స్పందించని నాడీ వ్యవస్థ.. ఆరోగ్యం విషమం..!

వరంగల్ జిల్లా మాజీ ఎమ్మెల్యే పెద్ది సుదర్శన్ రెడ్డి (54) తీవ్ర అస్వస్థతకు గురికావడంతో ఆయన ఆరోగ్య పరిస్థితి విషమంగా ఉంది. ప్రస్తుతం ఆయన సికింద్రాబాద్‌లోని యశోద ఆసుపత్రి అడ్వాన్స్‌డ్ క్రిటికల్ కేర్ యూనిట్‌లో వైద్యుల నిరంతర పర్యవేక్షణలో చికిత్స పొందుతున్నారు. ఈ మేరకు ఆయన ఆరోగ్య పరిస్థితిపై యశోద ఆసుపత్రి ఛీఫ్ ఆపరేటింగ్ ఆఫీసర్ డాక్టర్ జి. విజయ్ కుమార్ మంగళవారం హెల్త్ బులెటిన్ విడుదల చేశారు.

45 నిమిషాల పాటు ఆగిన గుండె స్పందన..!

ముందుగా వరంగల్‌లోని రోహిణి ఆసుపత్రిలో చేరిన పెద్ది సుదర్శన్ రెడ్డికి ఊపిరితిత్తుల్లో రక్తం గడ్డకట్టడం (పల్మనరీ ఎంబోలిజం) వల్ల తీవ్ర బీపీ పడిపోయి హార్ట్ ఎటాక్ (హెమోడైనమిక్ కొలాప్స్) వచ్చింది. అక్కడ వైద్యులు దాదాపు 45 నిమిషాల పాటు సీపీఆర్ (CPR), ఏసీఎల్ఎస్ (ACLS) పద్ధతుల్లో అత్యవసర వైద్యం అందించి గుండె స్పందనను పునరుద్ధరించారు. అనంతరం అక్కడ ప్రాథమిక చికిత్స (త్రాంబోలైసిస్) పూర్తి చేసి, మెరుగైన వైద్యం కోసం సికింద్రాబాద్ యశోద ఆసుపత్రికి తరలించారు.

నాడీ వ్యవస్థపై తీవ్ర ప్రభావం..!

యశోద ఆసుపత్రిలో క్రిటికల్ కేర్, పల్మనాలజీ, కార్డియాలజీ, న్యూరాలజీ విభాగాలకు చెందిన నిపుణుల బృందం ఆయనకు వైద్యం అందిస్తోంది. ప్రస్తుతం ఆయనకు వెంటిలేటర్‌పై స్వల్ప మద్దతుతో శ్వాసక్రియ, బీపీ అందుబాటులో ఉన్నప్పటికీ, 45 నిమిషాల పాటు గుండె ఆగిపోవడం వల్ల నాడీ వ్యవస్థ తీవ్రంగా దెబ్బతిన్నట్లు వైద్యులు తెలిపారు. ఈఈజీ (EEG), ఎంఆర్‌ఐ (MRI), టీసీడీ (TCD) పరీక్షల్లో మెదడుకు ఆక్సిజన్ అందకపోవడం వల్ల కలిగే నష్టం (Anoxic Damage) జరిగినట్లు గుర్తించారు.

శబ్దాలకు, స్పర్శకు ఆయన ఎలాంటి ప్రతిస్పందన ఇవ్వడం లేదని వైద్యులు పేర్కొన్నారు. జాతీయ, అంతర్జాతీయ వైద్య ప్రమాణాల ప్రకారం బుధవారం (రేపు) 72 గంటల న్యూరో అసెస్‌మెంట్ నిర్వహించి మెదడు పనితీరును మరోసారి అంచనా వేయనున్నట్లు ఆసుపత్రి వర్గాలు వెల్లడించాయి. ఆయన ఆరోగ్య పరిస్థితిని కుటుంబ సభ్యులకు ఎప్పటికప్పుడు తెలియజేస్తున్నామని ఆసుపత్రి యాజమాన్యం స్పష్టం చేసింది.

Peddi Sudarshan Reddy Health Bulletin released, Health Bulletin Release, Yashoda Hospital, Treatment in Advanced Critical Care, KCR, KTR, BRS Party