మహబూబ్ నగర్: మహబూబ్ నగర్ జిల్లా కొల్లాపూర్ అసెంబ్లీ నియోజకవర్గంలో సిపిఎం అభ్యర్ధిగా పోటీచేస్తున్న ఎండి జబ్బార్ ముమ్మరంగా ప్రచారం చేస్తూ తన బలాన్ని పుంజుకుంటున్నారు. జబ్బార్ ఈ నియోజకవర్గంలో  గెలిచే అవకాశాలు ఏమాత్రం లేకపోయినప్పటికీ ఆయనకు ఓట్ల సంఖ్య పెరిగేకొద్ది ప్రధాన రాజకీయ పార్టీల్లో ఎవరో ఒకరికి గట్టి దెబ్బ తగులుతుందని రాజకీయ పరిశీలకులు అంచనా వేస్తున్నారు. గత 30 ఏళ్ళుగా ఈ ప్రాంతంలో సిపిఎం నాయకులుగా ఉన్న జబ్బార్ ఈ ఎన్నికల్లో సుమారు 10వేల ఓట్లు తెచ్చుకునే అవకాశం ఉన్నట్లు అంచనా వేస్తున్నారు. ఆయన ఇంటింటికీ తిరుగుతూ అన్ని ప్రధాన పార్టీల విధానాలను తూర్పారపడుతున్నారు. ఇప్పటిదాకా గెలిచిన అభ్యర్ధులందరూ ఈ ప్రాంతం బాగుకోసం కాకుండా స్వప్రయోజనాల కోసమే పాటుపడ్డారని, తాను గెలిస్తే ప్రజలకోసమే ప్రతిక్షణం కేటాయిస్తానని హామీ ఇస్తున్నారు. తెలంగాణా పేరుతో అన్ని రాజకేయ పార్టీలు ఈ ప్రాంత అభివృద్ధితో చెలగాటాలాడుతున్నాయని ఆయన విమర్శిస్తున్నారు. నీతి, నిజాయితీ గల పార్టీలు నేడు కరువయ్యాయని, ప్రజా సమస్యలను అసెంబ్లీలో ప్రస్తావించే నాధుడే కనిపించడంలేదని ఆయన ఓటర్లకు వివరిస్తున్నారు. అందుకే తనకు అవకాశం ఇస్తే ప్రజల సమస్యలకను పరిష్కరించడానికి అసెంబ్లీ వేదిక చేసుకుని సంక్షేమం ఫలాలను అందరికీ దక్కేలా చూస్తామని ఆయన హామీ ఇస్తున్నారు. గ్రామీణ ప్రాంతాల్లో ఆయన చెబుతున్న మాటలను ప్రజలు ఆసక్తిగా వింటున్నారు. కొన్నిచోట్ల ఇప్పటిదాకా ఎందరికో ఓట్లు వేశాం, ఈసారి మీకే ఓటు వేస్తాం అని అంటుండటంతో ఇక్కడ సిపిఎం అభ్యర్ధికి కూడా కీలకంగా మారే వాతావరణం కనిపిస్తోంది.