించామని, జనాభా వివరాలతో పాటు ఇతర సమాచారాన్ని సేకరించామని ప్రభుత్వం తన వాదనల్లో పేర్కొంది. ఈ తాజా సమాచారాన్ని పరిగణనలోకి తీసుకోకుండా హైకోర్టు నిర్ణయం తీసుకుందని ప్రభుత్వం అభ్యంతరం వ్యక్తం చేసింది. 

బీసీ రిజర్వేషన్ల శాతాన్ని నిర్ణయించేందుకు సమగ్ర కుటుంబ సర్వే వివరాలు సరిపోతాయా అనే అంశం ఈ కేసులో కీలకంగా మారింది. రిజర్వేషన్లను 50 శాతానికి మించి నిర్ణయించాలంటే సుప్రీంకోర్టు గతంలో నిర్దేశించిన ప్రమాణాలకు అనుగుణంగా సమగ్ర, సమకాలీన గణాంక ఆధారాలు ఉండాలని  కోర్టు అభిప్రాయపడింది. కేవలం జనాభా వివరాల ఆధారంగా అదనపు రిజర్వేషన్లను సమర్థించలేమని పేర్కొంది.  

సుప్రీంకోర్టు ఏపీ సర్కార్ పిటిషన్‌ను కొట్టివేయడంతో స్థానిక ఎన్నికలలో బీసీలకు  34 శాతం బీసీ రిజర్వేషన్ల అమలుపై  తక్షణ ఊరట లభించలేదు. అయితే ఈ పరిణామాన్ని బీసీలకు రిజర్వేషన్లు కల్పించే అవకాశాలన్నీ పూర్తిగా ముగిసినట్లుగా భావించకూడదు. చట్టపరమైన ప్రమాణాలకు అనుగుణంగా అవసరమైన గణాంకాలను సేకరించి, రిజర్వేషన్ల శాతాన్ని పునఃపరిశీలించే అవకాశం రాష్ట్రానికి ఉందని  కోర్టు  పేర్కొంది. 

[Supreme Court rejects Ap Government Plea, AP BC Reservations, Supreme Court Verdict, Chandrababu Government, Local Body Elections,Telugu Court]