సినీ పరిశ్రమలో తీవ్ర విషాదాన్నిఘటన చోటు చేసుకుంది.  . ప్రముఖ  నిర్మాత, సూపర్ గుడ్ ఫిలిమ్స్ అధినేత  ఆర్బీ చౌదరి మంగళవారం (మే 5)   రోడ్డు ప్రమాదంలో దుర్మరణం పాలయ్యారు. ఆయన వయస్సు 81 సంవత్సరాలు.  దశాబ్దాలుగా దక్షిణ భారత సినీ రంగానికి అపార సేవలు అందించిన ఈ దిగ్గజ నిర్మాత అకస్మాత్తుగా మృతి చెందడం సినీ ప్రపంచాన్ని శోకసంద్రంలో ముంచేసింది.

రాజస్థాన్ లోని   పర్యాటక నగరంఉదయ్ పూర్  సమీపంలో ఈ ప్రమాదం జరిగింది. ఆర్బీ చౌదరి  ప్రయాణిస్తున్న కారు అదుపు తప్పడంతో ఈ ప్రమాదం జరిగినట్లు  ప్రాథమిక సమాచారం. ప్రమాద తీవ్రత ఎక్కువగా ఉండటంతో ఆయన అక్కడికక్కడే ప్రాణాలు కోల్పోయారు. కారులో ప్రయాణిస్తున్న మరో ఇద్దరు తీవ్రంగా గాయపడ్డారు. 

ఆర్.బి. చౌదరి పూర్తి పేరు రతన్‌లాల్ భగత్‌రామ్ చౌదరి. ఆయన స్థాపించిన  సూపర్ గుడ్ ఫిలింస్ సంస్థ దక్షిణ భారత సినీ పరిశ్రమలో అత్యంత విజయవంతమైన నిర్మాణ సంస్థల్లో ఒకటిగా నిలిచింది. తెలుగు, తమిళం, మలయాళం, హిందీ భాషల్లో 90కి పైగా చిత్రాలను నిర్మించి అనేక విజయాలు సాధించారు ఆర్బీ చౌదరి. మంచి కథలు, కుటుంబ విలువలు, భావోద్వేగాలకు ప్రాధాన్యత ఇచ్చే చిత్రాలు నిర్మించడం ఆయన ప్రత్యేకత. కొత్త దర్శకులు, నటులకు అవకాశాలు ఇవ్వడంలో ఆయన ముందుండేవారు. చాలా మంది హీరోలు, దర్శకులు ఆయన బ్యానర్ ద్వారా సినీ రంగంలో గుర్తింపు పొందారు. 

సూర్యవంశం, సుస్వాగతం,రాజు, నువ్వు వస్తావని, నిన్నే ప్రేమిస్తా, గాడ్ ఫాదర్ వంటి విజయవంతమైన సినిమాలను ఆర్బీ చౌదరి అందించారు.  ఆర్.బి. చౌదరికి నలుగురు కుమారులు ఉన్నారు. వారిలో ప్రముఖ తమిళ నటుడు జీవా సినీ రంగంలో మంచి గుర్తింపు పొందారు. కుటుంబ సభ్యులు కూడా సినీ రంగంతో అనుబంధం కొనసాగిస్తూ ఆయన వారసత్వాన్ని ముందుకు తీసుకెళ్తున్నారు. ఆర్.బి. చౌదరి మరణ వార్త తెలిసిన వెంటనే సినీ ప్రముఖులు, అభిమానులు తీవ్ర దిగ్భ్రాంతికి గురయ్యారు. సోషల్ మీడియాలో ఆయనకు నివాళులు అర్పిస్తూ   సంతాపం వ్యక్తం చేశారు.  దశాబ్దాల పాటు నాణ్యమైన సినిమాలు అందించిన నిర్మాతగా ఆయన పేరు చిరస్థాయిగా నిలిచిపోతుంది. ఆయన మరణం సినీ పరిశ్రమకు తీరని లోటుగా తమ సంతాప సందేశాలలో పేర్కొన్నారు.