సైనైడ్ ప్రయోగం గుట్టురట్టు.. పోలీసుల విచారణలో సాధిక్ ఖాన్ ఏం చెప్పాడు..?

ఆంధ్రప్రదేశ్‌లోని కాకినాడలో సంచలనం సృష్టించిన పంచాయతీరాజ్ ఏఈ టి. నూకరాజు కుటుంబం ఆత్మహత్య ఆయన అల్లుడు జగదీశ్వరరెడ్డి హత్య కేసుకు సంబంధించి విస్తుపోయే నిజాలు వెలుగులోకి వచ్చాయి. ఈ కేసులో ప్రధాన నిందితుడైన సాధిక్‌ఖాన్‌ను సర్పవరం పోలీసులు కోర్టు అనుమతితో కస్టడీకి తీసుకుని ముమ్మరంగా విచారించగా అనేక షాకింగ్ విషయాలను అంగీకరించాడు. కేవలం రూ. 25 కోట్ల భారీ ఆస్తిని సొంతం చేసుకునే దురాశతోనే తాను ఈ ఘాతుకానికి పాల్పడినట్లు సాధిక్ పోలీసుల ఎదుట స్పష్టంగా ఒప్పుకున్నాడు.  

మొదట తొలి రెండు రోజులు పోలీసులను తప్పుదోవ పట్టించేందుకు ప్రయత్నించినప్పటికీ, పోలీసులు సేకరించిన పక్కా సాంకేతిక ఆధారాలు మరియు సైనైడ్ విక్రయించిన వ్యక్తుల సాక్ష్యాలను ఎదురుగా పెట్టడంతో సాధిక్ నోరు విప్పక తప్పలేదు. జగదీశ్వరరెడ్డిని అంతం చేయడానికి తాను పన్నిన ప్లాన్‌ను పూసగుచ్చినట్లు వివరించాడు. మొదట ఒకసారి కొబ్బరి నీళ్లలో విష పదార్థాన్ని కలిపి జగదీశ్వరరెడ్డికి ఇచ్చినట్లు తెలిపాడు. అంతేకాకుండా, కాకినాడ ఆసుపత్రిలో చికిత్స పొందుతున్న సమయంలో కూడా మూడు, నాలుగు సార్లు విషం ప్రయోగించినట్లు వెల్లడించాడు.  

అయితే ఆ తర్వాత జగదీశ్వరరెడ్డి హైదరాబాద్‌లోని ఆసుపత్రిలో మెరుగైన చికిత్స పొంది కొంతవరకు కోలుకుని ఇంటికి తిరిగి వచ్చాడు. అయినా సరే సాధిక్ తన పగను వదలలేదని, మళ్లీ సైనైడ్‌ను పంపించగా... దానిని వాడుకున్న మరుసటి రోజే జగదీశ్వరరెడ్డి ప్రాణాలు కోల్పోయాడని పోలీసులు గుర్తించారు. జగదీశ్వరరెడ్డి భార్య సౌజన్యను వివాహం చేసుకుని, తద్వారా ఏఈ నూకరాజుకు చెందిన సుమారు రూ. 25 కోట్ల విలువైన ఆస్తులన్నింటినీ తన పేరు మీదకు మార్చుకోవాలనే దురాలోచనతోనే ఈ హత్యకు పథకం పన్నినట్లు విచారణలో తేలింది.  

అయితే నూకరాజు ఆస్తిని తన మనవడితో పాటు కుటుంబంలో వేరొకరి పేరున రాస్తానని చెప్పడంతో వివాదం తలెత్తిందని, సాధిక్ వారిని తీవ్రంగా బెదిరించాడని పోలీసులు తెలిపారు. కానీ తన వేధింపుల కారణంగా ఆ కుటుంబం మొత్తం గోదావరిలో దూకి ఆత్మహత్య చేసుకునే అంత తీవ్ర నిర్ణయం తీసుకుంటుందని మాత్రం తాను ఊహించలేదని నిందితుడు పేర్కొన్నాడు. ప్రస్తుతం ఈ కేసులో హత్యకు ఉపయోగించిన విష పదార్థాల నమూనాలను పోలీసులు సీజ్ చేయడంతో పాటు, దర్యాప్తును మరింత వేగవంతం చేసి అన్ని కోణాల్లోనూ విచారణ జరుపుతున్నారు.  

 [ Sadiq Khan confession, Kakinada AE Nookaraju case, Jagadeeshwara Reddy murder, Kakinada cyanide poisoning, Rs 25 crore property dispute, AP crime news, CM Chandrababu, Naralokesh, Home minister anitha ]